NIIREKE vannooxankihani omusoma Biibiliya khula esumana? Atthu anceene anoonela siiso. Masi muupuwele itthu nimpaka ahu khula nihiku, ntoko orapa. Orapa, onnikuxa okathi ni ikuru, masi nuumala opaka eyo, ninnikhala saana! Nave yoosoma ya Biibiliya, enlikanyihiwa ni ‘orapihiwa ni nuulumo na Muluku, ntoko orapihiwa ni maasi’. (aEef. 5:26) Nrowe nthokorerye malakiheryo vakhani anrowa oonikhaliherya opaka eyo:

• Mukhalaneke eprokrama ni mutthareke yeeyo. Yoosoma ya Biibiliya, eniirela mpantta ‘itthu sootepa oreerela’ seiyo mukristau onireerela awe opaka. (aFil. 1:10) Wiira muhiliyale okathi munirowa anyu opaka yoosoma anyu, pooti olepa nihiku ni ewoora vapapheloni ni opweha opuro vanrowa aya okhweyaka oweha. Aahiiso nyuwo pooti omwaativari alaarmi mutelefonini mwanyu wiira owuupuxeryekeni.

• Muupuweleke etthu ekhanle oowookhaliheryani. Enamuna xeeni munoona anyu okhweya opaka yoosoma anyu ya omwaneene? Mwa ntakiheryo, niireke munniwerya wiiwexexa ele munisoma anyu muhina mwa ewoora emosa paahi? Aahiiso munithanla osoma vakhaani-vakhaani khula nihiku? Nyuwo muhaana osuwela enamuna yoosoma enoophwanyihani mireerelo. Tivonto, musuweleke okathi munrowa anyu oviriha musomaka. Vakhala wiira vannoonyonyani osoma okathi mwaathanlale anyu, munoonela sai osoma iminutu 10 paahi? Hata musomaka iminutu vakhaani paahi, munimwiixutta itthu sinceene. Okathi muniviriha anyu iminutu iyo vakhaani musomaka, woonasa wene pooti osiveliwa ele munisoma anyu ni munaphavela ovikaniha. — aFil. 2:13.

• Muthanleke vahinatthi etthu munrowa anyu osoma. Vakhala wiira khamunithanla etthu munrowa anyu osoma ohinatthi ophiya okathi munrowa anyu opaka yoosoma anyu, khamunrowa orumeela ‘oratteene okathi anyu’. (aEef. 5:16) Nto munoonela sai opaka elista ya mwaha muniphavela anyu osoma? Akhala wiira munniphwanya eponto emosa muhiniiwexexa anyu, mwaanotariki. Nuumala ophera yoosoma anyu, nyuwo pooti ohela valistani vanyu iponto sikina mwaaphavela anyu osoma.

• Mukhaleke oowiixaakuviha. Etthu yootepexa okhalana efaita, ori osoma khula esumana. Masi wiira eyo eweryaneye, muhaana opaka marukunuxo voohimya sa ewoora ni nihiku munithanla anyu, okathi muniviriha anyu musomaka ni iponto munisoma anyu.

Vakhala wiira nnoopakaka yoosoma ahu khula esumana, nnoophwanya mareeliho manceene. Ompatthani ahu ni Yehova onookhala woolipa, nnoopakaka soothanla sooloka ni nnookhala atthu oolipa. — Yox. 1:8.