1-2. a) Exeeni Paulo aalepenle awe makristau a wEefeso, ni mwaha wa xeeni? b) Makoho xeeni ninrowa ahu othokorerya mwaha ola?

 OKATHI Paulo atthukweliwe awe oRoma, aaniphavela waalipiha anna ni arokora. Okhala wiira khaawerya okhuma orowaka waaxukurya, owo aahaalepela ikarta. Emosa wa ikarta iyo, aalempe wEefeso mwaakha wa 60 aahiiso 61 Nuumala Kristu Orwa. — aEef. 1:1; 4:1.

² Woonasa wene mwa iyaakha 10, Paulo aahiimananiha orumeela okathi awe wEefeso, wiira olaleerye ni wiixuttiha ihapari sooreera. (Mit. 19:1, 8-10; 20:20, 21) Paulo aanaaphenta vanceene anna ni arokora ni aaphavela waakhaliherya wiira ahihiye okhala oororomeleya wa Yehova. Masi exeeni yaamwiirinhe waalepela makristau oothanliwa, olavulaka sa epiphi ni muthuko? Makristau ootheene aniixutta exeeni ni ekarta eyo Paulo aalempe awe? Mwaha ola, nnoothokorerya waakhuliwa wa makoho awo.

OKHUMA MWEEPIPHINI NROWAKA MMUTHUKONI

3. Ekarta aalepenle awe makristau a wEefeso, moolumo xeeni a nthoonyeryo Paulo aarumenle awe?

³ Paulo aahaalepela makristau a wEefeso ohimyaka so: “Nyuwo mwaari ntoko epiphi, vano muri ntoko muthuko”. (aEef. 5:8) Paulo aahirumeela moolumo ala a nthoonyeryo, epiphi ni muthuko, ophavelaka otthokiherya itthu piili soovirikana. Vano nrowe nthokorerye etthu yaamwiirinhe murummwa Paulo waaleela makristau a wEefeso wiira “mwaari ntoko epiphi”.

4. Mwa enamuna xeeni atthu a wEefeso yaari aya mweepiphini?

⁴ Itiini soowootha aahiiso siri mweepiphini. Atthu ale a wEefeso Paulo aalepenle awe moolumo ala, ahinatthi wiixutta ekeekhai  ni okhala Makristau, awo yaari mweepiphini okhala wiira yeettela etiini yoowootha ni yaakupali itthu sa onammunepani. Epooma ya wEefeso, yaahikhalana etemplo yaarina muluku muulupale Arteemi, atthu anceene a okathi ole, yaanimuthokorerya okhala oovuwa ni oowerya. Nave akina yaanirowa otemplo iwe wiira yamukokhoreleke muluku owo eethiru. Atthu awo yaaniphwanya musurukhu okathi yaapaka aya ni otumiha elatarato eyo ya muluku Arteemi, yaakumiheriwe ni itiini soowootha. (Mit. 19:23-27) Nave atthu anceene a wEefeso, yaanipaka maxintta. — Mit. 19:19.

5. Exeeni enooniherya wiira mweettelo wa atthu a wEefeso waavarihana ni epiphi?

⁵ Yaari mweepiphini mwaha wa mweettelo aya woohiloka. Atthu a wEefeso yaanirupihana voohiloka nave khiyuuleliwa muru ni mweettelo aya owo. Atthu anceene a epooma ele, okathi yaatthekula aya aahiiso yaapaka aya ifesta sa itiini, yaahilimalela olavula mwa enamuna yoohiloka aahiiso yoovekana. (aEef. 5:3) Anamunceene yaakhala epooma ele, ‘yaahirimeeliwa mukhalelo wootheene wooreera’ eyo yaataphulela wiira ‘khiyoona ehaaya’. (aEef. 4:17-19) Ahinatthi wiixutta malamulo a Yehova voohimya sa etthu yooloka ni yoohiloka, murima aya waaniwiiriha opaka itthu soohiloka. Nave awo khiyaathokorerya moota Yehova oonela awe miteko saya. Eyo ti etthu yaamwiirinhe Paulo waalopola ohimyaka wiira “muupuwelo aya oneettihiwa ni epiphi, nave aarakamela okumi Muluku onivaha awe”.

6. Xeeni Paulo aahimmye awe wiira atthu a wEefeso ‘vano yaari ntoko muthuko’?

⁶ Atthu akina a wEefeso, yaahikhuma mweepiphini mmo. Nto atthu awo yaakhumme, Paulo aalenle so: “Vano muri ntoko muthuko, mwaha wa okhala atthu a Apwiya”. (aEef. 5:8) Awo yaakhala moovarihana ni Nuulumo na Muluku, nave yaalikana ni muthuko yoowo waweettiha. (Esal. 119:105) Aeefeso awo, yaahihiya mweettelo aya woohiloka ni opaka itthu saavarihana ni etiini yoowootha. Vano awo, ‘yaamutakiha Muluku’ ni yaaniimananiha opaka itthu wiira amukokhorele Yehova ni onvuwiha. — aEef. 5:1.

7. Mwa enamuna xeeni makhalelo ahu, anilikana aya ni makristau a wEefeso?

 ⁷ Mwa enamuna emosa-ru, nihinatthi wiixutta ekeekhai, naari etiini yoowootha ni naanipaka itthu saavarihana ni epiphi. Akina a hiyo, naanitthapela ifesta sinivarihana ni iferiyatu sa itiini soowootha ni naahikhalana mweettelo woohiloka. Masi nuumala wiixutta malakiheryo a Yehova voohimya sa etthu yooloka ni yoohiloka, noopaka marukunuxo. Okhuma vaavo, ninneettela exariya ntoko Yehova oniphavela awe. Mwaha woopaka marukunuxo awo, vano ninnihakalala ni ninniphwanya mareeliho, nnaamwi siniphwanyaka mixankiho. (Yes. 48:17) Ekeekhai wiira khivanikhweya khula okathi okhala nooniheryaka wiira nookhuma mweepiphini ni ‘nneetta ntoko anamwane a muthuko’. Masi ninrowa owerya sai opaka eyo?

MUSYAKEKE ITTHU SINIVARIHANA NI EPIPHI

8. Moovarihana ni aEefeso 5:3-5, itthu xeeni makristau a wEefeso yaareerela aya osyaka?

⁸ Mmusome aEefeso 5:3-5. Wiira awerye ohiirela mpantta mweettelo wa mweepiphini, makristau a wEefeso yaahaana osyakaka itthu sahaamusivela Yehova. Eyo yaahela muhina ohiya paahi osyaka mweettelo wa orupihana woohiloka, masi osyaka olavula mwa enamuna yoohiloka aahiiso yoovekana. Paulo aahiwuupuxerya makristau a wEefeso wiira yaahaana osyaka khula etthu yaakhanle oowiiriha ‘ohiirela mpantta Omwene wa Kristu ni wa Muluku’.

9. Xeeni ninreerela ahu okhootta khula etthu yaarowa oniiriha orupihana voohiloka?

⁹ Nave hiyo wiira nihihiye okhala ntoko muthuko, nihaana ‘ohiya ovara miteko sa epiphi, seiyo sihinikumiherya etthu’. (aEef. 5:11) Soowiiraneya sikina sinnooniherya wiira vannikhweya mutthu opaka etampi, akhala wiira onnithipelela oweha, owiriyana aahiiso olavula itthu soohiloka. (Maph. 3:6; Yak. 1:14, 15) Elapo emosa, anna yaahikhala “apatthani” mwaha woowinviyarelana mensagem amurumeelaka redes sociais. Wanipacerya anamunceene a yaawo, yaavaanela voohimya sa Yehova ni ikeekhai sa mbiibiliyani. Masi vakhaani-vakhaani, awo yaahipacerya ovaanelaka itthu Yehova oninyokha awe. Ikwaha sinceene awo yavaanela sa orupihana woohiloka. Muhoolo mwaya, akina a yaawo, yaahipacerya orupihana woohiloka.

10. Satana ni olumwenku awe onnoototha sai? (aEefeso 5:6)

¹⁰ Olumwenku ola wa Satana, onninoototha onikupalihaka wiira ele Yehova onoona awe okhala yoohiloka khahiyo ti yootthekeya. (2 Ped. 2:19) Veekeekhai eyo khennitikiniha! Muraakho mmosa Diabo onirumeela awe okhuma khalai, ori waakanyerya muupuwelo wa atthu, wiira ahiweryeke osuwela etthu yooloka ni yoohiloka. (Yes. 5:20; 2 aKor. 4:4) Vannooneya wiira iviidiyu sinceene, iprokrama sa TV, ni isaite sikina, sinnikumiherya itthu sinnivirikanya malakiheryo axariya a Yehova! Satana onniimananiha oniiriha wuupuwelaka wiira itthu soohiloka ni soohiirya sinipakiwa, ohiya paahi okhala sooheemerereya masi sinninikhaliherya okhala oohakalala ni okhala moovareleleya. — Mmusome aEefeso 5:6.

11. Yoowiiraneya ya murokora Angela, enooniherya sai wiira ti vooloka ovarihela muteko miruku siri aEefeso 5:7? (Nwehe efootu.)

¹¹ Satana oniphavela wiira naataaneke ni atthu ahiniphavela weettela malakiheryo a Yehova. Ti nthowa naya Paulo aaloponle awe makristau a wEefeso ohimyaka so: “Tivonto, muhiireke itthu siniira aya”, ale anipaka itthu soohiloka vamaithoni va Muluku. (aEef. 5:7) Olelo-va, nihaana okhalana ephoole yuulupale ovikana makristau a wEefeso. Mwaha  woowi, ohiya paahi okhala niri ene hoothe, masi-tho pooti ovirihaka okathi munceene nivaanelaka ni atthu awo, nimurumeelaka redes socias. Murokora Angela, a yoowo onikhala wAsia, aahoona moota vanoopiha aya wataana ni atthu akina omurumeelaka redes socias. Owo onihimya so: “Vakhaani-vakhaani kaahipacerya oturuka moota kuupuwela aka. Nave waahikhala okathi kuupuwela aka wiira khahiyo vootthekeya ‘wataana’ ni atthu ale ahinittittimiha malakiheryo a mbiibiliyani. Muhoolo mwaya, kaahipacerya wuupuwela wiira khahiyo ti vootthekeya, okhalana mweettelo ohinimusivela Yehova”. Axitokweene oophenta, yaahimukhaliherya Angela opaka marukunuxo aareerela awe. Owo onihimya-tho so: “Nenna-va etthu kinivaha aka efaita ori wataana waka ni Yehova ohiya aredes socias”.

12. Exeeni enrowa onikhaliherya wiiwelela malakiheryo a Yehova voohimya sa etthu yooloka ni yoohiloka?

¹² Nihaana wiimananihaka vanceene wiira nisyake mweettelo woohiloka yoowo ohireere wuulaana olumwenku ola. Noosuwela wiira owo ti woohiloka. (aEef. 4:19, 20) Etthu enrowa onikhaliherya ori wiikoha so: ‘Kiireke kinnisyaka weetta ni atthu oohiloka okhale omutekoni, oskola aahiiso atthu akina ahinttittimiha malamulo a xariya a Yehova? Kiireke moolipa murima, kinnaakiherya malamulo a Yehova hata atthu akina yuupuwelaka wiira kamulolo?’ Moovarihana ni 2 Timootheyo 2:20-22, nihaana okhalana ephoole, okathi nnaathanla ahu apatthani hata mmulokoni mwa ekristau. Nihiliyale wiira akina, pooti ohinikhaliherya wiira nimurumeeleke Yehova moororomeleya.

“MWEETTEKE NTOKO ANAMWANE A MUTHUKO”

13. Exeeni enitaphulela aya weetta “ntoko anamwane a muthuko”? (aEefeso 5:7-9)

¹³ Paulo aahaatumererya makristau a wEefeso ohiya paahi osyakaka itthu saavarihana ni epiphi, masi-tho yaahaana ‘weettaka ntoko anamwane a muthuko’. (Mmusome aEefeso 5:7-9.) Eyo enitaphulela exeeni wa hiyo? Enitaphulela wiira khula okathi mweettelo ahu, ohaana wooniheryaka wiira na makristau ekeekhai. Enamuna emosa nikhanle ahu oowerya opaka eyo, ori omusomaka Biibiliya ni  ephoole ohela muhina iliivuru sahu sinimutthokiherya Biibiliya. Etthu ya efaita, ori ovaha ephoole yuulupale ntakiheryo ni etthu Yesu iixuttinhe awe ohimyaka so: “Miyo ka muthuko wa olumwenku”. — Yoh. 8:12; Mir. 6:23.

14. Munepa woowaarya onrowa onikhaliherya sai?

¹⁴ Nihaana okhaliheriwa ni munepa woowaarya wa Muluku, wiira oneettiheke “ntoko anamwane a muthuko”. Mwaha wa xeeni? Mwaha woowi khivanikhweya okhalana mweettelo wooloka olumwenku ola wootakhala. (1 aTes. 4:3-5, 7, 8) Munepa woowaarya, pooti onikhaliherya osyaka miyuupuwelo sa atthu a olumwenku ola, ohela muhina soowiixuttiha saya ni miyoonelo sihinimusivela Yehova. Nave pooti onikhaliherya “okhala a xariya ni weettela ekeekhai”. — aEef. 5:9.

15. Mwa enamuna xeeni ninrowa ahu waakhela munepa woowaarya? (aEefeso 5:19, 20)

¹⁵ Enamuna emosa nikhanle ahu oowaakhela munepa woowaarya, ori ovekela. Yesu aahimmye wiira Yehova onimwaavaha “munepa woowaarya ale aninvekela”. (Luka 11:13) Nave nnoowerya waakhela munepa woowaarya, okathi yoole nninvuwiha ahu Yehova mmuthukumanoni sa ekristau. (Mmusome aEefeso 5:19, 20.) Akhala wiira nnimweemererya weettihiwa ni munepa woowaarya, onoonikhaliherya okhalana mweettelo oninvuwiha Muluku.

16. Exeeni enrowa onikhaliherya opaka soothanla sooloka? (aEefeso 5:10, 17)

¹⁶ Okathi nimphavela ahu opaka yoothanla yuulupale, nihaana otokosa wiira ‘nisuwele ele Yehova oniphavela awe’ ni opake etthu moovariha ni yeeyo. (Mmusome aEefeso 5:10, 17.) Nihaana ophavelasa malakiheryo a mbiibiliyani anrowa onikhaliherya voohimya sa mwaha ahu, ni osuwela moonelo wa Muluku voohimya sa mwaha owo. Akhala wiira nnootthara malakiheryo owo, anoonikhaliherya opaka soothanla sooloka.

17. Ninrowa orumeela sai mwa miruku okathi ahu? (aEefeso 5:15, 16) (Nwehe efootu.)

¹⁷ Paulo aahaatumererya makristau a wEefeso  wiira yaahaana orumeelaka okathi aya mwa miruku. (Mmusome aEefeso 5:15, 16.) Satana yoowo ori “mutakhali”, oniphavela wiira khula okathi nivareke itthu sa olumwenku ola, seiyo sinniiyerya okathi naarowa ahu orumeelaka nivaraka miteko sa Muluku. (1 Yoh. 5:19) Moohisuwela, mukristau pooti ohela nipuro noopacerya ophavelasa mihakhu, osoma iskola suulupale aahiiso muteko awe, ovikana eparakha orina awe ya omurumeela Yehova. Akhala wiira eyo enimwiiraneya, enooniherya wiira mutthu owo oneettihiwa ni muupuwelo wa olumwenku. Ekeekhai wiira itthu iyo khahiyo ti sootthekeya, masi ti voohiloka ohela nipuro noopacerya mookumini mwahu. Wiira ‘neette ntoko anamwane a muthuko’, nihaana ‘orumeelaka oratteene okathi ahu’ ni osuwela othanla itthu siri sekeekhai ni sa faita.

18. Donald aapanke exeeni wiira orumeele saana okathi awe?

¹⁸ Mphavelaseke inamuna sikhanle anyu oowuncererya muteko muninvarela anyu Yehova. Eyo ti etthu aapanke awe Donald, onikhala wÁfrica do Sul. Owo onihimya so: “Kaahiivarerya ni kaahimuxonttela Yehova, wiira okikhaliherye wuncererya muteko aka woolaleerya. Kaahinvekela wiira okikhaliherye ophwanya muteko, waarowa okikhaliheryaka okhalana okathi woorowa olaleerya. Kikhaliheriwaka ni Yehova, kaahiphwanya muteko waakeemererya opaka eyo. Nto miyo ni mwaaraka naahiilepiha okhala mapioneero ookilaatheya”.

19. Ninrowa owerya sai ohihiya weetta ntoko “anamwane a muthuko”?

¹⁹ Ekarta Paulo aalepenle awe makristau a wEefeso, yaahaakhaliherya vanceene ohihiya omuroromela Yehova. Nave malakiheryo awo anninikhaliherya olelo-va. Nave-tho, anninikhaliherya moota woothanla matthekulelo ni apatthani ooloka. Okhalana eprokrama ya yoosoma ya Biibiliya ya khula nihiku, enoonikhaliherya weetta ntoko anamwane a muthuko. Malakiheryo awo, annittittimiherya efaita orina aya munepa woowaarya, yoowo onnikhaliherya okhalana mikhalelo sooloka. Ovarihela muteko moolumo a Paulo, anoonikhaliherya opaka soothanla sooloka moovarihana ni ele Yehova oniphavela awe. Akhala wiira nnoopaka itthu iyo, nnnoowerya okhootta epiphi ya olumwenku ola ni ohihiya okhala ntoko muthuko!