1. Nniixutta exeeni ni anna oowuuluvala?

 OOTHEENE ahu, ninnipirisari okhaliheriwa wiira nipake soothanla sooloka. Axitokweene ni anna arina waataana woolipa ni Yehova, pooti onikhaliherya wiira nipake eyo. Hata ari ene oowuuluvala, nihuupuweleke wiira miruku annivaha aya, ti sa khalai ni khasinivareleya muteko. Yehova oniphavela wiira nitthareke ntakiheryo na anna awo oowuuluvala. Mwaha woowi, sookhala itthu sinceene akhanle aya ooniixuttiha. — Yoobi 12:12.

2. Mwaha ola ninrowa othokorerya exeeni?

² Khalai, Yehova anaarumeela alopwana ororomeleya wiira yaalipihe ni oweettiha atthu awe. Mwa ntakiheryo, Moise, Davidi ni murummwa Yohani. Arumeyi awo, khiyakhala okathi omosa-ru ni yaahikhalana mixankiho soovirikana. Ahinatthi okhwa, yaahaavaha miruku atthu akina wiira avikaniheke okhala oororomeleya wa Yehova. Yehova ohiiriha wiira moolumo a alopwana awo, alempwe mbiibiliyani wiira anikhaliheryeke olelo-va. Ootheene ahu, akhale amiravo aahiiso oowuuluvala, nnoowerya wiixutta etthu ni moolumo aya oolipiha. (aRom. 15:4; 2 Tim. 3:16) Mwaha ola, nnoothokorerya etthu nniixutta ahu ni moolumo ookiserya a alopwana awo araru.

‘MUNOKHALANA EKUMI YINCEENE’

3. Mwa enamuna xeeni Moise aamurumenle awe Muluku ni atthu awe?

³ Moise aahimurumeela Yehova okumi awe wootheene. Owo aahirumeela ntoko profeta, mukhulupale, muhooleli ni mulipa-oolepa. Moise aahiixutta etthu ni itthu sinceene saamwiiranenle mookumini mwawe. Owo taahoolela aisarayeli okathi yaakhuma aya weepotthani wExiitu. Nave owo aahiweha miiriirya sinceene saakhuma wa Yehova. Ohiya-vo, Yehova aahimurumeela wiira  olepe iliivuru 5 sa mbiibiliyani, eyo piiyo, Esaalimu 90 ni woonasa wene 91. Nave vanikhala wiira tolempe eliivuru ya Yoobi.

4. Tani Moise aavanhe awe miruku ni mwaha wa xeeni?

⁴ Ohinatthi Moise okhwa, orine ene iyaakha 120, aahaathukumanya atthu ootheene aisarayeli wiira owuupuxerye itthu sootheene Yehova aapakenle awe. Aisarayeli anceene okathi yaari aya amiravo, yaahiweha miiriirya sinceene Yehova aapanke awe, ni moota aahukhumu awe atthu a wExiitu. (Okhu. 7:3, 4) Awo yaahiweha okathi Yehova aahunle awe Ephareya yooxeerya wiira awo alapuwe ni moota ampwetenxe awe Farawo ni anakhotto awe. (Okhu. 14:29-31) Okathi yaari aya moothakoni, Yehova aahaakhaliherya ni aahaakhapelela. (Otum. 8:3, 4) Ohalaka okathi vakhani wiira aisarayeli akele elapo yooleiheriwa, Moise aahirumeela okathi owo wiira aalipihe. a

5. Yooleiherya xeeni Moise aalenle awe aisarayeli eri Otumererya 30:19, 20?

⁵ Exeeni Moise aahimmye awe? (Mmusome Otumererya 30:19, 20.) Moise aahiwuupuxerya atthu ale wiira Yehova aamwaavaha ohoolo woororomeleya. Okhala wiira Yehova aarowa waareelihaka aisarayeli, awo yanwerya okhalaka okathi munceene elapo aaleihenrye awe. Etthaya ya elapo ele yooleiheriwa, yaari yooloka ni yooruwerya! Moise olavulaka sa elapo eyo, aahimmye so: “Apwiya yaawo animooroihani ipooma sooreera ni suulupale sahaatakanle-anyu, ni ipa soosareya mihakhu sinciene sahuukenle-anyu, ni ihime sahaathinpe-anyu ni imatta sa miri sahaaphatteiye-anyu”. — Otum. 6:10, 11, Piipiliya Emakhuwa.

6. Xeeni Yehova eemerenrye awe wiira aisarayeli axinttiwe ni maloko makina?

⁶ Nave-tho Moise aahaalopola aisarayeli. Owo aalenle wiira vakhala wiira yaaniphavela ovikaniha okhala elapo ele yooleiheriwa, yaahaana ohihiya omwiiwelela Yehova. Moise aahaatthokiherya efaita erina aya ‘othanla ekumi’, eyo piiyo, yiiwelelaka moolumo awe ni ‘otthara yaawo’. Masi aisarayeli khiyaaphavenle omwiiwelela Yehova. Mwaha waivaavo, Yehova aaheemererya wiira Asiria ni aBabilonia, akuxe elapo ele ni waakhaliha ipottha. — 2 Mam. 17:6-8, 13, 14; 2 Wah. 36:15-17, 20.

7. Nnixutta exeeni ni moolumo a Moise? (Nwehe eteseenyo.)

⁷ Nniixutta exeeni? Wiiwelela onnoopola okumi. Ntoko siisaale aisarayeli yaahanle aya okela Elapo Yooleiheriwa, nave-tho hiyo nihanle vakhani okela elapo Tiithi ahu oleihenrye awe, eyo piiyo, mparayiisu. (Yes. 35:1; Luka 23:43) Satana ni malaikha awe khanrowa-tho waahapuxaka atthu muhoolo. (Wiis. 20:2, 3) Khenrowa-tho okhala etiini yoowootha ni atthu khanrowa-tho owokiwaka. (Wiis. 17:16) Ikuvernu sa apinaatamu, khasinrowa-tho waahaaxaka atthu. (Wiis. 19:19, 20) Yehova khonrowa weemererya wiira atakhali akele mParayiisu. (Esal. 37:10, 11) Atthu ootheene, anrowa wiiwelelaka malamulo axariya a Yehova, nave eyo enoorowa okumiherya murettele. Ohiya-vo, atthu anrowa ororomelanaka mukina ni mukhwaawe. (Yes. 11:9) Tthiri ninnilipelela okathi itthu iyo sootheene sinrowa aya wiiraneya! Navikaniha omwiiwelela Yehova, nnookhalana eparakha ya okhala mparayiisu, ohiya iyaakha vakhaani paahi, masi mahiku ootheene. — Esal. 37:29; Yoh. 3:16.

8. Yooleiherya ya okumi woohimala, yaamukhalihenrye sai misionaario? (Yuda 20, 21)

⁸ Akhala wiira nnimuupuwelela yooleiherya ya Muluku ya okumi woohimala, nnoowerya  omwiiwelela Yehova moohicikha muxankiho onrowa oniphwanya. (Mmusome Yuda 20, 21.) Nlipelelo nlo, ninninikhaliherya ovilela khula muxankiho. Munna mmosa yoowo onirumeela iyaakha sinceene wÁfrica, onihimya wiira ikwaha sikina, aneehereriwa opaka itthu saarowa omuriipiha murima Yehova. Owo onitthokiherya so: “Okathi kaasuwenle aka wiira yooweeha ele yaamukiiriha oyeleela eparakha ya okela elapo esya, kaahipaka ele eniwerya aka wiira kixintte muxankiho ole, ni kaaninvekela Yehova wiira okikhaliherye. Kikhaliheriwaka ni Yehova, koowerya oxintta yooweeha ele”.

“MUNOOVARAKA ITTHU NI MIRUKU NI MUNIMWEETTAKA SAANA”

9. Mixankiho xeeni samphwannye Davidi?

⁹ Davidi aari mwene aamuroromela Yehova. Owo aari mulipa-oowiipa, mulipa-oolepa ipoesia, nakhotto ni profeta. Nave owo saanimphwanya mixankiho. Mwa ntakiheryo, aahaana omutthyawa mwene Sawuli yoowo aamulupattha vanceene. Nave-tho nuumala okhala mwene, owo aahaana omutthyawa mwanawe Absalomi yoowo aaphavela omwaakha omwene. Nnaamwi samphwannye sooweha iya ni sikina, Davidi khaahiyale okhala oororomeleya wa Yehova. Yehova omuhimyaka Davidi, aahimmye so: ‘Onnihakalaliha murima aka’. Tivonto, ninnireerela ovaha ephoole miruku seiyo Davidi aahimmye awe! — Mit. 13:22; 1 Mam. 15:5.

10. Xeeni Davidi anvahale awe miruku mwanawe Salomoni ohinatthi okhala mwene?

¹⁰ Mwa ntakiheryo, muupuwele miruku Davidi anvahale awe mwanawe Salomoni, yoowo aarowa okhala mwene aisarayeli. Yehova aahimuthanla mmiravo Salomoni yoowo aarowa oteka etemplo, memmo atthu yaarowa aya omukokhorelaka. (1 Wah. 22:5) Salomoni aahikhalana muteko munceene woovara, nave ampirisariki okhaliheriwa ni Yehova wiira oweettiheke atthu ale. Davidi aalavunle exeeni wiira omulipihe mwanawe? Nrowe niwehe.

11. Moovarihana ni 1 Mamwene 2:2, 3, miruku xeeni Davidi anvahale awe mwanawe Salomoni, ni mareeliho xeeni aaphwanye awe mwaha wa wiiwelela? (Nwehe eteseenyo.)

¹¹ Etthu xeeni Davidi aahimmye awe? (Mmusome 1 Mamwene 2:2, 3.) Davidi aahimuleela mwanawe wiira akhala wiira ammwiiwelelaka Yehova, owo anvaraka itthu ni miruku ni amweettaka saana. Iyaakha sinceene, Yehova aaninvaha itthu sinceene ni aanimukhaliherya mwa inamuna soovirikana. (1 Wah. 29:23-25) Salomoni aahiteka etemplo yooreera, nave miruku sawe sooloka soolempwa mbiibiliyani. Owo aari mutthu oosuwelexiwa mwaha wa mihakhu ni ankhili aarina awe. (1 Mam. 4:34) Masi ntoko Davidi aahimmye awe, Salomoni aamukhumelaka saana akhala wiira khaarowa ohiya omwiiwelela Yehova. Masi mooriipiha murima, nuuvira okathi Salomoni aahipacerya waakokhorela amuluku a ethiru. Mwaha waivaavo,  Yehova aahihiya omukhaliherya ni khaawerya waalamulela atthu ni exariya. — 1 Mam. 11:9, 10; 12:4.

12. Exeeni nniixutta ahu ni moolumo a Davidi?

¹² Exeeni nniixutta ahu? Wiiwelela onniniphwanyiha mareeliho. (Esal. 1:1-3) Ekeekhai wiira olelo-va, Yehova khonnileiherya wiira ninrowa okhala atthu oosuwelexiwa aahiiso oothaaciri ntoko Salomoni. Masi vakhala wiira nnoomwiiwelela Tiithi ahu Yehova, nnookhalana ankhili yaawo anrowa onikhaliherya opaka soothanla sooloka. (Mir. 2:6, 7; Yak. 1:5) Nave malakiheryo a Yehova anoonikhaliherya opaka soothanla sooloka voohimya sa muteko, osoma, musurukhu ni matthekulelo. Weettela malakiheryo a Yehova, anoonikhaliherya osyaka mixankiho. (Mir. 2:10, 11) Niira siiso, nnoowerya opaka soothanla sooloka, nave nnoosuwelaka etthu yoopaka wiira nikhalane emusi yoohakalala.

13. Exeeni emukhalihenrye Carmen opaka yoothanla yooloka?

¹³ Carmen, yoowo onikhala oMoçambique, uupuwela wiira asoma iskola suulupale, amphwanya ohakalala weekeekhai. Nto owo aahirowa wiilepiha wuniversidade eniwiixuttiha atthu otesenyari ipalanta sa empa aahiiso sa ipereetiyu. Owo onihimya so: “Saanikisivela vanceene itthu iye sootheene kaixutta aka. Masi nkaakhalana okathi wiira kivare itthu sikina. Kaapacerya osoma okhuma ewoora ya 7:30 ya voosiisu ni kaaphera 18 oora. Vaanikixankiha orowela mithukumano nave ompatthani aka ni Yehova waanivukuwa. Masi vamurimani vaka, kaanisuwela wiira kaavarela muteko mapatarau manli”. (Math. 6:24) Owo aahinvekela Yehova omuleelaka muxankiho ole ni aahitokosa mwaha ole orumeelaka irevista ahu. Carmen onincererya ohimyaka so: “Nuumala axitokweene ni amaama okikhaliherya, kaahilakela ohiya osoma wuniversidade. Nave kaahithanla okela muteko wa okathi wootheene. Nkinthanana mwaha wa yoothanla ela kipanke aka, okhala wiira ennikiphwanyiha ohakalala”.

14. Itthu xeeni sirina efaita Moise ni Davidi ahimmye aya?

¹⁴ Moise ni Davidi yaanimphenta vanceene Yehova ni yaanisuwela efaita erina aya omwiiwelela. Moolumo aya ookiserya, anniwuupuxerya atthu ootheene, otthara ntakiheryo naya. Moise ni Davidi, ahooniherya wiira ale anihiya omwiiwelela Yehova, khanikhalana-tho eparakha ya waakhela mareeliho awe. Miruku  saya sinnivareleya muteko olelo-va. Nuuvira iyaakha sinceene, murumeyi mukina a Yehova, aahooniherya efaita erina aya ohihiya okhala oororomeleya wa Muluku. Nrowe nthokorerye itthu vakhani sa Murumeyi owo.

“KHIIVO ETTHU EKINA ENIKITTEELIHA MURIMA SIISO”

15. Murummwa Yohani aawenhe exeeni okathi aari awe mukumi?

¹⁵ Yohani aari murummwa aaphentiwa vanceene ni Yesu Kristu. (Math. 10:2; Yoh. 19:26) Yohani aanimuhoola Yesu okathi aalaleerya awe, aahiweha miiriirya aapaka awe ni aari ni Yesu okathi wootheene wooxankiha. Owo aahinweha Yesu okathi iiviwa awe ni nuumala ohihimuxiwa. Nave Yohani aahaaweha atthu anceene yaawo yaakela ekristau, okathi ole wa arummwa. Nto owo aahikhala okathi munceene ‘owehaka moota ihapari sooreera saalaleeriwa aya atthu anceene vathi-va’. — aKol. 1:23.

16. Tani attottenle muraarelo ikarta sa murummwa Yohani?

¹⁶ Nnaamwi uuluvanle vanceene, murummwa Yohani aahikhalana eparakha ya olepa eliivuru yookuxa murima yeeyo erina “moolumo a itthu Yesu Kristu oonihenrye awe”. (Wiis. 1:1) Yohani oolepa eliivuru erina nsina nawe. Nave owo aahilepa-tho iliivuru sikina tthaaru. Ekarta awe ya neeraru aamulepenle munnawe yoowo amphentexa awe ntoko mwanawe. (3 Yoh. 1) Vanikhala ntoko wiira yaahikhala anna akina Yohani aathokorerya awe ntoko anaawe. Itthu owo aalempe awe, saahaalipiha anna okathi ole ni sinninlipiha olelo-va.

17. Moovarihana ni 3 Yohani 4, etthu xeeni enniiriha ohakalala?

¹⁷ Exeeni murummwa Yohani olempe awe mukartani mwawe? (Mmusome 3 Yohani 4.) Owo olempe wiira, omwiiwelela Yehova onnihakalaliha. Okathi aalepa awe ekarta awe ya neeraru, yaahikhala atthu yiixuttiha itthu soowoothiwa ni eyo yaaniiriha okawanya muloko. Masi atthu akina yaanivikaniha ‘weettela ekeekhai’. Awo yaanimwiiwelela Yehova ni khiyaahiyale “weettela sooruma sa Tiithi”. (2 Yoh. 4, 6) Makristau ale oororomeleya, khiyaamuhakalalinhe paahi Yohani, masi-tho Tiithi aya Yehova. — Mir. 27:11.

18. Exeeni nniixutta ahu ni moolumo a Yohani?

¹⁸ Exeeni nniixutta ahu? Ororomeleya onniphwanyiha ohakalala. (1 Yoh. 5:3) Mwa ntakiheryo, ninnihakalala mwaha woosuwela wiira ninnihakalaliha murima wa Yehova. Owo onnihakalala okathi nniimananiha ahu wiira niiwelele malamulo awe. (Mir. 23:15) Nave malaikha annihakalala okathi anniweha aya nipakaka  eyo. (Luka 15:10) Nave-tho, ninnihakalala okathi nnaaweha ahu annihu avikanihaka okhala oororomeleya, nnaamwi alupatthiwaka ni yeehereriwaka. (2 aTes. 1:4) Okathi makhalelo a olumwenku ola anrowa aya opwetexiwa, nnoorowa ohakalala mwaha wa osuwela wiira noororomeleya mpakha wanikisa.

19. Murokora oniitthaniwa Rachel, ohimmye exeeni sa owiixuttiha atthu akina? (Nwehe efootu.)

¹⁹ Etthu ekina ennihakalaliha, ori waalaleerya atthu ihapari sooreera. Rachel, yoowo onikhala oRepública Dominicana, onnoona okhala eparakha yuulupale waalaleerya atthu ihapari sooreera. Olavulaka sa atthu owenrye awe waakhaliherya wiixutta ekeekhai, ohimmye so: “Kinnihakalala osuwela wiira atthu kaakhalihenrya aka wiixutta ekeekhai, vano annimurumeela Yehova moororomeleya. Ohakalala kiniphwanyaka, onnikikhaliherya oliyala mixankiho sootheene saakiphwanya okathi kaakhaliherya aka”.

MWIIXUTTE ETTHU NI MOOLUMO OOKISERYA A ARUMEYI OOROROMELEYA A YEHOVA

20. Itthu xeeni ninlikana ahu ni arumeyi oororomeleya a Yehova a khalai?

²⁰ Moise, Davidi ni Yohani, yaakhala okathi woovirikana ni okathi ola ninkhala ahu. Hata vari siiso, awo yaamurumeela Muluku a ekeekhai yoowo nimmurumeela ahu, Yehova. Sintoko alopwana awo, hiyo nninvekela yoowo, omuroromela nave ninneettela malamulo awe. Nave ninniroromela wiira Yehova, onnaareeliha vanceene ale animurumeela moororomeleya.

21. Yehova onrowa onireeliha sai natthara miruku sa Moise, Davidi ni Yohani ni naahihiye omwiiwelela?

²¹ Mweekeekhai, nimphavela otthara miruku sa alopwana awo ni ovikaniha omwiiwelela Yehova. Napaka eyo, Yehova onoonireeliha vanceene. Nave nnookhalana “ekumi yinceene”, eyo piiyo, ekumi yoohimala! (Otum. 30:20) Nnoomuhakalaliha Tiithi ahu yoowo onrowa onivaha mareeliho manceene, yaawo nihinuupuwelela ahu. — aEef. 3:20.