1. Ninsuwela sai wira muteko wowaapaka awiixutti onnoopola ikumi sa atthu?

MUTEKO wowaapaka awiixutti wookhalana efaita yinceene, mwaha woowi onnoopola ikumi sa atthu! Ninsuwela sai eyo? Ninnisuwela mwaha woowi okathi Yesu aavanhe awe yooruma eri Matheyo 28:19, 20, owo aahimmye so: “Murowé, mwawixuttiheke atthu . . . , mwabatizaka”. Masi ninsuwela sai wira opatisiwa wookhalana efaita yinceene? Wookhalana efaita, mwaha woowi naaphavelaka woopowa nihaana opatisiwa. Ale aniivahererya wira apatisiwe, ahaana waamini wira anoophwanya okumi woohimala, mwaha woowi Yesu ohookhwa ni oohihimuxiwa. Eyo ti etthu yaamwiirinhe murummwa Pedru waaleela maKristau akhwaawe wira: “Obatizo onniwòpolani mwaha w’ohihimuwa wa Yesu Kristu mokhwani”. (1 Ped. 3:21) Nto eyo enooniherya wira, vaavo mutthu onipatisiwa awe onnikhalana nlipelelo na okhalana okumi woohimala.

2. Moovarihana ni 2 Timootheyo 4:1, 2, enamuna xeeni ya wiixuttiha ninreerela ahu okhalana?

² Wira naapake awiixutti nihaana osuwela oratteene owiixuttiha atthu. (Mmusome 2 Timootheyo 4:1, 2.) Mwaha wa xeeni? Yesu onirumme wira: “Murowé, mwawixuttiheke atthu”. Murummwa Paulo ohimmye wira nihaana ‘okhalana murima wovilela’ naavaraka muteko owo. Maana “mwira siso, munimòpowa mmansinyu vamosá n’ale aniwiwani”. Tthiri, eyo ti etthu yaamwiirinhe Paulo ohimya wira: “Mwipasope mmansinyu n’itthu sinixuttihanyu”. (1 Tim. 4:16) Okhala wira wiixuttiha onnivarihana ni waapaka awiixutti, nto nimphavela owiixuttiha mwa enamuna yoolokexa.

3. Mwaha ola, ninrowa othokorerya exeeni voohimya sa wiiriha soosoma sa Biibiliya?

³ Olumwenku wotheene ninniwiixuttiha atthu imilyau sinceene ikeekhai siri mBiibiliyani. Masi ntoko niwenhe ahu mwaha ovinre, nimphavela  osuwela moota wowaakhaliherya ale nnaasomiha ahu Biibiliya opatisiwa wira akhale atthareli a Yesu Kristu. Mwaha ola, ninrowa othokorerya itthu 5 anamalaleerya otheene anireerela aya opaka wira yaakhaliherye ale anaasomiha aya Biibiliya okela vahoolo mpakha opatisiwa.

4. Xeeni varya aya vooloka anamalaleerya osyaka olavula vanceene okathi aniiriha aya soosoma sa Biibiliya? (Nwehe enoota.)

⁴ Sinninsivela vanceene itthu siniwiixuttiha ahu atthu siri Nuulumo na Muluku. Nto naahiivahe ephoole, hiyo pooti olavulaka vanceene itthu iyo sin­nisivela. Masi akhala wira munihoolela yoosoma ya Owehaweha, yoosoma ya Biibiliya ya muloko aahiiso yoosoma ya Biibiliya ya vatthokoni, muhaana osyaka olavula vanceene. Khula mwiixuttihi onniphavela omurumeela oratteene Biibiliya okathi oniixuttiha awe. Nto ohaana osyaka olavula vanceene, nave ohaana osyaka otthokiherya khula etthu onsuwela awe voohimya sa yoolepa emosa wala mwaha onithokorerya awe. * (Yoh. 16:12) Vano, nkahaya muupuwele itthu sa mBiibiliyani mwaasuwela anyu okathi mwaapatisiwe anyu ni itthu munisuwela anyu vano. Woonasa wene, okathi ole mwaasuwela sowiixuttiha soopacerya sa mBiibiliyani paahi. (aHeeb. 6:1) Tthiri soovira iyaakha sinceene wira mwiixutte itthu munisuwela anyu olelo-va, nto muheereryeke omwiixuttiha ekwaha emosa paahi itthu sotheene munisuwela anyu ole munimusomiha anyu Biibiliya.

5. (a) Moovarihana ni 1 aTesaloonika 2:13, etthu xeeni nimphavela ahu wira ole nimmusomiha ahu Biibiliya iiwexexe okathi nimmusomiha ahu? (b) Ninrowa waatumererya sai ale nnaasomiha ahu ohimya itthu aniixutta aya?

⁵ Otheene ahu nimphavela wira ale nnaasomiha ahu Biibiliya akupaliki ni murima wotheene wira ele aniixutta aya enikhuma Nuulumo na Muluku, Biibiliya. (Mmusome 1 aTesaloonika 2:13.) Ninrowa owerya sai opaka eyo? Mmutumereryeke ole munimusomiha anyu Biibiliya ohimya itthu oniixutta awe. Ohiya omakela omutthokiherya soolepa sa mBiibiliyani, munvekeleke wira ootthokiheryeni ele enihimya aya yoolepa eyo. Nave mmukhaliheryeke naxikola anyu woona moota Biibiliya onivareleya awe muteko mookumini mwawe. Munrowa owerya sai opaka eyo? Mum­pakeleke makoho anrowa omukhaliherya ohimya moonelo ni muupuwelo awe voohimya sa yoolepa musomme anyu. (Luka 10:25-28) Mwa ntakiheryo, nyuwo pooti omukoha so: “Yoolepa ela enookhaliheryani sai oweha mikhalelo sa Yehova?” “Ekeekhai ela ya mBiibiliyani mwiixuntte anyu enrowa wookhaliheryani sai mookumini mwanyu?” “Munoonela sai ele mwiixuntte anyu?” (Mir. 20:5) Etthu yootepa otthuneya khahiyo itthu naxikola anyu onsuwela awe masi moota onisiveliwa awe ni ovarihela muteko ele onsuwela awe.

6. Xeeni vari aya vooloka waalattula anamalaleerya arina sookumanana sinceene okathi munrowa anyu wiiriha soosoma sa Biibiliya?

⁶ Okathi munrowa anyu wiiriha soosoma sa Biibiliya, niireke munnaalattula anamalaleerya arina  sookumanana sinceene ni ansuwela wiixuttiha? Akhala wira munnipaka eyo, mwaakoheke moota anoonela aya enamuna muniiriha anyu soosoma sa Biibiliya ni moota munimurumeela anyu Biibiliya okathi muniixuttiha anyu. Mwaaphavelaka okhala mwiixuttihi oolokexa, muhaana okhala mutthu oowiiyeviha. (Mulikanyihe ni Miteko 18:24-26.) Nuumala-vo, mmukoheke namalaleerya owo orina sookumanana sinceene akhala wira naxikola anyu onniiwexexa ikeekhai oniixutta awe. Nave, nyuwo pooti onvekela namalaleerya owo wira iirihe yoosoma eyo okathi muhinkhala anyu, pooti okhala esumana emosa wala ovikana. Eyo enimwiiriha yoosoma anyu oheemela ni enoomukhaliherya naxikola anyu woona efaita erina aya yoosoma awe. Muhikhala-khale muupuwelaka wira eyo “yoosoma anyu paahi” khuuvo mutthu mukina okhanle owiiriha yoosoma eyo. Tthiri nyuwo mun­nimphavelela itthu sooloka naxikola anyu wira okeleke vahoolo vaavo oniixutta awe ekeekhai.

7. Exeeni enrowa omukhaliherya ole munimusomiha anyu Biibiliya osiveliwa ni itthu oniixutta awe?

⁷ Ole munimusomiha anyu, onniphavela woona wira munnisiveliwa ni munnikupali ikeekhai munimwiixuttiha anyu siri mBiibiliyani. (1 aTes. 1:5) Pooti wira eyo enoomwiiriha osiveliwa itthu oniixutta awe. Vaareerelaka pooti omuleela moota malakiheryo a mBiibiliyani yookhalihenryayani vanceene. Mwiira siiso, eyo enoomukhaliherya ole munimusomiha anyu Biibiliya woona wira malakiheryo a mBiibiliyani anoomukhaliherya vanceene.

8. Etthu xeeni munireerela anyu opaka wira mmukhaliherye ole munimusomiha anyu Biibiliya, ni munrowa opaka sai eyo?

⁸ Okathi munimusomiha anyu mmuleeleke sowiiraneya sa anna ni arokora, yaawo yaaxinttale mixankiho ntoko mixankiho orina awe. Nave nyuwo pooti omukuxa munna wala murokora a mmulokoni orina yowiiraneya enrowa omukhaliherya naxikola anyu. Ohiya-vo, nyuwo pooti waavya sowiiraneya soovara murima va jw.org mpantta oni: “Biibiliya Onnirukunuxa Mirima sa Atthu”. * Myaha iyo ni iviidiyu iyo sinoomukhaliherya naxikola anyu a Biibiliya woona wira ti vooloka ovarihela muteko malakiheryo a mBiibiliyani mookumini mwawe.

9. Munrowa omutumererya sai ole munimusomiha anyu Biibiliya waaleela amusi ni apatthani awe ele eniixutta awe?

⁹ Akhala wira naxikola anyu oothela wala ootheliwa, niireke ole othelanne awe onnikhala-vo okathi munisoma anyu? Akhala wira khonikhala mmulattuleke wira musomeke vamosa. Mmutumereryeke naxikola anyu, waaleela ele oniixutta awe amusi ni apatthani awe. (Yoh. 1:40-45) Munrowa owerya sai opaka eyo? Mmukoheke so: “Mwaarowa omutthokiherya sai mmusi anyu ekeekhai ela mwiixuntte anyu? Yoolepa xeeni mwaarowa anyu orumeela wira mmukhaliherye  woona wira ele munihimya anyu ekeekhai?” Mwiira siiso, munoomukhaliherya naxikola anyu wiilokiherya wira okhale namalaleerya ni mwiixuttihi ooloka. Nuumala-vo, akhala wira onniphwanelela, owo pooti opacerya olaleerya ni muloko ntoko namalaleerya oohipatisiwa. Ohiya-vo, nyuwo pooti omukoha naxikola anyu akhala wira onnimusuwela mutthu oniphavela omusoma Biibiliya. Aakhula wira, “aayo”, nyuwo muhaana wiimananiha olavula ni mutthu owo ni onvaha yoosoma ya Biibiliya moohipisa. Nave, mmooniherye eviidiyu eni: Enipakiwa Sai Yoosoma ya Biibiliya? *

10. Moovarihana ni 1 aTesaloonika 2:7, 8, ninrowa otthara sai ntakiheryo na murummwa Paulo?

¹⁰ Anamalaleerya ahaana waathokorerya saana ale anaasomiha aya Biibiliya. Muhiliyale wira ale munaasomiha anyu Biibiliya, moohipisa pooti okhala anna ni arokora a mmulokoni. (Mmusome 1 aTesaloonika 2:7, 8.) Nave musuweleke wira khivanaakhweela waahiya apatthani aya a moolumwenkuni, wira apake marukunuxo wira amurumeeleke Yehova. Nto nihaana waakhaliherya waaphwanya apatthani. Nyuwo nave muhaana okhala mpatthani awe nvaanelaka ni yena ohiya paahi okathi munimusomiha anyu Biibiliya, masi-tho okathi mukina. Akhala wira munoomulikarela, onvaha mensagem ni omuxukurya hata vakhalaka vakhaani munoomooniherya ole munimusomiha anyu Biibiliya wira munnimuthokorerya ni murima wotheene.

11. Ale nnaasomiha ahu Biibiliya nimphavela wira aphwanye exeeni mmulokoni, ni nthowa xeeni?

¹¹ Vanihimmwa wira: “Atthu otheene a mmuttettheni annikhaliherya omuhuwa mwaana”. Masi hiyo ninhimya wira “muloko wotheene onnikhaliherya ompaka mwiixutti a Yesu”. Tivonto anamalaleerya ansuwela wiixuttiha saana annaakhaliherya ale anaasomiha aya Biibiliya waasuwela atthu akina a mmulokoni wira awo yaakhaliheryeke otepa omwaattamela Yehova. Tthiri, ole munimusomiha anyu Biibiliya onoosiveliwa okhala vamosa ni atthu awo a Muluku, nto anna ni arokora awo anoomukhaliherya okhala mpatthani ooloka a Yehova ni omulipiha okathi onrowa awe okhalanaka mixankiho. Moohaanyiherya nimphavela wira ale nnaasomiha ahu Biibiliya yooneke wira anniirela mpantta muloko ni anniirela mpantta emusi ahu ya omunepani. Nave nimphavela wira akhalaneke waataana wooloka ni anna ni arokora, yaawo ari oophenta. Yiira siiso, vanimwaakhweela ohiya waataana ni atthu ahinaakhaliherya omphenta Yehova. (Mir. 13:20) Nto akhala wira khaniphaveliwa ni apatthani aya a khalai, awo anoosuwela wira animwaaphwanya apatthani mmutthenkesoni mwa Yehova.—Mar. 10:29, 30; 1 Ped. 4:4.

12. Xeeni vari aya vooloka omuleela ole nimmusomiha ahu Biibiliya voohimya sa wiivahererya ni opatisiwa?

¹² Ikwaha sinceene mmuleeleke efaita erina aya wiivahererya wa Yehova ni opatisiwa. Muhiliyale wira yoolakela ahu naamusomihaka Biibiliya mutthu, ori  omukhaliherya omurumeela Yehova ni opatisiwa. Nto nuumala ovira myeeri vakhaani nimusomihaka Biibiliya, otepexa wene, nuumala opacerya orowela mithukumano, ole nimmusomiha ahu Biibiliya ohaana osuwela wira yoolakela ahu omukhaliherya okhala Namoona a Yehova.

13. Itthu xeeni ole nimmusomiha ahu Biibiliya onireerela awe opaka wira opatisiwe?

¹³ Vakhaani-vakhaani, sookhala itthu ole nimmusomiha ahu Biibiliya onreerela awe opaka wira opatisiwe! Yoopacerya, ohaana omusuwela, omphenta ni omwaamini Yehova. (Yoh. 3:16; 17:3) Ya nenli, okhalana waataana wooloka ni Yehova, anna ni arokora a mmulokoni. (aHeeb. 10:24, 25; Yak. 4:8) Ya neeraru, ohaana ohiya opaka itthu soohiloka aapaka awe ni ottharuwa itampi sawe. (Mit. 3:19) Ya neexexe, waamini wawe ohaana omwiiriha waaleela atthu akina ikeekhai oniixutta awe. (2 aKor. 4:13) Nuumala-vo, ohaana wiivahererya wa Yehova ni wooniherya wiivahererya iwo opatisiwaka. (1 Ped. 3:21; 4:2) Tthiri nihiku ompatisiwa awe, atthu otheene annihakalala! Nto vaavo naxikola anyu onipaka awe itthu wira opatisiwe, mmuttottopeleke ni mmulipiheke wira ohihiye opaka itthu iyo.

14. Ninrowa osuwela sai akhala wira ole nimmusomiha ahu Biibiliya onnikela vahoolo?

¹⁴ Nihaana opixa murima vaavo nnaakhaliherya ahu ale nnaasomiha ahu Biibiliya okela vahoolo wira yiivahererye ni apatisiwe. Hata vari siiso, nihaana oweha akhala wira anniphavela tthiri omurumeela Yehova Muluku. Niireke ole munimusomiha anyu onnooniherya wira onniimananiha wiiwelela sooruma sa Yesu? Wala oniphavela paahi wiixutta itthu sa mBiibiliyani?

15. Itthu xeeni sinooniherya wira ole munimusomiha anyu Biibiliya onnikela vahoolo?

¹⁵ Okathi wotheene nweheke akhala wira ole munimusomiha anyu Biibiliya onnikela vahoolo. Mwa ntakiheryo, niireke onnooniherya wira onnimphenta Yehova? Niireke onninvekela Yehova? (Esal. 116:1, 2) Niireke onnimusivela omusoma Biibiliya? (Esal. 119:97) Niireke onnirowela mithukumano sotheene? (Esal. 22:23) Niireke onnipaka marukunuxo mookumini mwawe? (Esal. 119:112) Niireke oopacerya waaleela amusi ni apatthani awe ele oniixutta awe? (Esal. 9:2) Niireke onniphavela okhala Namoona a Yehova? (Esal. 40:9) Akhala wira naxikola anyu khonipaka itthu iyo, mwiimananiheke oweha etthu enimwiiriha, nuumala-vo mooreerela murima mulavulane ni muhimukhuwe etthu. *

16. Okathi xeeni onireerela aya ohiya omusomiha mutthu Biibiliya?

¹⁶ Okathi mukina nweheke akhala wira pooti aahiiso nnaari ohiya omusomiha mutthu Biibiliya. Mwiikoheke so: ‘Kiireke onnilokiherya yoosoma? Kiireke onnirowela mithukumano? Kiireke  onnihiya soolema soohiloka? Kiireke nlelo onniirela mpantta etiini yoowootha?’ Akhala wira munaakhula wira “aayo” makoho awo otheene musuweleke wira ovikaniha omusomiha mutthu ntoko owo onlikana ntoko omwiixuttiha mutthu okata variki ohiphavelaka! Akhala wira ole munimusomiha anyu Biibiliya khonisiveliwa osoma ni khoniphavela opaka marukunuxo, nto xeeni muhihiyaka omusomiha?

17. Moovarihana ni 1 Timootheyo 4:16, anamalaleerya ahaana opaka exeeni?

¹⁷ Hiyo nimphavela ovara oratteene muteko ahu wowaapaka awiixutti. Nave nimphavela waakhaliherya ale nnaasomiha ahu Biibiliya okela vahoolo mpakha opatisiwa. Tivonto, okathi ninwiixuttiha ahu nim­murumeela ahu Biibiliya wira akupaliki wira ele nnaasomiha ahu ekeekhai. Nave ninnaatumererya ale nnaasomiha ahu Biibiliya waapaka apatthani mmulokoni. Ohiya-vo ninnaakhaliherya wiivahererya wa Yehova ni opatisiwa ni oweha okathi wotheene akhala wira annikela vahoolo momunepani. (Nwehe ekaaxa eni: “ Itthu Anamalaleerya Anireerela Aya Opaka Wira Amukhaliherye Ole Animusomiha Aya Biibiliya Okela Vahoolo Mpakha Opatisiwa”.) Ninnihakalala vanceene wiirela mpantta muteko ola onoopola ikumi sa atthu! Nto niimananiheke opaka itthu sotheene ninwerya ahu wira naakhaliherye ale nnaasomiha ahu Biibiliya okela vahoolo mpakha opatisiwa.