MWAHA ONITHOKORERIWA 46
NSIPO 49 Nimuhakalalihe Yehova
Niireke Munniimananiha Wiira Mukhale Murumeyi Ookhaliherya?
“Ovaha onnitepa ohakalaliha ovikana ovahiwa”. — MIT. 20:35.
ELE NINROWA AHU WIIXUTTA
Mwaha ola, onimwaakhaliherya anna apatisiwe wiimananiha wiira akhale arumeyi ookhaliherya.
1. Murummwa Paulo aawoonela sai arumeyi ookhaliherya?
ARUMEYI ookhaliherya, annivara muteko munceene akhaliheryaka muloko. Murummwa Paulo, aanivaha efaita muteko yaavara aya alopwana awo. Etthu ennikupaliha, okhala wiira okathi aalepa awe ekarta aaroihelaka makristau yaakhala oFilipo, aanaakhomasa axitokweene vamosa ni arumeyi ookhaliherya. — aFil. 1:1.
2. Munna oniitthaniwa Luis onoonela sai orumeela ntoko murumeyi ookhaliherya?
2 Anna anceene oopatisiwa nave arina iyaakha soovirikana, annihakalala mwaha wa okhaliherya mmulokoni ntoko arumeyi ookhaliherya. Mwa ntakiheryo, Devan aathanliwe ntoko murumeyi ookhaliherya orine ene iyaakha 18. Nave-tho munna oniitthaniwa Luis, aathanliwe ntoko murumeyi ookhaliherya orine ene iyaakha sinivikana 50. Owo ohimmye so: “Kinnoona okhala eparakha yuulupale okhaliherya mmulokoni ntoko murumeyi ookhaliherya, otepexa wene okathi kinweha aka niphento na anna ni arokora!” Nave-tho arumeyi ookhaliherya akina arina moonelo mmosa-ru.
3. Exeeni ninrowa ahu othokorerya mwaha ola?
3 Vakhala wiira mwa munna oopatisiwa ni nlelo khahiyo mwa murumeyi ookhaliherya, niireke munniphavela okhalana yoolukama eyo? Exeeni enrowa wookhaliheryani? Exeeni Biibiliya onihimya awe, enrowa wookhaliheryani wiira mukhale murumeyi ookhaliherya? Mwaha ola, onimwaakhula makoho awo. Masi wanipacerya nrowe nthokorerye muteko anivara aya.
MUTEKO XEENI ARUMEYI OOKHALIHERYA ANIVARA AYA?
4. Miteko xeeni arumeyi ookhaliherya anivara aya? (Nwehe efootu.)
4 Arumeyi akina ookhaliherya a mmulokoni, annikhapelela iliivuru ni mapuro muloko onilaleerya aya. Akina annikhaliherya orattela ni olokiherya Empa ya Omwene. Awo annirumeela ntoko anamathoonyerya ni annikhapelela ikaruma sa audio-video. Arumeyi ookhaliherya, annivara muteko munceene. Masi hata vari siiso, awo alopwana arina waamini woolipa, annimphenta Yehova ni anikhala moovarihana ni ele Biibiliya oniixuttiha awe. Nave awo annaaphenta anna ni arokora a mmulokoni. (Math. 22:37-39) Etthu xeeni munna oopatisiwa onireerela awe opaka wiira okhale murumeyi ookhaliherya?
Arumeyi ookhaliherya annimutakiha Yesu yiivahereryaka wiira yaakhaliherye atthu akina (Nwehe ettima 4)
5. Exeeni enrowa wookhaliheryani waakhela eparakha ya okhala murumeyi ookhaliherya?
5 Biibiliya, onnivaha malakiheryo yaawo akhanle oomukhaliherya munna okhala murumeyi ookhaliherya. (1 Tim. 3:8-10, 12, 13) Munoonela sai osoma malakiheryo awo ni wiimananiha weettela? Opaka eyo enimookhaliheryani waakhela eparakha eyo. Masi wanipacerya, muhaana osuwela etthu eniwiirihani ophavela okhala murumeyi ookhaliherya.
EXEENI ENIWIIRIHANI OPHAVELA ORUMEELA NTOKO MURUMEYI OOKHALIHERYA?
6. Exeeni ekhanle owiirihani ophavela opaka itthu wiira mwaakhaliherye atthu akina? (Matheyo 20:28; Nwehe vakaapani.)
6 Yesu ntakiheryo nahu nuulupale. Itthu sootheene aavara awe, waari mwaha womphenta Tiithi awe ni atthu akina. Niphento ti naamwiiriha waakhaliherya atthu akina ni ovara miteko mowiiyeviha. (Mmusome Matheyo 20:28; Yoh. 13:5, 14, 15) Nto vakhala wiira itthu sootheene munipaka mwaha wa niphento, Yehova onimooreelihani ni wookhaliheryani wiira mphwanelele orumeela ntoko murumeyi ookhaliherya. — 1 aKor. 16:14; 1 Ped. 5:5.
Okathi Yesu aarapiha awe inawu sa arummwa awe, aahiwiixuttiha wiira yahaana wiiyeviha ni waarumeela atthu akina, ohiya ophavelasa ovuwa (Nwehe ettima 6)
7. Xeeni munna onireerela awe osyaka wiixinnuwiha?
7 Atthu anceene moolumwenkuni, annaattottopela atthu oowiixinnuwiha ni aniphavela mureerelo aya. Masi arumeyi a Yehova nnaari. Munna onaakhaliherya atthu akina mwaha wa niphento ntoko Yesu, khonrowa ophavelaka efaama, okhulupale nnakhala wiixoona okhalana efaita waavikana atthu akina. Akhala wiira mulopwana oowiixinnuwiha aamuthanliwa ntoko murumeyi ookhaliherya, woonasa wene, amukhoottaka ovara miteko seiye sihinooneliwa vatthu, okathi onikhaliherya awe ipwittipwitthi sa Yehova. Nave owo pooti wuupuwelaka wiira ookhalana efaita ohinreerela awe ovaraka miteko iyo. (Yoh. 10:12) Yehova khonaareeliha atthu yaale anipaka itthu moowiixinnuwiha aahiiso aphavelaka wooniwa. — 1 aKor. 10:24, 33; 13:4, 5.
8. Miruku xeeni Yesu aavahale awe arummwa?
8 Hata apatthani a Yesu, ikwaha sikina yaaniphavela okhalana iparakha masi ni mathowa oohiloka. Mwa ntakiheryo, nwehe etthu yiiraneyale ni arummwa a Yesu anli, Yakobo ni Yohani. Awo yahinvekela Yesu wiira aavahe opuro wa faita Moomweneni mwawe. Yesu khaattottopenle mwaha wa yoophavela aya ele ya wiixoona okhalana efaita, waavikana atthu akina. Ohiya-vo, awiixutti awe ale anli aalenle so: “Ole oniphavela okhala mukhulupale eriyari anyu, ohaana okhala murumeyi anyu. Nave ole oniphavela okhala oopacerya eriyari anyu, ohaana okhala epottha anyu”. (Mar. 10:35-37, 43, 44) Okathi munna oniphavela awe okhala murumeyi ookhaliherya ni mathowa ooloka, eyo piiyo, waarumeela atthu akina, owo onnikhaliherya vanceene muloko. — 1 aTes. 2:8.
MUNROWA WUNCERERYA SAI YOOPHAVELA ANYU YA OKHALA MURUMEYI OOKHALIHERYA?
9. Munrowa wuncererya sai yoophavela anyu ya waarumeela atthu akina?
9 Moohaanyiherya, munnimphenta vanceene Yehova ni munniphavela waakhaliherya atthu akina. Masi woonasa wene, khamuniphavela okhala murumeyi ookhaliherya, maana munoona wiira munookhalanaka muteko munceene. Nto munrowa wuncererya sai yoophavela anyu ya waakhaliherya atthu akina? Enamuna emosa, ori wuupuwelela ohakalala oniphwanya ahu okathi nnaakhaliherya ahu anna ni arokora. Yesu aahimmye so: “Ovaha onnitepa ohakalaliha ovikana ovahiwa”. (Mit. 20:35) Yesu aahooniherya eyo. Yesu aanihakalala vanceene okhala wiira anaarumeela atthu akina, mwa enamuna emosa-ru enimwiiraneya ni nyuwo.
10. Exeeni enooniherya wiira Yesu aanihakalala okathi aarumeela awe atthu akina? (Marko 6:31-34)
10 Nwehe ntakiheryo nimosa, nnooniherya moota Yesu aahakalala awe mwaha woowaarumeela atthu akina. (Mmusome Marko 6:31-34.) Waahikhala okathi Yesu ni arummwa awe yahaareere aya okhulumuwa. Nto awo yaahirowa waavya opuro woomaaleleya wiira aphumurye. Masi muttitthi wa atthu waahipacerya ophiya ohinatthi Yesu ni awiixutti awe, maana yaaphavela owiriyana itthu Yesu aixuttiha awe. Yesu anwerya okhootta, okhala wiira owo ‘khaarina okathi woomumula, nnakhala woolya’. Aahiiso Yesu anwerya owiixuttiha itthu vakhaani paahi, nuumala-vo, aamwaryeke atthu ale. Masi Yesu aanaaphenta atthu. Mwaha waivaavo, owo “aahipacerya owiixuttiha itthu sinceene”. Yesu aahiixuttiha muttitthi ole mpakha ‘nsuwa okela’. (Mar. 6:35) Yesu khaapanke eyo mwaha wa okhanyereriwa, masi mwaha woowi ‘aaniwoonela othunku atthu’. Owo aaniphavela owiixuttiha okhala wiira anaaphenta. Nto okathi Yesu aapaka awe eyo aanihakalala vanceene.
11. Itthu xeeni sikina Yesu aapanke awe wiira okhaliherye muttitthi ole? (Nwehe eteseenyo.)
11 Ohiya paahi wiixuttiha, Yesu aahikhaliherya muttitthi ole mwa enamuna ekina. Enamuna xeeni ekina Yesu aakhalihenrye awe? Mwa miiriirya, Yesu aahikuxa iphaawu 5 ni ihopa piili ni owiirela awiixutti awe wiira akawele muttitthi ole. (Mar. 6:41) Mwa enamuna eyo, Yesu aahiwiixuttiha atthareli awe waarumeela atthu akina. Nave aahiwooniherya efaita erina aya waakhaliherya atthu akina ni miteko. Eyo ti etthu ekhanle aya oopaka arumeyi ookhaliherya. Muupuwele moota arummwa ale yaahakalanle aya mwaha wa omukhaliherya okawa eyoolya ele, yeeyo atthu ‘otheene yaalyiiye aya mpakha ovona’! (Mar. 6:42) Ela khahiyo yaari ekwaha yoopacerya, Yesu aapwenhe awe nipuro noopacerya soophavela sa atthu akina. Okathi wootheene Yesu aari awe valaponi, aanipaka eyo. (Math. 4:23; 8:16) Yesu anihakalala vanceene okathi aawiixuttiha awe atthu akina, ni opaka itthu moowiiyeviha wiira aakhaliherye. Moohaanyiherya, nyuwo-tho munoohakalalaka vanceene akhala wiira munoopwehaka nipuro noopacerya soophavela sa atthu akina, ni wiimananiha opaka ele eniwerya anyu, wiira mukhale murumeyi ookhaliherya.
Omphenta Yehova ni yoophavela anyu ya omurumeela, enoowiirihani opaka ele eniwerya anyu wiira mwaakhaliherye anna ni arokora mmulokoni (Nwehe ettima 11) a
12. Xeeni nihinreerela ahu ohimya wiira khaninsuwela itthu sinceene wiira nikhaliherye muloko?
12 Atthu akina anuupuwela wiira khanisuwela itthu sinceene wiira arumeeliweke mmulokoni. Akhala wiira munuupuwela siiso, muhikhulumuwe. Moohaanyiherya, mookhalana mikhalelo sooloka wiira mwaakhaliherye atthu akina. Munoonela sai oleeri masu a murummwa Paulo ari 1 aKorinto 12:12-30 ni ovekela voohimya sa mwaha owo? Iversiikulu iyo, Paulo onnooniherya wiira khula murumeyi a Yehova woohelani muhina nyuwo, mookhalana efaita wa Yehova ni mmulokoni. Vakhala munuupuwela wiira khamuniwerya weettela malakiheryo wiira mukhale murumeyi ookhaliherya, muhikhulumuwe. Ohiya-vo, mwiimananiheke opaka ele eniwerya anyu wiira mmurumeeleke Yehova ni waakhaliherya anna ni arokora. Tivonto, mukupaliki wiira axitokweene animoona wiimananiha wanyu, ni animoovahani miritti seiyo muniwerya anyu omaleliha. — aRom. 12:4-8.
13. Malakiheryo xeeni anireerela aya weettela ale aniphavela okhala murumeyi ookhaliherya?
13 Nwehe-tho nthowa nimosa nikhanle owookhaliheryani wiimananiha wiira mukhale murumeyi ookhaliherya. Malakiheryo munireerela anyu otthara ti yaawo makristau ootheene anitthara aya. Mwa ntakiheryo, makristau ootheene ahaana olipiha waataana waya ni Yehova, okhala oolikana ene waakhaliherya atthu akina moohakalala ni ovaha ntakiheryo nooloka ni mweettelo aya. Woonasa wene, mookhalana mikhalelo sootheene sinivekeliwa wiira mukhale murumeyi ookhaliherya. Masi malakiheryo xeeni ooluluwanya yaawo munna onireerela awe otthara wiira okhale murumeyi ookhaliherya?
ITTHU MUNIREERELA ANYU OPAKA WIIRA MUKHALE MURUMEYI OOKHALIHERYA
14. Onitaphulela exeeni okhala “oororomeleya”? (1 Timootheyo 3:8-10, 12)
14 Nrowe niwehe malakiheryo vakhaani aniromoliwa 1 Timootheyo 3:8-10, 12. (Mmusome.) Arumeyi ookhaliherya, ahaana okhala alopwana “oororomeleya”. Nuulumo nla, pooti otaphuleliwa ntoko mutthu “onittittimihiwa” ni atthu akina, ‘ootthokiheya aahiiso onipaka itthu mwa enamuna atthu akina animuttittimiha aya’. Masi eyo khentaphulela wiira khamukhanle ootheya ni otthekula ni atthu akina. (Mus. 3:1, 4) Nto muhaana wiimananihaka wiira mmalelihe miritti sanyu. Vakhala wiira munimwiimananihaka opaka ele eniwerya anyu, atthu anceene mmulokoni animoottittimihakani.
15. Onitaphulela exeeni okhala mulopwana ‘ohinootha’ ni ‘ohiniphiyeriwa’?
15 ‘Ohaana okhala mulopwana ohinootha’. Eyo enitaphulela wiira nyuwo muhaana olavulaka ekeekhai okathi wootheene ni okhala oororomeleya. Muhaana olavula ekeekhai ni waakhwaniherya aahiiso omaleliha ele enihimya anyu. (Mir. 3:32) ‘Owo ohiphaveleke okhalana itthu voohiphiyeriwa’. Eyo enitaphulela wiira, muhaana ororomeleya ni muteko anyu ni osuwela orumeela musurukhu. Nyuwo khimwaarowa opatthana ni anna ni arokora a mmulokoni mphavelaka mureerelo anyu.
16. a) Onitaphulela exeeni ‘ohiwurya eviinyu yinceene’? b) Onitaphulela exeeni okhalana ‘murima wooreera’?
16 ‘Ohiwuryeke eviinyu yinceene’. Eyo enitaphulela wiira, muhaana osyaka owurya eviinyu yinceene mpakha ovikaniha mitita ni muhaana osyaka osuweliwa ntoko namuhapaliwa. Ohaana okhalana “murima wooreera”. Eyo enitaphulela wiira, muhaana ottittimiha ele Yehova onihimya awe okhala yooloka ni yoohiloka. Ekeekhai wiira nyuwo mwa mutthu oottheka, masi mookhalana ompatthani woolipa ni Yehova, nto eyo, ennoophwanyihani murettele.
17. Onitaphulela exeeni ‘owehiwa yaaphwanelelaka’? (1 Timootheyo 3:10; Nwehe efootu.)
17 ‘Awo apaceryeke toko owehiwa yaaphwanelelaka’. Eyo enitaphulela wiira axitokweene, aaweha mikhalelo sanyu nave pooti woororomelakani. Vakhala wiira axitokweene animoovekelani aahiiso woorumani ovara muteko mmosa, mutthareke malakiheryo aya ni malakiheryo anikhumiheriwa ni mutthenkeso wa Yehova. Mphavelaseke osuwela itthu sootheene sinihela muhina muteko owo ni mahiku nvahiwe anyu wiira mmalihe. Vakhala wiira munomalelihaka soothanleliwa sanyu, atthu anoowehaka wiira munnikela vahoolo. Xontte anna muri axitokweene, muhihiye owiixuttiha anna oopatisiwa. (Mmusome 1 Timootheyo 3:10.) Niireke muloko anyu aakhala anna apatisiwe arina iyaakha sihinivikana 14? Niireke annipaka yoosoma aya ya omwaneene ni annilokiherya mithukumano? Niireke annivaha ikomentaario omithukumanoni ni anniluttuweliwa muteko woolaleerya? Vakhala wiira makoho ala munaakhula wiira aayo, weeso mwaavaheke miritti munoona anyu wiira anoowerya moovarihana ni makhalelo aya. Mwiira siiso, munooweha wiira ‘anniphwanelela’. Woonasa wene okathi anrowa aya ophiyeriha iyaakha 17 aahiiso 18 anooreerelaka okhala arumeyi ookhaliherya.
Okathi axitokweene anaavaha aya miritti anna oopatisiwa, eyo ennaakhaliherya waaweha ‘yaaphwanelelaka’ (Nwehe ettima 17)
18. Onitaphulela exeeni okhala mutthu ‘ohirina mulattu’?
18 ‘Ohikhalaneke mulatthu’. Eyo enitaphulela wiira atthu akina ahimuhimyaneke itthu sootakhala. Ekeekhai wiira atthu akina pooti owootheryakani itthu soohiloka. Eyo yaahiiraneya ni Yesu, nave-tho aahihimya wiira atthareli awe yanwiiraneela etthu emosa-ru. (Yoh. 15:20) Masi vakhala wiira munookhalana mweettelo wooloka ntoko Yesu, eyo enimookhaliheryani osuweliwa ntoko mutthu orina mweettelo wooloka mmulokoni. — Math. 11:19.
19. Onitaphulela exeeni okhala ‘mulopwana orina muthiyana mmosa paahi’?
19 “Ekhaleke alopwana arina muthiyana mmosa paahi”. Muhaana okhalana moonelo mmosa-ru wa Yehova voohimya sa ekasamento, eyo piiyo, okhalana muthiyana mmosa paahi. (Math. 19:3-9) Mukristau orina waataana woolipa ni Yehova khonikhala-khala orupihanaka voohiloka. (aHeeb. 13:4) Ohiya-vo, ohaana ororomeleya wa mwaarawe ni ohilavula moovekana ni athiyana akina. — Yoobi 31:1.
20. Mulopwana onrowa ‘weettiha sai saana etthoko awe’?
20 “Eweettiheke saana anaaya ni itthoko saya”. Vakhala wiira mwa muhooleli a etthoko, muhaana wiimananiha wiira mmalelihe miritti sanyu. Khula esumana muhicompeleke omulompa Muluku vatthokoni. Mwiimananiheke orowela muteko woolaleerya ni amwaarinyu ni aniinyu. Mwaakhaliheryeke aniinyu olipiha waataana waya ni Yehova. (aHeeb. 6:4) Mulopwana onisuwela okhapelela saana emusi awe, onooniherya wiira onoowerya okhapelela muloko. — Mulikanyihe ni 1 Timootheyo 3:5.
21. Vakhala wiira nlelo khamuhiyo murumeyi ookhaliherya, exeeni mukhanle anyu oopaka?
21 Vakhala wiira nlelo khamuhiyo murumeyi ookhaliherya, xontte musome ni ephoole ni nvekeleke voohimya sa mwaha ola. Musomeke malakiheryo ari mbiibiliyani, yaawo aniroiheliwa arumeyi ookhaliherya ni mwiimananiheke weettela. Muupuweleke omphenta wanyu Yehova ni anna ni arokora a muloko anyu. Opaka eyo, enimuncererya yoophavela anyu ya waarumeela atthu awo. (1 Ped. 4:8, 10) Vakhala wiira munookhala murumeyi ookhaliherya, munooweha ohakalala onikhumelela mwaha wa waarumeela anna ni arokora a muloko anyu. Nave mukupaliki wiira Yehova onooreeliha wiimananiha wanyu wiira mukhale murumeyi ookhaliherya! — aFil. 2:13.
NSIPO 17 “Kinnitthuna”
a OTTHOKIHERIWA WA EFOOTU: Okathi Yesu aarapiha awe inawu sa arummwa, aahiwiixuttiha wiira yahaana wiiyeviha ni waarumeela atthu akina ohiya ophavelasa ovuwa. Epaaxina 17: Moono woothiyana, moowiiyeviha, Yesu aarumeelaka arummwa awe; Moono woolopwana, Murumeyi ookhaliherya omukhaliheryaka munna oowuuluvala.
