1. Exeeni nikhanle ahu oolipelela aka, nto nikupaliki exeeni?

 HIYO ninnilipelela wira nnoolupatthiwaka okathi ninrowa ahu ovaraka muteko ahu woolaleerya. Nave olupatthiwa iwo pooti wuncerereyaka muhoolo. (Dan. 11:44; 2 Tim. 3:12; Wiis. 16:21) Masi, nikupaliki wira Yehova onoopaka khula etthu wira onikhaliherye. Mwaha wa xeeni? Mwaha woowi Yehova onnaakhaliherya arumeyi awe, omaleliha miteko saya hata sikhalaka sooxankiha. Mwa ntakiheryo, nrowe nithokorerye etthu yaamwiiranenle profeta Ezekiyeli, yoowo aalaleerya ayuda yaatthukweliwe oBabilonia.

2. Yehova aahimmye wira atthu a mukhalelo xeeni Ezekiyeli aalaleerya awe? Nto exeeni ninrowa ahu othokorerya mwaha ola? (Ezekiyeli 2:3-6)

² Atthu a mukhalelo xeeni Ezekiyeli aalaleerya awe? Yehova aahaahimya atthu Ezekiyeli aarowa awe waalaleerya wira yaari “atthú òwisona”, “òtakhala murima” ni “òhìwelela”. Otakhala waya waalikana ni miiwa, nave woopiha waya waalikana ni makharanace. Ti nthowa naya Yehova aamulenle awe profeta Ezekiyeli ikwaha sinceene wira: “Muhiwové”! (Mmusome Ezekiyeli 2:3-6.) Ezekiyeli aahiwerya omaleliha muteko awe woolaleerya mwaha woowi (1) aarummwale ni Yehova, (2) owo aahilipihiwa ni munepa woowaarya wa Muluku ni (3) aahilipihiwa ni nuulumo na Muluku. Moota xeeni itthu iya tthaaru saamukhalihenrye aya profeta Ezekiyeli? Nave sinrowa onikhaliherya sai olelo-va?

3. Moolumo xeeni woonasa wene yaamulipinhe profeta Ezekiyeli, ni moota xeeni Yehova aamulipihenrye awe wira ammukhaliherya?

³ Yehova aahimuleela Ezekiyeli so: “Miyo kinorumani”. (Ezek. 2:3, 4) Nto moolumo ala yaahimulipiha vanceene Ezekiyeli. Mwaha wa Xeeni? Woonasa wene, Ezekiyeli aahuupuwela wira Yehova aahirumeela moolumo mamosa-ru okathi aathanla awe maprofeta awe Moise ni Yesaya. (Okhum. 3:10; Yes. 6:8) Nave Ezekiyeli aanisuwela moota Yehova aakhalihenrye awe maprofeta awe ale anli omaleliha soothanleliwa saya. Nto okathi Yehova aamulenle awe ikwaha piili profeta Ezekiyeli wira: “Miyo kinorumani”, profeta ole aahikhalana mathowa ooloka ookupali wira Yehova ammukhaliherya. Ti nthowa naya profeta Ezekiyeli aalempe awe ikwaha sinceene moolumo oowi: “Owerya w’Apwiya wahikirwela miyo n’ikuru sulupale”. (Ezek. 3:14) Nave-tho profeta owo aahilepa ikwaha sinceene moolumo oowi: “Apwiya yahikilavuliha”. (Ezek. 6:1) Moohaanyiherya, Ezekiyeli aanikupali wira aarummwale ni Yehova. Okhala wira aari mwaana a namukuttho, Ezekiyeli aahiixuttihiwa ni paapa awe moota Yehova aakhalihenrye awe maprofeta awe a khalai. Mwa ntakiheryo, Yehova aahimuleela Isakhi, Yakobe ni Yeremiya moolumo ala: “Miyo kiri ni nyuwo”. — Maph. 26:24; 28:15; Yer. 1:8.

4. Moolumo xeeni oomaaliha woonasa wene yaamukhalihenrye profeta Ezekiyeli?

⁴ Moota xeeni aisarayeli anceene yoonenle aya muhupi wa Ezekiyeli? Yehova aahimmye so: “Masi atthu a Isarayeli khantthuna wowiriyanani mana khantthuna okìwa”. (Ezek. 3:7) Mwaha wookhootta wiiwa muhupi aalaleya awe Ezekiyeli, atthu awo yaahooniherya wira yaamukhootta Yehova. Masi eyo, khiyaataphulela wira profeta ole khaavanre saana muteko awe. Nave Yehova aahimuleela profeta Ezekiyeli wira akhala wira itthu iye sootheene aahimmye awe saamwiiraneya, atthu  ale ‘yamusuwela wira eriyari aya òkhala profeta’. (Ezek. 2:5; 33:33) Moohaanyiherya, moolumo ale oomaaliha yaahimukhaliherya Ezekiyeli okhala oolipa wira ovare muteko awe saana.

5. Moota xeeni yoolepa ya Yesaya 44:8, ennilipiha aya?

⁵ Olelo-va, hiyo ninnilipa murima okathi ninvara ahu muteko woolaleerya okhala wira nirummwale ni Yehova. Owo onninttittimiha oniitthanaka okhala anamoona awe. (Yes. 43:10) Tthiri eyo eparakha yuulupale! Sintoko siisaale Yehova aamulenle awe Ezekiyeli wira: “muhové”, olelo-va Yehova onnaaleela arumeyi awe so: “muhov’etthu, muhituthuweké”. Exeeni enniiriha ohiwoova awanani ahu? Okhala wira, ntoko profeta Ezekiyeli, hiyo nirummwale ni Yehova ni owo onninikhaliherya. — Mmusome Yesaya 44:8.

6. (a) Exeeni Yehova onnileiherya awe? (b) Exeeni ennikhaliherya okhala oolipa murima?

⁶ Yehova onnileiherya wira onoonikhaliherya. Mwa ntakiheryo, ohinatthi Yehova ohimya wira: “Anamon’aka ti nyuwo”, owo aahimmye so: “Mwalapuwaka miró sosareya màsi, miyo kiri ni nyuwo: mwavirá mmàsini mowixa, màsi awo khanosamihani. Mwaviraka eriyari ya moro, khamumpahiwa: malumi a moro khaniwirelani sotakhala”. (Yes. 43:2) Okathi ninlaleerya ahu, ikwaha sikina sinniniphwanya sooweeha seiyo sinlikana ni miro soosareya maasi nave mixankiho sinlikana ni mooro. Hata vari siiso, nikhaliheriwaka ni Yehova hiyo khannihiya olaleerya. (Yes. 41:13) Sintoko siisaale mahiku a Ezekiyeli, atthu anceene olelo-va annikhootta muhupi nnaalaleerya ahu. Masi eyo khentaphulela wira khaninsuwela olaleerya saana. Nave ninnikhala oolipa mwaha woosuwela wira Yehova onnitteeliwa murima mwaha woohihiya olaleya muhupi awe. Murummwa Paulo aahimmye so: “Khula mutthu onimwaakhela etthuvo awe enivarihana ni muteko awe”. (1 aKor. 3:8; 4:1, 2) Murokora mmosa opacenrye ovara muteko wa opioneero okhuma khalai, ohimmye so: “Osuwela wira Yehova onrowa okitthuvela mwaha wa wiimananiha waka, eyo ennikitteeliha murima vanceene”.

7. Ezekiyeli oonenle sai nuumala wuupuwelela itthu aawenhe awe? (Nwehe elatarato ya ekaapa.)

⁷ Profeta Ezekiyeli aahoona owerya munepa wa Muluku orina aya. Etthu profeta Ezekiyeli aaweha awe yaahimukhaliherya osuwela wira munepa woowaarya waahikhaliherya malaikha oowerya ni waaheettiha ekaaro yuulupale ya wiirimu. (Ezek. 1:20, 21) Profeta Ezekiyeli oonenle sai itthu aawehihiwe awe? Owo aahilepa etthu yaamukhumelenle, ohimyaka so: “Okathi wonalyaka etthu ile, kahikokhora, khwipophela vathí”. Ezekiyeli aahitikinihiwa vanceene khumorela vathi. (Ezek. 1:28) Muhoolo mwaya, okathi Ezekiyeli uupuwelenle awe itthu aawenhe awe, owo aahoona wira anwerya ovara muteko awe okhaliheriwaka ni munepa woowaarya.

8-9. (a) Exeeni Yehova aamurumme awe profeta Ezekiyeli? (b) Yehova aamulipinhe sai Ezekiyeli okathi aalaleerya awe muttetthe woovila?

⁸ Yehova aahimuruma Ezekiyeli wira: “Nyuwo mwana a mutthu, mwemele: kimphavela olavula ni nyuwo”. Yooruma ele aaleeliwe awe ni munepa wa Muluku, yaahinvaha ikuru wira owerye ovenya. Ezekiyeli aalempe so: ‘Eroho [munepa wa] Muluku wahikirwela, khukemexa’. (Ezek. 2:1, 2) Muhoolo mwaya okathi aavara awe muteko awe woolaleerya owo aneettihiwa ni ntata na Muluku, eyo piiyo, munepa woowaarya wa Muluku. (Ezek. 3:22; 8:1; 33:22; 37:1; 40:1) Munepa wa Muluku waahimukhaliherya Ezekiyeli ovara muteko awe woolaleerya  saana, niire so, orowa waalaleerya aisarayeli yaari ‘òlipa muru ni òwuma murima’. (Ezek. 3:7) Nave Yehova aahimuleela profeta Ezekiyeli wira: “Miyo kinimovahani muru wolipa ntoko wawaya, ni murima wowuma ntoko wawaya: kinimokhalihani òlipa ntoko mwala ni òkhomala ovikana nluku nowarya. Tivó nyuwo muhiwoveké: muhithukumeleké oholo waya, okhala wira ti nloko n’atthu òhìwelela”. (Ezek. 3:8, 9) Vaakhala ntoko wira Yehova aamuleela so profeta Ezekiyeli: ‘Muhihiye olipa murima wa atthu awo wookhulumulakani. Miyo kinimoolipihani’.

⁹ Nuumala-vo, munepa wa Muluku waahimukumiha Ezekiyeli muttetthe ole waalaleerya awe. Profeta Ezekiyeli aalempe so: “Owerya w’Apwiya wahikirwela n’ikuru sulupale”. Yaahivira esumana emosa wira profeta Ezekiyeli iiwexexe muhupi ole aarowa awe olaleya. (Ezek. 3:14, 15) Nuumala-vo, Yehova aahimukuxa omuroohaka omukotini weiwo ‘munepa wa Muluku’ waamurweelale awe. (Ezek. 3:23, 24) Nto Ezekiyeli aari oolikana ene wira opacerihe muteko awe woolaleerya.

10. Nikhaliheryo xeeni ninreerela ahu wira niwerye olaleerya, ni mwaha wa xeeni?

¹⁰ Nikhaliheryo xeeni ninreerela ahu wira nivare muteko ahu woolaleerya? Wira naakhule nrowe nuupuwelele ele yaamwiiranenle Ezekiyeli. Ohinatthi opacerya ovara muteko awe woolaleerya, munepa wa Muluku waahinvaha ikuru saaphavela awe. Olelo-va, ntoko siisaale okathi wa Ezekiyeli nnoowerya ovara muteko ahu woolaleerya nikhaliheriwaka ni munepa wa Muluku. Mwaha wa xeeni? Okhala wira Satana oniphavela onihiiha muteko ahu woolaleerya. (Wiis. 12:17) Atthu anceene anuupuwela wira Satana tooweryexa nihinwerya ahu omuxintta. Masi mwaha wa muteko woolaleerya ninvara ahu, hiyo ninnimuxintta! (Wiis. 12:9-11) Moota xeeni? Okhala wira okathi ninlaleerya ahu hiyo ninnooniherya wira khannoova itthu Satana onnoopopiha awe. Khula okathi ninlaleerya ahu hiyo ninnimuxintta Satana. Exeeni ninwerya ahu woona vaavo ninlaleerya ahu hata nisuwela aka wira awanani ahu  anoonilupattha? Hiyo ninniwerya woona wira Yehova onninivaha ikuru orumeelaka munepa awe woowaarya nave onnisiveliwa ni muteko ninvara ahu. — Math. 5:10-12; 1 Ped. 4:14.

11. Munepa wa Muluku onrowa onikhaliherya sai, nto moota xeeni nikhanle ahu ookhalana munepa owo?

¹¹ Etthu xeeni-tho ekina nniixutta ahu sa moota Yehova aamulipinhe awe profeta Ezekiyeli onvahaka munepa awe woowaarya okathi aalaleerya awe? Munepa wa Muluku onoonivaha ikuru wira niwerye oxintta khula muxankiho ninkumana ahu okathi woolaleerya. (2 aKor. 4:7-9) Exeeni nikhanle ahu oopaka wira naakhele munepa wa Muluku? Nihaana ovekela munepa owo moohihiyererya, nikupaliki wira Yehova onoowiriyana mavekelo ahu. Yesu aahiwiixuttiha atthareli awe wira: “Muthipeleleke oveka, . . . Muthipeleleke ophavelasa, . . . Muthipeleleke omana mukhora”. Yehova onoowaakhula ale aninvekela, aavahaka “munepa woowaarya”. — Luka 11:9, 13; Mit. 1:14; 2:4.

12. Moovarihana ni Ezekiyeli 2:9–3:3, opuro xeeni yaakhuma aya eroolu? Ni etthu xeeni yaalempwale murooluni?

¹² Profeta Ezekiyeli khaalipihiwe paahi ni munepa wa Muluku nave waamini wawe waahilipihiwa ni nuulumo na Muluku. Nave-tho Ezekiyeli aahoonihiwa ntata naakunxe eroolu. (Mmusome Ezekiyeli 2:9–3:3.) Eroolu eyo yaakhuma woowi? Exeeni yaalempwale murooluni? Eroolu eyo yaawenrye sai omulipiha Ezekiyeli? Nrowe niwehe. Eroolu eyo yaakhuma veehiceni ya Muluku. Woonasa wene, Yehova aarumeelale nlaikha Ezekiyeli aawenhe awe, wira ninvahererye eroolu ele. (Ezek. 1:8; 10:7, 20) Eroolu ele yaari masu a Muluku, niire so, muhupi woophukela Ezekiyeli aarowa awe waalaleerya aisarayeli oohiiwelela yaatthukweliwe oBabilonia. (Ezek. 2:7) Eroolu ele yaalempwale ipantta soopiili.

13. Yehova aamulenle exeeni Ezekiyeli nuumala onvaha eroolu, ni xeeni eroolu eyo yaanayaaya ntoko oravo?

¹³ Yehova aahimuleela profeta awe wira okhuure eroolu ele ni ‘osarihe munipwipwini mwawe’. Profeta Ezekiyeli aahiiwelela ni aahikhuura eroolu yootheene. Yoowoonihiwa ele yaataphulela-ni? Eyo yaataphulela wira Ezekiyeli aahaana wiiwexexa saana muhupi aarowa awe olaleya. Owo aahaana okupali muhupi ole wira okhalane ikuru woolaleya. Nave yaahiiraneya etthu ekina yootikiniha. Ezekiyeli aahoona wira eroolu ele aakhuura awe ‘yanaya ntoko oravo’. (Ezek. 3:3) Mwaha wa xeeni? Okhala wira Ezekiyeli yoowo aarummwale ni Yehova, aari mutthu aamusiveliha Muluku. (Esal. 19:9-12) Owo aanixukhurela mwaha wa Yehova omurumeela ntoko profeta awe.

14. Exeeni yaamukhalihenrye profeta Ezekiyeli wiilokiherya wira eemererye yoothanleliwa awe?

¹⁴ Nuumala-vo, Yehova aahimuleela Ezekiyeli wira: “Molumo othene anohimeryakani, nwiriyane orattene, musuke mmurimani mwanyu”. (Ezek. 3:10) Ni moolumo ala, Yehova aamuleela Ezekiyeli wira aahaana opweha mmuupuweloni mwawe masu yaalempwale murooluni ni wuupuwelela. Okathi profeta Ezekiyeli aapanke awe eyo, waamini wawe waahilipa. Nave eyo yaahimukhaliherya olaleya muhupi ole moolipa murima. (Ezek. 3:11) Okhala wira moolumo ale yaari vamurimani vawe ni mmuupuweloni mwawe, Ezekiyeli aari oolikaneene wira eemererye ni omalelihe yoothanleliwa awe. — Mulikanyihe ni Esalimo 19:15.

15. Wira niwerye ovilela okathi ninlaleerya ahu exeeni nikhanle ahu oohela vamurimani vahu?

¹⁵ Wira niwerye ovilela okathi ninlaleerya ahu, nave hiyo nihaana weemererya wira nuulumo  na Muluku nilipihe waamini wahu. Nihaana ohela “mmurimani mwahu” moolumo ootheene Yehova onnileela awe. Olelo-va, Yehova onnilavula ni hiyo orumeelaka nuulumo nawe, Biibiliya. Moota xeeni ninrowa ahu osuwela vakhala wira nuulumo na Muluku niri vamurimani vahu ni mmuupuweleloni mwahu?

16. Exeeni nikhanle ahu oopaka wira niiwexexe nuulumo na Muluku?

¹⁶ Ntoko siisaale ninlya ahu yoolya wira erutthu ahu ekhale yoolipa, nave nihaana olipiha waamini wahu nisomaka nuulumo na Muluku ni wuupuwelela. Eyo ti etthu nniixutta ahu ni eroolu ooniheriwe awe Ezekiyeli. Yehova oniphavela wira nisarihe ‘munipwipwi mwahu’ nuulumo nawe, niire so, wiiwexexa saana nuulumo nawe. Hiyo nnoowerya opaka eyo nivekelaka, nisomaka nuulumo nawe ni wuupuwelela. Wanipacerya, nihaana ovekela wira nilokiherye murima ahu wira niiwexexeke miyuupuwelo sa Yehova. Nuumala-vo, nimusomeke Biibiliya. Moottharelana nuupuweleleke etthu nisomme ahu. Vakhala wira nnoopaka itthu iyo, exeeni enrowa wiiraneya? Okathi yoole nniiwexexa ahu nuulumo na Muluku, waamini wahu onnilipa.

17. Xeeni vari aya vooloka wuupuwelela ele ninsoma ahu mbiibiliyani?

¹⁷ Xeeni vari aya vooloka osoma ni wuupuwelela ele ninsoma ahu mbiibiliyani? Opaka eyo, enoonikhaliherya olelo-va okhala oolipa wira nilaleye muhupi wa Omwene ni owerya olaleya muhupi woophukela muhoolo. Nave okathi nnuupuwelela ahu mikhalelo soovara murima sa Yehova, waataana wahu ni yena onnilipa. Ohiya-vo, nnookhalana murettele ni omaaleleya. — Esal. 119:103.

18. Waphiya okathi woophukela, etthu xeeni atthu a muttetthe ahu anrowa aya osuwela, nto mwaha wa xeeni?

¹⁸ Moovirikana ni Ezekiyeli, hiyo khanihiyo maprofeta. Masi niri oolikaneene wira nilaleye muhupi wa Yehova yoowo ori mbiibiliyani, mpakha muteko woolaleerya omala. Waphiya okathi woophukela, atthu anikhala muttetthe ahu khanrowa okhalana mathowa oohimya wira khiyiiwale muhupi woolopola wa Yehova aahiiso owo khaacanle. (Ezek. 3:19; 18:23) Ohiya-vo, awo anoosuwela wira muhupi naalaleerye ahu tthiri waakhuma wa Muluku.

19. Exeeni enrowa onivaha ikuru wira niwerye ovara muteko ahu woolaleerya?

¹⁹ Exeeni enrowa onivaha ikuru wira niwerye ovara muteko ahu woolaleerya? Itthu seiye tthaaru saamulipinhe profeta Ezekiyeli. Khannihiya olaleerya maana ninnisuwela wira nirummwale ni Yehova, ninkhaliheriwa ni munepa wa Muluku nave nuulumo na Muluku ninnilipiha waamini wahu. Tthiri nikhaliheriwaka ni Yehova, nnoowerya ovara muteko ahu woolaleerya ni owerya ovilela “mpakha wookiseryani”. — Math. 24:13.