1. Yoolepa ya 2 aKorinto 3:1-3, ennikhaliherya sai oxukhurela eparakha erina ahu ya omusomiha mutthu mpakha opatisiwa? (Nwehe efootu ya ekaapa.)

MUNOONELA sai vaavo muninweha anyu namasoma a Biibiliya a muloko anyu opatisiwaka? Moohaanyiherya, nyuwo munnihakalala vanceene! (Math. 28:19) Tthiri akhala wira ti nyuwo mwaamusomiha mutthu owo, nyuwo munnitthapa onweha opatisiwaka! (1 aTes. 2:19, 20) Vannooneya wira ale anipatisiwa niinaano ‘ipaphelo soloka sa olavuleliwa’ ohiya paahi wa mutthu ole aamusomiha masi muloko wotheene.—Mmusome 2 aKorinto 3:1-3.

2. (a) Nikoho xeeni ninreerela ahu othokorerya ni nthowa xeeni? (b) Yoosoma ya Biibiliya exeeni? (Nwehe moolumo ootthokiheriwa.)

² Ti voohakalaliha woona wira iyaakha xexe sivinre olumwenku wotheene, khula mweeri sinniirihiwa soosoma sa Biibiliya * sinivikana 10.000.000. Nave okathi ene yoowo wa iyaakha xexe, atthu anivikana 280.000 yaanipatisiwa, khukhala Anamoona a Yehova ni atthareli a Yesu Kristu. Nto ninrowa waakhaliherya sai atthu awo anisomihiwa Biibiliya okela vahoolo mpakha opatisiwa? Nlelo moopixa murima, Yehova onnaavaha eparakha atthu wira akhale Anamoona awe ni atthareli a Kristu. Nto nihaana waakhaliherya okela vahoolo ni opatisiwa moohipisa. Maana okathi onnivira moowaakuveya!—1 aKor. 7:29a; 1 Ped. 4:7.

3. Mwaha ola, ninrowa othokorerya exeeni voohimya sa wiiriha soosoma sa Biibiliya?

 ³ Okhala wira niinaano-va ti vootthuneya waapaka awiixutti, Nikhuuru Noolamulela naahivekela ifiliyaali sinceene wira siwehe ni sihimye etthu ekhanle oopakiwa wira akhaliheriwe ale anisomihiwa Biibiliya okela vahoolo mpakha opatisiwa. Mwaha ola ni onittharelana, ninrowa woona etthu anniixuttiha aya mapioneero, mamisionaario ni axitokweene a esirkwiitu arina sookumanana sinceene. * (Mir. 11:14; 15:22) Myaha iya sinrowa ottittimiherya etthu anamalaleerya ni ale anisomihiwa Biibiliya akhanle aya oopaka wira yoosoma ya Biibiliya ekhumele saana. Masi mwaha ola, ninrowa othokorerya itthu 5 ole onisomihiwa Biibiliya onireerela awe opaka wira okele vahoolo mpakha opatisiwa.

4. Niireke omusomiha mutthu neemenle ene vamukhora vawe onnikumiherya mireerelo?

⁴ Anna ni arokora anceene, anniiriha soosoma sa Biibiliya yeemenle ene vamukhora va mwaneene etthoko. Nnaamwi eyo eri ene enamuna yooloka ya omukhaliherya mutthu osiveliwa myaha sa mBiibiliyani, okathi mutthu oniviriha awe othokoreryaka myaha sa mBiibiliyani, onikhala vakhaani ni khonikhala khula esumana. Wira amukhaliherye nlelo osiveliwa myaha sa mBiibiliyani, anna ni arokora anceene annimulikarela aahiiso annimwinviyarela mensaxe mutthu ole animuxukurya aya amuleelaka myaha sa mBiibiliyani wala yoolepa. Ovaanela iwo wowaakuveya pooti oviriha myeeri sinceene nlelo ahipacerinhe yoosoma ya Biibiliya. Masi niireke omusomiha mutthu Biibiliya mwa enamuna eyo enoomukhaliherya * okela vahoolo mpakha opatisiwa? Woonasa wene nnaari.

5. Moovarihana ni Luka 14:27-33, etthu xeeni Yesu aattittimihenrye awe enrowa onikhaliherya waapaka awiixutti?

⁵ Okathi omosa, Yesu aahipaka nlikanyiho na etthu mutthu ekhanle awe oopaka aaphavelaka okhala mutthareli awe. Owo aahilavula nlikanyiho na mutthu oniphavela oteka empa yoorakama ni na mwene oniphavela orowa owana ekhotto ni mwene mukina. Yesu aahimmye wira mulopwana ole oniphavela oteka empa yoorakama, ohaana toko “okilathi, khupuwela musurukhu orinawe okumiha, wira asuwele waphiyeryaka omalihana”, nave mwene ole onrowa owana ekhotto, ohaana toko “okilathi, khíyupuwela wira” oone akhala wira ookhalana anakhotto amphiyerya oxintta ekhotto. (Mmusome Luka 14:27-33.) Mwa enamuna emosaru, Yesu aanisuwela wira mutthu oniphavela okhala mutthareli awe, ohaana othokorerya oratteene ele onireerela awe opaka. Nto nihaana waatumererya ale nnaasomiha ahu Biibiliya osoma khula esumana. Ninrowa owerya sai opaka eyo?

6. Nihaana wiimananiha opaka exeeni wira nikhalane soosomiha sa Biibiliya sinkela vahoolo?

 ⁶ Etthu yoopacerya, muncereryeke okathi muniviriha anyu mmusomihaka vamukhora mutthu owo. Woonasa wene, nyuwo pooti othokorerya myaha sikina wala soolepa sikina okathi munimuxukurya anyu. Nto vaavo onlimalela awe oviriha okathi ovaanelaka ni nyuwo, mmukoheke akhala wira nookhala nipuro mukhanle anyu ookilaathi wira nvikaniheke othokorerya myaha sa mBiibiliyani. Moota onrowa awe owaakhulani onimooniherya akhala wira onnivaha efaita omusoma Biibiliya aahiiso nnaari. Nuuvira okathi, wira aakuveye okela vahoolo momunepani, nyuwo pooti omukoha akhala wira onniphavela osoma ikwaha piili vasumanani. Masi muhaana opaka etthu ekina ohiya omusomiha ekwaha emosa wala piili vasumanani.

7. Xeeni vari aya vooloka wiilokiherya oratteene muhinatthi wiiriha yoosoma ya Biibiliya?

⁷ Okhala wira mwa mwiixuttihi, nyuwo muhaana wiilokiherya oratteene muhinatthi orowa omusomiha. Nyuwo pooti opacerya musomaka mpantta munrowa anyu omwiixuttiha ni oweha soolepa sotheene. Nave muhaana osuwela oratteene iponto suulupale. Muupuweleke muru muulupale wa yoosoma eyo, miru saamukhaani, makoho a yoosoma, soolepa sihimmwe wira “musome”, ifootu ni iviidiyu sinrowa wookhaliheryani omutthokiherya saana ole munimusomiha anyu. Nuumala-vo, mmuupuwelaka ole munimusomiha anyu Biibiliya, nweheke moota munrowa anyu omutthokiherya mwa enamuna yookhweya wiiwexexa wira mmukhaliherye wiiwexexa oratteene ni ovarihela muteko.—Neh. 8:8; Mir. 15:28a.

8. Moolumo a Paulo ari aKolosi 1:9, 10, anniixuttiha exeeni voohimya sa waavekelela ale nnaasomiha ahu Biibiliya?

⁸ Okathi muniilokiherya anyu, munvekeleleke ole munimusomiha anyu ohela muhina itthu sinimuxankiha. Nave munvekeleke Yehova wira ookhaliheryeni omwiixuttiha mwa enamuna enrowa onvara murima. (Mmusome aKolosi 1:9, 10.) Nave-tho mwiimananiheke osuwela etthu naxikola anyu enrowa onvila wiiwexexa aahiiso weemererya. Muhiliyale wira yoolakela anyu omukhaliherya mpakha opatisiwa.

9. Mutthokiherye moota namalaleerya okhanle awe oomukhaliherya ole onimusomiha awe olokiherya yoosoma awe.

⁹ Ninnikupali wira yoosoma ya Biibiliya eniiriwa khula esumana, enoomukhaliherya ole onisomihiwa oxukhurela itthu sotheene Yehova ni Yesu apanke aya, nave onoophavelaka osuwela itthu sikina. (Math. 5:3, 6) Wira ottottele mureerelo yoosoma, ole onisomihiwa ohaana ovaha ephoole itthu oniixutta  awe. Wira mmukhaliherye opaka eyo, muhaana omutumererya wiilokiherya oratteene vahinatthi, osomaka ittima munrowa anyu othokorerya ni wuupuwelela moota onrowa awe ovarihela muteko mookumini mwawe. Munrowa omukhaliherya sai wiilokiherya vahinatthi? Mulokiheryeke vamosa wira naxikola anyu, oone moota enlokiheriwa aya * yoosoma. Nave mmooniheryeke nipuro nnaakhuliwa aya nikoho ni mmukhaliheryeke okhwenyenya moolumo wala ifrase sinrowa omukhaliherya wuupuwela nipuro nnaakhuliwa aya nikoho. Nuumala-vo munvekeleke waakhula orumeelaka moolumo awe, maana eyo enimookhaliheryani osuwela akhala wira ohiiwexexa ele eniixutta awe. Masi yookhala etthu ekina munreerela anyu omutumererya naxikola anyu opaka.

10. Xeeni ole onisomihiwa Biibiliya onreerela awe omusoma Biibiliya khula nihiku? Onrowa ottottela sai mureerelo yoosoma awe ya Biibiliya?

¹⁰ Ohiya paahi osomihiwa khula esumana, sookhala itthu sikina ole onisomihiwa Biibiliya onireerela awe opaka khula nihiku ori ene mekhawe. Owo ohaana ovaanela ni Yehova, niire so, onvekela Yehova ni owiriyana ele Muluku enihimya awe. Nto onrowa owerya sai onwiriyana Yehova? Owo ohaana omusoma Biibiliya khula nihiku. (Yox. 1:8; Esal. 1:1-3) Nto muhaana omooniherya efolyeeto eni: “Eprokrama ya Omusoma Biibiliya” eri va jw.org. * Wira naxikola anyu ottottele mureerelo yoosoma awe ya Biibiliya mmutumereryeke wuupuwelela ele enisoma awe. Nave mmuleeleke wira okathi onimusoma awe Biibiliya, ohaana wiikoha so: ‘Ele enisoma aka enkiixuttiha exeeni voohimya sa Yehova? Kinrowa ovarihela sai muteko mookumini mwaka?’—Mit. 17:11; Yak. 1:25.

11. Ninrowa omwiixuttiha sai ole nimmusomiha ahu Biibiliya ovekela mwa enamuna yooloka? Xeeni vari aya vooloka naxikola anyu onvekela Yehova khula nihiku?

¹¹ Mmutumereryeke naxikola anyu a Biibiliya olavula ni Yehova. Onrowa owerya sai opaka eyo? Onvekelaka khula nihiku, nto ehinatthi ni nuumala yoosoma ya Biibiliya muhaana onvekelela naxikola anyu ni murima wotheene muhimyaka nsina nawe. Nto vaavo onrowa awe woowiriyanakani nvekelaka ni murima wotheene onimwiixutta onvekela Yehova ni murima wotheene mwa nsina na Yesu Kristu. (Math. 6:9; Yoh. 15:16) Nkahaya muupuwele moota naxikola anyu a Biibiliya onrowa awe okhalana waataana wooloka ni Yehova vaavo orowa awe onwiriyanaka Yehova khula nihiku ni olavula ni Yehova onvekelaka! (Yak. 4:8) Akhala wira naxikola anyu onoopakaka eyo khula nihiku, eyo enoomukhaliherya okela vahoolo mpakha wiivahererya ni opatisiwa. Etthu xeeni ekina enrowa omukhaliherya?

12. Namalaleerya onrowa omukhaliherya sai ole onimusomiha awe Biibiliya okhalana waataana wooloka ni Yehova?

¹² Itthu sotheene naxikola anyu oniixutta awe mBiibiliyani sihikhaleke paahi mmuupuweloni mwawe, sihaana okela mpakha vamurimani vawe. Mwaha wa xeeni? Mwaha woowi, murima onihela muhina soophavela ni moonelo. Nto eyo tenrowa omukhaliherya ovarihela muteko ele eniixutta awe. Yesu anisuwela owiixuttiha oratteene atthu. Nto atthu ale yaanimutthara mwaha woowi aanaavara murima. (Luka 24:15, 27, 32) Naxikola anyu ohaana onweha Yehova ntoko Mutthu eekeekhai, eyo piiyo, mutthu onreerela awe okhalana waataana wooloka. Nave ohaana omoona Yehova ntoko Tiithi, Muluku awe ni Mpatthani awe. (Esal. 25:4, 5) Nto okathi munimusomiha anyu muhaana omukhaliherya naxikola anyu a Biibiliya oweha mikhalelo sookuxa murima sa Muluku ahu. (Okhum. 34:5, 6; 1 Ped. 5:6, 7) Moohicikha mwaha munithokorerya anyu, mwiimananiheke omukhaliherya naxikola anyu oweha omutthu wa Yehova ni mmukhaliheryeke woona mikhalelo sooloka sa Yehova ntoko ophenta, oreera murima ni othunku. Yesu aahimmye wira: “Yoruma yulupalexa ni yopajerya” tiila: “Mwaphenteke Apwiya Muluku anyu”. (Math. 22:37, 38) Nto mmukhaliheryeke naxikola anyu omphenta Yehova ni murima awe wotheene.

13. Munrowa omukhaliherya sai naxikola anyu a Biibiliya osuwela omutthu wa Yehova? Nvahe ntakiheryo.

¹³ Okathi munivaanela anyu ni naxikola anyu mmooniheryeke wira munnimphenta Yehova ni murima anyu wotheene. Eyo enoomukhaliherya naxikola anyu a Biibiliya woona wira yena nave ohaana okhalana waataana wooloka ni Muluku. (Esal. 73:28) Mwa ntakiheryo, pooti wira eliivuru munisoma anyu aahiiso yoolepa munithokorerya anyu, yookhala efrase enooniherya ophenta, ankhili, exariya ni owerya wa Yehova. Nyuwo munoonela sai efrase eyo? Niireke ennivara murima anyu? Akhala wira ti siiso, mmuleeleke eyo naxikola anyu a Biibiliya ni mmooniheryeke mukhalelo owo ni mikhalelo sikina siniwiirihani omphenta Tiithi anyu a wiirimu. Masi yookhala etthu ekina khula mutthu onisomihiwa Biibiliya onreerela awe opaka wira okele vahoolo mpakha opatisiwa.

14. Moovariha ni aHeeberi 10:24, 25, mithukumano sa mmulokoni sinrowa omukhaliherya sai naxikola anyu okela vahoolo?

¹⁴ Otheene ahu nimphavela wira ole nimmusomiha ahu Biibiliya okele vahoolo mpakha opatisiwa. Wira nimukhaliherye opaka eyo, nihaana omutumererya orowela mithukumano mmulokoni. Anamalaleerya arina sookumanana sinceene ahimmye wira naxikola a Biibiliya onaakuvela orowela mithukumano onnakuva okela vahoolo momunepani.  (Esal. 111:1) Anamalaleerya akina annimutthokiherya ole animusomiha aya Biibiliya wira yoosoma awe ya Biibiliya mpantta mmosa paahi wa omusoma Biibiliya, mpantta mukina ohaana orowela mithukumano mmulokoni wira omalelihe. Mmusome aHeeberi 10:24, 25 ni naxikola anyu ni mmooniherye itthu sooloka onrowa awe ophwanya akhala wira onoorowela mithukumano. Nave pooti omooniherya eviidiyu eni: Exeeni Eniiraneya Mmithukumanoni sa Empa ya Omwene? * Mmutumereryeke naxikola anyu a Biibiliya ohicompa nnakhala muthukumano mmosa wa khula esumana.

15. Etthu xeeni munreerela anyu opaka wira mmukhaliherye naxikola anyu ohicompela mithukumano?

¹⁵ Etthu xeeni munireerela anyu opaka akhala wira naxikola anyu khonarowele mithukumano, aahiiso onrowa atthuna vale? Mmuleeleke moohakalala etthu mwiixuntte anyu mmithukumanoni. Eyo enoomukhaliherya naxikola anyu orowela mithukumano. Munvaheke erevista Owehaweha wala Ekaderno Enirumeeliwa Omuthukumanoni, nuumala-vo mmuleeleke etthu enrowa othokoreriwa mithukumano sinittharelana ni mmukoheke etthu enimusivela. Etthu naxikola anyu enrowa awe owiriyana ni wiixutta muthukumano awe woopacerya enoomusivela vanceene ovikana mithukumano aaweha awe itiini sikina. (1 aKor. 14:24, 25) Owo onimwaasuwela atthu onrowa awe otthara ntakiheryo naya ni eyo enoomukhaliherya okela vahoolo mpakha opatisiwa.

16. Itthu xeeni ninreerela ahu opaka wira naakhaliherye ale nnaasomiha ahu Biibiliya okela vahoolo mpakha opatisiwa? Mwaha onittharelana, ninrowa othokorerya exeeni?

¹⁶ Nuupuwelaka itthu sotheene nthokorenrya ahu mpakha-va, munrowa omukhaliherya sai naxikola anyu a Biibiliya okela vahoolo mpakha opatisiwa? Mmutumereryeke naxikola anyu ovarexexa yoosoma awe ya Biibiliya, osoma khula esumana, ni olokiherya ohinatthi osoma. Ohiya-vo, mmutumereryeke naxikola anyu ovaanela ni Yehova khula nihiku ni okhalana waataana wooloka ni yena. Nave, mmutumereryeke ohicompela mithukumano sa mmulokoni. (Nwehe ekaaxa eni: “ Itthu Ale Anisomihiwa Biibiliya Anireerela Aya Opaka Wira Akele Vahoolo Mpakha Opatisiwa”.) Masi sookhala itthu thanu (5) anamalaleerya anireerela aya opaka wira yaakhaliherye ale anaasomiha aya Biibiliya okela vahoolo mpakha opatisiwa. Itthu xeeni? Mwaha onittharelana ninrowa othokorerya.