Paul: Khinaareere ohakalala vanceene! Waari mweeri wa Novembro mwaakha wa 1985, naarowa yoothanleliwa ahu yoopacerya ntoko mamisionaario, oLibéria wÁfrica Ocidental. Eviyau naawenle ahu, yaaheemela oSenegal. Anne, aahimmye so: “Ehanle ewoora emosa paahi niphiyeke oLibéria!” Nuumala-vo, naahiiwa muhupi onihimya so: “Atthu ootheene anirowa oLibéria ari nviyawuni-mu, akhuruwe. Atthu akina amphavela omurukunuwela kuvernu, nto mwaha wa yeeyo, khivanrowa oweryaneya ophiya oLibéria”. Naahikhala oSenegal mahiku ale 10 yaattharelana. Naaniiwa wiira atthu anceene yaaniiviwa, nave kuvernu khaaweemiherya atthu okhuma owannyeya. Nto vakhala wiira mutthu aamukhuma, aamoopeliwa.

Anne: Hiyo khanlimalenle oviyaxari ikwaha sinceene. Ohiya-vo, okhuma enamwane aka kaasuweliwa ntoko “Aninha mutthu oowoova vanceene”. Hata otupha estaraata, miyo kinnoova. Masi hiyo naahilakela orowa yoothanleliwa ahu ele.

Paul: Niyariwe mpantta mmosa onikela nsuwa wInglaterra. Miyo ni Anne nipacerye muteko wa opioneero nuumala omaliha osoma eskola Secundária. Hiyo naanitumereriwa okela muteko wa okathi wootheene, miyo kaakhaliheriwa ni anamuyari aka, vano Anne aakhaliheriwa ni maama awe. Yoophavela ahu yaari okela muteko wa okathi wootheene, ni anamuyari ahu yaahinikhaliherya vanceene. Kirina ene iyaakha 19, kaahikhalana eparakha ya orumeela oBeteli, vano Anne aahilattuliwa oBeteli nuumala hiyo othelana mwaakha wa 1982.

Anne: Hiyo waaninsivela orumeela oBeteli, masi okhala wene naaphavela orumeela mapuro oothowa anamalaleerya. Okhala wiira obeteli naahikhalana eparakha ya ovara ni anna yaari mamisionaario, nto yoophavela ahu ele yaamutepa wunnuwa. Khula ohiyu naanivekela voohimya sa mwaha ole, nave naahihakalala vanceene nuumala waakhela nlattulo na orowela eturma 79 ya oGileyaadi mwaakha wa 1985! Nuumala-vo, naahithanleliwa orumeela oLibéria, wÁfrica Ocidental.

Paul: Naahiwela eviyau yoopacerya yeeyo yeemereriwe orowa oLibéria. Atthu yaanoova vanceene okhala wiira khiyeemiheriwa okhuma owaani ohiyu.  Mwa ntakiheryo, nihiku nimosa yaahirwa ekaaro omerkaatu, khuwiiriha atthu anceene otuthuwa ni otthyawa. Wiira nikhale oomaaleleya, khula nihiku naanisoma Isaalimu. Ohimya ekeekhai, naaniphenta yoothanleliwa ahu. Anne aarumeela ntoko misionaaria, vano miyo kaavara oBeteli vamosa ni munna John Charuk. a Miruku sawe vamosa ni osuwela mixankiho saaphwanya axinnihu, yahikiixuttiha etthu yuulupale.

Anne: Exeeni yaaniirinhe osiveliwa ni elapo ele ya oLibéria mwa okathi vakhaani? Mwaha wa anna ni arokora. Awo yaari oophenta, oopatthaneya ni oororomeleya. Naahaatana naawo ni awo yaahikhala amusi ahu. Miruku saya sahinikhaliherya olipiha waataana wahu ni Yehova. Nave olaleerya waaninsivela vanceene. Atthu naalaleerya ahu khiyaasiveliwa okathi naaleela ahu wiira khinaarowa opisa! Vaanikhweya olaleerya okhala wiira hata mustaraatani mwanaaphwanya atthu avaanelaka mwaya sa mbiibiliyani. Naahikhalana soosoma sa Biibiliya sinceene, nto vaaninxankiha osomiha sootheene. Tthiri waari okathi woohakalaliha!

Paul: Nuumala oviriha iyaakha 4 nikhalaka ni murettele, mootutuxerya, mwaakha wa 1989 yaahikhumelela marukunuxo nahaalipelela ahu, eyo piiyo, yaahipacerya ekhotto. Atoropa yaahituphela muttetthe ole ohela muhina oBeteli, okhuma 2 a Julho a 1990. Mwa miyeeri miraru, khivaaweryaneya olavula ni atthu ari elapo ekina, amusi ahu ni anna a oseedi mundiale. Khaakhanle mutthu aalamulela, yaanithowa eyoolya ni otakhala waamutepa wuncerereya. Mixankiho iye saahivikaniha okhumelela oLibéria mwa iyaakha 14.

Anne: Maloko makina a elapo ele, yaaniwana ni yaaniwiiva atthu a maloko makina. Anakhotto yaanikuxa ikaphwitti, yaniwara ikuwo soohisuwanyeya ni yanivira mustaraatani yiiyaka khula etthu. Akina a yaawo, omwiiva mutthu waalikana ni “omwiiva mwalyakhu” ntoko axineene yaawo yaahimya saya. Vaaniweryaneya oweha mirutthu sa atthu suukelinwe ene mapuro oovirikana ohela muhina waattamela ofiliyaali wahu. Yaahiiviwa arumeyi a Yehova waahela muhina mamisionaario manli.

Okhala wiira yaahikhala maloko yaalupatthiwa ni yaaphavela omala-malihiwa, anna akina yaahileva ikumi saya wiira awiipithihe atthu awo. Mamisionaario ni maBetelita yaahipaka etthu emosaru. Anna akina yaatthyawenle oBeteli, yaarupa antaari a vathi ni akina yaarupa ni hiyo antaari a osulu. Ekwartu ahu naarupa ni emusi emosa yaarina atthu 7.

Paul: Khula nihiku, atoropa yaaneererya ovolowa obeteli wiira awehe akhala wiira nahaattukuttherya atthu. Wiira nikhale oovareleleya, naahikhalana anna  4 yaanikhaliherya owehaweha. Anli yaakhala vaxanelani ni akina anli yaakhala vamukhora. Vakhala wiira ale anli yaanihela matata aya ohoolo, eyo yooniherya wiira itthu saari saana. Masi vakhala wiira yaahela matata aya ottuli, eyo yaataphulela wiira anakhotto awo yaahinanariwa, nto anna ale yaawehaweha, yaahaana owiipithiha axinnihu.

Anne: Nuuvira isumana sinceene, ekurupu emosa ya anakhotto enanarinwe ene vanceene, yaahiwerya ovolowa oBeteli. Miyo ni murokora mmosa, naahiiwalela oxoworo weiwo yaari arumaariyu vaaweryaneya ovolowa mutthu khuhooneya. Murokora ole ahipitha muhina mwa arumaariyu owo. Nuumala ophiya ekwartu naari ahu, awo yaahihula mukhora ni ikuru, vano iyaka ahaahimeerya wiira: “Amwaaraka ari oxoworo iwo”. Wiira murokora ole owerye okela mwaarumariyu mme, naahaana okumiha ikaveta, nto opaka eyo waamunyakhula ni waamurowa opisa vakhaani, ni kaanoova ophwanyeriwa. Nto kaahipacerya ottettemela vanceene kinaikoha so: “Kinrowa owerya sai ohula mukhora ola?” Kahinvekela Yehova wiira okikhaliherye, nuumala-vo, kaahihula mukhora ni kaahimaaleleya. Nakhotto mmosa aahikikakha onarowa otthukula ikaveta iye. Masi mootikiniha khamphwannye mutthu. Nuumala-vo, owo ni ekurupu awe yaahirowa owaavya atthu akina mipantta sikina sa epereetiyu ele. Masi hata vari siiso khiyamphwannye mutthu.

Paul: Naahiviriha miyeeri sinceene nihirina eyoolya. Obeteli, “matapiixu ahu” yaari paahi owiriyana myaha okathi wa omulompa Muluku voosiisu. Owiriyana myaha iye saaninlipiha vanceene.

Naanisuwela wiira naamukhuma efiliyaali ele okhala wiira khinaarowa okhalana yoolya ni maasi. Nto exeeni yaarowa waakhumelela anna ale yaipinthe? Moohaanyiherya, awo yamwiiviwa. Masi vanikhala wiira Yehova aapaka miiriirya onivahaka etthu naapirisari ahu okathi wooreerela! Yehova aaninikhaliherya ni itthu naapirisari ahu ni ovilela mixankiho sahu.

Okathi otakhala waatepa aya, nave ekeekhai yaanitepa waarya. Ikwaha sinceene annihu yaahaana otthyawa wiira yiikhapelele, masi khiyaahiyale okhala oororomeleya ni oomaaleleya. Atthu akina yaahimmya wiira itthu iye saakhumelela yaari “enamuna ya wiixuttihiwa mwaha wa itthu saarowa wiiraneya muhoolo”. Amiravo ni axitokweene oolipa murima yaahipaka sootheene yaawerya aya wiira yaakhaliherye anna. Okathi yaakhuma aya muttetthe aya, anna yaakhala oowiiraana ni yaanipacerya olaleerya muttetthe ole musya yaathamenle aya, ni yaanipaka mithukumano mapuro yaalokiherya aya mutakhwani mme. Mithukumano saaninlipiha vanceene okathi ole wooxankiha, ni olaleerya wanaakhaliherya anna ovilela mixankiho. Okathi naakhaliherya ahu anna ale, naahitikinihiwa vanceene mwaha wowaaweha anna ale anivekelaka mirupa wiira yalaleeryeke ohiya onivekela ikuwo! Atthu anceene yaawenhe itthu iye siiraneyale okathi ole wa ekhotto, yaahipacerya wiiwa ihapari sooreera. Awo yaanitikinihiwa vanceene okathi yaaweha aya Anamoona a Yehova ari ene moonelo wooloka ni ahakalanle ene. Awo yanaarya okathi ole wa epiphi! (Math. 5:14-16) Oluttuweliwa wa anna ni arokora,  waahaakhaliherya anakhotto akina ootakhala wiixutta ekeekhai.

Paul: Ikwaha sikina naanithaama oLibéria. Mwa ntakiheryo, nootoko othaama ikwaha tthaaru masi khinaapisa. Nave nootoko othaama nimaliha mwaakha ntero ikwaha piili. Murokora mmosa misionaaria olavulaka sa moonelo ahu ohimmye so: “OGileyaadi, naahiixutta wiira nihaana ovaha efaita yoothanleliwa ahu, nto eyo ti etthu naapanke ahu”. Masi wuupuwela waahiya anna ale waninriipiha murima! Nto naahihakalala vanceene mwaha wa osuwela wiira hata nri ene ilapo soovirikana, nanwerya waakhaliherya anna ni arokora a oLibéria.

Anne: Mweeri wa Maio a 1996, miyo ni anna anli naahikhuma ni ekaaro nikunxe ene idukumento sa ofiliyaali. Naaphavela ophiya muttetthe mukina woovareleleya wa epooma ele, nto naahaana weetta ikiloomo 16. Masi mooriipiha murima, muttetthe ole naari ahu waahitupheliwa ni anakhotto. Anakhotto ale ananariwe ene vanceene, yaahimoopela kapwitthi osulu, yaahikeemexa, yaahikikumiherya ota wa ekaaro ele vamosa ni anna ale anli. Masi yaahimukuxa Paul mukaaroni mme anarowa. Nto naahanle nixankale ene. Masi voohipisa naahimoona Paul orwaaka opuro naari ahu okhumaka ephome vayuuci. Wanipacerya nuupuwela wiira aari moopeliwa, masi naahuupuwela wiira vakhanle wiira aari moopeliwa khaarowa owerya weetta! Toropa aamukhumulinhe ekaaro okathi aamukakha awe wiira okhume mukaaroni mme. Oreera waya okhala wiira nikhwatta ele khinaatempe wunnuwa.

Opuro ole naattamenle ahu yaahikhala ekaaro ya atoropa yaasarenye atthu yaatthyawa mwaha wa woova. Naahilakela owela ekaaro ele, masi okhala wiira khiyaareera osareiwa, naahiiphunyeeriha. Okhala wiira motorista ole aanoova, aahuupiha ekaaro ele nto naahanle vakhaani omora. Naahipacerya okhuwela wiira eetteke vakhaani, masi okhala wiira aanoova, owo khaatthunne wiiwa. Hiyo naahiwerya ophiya opuro naarowa ahu, okhala wiira naahilipiha ekaaro ele, masi naaphiyale nikhulumunwe ene vanceene.

Paul: Nisareyale ene ntthupi vanceene ni ikuwo sahu sithaalale ene, naahipacerya okohana moota xeeni vaaweryaneyale aya okhala nlelo akumi. Naarumpe vanlakani. Nto opuro ole naahimwaattamela Helicóptero ahareere woopeliwa yoowo naarowa ahu onwela nihiku naattharelana nrowaka oSerra Leoa. Naahihakalala vanceene mwaha wa okhala akumi. Nto naanixanka mwaha wa annihu naahiyale ahu oLibéria.

Anne: Nuumala ophiya esitati ya oFreetown, oSerra Leoa, naahikhala oovareleleya ni nahaakheliwa saana ni anna ni arokora a elapo ele. Ikwaha sikina, kaanuupuwelela itthu iye sootakhala saanikhumelenle. Khula nihiku kaanixanka ni woova kihinawerya wuupuwela saana. Vaakhala ntoko wiira itthu iye sootheene siiraneya khahiyo saari sa ekeekhai. Kaanivenya ohiyu kithukumelasaka ni kuupuwela wiira yamukhumelela etthu yootakhala. Kaanixanka vanceene, masi Paul anikikupaarela ni onavekela ni miyo. Naaniipa isipo mpakha woova waka ovukuwa. Kuupuwela wiira nkaakhanle saana ni nkaarowa owerya orumeela ntoko misionaaria. Nkinrowa oliyala itthu sootheene sikiiranenle.

Esumana ene yeele, naahaakhela irevista piili. Emosa yaari Despertai! 8 a Junho a 1996. Despertai ole aahikhalana muru oni: “Como lidar com a síndrome do pânico”. Nuumala-vo, kaahisuwela etthu yaakiiraneela. Erevista ya nenli yaari A Sentinela 15 a Maio a 1996 yoowo aarina mwaha oni: “Como obtêm essa força?” Erevista ele, yaahikhalana efootu ya nikuruthu nenlo nipupha naya nimosa nanteyale. Mwaha ole waahitthokiherya wiira, sintoko nikuruthu ninwerya aya olya ni ovava nnaamwi nipupha naya ninteyale ene, mwa enamuna emosa-ru, hiyo khaninhiya waakhela munepa wa Yehova wiira naakhaliherye atthu akina hata ikwaha sikina nixankaka. Myaha iye saahikilipiha vanceene okhala wiira kaahoona wiira nikhaliheryo na Yehova, maana irevista iye saaphiyale okathi wooreerela. Etthu ekikhalihenrye, waari otokosa myaha ni khula okathi kaanikuxa mpastani mwaka. Nuuvira okathi oriipiwa waka murima waanivukuwa.

Paul: Nuumala mixankiho iye ovukuwa, naahihakalala vanceene osuwela wiira vanweryaneya otthikela owaani oLibéria. Wanikisa wa mwaakha wa 2004, niira nivirinhe ene iyaakha 20 ni yoothanleliwa ahu. Ekhotto ele yiira emanle ene nto yaanipakiwa mareheryo a otekiwa eBeteli ekina. Mootutuxerya naahilattuliwa wiira nirowe yoothanleliwa esya.

 Eyo yaari yooweeha para hiyo. Okhala wiira anna ni arokora ale yaari ntoko amusi ahu, hiyo khinaaphavela waahiya. Exeeni yaarowa onikhaliherya ovilela nuupuwelelaka yoothanleliwa ele esya? Naahuupuwela okathi naalattuliwe ahu oGileyaadi, naahaana waahiya amusi ahu wiira naakhele mareeliho anikhuma wa Yehova. Nto naaheemererya nlattulo nle. Yoothanleliwa ahu ele, yaarowa okhala elapo yoowaattamela oLibéria, eyo piiyo, oGana.

Anne: Naahinla vanceene nuumala okhuma oLibéria. Naahitikinihiwa vanceene nuumala munna mmosa oowuuluvala iitthaniwa Frank, aahimmya awe so: “Muniliyale!” Nuumala-vo aahinithokiherya etthu yaamwiirinhe olavula siiso. Owo aahimmye so: “Ekeekhai wiira khamunrowasa oniliyala, masi muhaana orowa yoothanleliwa anyu esya ni murima anyu wootheene. Okhala wiira Yehova toorummeni, muhaana orowa waakhaliherya anna ni arokora a oGana”. Moolumo ale yaahinilipiha ni yaahinikhaliherya vanceene wiira nipacerye yoothanleliwa ahu ele esya elapo yeeyo atthu anceene yahaanisuwela aya.

Paul: Nuumala ophiya oGana anna ale yaahikhala amusi ahu asya. Elapo ele khiyaareere Anamoona a Yehova! Naahiixutta itthu sinceene ni anna ale oowaamini ni yaarina waataana woolipa ni Yehova. Nuumala oviriha iyaakha 13 niri ene oGana, naahaakhela yoothanleliwa ekina. Moohipisa naahilattuliwa orumeela eBeteli ya wÁfrica Oriental, oQuênia. Nnaamwi nankhelinwe ni anna ale, moohipisa naahipatthana ni anna ale oororomeleya a oQuênia. Nlelo ninnoona wiira nookhalana efaita mwaha wa okhaliherya elapo ela yuulupale ohireere muteko munceene woovara.

Anne: Mwa iyaakha sinceene kooviriha mixankiho sinceene ni ikwaha sikina, kaanoova. Akhala wiira ninkhala okathi woowoopiha ni wooxankiha, eyo pooti oniiriha owereyasiwaka ni ohoona etthu yoopaka. Nihuupuweleke wiira Yehova onoonikhapelela mwa miiriirya okathi ntoko owo. Okathi kiniiwaka ikaphwitti sirumaka, nkinikhala saana. Masi kihiixutta wiira kihaana ororomela nikhaliheryo Yehova onnivaha awe wiira onlipihe, waahela muhina anna ni arokora. Akhala wiira khaninhiya omusoma Biibiliya, ovekela, orowela mithukumano ni olaleerya, nikupaliki wiira Yehova khonirowa ohiya onikhaliherya.

Paul: Ikwaha sikina, atthu annikikoha so: “Niireke munnisiveliwa ni yoothanleliwa anyu?” Elapo pooti okhala yooreera, masi pooti okhala nipuro nihinkhaleya ni noowoopiha. Nto etthu xeeni enikisivela elapo eyo? Anna ni arokora yaawo ari amusi ahu. Nnaamwi niyariwe ene mapuro oovirikana, nirina moonelo ni muupuwelo mmosa-ru voohimya sa Yehova. Nuupuwela wiira naarowa waalipiha anna mapuro naathanleliwa ahu, masi moovirikana ni vo, awo ti yaanilipiha.

Khula okathi naavahiwa ahu yoothanleliwa esya, naaniweha mareeliho a Yehova, eyo piiyo, wiiraana ni anna ni arokora. Vakhala wiira nnimwiiranaka ni muloko, nnookhalana amusi. Ninnikupali wiira naahihiye omurumeela Yehova, owo onoonivaha ikuru nimpirisari ahu. — aFil. 4:13.