1. Ontaphulelani ‘wuupuwela saana’? (2 Timootheyo 4:5)

 OKATHI sinikhumelela aya itthu sinninyoonya mmulokoni, ororomeleya wahu wa Yehova ni mutthenkeso awe pooti weehereriwa. Nto eyo yaniiraneela nihaana opaka exeeni? Nihaana wuupuwelaka saana, okhala oowehaweha ni ‘olipiha waamini wahu’. (Mmusome 2 Timootheyo 4:5.) Akhala wira na atthu oomaaleleya, eyo enoonikhaliherya ohipaka itthu soohiloka nave nnimoonaka itthu ntoko Yehova onoonela awe. Opaka itthu iyo sinoonikhaliherya okhalana miyuupuwelo sooloka.

2. Mwaha ola, ninrowa othokorerya exeeni?

² Mwaha ovinre, nooweha mixankiho miraru sinikumiheriwa ni atthu ahikhanle Anamoona a Yehova. Nto mwaha ola, nnooweha mixankiho miraru sikhanle ookumiheriwa ni anna ni arokora a mmulokoni ni sikhanle ooweehererya omuroromela wahu Yehova ni mutthenkeso awe. Muxankiho woopacerya: Okathi munna aahiiso murokora onniirela awe etthu yoohiloka. Wa nenli: Okathi ninttaruxiwa ahu. Ni wa neeraru: Okathi anikhumelela aya marukunuxo mmutthenkesoni. Okathi sinnikhumelela aya mixankiho iyo, moota xeeni nikhanle ahu owuupuwela aka saana ni ohihiya okhala oororomeleya wa Yehova ni mutthenkeso awe?

3. Exeeni ninreerela ahu opaka akhala wira munna oninyoonyiha?

³ Niireke mootoko onyoonyihiwa ni munna wala murokora aahiiso mutthu mukina orina miritti mmulokoni? Woonasa wene, mutthu owo khahiyo aroolakela opaka eyo. (aRom. 3:23; Yak. 3:2) Hata vari siiso, nyuwo mwaahinyoonyiwa mwaha wa etthu eyo. Woonasa wene, yaahowereyani etthu eyo muhinawerya orupa. Nto muniikoha so: ‘Akhala wira munna aahiiso murokora onniwerya opaka ela, kiireke tthiri ola mutthenkeso  wa Yehova?’ Tthiri Satana oniphavela wira nuupuweleke siiso. (2 aKor. 2:11) Miyuupuwelo ntoko iyo, pooti oniiriha ohiya omurumeela Yehova ni ohiya ororomela mutthenkeso awe. Nto vakhala wira munna opanke etthu eninyoonyale, exeeni nikhanle ahu oopaka wira nuupuweleke saana ni osyaka miyuupuwelo sinikumiheriwa ni Satana?

4. Yosefe aawenrye sai wuupuwela saana okathi aathokoreriwa awe moohiloka, ni ntakiheryo nawe ninniixuttiha exeeni? (Maphattuwelo 50:19-21)

⁴ Muhipweheke mathowa vamurimani. Okathi Yosefe aari awe mmiravo, axuulupale awe yaahimuthokorerya moohixariya. Nave axuulupale awe akina yaaphavela omwiiva. (Maph. 37:4, 18-22) Nuumala-vo, awo yaahimutumiha ntoko epottha. Mwaha wa yeeyo, Yosefe aahiviriha mixankiho sinceene mwa iyaakha 13. Nto okathi owo, woonasa wene Yosefe aaniikoha so: kiireke Yehova nlelo onnikiphenta? Xeeni Yehova okinyanyalaka okathi ola wa mixankiho? Masi Yosefe kheemerenrye wira miyuupuwelo iyo simwiirihe okhala mutthu ootakhala. Ohiya-vo, owo aahikhala oomaaleleya. Okathi aarina awe eparakha yoowunlela ikuhu axuulupale awe, khaapanke eyo. Masi aahiwooniherya niphento ni aahaalevelela. (Maph. 45:4, 5) Yosefe aahiwerya opaka eyo, okhala wira anuupuwela saana. Ohiya owehexexaka paahi mixankiho sawe, Yosefe aahikhalana muupuwelo wa Yehova. (Musome Maphattuwelo 50:19-21.) Yoowiiraneya ya Yosefe enniixuttiha-ni? Vakhala wira munna aahiiso murokora owiirihani etthu yoohiloka, muhinvaheke nthowa Yehova, aahiiso muhuupuweleke wira Yehova ohoonyanyalani. Masi muupuweleleke moota Yehova onookhaliheryaweni wira nwerye ovilela muxankiho owo. Nave okathi munna oniwiirelaaweni etthu yoohiloka, muhimunleleke ikuhu. Masi mumphenteke, okhala wira ophenta onnikhuneela itampi sinceene. — 1 Ped. 4:8.

5. Itthu xeeni saamukhalihenrye Miqueas, wuupuwela saana okathi anyoonyihiwa awe?

⁵ Nrowe niwehe ntakiheryo nimosa na munna Miqueas. b onikhala wAmerica do Sul. Anna yaarina miritti mmulokoni yaahipaka etthu yaamuriipinhe murima vanceene. Owo aahimmye so: “Nkaatonko oriipiwa murima siisaale. Kaahixanka vanceene, nkaawenrye orupa ohiyu ole ni kaaninla okhala wira nkoona etthu yoopaka”. Hata vari siiso, Miqueas aahiwerya wuupuwela saana ni aahiimananiha vanceene wira osyake miyuupuwelo soohiloka. Owo aawenrye sai opaka eyo? Aahiwerya opaka eyo, okhala wira aaninvekela Yehova munepa awe woowaarya wira omukhaliherye ovilela muxankiho ole. Nave etthu ekina yaamukhalihenrye waari osoma iliivuru sahu sinimutthokiherya Biibiliya. Nniixutta-ni? Akhala wira munna wala murokora oopaka etthu yoowereyaleni, mukhaleke oomaaleleya ni muheemereryeke miyuupuwelo soohiloka siwiirihakani oriipiwa murima. Okhala wira khamunsuwela etthu emwiirinhe munna owo opaka aahiiso olavula etthu eyo. Nto munvekeleke Yehova mmutthukulelaka murima anyu wira ookhaliheryeni okhalana moonelo mmosaru ni yena. Opaka eyo, enimookhaliheryani omulevelela mutthu owo ni ohuupuwela wira oroolakela oninyoonyiha. (Mir. 19:11) Nave muhiliyale wira Yehova, onnisuwela itthu sootheene siniwiiraneelani ni onimoovahani ikuru wira nvilele. — 2 Wah. 16:9; Mus. 5:8.

6. Xeeni ottaruxiwa ni Yehova, enooniherya aya oniphenta wawe? (aHeeberi 12:5, 6, 11)

⁶ Okathi Yehova onnittaruxa awe, hiyo pooti oriipiwaka murima vanceene. Akhala wira nnoowehaka mixankiho sahu paahi, eyo enooniiriha wuupuwelaka wira nithokoreriwe moohixariya aahiiso khanithokoreriwe saana.  Nto opaka eyo, enoonikhaliherya wiixutta etthu yuulupale eyo piiyo, wira Yehova onnaattaruxa ale onaaphenta awe. (Mmusome aHeeberi 12:5, 6, 11.) Akhala wira nnoopwehaka mathowa vamurimani okathi ninttaruxiwa ahu, eyo pooti omwiirihaka Satana ohonona muupuwelo ahu. Satana oniphavela wira nikhootteke miruku ninvahiwa ahu ni ohiya omurumeela Yehova. Nto vakhala wira moottaruxiwa, munrowa owerya sai wuupuwela saana?

7. (a) Ntoko enooniherya aya edesenyo, moota xeeni Yehova amurumenle awe Pedru nuumala weemererya ottaruxiwa? (b) Ntakiheryo na Pedru ninwiixuttihani exeeni?

⁷ Mweemereryeke ottaruxiwa, ni mpakeke marukunuxo anireerela. Ikwaha sinceene, Yesu aahimuttaruxa Pedru ohoolo wa awiixutti awe akina. (Mar. 8:33; Luka 22:31-34) Woonasa wene, Pedru aahuuliwa muru. Hata vari siiso, owo khaahiyale okhala oororomeleya wa Yesu. Masi aaheemererya ottaruxiwa ni aahiixutta etthu ni soovonya sawe. Mwaha waivaavo, Yehova aahimutthuvela Pedru mwaha woororomeleya wawe onvahaka miritti mmulokoni. (Yoh. 21:15-17; Mit. 10:24-33; 1 Ped. 1:1) Ntakiheryo na Pedru ninniixuttiha exeeni? Ninniphwanya mareeliho manceene, okathi nneemererya ahu miruku ninvahiwa ahu ni opaka marukunuxo anireerela. Okathi nimpaka ahu eyo Yehova ni anna anninivaha efaita yinceene.

8-9. Nuumala ottaruxiwa, muupuwelo xeeni munna Bernardo aarina awe wanipacerya ni exeeni yaamukhalihenrye olokiherya muupuwelo awe?

⁸ Nrowe nithokorerye etthu yaamwiiranenle munna Bernardo, yoowo onikhala oMoçambique. Owo aahihiya okhala mutokweene. Wanipacerya munna Bernardo oonenle sai? Owo onihimya so: “Kaahiriipiwa murima vanceene maana kuupuwela wira nkaathokoreriwe mwa xariya”. Owo aahixankiheya ni moota anna a mmulokoni yaarowa aya omoonelaka. Nave onnincererya ohimyaka so: “Saahivira miyeeri sinceene wira kilokiherye moonelo aka woohiloka ni otthikela omuroromela Yehova vamosa ni mutthenkeso awe”. Exeeni yaamukhalihenrye munna Bernardo owerya oturuka moonelo awe?

⁹ Bernardo aahilokiherya moonelo awe. Owo onitthokiherya so: “Okathi kaari aka mutokweene kaanirumeela yoolepa ya aHeeberi 12:7, wira kaakhaliherye atthu akina okhalana moonelo wooloka voohimya sa ottaruxiwa ni Yehova. Vano kaaniikoha so: ‘Vano tani anireerela wiiwelela yoolepa ela?’ arumeyi ootheene a Yehova okihela muhina miyo”. Munna Bernardo  aahipaka marukunuxo makina wira otthikele olipiha omuroromela wawe Yehova ni mutthenkeso awe. Nuumala-vo, aahitthikela omusoma Biibiliya ni oviriha okathi munceene uupuwelelaka itthu aasoma awe. Nnaamwi aaxankiheya ni moota anna ni arokora yaarowa aya omoonelaka, owo khaahiyale orowa olaleerya ni anna ni wiirela mpantta mithukumano sa mmulokoni. Muhoolo mwaya owo aahitthikela okhala mutokweene. Ntoko munna Bernardo, vakhala wira nyuwo moottaruxiwa, mweemereryeke miruku munivahiwa anyu ni mpakeke marukunuxo anireerela. c (Mir. 8:33; 22:4) Vakhala wira munoopaka eyo, mukupaliki wira Yehova onimootthuvelani mwaha wa ohihiya wanyu omuroromela yena ni mutthenkeso awe.

10. Marukunuxo xeeni yeeherenrye ororomeleya wa aisarayeli akina?

¹⁰ Marukunuxo anikhumelela mmutthenkesoni mwa Yehova pooti weehererya ororomeleya wahu. Naahikhalane ephoole itthu ntoko iyo, pooti weemererya wira waataana wahu ni Yehova ohononeye. Mwa ntakiheryo, nwehe moota marukunuxo yaaweeherenrya aya aisarayeli akina. Aisarayeli ahinatthi waakhela Nlamulo na Moise, ahooleli a itthoko ti yaavara miteko sa anamukuttho. Nave ahooleli a itthoko yaanapaka altaari ni yaaninvaha mukuttho Yehova mmureerelo wa emusi aya. (Maph. 8:20, 21; 12:7; 26:25; 35:1, 6, 7; Yobi 1:5) Masi nuumala okumiheriwa Nlamulo na Moise, ahooleli a itthoko yaahaana ohiya ovara miteko iyo. Muhoolo mwaya, Yehova aahaavaha muteko woovaha mikuttho atthu a nloko na Aroni. Nuumala okhumelela marukunuxo awo, khula muhooleli a etthoko aarowa ovahaka mikuttho ohikhanle a nloko na Aroni aahaana wiiviwa. d (Onam. 17:3-6, 8, 9) Niireke waari mwaha wa marukunuxo awo yaamwiirinhe Koré, Datani, Abirami ni anamukuttho 250 omurukunuwela Moise ni Aroni? (Moth. 16:1-3) Khaninsuwela oratteene. Etthu ninsuwela ahu tiila, Koré ni atthu awe yaahihiya omuroromela Yehova. Masi vakhala wira marukunuxo anikhumelela mmutthenkesoni mwa Yehova anneehererya ororomeleya wanyu, etthu xeeni mukhanle anyu oopaka?

11. Ntakiheryo na atthu a nloko na Kehathi, ninniixuttiha exeeni?

¹¹ Mukhaliheryeke marukunuxo ootheene anipakiwa mmutthenkesoni. Okathi yeetta aya moothakoni, atthu a nloko na Kehathi yaanivara muteko wa vameekhaaya. Khula okathi aisarayeli yaaphavela aya othaama, alopwana akina a oKehati yaahaana oteexa nivuku na waataana, atthu akina ahinatthi okhuma. (Moth. 3:29, 31; 10:33; Yox. 3:2-4) Tthiri eyo yaari eparakha yuulupale! Masi itthu saahiturukeya nuumala aisarayeli okela Elapo Yooleiheriwa. Okhala wira nivuku na waataana khinaarowa-tho othaamihiwa. Nto okathi Salomoni aalamulela awe ntoko mwene, atthu akina a nloko na Kehathi yaahithanliwa wira avareke miteko sikina ntoko okhala alipa-oowiipa, makwarta ni alipa-oosuka empa ya Muluku. (1 Wah. 6:31-33; 26:1, 24) Mbiibiliyani, khanivo nipuro ninhimya wira atthu a nloko na oKehati yaahiixinliha mwaha wohiihiwa iparakha saya. Nto ntakiheryo naya ninniixuttiha exeeni? Okathi anikhumelela aya marukunuxo mmutthenkesoni mwa Yehova, nihaana okhaliherya ni murima ahu wootheene, hata ehelaka  muhina ohiya iparakha sahu. Nihaana ohakalala ni khula eparakha nirina ahu. Muhiliyale wira Yehova khonoovahani efaita mwaha wa iparakha sanyu, masi owo onivaha efaita wiiwelela wanyu. — 1 Sam. 15:22.

12. Murokora Zaina oonenle sai, nuumala okhuma obetheli onarowa orumeela ntoko pioneera a vameekhaaya?

¹² Nrowe niwehe ntakiheryo na murokora Zaina, yoowo aahiyale yoothanleliwa awe yaamusivela vanceene. Nuumala oviriha iyaakha 23 orumeelaka obetheli, aahithanleliwa okhala pioneera a vameekhaaya. Owo onihimya so: “Marukuxo awo yiiraneyale mootutuxerya, ni kaahipacerya ohiivaha efaita ni kaaniikoha so: ‘Kitthenkeni?’”. Nave etthu ekina yaatempe omuriipiha murima okhala wira anna akina a mmulokoni, yaamulenle so: “Vakhanle wira mwaanipaka itthu sooloka nyuwo khimwaarowa okhuma obetheli”. Ikwaha sikina, murokora ole aaniriipiwa murima ni aaninla. Masi owo aahimmye so: “Nkeemyale wira miyuupuwelo soohiloka sikiiriheke waanyiherya mutthenkeso wa Yehova ni niphento Yehova orina awe ni miyo”. Murokora Zaina aawenrye sai okhalana muupuwelo wooloka?

13. Etthu xeeni Zaina aapanke awe, wira oxintte miyuupuwelo soohiloka?

¹³ Murokora Zaina aahiwerya ooxintta miyuupuwelo soohiloka. Aawenrye sai eyo? Owo aanisoma iliivuru sahu otepexa wene myaha saavarihana ni muxankiho awe. Mwaha waamukhalihenrye vanceene waakhuma erevista A Sentinela ya 1 a Fevereiro a 2001, yeeyo yaarina muru oni: “Você Pode Vencer o Desânimo!” Mwaha owo waahitthokiherya moota mulipa oomulepa Biibiliya Marko, aawenrye awe oxintta muxankiho mmosaru aarina awe murokora ole, okathi yaaturukiwe aya yoothanleliwa awe. Zaina onihimya so: “Ntakiheryo na Marko nookikhaliherya oxintta oriipiwa murima”. Nave etthu ekina yaamuikhalihenrye Zaina yaari okhala hoothe ni apatthani awe. Owo khaivalanyale nnakhala wiixinliha. Nave owo aahoona wira munepa woowaarya wa Yehova tonikhaliherya mutthenkeso awe opaka soothanla, aarumeelaka ale anihoolela. Owo ahoona wira etthu yuulupale mmutthenkesoni mwa Yehova ori ohihiya ovara muteko wa Yehova.

14. Marukunuxo xeeni munna Vlado aareerela awe olimalela, nto exeeni yaamukhalihenrye?

¹⁴ Vlado mutokweene orina iyaakha 73, onikhala wEslovênia, waanimuxankiha wiiwexexa etthu yiirinhe muloko awe otakaaheriwa ni muloko mukina ni Empa ya Omwene owaliwa. Owo onihimya so: “Nkaiwexexa saana etthu yiirinhe  Empa ya Omwene ele yooreera yaathukumana ahu owaliwa. Eyo yaahikiriipiha murima okhala wira kiira kilokihenrye ene niinaano Empa ahu ya Omwene. Okhala wira ka kalapintero kiira kipanke ene itthu sikina saareerela wira sirumeeliweke empa ele ya Omwene. Nave okathi satakaaheriwe aya miloko vaahinixankiha maana naahaana opaka marukuxo manceene”. Exeeni yaamukhalihenrye munna Vlado okhaliherya marukunuxo ale? Owo onihimya so: “Okhaliherya marukunuxo anipakiwa mmutthenkesoni mwa Yehova onniphwanyiha mareeliho. Nto marukuxo awo anikhumelela olelo-va anoonikhaliherya muhoolo”. Niireke muniwanana muxankiho mwaha wa yoothanleliwa anyu oturukiwa? Aahiiso muloko anyu otakaaheriwa ni muloko mukina? Muhiliyale wira Yehova onnisuwela itthu sootheene sinooxankihani. Okathi munikhaliherya anyu marukunuxo awo ni ohihiya okhala oororomeleya wa Yehova vamosa ni mutthenkeso awe owo onimooreelihani. — Esal. 18:26.

15. Ninrowa owerya sai wuupuwelela saana, vakhala wira annikhumelela marukunuxo mmulokoni?

¹⁵ Vaavo nnaattamela ahu wanikisa wa olumwenku ola, sinooniphwanyaka mixankiho sinrowa okhumelelaka mmulokoni. Mixankiho iyo pooti weehereryaka omuroromela wahu Yehova. Nto nihaana wuupuwelaka saana itthu sootheene. Vakhala wira munna oopaka etthu yoowereyaleni, muhipweheke mathowa vamurimani. Okathi munivahiwa anyu miruku, mukhalaneke moonelo wooloka, mweemereryake miruku iyo, ni mpakeke marukunuxo anireerela. Nave-tho, vakhala wira mutthenkeso wa Yehova onnipaka marukunuxo, niire so, oturukiwa yoothanleliwa anyu mukhaliheryeke ni murima wootheene ni mweemereryeke marukunuxo awo.

16. Munrowa owerya sai ohihiya omuroromela Yehova ni mutthenkeso awe?

¹⁶ Tthiri nyuwo munoowerya omuroromela Yehova ni mutthenkeso awe, hata ororomeleya wanyu weehereriwaka. Masi wira nwerye opaka eyo, nyuwo muhaana wuupuwela saana, niire so, okhala oomaaleleya, okhalana moonelo wooloka, ni okhalana muupuwelo wa Yehova. Etthu ekina enrowa wookhaliheryani ori osoma matakiheryo a mbiibiliyani a atthu yaavilenle mixankiho saya, ni wuupuwelela etthu muniixutta anyu. Munvekeleke Yehova wira ookhaliheryeni. Muhiivalanyeke ni anna a mmulokoni. Napaka eyo, Satana khonirowa owerya onivalanya ni Yehova vamosa ni mutthenkeso awe.— Yak. 4:7.