1. Xeeni vari aya vooloka wiirela mpantta mutthenkeso wa Yehova?

 NINNIHAKALALA vanceene, wiirela mpantta mutthenkeso wa Yehova mahiku ala ookiserya ni ooxankiha. Makhalelo a okumi olumwenku ola, anootepa oxankiha, masi Yehova oonivaha anna ni arokora wiira anikhaliheryeke. (Esal. 133:1) Yena onninikhaliherya onivahaka ikuru wiira nikhalane emusi yoohakalala. (aEef. 5:33–6:1) Nave, onninivaha osuwela nimpirisari ahu wiira nikhalane murettele wa ekeekhai vamurimani ni mmuupuweloni.

2. Xeeni ninreerela ahu wiimananiha, ni mwaha wa xeeni?

² Nihaana wiimananiha vanceene wiira nihihiye omurumeela Yehova moororomeleya. Mwaha wa xeeni? Mwaha woowi, hiyo pooti onyoonyiheyaka mwaha wa itthu atthu akina anipaka aya aahiiso anihimya aya. Nave ikwaha sikina hiyo pooti woona okhala vooxankiha, oxintta soovonya sahu otepexa wene okathi yoole ninfalyari ahu ikwaha-ikwaha sene. Okathi nimmurumeela ahu Yehova, nimpirisari ovilela otepexa wene (1) vaavo anna ni arokora anninyoonyiha aya, (2) vaavo mwaarihu aahiiso iyahu onninyoonyiha awe ni (3) okathi ninfalyari ahu. Mwaha ola, nnoothokorerya etthu nniixutta ahu ni matakiheryo atthu araru aniromoliwa mbiibiliyani, yaawo yahaahiyale ororomeleya nnaamwi saaphwanya mixankiho ntoko iya.

NVILELEKE HATA ANNA NI AROKORA YOONYOONYIHAKANI

3. Mixankiho xeeni sinaaphwanya arumeyi a Yehova?

³ Okathi wa mixankiho. Anna ni arokora akina, pooti okhalana mikhalelo seiyo ikwaha sikina sinninyoonya. Akina pooti opaka etthu ekhanle onikhulumula, aahiiso awo pooti onithokoreryaka mwa enamuna ehinnisivela. Hata axitokweene, ikwaha sikina annifalyari. Itthu ntoko iyo, pooti oniirihaka waanyiherya akhala wiira ola tthiri mutthenkeso wa Muluku. Akina ohiya ovikanihaka omurumeela Yehova ni “murima mmosaru” ni anna ni  arokora, awo annihiya weetta ni ale yaanyoonyinhe ni orowela mithukumano. (Sof. 3:9) Niireke ti vamiruku opaka eyo? Nrowe nthokorerye etthu enniixuttiha aya yoowiiraneya eri mbiibiliyani, ya mutthu samphwannye mixankiho ntoko iya.

4. Mixankiho xeeni samphwannye murummwa Paulo?

⁴ Ntakiheryo na mbiibiliyani. Murummwa Paulo aanisuwela wiira anna ni arokora, yaari atthu oottheka. Mwa ntakiheryo, anna akina a muloko wa oYerusalemu yaanimoova, nave nuumala omusuwela, khiyaakupali wiira aari mwiixutti a Yesu. (Mit. 9:26) Muhoolo mwaya, atthu akina yaanilavula itthu soohiloka voohimya sa yena ni yaaniwiiriha atthu akina ohimuroromelaka. (2 aKor. 10:10) Paulo aahinweha mutokweene mmosa aapanke yoothanla yoohiloka, yaakhanle oowaakhumuliha atthu akina. (aGal. 2:11, 12) Nave mpatthani awe mmosa amphenta awe, iitthaniwa Marko, aahimunyoonyiha vanceene Paulo. (Mit. 15:37, 38) Paulo anwerya weemererya wiira mixankiho ntoko iya, simwiirihe ohaataanaka ni ale yaamunyoonyiha. Masi hata vari siiso, owo khaahiyale waataana ni anna ni arokora ni omurumeela Yehova moororomeleya. Exeeni yaamukhalihenrye ovilela?

5. Exeeni yaamukhalihenrye Paulo ohihiya okhala oowiiraana ni anna ni arokora? (aKolosi 3:13, 14) (Nwehe eteseenyo.)

⁵ Paulo aanaaphenta anna ni arokora. Niphento nno, naahimukhaliherya ohiwehexexaka ifaalya saya, masi mikhalelo saya sooloka. Nave ophenta waahimukhaliherya Paulo waalevelela soottheka saya, moovarihana ni aKolosi 3:13, 14. (Mmusome.) Nwehe moota Paulo aamulevelenle awe ni murima wootheene Marko. Nnaamwi Marko aamutthyanwe Paulo mukwaha awe woopacerya wa omisionaario, Paulo khaanyoonyiheyale. Muhoolo mwaya, okathi Paulo aalepa awe ekarta oroihaka muloko wa oKolosi, owo aahimuttottopela Marko ntoko mutthu aavarana awe saana muteko ni ‘aamulipiha vanceene’. (aKol. 4:10, 11) Okathi aatthukweliwe awe oRoma, Paulo aahimwiitthaniha Marko okhala wiira aanimukhaliherya muteko wa Muluku. (2 Tim. 4:11) Eyo ennooniherya wiira Paulo khaanyanyanle anna ni arokora. Exeeni nniixutta ahu ni ntakiheryo na Paulo?

6-7. Exeeni enrowa onikhaliherya ohihiya ovilela naaphentaka anna ni arokora hata niri ene atthu oottheka? (1 Yohani 4:7)

⁶ Etthu nniixutta ahu. Yehova oniphavela wiira nihihiye waaphenta anna ni arokora. (Mmusome 1 Yohani 4:7.) Vakhala wiira munna aahiiso murokora onninthokorerya mwa enamuna ehininsivela, nikupaliki wiira owo khahiyo oroolakela opaka eyo, masi oniimananiha opaka ele Yehova onoona awe okhala yooloka. (Mir. 12:18) Muluku onnaaphenta arumeyi awe oororomeleya, hata okathi mukina  afalyariki. Nnaamwi ikwaha sikina nimutthekelaka, owo khonihiya okhala mpatthani ahu nave khonniviruwela khula okathi. (Esal. 103:9) Ninnimuxukhurela vanceene Yehova mwaha wa onilevelelaka, nave nihaana wiimananiha omutakiha naalevelelaka atthu akina! — aEef. 4:32–5:1.

⁷ Muhiliyale wiira vaavo vanaattamela aya wanikisa, nimpirisari okhala oowiiraana ni anna ni arokora. Nave ninnilipelela okathi onrowa aya wuncerereyaka olupatthiwa. Hiyo pooti otthukweliwaka mwaha wa waamini wahu. Nto eyo yaniiraneela, ninrowa opirisariki nikhaliheryo na anna ni arokora ovikana khalai. (Mir. 17:17) Nrowe nthokorerye etthu yaamwiiranenle Josep, a mutokweene a wEspanha. Owo ni anna akina yaahitthukweliwa ekhatteya emosa mwaha wa ohiirela mpantta myaha sa epoliitika. Josep onihimya so: “Mukhatteya mme vaanikhweya otthekelana mukina ni mukhwaawe, okhala wiira khinaakhala mootaphuwa. Hiyo naahaana ovilelana ni olevelelana mukina ni mukhwaawe. Eyo yaaninikhaliherya okhala oowiiraana ni okhapelelana. Opuro ole yaahikhala alopwana yahaamurumeela Yehova. Waahikhala okathi moono aka waakiwereya aya ni wiipale aya vanceene. Nto eyo yaanikiiriha ohiweryaka opaka itthu wiira kiikhaliherye. Masi munna mmosa aahikattha ikuwo saka ni aahikikhaliherya mwa inamuna sikina. Kihoona niphento nno neekeekhai okathi kaapirisari aka”. Tthiri nookhalana mathowa ooloka, anniiriha ophukaka muxankiho ni anna ni arokora akina!

NVILELEKE OKATHI MUNNYOONYIHIWA ANYU NI IYANYU AAHIISO MWAARINYU

8. Muxankiho xeeni okhanle oowaaphwanya anamathelana?

⁸ Okathi wa mixankiho. Anamathelana ootheene, sinnaaphwanya mixankiho. Biibiliya onnooniherya wiira anamathelana, sinimwaaphwanyaka “mixankiho mookumini mwaya”. (1 aKor. 7:28) Mwaha wa xeeni? Mwaha woowi oowanli aya toottheka ni aakhalana mikhalelo soovirikana, ni sookhala itthu sinaasivela aahiiso sihinaasivela. Nave anamathelana awo pooti okhala a ilapo soovirikana ni a ikultuura soovirikana. Nuuvira okathi, awo pooti owehaka mikhalelo sa ole athelanne aya, yahaawenrye aya oweha ahinatthi othelana. Nto mikhalelo iyo, pooti okumiheryaka mixankiho. Nnaamwi oowanli aya avonyaka, awo pooti opaceryaka okhupanyana mwaha wa mixankiho sinikhumelela mukasamentoni mwaya. Etthu akhanle aya oopaka, ori wiimananiha ophuka mixankiho iyo hoothe wiira axintte. Masi ikwaha sikina, awo pooti wuupuwelaka wiira fataari ovalaana aahiiso omwalana. Niireke opaka eyo enamuna yooloka ya ophuka mixankiho iyo? b Nrowe niixutte ntakiheryo na muthiyana mmosa yoowo ahaahiyale okhala oororomeleya wa Yehova, nnaamwi iyawe aapaka itthu soohiloka.

9. Muxankiho xeeni wamphwannye Abigayili?

⁹ Ntakiheryo na mbiibiliyani. Abigayili aatheliwe ni mulopwana Biibiliya onimuhimya awe wiira aari oowali ni ootakhala, iitthaniwa Nabali. (1 Sam. 25:3) Tthiri Abigayili vaanimuxankiha vanceene okhala vamosa ni mulopwana ole. Niireke wookhala okathi Abigayili oonaawe oreerela omwalana? Aayo. Owo aahikhalana eparakha eyo, maana waahikhala okathi Davidi yoowo aarowa okhala mwene a wIsarayeli, aarwiiye awe ophavelaka omwiiva Nabali mwaha wonveeha yena ni alopwana awe. (1 Sam. 25:9-13) Owo anwerya otthyawa ni omuhiya Davidi omwiivaka Nabali. Masi Abigayili khaapanke eyo. Aahimuxonttela Davidi wiira ohimwiive  iyawe. (1 Sam. 25:23-27) Exeeni yaamwiirinhe Abigayili omuxonttela Davidi wiira ohimwiive iyawe?

10. Exeeni yaamukhalihenrye Abigayili ohihiya omphenta Nabali?

¹⁰ Abigayili aanimphenta Yehova ni aanittittimiha malamulo awe voohimya sa ekasamento. Owo aanisuwela itthu Muluku aahimmye awe nuumala Yena okumiherya ekasamento yoopacerya ya Adamu ni Eva. (Maph. 2:24) Abigayili aanisuwela wiira Yehova onnittittimiha vanceene ekasamento. Nave aaphavela onvuwiha Muluku ni opaka ele aawerya awe wiira okhapelele etthoko awe omuhela muhina iyawe. Owo aahipaka etthu moowaakuveya wiira Davidi ohimwiive Nabali. Nnaamwi Abigayili ahaapanke etthu yootakhala, aaheemererya onvekela muswammaha Davidi. Moohaanyiherya, Yehova onnaaphenta athiyana siisa oolipa murima ni ooreera murima. Anamathelana aniixutta exeeni ni ntakiheryo na Abigayili?

11. a) Exeeni Yehova oniphavela awe wa anamathelana? (aEefeso 5:33) b) Exeeni muniixutta anyu sa moota Carmen iimananinhe awe wiira okhapelele ekasamento awe? (Nwehe efootu.)

¹¹ Etthu nniixutta ahu. Yehova oniphavela wiira anamathelana ekhaleke vamosa hata vaxankihaka. Muluku onnihakalala vanceene okathi onaaweha awe anamathelana yiimananihaka ophuka mixankiho mwa enamuna yooloka, ni aphentanaka ni ottittimihana mukina ni mukhwaawe. (Mmusome aEefeso 5:33.) Nrowe nthokorerye yoowiiraneya ya Carmen. Nuumala oviriha iyaakha 6 otheliwe ene, Carmen aahipacerya osomihiwa Biibiliya ni Anamoona a Yehova, ni muhoolo mwaya aahipatisiwa. Owo ohimmye so: “Iyaka khaasiveliwe ni yoothanla aka nave khaaphavela wiiwa olavuliwaka voohimya sa Yehova. Owo aanikiveeha ni aanikoopopiha wiira aamukimwalana”. Hata vari siiso Carmen aanivilela. Aahiviriha iyaakha 50, iimananihaka omphenta ni omuttittimiha iyawe. Owo onnincererya oriki: “Iyaakha iye sootheene kivirinhe aka, kihiixutta okhala oowiihiiha ni olavula mwa enamuna yooreera murima ni iyaka. Kaanisuwela wiira Yehova onnoona ekasamento okhala yoottittimiheya ni kaanipaka ele kaawerya aka, wiira kikhapeleleke ekasamento aka. Okhala wiira kinnimphenta Yehova, nkitonko wuupuwela omwalana ni iyaka”. c Akhala wiira ekasamento anyu yookhalana mixankiho, mukupaliki wiira Yehova onimookhaliheryani ovilela.

NVILELEKE HATA IKWAHA SIKINA NFALYARIKI

12. Exeeni ekhanle oniiraneela vaavo nimpaka ahu soottheka suulupale?

¹² Okathi wa mixankiho. Hiyo pooti wuupuwelaka ohiya omurumeela Yehova, okathi yoole  ninttheka ahu. Biibiliya onnooniherya wiira soottheka sahu pooti oniiriha ‘oriipiwa murima ni okhulumuwa’ vanceene. (Esal. 51:17) Munna mosa oniitthaniwa Robert, aaniimananiha mwa iyaakha sinceene wiira ophwanelele okhala murumeyi ookhaliherya. Nuuvira okathi, aahipaka itampi suulupale ni aahoona wiira aahimutthekela Yehova. Owo onihimya so: “Nuumala osuwela wiira kaahimutthekela Yehova, kaahiriipiwa murima vanceene. Nuumala-vo, kaaniithokorerya ntoko mutthu ohirina efaita. Eyo yaahikiiriha wunla ni omuxonttela Yehova. Hata vari siiso, kuupuwela wiira Muluku khaakhala-khala okiwiriyanaka, mwaha woowi kaahimunyoonyiha vanceene”. Okathi nimmutthekela ahu Yehova, pooti oriipiwaka murima ni wuupuwelaka wiira yena ooninyanyala ni khanimphwanela-tho omurumeela. (Esal. 38:4) Akhala wiira eyo yoowiiraneelani, muthokorerye ntakiheryo na mutthu oororomeleya oniromoliwa mbiibiliyani, yoowo ahaahiyale ovilela omurumeelaka Yehova, nnaamwi aapanke itampi suulupale.

13. Ifaalya xeeni Pedru aapanke awe?

¹³ Ntakiheryo na mbiibiliyani. Ohiyu wookiserya Yesu ohinatthi wiiviwa, murummwa Pedru aahipaka soottheka seiyo saamwiirinhe muhoolo mwaya othanana. Wanipacerya, Pedru aaniiroromela vanceene, aakupali wiira hata awiixutti akina amunyanyalaka Yesu, yena khaarowa omuhiya. (Mar. 14:27-29) Ya nenli, okathi aari awe exarti ya oXeseemani, Pedru khaawenrye okhala oowehaweha ni aahipacerya orupa. (Mar. 14:32, 37-41) Muhoolo mwaya, Pedru aahimunyanyala Yesu. (Mar. 14:50) Waanikisa waya, Pedru aahimukhootta Yesu ikwaha tthaaru, mpakha olapha ohimyaka wiira khaamusuwela. (Mar. 14:66-71) Pedru oonenle sai nuumala opaka soottheka iye? Owo aahiriipiwa murima ni aanipacerya wunla woonasa wene uupuwelaka wiira aahikhalana nthowa. (Mar. 14:72) Nuuvira iwoora vakhaani, aahinweha mpatthani awe, Yesu, iiviwaka. Nkuupuwelani moota Pedru aariipiwe awe murima okathi ole! Itthu iyo, saahimwiiriha Pedru wiixoonaka wiira khaarina efaita!

14. Exeeni yaamukhalihenrye Pedru ovilela ni ohihiya omurumeela Yehova? (Nwehe ya vakaapani.)

¹⁴ Sookhala itthu sinceene saamwiirinhe Pedru ovilela ni ohihiya omurumeela Yehova. Owo khaivalaanya ni aahirowa yaari aya anna aarina awe waamini omosa-ru, moohaanyiherya awo yaahimulipiha. (Luka 24:33) Nuumala Yesu ohihimuxiwa, aahirowa vaari awe Pedru okhala wiira aaphavela omulipiha. (Luka 24:34; 1 aKor. 15:5) Muhoolo mwaya, ohiya Yesu ompwapwela Pedru mwaha wa soottheka sawe, owo aahimuleela mpatthani awe wiira aamunvaha Pedru  miritti sinceene. (Yoh. 21:15-17) Nnaamwi Pedru aasuwenle wiira aahipaka soottheka iye, masi owo khaatthikenle ottuli. Mwaha wa xeeni? Mwaha woowi aanikupali wiira mwiixuttihi awe, Yesu, khaahiyale omphenta. Nave anna ale yaarina awe waamini omosa-ru, khiyaahiyale omukhaliherya. Ntakiheryo na Pedru ninniixuttiha exeeni?

15. Yehova oniphavela wiira nikupaliki exeeni? (Esalimo 86:5; aRoma 8:38, 39) (Nwehe efootu.)

¹⁵ Etthu nniixutta ahu. Yehova oniphavela nikupaliki wiira onniniphenta ni onoonilevelela soottheka sahu. (Musome Esalimo 86:5; aRoma 8:38, 39.) Okathi ninttheka ahu, ninniivaha mathowa. Eyo etthu eniiraneya. Nto nihuupuweleke wiira Yehova khonniphenta, maana khonikhala-khala oninyanyalaka. Moowaakuveya nihaana ovekela wiira nikhaliheriwe. Robert, yoowo nimulavunle ahu ittima sivinre, onihimya so: “Kaahipaka soottheka iye, okhala wiira kairoromela mmansaka kuupuwelaka wiira kanwerya oxintta sooweeha”. Nto owo aahilakela orowa ovaanela ni axitokweene. Robert onnincererya ohimyaka so: “Nuumala opaka eyo, moowaakuveya kaahoona wiira Yehova onnikiphenta aarumeelaka axitokweene awo. Nave axitokweene awo khiyaakinya-nyanle. Awo yaahikikhaliherya okupali wiira Yehova khaakinya-nyanle”. Nave hiyo, nikupaliki wiira Yehova onniniphenta, onoonilevelelaka soottheka sahu naattharuwaka moomalela, naavekelaka kikhaliheryo, ni ohitthikela opaka itampi. (1 Yoh. 1:8, 9) Akhala wiira ninnikupali eyo, khaninrowa ohiya omurumeela hata nuumala opaka soottheka.

16. Exeeni mulakenle anyu opaka wiira muhihiye ovilela ni omurumeela Yehova?

¹⁶ Yehova onnihakalala vanceene ni wiimananiha wahu wiira nihihiye omurumeela mahiku ala ookiserya ni ooxankiha. Nikhaliheriwaka ni Yehova, nnoowerya ohihiya omurumeela yena moororomeleya nnaamwi ninyoonyihiwaka. Nto nihihiye waaphenta anna ni arokora ni waalevelela okathi annitthekela aya. Nnoowerya wooniherya omphenta wahu Muluku ni ottittimiha wahu malamulo awe voohimya sa ekasamento, akhala wiira nnoopakaka ele ninwerya ahu wiira niphuke mixankiho mwa enamuna yooloka ni ole nithelanne ahu. Akhala wiira nnoopaka soottheka, nihaana ophavelasa nikhaliheryo na Yehova, weemererya ophenta ni olevelela wawe ni ohihiya omurumeela. Nikupaliki wiira Yehova onoonireeliha vanceene, ‘naahikhulumuwe ovara miteko sooreera’. — aGal. 6:9.