MWAHA ONITHOKORERIWA 47
NSIPO 103 Axitokweene: Yoovaha ya Yehova
Niireke Munniimananiha Wiira Mukhale Mutokweene a Mmulokoni?
“Akhala mulopwana oniphavela okhala mutokweene onihoolela, owo onniphavela etthu yooreera”. — 1 TIM. 3:1.
ELE NINROWA AHU WIIXUTTA
Mwaha ola, nnoothokorerya malakiheryo a mbiibiliyani yaawo murumeyi ookhaliherya onireerela awe osuwela ni weettela, wiira okhale mutokweene a mmulokoni.
1-2. Exeeni enihela muhina “etthu yooreera”, yeeyo axitokweene anivara aya?
AKHALA wiira mooviriha okathi murumeelaka ntoko murumeyi ookhaliherya, woonasa wene, eyo enimookhaliheryani okhala mutokweene a mmulokoni. Niireke munniphavela opaka “etthu yooreera”, yeeyo axitokweene anipaka aya? — 1 Tim. 3:1.
2 Miteko xeeni axitokweene anivara aya? Awo annihoolela muteko woolaleerya, waaxukurya anna ni arokora, anniixuttiha ni annilipiha muloko ni moolumo aya ni miteko saya. Ti maana aya Biibiliya onaahimya awe alopwana awo anivara muteko munceene, okhala “soovaha”. — aEef. 4:8.
3. Etthu xeeni murumeyi ookhaliherya, onireerela awe opaka wiira okhale mutokweene? (1 Timootheyo 3:1-7; Tito 1:5-9)
3 Etthu xeeni munireerela anyu opaka wiira mukhale mutokweene? Mutthu oniphavela okhala mutokweene, toovirikana ni mutthu oniphavela ovara muteko vampereesani. Okhala wiira vampereesani, mwakhalana mikhalelo sinivekeliwa ni patarau wiira mphwanelele ovara muteko owo, moohaanyiherya munoophwanya. Moovirikana ni vo, wiira mutthu okhale mutokweene, khivampirisari paahi osuwela olaleerya ni wiixuttiha. Muhaana weettela malakiheryo ari mbiibiliyani para axitokweene yaawo ari 1 Timootheyo 3:1-7 ni Tito 1:5-9. (Mmusome.) Mwaha ola, nnoothokorerya iponto 3 seiyo axitokweene anireerela aya weettela: (1) Okhalaneke mweettelo wooloka mmulokoni ni mapuro makina, (2) osuweleke weettiha saana etthoko awe ni (3) okhaleke oolikana ene wiira okhaliherye muloko.
OKHALANEKE MWEETTELO WOOLOKA
4. Onitaphulela exeeni ‘weettiha saana okumi anyu wira atthu ahoophwanyanekeni mulattu’?
4 Wiira mukhale mutokweene, nyuwo ‘muhaana weettiha saana okumi anyu wira atthu ahoophwanyanekeni mulattu’. Eyo enitaphulela wiira mookhalana mweettelo wooloka mmulokoni, okhala wiira khuuvo onoohimyanani mweettelo woohiloka. Ohiya-vo, muhaana “wooniwaka saana ni atthu ahikhanle a mmulokoni”. Atthu akina pooti wooveehani mwaha wookhala mukristau, masi ohikhale mutthu onrowa waanyiheryaka wiira mwa mutthu ooloka ni oororomeleya. (Dan. 6:4, 5) Mwiikoheke so: ‘Kiireke anna, arokora ni atthu akina, annoona wiira kookhalana mweettelo wooloka?’
5. Etthu xeeni munireerela anyu opaka wiira ‘musiveliweke ni itthu sooreera’?
5 Nave-tho muhaana ‘osiveliwaka itthu sooreera’, aahiiso mphaveleke oweha mikhalelo sooloka sa anna ni arokora ni waattottopela. Muhakalaleke mwaha woowiirela itthu sooreera atthu akina. (1 aTes. 2:8) Xeeni makristau anireerela aya okhalana mukhalelo ola wa osiveliwa itthu sooreera? Okhala wiira, awo anniviriha okathi munceene yaalipihaka anna ni arokora ni akhapelelaka miritti sikina. (1 Ped. 5:1-3) Hata vari siiso, ohakalala aniphwanya aya mwaha wa waakhaliherya atthu akina, ti wuulupale ovikana miteko anivara aya. — Mit. 20:35.
6. Inamuna xeeni mukhanle anyu owooniherya wiira ‘munniwaakhela aletto’? (aHeeberi 13:2, 16; Nwehe efootu.)
6 Munimooniherya wiira ‘munniwaakhela aletto’, okathi munaapakela anyu itthu sooloka atthu akina, hata ale muhinviriha anyu okathi munceene muri ene naawo. (1 Ped. 4:9) Eliivuru emosa elavulaka sa mutthu oosuwela owaakhela aletto, ehimmye so: “Ohaana owaakhela owannya awe ni murima awe wootheene, hata atthu yaale ohinaasuwela awe”. Nto mwiikoheke so: ‘Kiireke kinnisuweliwa okhala mutthu ooreera murima, ni oniwaakhela saana atthu anrwa oxukurya muloko aka?’ (Mmusome aHeeberi 13:2, 16.) Mutthu oniwaakhela aletto, onnaareerela murima ni onnaavaha itthu orina awe ale animuxukurya. Eyo enihela muhina waavaha atthu oothoiwa muhilipelelaka ottikiheriwa etthu. Nihaana opaka eyo hata ni anna anilattuliwa olavula myaha sa mmulokoni vamosa ni axitokweene a esirkwiitu. — Maph. 18:2-8; Mir. 3:27; Luka 14:13, 14; Mit. 16:15; aRom. 12:13.
Anamathelana amosa amwaakhelaka owannyeya mutokweene a esirkwiitu ni mwaarawe (Nwehe ettima 6)
7. Mutokweene, onooniherya sai wiira ‘Khoniphenta musurukhu’?
7 ‘Khoniphenta musurukhu’. Eyo enitaphulela wiira khonihela nipuro noopacerya itthu sa weerutthuni. Moohicikha akhala wiira mookhalana musurukhu munceene aahiiso nnaari, muhaana ohela nipuro noopacerya Omwene wa Muluku mookumi mwanyu. (Math. 6:33) Munnirumeela okathi anyu, ikuru sanyu ni itthu sootheene murina anyu wiira mmurumeeleke Yehova. Nave munniimananiha mwaakhaliheryaka amusi anyu ni anna ni arokora. (Math. 6:24; 1 Yoh. 2:15-17) Mwiikoheke so: ‘Kinoonela sai musurukhu? Kiireke kinnihakalala ni itthu kirina aka? Kiireke kinniimananiha ophavelasa musurukhu munceene ni itthu siniphavelexiwa ni atthu?’ — 1 Tim. 6:6, 17-19.
8. Munrowa wooniherya sai wiira ‘munnisuwela wiiphimela itthu sotheene’ ni ‘munnihiiha’?
8 Akhala wiira ‘munoosuwelaka wiiphimela itthu sotheene’ ni okhala “oowiihiiha”, eyo enooniherya wiira munooweryaka opaka soothanla sooloka mweekumini mwanyu. Nave munooweryaka wiiphimela itthu ntoko olya, owurya, moota woowara ni matthekulelo. Khamunrowa otakihaka mweettelo wa atthu ahinimurumeela Yehova. (Luka 21:34; Yak. 4:4) Nave khamunihiya okhala oomaleleya hata atthu akina yoopacakani aahiiso ahoothokoreryakani mooreera murima. Muhikhaleke “namuhapaliwa” nnakhala osuweliwa ntoko mutthu oowurya vanceene. Mwiikoheke so: ‘Kiireke mweettelo aka onnooniherya wiira ka mutthu onisuwela wiiphimela aahiiso kinniihiiha?’
9. Exeeni enihela muhina okhala mulopwana ‘onuupuwela vookhalela’ ni “oowiitthokiha saana”?
9 Wiira mukhale mutthu ‘onuupuwela vookhalela’, muhaana ovarerya khula mwaha muttharaka malakiheryo a mbiibiliyani. Vakhala wiira munimuupuwelelaka malakiheryo awo, munoowerya wiiwexexa itthu sootheene sinihela muhina mwaha owo, ni opaka soothanla sooloka. Muhaakuveke olavula muhinatthi osuwela itthu sootheene sinihela muhina mwaha owo. (Mir. 18:13) Mwaha waivaavo, munooweryaka opaka soothanla sooloka muttharaka muupuwelo wa Yehova. Wiira mukhale “oowiitthokiha saana”, muhaana wiilokiherya ni omaleliha miteko sanyu. Nave munnisuweliwa okhala oororomeleya ni munitthara malakiheryo. Okhalana mikhalelo iyo, sinimookhaliheryani wooniwa saana ni atthu akina. Nrowe nithokorerye malakiheryo a mbiibiliyani a moota wookhala muhooleli ooloka a etthoko.
OKHALEKE MULOPWANA ONEETTIHA SAANA ETTHOKO AWE
10. Mulopwana onrowa owerya sai ‘weettiha saana etthoko awe’?
10 Akhala wiira moothela ni munniphavela okhala mutokweene, atthu a vatthokoni vanyu, ahaana okhalana mweettelo wooloka. Nto muhaana osuwela ‘weettiha saana etthoko anyu’. Eyo enitaphulela wiira muhaana osuweliwa ntoko muhooleli oophenta ni onipaka soothanla sooloka para emusi awe. Eyo enihela muhina ohoolela omulompa Muluku vatthokoni, okhaliherya emusi awe orowela mithukumano ni muteko woolaleerya. Xeeni vari aya vooloka opaka eyo? Murummwa Paulo olavulaka sa mwaha owo, aahimmye so: “Akhala mulopwana ohinisuwela weettiha saana etthoko awe, onrowa owerya sai okhapelela muloko wa Muluku?” — 1 Tim. 3:5.
11-12. Akhala wiira murumeyi ookhaliherya oniphavela okhala mutokweene, xeeni vari aya vooloka anaawe okhalana mweettelo wooloka? (Nwehe efootu.)
11 Akhala wiira mwa paapa, ‘aniinyu ahaana okhala owiiwelela ni arina mweettelo wooloka’. Muhaana owiixuttiha ni waavaha malakiheryo mwa niphento. Ekeekhai wiira muniphavela wiira aniinyu ahakalaleke ni atthekuleke ntoko anamwane akina. Masi wiimananiha wanyu owiixuttiha, onimwaakhaliherya okhala owiiwelela, oottittimiha ni okhalana mweettelo wooloka. Ohiya-vo, muhaana wiimananiha vanceene waakhaliherya okhalana waataana wooloka ni Yehova, weettela malakiheryo a mbiibiliyani ni okela vahoolo mpakha opatisiwa.
12 “Okhalaneke anamwane animwaamini Muluku ni ahinihimmwa okhalana mweettelo woohiloka aahiiso oohiiwelela”. Akhala wiira mwaana a namoona a Yehova onnipaka etampi yuulupale, exeeni enrowa omwiiraneela paapa awe? Akhala wiira paapa khomwiixuttinhe ni omuttaruxa saana mwanawe, owo khonireerela orumeela ntoko mutokweene. — Munwehe A Sentinela 15 a Outubro a 1996, epaax. 21 itti. 6-7.
Paapa mukristau, ohaana owiixuttiha anaawe wiira olipihe waataana waya ni Yehova ni akhaliheryeke muloko (Nwehe ettima 11)
AAKHALIHERYEKE ANNA NI AROKORA
13. Munrowa wooniherya sai wiira mwa mutthu “ooreera murima”, ni ‘oohiisoona’?
13 Anna arina mikhalelo sooloka, aakhalana efaita yinceene mmuloko. Mulopwana “ooreera murima”, onniimananiha okhaliha murettele. Akhala wiira muniphavela osuweliwa ntoko mutthu ooreera murima, mwaawiriyaneke atthu akina ni nvaheke ephoole miyoonelo saya. Vakhala wiira muri muthukumano wa axitokweene, niireke mwaamukhaliherya soothanla sa anna akina, vakhala wiira khasinvirikanya malamulo ni sooruma sa mbiibiliyani? Muhikhaleke “oowiisoona”, aahiiso muhithipeleleke opaka itthu mwa enamuna muniphavela anyu. Muhaana ovaha ephoole miyoonelo sa atthu akina. (Maph. 13:8, 9; Mir. 15:22) Muhikhaleke mutthu ‘oninyakulihana’, ni ‘owaakuva onanariwa’. Ohiya omakelaka waavaanyiha atthu akina, mukhaleke ooreera murima ni olavula mwa enamuna yooloka. Vakhala wiira mwa mutthu a murettele, munrowa wiimananihaka okhaliha murettele hata okathi wooxankiha. (Yak. 3:17, 18) Vakhala wiira munoolavulaka saana ni atthu ootheene waahela muhina ale ahikhale Anamoona a Yehova, munoowerya waakhaliherya okhala oomaaleleya ni ovukula onanariwa. — Makh. 8:1-3; Mir. 20:3; 25:15; Math. 5:23, 24.
14. Onitaphulela exeeni ‘ohikhala mulopwana opatisiwe niinaano’ ni okhala “oororomeleya”?
14 Wiira munna oreerele okhala mutokweene, ‘ohikhaleke mulopwana opatisiwe niinaano’. Nave khonipirisari oviriha iyaakha sinceene opatisiwe ene. Masi hata vari siiso, owo ohaana oviriha okathi onireerela olipihaka waataana wawe ni Yehova. Ntoko Yesu, muhinatthi othanliwa okhala mutokweene, muhaana okhala oowiiyeviha ni oopixa murima, mulipelelaka okathi wooreerela Yehova onrowa awe woothanlani. (Math. 20:23; aFil. 2:5-8) Ohiya paahi otthara malakiheryo ninvahiwa ahu ni mutthenkeso wa Yehova, munimooniherya wiira mwa mutthu “oororomeleya”, vakhala wiira munimweettelaka malamulo ni malakiheryo a Yehova. — 1 Tim. 4:15.
15. Niireke mutokweene ohaana osuwela olavula oratteene myaha?
15 Biibiliya onnooniherya oratteene wiira axitokweene ahaana okhala ‘anisuwela wiixuttiha’. Niireke eyo enitaphulela wiira axitokweene ootheene ahaana osuwela olavula oratteene myaha? Nnaari. Nnaamwi axitokweene ootheene ahisuwelaka olavula oratteene myaha, awo anniwerya wiixuttiha saana okathi woolaleerya ni okathi anaaxukurya aya anna ni arokora. (1 Tim. 3:2; Mulikanyihe-tho ni 1 aKorinto 12:28, 29 ni aEefeso 4:11.) Nnaamwi muhisuwelaka olavula oratteene myaha, muhaana wiimananiha olokiherya enamuna muniixuttiha anyu. Munrowa owerya sai opaka eyo?
16. Munrowa owerya sai okhala mwiixuttihi ooloka? (Nwehe efootu.)
16 “Otthareke oratteene moolumo oororomeleya a Muluku”. Vakhala wiira munnimurumeela Biibiliya okathi muniixuttiha anyu ni munivaha anyu miruku, munoowerya okhala mwiixuttihi ooloka. Mmusome Biibiliya khula nihiku ni irevista sikina. (Mir. 15:28; 16:23; Tito 1:9) Okathi munisoma anyu, nvaheke ephoole vakhala wiira munniwerya otthokiherya ni weettela iversiikulu sa mbiibiliya mwa enamuna yooloka. Nave, okathi muniixuttiha anyu mmananiheke waavara murima atthu anoowiriyanani. Pooti olokiherya enamuna muniixuttiha anyu, vakhala wiira munoovekela miruku ni nikhaliheryo na anna anisuwela wiixuttiha. (1 Tim. 5:17) Axitokweene ahaana wiimananiha wiira ‘yaalipihe’ anna ni arokora. Masi ikwaha sikina, awo ahaana waavaha miruku aahiiso ‘owooniherya wira aattheka’. Khula okathi, mutokweene ohaana wiimananiha okhala ooreera murima. Akhala wiira munookhala ooreera murima, oophenta ni orumeela Nuulumo na Muluku okathi muniixuttiha anyu, munoowerya okhala mwiixuttihi ooloka maana munrowa omutakihaka Mwiixuttihi Muulupale, Yesu Kristu. — Math. 11:28-30; 2 Tim. 2:24.
Murumeyi ookhaliherya ottottelaka muraarelo eparakha ya wiixutta moota mutokweene onimurumeela awe Biibiliya wiira iixuttihe. Murumeyi ookhaliherya onsayariki mwaha awe ohoolo wa exipelyu (Nwehe ettima 16)
MUHIHIYE OPAKA ELE MUNIWERYA ANYU
17. a) Exeeni ekhanle oomukhaliherya murumeyi ookhaliherya ohihiya wiimananiha? b) Itthu xeeni axitokweene anireerela aya wuupuwelela okathi anaavarerya aya anna aphavelaka waavaha iparakha? (Nwehe ekaaxa eni: “ Muhilipeleleke Wiira Anna Akhale Oohittheka”.)
17 Nuumala oweha malakiheryo ootheene anivekeliwa wiira munna ori murumeyi ookhaliherya okhale mutokweene, akina pooti wuupuwelaka wiira khaniwerya waakhwaniherya. Muhiliyale wiira Yehova vamosa ni mutthenkeso awe, khanlipelela wiira anna akhale oohittheka wiira awerye omaleliha mikhalelo iya. (1 Ped. 2:21) Nave munepa woowaarya wa Muluku, onimookhaliheryani okhalana mikhalelo iyo. (aFil. 2:13) Niireke ookhala mukhalelo munireerela anyu olokiherya? Mmuleeleke Yehova voohimya sa mwaha owo. Mutokoseke ni munvekeleke mutokweene malakiheryo a moota woolokiherya mukhalelo owo.
18. Exeeni anireerela aya opaka arumeyi ookhaliherya ootheene?
18 Ootheene ahu waahela muhina axitokweene, nihaana ovikaniha okhalana mikhalelo seiyo nithokorenrye ahu mwaha ola. (aFil. 3:16) Niireke mwa murumeyi ookhaliherya? Mphavelaseke inamuna sikina wiira muncererye yoophavela anyu ya waakhaliherya anna ni arokora! Munvekeleke Yehova wiira owiixuttiheni ni ookhaliheryeni wiira nvikaniheke orumeeliwa mmulokoni. (Yes. 64:8) Moohaanyiherya, Yehova onooreeliha wiimananiha wanyu ni yoophavela anyu ya orumeela ntoko mutokweene.
NSIPO 101 Nimurumeeleke Yehova Mowiiwanana
