1-2. Vakhala wiira nlelo khamuniphwanelela wiira mpatisiwe, xeeni muhinreerela anyu okhulumuwa? (Nwehe efootu ya vakaapani.)

 AKHALA WIIRA munniphavela opatisiwa, ninnoottottopelani, maana eyo etthu yooreera. Masi niireke muhiilokiherya wiira mpatisiwe? Akhala wiira muhiilokiherya ni axitokweene ahoona wiira munniphwanelela, munoonela sai opatisiwa muthukumano muulupale onirwa? Nto mukupaliki wiira mwaha woomurumeela Yehova munookhalana okumi woohakalaliha.

² Munrowa opaka exeeni vakhala wiira axitokweene ahooleelani wiira muhaana opaka marukunuxo muhinatthi opatisiwa aahiiso mmansinyu muhoona eyo? Eyo yiiraneya muhikhulumuwe. Maana nyuwo munoowerya opaka marukunuxo mpakha ophwanelela opatisiwa, voohicikha iyaakha sanyu.

3. Etthu xeeni mukhulupale a ekuvernu ya wEthiyopia aamukonhe awe Filipe, nto nikoho xeeni ninkhumelela? (Miteko 8:36, 38.)

³ Musome Miteko 8:36, 38. Mukhulupale a ekuvernu ya wEthiyopia, aahimukoha Filipe namalaleya wiira: “Kiireke yookhala etthu enikikhoottiherya opatisiwa?” Mukhulupale ole a ekuvernu ya wEthiyopia aaniphavela opatisiwa. Masi ninnikhumelela nikoho nla: Niireke aahiilokiherya?

4. Mulopwana ole a wEthiyopia, exeeni aapanke awe enooniherya wiira aaniphavela wiixutta itthu sinceene?

⁴ Mukhulupale a wEthiyopia ʻaahirowa oYerusalemu wiira amukokhorela Mulukuʼ. (Mit. 8:27) Eyo enooniherya wiira, owo aheemererya etiini ya eyuda. Okhala wiira aanisoma soolempwa sa eheeberi, owo aahiixutta itthu sinceene voohimya sa Yehova. Masi-tho owo aaniphavela wiixutta itthu sinceene. Nto okathi Filipe amphwanye awe mulopwana ole mustaraatani, owo iira osomaka eliivuru ya profeta Yesaya. (Mit. 8:28) Tthiri eliivuru ele aasoma awe saari iprofesia soovila wiiwexexa. Nto ohiya paahi ophavela wiixutta ikeekhai soopacerya sa mbiibiliyani, vannooneya  wiira mulopwana ole aaniphavela wiixutta itthu sinceene.

5. Mukhulupale a wEthiyopia aavarihenle sai muteko itthu iixutta awe?

⁵ Mulopwana ole ari mukhulupale a ekuvernu ya pwiyamwene Kandasi a wEthiyopia, nave-tho “aasuka muhakhu wa pwiyamwene owo”. (Mit. 8:27) Nto vannooneya wiira mulopwana owo waanimuthowa okathi okhala wiira khaareerane miritti. Hata vari siiso, owo aaniivaha okathi wiira omukokhorele Yehova. Ohiya paahi wiixutta ikeekhai iyo, owo aaniphavela ovarihela muteko itthu iixutta awe. Nto eyo, ti etthu yaamwiirinhe okhuma wEthiyopia orowaka oYerusalemu wiira amukokhorele Muluku mutemplo. Tthiri mukwaha ole waari woorakama ni aahirumeela musurukhu munceene, masi hata vari siiso owo aahipaka sootheene aawerya awe wiira amukokhorele Yehova.

6-7. Mulopwana a wEthiyopia aalipinhe sai omphenta wawe Yehova?

⁶ Filipe aahimwiixuttiha mulopwana ole ikeekhai sa niinaano sa mbiibiliyani, ohela muhina ti pani aari Mesiya. (Mit. 8:34, 35) Mulopwana ole aahihakalala vanceene nuumala osuwela mukuttho wa Yesu ni ele yaataphulela aya wa yena. Nto exeeni mulopwana ole aapanke awe nuumala wiixutta itthu iyo? Mwaha wookhala mutthu oottittimihiwa ni ayuda, owo anwerya oheemererya opaka marukunuxo. Masi khahiyo yeeyo yiiraneyale. Maana omphenta wawe Yehova ni Yesu waahincerereya. Eyo yaahimwiiriha opaka marukunuxo maalupale, othanlaka opatisiwa ni okhala mutthareli a Yesu Kristu. Nto, Filipe aahoona wiira mulopwana ole aahiilokiherya wiira opatisiwe, nto owo aahimpatisa.

⁷ Nave nyuwo-tho munoowerya wiilokiherya wiira mpatisiwe mmutakihaka mulopwana a wEthiyopia. Nuumala-vo, nyuwo pooti wiikohaka so: “Exeeni enkikhoottiherya opatisiwa?” Vano nrowe niwehe itthu mulopwana ole a wEthiyopia aapanke awe, seiyo munireerela anyu opaka. Yoopacerya, ohihiya wiixutta, yanenli, ovarihela muteko itthu muniixutta anyu ni yaneeraru, wuncererya omphenta wanyu Yehova.

8. Yohani 17:3, onniruma opaka exeeni?

⁸ Mmusome Yohani 17:3. Niireke moolumo ari yoolepa ela tawiirinheni opacerya omusoma Biibiliya? Eyo ti etthu ewiiranenle anamunceene a hiyo. Masi niireke moolumo ala annintumererya-tho ohihiya wiixutta? Aayo annintumererya. Nave nihaana ohihiya ʻomusuwela oratteene . . . Muluku mmosaru eekeekhaiʼ. (Mus. 3:11) Maana wiixutta wahu voohimya sa Yehova khonimala. Nto vaavo nintepa ahu wiixutta voohimya sa Yehova ninnitepa omusuwela ni omwaattamela. — Esal. 73:28.

9. Nihaana opaka exeeni nuumala wiixutta ikeekhai soopacerya sa mbiibiliyani?

⁹ Ekeekhai wiira okathi naapacenrya ahu  omusoma Biibiliya, niixuttihiwe paahi ikeekhai soopacerya sa mbiibiliyani. Epaphelo aalepenle awe aheeberi, murummwa Paulo aahiitthana ikeekhai iyo soopacerya okhala “itthu soopacerya sa nuulumo noowaarya na Muluku”. Paulo khaaphavela ohimya wiira “soowiixuttiha soopacerya” khisaarina efaita, masi sinoonikhaliherya, ntoko siisaale mwaana onaamwa awe nipele wiira innuwe. (aHeeb. 5:12; 6:1) Eyo ti etthu yaamwiirinhe murummwa Paulo waatumererya makristau ale wiira ahihiye wuncererya osuwela waya ikeekhai sa mbiibiliyani. Niireke vannoosivelani wiixutta ikeekhai soovila wiiwexexa sa mbiibiliyani? Niireke munnirowa vahoolo mwiixuttaka ikeekhai sikina voohimya sa Yehova ni yoolakela awe?

10. Exeeni eniwiiriha anamunceene ohaasivelaka osoma?

¹⁰ Anamunceene a hiyo, khonaasivela osoma. Ankhi nyuwo, niireke okathi mweetta anyu oxikola mwaahiixutta osoma saana? Aahiiso wanoovilani ni mpakha-va munoona wiira khamunwerya osoma saana? Vakhala wiira eyo yowiiraneelani muhikhulumuwe, maana eyo ti etthu ewiiranenle anamunceene. Yehova onimookhaliheryani. Okhala wiira owo toohittheka ni prusoore oolokexa.

11. Yehova onooniherya sai wiira “mwixuttihi” ahu Muulupale?

¹¹ Yehova onniihimya okhala “mwixuttihi” ahu Muulupale. (Yes. 30:20, 21) Yehova prusoore oopixa murima, ooreera murima ni onnaasuwela saana anaxikola awe. Nave owo onniweha mikhalelo sooloka sa anaxikola awe. (Esal. 130:3) Yehova khonlipelela wiira nnoovaraka itthu nihinwerya ahu. Maana oonivaha etthu ya efaita yuulupale, eyo piiyo, ottoopare aahiiso oramattha. (Esal. 139:14) Okhala wene hiyo apinaatamu onisivela wiixutta itthu isya. Mpattuxa ahu, oniphavela wiira nisiveliweke wiixutta itthu sa niinaano mahiku ootheene. Nto ola okathi ninreerela ahu ʻophavelaka vanceeneʼ ikeekhai sa mbiibiliyani. (1 Ped. 2:2) Mukhalaneke soolukama munwerya anyu waakhwaniherya ni mmusomeke Biibiliya khula nihiku. (Yox. 1:8) Mukhaliheriwaka ni Yehova, munoowerya osiveliwa omusoma Biibiliya ni iliivuru sinimutthokiherya Biibiliya ni wuupuwelela ele muniixutta anyu.

12. Xeeni ninreerela ahu osoma ni otokosa okumi ni muteko woolaleerya wa Yesu?

¹² Khula nihiku, nihaana ovirihaka okathi wiira nuupuwelele okumi ni muteko woolaleerya wa Yesu. Naaphavelaka okhala atthareli a Yesu, nihaana omurumeelaka Yehova mwa enamuna oniphavela awe. Nto nihaana omutakihaka Yesu hata okathi yoole wa mixankiho. (1 Ped. 2:21) Yesu aahaaleela atthareli awe wiira yaamukhalanaka mixankiho. (Luka 14:27, 28) Hata vari siiso, Yesu aahaaleela awiixutti awe wiira yanwerya oxintta mixankiho iyo ntoko owo aaxinttale awe. (Yoh. 16:33) Musomeke ni mutokoseke moota okumi wa Yesu waari aya, nuumala-vo, mukhalaneke yoolakela yoomutakiha mookumini mwanyu khula nihiku.

13. Exeeni enreerela ahu onvekelaka Yehova, ni mwaha wa xeeni?

¹³ Khivamphiyerya mutthu okhalana osuwela paahi masi nihaana-tho okhalana mikhalelo ntoko waamini ni ophenta. Mikhalelo iyo sinoonikhaliherya wiixutta itthu sikina voohimya sa Yehova. (1 aKor. 8:1-3) Vaavo muniixutta anyu voohimya sa Yehova, munvekeleke wiira incererye waamini wanyu. (Luka 17:5) Moohaanyiherya Yehova onnaakhula mavekelo siiso. Waamini onoonikhaliherya weettela itthu siniixutta ahu voohimya sa Yehova. — Yak. 2:26.

14. Moota xeeni murummwa Pedru oonihenrya awe efaita erina aya ovarihela muteko ele nniixutta ahu? (Nwehe eteseenyo.)

¹⁴ Orumeelaka ntakiheryo na Nowe, murummwa Pedru onninooniherya wiira vannireerela ovarihela muteko ele nniixutta ahu. Yehova aahimuleela Nowe wiira ammuruuha mutaaseke, epula yeeyo yaarowa waapwetexa atthu ootakhala murima a okathi ole. Nowe ni emusi awe,  khiyaarowa woopowa paahi mwaha woosuwela wiira Yehova aamuruuha epula ya mutaaseke. Ninnisuwela eyo mwaha wa etthu aapanke awe ehinatthi epula ya mutaaseke. Olavulaka sa okathi owo murummwa Pedru aahimmye so: “Okathi aawehererya awe . . . etekiwaka ekalawa”. (1 Ped. 3:20) Eyo enooniherya wiira Nowe vamosa ni emusi awe yaahiiwelela ele Yehova aarumme awe. (aHeeb. 11:7) Olikanyihaka ele Nowe aapanke awe ni opatiso, Pedru aahimmye so: “Etthu enlikana ni ela, ti opatiso, yoowo oniwoopolani vano”. (1 Ped. 3:21) Hiyo pooti olikanyiha wiimananiha munipaka anyu wiira mphwanelele opatisiwa ni wiimananiha Nowe ni emusi awe yaapanke aya wiira eteke ekalawa. Muhaana opaka exeeni wiira mphwanelele opatisiwa?

15. Ninrowa wooniherya sai wiira noottharuwa ni murima ahu wootheene?

¹⁵ Etthu yoopacerya ninreerela ahu opaka wiira niphwanelele opatisiwa, ori ohiya opaka itthu sihimmusivela Yehova. (Mit. 2:37, 38) Nto nnoopaka marukunuxo ootheene anireerela vakhala wiira nnoottharuwa. Niireke moottharuwa opaka itthu sihimmusivela Yehova, ntoko orupihana woohiloka, olya mirette soohapala, aahiiso olavula moolumo oohiloka? (1 aKor. 6:9, 10; 2 aKor. 7:1; aEef. 4:29) Akhala wiira nyuwo khanwenrye opaka marukunuxo awo, muhikhulumuwe maana munoowerya opaka. Munvekeleke nikhaliheryo ole onoosomihani Biibiliya aahiiso axitokweene a mmulokoni. Vakhala wiira mwa mmiravo munikhala ni anamuyari anyu, mwaavekeleke nikhaliheryo. Maana awo animookhaliheryani ohiya soolema sinookhoottiheryani opatisiwa.

16. Onitaphulela exeeni oluttuweliwa ovara miteko sa Muluku?

¹⁶ Etthu ekina mukhanle anyu oopaka wiira mphwanelele opatisiwa ori oluttuweliwa ovara miteko sa Muluku. Eyo enihela muhina orowela mithukumano sa mmulokoni ni wiirela mpantta. (aHeeb. 10:24, 25) Nuumala okhala namalaleerya oohipatisiwa, muluttuweliweke ni muteko woolaleerya. Nave mwaluttuweliwa ovara muteko owo onoopola ikumi, nyuwo munoohakalalaka. (2 Tim. 4:5) Vakhala wiira mwa mmiravo ni nlelo munikhala ni anamuyari anyu, mwiikoheke so: ‘Kiireke anamuyari aka animakela okuupuxerya wiira kirowe muteko woolaleerya ni omuthukumanoni? Aahiiso kinnipaka itthu iyo anamuyari aka ahiprisanri okuupuxerya?’ Akhala wiira nyuwo munnipaka itthu iyo sootheene muhuupuxeriwe, munnooniherya wiira munnimphenta  Yehova Muluku, munnimwaamini ni munnixukhurela itthu sootheene onoovahaaweni. Nto opaka itthu iyo ʻmunooniherya wiira munniroromeleya wa Mulukuʼ, ni munninvaha etthu ya faita Yehova. (2 Ped. 3:11; aHeeb. 13:15) Akhala wiira nnonvaha itthu Yehova ni murima ahu wootheene, owo onoohakalala. (Mulikanyihe ni 2 aKorinto 9:7.) Nave hiyo ninnihakalala vaavo nninvaha ahu Yehova ele eniwerya ahu.

17-18. Mukhalelo xeeni munreerela anyu okhalana wiira mpatisiwe, ni mwaha wa xeeni? (Miruku 3:3-6.)

¹⁷ Okathi munrowa anyu wiilokiheryaka wiira mpatisiwe, sinimoophwanyaka-ni sooweeha. Nave atthu akina anrowa wootheyakani, woolupatthani aahiiso woonyokhani mwaha wa itthu munikupali anyu. (2 Tim. 3:12) Woonasa wene, yaahikhala yoolema mwaattharunwe anyu, masi vano mutthikela-tho opaka. Aahiiso nyuwo pooti okhulumuwa muupuwelaka wiira khamunkhala-khala mpakaka marukunuxo wiira nwerye opatisiwa. Vakhala wiira itthu iyo sinoowiiraneelani, exeeni enrowa wookhaliheryani ohikhulumuwa? Etthu enrowa wookhaliheryani omphenta wanyu Yehova.

¹⁸ Omphenta wanyu Yehova etthu yootepexa oloka murina anyu. (Musome Miruku 3:3-6.) Omphenta vanceene Yehova, onimookhaliheryani ohihiya omurumeela hata oviraka okathi aahiiso soophwanyakani mixankiho. Nave Biibiliya onihimya wiira Yehova toororomeleya wa ale animurumeela. Eyo entaphulela wiira Yehova khonikhala-khala aanyanyalaka arumeyi awe nnakhala ohiya waaphenta. (Esal. 100:5) Muhiliyale wiira Muluku onipattunxe ailattanihaka mmansawe. (Maph. 1:26) Ninrowa omutakiha sai Yehova?

19. Munrowa wooniherya sai wiira munnixukhurela itthu sootheene Yehova onoovahaaweni? (aGalasia 2:20.)

¹⁹ Etthu enrowa onikhaliherya ohihiya omphenta Yehova ori oxukhuru. (1 aTes. 5:18) Khula nihiku mwiikoheke so: ‘Yehova onooniherya sai wiira onnikiphenta?’ Okathi muninvekela anyu Yehova, mmuxukhureleke mmuleelaka etthu eni oopakenlyaaweni nihiku nno. Okhala wiira Yehova onnoophentani, nto owo onnipaka itthu sinceene wiira oohakalaliheni. Mmutakihaka murummwa Paulo, niireke munniwerya oweha itthu iyo? (Mmusome aGalasia 2:20.) Mwiikoheke so: ‘Kiireke kinniphavela omooniherya Yehova wiira kinnimphenta?’ Tthiri omphenta wanyu Yehova tonrowa wookhaliheryani oxintta sooweha ni ovilela mixankiho. Nave onoowiirihani okhalela nthiti miteko sa Muluku.

20. Ontaphulela exeeni wiivahererya wa Yehova, niireke yoothanla ela yookhalana efaita?

²⁰ Okhala wiira munnimphenta Yehova, nuuvira  okathi munoophavelaka opaka nivekelo na vameekhaaya. Nivekelo nno munrowa omuhimeerya Yehova wiira muniphavela omurumeelaka okumi anyu wootheene, eyo piiyo, wiivahererya wa yena. Nto okhala wiira munrowa wiivahererya wa Yehova, nyuwo munookhalana nlipelelo noohakalaliha na omurumeela yena mahiku ootheene. Muhiliyale wiira, okathi muniivahererya anyu wa Yehova nyuwo munimuleiherya wiira munrowa omurumeelaka okumi anyu wootheene, okhale okathi woohakalaliha aahiiso wa mixankiho. Nave-tho muhiliyale wiira mutthu oniivahererya wa Yehova ekwaha emosa paahi okumi awe wootheene. Tthiri, wiivahererya yoothanla yuulupale munreerela anyu opaka. Masi muhiliyale etthu ela: Yoothanla eyo ya wiivahererya wa Yehova ti yootepa ohakalaliha ovikana soothanla sikina munrowa anyu opaka. (Esal. 50:14) Satana onimookhulumulakani okhala wiira owo oniphavela wiira muhiye omphenta ni omuroromela Yehova. Nto muhimuhiye Satana ooxinttakani! (Yob. 27:5) Akhala wiira omphenta wanyu Yehova onoolipa, munooweryaka omwaattamela ni omurumeela Yehova mahiku ootheene ntoko mwaamuleihenrye anyu.

21. Xeeni ninhimya ahu wiira opatisiwa wanipacerya paahi?

²¹ Nuumala opaka nivekelo mwiivahereryaka wa Yehova mulavule ni axitokweene a muloko anyu wiira mpake etthu ekina ya nenli. Masi muhiliyale wiira opatisiwa khontaphulela wiira moophera itthu sootheene. Maana wanipacerya paahi wa omurumeela Yehova okumi anyu wootheene. Nave nuumala opatisiwa muhihiye olipiha omphenta wanyu Yehova. Munoowerya opaka eyo mukhalanaka soolukama sinrowa wookhaliheryani olipiha omphenta wanyu Yehova khula nihiku. Opaka itthu iyo sinimookhaliheryani wiira mphwanelele opatisiwa. Nihiku munipatisiwa anyu nihiku na vameekhaaya, masi muhiliyale wiira wanipacerya paahi. Nto nnootumereryani wiira omphenta wanyu Yehova vamosa ni Yesu otepeke wunnuwa mahiku ootheene.