MWAHA ONITHOKORERIWA 44
NSIPO 33 Ninvahererye Yehova Ovelavela Wahu
Moota Woovilela Ohixariya
“Muhihiye muxinttiwaka ni sootakhala, masi muxintteke sootakhala mwiiraka sooreera”. — AROM. 12:21.
ELE NINROWA AHU WIIXUTTA
Mwaha ola, nnimwiixutta etthu nikhanle ahu oopaka vakhala wiira atthu akina anninthokorerya moohixariya.
1-2. Itthu xeeni sikhanle ooniiriha othokoreriwa moohixariya?
YESU aahilavula nlikanyiho na muthiyana mmosa naamukhweli. Nlikanyiho nlo, naahaavara murima atthareli a Yesu okhala wiira okathi ole, yaari yoolema atthu othokoreriwaka moohixariya. (Luka 18:1-5) Nave nlikanyiho nlo, pooti onikhaliherya olelo-va, okhala wiira woonasa wene, nootoko aahiiso ninnilipelela othokoreriwa moohixariya.
2 Atthu anceene olelo-va, ta nthalu, oowiixinnuwiha ni owootha. Ti nthowa naya, nihintikinihiwa ahu okathi ninthokoreriwa ahu moohixariya. (Mus. 5:8) Woonasa wene, etthu nihinlipelela ahu ori othokoreriwa moohixariya ni anna ni arokora, masi eyo pooti wiiraneya. Ekeekhai wiira anna ni arokora, khanlikana ni atthu akina annihaaxa. Masi awo atthu ayariwe ni etampi. Ntakiheryo na Yesu, nnoonikhaliherya oweha moota aavilenle awe ohixariya, ni moota nikhanle ahu otthara ntakiheryo nawe. Ntoko siisaale nniimananiha ahu waapixerya murima atthu ahinimurumeela Yehova masi annithokorerya moohixariya, mwa enamuna emosa-ru, nihaana wiimananiha waapixerya murima anna ni arokora! Yehova onoonela sai, okathi ninthokoreriwa ahu moohixariya ni atthu akina, waahela muhina anna ni arokora? Niireke Yehova onniweha etthu enniiraneela?
3. Ninsuwela sai wiira Yehova onniweha enamuna atthu akina annithokorerya aya?
3 Yehova onniweha moota atthu akina annithokorerya aya. Biibiliya onihimya wiira “Yehova ennimusivela exariya”. (Esal. 37:28) Yesu onnileiherya wiira Yehova “khonrowa opisa owiirela exariya” arumeyi awe, okathi wooreerela. (Luka 18:7, 8) Moohipisa, Yehova onoomaliha mixankiho sootheene ni inamuna sootheene sa ohixariya. — Esal. 72:1, 2.
4. Yehova onnikhaliherya sai okathi atthu akina annithokorerya aya moohixariya?
4 Nenna-va, nihaana olipelela okathi Yehova onrowa awe omaliha mixankiho sootheene. Masi ohinatthi ophiya okathi owo, Yehova onninlela etthu nimpirisari ahu opaka okathi ninthokoreriwa ahu moohixariya. (2 Ped. 3:13) Wiira nihitepe wiikumiherya mixankiho, Yehova onninleela etthu nikhanle ahu oopaka okathi ninthokoreriwa ahu moohixariya. Ohiya-vo, omurumeelaka mwanawe Yesu Kristu, Yehova oonivaha ntakiheryo na moota nikhanle ahu oovilela ohixariya. Nave mbiibiliyani, Yehova onninivaha miruku seiyo sinnikhaliherya okathi atthu akina annipakela aya etthu yoohiloka.
MUKHALANEKE EPHOOLE NI MOONELO ANYU
5. Xeeni ninreerela ahu okhalana ephoole ni moonelo ahu?
5 Hiyo pooti oxankiheya ni woona owereya mwaha wa ohixariya onikhumelela. (Mus. 7:7) Hata arumeyi oororomeleya a Yehova a khalai ntoko Yoobi ni Habakuki, yaahikhalana moonelo mmosa-ru. (Yoobi 6:2, 3; Hab. 1:1-3) Ekeekhai wiira khahiyo vootthekeya okhalana moonelo owo, masi nihaana okhalana ephoole wiira nihipake etthu yaarowa onikumiherya aahiiso waakumiherya mixankiho atthu akina.
6. Ntakiheryo na Absalomi ninniixuttiha exeeni? (Nwehe eteseenyo.)
6 Okathi ninhasuliwa ahu aahiiso nninweha ahu mutthu nnimphenta ahu othokoreriwaka moohixariya, woonasa wene, ninnuupuwela omuhukhumu aahiiso omwiirela etthu nnoona ahu oreerela para mutthu owo. Masi opaka eyo, enrowa otepiha paahi mwaha owo. Nwehe ntakiheryo na Absalomi mwaana a Mwene Davidi. Absalomi aahinyoonyiheya vanceene okathi murokorawe Tamari arupihiwe awe ni munnawe Aminoni. Moovarihana ni Nlamulo na Moise, Aminoni aahaana wiiviwa mwaha wa etthu ele yoohiloka aapanke awe. (Onam. 20:17) Absalomi aahikhalana mathowa yaarowa omwiiriha onanariwa mwaha wa etthu ele yaakhumelenle, masi owo khaarina etireitu ya omunlela ikuhu munnawe ole. — 2 Sam. 13:20-23, 28, 29.
Mwaha wa onanariwa, Absalomi aahipaka etthu yoohiloka nuumala murokorawe Tamari othokoreriwa moohixariya (Nwehe ettima 6)
7. Nasaalimu oonela sai ohixariya aaweha awe?
7 Ikwaha sikina vanikhala wiira atthu anipaka itthu soohiloka khanihukhummwa. Mwaha waivaavo, pooti opaceryaka waanyiherya vakhala wiira vannireerela opaka itthu sooloka. Nwehe etthu yiiraneyale ni nasaalimu, yoowo aapacenrye oweha wiira atthu yaapaka itthu sootakhala yaanikhumela saana, masi ale yaapaka itthu sooreera yaamutepa okhalana mixankiho. Owo aahimmye so: “Okathi wootheene, atakhali khanixanka ni etthu”. (Esal. 73:12) Owo aahixankiheya ni ohixariya aaweha awe, mpakha opacerya waanyiherya akhala wiira vaari vooloka wiimananiha omurumeela Yehova. Owo ahincererya ohimyaka so: “Okathi kaaphavenle aka osuwela oratteene etthu ene, Eyo yaahikixankiha”. (Esal. 73:14, 16) Olavulaka sa muupuwelo awe, owo onihimya-tho so: “Miyo kaahanle vakhaani ohapuwa; Kaahanle vakhaani otherekuwa”. (Esal. 73:2) Eyo yaahimwiiraneela munna mmosa oniitthaniwa Alberto.
8. Exeeni Alberto aapanke awe mwaha wa othokoreriwa moohixariya?
8 Alberto aahootheriwa wiiya musurukhu wa muloko. Mwaha waivaavo, owo aahiyeleela iparakha sawe sootheene nave khattittimihiwa ni anna ni arokora yaawo yaasuwenle mwaha ole. Owo ohimmye so: “Nkaareere oriipiwa murima, onanariwa ni okhulumuwa”. Mwaha wa etthu ele yiiraneyale, owo aahikhulumuwa nave ompatthani awe ni Yehova waahivukuwa, mpakha ohiya orowela mithukumano ni olaleerya iyaakha soowiiraka 5. Etthu yaamwiiranenle Alberto, ennooniherya etthu enrowa okhumelela akhala wiira nnoohiya nxinttiwaka ni onanariwa okathi ninthokoreriwa ahu moohixariya.
MMUTAKIHEKE YESU NVILELAKA OKATHI MUNITHOKORERIWA ANYU MOOHIXARIYA
9. Yesu aathokorerinwe sai moohixariya? (Nwehe eteseenyo.)
9 Yesu, ntakiheryo nooloka na ovilela okathi ninthokoreriwa ahu moohixariya. Muupuwele moota ahaareere awe othokoreriwa moohixariya ni amusi awe ni atthu akina. Amusi awe akina, yuupuwela wiira owo aaroovahuwa ni alipa-oowiixuttiha nlamulo yaahimya wiira miteko aavara awe, aakhaliheriwa ni minepa sootakhala. Nave anakhotto a oRoma yaaninveeha, omuhasula mpakha omwiiva. (Mar. 3:21, 22; 14:55; 15:16-20, 35-37) Hata vari siiso, Yesu aahivilela ohixariya ole wootheene ni khaawunlenle ikuhu. Exeeni nniixutta ahu ni ntakiheryo nawe?
Yesu oonivaha ntakiheryo nooloka na moota woovilela ohixariya (Nwehe ittima 9-10)
10. Yesu aavilenle sai ohixariya? (1 Pedru 2:21-23)
10 Mmusome 1 Pedru 2:21-23. a Yesu oonivaha moonelo wooloka ninreerela ahu okhalana, vaavo ninhasuliwa ahu aahiiso ninthokoreriwa ahu moohixariya. Aanisuwela okathi wooreerela olavula ni okathi woomaala. (Math. 26:62-64) Owo kheererya wiixaakiha ni khula etthu ootheriwa awe. (Math. 11:19) Nave okathi aalavula awe, owo khaaruwana ni khaamoopopiha mutthu. Yesu aanikhalana ephoole okathi aapaciwa awe, okhala wiira “aamuroromela Muluku oniphuka mwa xariya”. Yesu aanisuwela wiira etthu yaarina efaita yuulupale, waari okhalana moonelo wa Yehova voohimya sa mwaha ole. Nave aanisuwela wiira Yehova aamulokiherya mwaha ole okathi wooreerela.
11. Ninrowa okhalana sai ephoole ni itthu ninlavula ahu?(nwehe efootu.)
11 Nnoowerya omutakiha Yesu, nikhalanaka ephoole ni itthu ninlavula ahu okathi ninthokoreriwa ahu moohixariya. Ikwaha sikina, ohixariya iwo pooti okhala woohitepa, nto nihaana ohicalela itthu sikina. Ikwaha sikina, vannireerela ohilavula etthu, okhala wiira nalavula vale, pooti otepihaka mwaha owo. (Mus. 3:7; Yak. 1:19, 20) Okathi mukina, pooti opirisariki omwaakiha mutthu onithokoreriwa moohixariya aahiiso olavula ekeekhai wiira naakiherye sookupali sahu. (Mit. 6:1, 2) Masi okathi nimpaka ahu eyo, nihaana wiimananiha wiira nilavule moomaaleleya ni mwa nttittimiho. — 1 Ped. 3:15. b
Okathi ninthokoreriwa ahu moohixariya, nnoowerya omutakiha Yesu nisuwelaka okathi woomaala ni okathi woolavula (Nwehe ittima 11-12)
12. Nnooniherya sai wiira ninnimuroromela Muluku yoowo “oniphuka mwa xariya”?
12 Nave nnoowerya omutakiha Yesu, nimuroromelaka Yehova yoowo “oniphuka mwa xariya”. Okathi atthu akina annihasula aya aahiiso annithokorerya aya moohixariya, ninnisuwela wiira Yehova onnisuwela itthu sootheene sinihela muhina mwaha owo. Osuwela eyo, enninikhaliherya ovilela okathi ninthokoreriwa ahu moohixariya, okhala wiira ninnikupali wiira voohipisa Yehova onoolokiherya mwaha owo. Okathi nneemererya ahu wiira Yehova ophuke mixankiho sahu, ninnisyaka onanariwa ni khaninrowa opwehaka mathowa vamurimani. Muhiliyale wiira opweha mathowa vamurimani, pooti oniiriha opaka etthu yoohiloka, ohihakalala ni oyeleela ompatthani ahu ni Yehova. — Esal. 37:8.
13. Exeeni enrowa onikhaliherya ovilela moopixa murima okathi ninthokoreriwa ahu moohixariya?
13 Ekeekhai ti yoowi hiyo khaninwerya otthara moomalela ntakiheryo na Yesu. Ikwaha sikina, hiyo pooti olavula aahiiso opaka etthu ekhanle ooniiriha othanana. (Yak. 3:2) Inamuna sikina ninthokoreriwa ahu moohixariya, pooti onivilaka oliyala. Akhala wiira mootoko othokoreriwa moohixariya, muhiliyale wiira Yehova onnisuwela muxankiho anyu. Nave-tho Yesu yoowo otonko othokoreriwa moohixariya, onnisuwela moonelo anyu. (aHeeb. 4:15, 16) Ohiya paahi onivaha ntakiheryo na Yesu ninreerela ahu otthara, Yehova onninivaha malakiheryo yaawo annikhaliherya ovilela okathi ninthokoreriwa ahu moohixariya. Nrowe niwehe iversiikulu piili siri eliivuru ya aRoma sinrowa onikhaliherya ovilela.
“MMUHIYEKE MULUKU OONIHERYEKE OVIRUWA WAWE”
14. Onitaphulela exeeni ‘omuhiya Muluku ooniheryaka oviruwa wawe’? (aRoma 12:19)
14 Mmusome aRoma 12:19. Okathi murummwa Paulo aavaha awe miruku makristau wiira yaahana ‘omuhiya Muluku ooniheryaka oviruwa wawe’, aaphavela ohimya exeeni? Moovarihana ni moolumo ala, murummwa Paulo aaphavela ohimya wiira nihaana omuhiyerya Yehova ophukaka muxankiho owo. Hiyo ninnimuhiya Muluku ooniheryaka oviruwa wawe, vaavo nneemererya ahu wiira ophuke muxankiho owo okathi ni mwa enamuna oniphavela awe. Munna mmosa oniitthaniwa John, yoowo aathokoreriwe moohixariya onihimya so: “Miyo kaahaana okhalana ephoole ni onanariwa waka, wiira kihiphuke muxankiho ole mwa enamuna kaaphavela aka. Masi eyo khahiyo etthu yookhweya. ARoma 12:19 ookikhaliherya vanceene ohihiya omulipelela Yehova”.
15. Xeeni vari aya vooloka omuhiyerya Yehova wiira ophuke mixankiho sahu?
15 Vaavo nimmuhiya ahu Yehova wiira ophuke ohixariya nniireliwa ahu, ninniphwanya mareeliho manceene. Okathi nimpaka ahu eyo, ninkhala ntoko wiira niruliwe muritti woolemela, nave ninnisyaka onyoonyiheya onikhumelela mwaha wa ophavela ophuka mixankiho sahu mekhihu. Yehova ori oolikana ene wiira onikhaliherye. Nto okathi ninthokoreriwa ahu moohixariya, vanikhala ntoko wiira Yehova onihimya so: ‘Mukihiyerye miyo, kinoophuka muxankiho owo’. Vakhala wiira nnookupali yooleiherya eni: “Miyo kinimwattikiherya”, nnoowerya ohiya muxankiho owo oviraka ni ororomela wiira Yehova, onoophuka muxankiho owo mwa enamuna yooloka. Eyo ti etthu yaamukhalihenrye John. Owo uupuwela so: “Vakhala wiira kinoomuhiyerya Yehova muxankiho aka, owo onoophuka saana ovikana enamuna kaarowa aka weererya ophuka”.
“MUXINTTEKE SOOTAKHALA MWIIRAKA SOOREERA”
16-17 Ovekela onrowa onikhaliherya sai ‘oxintta sootakhala niiraka sooreera?’ (aRoma 12:21)
16 Mmusome aRoma 12:21. Murummwa Paulo aahaatumererya makristau wiira yaahana ‘oxintta sootakhala yiiraka sooreera’. Okathi Yesu aawiixuttiha awe atthu ori ene vamwaako, owo aahimmye so: “Muthipeleleke waaphenta awanani anyu ni mwaavekeleleke ale anoolupatthani”. (Math. 5:44) Tthiri eyo ti etthu Yesu aapanke awe. Niireke munniwerya wuupuwelela ohaawa wamphwannye Yesu okathi aakhomeliwe awe vamwirini va nihaaxeryo ni anakhotto a oRoma? Mweekeekhai owo khaareere ohaawa ni aahaana ovilela ohixariya wootheene.
17 Nnaamwi samphwannye mixankiho iye sootheene, Yesu khaahiyale okhala oororomeleya wa Tiithi awe. Ohiya onvekela Tiithi awe wiira aahukhumu anakhotto ale, owo aavekenle so: “Tiithi, mwaalevelele, maana khanisuwela etthu aniira aya”. (Luka 23:34) Okathi nnaavekelela ahu atthu annihaaxa, ninnivukula opweha mathowa va murimani, onanariwa, nave ninnituruka enamuna nnaathokorerya ahu ale annihasula.
18. Mavekelo amukhalihenrye sai Alberto ni John, ovilela okathi yaathokoreriwa aya moohixariya?
18 Ovekela ohaakhaliherya anna anli aromolinwe mwaha ola, ovilela okathi yaathokoreriwa aya moohixariya. Alberto, onihimya so: “Miyo kaanavekelela anna ale yaakithokorenrye moohixariya. Kaaninvekela Yehova ikwaha sinceene wiira okikhaliherye oliyala itthu sootheene siiraneyale”. Moohakalaliha, Alberto ootthikela omurumeela Yehova moororomeleya. John, onihimya so: “Kaaninvekelela ikwaha sinceene munna ole aakiveehale. Mwaha wa mavekelo awo, Yehova ookikhaliherya omulevelela, ohinanariwa ni yena ni ohimphukela. Nave mavekelo awo aakikhaliherya okhalana murettele”.
19. Etthu xeeni ninreerela ahu opaka okhuma nenna-va mpakha wanikisa? (1 Pedru 3:8, 9)
19 Mpakha wanikisa wa olumwenku ola, khanniwerya osuwela inamuna xeeni sa ohixariya sinrowa oniphwanya. Moohicikha enamuna ninrowa ahu othokoreriwa muhoolo, nihihiye onvekela nikhaliheryo Yehova. Ohiya-vo, muhihiye otthara malakiheryo a mbiibiliyani nave muhihiye omutakiha Yesu okathi munithokoreriwa anyu moohixariya. Vakhala wiira munoopaka eyo, mukupaliki wiira Yehova onimooreelihakani mahiku ootheene. — Mmusome 1 Pedru 3:8, 9.
NSIPO 38 Yehova Onimoovahani Ikuru
a Eliivuru ya 1 Pedru ikapiitulu 2 ni 3, murummwa Pedru onnilavula sa inamuna sa ohixariya saaphwanya makristau. Mwa ntakiheryo, akina yaari ipottha, nto yaanihasuliwa ni mapatarau aya, nave athiyana akina yaanihasuliwa ni axiiyaya yaawo yahaamurumeela Yehova. — 1 Ped. 2:18-20; 3:1-6, 8, 9.
b Nwehe eviidiyu eni: Moota Ophenta Onniphwanyiha Aya Murettele Weekeekhai eri va jw.org.
