1-2. Exeeni mutthu onireerela awe opaka ohinatthi opatisiwa?

 OKHUMA mwaakha wa 2018, atthu imilyau sinceene annipatisiwa ntoko Anamoona a Yehova, ovikana khalai. Anamunceene a yaawo, yiixuntte ekeekhai ‘okhuma enamwane aya’, ntoko murummwa Timootheyo a okathi woopacerya. (2 Tim. 3:14, 15) Atthu akina, amusuwenle Yehova nuumala wunnuwa. Mwa ntakiheryo, okathi vakhaani ovinre, muthiyana mmosa aamusoma Biibiliya ni Anamoona a Yehova, aahipatisiwa orina ene iyaakha 97!

² Akhala wiira munisomihiwa Biibiliya aahiiso munikhala ni anamuyari anyu ari anamoona a Yehova, niireke munnuupuwelela opatisiwa? Tthiri eyo yoothanla yoolaka! Masi muhinatthi opatisiwa, muhaana wiivahererya wa Yehova. Mwaha ola, onoorowa otthokiherya ele enitaphulela aya wiivahererya wa Muluku. Nave onoorowa wookhaliherya osuwela xeeni muhinreerela anyu woova opatisiwa akhala wiira muhiivahererya wa Yehova.

WIIVAHERERYA WA YEHOVA ONTAPHULELA EXEENI?

3. Muhimye matakiheryo ari mbiibiliyani a atthu yiivaherenrye wa Yehova.

³ Mbiibiliyani, wiivahererya onitaphulela natiri a vameekhaaya mutthu onimpakela awe Yehova. Aisarayeli, naari nloko naivaherenrye wa Yehova. Masi hata vari siiso, atthu akina a nloko nne, yaahivahererya wa Yehova mwa enamuna ya vameekhaaya. Mwa ntakiheryo, Aroni aahiwara ekhara ya eweero vamuru, eyo yaari “ethonyeryo y’orerihiwa” aahiiso ya wiivahererya. Ekhara eyo, yaataphulela wiira owo aahithanla omurumeela Yehova mwa enamuna ya vameekhaaya, eyo piiyo, okhala namukuttho a wIsarayeli. (Onam. 8:9) Nave maNaziri, yaahiivahererya wa Yehova mwa enamuna ya vameekhaaya. Nuulumo noowi “MuNaziri” nikumihiwe nttaava na Eheeberi nazir, nintaphulela  “Oowiivalaanya”, aahiiso “Oowiivahererya”. MaNaziri, yaahaana wiiwelelaka itthu saalempwale Nlamulo na Moise. — Mooth. 6:2-8.

4. a) Exeeni anithanla aya ale aniivahererya wa Yehova? b) Enitaphulela exeeni ‘wiikhootta’ mmansawo? (Nwehe efootu.)

⁴ Vaavo muniivahererya anyu wa Yehova, nyuwo munnithanla okhala mwiixutti a Yesu Kristu ni opaka ele oniphavela awe, yeeyo ekhanle etthu yootepa oreera mweekumini mwanyu. Wiivahererya wa makristau onihela muhina exeeni? Onihela muhina etthu Yesu aahimmye awe oriki: “Akhala mutthu oniphavela okitthara, aikhootte mmansawe”. (Math. 16:24) Nuulumo na Ekereku nitaphuleliwe noowi “aikhootte mmansawe” pooti otaphulelaka mutthu ‘ohiniisiveliha mmansawe’. Okathi muniivahererya anyu wa Yehova, nyuwo munileiherya ohipaka khula etthu yahaarowa omusivela Yehova. (2 aKor. 5:14, 15) Eyo enihela muhina okhootta “itthu siniphavela aya erutthu yoottheka”, eyo piiyo, orupihana woohiloka. (aGal. 5:19-21; 1 aKor. 6:18) Niireke munimwiiwelela yooruma eyo nnaamwi vooxankihakani? Akhala wiira munnimphenta Yehova ni munniiwelela malamulo awe, eyo enimoophwanyihani mireerelo. (Esal. 119:97; Yes. 48:17, 18) Munna mmosa oniitthaniwa Nicholas, ohimmye so: “Nyuwo pooti woonaka malamulo a Yehova ntoko ekhatteya enookhoottiheryani opaka itthu mwaaphavela anyu aahiiso pooti woonaka ntoko ifeero sa ekintaali ya akharamu sinookhapelelani wiira muhikhuuriwe naawo”.

5. a) Munrowa wiivahererya sai wa Yehova? b) Wiivahererya wa Yehova ovirikanne sai ni opatisiwa? (Nwehe efootu.)

⁵ Moota xeeni munrowa anyu wiivahererya wa Yehova? Muhaana opaka nivekelo mmuleiheryaka wiira munrowa omurumeelaka yena paahi, ni munrowa ohelaka nipuro noopacerya mweekumini mwanyu, itthu oniphavela awe. Tthiri munimuleiherya Yehova wiira  khamunrowa ohiya omphenta yena ni “murima anyu wotheene, ni okumi anyu wotheene, ni muupuwelo anyu wotheene, ni ikuru sanyu sotheene”. (Mar. 12:30) Okathi muniivahererya anyu, khuuvo pinaatamu onisuwela ohikhanle paahi nyuwo ni Yehova. Masi okathi munipatisiwa anyu, eyo eniwooniherya atthu akina wiira muhiivahererya wa Yehova. Wiivahererya wanyu, natiri munimusuwela anyu nyuwo ni Yehova, nave owo onilipelela wiira mpakeke itthu moovarihana ni natiri owo. — Mus. 5:4, 5.

XEENI MUNIREERELA ANYU WIIWAHERERYA WA YEHOVA?

6. Exeeni enimwiiriha mutthu wiivahererya wa Yehova?

⁶ Etthu yuulupale eniwiirihani wiivahererya wa Yehova, ori omphenta wanyu ohiya mwaha wa okuxeya murima. Ohiya-vo, etthu eniwiirihani omphenta vanceene Yehova, mwaha wa “osuwela oratteene ele oniphavela awe” ni ‘okhaliheriwa ni munepa wa Muluku’. (aKol. 1:9) Yoosoma anyu ya Biibiliya, ehookhaliheryani okupali wiira (1) Yehova, Muluku a ekeekhai, (2) Biibiliya onkhuma wa Muluku ni (3) owo onnirumeela mutthenkeso awe wiira omalelihe ele oniphavela awe.

7. Exeeni munireerela anyu osuwela muhinatthi wiivahererya wa Muluku?

⁷ Ale aniivahererya wa Yehova, ahaana osuwela soowiixuttiha soopacerya sa Nuulumo na Muluku ni okhalaka moovarihana ni malamulo awo. Awo anniimananiha wiira yaaleele atthu akina ele yiixuntta aya. (Math. 28:19, 20) Nto okathi omphenta waya Yehova onincerereya aya, eyo enniwiiriha omukokhorela Yehova paahi ni murima aya wootheene. Tthiri eyo ti etthu eniiraneya! Akhala wiira munnimphenta Yehova ni murima anyu wootheene,  khamunrowa wiivahererya wa yena ni opatisiwa, mphavelaka omuhakalaliha ole onoosomihani Biibiliya aahiiso anamuyari anyu. Nave khamunrowa opaka eyo mphavelaka wiira mulikaneke ni apatthani anyu akina.

8. Oxukhurela onrowa wookhaliheryani sai wiivahererya wa Yehova? (Esalimo 116:12-14)

⁸ Akhala wiira munimuupuwelelaka itthu sootheene Yehova ooopakenle aweni, eyo enoowiirihani omuxukhurela ni ophavela ovahererya okumi anyu wa yena. (Musome Esalimo 116:12-14.) Biibiliya onnimuhimya Yehova okhala maphattuwelo a “soovaha sotheene sooreera ni soomalela”. (Yak. 1:17) Yoovaha yuulupale, mukuttho wa mwanawe ori, Yesu. Tthiri eyo yoovaha ehinlikana ni sikina! Eyo ti etthu yiirinhe oweryaneya nyuwo okhalana ompatthani woolipa ni Yehova. Nave eyo ehoovahani eparakha ya ophwanya okumi woohimala muhoolo. (1 Yoh. 4:9, 10, 19) Wiivahererya wa Yehova, enamuna ekina munooniherya anyu wiira munnixukhurela itthu sootheene Yehova opanke awe mwaha wa niphento, ohela muhina mareeliho muniphwanya anyu. (Otum. 16:17; 2 aKor. 5:15) Nwehe yoosoma 46, eponto 4 ya eliivuru Okumi Woohimala! ohela muhina eviidiyu erina minuutu 3 eni: Itthu Xeeni Nikhanle Ahu Onvaha Muluku?

MURI OOLIKANA ENE WIIRA MWIIVAHERERYA WA YEHOVA NI OPATISIWA?

9. Xeeni mutthu ohinreerela awo wiivahererya wa Yehova mwaha wa wiilikanyiha ni atthu akina?

⁹ Nyuwo pooti woona wiira khamwiilokihenrye wiira mwiivahererye ni mpatisiwe. Woonasa wene nlelo nyuwo muhaana opaka marukunuxo mweekumini mwanyu, wiira mwiiweleleke malakiheryo a Yehova, aahiiso muniprisari okathi munceene wiira mulipihe waamini wanyu. (aKol. 2:6, 7) Khahiyo atthu ootheene animusoma Biibiliya anikela vahoolo, aahiiso animphenta Yehova mwa enamuna emosa-ru. Nave khahiyo amiravo ootheene aniilokiherya wiira yiivahererye ni opatisiwa arina ene iyaakha simosa-ru. Mmananiheke opaka itthu sootheene muniwerya anyu wiira mumphente Yehova, muhiilikanyihaka ni atthu akina. — aGal. 6:4, 5.

10. Exeeni mukhanle anyu oopaka moona wiira khamwiilokihenrye wiira mwiivahererye ni opatisiwa? (Nwehe ekaaxa eni: “ Malakiheryo Aniroiheliwa Ale Anikhala Aahiiso Ayariwe ni Anamoona a Yehova”.)

¹⁰ Masi moona wiira nlelo khamwiilokihenrye wiira mwiivahererye wa Yehova, muhihiye opaka ele muniwerya anyu wiira mmalelihe yoolakela anyu. Munvekeleke Yehova wiira ookhaliheryeni opaka marukunuxo muniprisari anyu mookumini mwanyu. (aFil. 2:13; 3:16) Mukupaliki ni murima anyu wootheene wiira Muluku onoowiriyana mavekelo anyu ni onimwaakhula. — 1 Yoh. 5:14.

XEENI MUHINREERELA ANYU WOOVA WIIVAHERERYA NI OPATISIWA?

11. Yehova onrowa onikhaliherya sai wiira nihihiye omurumeela?

¹¹ Atthu akina anniilokiherya masi anoova wiivahererye wa Yehova ni opatisiwa. Awo pooti wuupuwelaka so: ‘Akhala wiira kinoopaka etampi yuulupale nuumala wiivahererya wa Yehova ni opatisiwa, kinookumihiwa mmulokoni’. Akhala wiira munnoova, mukupaliki wiira Yehova onimoovahani khula etthu muniprisari anyu, wiira “nweryeke weetta ntoko simphwanela aya atthu a Yehova”. (aKol. 1:10) Nave onimoovahani ikuru wiira mpakeke itthu sooloka. Atthu anceene anniwerya opaka itthu sooloka akhaliheriwaka ni Yehova. (1 aKor. 10:13) Okhala wiira atthu awo anikhaliheriwa ni Yehova, ti maana aya ahinaatta aya atthu anikumihiwa mmulokoni wa ekristau. Maana Yehova onnaalokiherya arumeyi awe, wiira akhalaneke waamini woolipa okathi wootheene.

12. Exeeni enrowa onikhaliherya osyaka opaka itampi suulupale?

 ¹² Khula mutthu onneehereriwa opaka itthu soohiloka mwa inamuna soovirikana. (Yak. 1:14) Nto nyuwo, mukhanle oothanla etthu yoopaka akhala wiira munimweehereriwa. Ekeekhai ti yoowi, nyuwo muhaana wiixutta wiikhapelela. Atthu akina anikupali wiira vannivila osuwela etthu yoopaka okathi owo. Masi eyo khahiyo ekeekhai. Nyuwo pooti osuwela moota woosyaka opaka itampi suulupale. Tivonto, okathi muneehereriwa anyu, nyuwo pooti othanla ohipaka itampi. Etthu enrowa wookhaliheryani osyaka, ori ohihiya ovekela khula nihiku. Mukhalaneke ni mutthareke, eprokrama anyu ya yoosoma ya Biibiliya ya omwaneene khula nihiku. Muhicompeleke mithukumano. Mwaaleeleke atthu akina ele mwiixuntte anyu. Mwapaka itthu iyo, mukupaliki wiira Yehova onimoovahani ikuru nave khamunrowa ohiya omuroromela. Muhiliyale wiira Yehova onimookhaliheryani opaka itthu sooloka. — aGal. 5:16.

13. Ntakiheryo xeeni nooloka Yosefe onivanhe awe?

¹³ Akhala wiira munoosuwela etthu yoopaka muhinatthi weehereriwa, vanimookhweelakani ohihiya omuroromela wanyu Yehova. Biibiliya onnaaromola atthu anceene yaasyanke opaka itthu soohiloka, nnaamwi yaari atthu oottheka. Mwa ntakiheryo, ikwaha sinceene mwaara a Potifari aanimukhanyererya Yosefe opaka itthu soohiloka. Masi owo aahisuwela etthu aakhanle awe oopaka, ohinatthi okhumelela muxankiho ole. Maana Biibiliya onihimya wiira “ahikhotta” ni khumuhimeerya so: “Kiniwerya sai wira etthu yotepaxa otakhala, kinvehaka Muluku?” (Maph. 39:8-10) Vannooneya wiira Yosefe aahisuwela vahinatthi etthu yoopaka. Nto nuumala weehereriwa, vaahimukhweela osyaka opaka etthu yoohiloka.

14. Ninrowa wiixutta sai okhootta moowaakuveya opaka etthu yoohiloka?

¹⁴ Munrowa omutakiha sai Yosefe okathi muneehereriwa anyu? Nyuwo muhaana osuwela etthu yoopaka, nenna-va muhinatthi weehereriwa. Okhuma nenna-va, mwiixutteke okhootta moowaakuveya itthu Yehova oninyokha awe ni mukhaleke ottaiwene ni itthu iyo. (Esal. 97:10; 119:165) Eyo enamuna yookhweya ya osyaka itthu soohiloka, akhala wiira munimweehereriwa. Nto muhaana wiilokiherya ni osuwela moota munrowa anyu waakhula. Nave muupuweleleke malakiheryo anrowa wookhaliheryani oxintta sooweeha iyo.

15. Munrowa wooniherya sai wiira ‘munnimwaavya [Yehova] ni murima anyu wootheene’? (aHeeberi 11:6)

 ¹⁵ Masi hata musuwelaka wiira moophwanya ekeekhai ni munnimurumeela Yehova ni murima anyu wootheene, pooti okhala etthu enrowa wookhoottiheryakani wiivahererya wa yena ni opatisiwa. Akhala wiira eyo enoowiiraneelani mutthareke ntakiheryo na Mwene Davidi. Owo aahinvekela Yehova ahimyaka so: “Muluku, mutokose murima aka, musuwele, mukeehererye, musuwele sinuupuwelaka. Mukiwehe: karowa ephiro yootakhala, mukittikiherye ephiro ya okumi woohimala”. (Esal. 139:23, 24, Piipiliya Emakhuwa.) Yehova onnaatthuvela ale “animwaavya ni murima aya wootheene”. Wiimananiha opaka itthu moovarihana ni yoolakela anyu ya wiivahererya wa yena ni opatisiwa, ennooniherya wiira munnipaka itthu sooloka. — Mmusome aHeeberi 11:6.

MUHIHIYE OLIPIHA OMPATTHANI ANYU NI YEHOVA

16-17. Yehova oniwaattamela sai ale anikhala aahiiso ayariwe ni Anamoona a Yehova? (Yohani 6:44)

¹⁶ Yesu aahimmye wiira awiixutti awe yaathanliwe ni Yehova. (Mmusome Yohani 6:44.) Nto muupuweleleke moota eyo eri aya etthu ya faita yuulupale ni ele enitaphulela aya wa nyuwo. Yehova onniweha itthu sooloka khula mutthu onipaka awe, nuumala-vo onnimuthanla wiira okhale mwiixutti a Yesu. Owo onnimuthokorerya khula mmosa a hiyo ntoko mutthu ‘oovalaanyiwa ni maloko makina’ aahiiso orina efaita yuulupale. (Otum. 7:6) Eyo ti enamuna Yehova onoothokorerya weni.

¹⁷ Woonasa wene nyuwo munikhala aahiiso muyariwe ni Anamoona a Yehova. Mwaha waivaavo, pooti wuupuwelaka wiira, Yehova khokithanlale masi kinimurumeela yena, mwaha woowi anamuyari aka aahiiso ale kinikhalanaka annimurumeela. Masi Biibiliya onihimya so: “Mmwaattameleke Muluku, vano owo onoowaattamelani”. (Yak. 4:8; 1 Wah. 28:9) Akhala wiira nyuwo munoopaceriha omwaattamela Yehova, owo onoowaattamelani maana khonoothokoreryani ntoko ekhurupu ya atthu. Yehova onnimwaattamela khula mmosa waahela muhina ale anikhala aahiiso ayariwe ni Anamoona a Yehova. Vaavo khula mutthu onithanla awe omwaattamela Yehova, owo onnaakhula moovarihana ni moolumo ari Yakobo 4:8. — Munwehe-tho 2 aTesaloonika 2:13.

18. Exeeni enrowa ahu wiixutta mwaha onittharelana? (Esalimo 40:8)

¹⁸ Okathi muniivahererya anyu wa Yehova ni opatisiwa, munnooniherya mikhalelo sa Yesu. Owo aahiivahererya vootthuna wawe wa Tiithi awe wiira opakeke ele aavekeliwa awe ni yena. (Musome Esalimo 40:8; aHeeb. 10:7) Mwaha onittharelana, ninrowa wiixutta etthu enrowa wookhaliheryani ohihiya omurumeela Yehova moororomeleya, nuumala opatisiwa.