1-2. (a) Xeeni anamathelana a niinaano anireerela aya omuroromela Yehova? (Esalimo 37:3, 4) (b) Mwaha ola, ninrowa othokorerya exeeni?

NIIREKE nyuwo muhanle othela wala otheliwa aahiiso muthelanne niinaano? Akhala wira ti siiso, munnilipelela okhalana okumi woohakalaliha ni mutthu munimphenta anyu vanceene. Masi ekasamento yookhalana mixankiho saya. Nave anamathelana a niinaano ahaana opaka soothanla. Etthu munipaka anyu okathi wa mixankiho ni soothanla sanyu pooti woophwanyihani ohakalala wala nnaari mwa iyaakha sinceene. Masi akhala wira munoomuroromela Yehova ni murima wotheene, nyuwo munoopaka soothanla mwa miruku. Ekasamento anyu enoolipa ni munoohakalalaka vanceene. Masi akhala wira khamunrowa otthara malakiheryo a Muluku, woonasa wene munookhalana mixankiho sinrowa ohonona ekasamento anyu ni khamunrowa ohakalalaka.—Musome Esalimo 37:3, 4.

² Nnaamwi mwaha ola aroiheliwaka anamathelana a niinaano, mixankiho ninrowa wahu othokorerya sinnaaphwanya anamathelana otheene. Nave nnooweha itthu nniixutta ahu ni matakiheryo a alopwana ni athiyana oororomeleya anilavuliwa mBiibiliyani. Biibiliya ookhalana matakiheryo anniixuttiha itthu sinceene ninreerela ahu weettela mikhalelo soovirikana mookumini mwahu ohela muhina mukasamentoni. Ohiya-vo, nnooweha itthu nniixutta ahu ni matakiheryo a anamathelana a mahiku ala arina sookumanana sinceene.

3-4. Mixankiho xeeni woonasa wene sinaaphwanya anamathelana a niinaano?

³ Atthu akina pooti waatumererya anamathelana a niinaano okhalana okumi ntoko anamathelana akina. Mwa ntakiheryo, anamuyari ni amusi aya anamathelana a niinaano pooti waatumererya opacerya waayara anamwane moowaakuveya. Nave apatthani ni amusi akina pooti waatumererya anamathelana a niinaano othuma empa yuulupale ni osarya mireerelo.

⁴ Yaahiivahe ephoole, anamathelana a niinaano pooti opaka soothanla sinrowa owiiriha okopha musurukhu munceene. Nto eyo, pooti owiiriha anamathelana awo oviriha okathi munceene avaraka muteko wira alive musurukhu akomphe aya. Nave muteko aya wa mulaponi pooti owiiyerya okathi yaarowa aya orumeelaka wira amusome Biibiliya, omukokhorela Muluku vatthokoni ni olaleerya. Ohiya-vo, anamathelana pooti opacerya ocompela mithukumano mwaha woovara muteko horas extras aahiiso wira ahoomoliwe omutekoni. Nto akhala wira eyo enookhumelela, awo pooti ohiwerya wuncererya muteko aninvarela aya Yehova.

5. Ntakiheryo na Klaus ni Marisa, niwiixuttinheni exeeni?

⁵ Sowiiraneya sinceene, sinnooniherya wira ohela nipuro noopacerya mihakhu ni mireerelo sa werutthuni khoniphwanyiha ohakalala wekeekhai. Nwehe etthu yaawiiranenle anamathelana Klaus ni Marisa. * Wanipacerya wa ekasamento aya, awo yaanivara muteko waaphwanyiha musurukhu munceene ni mireerelo sinceene sa werutthuni. Masi awo khiyaarina ohakalala wekeekhai. Klaus onihimya so: “Naahikhalana mireerelo sinceene sa werutthuni, masi khinaarina soolukama wira nincererye muteko nanvarela ahu Yehova. Ohimya ekeekhai hiyo naanixanka vanceene”. Woonasa wene, nyuwo muhoona wira ophavela itthu sa werutthuni ni mihakhu khiwoophwanyinheni ohakalala wekeekhai. Akhala wira ti siiso, muhikhulumuwe. Othokorerya matakiheryo aatthu akina, pooti wookhaliheryani opaka marukunuxo. Wanipacerya nrowe niwehe itthu alopwana oothela aniixutta aya ni ntakiheryo na mwene Yosafati.

6. Yosafati aatthanre sai malakiheryo ari Miruku 3:5, 6, okathi muttitthi muulupale waarwiiye aya waatuphela atthu awe?

⁶ Alopwana othela, niireke okathi mukina munnikhulumuwa mwaha wa miritti murina anyu? Akhala wira ti siiso, ntakiheryo na mwene Yosafati nnimookhaliheryani. Okhala wira aari mwene, Yosafati aahaana okhapelela nloko notheene na aisarayeli. Aawenrye sai ovara muteko owo? Yosafati aahipaka sotheene aawerya awe wira okhapelele nloko nne. Owo aahilipiha muttetthe wa oyuda ni aahaathukumanya anakhotto oowerya yaavikana 1.160.000. (2 Wah. 17:12-19) Nuuvira okathi, Yosafati aahikhalana mixankiho sikina suulupale. Anakhotto ootupa a wAmoni, oMowabi ni a mittetthe sa omiyaakoni wa oSeyiri yaahirwa omutuphela Yosafati  ni atthu awe. (2 Wah. 20:1, 2) Yosafati aapanke exeeni? Owo aahinvekela Yehova wira omukhaliherye ni onvaha ikuru. Nave Yosafati aahaatthara ankhili ari Miruku 3:5, 6. (Musome.) Moowiiyeviha, Yosafati aahipaka nivekelo niri 2 Wahala 20:5-12, nenno nnooniherya wira aanimuroromela Tiithi awe a wiirimu, Yehova. Nto Yehova aakhunle sai nivekelo na Yosafati?

7. Yehova aakhunle sai nivekelo na Yosafati?

⁷ Omurumaka mulevi iihaniwa Yahaziyeli, Yehova aahimuleela Yosafati wira: “Nyuwo khamunrowa owanano. Mwemele pahi, mwalitteke: munimona wopowa Apwiya anovahayani”. (2 Wah. 20:13-17) Tthiri ele yaari etthu yootikiniha, maana ekhotto kheniwaniwa siiso. Masi malakiheryo ale khahiyo yaakhuma wa apinaatamu, awo yaakhuma wa Yehova. Omuroromelaka Yehova ni murima wotheene, Yosafati aahitthara malakiheryo aavahiwe awe. Okathi Yosafati ni atthu awe yaaronwe aya okumana ni awanani aya, Yosafati aahaahela ohoolo ohiya anakhotto ootupexa, masi alipa-oowiipa. Yehova aahipaka ele aamuleihenrye awe Yosafati. Maana owo aahaaxintta awanani awe oowerya.—2 Wah. 20:18-23.

8. Ntakiheryo na Yosafati ninwiixuttiha exeeni alopwana oothela?

⁸ Alopwana oothela, ntakiheryo na Yosafati nnoowiixuttihani itthu sinceene. Nyuwo mookhalana muritti wookhapelela etthoko anyu, tivonto muniimananiha anyu vanceene okhaliherya. Okathi munikumana anyu mixankiho, pooti wuupuwelaka wira munoowerya ophuka mixankiho iyo mekhinyu. Masi muhikhala-khale muroromelaka ikuru sanyu, ohiya-vo muri ene mekhinyu muhaana onvekela Yehova wira ookhaliheryeni. Nuumala-vo, nvekeleke muri ene ni mwaarinyu. Mutthareke malakiheryo a Yehova mmusomaka Biibiliya, iliivuru sinimutthokiherya Biibiliya sinikumiheriwa ni mutthenkeso ahu ni weettela malakiheryo muniphwanya anyu. Atthu akina pooti oheemererya soothanla munipaka anyu sinivarihana ni Biibiliya. Nave akina pooti ohimya wira nyuwo mwa mulolo. Ohiya-vo, atthu akina pooti ohimyaka wira musurukhu ni othuma itthu sinceene onimookhaliheryani okhapelela etthoko anyu. Masi muhiliyale ntakiheryo na Yosafati. Owo aahimuroromela Yehova ni aahooniherya eyo ni miteko sawe. Yehova khaamunya-nyanle mulopwana ole oororomeleya ni khonikhala-khala oonyanyalakani. (Esal. 37:28; aHeeb. 13:5) Etthu xeeni ekina anamathelana anireerela aya opaka wira ahakalaleke?

9. Etthu xeeni profeta Yesaya ni mwaarawe yaavaha aya efaita mookumini mwaya?

⁹ Profeta Yesaya ni mwaarawe yaanihela nipuro noopacerya mookumini mwaya omurumeela Yehova. Yesaya aari profeta, nto vanikhala ntoko wira mwaarawe aahikhalana yoothanleliwa awe. Maana Biibiliya onnimuhimya mwaarawe Yesaya okhala “profeta”. (Yes. 8:1-4) Vannooneya wira Yesaya ni mwaarawe yaanihela nipuro noopacerya mookumini mwaya omukokhorela Yehova. Tthiri awo ahaavaha ntakiheryo nooloka anamathelana a mahiku ahu ala!

10. Osoma iprofesia sa mBiibiliyani, onrowa waakhaliherya sai anamathelana ovara muteko wa Yehova mpakha vaniwerya aya?

¹⁰ Anamathelana olelo-va, anoowerya omutakiha profeta Yesaya ni mwaarawe apakaka sotheene aniwerya aya wira avare muteko wa Yehova. Awo anoowerya olipiha omuroromela waya Yehova asomaka iprofesia sa mBiibiliyani hoothe ni oweha moota siiraneyale aya. *  (Tito 1:2) Nave awo pooti wuupuwela etthu akhanle aya oopaka wira akhaliherye wiiraneya wa iprofesia sikina sa mBiibiliyani. Mwa ntakiheryo, awo pooti okhaliherya wiiraneya wa eprofesia ya Yesu yoowi ihapari sooreera sinoolaleiwa elapo yotheene ohinatthi olumwenku omala. (Math. 24:14) Okathi anamathelana anoona aya iprofesia sikina sa mBiibiliyani siiraneyaka, awo anoolipiha yoolakela aya ya wiimananiha ovara muteko wa Yehova.

11. Etthu xeeni Aakila ni Prisila yaapanke aya, ni mwaha wa xeeni?

¹¹ Ntakiheryo na Prisila ni Aakila, nnoowiixuttiha itthu sinceene anamathelana a niinaano. Prisila ni Aakila yaari ayuda yaakhala oRoma. Awo yaahiiwa ihapari sooreera voohimya sa Yesu ni yaahikhala makristau. Moohaanyiherya, awo yaanihakalala vanceene mookumini mwaya. Masi moohipisa itthu saahiturukeya vaavo mukhulupale a oRoma iihaniwa Klaudio aahimmye awe wira ayuda otheene yaahaana okhuma oRoma. Nkahaya muupuwele etthu yaamukhumelenle Aakila ni Prisila. Awo yaahaana okhuma muttetthe yaasuwela aya, ophwanya empa ekina ni omweetta nakoso aya a opaka itenta muttetthe mukina. Niireke oturukeya wa makhalelo waahaakhoottiherya opaka sotheene yaawerya aya wira avare muteko wa Yehova? Woonasa wene, nyuwo munnisuwela waakhuliwa wa nikoho nno. Akhalaka empa aya esya oKorinto, Aakila ni Prisila yaaniimananiha okhaliherya muloko wa muttetthe ole ni wiimananiha ovara hoothe ni Paulo yaalipihaka anna ni arokora a epooma ele. Muhoolo mwaya, awo yaahithaamela ipooma sikina yaahaareere othowa anamalaleerya a Omwene. (Mit. 18:18-21; aRom. 16:3-5) Tthiri anamathelana ale yaaniimananiha ovara muteko wa Yehova ni yaanihakalala!

12. Xeeni vari aya vooloka anamathelana okhalana soolukama sa muteko aninvarela aya Yehova?

¹² Anamathelana a mahiku ala anoowerya omutakiha Prisila ni Aakila ahelaka nipuro noopacerya Omwene. Nto ti vooloka ovaanela voohimya sa soolukama saya okathi annamorari aya. Vaavo anamathelana anikhalana aya soolukama sa ovara muteko wa Yehova ni aniimananiha aya ovara muteko hoothe, eyo enimwaakhaliherya vanceene oweha moota Yehova onaakhaliherya awe mookumini mwaya. (Mus. 4:9, 12) Nkahaya nwehe yowiiraneya  ya Russell ni Elizabeth. Russell onihimya so: “Okathi naanamorari ahu, hiyo naahivaanela soolukama sahu sa moota woowuncerereya muteko nanvarela ahu Yehova”. Vano Elizabeth onihimya so: “Hiyo naahivaanela voohimya sa soolukama sahu wira muhoolo mwaya soothanla sahu sihinikhoottiherye ophwanya soolukama sahu”. Makhalelo a Russell ni Elizabeth yaahiweemererya othaamela oMicronésia wira yarumeeleke muttetthe woothowa anamalaleerya.

13. Moovarihana ni Esalimo 28:7, etthu xeeni enrowa okhumelela akhala wira anamathelana annimuroromela Yehova?

¹³ Amutakihaka Russell ni Elizabeth, anamathelana anceene olelo-va annikhweiherya okumi aya wira aviriheke okathi munceene alaleeryaka ni awiixuttihaka atthu ihapari sooreera sa Omwene. Okathi anamathelana anikhalana aya soolukama wira yincererye muteko aninvarela aya Yehova ni aanimananiha aya hoothe wira aphwanye soolukama iyo, sinnaakhumelela itthu sinceene sooreera. Nave okathi anoona aya wira Yehova onnaakhapelela, omuroromela waya onnilipa ni anniphwanya ohakalala wekeekhai.—Musome Esalimo 28:7.

14. Murummwa Pedru ni mwaarawe yoonihenrye sai wira yaaniroromela yooleiherya eri Matheyo 6:25, 31-34?

¹⁴ Ntakiheryo na murummwa Pedru ni mwaarawe nnoowiixuttiha itthu sinceene anamathelana. Nuuvira myeeri 6 okhuma ekwaha yoopacerya murummwa Pedru aamusuwenle awe Yesu, murummwa Pedru aahaana opaka yoothanla ya efaita yinceene. Pedru aatotha ihopa wira okhapeleleke etthoko awe. Nto nuumala Yesu omulattula Pedru wira okhale mutthareli awe, Pedru aahaana omuupuwela mwaarawe ohinatthi opaka yoothanla. (Luka 5:1-11) Masi Pedru aahithanla olaleerya hoothe ni Yesu! Yoothanla Pedru aapanke awe yaari ya miruku. Hiyo ninnikupali ni murima wotheene wira mwaarawe Pedru aahikhaliherya yoothanla ya iyawe. Biibiliya onnooniherya wira nuumala Yesu ohihimuxiwa, mwaarawe Pedru aanimuhoola Pedru mikwaha eetta awe. (1 aKor. 9:5) Moohaanyiherya, okhala wira mwaarawe Pedru aari muthiyana ooloka, eyo yaahimukhaliherya Pedru waavaha miruku alopwana othela ni athiyana ootheliwa. (1 Ped. 3:1-7) Vannooneya oratteene wira Pedru ni mwaarawe yaaniroromela sooleiherya sa Yehova. Maana yaanikupali ni murima wotheene wira yahela nipuro noopacerya Omwene, Yehova aamwaavaha itthu sikina.—Mmusome Matheyo 6:25, 31-34.

15. Yowiiraneya ya Tiago ni Esther, ewiixuttinheni exeeni?

¹⁵ Ale athelanne iyaakha vakhaani sivinre anrowa wuncererya sai muteko aninvarela aya Yehova? Enamuna emosa ori wuupuwela sowiiraneya sa anamathelana akina. Mwa ntakiheryo, nyuwo pooti osoma myaha sini: “Awosa Yaahiivahererya Ni Murima Aya Wotheene”. Myaha iyo saahaakhaliherya anamathelana a oBrasil, Tiago ni Esther, yaawo yaaphavela orowa orumeela mapuro oothowa anamalaleerya. Tiago onihimya so: “Okathi naasoma ahu moota Yehova onaakhaliherya awe arumeyi awe a mahiku ahu ala, hiyo nave naaniphavela otthara miruku sa Yehova ni oweha moota aarowa awe onikhaliherya mookumini mwahu”. Mwaakha wa 2014, awo yaahithaamela oParaguai wira yarumeeleke mapuro oothowa anamalaleerya muloko yaalavuliwa Ekunya. Esther onihimya so: “Yoolepa ennisivela vanceene ti aEefeso 3:20. Ikwaha sinceene ninniweha moota yoolepa ela eniiraneya aya mookumini mwahu vaavo ninvara ahu muteko wa Yehova”. Ekarta Paulo aalepenle awe aEefeso, owo onnilavula yooleiherya ya Yehova yoowi onoonivaha itthu sinceene ovikana iye  nninvekela ahu. Tthiri yooleiherya ela enniiraneya ikwaha sinceene!

16. Anamathelana a niinaano yaavekeleke aani miruku akhala wira anoona wira ahaana ovarerya soolukama saya sa omunepani?

¹⁶ Olelo-va, anamathelana a niinaano anoottottela mureerelo sowiiraneya sa atthu akina yiixuntte omuroromela Yehova. Anamathelana akina aaviriha iyaakha sinceene avaraka muteko wa Muluku wa okathi wotheene. Munoonela sai ovekela miruku akhala wira munoona wira muhaana ovarerya soolukama sanyu? Eyo enamuna ekina munrowa anyu wooniherya wira munnimuroromela Yehova. (Mir. 22:17, 19) Nave axitokweene, pooti waakhaliherya anamathelana a niinaano okhalana ni ophwanya soolukama saya sa omunepani.

17. Etthu xeeni yaamwiiranenle Klaus ni Marisa? Yowiiraneya aya, enniixuttiha exeeni?

¹⁷ Okathi mukina, yoolakela ahu ya wuncererya muteko nninvarela ahu Yehova pooti ohiiraneya ntoko naaphavela ahu. Eyo ti etthu yaawiiranenle anamathelana Klaus ni Marisa naalavunle ahu wanipacerya. Nuumala ovira iyaakha 3 athelanne ene, awo yaahithaama empa aya wira yakhaliheryeke otekiwa efiliyaali ya oFinlândia. Masi awo yaahileeliwa wira khiyaarowa weemereriwa oviriha myeeri sinivikana 6. Wanipacerya, awo yaahixanka. Masi itthu saahiturukeya moowaakuveya, maana yaahilattuliwa orowa osoma nttaava Árabe. Moohakalaliha olelo-va, awo anirumeela elapo ekina muttetthe ninlavuliwa nttaava Árabe. Uupuwelaka itthu saamwiiranenle, Marisa onihimya so: “Miyo kaanoova opaka itthu kihaatonko aka opaka. Nto kaahaana omuroromela moomalela Yehova. Masi kihoona moota Yehova onnikhaliherya awe mwa inamuna nihaalipelela ahu. Yowiiraneya ele yookikhaliherya olipiha omuroromela waka Yehova”. Ntoko enooniherya ya yowiiraneya ela, nyuwo mukupaliki ni murima wotheene wira Yehova onimookhaliheryani akhala wira munoomuroromela ni murima wotheene.

18. Anamathelana ahaana opaka exeeni wira ahihiye omuroromela Yehova?

¹⁸ Ekasamento yoovaha enikhuma wa Yehova. (Math. 19:5, 6) Nto Yehova oniphavela wira nyuwo mpuheke yoovaha eyo. (Mir. 5:18) Anamathelana a niinano, niireke munnivarerya moota munirumeela anyu okumi anyu? Niireke munnipaka itthu muniwerya anyu wira mmooniherye Yehova omuxukhurela wanyu mwaha wa yoovaha eyo? Akhala wira ti siiso, mmuleeleke Yehova. Mutokoseke malakiheryo ari nuulumo nawe, Biibiliya ni nweheke ale anivarihana ni makhalelo anyu. Nuumala-vo, mutthareke miruku Yehova onoovahaaweni. Mukupaliki ni murima wotheene wira munoohakalalaka akhala wira munoohela nipuro noopacerya mookumini mwanyu omurumeela Yehova!