1. Woonasa wene, makoho xeeni nniikoha ahu?

NIIREKE okathi mukina nyuwo munnixanka vaavo munuupuwela anyu itthu sinrowa wiiraneya moohipisa ntoko opwetexiwa wa etiini yoowootha, otupheliwa ni Gogi a Omagogi ni ekhotto ya Armagedoni? Woonasa wene, nyuwo munniikoha so: ‘Waphiya okathi owo, kiireke kinoowerya ohihiya ororomeleya?’ Akhala wira nyuwo munniipakela makoho awo, etthu Yesu aahimmye awe ntoko enooniherya aya yoolepa ya mwaha ola, enimookhaliheryani vanceene. Yesu aahaaleela awiixutti wira: “Muhixanke. Mooniheryeke omwaamini Muluku”. (Yoh. 14:1) Olipiha waamini wahu niinaano-va, onoonikhaliherya ovilela itthu sinrowa onikhumelela muhoolo.

2. Ninrowa olipiha sai waamini wahu? Mwaha ola, ninrowa othokorerya exeeni?

² Akhala wira ninnuupuwela niinaano-va itthu ninrowa ahu opaka vaavo sinrowa aya onikhumelelaka itthu sinrowa weehereryaka waamini ahu, eyo enoonikhaliherya olipiha waamini wahu wira nivilele mixankiho sa muhoolo. Nto vaavo hiyo nnuupuwela ahu eyo, nnooweha mipantta ninreerela ahu olipiha waamini wahu. Musuweleke wira khula muxankiho ninviriha ahu niinaano-va onoolipiha waamini wahu. Eyo enoonikhaliherya ovilela mixankiho sa muhoolo. Mwaha ola, nnooweha mixankiho 4 awiixutti yaarina aya seiyo sinooniherya wira yaahaana wuncererya waamini waya. Nave nnoothokorerya moota nikhanle ahu oovilela mixankiho olelo-va ni wiilokiherya wira nivilele mixankiho sinrowa onikhumelela muhoolo.

3. Moolumo a Yesu ari Matheyo 6:30, 33, annikupaliha exeeni?

³ Okhala wene, ahooleli a itthoko annaavaha yoolya, ikuwo ni opuro wookhala amwaraaya ni anaaya. Olumwenku ola ohireere mixankiho, khivanikhweya opaka eyo. Anna ni arokora  akina aayeleela muteko yaavara aya hata yiimananiha vanceene. Anna akina khiyeemerenrye ovara muteko mukristau ohinreerela awe ovara. Akhala wira eyo enimwiiraneya mukupaliki ni murima wotheene wira Yehova onimookhaliheryani ophwanya itthu wira mukhapeleleke etthoko anyu. Yesu aahooniherya eyo okathi aalavula awe Mwaha awe Vamwaako. (Mmusome Matheyo 6:30, 33.) Akhala wira ninnikupali ni murima wotheene wira Yehova khonkhala-khala oninyanyalaka nnoowerya oweha etthu ya efaita yinceene, eyo piiyo, Omwene. Nto vaavo ninrowa ahu owehaka moota Yehova onnikhaliherya awe onivahaka itthu sa weerutthuni, eyo enoonikhaliherya omwaattamela Yehova ni olipiha waamini wahu.

4-5. Etthu xeeni yaakhalihenrye emusi emosa okathi yaaxanka aya mwaha woohiphwanya yoolya?

⁴ Nwehe yowiiraneya ya emusi emosa ya oVenezuela. Awo yaahoona moota Yehova aakhalihenrye awe okathi yaaxankale aya moota woophwanya mireerelo sa weerutthuni. Mwa okathi munceene, emusi ya Castro yaaniphwanya musurukhu ni yoolya alimaka mmatta mwaya. Nuumala-vo, alopwana yaakunxe ikapwitthi, yaahiwoomola ni yaahikuxa ematta aya. Paapa aya oniihaniwa Miguel, onihimya so: “Vano hiyo ninlipa ni itthu ninlima ahu ematta yaamukhaani noolihiwa ahu. Khula nihiku miyo kinninvekela Yehova wira onivahe itthu sinnithowa sa khula nihiku”. Nnaamwi emusi ele ehireerane mixankiho, awo annikupali ni murima wotheene wira Tiithi ihu onimwaavaha itthu sinaathowa sa khula nihiku. Nave emusi ya Castro khenihiya orowela mithukumano, wiirela mpantta ni olaleerya. Tthiri awo, annihela nipuro noopacerya Omwene, nto Yehova onnaavaha itthu sinaathowa.

⁵ Mahiku ala ooxankiha, Miguel ni mwaarawe oniihiwani Yurai anniimananiha oweha moota Yehova onaakhapelela awe. Okathi mukina, Yehova onnaaruma anna ni arokora wira anvahe Miguel itthu sinaathowa ni omukhaliherya ophwanya muteko. Nave ikwaha sikina, Yehova onnirumeela efiliyaali ya elapo aya wira yaavahe itthu sinaathowa. Yehova khonikhala-khala aanyanyalaka, nto eyo yoolipiha vanceene waamini waya. Nuumala ohimya yowiiraneya emosa ya moota Yehova aakhalihenrye awe, mwanaya mwamuthiyana muulupale oniihaniwa Yoselin, ohimmye so: “Ti voolipiha vanceene oweha moota Yehova onnikhaliherya awe. Owo mpatthani aka kinlipanaka okumi aka wotheene”. Yoselin onincererya so: “Mixankiho emusi aka yaarina aya soonikhaliherya wira niwerye ovilela mixankiho sinrowa onikhumelela muhoolo”.

6. Etthu xeeni enrowa wookhaliheryani olipiha waamini wanyu vaavo munithoiwa anyu musurukhu?

⁶ Niireke khamureere othoiwa musurukhu? Akhala wira ti siiso, ola okathi wooxankiha mookumi mwanyu. Masi nyuwo pooti orumeela okathi ola wa mixankiho wira mulipihe waamini wanyu. Munvekeleke Yehova, musomeke ni muupuweleleke moolumo a Yesu ari Matheyo 6:25-34. Nave muthokoreryeke sowiiraneya sa atthu a mahiku ala sa moota Yehova onaakhaliherya awe ale aniluttuweliwa ovara miteko sawe. (1 aKor. 15:58) Akhala wira munoopaka eyo, nyuwo munoolipiha omuroromela  wanyu Yehova wira ntoko aakhalihenrye awe atthu akina yaarina mixankiho simosaru ntoko sawinyu, owo onimookhaliheryani. Muhiliyale wira Yehova onnisuwela itthu sinoothowani nave onnisuwela moota okhanle awe oowookhaliheryani. Vaavo munrowa anyu owehaka moota Yehova onookhaliheryaaweni mookumi mwanyu, waamini wanyu onrowa otepaka olipa ni munoowerya ovilela mixankiho suulupale sinrowa okhumelela muhoolo.—Hab. 3:17, 18.

7. Moovarihana ni Matheyo 8:23-26, “epheyo yuulupale” yeeherenrye sai waamini wa awiixutti?

⁷ Okathi Yesu ni awiixutti awe eetta awe mukwaha mphareya, mootutuxerya yaahikhumelela epheyo yuulupale. Yesu aahirumeela okathi ole wira aakhaliherye awiixutti awe woona wira yaahaana olipiha waamini waya. (Mmusome Matheyo 8:23-26.) Epheyo ele yaari yuulupale, nto mawimpi a mphareya yaahisarya maasi mukalawani, masi Yesu iira orupaka. Okathi awiixutti ale yanvenxale aya Yesu ni onvekela wira owoopole, Yesu aahaakoha oriki: “Munoovela-ni, nyuwo oowaamini vakhaani?” Awiixutti ale yaahaana osuwela wira Yehova anwerya omukhapelela Yesu ni atthu ale aarina awe. Niireke mooweha etthu nniixutta ahu va? Waamini woolipa, pooti onikhaliherya ovilela “epheyo yuulupale” ni mixankiho suulupale sinlikana ni epheyo.

8-9. Waamini wa Anel weehereriwe sai? Etthu xeeni yaamukhalihenrye Anel?

⁸ Nwehe yowiiraneya na Anel murokora oohitheliwa onikhala oPorto Rico. Owo aahikhalana muxankiho muulupale weeherenrye waamini wawe. Waamini wawe waaheehereriwa ni “epheyo yuulupale”. Mwaakha wa 2017, sikoloni iihaniwa Maria aahinyaanya empa ya Anel. Sikoloni ole, aahimwiiriha Anel oyeleela muteko awe. Anel onihimya so: “Mahiku ale ooxankiha, kaahixanka vanceene, masi kaahiixutta omuroromela Yehova kinvekelaka ni nkeemerenrye oxanka okiirihaka ohiya opaka itthu kaareerelaka opaka”.

⁹ Anel onnihimya etthu ekina yaamukhalihenrye okathi ole wooxankiha. Etthu xeeni? Wiiwelela. Anel onihimya so: “Otthara malakiheryo a mutthenkeso, aakikhaliherya okhala oomaaleleya. Kihoona wira Yehova aanikikhaliherya aarumaka anna ni arokora. Awo yaanikilipiha ni yaanikivaha itthu saakithowa. Anel onincererya oriki: “Yehova ookivaha itthu sinceene ovikana iye kanvekenle aka. Nto eyo, yoolipiha vanceene waamini waka”.

10. Etthu xeeni mukhanle anyu oopaka akhala wira ehoophwanyani “epheyo yuulupale”, niire so, muxankiho?

¹⁰ Niireke yookhala “epheyo yuulupale”, niire so, muxankiho muniwanana anyu? Pooti wira muxankiho anyu ehasara ya ephattu yookhumelenleni. Nave pooti wira mookhalana mixankiho sikina ntoko owereyasiwa, weiwo onookhulumulani ni muhinoona etthu yoopaka. Okathi mukina nyuwo pooti oxanka. Masi muheemererye oxanka owiirihakani ohiya omuroromela Yehova. Nmwaattameleke Yehova munvekelaka, nave mulipihe waamini wanyu muupuwelaka moota Yehova ookhalihenryaaweni khalai. (Esal. 77:12, 13) Mukupaliki ni murima wotheene  wira Yehova khonikhala-khala oonyanyalakani niinaano-va nnakhala muhoolo.

11. Xeeni vari aya vooloka owiiwelela anna annihoolela?

¹¹ Etthu xeeni ekina enrowa wookhaliheryani ovilela mixankiho? Anel ohimmye wira ti wiiwelela. Muhaana wiixutta waaroromela atthu Yehova ni Yesu yaathanlale aya wira anihooleleke. Okathi mukina, anna awo pooti onivaha malakiheryo nnoona wira toohiloka. Masi muhiliyale wira Yehova onnaareeliha atthu oowiiwelela. MBiibiliyani aakhala matakiheryo a arumeyi oororomeleya a Muluku yooponwe mwaha wa wiiwelela. (Okhum. 14:1-4; 2 Wah. 20:17) Nto muhaana wuupuwelela matakiheryo awo. Akhala wira munoopaka eyo, munoolipiha yoolakela anyu ya otthara malakiheryo ninvahiwa ahu ni mutthenkeso wa Yehova niinaano-va ni ninrowa ahu ovahiwa muhoolo. (aHeeb. 13:17) Akhala wira munoopaka eyo, nyuwo khamunrowa woova maxakha maalupale anrowa okhumelela moohipisa.—Mir. 3:25.

12. Moovarihana ni Luka 18:1-8, ovarihana xeeni okhanle eriyari ya waamini ni ovilela ohixariya?

¹² Yesu aanisuwela wira ohixariya waamweehereryaka waamini wa awiixutti awe. Nto wira aakhaliherye ovilela ohixariya, Yesu aahipaka nlikanyiho niri eliivuru ya Luka. Yesu aahilavula nlikanyiho na naamukhweli aamuxonttela mulipa-oophuka oohixariya. Naamukhweli ole aanikupali ni murima wotheene wira akhala wira aamuthipelela aamukhaliheriwa. Nuuvira okathi, mulipa-oophuka ole oohixariya aahipaka ele naamukhweli ole anvekenle awe. Nniixutta exeeni? Yehova ta xariya. Yesu aahimmye so : “Niireke Muluku khonrowa waakhaliherya ale aathanlale awe, yaawo animukhuwelela othana ni ohiyu wira yiireliwe exariya?” (Mmusome Luka 18:1-8.) Nave, Yesu aahincererya oriki: “Okathi Mwaana a mutthu onrwa awe, niireke tthiri onimwaaphwanya atthu oowaamini vathi-va?” Akhala wira nnoovilela ni othipelela okathi nniireliwa ahu itthu soohixariya, nnimooniherya wira nookhalana waamini woolipa ntoko wa naamukhweli ole. Nto waamini iwo onoonikhaliherya okupali ni murima wotheene wira vanapisaka Yehova onoonikhaliherya. Nave nihaana okupali ni murima wotheene wira nivekelo ninnikhaliherya vanceene. Okathi mukina, mavekelo ahu pooti waakhuliwa mwa enamuna nihaalipelela ahu.

13. Nivekelo naakhalihenrye sai emusi emosa okathi yaathokoreriwa aya voohixariya?

¹³ Nwehe yowiiraneya ya murokora oniihaniwa Vero, yoowo onikhala oRepública Democrática do Congo. Murokora Vero, iyawe ohikhanle Namoona a Yehova ni mwanaya mwaamuthiyana orina iyaakha 15, yaahaana otthyawa muttetthe yaakhala aya okathi waatupheliwe aya ni atoropa. Okathi yaatthyawa aya, awo yaahiphiya ephiro yaattiiwale ni atoropa. Nto atoropa ale yaahiwoopopiha wira yanwiiva. Okathi Vero anla awe, mwanawe mwamuthiyana aahipacerya ovekela ni nsu nowiiwanyeya orumeelaka nsina na Yehova. Nuumala omaliha ovekela, mukhulupale aatoropa ale aahimukoha wira: “Mwali, tani owiixuttinheni ovekela?” Owo aahimwaakhula wira: “Maama aka tokiixuttinhe  orumeelaka nivekelo na ntakiheryo niri Matheyo 6:9-13”. Mukhulupale aatoropa ale aahimuleela so: “Mwali muroweke ni murettele ni anamuyari anyu. Yehova Muluku anyu ookhapeleleni!”

14. Etthu xeeni ekhanle ooweehererya waamini wahu ni etthu xeeni enrowa onikhaliherya ovilela?

¹⁴ Sowiiraneya ntoko iya, sinninooniherya wira nihikhala-khale niliyalaka wira nivekelo nookhalana efaita yinceene. Masi ankhi akhala wira mavekelo anyu khanaakhuliwa ntoko mwaaphavela anyu? Mmutakihaka naamukhweli Yesu aamulavunle awe nlikanyiho nawe, muhihiye ovekela ni mukupaliki wira Muluku khonikhala-khala oonyanyalakani, nto okathi wooreerela owo onimwaakhula mavekelo anyu. Nave muhihiye omuxonttela Yehova wira oovaheeni munepa awe woowaarya. (aFil. 4:13) Muupuweleke wira moohipisa Yehova onimooreelihani ni munooliyala mixankiho sotheene sookhumelenleni. Vaavo muhinihiya anyu ovilela mixankiho mukhaliheriwaka ni Yehova, waamini wanyu onoolipa vanceene ni munoowerya ovilela mixankiho sinrowa wookhumelelani muhoolo.—1 Ped. 1:6, 7.

15. Ntoko onooniherya awe Matheyo 17:19, 20, muxankiho xeeni awiixutti a Yesu yaarina aya?

¹⁵ Yesu aahiwiixuttiha atthareli awe wira waamini waamwaakhaliherya oxintta mixankiho. (Mmusome Matheyo 17:19, 20.) Okathi omosa, awiixutti a Yesu khiyaawenrye woomola nlaikha nootakhala hata yaatonko woomola khalai ene. Etthu xeeni yaawiirinhe ohiwerya woomola nlaikha nne nootakhala? Yesu aahimmye wira yaahaana wuncererya waamini waya. Nave Yesu aahaaleela wira akhala wira yaamukhalana waamini woolipa, awo yanwerya oxintta mixankiho sinlikana ni myaako! Olelo-va, hiyo pooti okhalana mixankiho suulupale seiyo nnoona ahu wira khaninrowa owerya oxintta.

16. Waamini waamukhalihenrye sai murokora Geydi ovilela okhweliwa iyawe?

¹⁶ Nwehe yowiiraneya ya murokora Geydi, yoowo onikhala oGuatemala. Iyawe iihaniwa Edi, aahiiviwa okathi yaatthikela aya owaani akhumaka omithukumanoni. Waamini waamukhalihenrye sai murokora Geydi ovilela muxankiho ole muulupale? Owo onihimya so: “Ovekela wookikhaliherya vanceene onvahererya Yehova muxankiho aka. Nto kinniphwanya murettele. Kihoona moota Yehova onikikhapelela awe aarumeelaka amusi, apatthani ni anna ni arokora a mmulokoni. Oluttuweliwa ovara miteko sa Yehova, onnikikhaliherya ovukula oriipiwa waka murima ni oviriha khula nihiku kihixankaka mwaha wa itthu sinrowa okikhumelela meelo. Nuumala okikhumelela muxankiho ole wooriipiha murima, kihiixutta wira moohicikha enamuna ya muxankiho onrowa okikhumelela muhoolo, kinoowerya ovilela kikhaliheriwaka ni Yehova, Yesu ni mutthenkeso wa Yehova”.

17. Etthu xeeni ninreerela ahu opaka akhala wira nookhalana mixankiho sinlikana ni myaako?

¹⁷ Niireke mooriipiwa murima mwaha wa okhweliwa mutthu mwamphenta anyu? Akhala wira ti siiso, mulipihe waamini wanyu nlipelelo na ohihimuxiwa musomaka sowiiraneya sa mBiibiliyani sa atthu yaahihimuxiwe. Niireke  nyuwo muriipiwe murima mwaha woowi mmusi anyu orookumihiwa mmulokoni? Akhala wira ti siiso, muhihiye okupali ni murima wotheene wira ottaruxa wa Muluku ti wootepexa oloka. Moohicikha enamuna ya muxankiho muniwanana anyu, murumeeleke okathi owo wa mixankiho wira mulipihe waamini wanyu. Munvekeleke Yehova ikwaha sinceene. Muhiivalaanyeke, ohiya-vo mukhaleke hoothe ni anna ni arokora. (Mir. 18:1) Nave muhihiye ovara miteko sinrowa wookhaliheryani ovilela hata nvaraka miteko iyo munlaka mwaha wa wuupuwela itthu sookhumelenleni. (Esal. 126:5, 6) Nave-tho muhihiye orowela mithukumano, olaleerya ni omusoma Biibiliya. Etthu ekina munireerela anyu opaka ori ohihiya wuupuwela itthu soovara murima Yehova ooleihenryaaweni muhoolo. Nto okathi munrowa anyu owehaka moota Yehova onookhaliheryaaweni, munootepaka olipiha waamini wanyu ni omuroromela wanyu Yehova.

18. Akhala wira munoona wira waamini wanyu onnivukuwa, etthu xeeni mukhanle anyu oopaka?

¹⁸ Niireke mixankiho sookhumelenleni khalai wala murina anyu niinaano-va, soovukula waamini wanyu? Akhala wira ti siiso, muhikhulumuwe. Murumeeleke okathi owo wa mixankiho wira mulipihe waamini wanyu. Mpakeke etthu emosaru yaapanke aya arummwa a Yesu. Awo yaahinvekela Yesu wira: “Muncererye waamini wahu”. (Luka 17:5) Nave muupuweleleke matakiheryo aatthu naalavunle ahu mwaha ola. Mmutakihaka Miguel ni Yurai, muhiliyale wira okathi wotheene Yehova onninikhaliherya. Nave mmutakihaka mwaana mwamuthiyana a Vero ni Anel, muhihiye onvekela Yehova, otepexa wene okathi munikhalana anyu mixankiho suulupale sinlikana ni myaako. Ohiya-vo, ntoko Geydi, muhiliyale wira Yehova onoowerya wookhaliheryani aarumeelaka amusi ni apatthani anyu. Akhala wira munoomweemererya Yehova wookhaliheryani mixankiho sanyu, munrowa okupaliki ni murima wotheene wira onimookhaliheryani ovilela mixankiho sinrowa wookhumelelani muhoolo.

19. Etthu xeeni Yesu aakupali awe, ni etthu xeeni nyuwo munireerela anyu okupali?

¹⁹ Yesu aahiwooniherya awiixutti awe mapuro yaareerela aya olipiha waamini waya. Masi aanisuwela wira Yehova aamwaakhaliherya ovilela mixankiho saarowa waakhumelela muhoolo. (Yoh. 14:1; 16:33) Nave Yesu onnisuwela oratteene wira muttitthi muulupale wa atthu onimoopowa okathi wa maxakha maalupale mwaha wa waamini waya woolipa. (Wiis. 7:9, 14) Niireke nyuwo munookhala eriyari ya atthu awo? Mukhaliheriwaka ni Yehova, nyuwo munookhala. Nto muhaana opaka itthu sotheene muniwerya anyu wira mulipihe waamini wanyu niinaano-va!—aHeeb. 10:39.