1. Ninsuwela sai wira Yehova oniphavela wira nimwaattameleke?

 YEHOVA oniphavela wira nimwaattameleke. (Yak. 4:8) Maana owo oniphavela wira okhale Muluku ahu,Tiithi ahu ni mpatthani ahu. Nave Yehova onnaakhula mavekelo ahu ni onninikhaliherya hata okathi wa mixankiho. Nave-tho Yehova onnirumeela mutthenkeso awe wira oniixuttiheke ni onikhapelela. Nto hiyo nihaana opaka exeeni wira nihihiye omwaattamela Yehova?

2. Nihaana opaka exeeni wira nimwaattameleke Yehova?

² Hiyo nnoowerya omwaattamela Yehova ninvekelaka, omusoma Biibiliya ni wuupuwelela itthu ninsoma ahu. Napaka itthu iyo nnimooniherya wira ninnimuxukhurela Yehova ni nnimuncererya omphenta wahu yena. Niira siiso, nnimooniherya wira ninnivaha Yehova ele eniphwanela awe, eyo piiyo, ovuwa ni nttittimiho. (Wiis. 4:11) Nto vaavo nintepa ahu omusuwela Yehova, ninnitepa ororomela mutthenkeso awe yoowo onirumeela awe wira onikhaliheryeke.

3. (a) Satana onipaka exeeni wira onihiihe omuroromela wahu Yehova? (b) Exeeni enrowa onikhaliherya ohihiya omuroromela Yehova ni mutthenkeso awe? (Esalimo 31:14, 15)

³ Satana onneererya-tho onivalaanya ni Yehova okathi yoole hiyo ninkumana ahu mixankiho. Oniwerya sai opaka eyo? Onnipaka eyo oniirihaka vakhaani-vakhaani ohiya omuroromela Yehova ni mutthenkeso awe. Masi hiyo nnoowerya osyaka omorela muraakho owo. Maana nakhalana waamini ni nroromelo noolipa khiivo etthu enrowa oniiriha ohiya omuroromela Yehova ni mutthenkeso awe. — Musome Esalimo 31:14, 15.

4. Mwaha ola ninrowa othokorerya exeeni?

⁴ Mwaha ola, nnooweha mixankiho miraru atthu ahikhanle Anamoona a Yehova akhanle aya onikumiherya wira anihiihe omuroromela wahu Yehova ni mutthenkeso awe. Nto mixankiho  iyo sinrowa onivalaanyiha sai ni Yehova? Exeeni nikhanle ahu oopaka wira nihimorele miraakho iyo sa Satana?

5. Moota xeeni mixankiho sahu sikhanle aya ooniiriha ohiya omuroromela Yehova ni mutthenkeso awe?

⁵ Ikwaha sikina hiyo ninnikhalana mixankiho ntoko olupatthiwa ni amusi ahu aahiiso ohikhalana muteko. Nto mixankiho iyo pooti oniiriha ohiya omuroromela Yehova ni mutthenkeso awe. Moota xeeni mixankiho sinrowa aya onivalaanyiha ni Yehova? Vaavo mixankiho siniviriha aya okathi munceene sinikhumelelaka, hiyo pooti wuupuwelaka wira noonyanyaliwa ni khaninthokoreriwa. Nto Satana onnirumeela okathi owo oniirihaka wuupuwela wira Yehova khonniphenta. Satana oniphavela wira nikupaliki wira Yehova aahiiso mutthenkeso awe tonnikumiherya mixankiho. Etthu emosa-ru yahiwiiraneela aisarayele akina yaakhala wExiitu. Woopaceryani awo yaanikupali wira Yehova aahimuthanla Moise ni Aroni wira owoopole weepotthani. (Okhum. 4:29-31) Masi okathi mwene Farawo aalupatthawe vanceene, awo yaaninvaha nthowa Moise ni Aroni wira tiyaakumiherya mixankiho saya. Ahimyaka so: “Mwaha wa nyuwo mwené ni makhulupale annininyokha: nyuwo mohela mmatatani mwaya nivaka, wira enìve!” (Okhum. 5:19-21) Aisarayeli yaaninvaha nthowa Moise ni Aroni. Tthiri eyo yaari etthu yooriipiha murima! Vakhala wira nyuwo munnivilela mixankiho mwa okathi munceene, munrowa owerya sai ohihiya omuroromela Yehova ni Mutthenkeso awe?

6. Exeeni nniixutta ahu ni yoowiiraneya ya profeta Habakuki? (Habakuki 3:17-19)

⁶ Munvekeleke Yehova ni murima wootheene, ni nvekeleke nikhaliheryo. Profeta Habakuki aahiviriha mixankiho sinceene. Nave waahiphiya okathi, owo uupuwela awe vakhala wira Yehova aanimuthokorerya. Nto owo aahimutthukulela murima awe Yehova omuleela itthu sootheene saamuxankiha. Habakuki aahimmye so: “Nyuwo Apwiya! Kinokhuwela mpakha lini, muhikìwaka? . . . Munikòniherya-ní sotakhala?” (Hab. 1:2, 3) Yehova aahaakhula nivekelo Habakuki aapanke awe ni murima wootheene. (Hab. 2:2, 3) Nuumala profeta Habakuki wuupuwelela moota Yehova aawooponle awe arumeyi awe khalai, eyo yaahimukhaliherya otthikela ohakalala. Habakuki aanikupali wira Yehova aanimuthokorerya ni ammukhaliherya wira ovilele khula muxankiho. (Mmusome Habakuki 3:17-19.) Yoowiiraneya ya Habakuki enniixuttiha exeeni? Okathi wa mixankiho, nihaana omuleelaka Yehova itthu sootheene sinnixankiha. Nave mukupaliki wira Yehova onimoovahani ikuru wira nwerye ovilela mixankiho. Nto vaavo munrowa anyu woonaka wira Yehova onnookhaliheryani waamini wanyu onootepaka olipa.

7. Mixankiho xeeni Marcia aarina awe, nto exeeni aapanke awe?

⁷ Muhihiye opaka itthu sinrowa wookhaliheryani olipiha ompatthani anyu ni Yehova. Murokora mmosa oniitthaniwa Marcia a oPapua oNova Guinea, aahikumana mixankiho sinceene. b Emusi awe Marcia yaari yoohaawa nave ikwaha sikina wira ephwanye itthu yaaphavela aya vanaaxankiha vanceene. Mmusi awe mmosa Marcia aahimwiiriha ophavela ohiya omuroromela Yehova. Mmusi awe owo aamukonhe so: “Nyuwo munihimya wira munepa wa Muluku onnookhaliheryani, masi onookhaliheryani sai? Niireke amusi anyu athaaciri? Nyuwo munnihonona okathi anyu mahala muriki munoolaleerya”. Murokora  Marcia onihimya wira aahipacerya wiikoha so: “Kiireke Muluku onnikithokorerya tthiri miyo vamosa ni emusi aka? Nto kaahinvekela Yehova moowaakuveya ni kaahimuleela itthu sootheene kuupuwela aka. Nave nkaahiyale omusoma Biibiliya, iliivuru sahu sinimutthokiherya Biibiliya, orowa olaleerya ni orowela mithukumano”. Marcia aahipacerya woona wira tthiri Yehova aanithokorerya emusi awe. Nnaamwi yaari oothoiwa, yaanikhalana eyoolya hata yaakhala vakhaani ni yaanihakalala. Nto Marcia onihimya wira: “Kaahipacerya woona wira Yehova anaakhula mavekelo aka”. (1 Tim. 6:6-8) Vakhala wira khamunihiya olipiha ompatthani anyu ni Yehova, mixankiho khasinrowa woovalaanyani ni yena.

8. Exeeni ekhanle owiiraneela anna anihoolela mmutthenkesoni mwa Yehova?

⁸ Awanani ahu annimurumeela redes sociais wira amwara-mwarye itthu sowoothiwa sinaahimya anna anihoolela mmutthenkesoni mwa Yehova. (Esal. 31:14) Anna akina annitthukweliwa mukhatteya ni wootheriwa okhala anakirime. Okathi eyo eniiraneya aya hiyo khanintikinihiwa. Makristau a eseekulu yoopacerya, nave sanaaphwanya mixankiho simosaru, okathi murummwa Paulo ootheriwa awe itthu soohiloka khutthukweliwa mukhatteya. Makristau ale yoonenle sai?

9. Makristau makina yoonenle sai nuumala murummwa Paulo otthukweliwa?

⁹ Okathi murummwa Paulo aatthukweliwe awe oRoma, makristau makina yaahihiya omukhaliherya. (2 Tim. 1:8, 15) Mwaha wa xeeni? Niireke awo yuuliwa muru mwaha woowi murummwa Paulo aanithokoreriwa ntoko nakirime? (2 Tim. 2:8, 9) Aahiiso niireke yoova olupatthiwa? Moohicikha mathowa ene, nkahaya muupuwele moota murummwa Paulo oonenle awe. Owo aahivilela mixankiho sinceene mpakha oleva okumi awe wira aakhaliherye axinnawe. (Mit. 20:18-21; 2 aKor. 1:8) Nave hiyo khanimphavela waatakiha makristau ale a eseekulu yoopacerya yaawo yaahiiyale omukhaliherya Paulo okathi aareerela  awe okhaliheriwa! Exeeni nihikhanle ahu ooliyala okathi anna anihoolela mmutthenkesoni mwa Yehova anlupatthiwa aya?

10. Exeeni nikhanle ahu oowuupuwelaka, okathi anna anihoolela mmutthenkesoni mwa Yehova anlupatthiwa aya, nto mwaha wa xeeni?

¹⁰ Musuweleke nthowa naya ninlupatthiwa ahu ni ti pani onikumiherya olupatthiwa iwo. Timootheyo a nenli 3:12 onihimya so: “Otheene ale aniphavela omurumeela Muluku ntoko awiixutti a Kristu Yesu, nave anrowa olupatthiwaka”. Nto hiyo khanintikinihiwa okathi Satana onaatuphela awe anna anihoolela mmutthenkesoni mwa Yehova. Satana onnaatuphela anna awo ophavelaka owoopopiha wira ahiye omuroromela Yehova. — 1 Ped. 5:8.

11. Ntakiheryo na Onesiiforo ninniixuttiha exeeni? (2 Timootheyo 1:16-18)

¹¹ Muhihiye okhala oororomeleya ni waakhaliherya axinninyu. (Mmusome 2 Timootheyo 1:16-18.) Moovirikana ni makristau a eseekulu yoopacerya yaahiiye omukhaliherya murummwa Paulo okathi aatthukweliwe awe, Onesiiforo khaapanke eyo. Onesiiforo ‘khuuliwe muru mwaha wootthukweliwa wawe Paulo’. Onesiiforo aahimphavelasa Paulo, nuumala omphwanya aahimukhaliherya onvahaka itthu saarina awe. Mwaha woopaka eyo, Onesiiforo aahileva okumi awe wira omukhaliherye Paulo. Etthu aapanke awe Onesiiforo enniixuttiha-ni? Enniixuttiha wira niheemererye wira woova onihiiheke waakhaliherya anna anilupatthiwa. Ohiya-vo, nihaana owaakiha ni waakhaliherya. (Mir. 17:17) Okhala wira okathi owo awo annireerela ophentiwa ni okhaliheriwa.

12. Exeeni nniixutta ahu ni ntakiherye na anna ni arokora a oRússia?

¹² Nrowe nithokorerye yoowiiraneya ya anna ni arokora a oRússia. Awo khanihiya waakhaliherya anna ni arokora atthukweliwe mukhatteya. Okathi anna aniroihiwa aya otribunaali wira yaphukeliwe anna anceene annipaka sootheene aniwerya aya wira yaakhaliherye. Ntakiheryo naya ninniixuttiha exeeni? Nniixutta wira okathi anna anihoolela mutthenkeso wa Yehova anootheriwa aya, olupatthiwa ni otthukweliwa mukhatteya hiyo nihooveke ni naakhaliheryeke. Nnoowerya opaka itthu iyo, akhala wira nnimwaavekelela, okhaliherya emusi aya ni opaka itthu sootheene ninwerya ahu wira naakhaliherye. — Mit. 12:5; 2 aKor. 1:10, 11.

13. Muxankiho xeeni okhanle ooniiriha ohiya omuroromela Yehova ni mutthenkeso awe?

¹³ Ikwaha sikina amusi ahu, ale nnivarana ahu muteko ni ale ninsomana ahu oxikola pooti oniveehaka mwaha wa olaleerya ni wiiwelela malamulo a Yehova. (1 Ped. 4:4) Nto atthu awo pooti ohimyaka so: “Miyo okisivela makhalelo anyu masi etiini anyu ti yoovila weettela okhala wira itthu sineetteliwa ti sa khalai”. Nave atthu awo pooti olavulaka moohiloka sa moota nimmuthokorerya ahu mutthu okumihiwe mmulokoni. Nto awo pooti ohimyaka so: “Hata nyuwosa mulaleyaka wira naaphenteke atthu akina masi khamunaathokorerya saana ale anikumihiwa mmulokoni”. Nto miyuupuwelo ntoko iyo pooti oniirihaka opacerya ohoverya malakiheryo ninvahiwa ahu mmutthenkesoni mwa Yehova. Woonasa wene, hiyo pooti opacerya wiikoha so: ‘Kiireke Yehova khonikivekela opaka itthu mootepana? Kiireke malakiheryo ninvahiwa ahu ni mutthenkeso wa Yehova khanitepa ovilihiwa?’ Akhala wira nyuwo sinnoophwanyani mixankiho simosaru, munrowa owerya sai ohihiya omuroromela Yehova ni mutthenkeso awe?

14. Exeeni nikhanle ahu oopaka akhala wira atthu akina anooniveeha mwaha wowiiwelela malamulo a Yehova? (Esalimo 119:50-52)

 ¹⁴ Muhihiye opaka itthu sinimusivela Yehova. Nnaamwi aaveehiwa, Yobi khaahiyale otthara malakiheryo a Yehova. Mpatthani awe mmosa aahimananiha omukupaliha wira Yehova khaamuthokorerya hata aimananiha wiiwelela malamulo awe. (Yobi 4:17, 18; 22:3) Masi Yobi aahikhootta okupali moolumo ale oowoothiwa. Okhala wira aanisuwela wira malamulo a Yehova tooloka, Yobi aahilakela wiiwelela. Nto yena kheemyale wira mixankiho simwiirihe ohiya oororomeleya. (Yobi 27:5, 6) Nto ntakiheryo na Yobi ninniixuttiha-ni? Nniixutta wira, hata niveehiwa aka nihihiye wiiwelela malamulo a Yehova. Nkahaya muupuwele, makhalelo anyu ari sai vano nuumala okhala Namoona a Yehova? Niireke moowerya oweha wira wiiwelela malamulo a Yehova onniniphwanyiha mireerelo? Nto akhala wira ti siiso, muhihiye wiiwelela malamulo anikumiheriwa ni mutthenkeso awe. Napaka eyo hata atthu akina aniveehaka aahiiso oninyokha, awo khanrowa owerya onivalaanya ni Yehova. — Musome Esalimo 119:50-52.

15. Mixankiho xeeni Brizit aarina awe? Nave exeeni yaakhumelenle?

¹⁵ Nrowe niwehe etthu yaamwiiranenle murokora Brizit a wÍndia. Owo aaniveehiwa ni amusi awe mwaha wa waamini wawe. Nuumala opatisiwa mwaakha wa 1997, iyawe yoowo ahaakhanle Namoona a Yehova, aahoomoliwa muteko. Nto yaahaana othaama epooma ele yaakhala aya arowaka okhala hoothe ni anamuyari aya aiyawe. Masi murokora Brizit aahikhalana-tho mixankiho sikina. Mwa ntakiheryo, okhala wira iyawe aahoomoliwa muteko, murokora ole aahaana ovaraka muteko nihiku ntero wira ophwanyeke yoolya. Ohiya-vo, Brizit aahirakamela Empa ya Omwene etthu yoowiiraka ikiloomo 350. Nave-tho mooriipiha murima amusi a aiyawe yaahipacerya omulupattha mwaha wa waamini wawe. Nto eyo yaahimwiiriha Brizit ni aiyawe othaama-tho opuro ole. Moohipisa aiyawe yaahikhwa. Nuuvira okathi vakhaani, mwanawe mwaamuthiyana aarina  iyaakha 12 aahikhwa mwaha wa kanser. Nto amusi awe yaahinvaha nthowa, ahimyaka wira itthu iye saamwiiranenle mwaha wookhala Namoona a Yehova ni wira aahikhalana nthowa. Nnaamwi saamukhumelenle itthu iye sootheene, Brizit khaahiyale omuroromela Yehova ni mutthenkeso awe.

16. Yehova aamureelinhe sai Brizit, mwaha woororomeleya ni otthara malakiheryo a mutthenkeso awe?

¹⁶ Okhala wira Brizit aahirakamela Empa ya Omwene, mutokweene a esirkwiitu aahimutumererya wira aahaana olaleerya muttetthe awe ni opaka mithukumano owannya awe. Woopaceryani, murokora ole oona wira khaarowa owerya opaka itthu iye, masi aahitthara malakiheryo awo. Nto aaniimananiha waalaleerya atthu a muttetthe awe, opaka mithukumano owannyawe ni omulompa Muluku hoothe ni anaawe. Exeeni yaakhumelenle? Brizit aahikhalana soosoma sa Biibiliya sinceene, nave muhoolo mwaya atthu anceene aasomiha awe Biibiliya yaahipatisiwa. Nave mwaakha wa 2005 aahipacerya orumeela ntoko pioneera ookilaatheya. Mwaha wa ohihiya omuroromela Yehova ni mutthenkeso awe, Brizit aahiphwanya mareeliho manceene. Mwa ntakiheryo, anaawe nlelo annimurumeela Yehova moororomeleya ni muttetthe ole aalaleerya awe vano sookhala miloko miili. Brizit ohoona wira Yehova aahimukhaliherya onvahaka ikuru wira owerye oxintta mixankiho iye sootheene.

17. Etthu xeeni nikhanle ahu oothipelela opaka?

¹⁷ Satana oniphavela wira nuupuweleke wira Yehova khonnikhaliherya nnakhala khonnithokorerya okathi wa mixankiho. Nave oniphavela wira nuupuweleke wira naahihiye omuroromela Yehova ni mutthenkeso awe mixankiho khasinrowa onimalelaka. Nave-tho, Satana oniphavela wira nooveke okathi anna anihoolela mutthenkeso wa Yehova anlupatthiwa aya ni antthukweliwa aya mukhatteya. Owo oniphavela wira okathi ninveehiwa ahu, nihiyeke omuroromela Yehova ni mutthenkeso awe. Masi okhala wira noosuwela itthu Satana oniphavela awe wira onihapuxe, hiyo khanniwokiwa ni itthu iyo. (2 aKor. 2:11) Muhimuhiye Satana oowokakani ni owiirihakani ohiya omuroromela Yehova ni mutthenkeso awe. Nave muhiliyale wira Yehova khonikhala-khala oonyanyalakani. (Esal. 28:7) Nto muheemererye mixankiho iyo soovalanyakani ni Yehova! — aRom. 8:35-39.

18. Mwaha onittharelana ninrowa othokorerya exeeni?

¹⁸ Mwaha ola, nooweha mixankiho sinikumiheriwa ni atthu ahikhanle Anamoona a Yehova. Masi omwaamini wahu Yehova ni mutthenkeso awe pooti weehereriwaka ni mixankiho sinikumiheriwa ni anna ni arokora. Ninrowa owerya sai ovilela mixankiho iyo? Mwaha onittharelana nnimwaakhula nikoho nlo.