1-2. Mareeliho xeeni mutthu oniphwanya awe nuumala opatisiwa?

 TI VOOHAKALALIHA opatisiwa ni wiirela mpantta emusi ya Yehova. Ale apatisiwe, annikupali moolumo a Nasaalimo Davidi, yoowo aahimmye so: “Ooreeriwa ti ole nyuwo mmuthanlale anyu, munampixa vari anyu, wiira okhaleke vate vanyu”. — Esal. 65:4, Piipiliya Emakhuwa.

² Yehova khonimukhanyererya mutthu wiira okhale mpatthani awe. Ntoko niixuntte ahu mwaha ovinre, owo onnaathanla okhala apatthani awe atthu yaale aniphavela okhala mpatthani awe. (Yak. 4:8) Munnithanla okhala mpatthani a Yehova mwa enamuna ya vameekha aya, okathi yoole muniivahererya anyu wa yena ni opatisiwa. Nuumala opatisiwa, mukupaliki wiira Yehova onrowa ‘owiitthelelani mareeliho oowaatta ahinrowa anyu woona woopweha’. — Mal. 3:10, Piipiliya Emakhuwa; Yer. 17:7, 8.

3. Muritti xeeni arina aya ale aniivahererya wa Yehova ni opatisiwa? (Musuweli 5:4, 5)

³ Opatiso, nivalo noopacerya munooniherya anyu wiira muniphavela omurumeelaka Yehova. Nuumala opatisiwa, muhihiye opaka ele muniwerya anyu wiira mummalelihe natiri anyu a omurumeela Yehova, hata waamini wanyu weehereriwaka. (Mmusome Musuweli 5:4, 5.) Ntoko mutthareli a Yesu, nyuwo mookhalana muritti wa ottharaka malakiheryo awe ni ntakiheryo nawe. (Math. 28:19, 20; 1 Ped. 2:21) Mwaha ola, onimookhaliheryani moota woopaka eyo.

MUHIHIYE “OMUTTHARA” YESU HATA SOOPHWANYAKANI MIXANKIHO

4. Mwa enamuna xeeni awiixutti a Yesu anikuxa aya ‘mwiri aya wa nihaaxeryo’? (Luka 9:23)

⁴ Muhuupuweleke wiira nuumala opatisiwa khasinrowa woophwanyakani mixankiho. Yesu aahaatthokiherya oratteene  awiixutti awe wiira yaahaana okuxa ‘mwiri aya wa nihaaxeryo’. Tthiri, awo yaahaana opaka eyo “nihiku ti nihiku”. (Mmusome Luka 9:23.) Niireke Yesu aaphavela ohimya wiira awiixutti awe, saarowa waaphwanyaka mixankiho khula okathi? Nnaari. Owo aaphavela ottittimiherya wiira awiixutti awe, saamwaaphwanyaka mixankiho ohiya paahi mareeliho. Mixankiho sikina saarowa okhala sootepa owereya. — 2 Tim. 3:12.

5. Mareeliho xeeni Yesu aaleihenrye awe ale anihiya itthu sikina wiira emutthareke?

⁵ Woonasa wene, munnilupatthiwa vanceene ni amusi, aahiiso munnileva itthu sinceene wiira muhele nipuro noopacerya Omwene wa Muluku. (Math. 6:33) Akhala wiira eyo enniwiiraneelani, mukupaliki wiira Yehova onniweha wiimananiha wanyu. (aHeeb. 6:10) Tthiri opaka eyo, enooniherya wiira nyuwo munnikupali moolumo a Yesu ani: “Ole ohiyale empa, aahiyale axinnawe, axirokorawe, amamawe, apapawe, anaawe, aahiiso ohiyale imatta mwaha wookhala mwiixutti aka ni mwaha wa ihapari sooreera, okathi ola, onimwaakhela voowaatta, ipa, axinna, axirokora, aximaama, anamwane, imatta, hata olupatthiwaka. Nave olumwenku onirwa, onoophwanya okumi woohimala”. (Mar. 10:29, 30) Nto mareeliho awo ootheene mphwanye anyu toowaatta ovikana itthu sootheene mulenve anyu. — Esal. 37:4.

6. Xeeni ninreerela ahu osyaka, “itthu erutthu ahu siniphavela aya” hata nuumala opatisiwa?

⁶ Hata nuumala opatisiwa, munoopirisariki wiimananiha wiira muxintte “itthu erutthu ahu siniphavela aya”. (1 Yoh. 2:16) Okhala wiira ootheene ahu noorava etampi ya Adamu. Nave pooti wiira ikwaha sikina, munniixoona ntoko murummwa Paulo yoowo aalempe so: “Vamurimani vaka, kinnisiveliwa nlamulo na Muluku. Masi kinnoona nlamulo nikina mweerutthuni mwaka, nenlo ninvirikanya nlamulo na muupuwelo aka. Nlamulo nlo ti etampi eri mweerutthuni mwaka, nave tenikeettiha”. (aRom. 7:22, 23) Ikwaha sikina nyuwo pooti onyoonyiheyaka mwaha wa soovonya sanyu. Omuupuwela natiri mummanenle anyu Yehova, eyo enimookhaliheryani ovilela okathi sinoophwanyaayani mixankiho. Ohimya ekeekhai, natiri mummanenle anyu Yehova, onimookhaliheryani osuwela moota wookhweiherya okumi anyu okathi wa mixankiho. Moota xeeni?

7. Wiivahererya wanyu wa Yehova, onrowa wookhaliheryani sai ohihiya okhala oororomeleya wa yena?

⁷ Okathi muniivahererya anyu wa Yehova, muniikhootta mmansinyu. Nto eyo enitaphulela wiira, munrowa okhoottaka khula etthu Yehova oninyokha awe. (Math. 16:24) Vaavo sinoophwanyaayani mixankiho, khamunrowa oviriha okathi munceene muupuwelelaka etthu yoopaka. Okhala wiira munrowa wiiraka musuwenle ene etthu yoopaka, eyo piiyo, ohihiya omuroromela Yehova. Mwapaka eyo, khamunrowa ohiya omuhakalaliha Yehova. Nave munrowa olikanaka ni Yoobi. Hata okathi yoole samphwanya aya mixankiho, owo aahimmye so: “Mpakha okhwa waka, nkinihiya okhala oororomeleya!” — Yoob. 27:5.

8. Wuupuwelela nivekelo mwaapanke anyu na wiivahererya, ninrowa wookhaliheryani sai ovilela mixankiho?

⁸ Wuupuwelela nivekelo mwaapanke anyu okathi mwiivahererya anyu wa Yehova, ti etthu enrowa wookhaliheryani ovilela mixankiho. Mwa ntakiheryo, niireke mwaamulavula mwa enamuna yoovekana ni mutthu othenle aahiiso otheliwe? Moohaanyiherya nnaari! Okhala wiira mwaahimuleiherya Yehova wiira khimwaarowa opaka etthu siisa. Osyaka ohela miyuupuwelo soohiloka mmuruni, onimookhaliheryani muhoolo oxintta mixankiho iyo. Mwiira siiso, munoosyaka weetta “ephiro y’atthu òtakhala”. — Mir. 4:14, 15.

9. Wuupuwelela nivekelo nanyu na wiivahererya, ninrowa wookhaliheryani sai ohihiya omuhakalaliha Yehova?

 ⁹ Ankhi vakhala wiira mooleiheriwa muteko munrowa anyu waakhelaka musurukhu munceene, masi onrowa owiirihani ocompelaka mithukumano? Moohaanyiherya nyuwo munoosuwela etthu yoopaka. Nto muhinatthi oleiheriwa muteko owo, nyuwo mwaahimuleiherya Yehova wiira khiivo etthu yaarowa owooceelihakani orowela mithukumano sootheene. Tivonto, khimwaarowa weemya muteko owo, muupuwelaka wiira muhoolo mwaamulokiherya waataana wanyu ni Yehova. Wuupuwelela ntakiheryo na Yesu, nnimookhaliheryani vanceene voohimya sa mwaha owo. Okathi wootheene Yesu aahilakela omuhakalaliha Tiithi awe. Nave nimutakihaka Yesu nimphavela omuhakalaliha Tiithi ahu Yehova. — Math. 4:10; Yoh. 8:29.

10. Yehova onrowa wookhaliheryani sai ohihiya ‘omutthara’ Yesu nuumala opatisiwa?

¹⁰ Ohimya ekeekhai, mixankiho sinoophwanyani sinimoovahani eparakha, ya wooniherya wiira munniphavela ohihiya ‘omutthara’ Yesu. Mukupaliki wiira Yehova onimookhaliheryani opaka eyo. Yoolepa ya 1 aKorinto 10:13, enihimya so: “Muluku toororomeleya, ni khonrowa weemererya wookhumelelani etthu muhinwerya anyu ovilela. Ohiya-vo, okathi enookhumelelaayani etthu yooxankiha, owo onoowooniheryani ephiro wira nwerye ovilela”.

NINROWA OWERYA SAI OMUTTHARA YESU?

11. Etthu xeeni nikhanle ahu oopaka wiira nihihiye omutthara Yesu? (Nwehe efootu.)

¹¹ Yesu aanimurumeela Yehova ni murima awe wootheene. Nave khula okathi aaninvekela. (Luka 6:12) Wiira muhihiye omutthara Yesu nuumala opatisiwa, mpakeke khula etthu enrowa owiirihani omwaattamela Yehova. Biibiliya onihimya so: “Masi, hata nironwe ene vahoolo, nitepeke weetta ephiro emosa-ru”. (aFil. 3:16) Nave ikwaha sikina, nyuwo munrowa wiiwaka soowiiraneya sa anna ni arokora yaawo athanlale wuncererya muteko aninvarela aya Yehova.  Woonasa wene, awo aarowela eskola ya anamalaleerya a Omwene aahiiso athamenle mapuro oothowa anamalaleerya. Nto akhala wiira makhalelo anyu anniweemereryani, iya soolukama munireerela anyu okhalana. Arumeyi a Yehova khula okathi annihaavya inamuna sa wuncererya muteko aninvarela aya Yehova. (Mit. 16:9) Masi ankhi vakhala wiira, yookhala enookhoottiheryani ophwanya etthu mwaaphavela anyu? Muhuupuweleke wiira nyuwo khamurina efaita waavikana anna akina. Etthu yooloka ori ohihiya ovilela. (Math. 10:22) Muhiliyale wiira, Yehova onnihakalala ni itthu muniwerya anyu ovara, moovarihana ni makhalelo anyu. Nto eyo ti etthu enrowa wookhaliheryani ohihiya omutthara Yesu, nuumala opatisiwa. — Esal. 26:1.

12-13. Exeeni mukhanle anyu oopaka moona wiira oluttuweliwa wanyu woopacerya ovukuwa? (1 aKorinto 9:16, 17) (Nwehe ekaaxa eni: “ Muhihiye Otthimaka”.)

¹² Exeeni mukhanle anyu oopaka, moona wiira khamunivekela ni murima anyu wootheene, aahiiso muteko woolaleerya khonoosivelani ntoko khalai? Ankhi vakhala wiira khonoosivelani omusoma Biibiliya ntoko mwiira anyu khalai? Akhala wiira eyo enoowiiraneelani nuumala opatisiwa, muhuupuweleke wiira khamurina munepa woowaarya wa Yehova. Ntoko apinaatamu oottheka, ikwaha sikina pooti okhalanaka miyoonelo soohiloka. Moona wiira oluttuweliwa wanyu woovukuwa, muupuweleleke ntakiheryo na murummwa Paulo. Owo aaniimananiha omutakiha Yesu, masi hata vari siiso ikwaha sikina aahikhalana miyoonelo soovirikana. (Mmusome 1 aKorinto 9:16, 17.) Owo ohimmye so: “Hata kipakaka eyo kihiphavelaka, nlelo kinniroromeliwa ni Muluku wira kivare muteko ola”. Eyo enitaphulela wiira, Paulo aaniimananiha opaka ele aawerya awe, wiira ovare muteko woolaleerya moohicikha mixankiho samphwanya.

 ¹³ Moolikanasa ni Paulo, muhipakeke soothanla muttharaka mixankiho sinoophwanyani. Mwiimananiheke opaka itthu sooloka, hata muhipakaka ntoko mwaaphavela anyu. Mwaahihiye opaka itthu sooloka, nuuvira okathi munookhalanaka moonelo wooloka nave mixankiho sanyu pooti ovukuwaka. Olipiha waataana wanyu ni Yehova murowelaka mithukumano, olaleerya, okhalana yoosoma ya Biibiliya ya omwaneene ni ovekela, sinimookhaliheryani ohihiya omutthara Yesu hata nuumala opatisiwa. Ohiya-vo, anna ni arokora yoowehakani mmurumeelaka Yehova moovilela, awo anoolipa. — 1 aTes. 5:11.

“OKATHI WOTHEENE MWIIWEHEKE . . . MWIIVARERYEKE”

14. Itthu xeeni munireerela anyu wiivareryaka khula okathi ni mwaha wa xeeni? (2 aKorinto 13:5)

¹⁴ Etthu ekina enrowa wookhaliheryani nuumala opatisiwa, ori khula okathi wiivareryaka moowiiyeviha. (Mmusome 2 aKorinto 13:5.) Ikwaha sikina, mwiivaheke okathi wiira mwiivarerye akhala wiira munnivekela khula nihiku, munnimusoma Biibiliya, khamunicompela mithukumano ni munnirowela muteko woolaleerya. Mphavelaseke inamuna mukhanle anyu oottottela mureerelo itthu iyo. Mwa ntakiheryo, mwiikoheke so: ‘Kinniwerya waatthokiherya atthu akina soowiixuttiha soopacerya sa mbiibiliyani? Kiireke yookhala etthu kikhanle aka oopaka wiira okisiveleke muteko woolaleerya? Kiireke mavekelo aka tooluluwanyeya, ni annooniherya wiira kinnimuroromela Yehova ni murima aka wootheene? Kiireke nkinicompela mithukumano? Akhala wiira kinnicompela, exeeni kikhanle aka oopaka wiira kihicompeleke ni kiireleke mpantta mithukumano iyo?’

15-16. Yoowiiraneya ya munna Robert ewiixuttinheni exeeni sa oxintta sooweeha?

¹⁵ Nave etthu ekina erina efaita yuulupale, ori osuwela itthu muniwerya anyu opaka ni muhiniwerya anyu. Munna mmosa oniitthaniwa Robert, olavulaka wa ele yaamwiiranenle voohimya sa mwaha ola, ohimmye so: “Okathi kaarina aka iyaakha 20, kaahiphwanya muteko kaavara aka iwoora vakhaani vanihikuni. Nihiku nimosa nuumala muteko, muthiyana kaavarana aka aahikilattula wiira nirowe vamosa owannya awe. Owo aahimmye wiira ‘naarowa okhala mekhihu nave naamutthekula vanceene’. Woopaceryani kaamusyaka-syaka paahi, nuumala-vo kaahikhootta ni kaahimutthokiherya mathowa ene”. Masi etthu yoohakalaliha okhala wiira Robert aahiwerya oxintta yooweeha ele. Nuuvira okathi, vaavo uupuwelela awe etthu yiiraneyale, owo aahoona wiira aanireerela opaka itthu mwa enamuna ekina. Owo onihimya-tho so: “Ohiya omakela osyaka-syaka, miyo kaahaana okhootta moowaakuveya  ntoko iirale awe Yosefe ni mwaara a Potifari. (Maph. 39:7-9) Veekeekhai kaahoona wiira khivaakhweyale oxintta muxankiho ole. Eyo yaahikikhaliherya osuwela wiira kaanipirisari olipiha ompatthani aka ni Yehova”.

¹⁶ Etthu yooloka ori wiivarerya mmansihu ntoko aapanke awe Robert. Hata nuumala oxintta yooweeha eyo, mwiikoheke so: ‘Kiireke kaahipisa okhootta?’ Moona wiira munnireerela opaka marukunuxo, muhiiphukeleke. Moovirikana ni vo, muhakalaleke mwaha woosuwela etthu munireerela anyu opaka moowaakuveya. Munvekeleke Yehova mmuleelaka muxankiho anyu, ni mpakeke itthu sinrowa wookhaliheryani omaleliha yoophavela anyu ya wiiwelela malakiheryo a Yehova. — Esal. 139:23, 24.

17. Yoowiiraneya ya Robert yaatteelinhe sai nsina na Yehova?

¹⁷ Yoowiiraneya ya Robert, enniniixuttiha-tho etthu ekina. Owo ohimmye so: “Nuumala okhootta nlattulo nawe ni oxintta muxankiho ole, muthiyana ole aahimmye so: ‘Vaareera-vo mooxintta yooweeha!’ Nto kaahimukoha etthu aaphavela awe ohimya ni moolumo ale. Muthiyana owo aahikithokiherya wiira mpatthani awe aari Namoona a Yehova, aahimuleela wiira amiravo ootheene ari Anamoona a Yehova, annipaka itthu soohiloka moohisuweliwa vakhala wiira ennaaphwanya yooweeha eyo. Muthiyana ole, iira omulenle ene mpatthani awe wiira kinrowa oweehererya aRobert. Kaahihakalala vanceene nuumala osuwela wiira kaahitteeliha nsina na Yehova”.

18. Exeeni mulakenle anyu oopaka nuumala opatisiwa? (Nwehe ekaaxa eni: “ Myaha Miili Sinrowa Woosivelani Vanceene”.)

¹⁸ Okathi muniivahererya anyu wa Yehova ni opatisiwa, nyuwo munooniherya wiira muniphavela otteeliha nsina nawe, moohicikha mixankiho sinrowa woophwanyani. Mukupaliki wiira Yehova onnisuwela mixankiho ni sooweeha sootheene sinoophwanyani. Nto owo onooreeliha wiimananiha wanyu mwaahihiye-ru ororomeleya. Muhiliyale wiira orumeelaka munepa awe woowaarya, Yehova onimoovahani ikuru munipirisari anyu. (Luka 11:11-13) Mukhaliheriwaka ni Yehova, munoowerya ohihiya omutthara Yesu, hata nuumala opatisiwa.