1-2. (a) Makoho xeeni ninrowa ahu othokorerya? (b) Exeeni enooniherya wira Yehova tthiri onniphavela onikhaliherya?

 NIKHALIHERIWAKA ni Yehova nnoowerya oxintta mixankiho ni okhala oohakalala okathi nninvarela ahu muteko awe. Yehova onnikhaliherya sai? Nto hiyo ninrowa ottottela sai mureerelo nikhaliheryo nno Yehova onninvaha awe? Mwaha ola nnoophwanya waakhuliwa wa makoho awo. Masi nihinatthi waakhula makoho awo, naakhule toko nikoho nna nni: Niireke tthiri Yehova onniphavela onikhaliherya?

² Epaphelo murummwa Paulo aalepenle awe aHeeberi, enoonikhaliherya ophwanya waakhuliwa wa nikoho nno. Paulo aalempe so: “Yehova tonikikhaliherya. Miyo nkinrowa woova etthu. Exeeni mutthu oniwerya awe okiiriha?” (aHeeb. 13:6) Anamatokosa a Biibiliya anihimya wira, nuulumo nirumeeliwe eversiikulu ela noowi: “tonikikhaliherya”, onihimmwa mutthu onitthimaka wira amukhaliherye mutthu mukina oxankale. Nto nkahaya mmuupuwelele Yehova otthimakaka wira amukhaliherye mutthu oxankale. Tthiri ntakiheryo nna ninnivarihana ni Yehova okhala wira owo onniphavela onikhaliherya. Nto nikhaliheriwaka ni Yehova, nnoowerya oxintta moohakalala khula muxankiho onniphwanya.

3. Itthu xeeni tthaaru Yehova onirumeela awe wira onikhaliherye ovilela mixankiho moohakalala?

³ Yehova onnikhaliherya sai ovilela mixankiho moohakalala? Wira naakhule nikoho nna, nrowe nithokorerye iprofesia siri eliivuru ya Yesaya. Mwaha wa xeeni? Okhala wira iprofesia sinceene profeta Yesaya aarummwale awe ni Muluku sinnivareleya muteko olelo-va. Ikwaha sikina, profeta Yesaya aanirumeela moolumo ookhweya wira onikhaliherye  omusuwela saana Yehova. Mwa ntakiheryo, nrowe nithokorerye ekapiitulu 30 ya Yesaya. Ekapiitulu eyo, profeta Yesaya onnirumeela malikanyiho ooreera yaawo annikhaliherya osuwela moota Yehova onaakhaliherya awe arumeyi awe. Nto Yehova onnipaka eyo, (1) owiriyanaka saana mavekelo ahu ni waakhula, (2) onivahaka malakiheryo ni (3) onireelihaka olelo-va ni muhoolo. Nto vano, ninrowa othokorerya inamuna iyo tthaaru Yehova onirumeela awe wira onikhaliherye.

4. (a) Yehova aahimmye exeeni sa ayuda yaakhala okathi wa Yesaya, ni exeeni eemerenrye awe wira ewiiraneele? (b) Nlipelelo xeeni Yehova aavanhe awe ayuda oororomeleya? (Yesaya 30:18, 19)

⁴ Masu oopacerya a eliivuru ya Yesaya ekapiitulu 30, Yehova onnaahimya ayuda okhala “àna ahinìwelela” ni okhala atthu ‘anincererya sottheka saya’. Nave Yehova aahincererya oriki: “Nloko nla nloko n’atthu ahinìwelela ni òwòtha, . . . ankhotta wixuttihiwa n’Apwiya”. (Yes. 30:1, 9) Okhala wira atthu ale yaari oohiiwelela, Yesaya aahihimya wira Yehova aamweemererya wira awanani aya yaahaaxe. (Yes. 30:5, 17; Yer. 25:8-11) Nto, eyo ti etthu yiiraneyale, okhala wira aisarayeli ale yaahikhalihiwa ipottha oBabilonia. Masi ayuda yaari oororomeleya, profeta Yesaya aahaaleela muhupi woohakalaliha ni wa nlipelelo. Owo aahaaleela wira Yehova amwaahokoloxerya oYerusalemu. (Mmusome Yesaya 30:18, 19.) Tthiri eprofesia eyo yaahiiraneya okathi Yehova aawooponle awe aisarayeli oororomeleya yaari ipottha oBabilonia. Masi woopoliwa waya aisarayeli ale oororomeleya khiwiiraneyale moowaakuveya. Ninnisuwela eyo okhala wira moolumo oowi: “Apwiya annowehereryani wira yoleveleleni: awo animwemela wira yomoreleni ikharari”, anooniherya wira saahivira iyaakha sinceene wira aisarayeli ale oororomeleya yoopoliwe. Tthiri aisarayeli ale oororomeleya, yaahiviriha iyaakha 70 ari ene oBabilonia, ahinatthi weemereriwa otthikela elapo aya ya oYerusalemu. (Yes. 10:21; Yer. 29:10) Okhala wira yaari ipottha oBabilonia, nuumala otthikela elapo aya oYerusalemu awo yaanihakalala.

5. Yesaya 30:19, onnilipiha sai?

⁵ Olelo-va, hiyo ninnilipa vaavo nniiwa ahu moolumo ala ani: “Mwakhuwelelaru wa Muluku, owo onimomorelani ikharari”. (Yes. 30:19) Ni moolumo ala, Yesaya onninlipiherya wira Yehova onoowiriyana mavekelo ahu ni onimwaakhula okathi ninxanka ahu. Nave Yesaya aahincererya oriki: “Ìwakaru ikuttho sanyu, onowakhulani”. Yoolepa ela ennooniherya wira Tiithi ahu a wiirimu onniphavela onikhaliherya okathi nninvekela ahu. Nto osuwela eyo enninikhaliherya ovilela mixankiho sahu moohakalala.

6. Moota xeeni moolumo a Yesaya, anooniherya aya wira Yehova onniwiriyana ni ephoole mavekelo a khula murumeyi awe?

⁶ Nlipelelo xeeni nikina yoolepa ya Yesaya ninnivaha aya voohimya sa mavekelo ahu? Tthiri Yehova, onniwiriyana ni ephoole mavekelo anipakiwa ni khula murumeyi awe. Exeeni ennikupaliha eyo? Eversiikulu yoopacerya ya ekapiitulu 30, ennirumeela nuulumo noowi “nyuwo” ephavelaka ohimmwa atthu anceene aahiiso ekrupu ya atthu. Masi eversiikulu 19, nuulumo noowi “nyuwo” nirumeeliwe niphavelaka ohimmwa mutthu mmosa paahi. Yesaya olempe so: “Nyuwo khamuninla-tho”, “owo onimomorelani ikharari”, “onowakhulani”. Okhala wira Tiithi oophenta, okathi ninriipiwa ahu murima ni okhulumuwa, Yehova khonnileela so: “Nyuwo mwaahaana okhala oolipa ntoko munna wala murokora mukina”. Ohiya-vo, owo  onnaakhapelela ni owiriyana mavekelo arumeyi awe. — Esal. 116:1; Yes. 57:15.

7. Moota xeeni profeta Yesaya ni Yesu yoonihenrye aya efaita erina aya othipelela ovekela?

⁷ Okathi nimmuleela ahu Yehova mixankiho sahu, etthu yoopacerya enipaka awe, ori onivaha ikuru wira nivilele muxankiho owo. Nto akhala wira muxankiho ahu khonaakuva omala, hiyo woonasa wene nihaana othipelela onvekela Yehova ikuru wira niweryeke ovilela. Eyo ti etthu Yehova onnitumererya awe wira nipakeke. Nave ti yeeyo yoolepa ya Yesaya ennitumererya aya opaka, ni moolumo ala ani: “Muhamumuliheké Apwiya [Yehova]”. (Yes. 62:7) Moolumo ala antaphulela exeeni? Antaphulela wira nihaana ohihiya onvekela Yehova, eyo piiyo, ohimuhiya omumulaka. Moolumo a Yesaya, anninuupuxerya ele Yesu aahimmye awe voohimya sa mavekelo ari Luka 11:8-10, 13. Ni iversiikulu iya Yesu onnitumererya “othipelela” ni “othipelela oveka” munepa woowaarya. Nto nihaana onvekela Yehova malakiheryo wira nipake soothanla sooloka.

8. Khalai, moota xeeni moolumo ari Yesaya 30:20, 21, yiiraneyale aya?

⁸ Mmusome Yesaya 30:20, 21. Okathi anakhotto oBabilonia yaarukurenrye aya muttetthe wa oYerusalemu eyaakha emosa nnimeya, mixankiho sa aisarayeli yaakhala muttetthe ole saanincerereya. Masi moovarihana ni iversiikulu 20 ni 21, Yehova aahaaleiherya ayuda wira yattharuwa ni oturuka mweettelo aya owo anwoopola. Yesaya aahimuhimya Yehova okhala ‘Mwiixuttihi Muulupale’ nave aahaaleiherya aisarayeli wira Yehova anwiixuttiha enamuna ekina ya omukokhorela. Nto eyo yiiraneyale okathi yoole ayuda yoopoliwe aya weepotthani oBabilonia. Yehova ahooniherya okhala Mwiixuttihi Muulupale, nave aisarayeli attharaka malakiheryo awe, awo yaahipacerya omukokhoorela mwa enamuna yooloka. Nave olelo-va, ninnihakalala mwaha wa Yehova okhala Mwiixuttihi ahu Muulupale.

9. Inamuna xeeni Yehova onirumeela awe olelo-va wira onivahe malakiheryo?

⁹ Yoolepa ya Yesaya 30:20, 21, ennihimya wira hiyo niri ntoko atthu aniixuttihiwa ni Yehova. Nto owo onniniixuttiha orumeelaka inamuna piili. Yoopacerya, Yesaya aahaaleela aisarayeli wira ‘yamunweha Mwiixuttiha aya Muulupale ni maitho aya’. Nlikanyiho nna Yesaya orumeelale awe, ninlikana ni mwiixuttihi ori ene ohoolo wa anaxikola awe. Hiyo ninlikana ni anaxikola awo, nave nookhalana eparakha yuulupale ya wiixuttihiwa ni Yehova. Nto Yehova onniixuttiha sai? Onnipaka eyo orumeelaka mutthenkeso awe. Tthiri ninnixukhurela vanceene malakiheryo ninvahiwa  ahu ni mutthenkeso wa Yehova. Malakiheryo nnaakhela ahu mithukumano sa mmulokoni, okathi wa konkresu, okathi ninsoma ahu iliivuru sahu, onweha broadcasting ni inamuna sikina, sinninikhaliherya ovilela mixankiho moohakalala.

10. Mwa enamuna xeeni ninwiriyaana ahu nsu na Muluku ‘owaruni wahu’?

¹⁰ Yesaya onnihimya enamuna ya nenli Yehova onirumeela awe wira oniixuttihe. Owo aahimmye so: “Owaruni wanyu munimwiwa nsu”. Ni moolumo ala, profeta Yesaya onnimuhimya Yehova okhala Mwiixuttihi ori ottuli wa anaxikola awe ni onaathoonyerya ephiro ekhanle aya ootthara. Nave hiyo olelo-va, ninniwerya wiiwa nsu na Yehova owaruni wahu. Moota xeeni? Ninniwerya wiiwa nsu na Yehova, okathi nimmusoma ahu Biibiliya, yoowo olempwale iyaakha sinceene sivinre. Nto okathi nimmusoma ahu Biibiliya, onlikana ni wiiwa nsu na Yehova owaruni wahu. — Yes. 51:4.

11. Wira nivilele mixankiho moohakalala, itthu xeeni piili nikhanle ahu oopaka, ni mwaha wa xeeni?

¹¹ Ninrowa owerya sai ottottela mureerelo malakiheryo Yehova onnivaha awe orumeelaka mutthenkeso awe, ni Nuulumo nawe Biibiliya? Yesaya onnihimya itthu piili sinrowa onikhaliherya ottottela mureerelo malakiheryo a Yehova. Yoopacerya, “ephiro yorera t’ila”. Ya nenli “mutthareke yela”. (Yes. 30:21) Nto khivaniphiyerya paahi osuwela “ephiro”, masi nihaana ‘ottharaka’. Orumeelaka Nuulumo nawe ni mutthenkeso awe, Yehova onninleela etthu oniphavela awe wira nipakeke. Nave Yehova onniniixuttiha moota woweettela itthu onniixuttiha awe. Nto wira nivilele mixankiho sinnikhumelela mmutekoni mwa Yehova, nihaana osuwela ephiro ni weettela. Napaka eyo, Yehova onoonireeliha vanceene.

12. Moovarihana ni Yesaya 30:23-26, moota xeeni Yehova aarowa awe waareeliha arumeyi awe?

¹² Mmusome Yesaya 30:23-26. Moota xeeni eprofesia ela yiiraneyale aya ni aisarayeli yaatthinke weepotthani oBabilonia? Yehova aahaavaha mareeliho manceene aisarayeli. Mareeliho awo yaahaakhaliherya ovikaniha okhala akumi ni ohihiya omurumeela yena. Yehova aahaareeliha aisarayeli aavahaka eyoolya yinceene. Nave, Yehova aahaavaha malakiheryo manceene yaawo yaakhalihenrye olipiha waataana waya ni yena ni otthikela omukokhorela mwa enamuna yooloka. Mareeliho ale yaakhenle aya arumeyi a Muluku a okathi ole, yaahivikana itthu sootheene sooreera yaarina aya khalai. Eversiikulu 26, ennooniherya wira Yehova aahincererya malakiheryo awe aakhaliheryaka arumeyi awe wiiwexexa malamulo awe.  (Yes. 60:2) Nave mareeliho a Yehova yaahaakhaliherya arumeyi awe ohihiya omurumeela yena moohakalala ni ‘otthapa motteliwa murima’. — Yes. 65:14.

13. Moota xeeni eprofesia yaalavula sa ottikiheriwa okokhorela wa ekeekhai yiiraneyale aya olelo-va?

¹³ Niireke eprofesia enilavula sa ottikiheriwa okokhorela wooloka ennivarihana ni hiyo olelo? Aayo! Masi mwa enamuna xeeni? Okhuma mwaakha wa 1919  Nuumala Kristu Orwa, imilyau sinceene sa atthu aakhuma weepotthani, eyo piiyo, Babilonia muulupale yoowo okhanle etiini yoowootha. Okhala wira awo aaroihiwa opuro woolokexa ovikana elapo yooleiheriwa ya wIsarayeli a khalai. Niire so, awo annimurumeela Yehova nipuro nooloka ni noovareleleya. (Yes. 51:3; 66:8) Okokhorela weekeekhai exeeni?

14. Okokhorela weekeekhai exeeni, ni tani aniirela mpantta olelo-va?

¹⁴ Okhuma mwaakha wa 1919 Nuumala Kristu Orwa, makristau oothanliwa annimurumeela Yehova ni murettele ni mowiiraana. Nuuvira okathi, ale arina nlipelelo na okhala valaponi, niire so, “ipwittipwitthi sikina” vamosa ni makristau oothanliwa ahiixutta ikeekhai sinceene seiyo sinivirikana ni itthu sowoothiwa sa itiini sikina. Ohiya-vo, annivara muteko woolaleya ihapari sooreera sa Muluku nave aakhalana waataana wooloka ni Yehova, ni aakhalana murettele yoowo onaakhaliherya ovilela mixankiho saya moohakalala. Ninniirela mpantta okokhorela weekeekhai vaavo nimmurumeela ahu Yehova mwa enamuna oniphavela awe ni okathi nniimananiha ahu omutakiha. — Yoh. 10:16; Yes. 25:6; 65:13.

15. Okokhorela weekeekhai ori opuro xeeni?

¹⁵ Okokhorela iwo weekeekhai ori opuro xeeni? Okhala wira arumeyi a Yehova anniphwanyaneya elapo yootheene, nto okokhorela weekeekhai ori olumwenku wootheene. Nto olelo moohicikha opuro ninkhala ahu, nnoowerya wiirela mpantta okokhorela weekeekhai vakhala wira nnookhalela nthiti ovara miteko sa Muluku ni omutakiha.

16. Exeeni nikhale ahu oopaka wira niwehe oreera waya omukokhorela Yehova vamosa ni anna ni arokora?

¹⁶ Wira nihihiye wiirela mpantta okokhorela weekeekhai, nihaana wooniherya oxukhurela wahu mwaha wookhalana anna ni arokora a olumwenku wootheene. Ninrowa wooniherya sai oxukhurela wahu? Nnoowerya opaka eyo niwehaka mikhalelo sooloka sa anna ni arokora, ohiya soovonya saya. (Yoh. 17:20,  21) Xeeni vari aya va faita opaka eyo? Nkahaya muupuwele ela: Okathi ninrowa ahu oxukurya eparkhi yooreera ninnilipelela oweha miri soovirikana. Nto moolikanasa, mmulokoni ninnaaphwanya anna ni arokora arina mikhalelo soovirikana. Ntoko siisaale ninweha ahu mparkhi miri soovirikana. (Yes. 44:4; 61:3) Nto nihaana owehexexaka oreera wa “eparkhi”, ohiya moota “miri” siri aya. Hiyo khanimphavela wira soovonya sahu ni soovonya sa anna akina sihononeke wuuraana okhanle mmulokoni.

17. Etthu xeeni khula mmosa a hiyo, okhanle awe oopaka wira okhaliherye wuuraana mmulokoni?

¹⁷ Etthu xeeni khula mmosa a hiyo okhanle awe oopaka wira okhaliherye wuuraana wa mmulokoni? Nikhala aka atthu a murettele. (Math. 5:9; aRom. 12:18) Khula okathi nniimananiha ahu okumiherya murettele mmulokoni, ninnincererya oreera wa eparayiisu ya omunepani. Nave nihiliyale wira Yehova taathanlale anna awo ni arokora wira yiireleke mpantta eparayiisu ya omunepani. (Yoh. 6:44) Tthiri Yehova onnihakalala okathi onaaweha awe arumeyi awe yiimananiha aka okumiherya murettele ni wiiraana mmulokoni. — Yes. 26:3; Hag. 2:7.

18. Itthu xeeni ninreerela ahu wuupuwelela aka, ni mwaha wa xeeni?

¹⁸ Ninrowa ottottela sai mureerelo mareeliho Yehova onnivaha awe? Nnoottottela mureerelo, vakhala wira nnimuupuwelela ele ninsoma ahu mBiibiliyani ni iliivuru sinimutthokiherya Biibiliya. Nto osoma ni wuupuwelela, onoonikhaliherya okhalana mikhalelo sinrowa oniiriha ‘ophentana aka vanceene ntoko axinna’ ni ‘ottittimihana’ mmulokoni. (aRom. 12:10) Nto vakhala wira nnimuupuwelaka mareeliho nnaakhela ahu, nnoolipiha waataana wahu ni Yehova. Okathi nnuupuwelela ahu itthu sooreera Yehova onnileiherya awe onivaha muhoolo, eyo enoonikhaliherya ohihiya omurumeela. Nave itthu sootheene iyo sinoonikhaliherya omurumeela Yehova olelo-va moohakalala.

19. (a) Moovarihana ni Yesaya 30:18, etthu xeeni nikhanle ahu ookupali? (b) Exeeni enrowa onikhaliherya ovilela mixankiho moohakalala okathi nimmurumeela ahu Yehova?

¹⁹ Yehova ‘onimwemela’ wira onoopole okathi onrowa awe opwetexa olumwenku ola wootakhala. (Yes. 30:18) Nto hiyo ninnikupali wira Yehova, yoowo okhanle ‘Muluku oororomeleya’, khonrowa weemya wira olumwenku ola wa Satana okhaleke wa mahiku ootheene. (Yes. 25:9) Moopixa murima ninnimulipelela Yehova okathi onrowa awe omaliha mixankiho. Nto nihihiye ovaha efaita eparakha erina ahu ya ovekela, osoma ni ovarihela muteko Nuulumo na Muluku, wuupuwelela mareeliho nnaakhela ahu olelo-va ni ninrowa ahu waakhela muhoolo. Napaka itthu iyo, Yehova onoonikhaliherya ovilela moohakalala mixankiho sinniphwanya okathi nimmukokhorela ahu.