1. Exeeni aniikoha aya arumeyi akina oororomeleya?

 TI VOOLIPIHA osuwela wiira Yehova onnihakalala ni arumeyi awe ootheene! Biibiliya onihimya so: “Apwiya annisiveliwa ni atthu aya”. (Esal. 149:4, Piipiliya Emakhuwa.) Ikwaha sikina arumeyi akina annixanka ni anniikoha so: ‘Kiireke Yehova onnisiveliwa ni miyo?’ Nave atthu anceene aniromoliwa mbiibiliyani, yaamurumeela Yehova moororomeleya, yaanixanka ni yaaniikoha siiso. — 1 Sam. 1:6-10; Yoob. 29:2, 4; Esal. 51:11.

2. Tani animusiveliha Yehova?

² Biibiliya onnooniherya oratta ene wiira nnaamwi apinaatamu ari ene oottheka, anoowerya omusiveliha Muluku. Moota xeeni? Akhala wiira nnoomwaaminiki Yesu Kristu ni opatisiwa. (Yoh. 3:16) Niira siiso, nnoowooniherya atthu ootheene, wiira noottharuwa soottheka sahu ni noomuleiherya Yehova wiira nimphavela opakaka ele enimusivela. (Mit. 2:38; 3:19) Yehova onnihakalala vanceene, aaniwehaka nipakaka itthu iyo ni niimananihaka olipiha waataana wahu ni yena. Tivonto, nihihiye wiimananiha opaka ele eniwerya ahu, wiira nikhaleke moovarihana ni natiri nimuleihenrye ahu Yehova. Owo onnisiveliwa ni hiyo ni onninthokorerya ntoko apatthani awe eekeekhai. — Esal. 25:14.

3. Makoho xeeni ninrowa ahu othokorerya mwaha ola?

³ Xeeni ikwaha sikina atthu akina anuupuwela aya wiira Yehova khonisiveliwa naawo? Yehova onooniherya sai wiira onnisiveliwa ni hiyo? Makristau anrowa olipiha sai okupali waya wiira Yehova onnisiveliwa naawo?

XEENI IKWAHA SIKINA ATTHU AKINA ANUUPUWELA AYA WIIRA YEHOVA KHONISIVELIWA NAAWO?

4-5. Exeeni nikhanle ahu oowuupuwelelaka, wiira nisyake muupuwelo woowi khanrina efaita?

⁴ Anamunceene a hiyo, okhuma enamwane ahu, ninniixoona ohikhalana efaita. (Esal. 88:15) Murokora mmosa oniitthaniwa  Adrián, onihimya so: “Okhala wene, miyo kiniixoona okhala mutthu ohirina efaita. Etthu yoopacerya kinuupuwelaka, ori waavekelela amusi aka wiira erowe Elapo Esya, maana miyo nkiniixoona wiira kinnipwanela okhala elapo eyo”. Tony yoowo aakhalaniwa ni emusi yahaamurumeela Yehova, onihimya so: “Amusi aka khiyaatonko okileela wiira annikiphenta ni annisiveliwa ni miyo. Eyo yaanikiiriha wuupuwela wiira khiivo etthu kaapaka aka yaasivela”.

⁵ Akhala wiira ikwaha sikina ninnikhalana muupuwelo woowi khanirina efaita, nuupuweleleke enamuna Yehova orumenle awe wiira onithanle. (Yoh. 6:44) Owo onniweha mikhalelo sooloka nirina ahu, nihinwerya ahu oweha ni onnisuwela murima ahu. (1 Sam. 16:7; 2 Wah. 6:30) Nto nihaana omukupali vaavo onnihimeerya awe wiira nookhalana efaita. — 1 Yoh. 3:19, 20.

6. Muupuwelo xeeni Paulo aarina awe voohimya sa itampi sawe sa khalai?

⁶ Nihinatthi wiixutta ekeekhai, akina a hiyo naanipaka itthu woonasa wene seiyo sinniiriha wiivaha nthowa. (1 Ped. 4:3) Hata atthu akina apacenrye khalai omurumeela Yehova moororomeleya, ikwaha sikina pooti wiivahaka nthowa. Ankhi nyuwo? Akhala wiira eyo enniwiiraneelani, muhiliyale wiira hata arumeyi oororomeleya a khalai, yaahikhalana mixankiho simosa-ru. Mwa ntakiheryo, murummwa Paulo aaniixoona okhala mutthu ootakhaliwa mwaha wa mixankiho sawe. (aRom. 7:24) Ekeekhai wiira Paulo aahittharuwa soottheka sawe ni aahipatisiwa. Aihimyaka mwaneene, aahimmye so: “Miyo ka mwaamukhaanixa waavikana arummwa otheene” ni “kitepanxe okhala natampi”. — 1 aKor. 15:9; 1 Tim. 1:15.

7. Exeeni nikhanle ahu ookupali voohimya sa itampi sahu sa khalai?

⁷ Tiithi ahu a wiirimu ooleiherya onilevelela soottheka sahu, akhala wiira nnoottharuwa. (Esal. 86:5) Tivonto, nattharuwa soottheka sahu, nikupaliki wiira Yehova onoonilevelela ntoko ohimmye awe mbiibiliyani. — aKol. 2:13.

8-9. Ninrowa owerya sai oxintta muupuwelo woowi khaninwerya opaka itthu sinimusivela Yehova?

⁸ Ootheene ahu ninniphavela omurumeela Yehova ni murima ahu wootheene. Woonasa wene atthu akina pooti wuupuwelaka wiira khaniwerya opaka etthu wiira amusivelihe. Murokora mmosa oniitthaniwa Amanda, onihimya so: “Kinninvaha Yehova ele kiniwerya aka, kiimananihaka opaka itthu ovikana khalai. Masi kinoona wiira Yehova khanihakalala ni miyo, okhala wiira nkiniwerya opaka itthu sootheene kaaphavela aka”.

⁹ Ninrowa oxintta sai muupuwelo owo woowi khaninwerya omusiveliha Yehova? Nnoowerya, akhala wiira nnimuupuwelela wiira Yehova khonnivekela ni khonlipelela wiira nipakeke itthu ovikana iye ninwerya ahu. Owo onnivaha efaita wiimananiha wahu opaka ele ninwerya ahu. Nave mbiibiliyani aakhala matakiheryo a atthu yaamurumenle Yehova ni murima aya wootheene. Nkuupuwelani ntakiheryo na Paulo. Mwa iyaakha sinceene, owo aaniimananiha weetta mikwaha sa ikiloomu sinceene, wiira aalipihe anna ni arokora a miloko soovirikana. Masi okathi makhalelo a okumi awe yaaturukeyale aya, ohinawerya olaleerya vanceene, niireke aanuupuwela wiira khaawerya-tho omusiveliha Muluku? Naari. Owo khaahiyale opaka ele aawerya awe nave Yehova aahimureeliha. (Mit. 28:30, 31) Moolikanasa ni Paulo, nnoowerya onvarela muteko Yehova ikwaha sinceene. Masi etthu Yehova onivaha awe efaita, omphenta wahu. Nrowe nthokorerye inamuna vakhaani Yehova onooniherya awe wiira ninnimusiveliha.

 YEHOVA ONOONIHERYA SAI WIIRA NINNIMUSIVELIHA?

10. Ninrowa owerya sai “owiriyana” nsu na Yehova? (Yohani 16:27)

¹⁰ Omurumeelaka Biibiliya. Yehova onnooniherya inamuna sinceene wiira onnaaphenta arumeyi awe ni onnisiveliwa naawo. Biibiliya onnihimya ikwaha piili Yehova olavulaka sa Yesu aahimmye awe wiira, ola mwanaka onnimphentexa aka aahiiso onikihakalaliha. (Math. 3:17; 17:5) Niireke mwaaniphavela omwiiwa Yehova ahimyaka wiira kinnihakalala aahiiso kinnisiveliwa ni nyuwo? Owo onilavula ni hiyo orumeelaka Nuulumo nawe, nto nihilipeleleke nsu na Yehova nikhumaka wiirimu. Vaavo ninsoma ahu moolumo oophenta Yesu aalenle awe awiixutti awe, eyo pooti onikhaliherya owiriyana etthu Yehova onnihimeerya awe. (Mmusome Yohani 16:27.) Yesu aanitakiha moomalela mikhalelo sa Tiithi awe. Okathi ninsoma ahu moolumo oohakalaliha aaroihenle awe awiixutti oororomeleya nnaamwi yaari oottheka, eyo enoonikhaliherya owiriyana nsu na Yehova. — Yoh. 15:9, 15.

11. Xeeni ninhimya ahu wiira mixankiho khasinitaphulela wiira Yehova khonsiveliwa ni hiyo? (Yakobo 1:12)

¹¹ Owo onninivaha itthu nimpirisari ahu. Yehova onniphavela onikhaliherya. Mwa ntakiheryo, owo onninivaha itthu sinnithowa. Ikwaha sikina Yehova pooti weemererya wiira mixankiho sinikhumelele, ntoko iirale awe ni naxariya Yoobi. (Yoob. 1:8-11) Okathi sinniphwanya aya mixankiho, eyo khentaphulela wiira Muluku khonisiveliwa ni hiyo. Moovirikana ni vo, mixankiho iyo sinninivaha eparakha ya wooniherya omphenta wahu Muluku ni omuroromela wahu. (Mmusome Yakobo 1:12.) Okathi wa mixankiho, ninnoona moota Yehova onniphenta awe, onikhapelela ni moota onnikhaliherya awe ovilela.

12. Yoowiiraneya ya Dmitrii, enniixuttiha exeeni?

¹² Nrowe nthokorerye etthu yaamwiiranenle munna Dmitrii onikhala wÁsia. Muteko waavara awe waahimala ni aahiviriha miyeeri sinceene ohiphwannye mukina. Owo aahilakela wooniherya omuroromela wawe Yehova, oluttuweliwaka ovara muteko woolaleerya. Saanivira miyeeri sinceene nlelo ohiphwanyaka muteko. Nuuvira okathi waahimphwanya oretta waamwiiriha ohiweryaka weetta. Nto owo aahipacerya wuupuwela wiira khahiyo namaiyawe aahiiso paapa ooloka, ni aaniikoha akhala wiira Yehova khaasiveliwa-tho ni yena. Ohiyu omosa mwanawe mwaamuthiyana aahiruuha ekarta erina ene moolumo aniphwanyaneya  Yesaya 30:15 ani: “Mwakiroromela ni murima, munnolipa”. Nuumala onvaha paapa awe, mwaana owo aahimmye so: “Paapa okathi ola munixanka anyu muupuweleleke moolumo ala”. Nto Dmitrii aahuupuwela omuxukhurela Yehova okhala wiira emusi awe yaahikhalana yoolya, ikuwo soowara ni opuro wookhala. Dmitrii onihimya-tho so: “Etthu kaareerela aka opaka, yaari okhala oomaaleleya ni ohihiya omuroromela Muluku aka”. Akhala wiira sinnoophwanyani mixankiho ntoko iya, mukupaliki wiira Yehova onnookhapelelani ni onimookhaliheryani ovilela.

13. Tani Yehova onaarumeela awe, ophavelaka wooniherya wiira onnisiveliwa ni hiyo ni moota xeeni?

¹³ Aarumeelaka anna ni arokora. Yehova onnaarumeela anna ni arokora ophavelaka wooniherya wiira onnisiveliwa ni hiyo. Mwa ntakiheryo, owo onnaarumeela awo wiira anilipihe ni moolumo aya, okathi wooreerela. Eyo ti etthu yaamwiiranenle murokora mmosa onikhala wÁsia, okathi aaripiwe awe murima vanceene. Owo aahiyeleela muteko awe ni saahipacerya omphwanya mixankiho sinceene. Iyawe aahipaka itampi saamwiirinhe ohiihiwa okhala mutokweene. Murokora owo onihimya so: “Miyo nkaasuwela nthowa naya siiraneya aya itthu iyo. Kuupuwela wiira kaahipaka etthu yoohiloka nave Muluku khaasiveliwa-tho ni miyo. Arokora yaahipacerya okilipiha akooniheryaka wiira kinnimusiveliha Yehova”. Yehova onipaka sai eyo? Owo onihimya-tho so: “Axitokweene a mmulokoni yaahirwa olavula ni miyo, ni yaahikooniherya wiira nlelo Yehova onnikiphenta”. Nuuvira okathi murokora owo, aahinvekela Yehova wiira omukhaliherye. Owo onitthokiherya so: “Nihiku nimosa kaahaakhela ekarta ya anna ni arokora a mmulokoni. Nuumala osoma moolumo aya oolipiha, kaahoona wiira Yehova aanikiwiriyana”. Ikwaha sinceene, Yehova onnirumeela moolumo a  anna ni arokora ophavelaka wooniherya wiira onniniphenta. — Esal. 10:17.

14. Enamuna xeeni ekina Yehova onooniherya awe wiira onnisiveliwa ni hiyo?

¹⁴ Nave Yehova onnooniherya oniphenta wawe aarumeelaka anna wiira anivahe miruku. Mwa ntakiheryo, okathi wa makristau oopacerya, Yehova aahimuruma Paulo wiira olepe ikarta 14 aaroihelaka anna ni arokora. Ikarta iyo, saahikhalana miruku soolipiha ni sooniherya niphento. Exeeni yaamwiirinhe Yehova omuruma Paulo olepa ikarta iyo? Okhala wiira Yehova Tiithi ooloka ni onnattaruxa anaawe ‘onaaphentexa awe’. (Mir. 3:11, 12) Nto okathi mutthu mukina onnivaha awe miruku sinikhuma mbiibiliyani, eyo khenitaphulela wiira Yehova khonisiveliwa ni hiyo. Moovirikana ni vo, eyo enooniherya wiira Yehova nlelo onniniphenta ni onnisiveliwa ni hiyo. (aHeeb. 12:6) Itthu xeeni sikina sinooniherya wiira ninnimusiveliha Yehova?

ITTHU SIKINA SINOONIHERYA WIIRA NINNIMUSIVELIHA YEHOVA

15. Yehova onaavaha aani munepa awe woowaarya ni exeeni osuwela eyo ennilipiha aya?

¹⁵ Yehova onnaavaha munepa awe woowaarya, atthu ale animusiveliha. (Math. 12:18) Niikoheke so: ‘Kiireke miyo kinooniherya mikhalelo sinikumiheriwa ni munepa woowaarya?’ Niireke munnaapixerya murima akina ovikana muhinatthi omusuwela Yehova? Akhala wiira mookhalana mikhalelo sinikhumiheriwa ni munepa wa Muluku, eyo enooniherya wiira Yehova onnisiveliwa ni nyuwo! — Nwehe ekaaxa eni: “ Mikhalelo Sinikumiheriwa ni Munepa Woowaarya . . . ”

16. Yehova onaarumeela aani wiira alaleyeke ihapari sawe sooreera, ni osuwela eyo ennilipiha sai? (1 aTesaloonika 2:4)

¹⁶ Yehova onnaaroromela ale animusiveliha wiira alaleyeke ihapari sawe sooreera. (Mmusome 1 aTesaloonika 2:4.) Nrowe niwehe moota murokora mmosa oniitthaniwa Jocelyn, attottenle awe mureerelo mwaha woowaalaleerya atthu akina ihapari sooreera. Nihiku nimosa, Jocelyn aavennye ohireere okhulumuwa. Owo onihimya so: “Miyo kuupuwela wiira khiivo kaarowaka owerya opaka. Masi kaahaana orowa olaleerya nihiku nne maana kaarumeela ntoko pioneera. Nto kaahivekela nuumala-vo, kinakhuma kirowaka olaleerya”. Nihiku nenne vaasiisu, Jocelyn aahimphwanya muthiyana mmosa oniitthaniwa Mary, yoowo eemerenrye yoosoma ya Biibiliya.  Nuuvira miyeeri vakhaani, Mary aahimuleela Jocelyn, wiira nihiku nne mwaamanne anyu mukhora, kiira kinvekenle ene Muluku wiira okikhaliherye. Uupuwelelaka yoowiiraneya ele, Jocelyn onihimya so: “Vaakhala ntoko wiira Yehova onikihimeerya wiira, ‘kinnihakalala ni nyuwo’”. Ekeekhai wiira khahiyo atthu ootheene animweemereryaka ihapari ninlaleya ahu. Masi nikupaliki wiira ninnimusiveliha vanceene Yehova, vaavo nniimananiha ahu waalaleerya atthu akina ihapari sooreera.

17. Yoowiiraneya ya Vicky eniwiixuttihani exeeni voohimya sa mukuttho woowoopola? (Esalimo 5:12)

¹⁷ Yehova onnaavaha eparakha yoottottela mureerelo, mukuttho woowoopola ale animusiveliha. (1 Tim. 2:5, 6) Ankhi naahikupaliki wiira Yehova onnisiveliwa ni hiyo hata naaminiki mukuttho woowoopola ni nipatisiwe ene? Nihiliyale wiira nihaana omuroromela Yehova ohiya ororomela muupuwelo ahu. Owo onniwoona okhala anaxariya atthu yaale anaamini mukuttho woowoopola, ni onnileiherya wiira onimwaareeliha. (Musome Esalimo 5:12; aRom. 3:26) Murokora mmosa oniitthaniwa Vicky, aahoona wiira aahiphwanya nikhaliheryo vaavo uupuwelela awe mukuttho woowoopola. Nihiku nimosa, nuumala wuupuwelela sa mukuttho woowoopola, owo aahimmye so: “Yehova onnikipixerya murima mwa okathi munceene. . . . Vaamulikana omuhimeerya Yehova wiira ‘khivaniweryaneya nyuwo omphenta mutthu ntoko miyo. Mukuttho wa mwaninyu, khoniwerya olevelela itampi saka’”. Uupuwelelaka yoovaha ya mukuttho woowoopola, owo aahipacerya wiixoona wiira aniphentiwa ni Yehova. Nave hiyo, nnoowerya osuwela wiira ninniphentiwa ni Yehova ni onnisiveliwa ni hiyo, vaavo nnuupuwelela ahu mukuttho woowoopola.

18. Nikupaliki exeeni vakhala wiira khaninrowa ohiya omphenta Tiithi ahu a wiirimu?

¹⁸ Nnaamwi vaaweryaneyaka wiimananiha wiira nivarihele muteko malakiheryo ala niixuntte ahu, ikwaha sikina hiyo pooti oriipiwaka murima ni nnaikoha vakhala wiira Yehova onnisiveliwa ni hiyo. Akhala wiira eyo enoowiiraneelani, muhiliyale wiira Yehova onnisiveliwa ni “ale ahinihiya omphenta”. (Yak. 1:12) Nto muhihiye olipiha ompatthani anyu ni Yehova, nwehaka inamuna onooniherya awe wiira onnisiveliwa aahiiso onnihakalala ni nyuwo. Muhikhala-khale muliyalaka wiira, Yehova “ori vakhiviru wa khula mmosa a hiyo”. — Mit. 17:27.