1. Yoothanla xeeni yootepexa oloka mutthu okhanle awe oopaka?

SOOTHANLA anamuyari anipaka aya pooti waakhaliherya anaaya aahiiso nnaari. Akhala wira anamuyari anoopaka soothanla soohiloka, eyo pooti waakumiherya mixankiho anaaya. Masi akhala wira anamuyari anoopaka soothanla sooloka animwaakhaliherya anaaya okhalana okumi woohakalaliha. Ekeekhai wira anamwane nave, ahaana opaka soothanla sooloka. Muhiliyale wira yoothanla yootepexa oloka mutthu okhanle awe oopaka ori omurumeela Tiithi ihu oophenta a wiirimu, Yehova.—Esal. 73:28.

2. Soothanla xeeni sooloka Yesu ni anamuyari awe yaapanke aya?

² Anamuyari a Yesu, Yosefe ni Maria yaaniimananiha vanceene waakhaliherya anaaya omurumeela Yehova. Nto soothanla yaapanke aya saanooniherya wira yaanivaha efaita yinceene omurumeela Yehova. (Luka 2:40, 41, 52) Nave Yesu aahipaka soothanla sooloka saamukhalihenrye opaka yootthuna ya Yehova. (Math. 4:1-10) Yesu aahinnuwa khukhala mutthu ooreera murima, oororomeleya ni oolipa murima. Anamuyari otheene animphenta Yehova yaamuhakalala okhalana mwaana ntoko Yesu.

3. Mwaha ola, ninrowa waakhula makoho xeeni?

³ Mwaha ola, ninrowa waakhula makoho ala: Soothanla xeeni sooloka Yehova ampakenle awe Yesu? Soothanla sa anamuyari a Yesu, Yosefe ni Maria siniwiixuttiha exeeni anamuyari olelo-va? Soothanla sa Yesu siniwiixuttiha exeeni amiravo maKristau?

4. Yoothanla xeeni yootepexa oloka Yehova ampakenle awe Mwanawe?

⁴ Yehova aahaathanla anamuyari oolokexa wira amuhuwe Yesu.  (Math. 1:18-23; Luka 1:26-38) Moolumo oovara murima a Maria alempwale mBiibiliyani annooniherya wira aanimphenta vanceene Yehova ni Nuulumo nawe. (Luka 1:46-55) Nave enamuna Yosefe iiwelenle awe malakiheryo a Yehova, ennooniherya wira aanimoova Muluku ni aaphavela omusiveliha.—Math. 1:24.

5-6. Itthu xeeni Yehova eemerenrye awe omukhumelela Mwanawe?

⁵ Moone wira Yehova khaathanlale anamuyari oothaaciri wira amuhuwe Yesu. Maana mukuttho Yosefe ni Maria yaavanhe aya nuumala Yesu oyariwa, onnooniherya wira yaari atthu oohaawa. (Luka 2:24) Nave okhala wira aari kalapinteero, woonasa wene Yosefe aahikhalana nipuro aatumiha awe mireerelo sawe waattamela owannyawe oNazarethi. Ohiya-vo vanikhala ntoko wira khiyaarina musurukhu munceene ni mireerelo sinceene, otepexa wene okhala wira muhoolo mwaya yaahikhalana anamwane yaavikana 7.—Math. 13:55, 56.

⁶ Yehova aahimukhapelela Yesu wira sihimukhumelele ihasara, masi owo khaamwaakihenrye mixankiho sotheene. (Math. 2:13-15) Mwa ntakiheryo, Yesu aahikhalana amusi yahaamukupali. Nkahaya muupuwele moota Yesu aanyoonyiheyale awe vaavo amusi awe akina wanipacerya yaahakupali aya wira owo aari Mesiya aaleiheriwe. (Mar. 3:21; Yoh. 7:5) Nave Yesu aahaana ovilela oriipiwa murima ni oxanka mwaha wookhweliwa paapa awe iihaniwa Yosefe. Okhala wira Yosefe aahikhwa, Yesu aahaana ovara muteko tiithi awe aavara awe wira emusi awe ephwanyeke yoolya. (Mar. 6:3) Nto nuumala Yesu wunnuwa, owo aahiixutta waakhapelela amusi awe, woonasa wene aahaana ovara muteko munceene wira ophwanyeke musurukhu wira aakhaliheryeke amusi awe. Nto Yesu aanisuwela ele entaphulela aya okhulumuwa nuumala oviriha nihiku notheene mutthu ovaraka muteko.

7. (a) Makoho xeeni anrowa waakhaliherya anamathelana aniphavela waayara anamwane? (b) Miruku 2:1-6, onrowa waakhaliherya sai anamuyari owiixuttiha anaaya?

⁷ Akhala wira moothela wala mootheliwa ni muniphavela waayara anamwane, mwiikoheke so: ‘Niireke naatthu oowiiyeviha ni ninnimphenta Yehova ni Nuulumo nawe? Niireke Yehova aamunithanla wira nimukhapelele mwaana?’ (Esal. 127:3, 4) Akhala wira mwa namuyari mwiikoheke so: ‘Kiireke kinniwiixuttiha anaaka osuwela ovara muteko?’ (Mus. 3:12, 13) ‘Kiireke kinniimananiha waakhapelela anaaka wira sihaakhumelele ihasara somunepani ni sa werutthuni sinikumiheriwa ni olumwenku ola wa Satana?’ (Mir. 22:3) Ekeekhai wira khamunrowa owerya  waakhapelela aniinyu mixankiho sotheene sinrowa waakhumelela. Maana khivaniweryaneya opaka eyo. Masi nyuwo pooti waakhaliherya aniinyu ovilela mixankiho sa mookumini nwiixuttihaka moophenta ororomela miruku sa Nuulumo na Muluku, Biibiliya. (Musome Miruku 2:1-6.) Mwa ntakiheryo, akhala wira ookhala mmusi anyu ohiyale omurumeela Yehova, nwiixuttiheke aniinyu efaita erina aya ororomeleya wa Yehova murumeelaka matakiheryo a mBiibiliyani. (Esal. 31:24) Nave akhala wira ohookhwa mutthu mwamphenta anyu, nwooniherye aniinyu iveersu sa mBiibiliyani sinrowa waakhaliherya oxintta oriipiwa murima ni ophwanya murettele.—2 aKor. 1:3, 4; 2 Tim. 3:16.

8. Yosefe ni Maria yaatthanre sai malakiheryo ari Otumererya 6:6, 7?

⁸ Yosefe ni Maria yaahimukhaliherya Yesu nuumala wunnuwa weemereriwa ni Yehova, mwaha woowi yaanitthara malakiheryo a awe. (Mmusome Otumererya 6:6, 7.) Nave Yosefe ni Maria yanimphenta vanceene Yehova. Nto yoolakela aya yuulupale waari waakhaliherya anaaya omphenta vanceene Yehova.

9. Soothanla xeeni sa faita Yosefe ni Maria yaapanke aya?

⁹ Yosefe ni Maria yaahithanla omukokhorela Yehova mahiku otheene ni anaaya. Tthiri awo khiyaacompa orowela mithukumano khula esumana osinagoga oNazarethi ni Paasikha aapakiwa oYerusalemu khula mwaakha. (Luka 2:41; 4:16) Woonasa wene, awo yaanirumeela mikhwaha iyo sa orowa oYerusalemu wira amwiixuttihe Yesu ni axinnawe voohimya sa itthu Yehova aapakenle awe atthu awe khalai sinilavuliwa Soolempwa. Pooti wira yaanipaka eyo yeettaka mphironi arowaka oYerusalemu. Nuumala Yosefe ni Maria waayara anamwane akina, woonasa wene waanaavila omukokhorela Yehova khula nihiku. Masi, hata vaari siiso, awo yaahiphwanya mareeliho manceene mwaha woohihiya omukokhorela Yehova. Okhala wira yaanihela nipuro noopacerya omukokhorela Yehova, emusi ya Yosefe yaahikhalana waataana wooloka ni Yehova!

10. Ntakiheryo na Yosefe ni Maria ninwiixuttiha exeeni anamuyari?

¹⁰ Ntakiheryo na Yosefe ni Maria ninwiixuttiha exeeni anamuyari animoova Muluku? Etthu yootepexa otthuneya, moolumo ni miteko sanyu sihaana owooniherya oratteene aniinyu wira munnimphenta vanceene Yehova. Xontte anamuyari muhiliyale  wira etthu yuulupalexa mukhanle anyu oowaavaha aniinyu, waakhaliherya omphenta vanceene Yehova. Etthu mukhanle anyu oopaka ori waakhaliherya aniinyu omusoma Biibiliya khula nihiku, ovekela, orowela mithukumano ni olaleerya. (1 Tim. 6:6) Muupuweleke wira etthu enrowa waakhaliherya aniinyu woopowa okathi olumwenku wa Satana onrowa awe opwetexiwa ni okela elapo esya, khahiyo musurukhu wala mireerelo sikina, masi waataana wooloka aniinyu arina aya ni Yehova. *—Ezek. 7:19; 1 Tim. 4:8.

11. (a) Malakiheryo ari 1 Timótheyo 6:17-19, anaakhaliherya sai anamuyari vaavo anaahuwa aya anaaya? (b) Soolukama xeeni emusi anyu sinireerela aya othokorerya ni mireerelo xeeni sinrowa okhumelela? (Nwehe ekaaxa eni: “ Soolukama Xeeni Munireerela Anyu Okhalana?”)

¹¹ Ti voohakalaliha waaweha anamuyari anceene maKristau apakaka soothanla sooloka wira yaakhaliherye anaaya okhalana waataana wooloka ni Yehova! Okathi wotheene awo anniimananiha omulompa Muluku hoothe. Annirowela mithukumano sa mmuloko ni akonkresu ni emusi aya. Nave annilaleya ihapari sooreera vamosa. Imusi sikina sinniimananiha olaleerya mittetthe sihinlaleeriwa ikwaha sinceene. Akina annirowa oxukurya oBetheli ni akina annikhaliherya oteka ipa sinirumeeliwa ni mutthenkeso wa Yehova. Imusi sinithanla opaka miteko iyo sinnirumeela musurukhu aya, nave pooti wira aakhalana mixankiho aahiiso kharina musurukhu munceene. Masi awo anniphwanya mireerelo sinceene, nto Yehova onnaatthuvela aavahaka mihakhu sinceene sa omunepani. (Mmusome 1 Timootheyo 6:17-19.) Anamwane aninnuwa wala anihuuwa imusi ntoko iyo khanihiya opaka itthu sooloka hata yinnunwe ene ni annihakalala ohuuwa mwa enamuna eyo. *—Mir. 10:22.

12. Yoothanla xeeni Yesu aapanke awe?

¹² Okathi wotheene, Tiithi awe a wiirimu Yesu onnipaka soothanla mwa miruku, nave anamuyari awe a valaponi yaanipaka soothanla sooloka. Masi nuumala wunnuwa, Yesu aahaana opaka soothanla sawe. (aGal. 6:5) Mwa enamuna emosaru, otheene ahu nookhalana eparakha ya othanla ele nimphavela ahu opaka. Nto Yesu anwerya othanla opaka ele aaphavela awe ohiya opaka yootthuna ya Yehova. (Yoh. 8:29) Ohiya opaka eyo, Yesu aahithanla okhalana waataana wooloka ni Yehova. (Yoh. 8:29) Olelo-va, ntakiheryo na Yesu ninrowa waakhaliherya sai amiravo?

13. Yoothanla xeeni Yesu aapanke awe ori ene mmiravo?

¹³ Okathi aari awe mmiravo, Yesu aahithanla owiiwelela anamuyari awe. Owo khonakhootte malakiheryo aavahiwa awe ni anamuyari awe, ohimyaka wira aahikhalana ankhili waavikana anamuyari awe. Ohiya-vo, Yesu “aniwiwelela yawo”. (Luka 2:51) Moohaanyiherya, Yesu aanivara oratteene  muteko awe wookhala mwaana oopacerya oyariwa. Tthiri owo aahiimananiha wiixutta muteko wa okalapintero waavariwa ni tiithi awe wira oweryeke ophwanya musurukhu wira aakhaliheryeke amusi awe.

14. Ninsuwela sai wira Yesu aanisiveliwa osoma Nuulumo na Muluku?

¹⁴ Woonasa wene, anamuyari a Yesu yaahimuleela moota aayariwe awe mwa mwiiriirya ni itthu malaikha a Muluku yaahimmye aya. (Luka 2:8-19, 25-38) Masi Yesu khaikhuraanale uupuwelaka wira itthu iixuttihiwe awe saahiphiyerya, nto aahisoma mmensawe Soolempwa. Ninsuwela sai wira Yesu aanisiveliwa osoma Nuulumo na Muluku? Ninnisuwela eyo mwaha woowi, nlelo ori ene mmiravo awiixuttihi a oYerusalemu “yanithamala, mana Yesu aniwiwa n’usuwela, anakhula ni miruku”. (Luka 2:46, 47) Orina ene iyaakha 12 paahi, Yesu aahooniherya oratteene wira Yehova aari Tiithi awe.—Luka 2:42, 43, 49.

15. Ninsuwela sai wira Yesu aahithanla opaka yootthuna ya Yehova?

¹⁵ Nuumala osuwela ele Yehova aaphavela awe wira opakeke, Yesu aahithanla ni murima wotheene opaka yootthuna ya Yehova. (Yoh. 6:38) Yesu aanisuwela wira aamunyokhiwaka ni atthu anceene. Nnaamwi aahaaphavela onyokhiwa, owo aahithanla omwiiwelela Yehova ni murima wotheene. Okathi Yesu aapatisiwe awe mwaakha 29 EC, etthu yootepexa otthuneya aaphavela awe opaka waari opaka ele Yehova aamurumme awe. (aHeeb. 10:5-7) Nave okathi aakhwa awe vamwirini va nihaaxeryo, Yesu khaahiyale opaka yootthuna ya Tiithi awe.—Yoh. 19:30.

16. Ntakiheryo na Yesu ninwiixuttiha exeeni anamwane?

¹⁶ Nwiiweleleke anamuyari anyu. Ntoko Yosefe ni Maria, anamuyari anyu khahiyo atthu oomalela. Hata vari siiso, Yehova ohaathanla anamuyari anyu wira yookhapelelekeni, awiixuttihekeni ni yoolakiheryekeni. Nto nwiriyaneke miruku anoovahaayani ni muttittimiheke okhulupale aya. Mwiira siiso, ‘munimwetta ni murettele n’ikumi’.—aEef. 6:1-4.

17. Moovarihana ni Yoxuwa 24:15, yoothanla xeeni amiravo anireerela aya opaka?

¹⁷ Mmuthanle ole munrowa anyu omukokhorelaka. Nyuwo muhaana omusuwela oratteene Yehova ni yootthuna awe. Nuumala-vo, mpakeke yootthuna eyo mookumini mwanyu. (aRom. 12:2) Mwiira siiso, nyuwo munoowerya opaka yoothanla eri yootepexa otthuneya mookumini mwanyu, ori omurumeela Yehova. (Mmusome Yoxuwa 24:15; Mus. 12:1) Nto mwaahihiye omusoma Biibiliya khula nihiku, omphenta wanyu Yehova onimunnuwa ni omwaamini wanyu onrowa otepaka olipa.

18. Yoothanla xeeni ekina amiravo anireerela aya opaka ni exeeni enrowa okhumelela?

 ¹⁸ Muthanle ohela nipuro noopacerya mookumini mwanyu opaka yootthuna ya Yehova. Olumwenku wa Satana, onihimya wira akhala wira munoorumeela itthu munisuwela anyu wira mwiiphwanyihe mireerelo mekhinyu paahi, munoophwanya ohakalala. Masi hiyo ninnisuwela wira ale aniimananiha ophavelasa mihakhu paahi, anniphwanya “masoso malupale”. (1 Tim. 6:9, 10) Masi akhala wira munonwiriyana Yehova ni othanla ohela nipuro noopacerya mookumini mwanyu opaka yootthuna awe, nyuwo munookhumela saana mookumini ni munookhalana ankhili.—Yox. 1:8.

19. Anamuyari ahaana ohiliyala exeeni?

¹⁹ Xontte anamuyari, mwiimananiheke waakhaliherya aniinyu omurumeela Yehova. Mmuroromeleke yena, owo onimookhaliheryani opaka soothanla mwa miruku. (Mir. 3:5, 6) Muhiliyale wira aniinyu anrowa opakaka, ohiya ele munihimya anyu, masi ele munipaka anyu. Nto mpakeke soothanla mwa miruku sinrowa waakhaliherya aniinyu omurumeela ni weemereriwa ni Yehova.

20. Mareeliho xeeni amiravo anrowa aya ophwanya akhala wira anoothanla omurumeela Yehova?

²⁰ Nyuwo amiravo, anamuyari anyu animookhaliheryani opaka soothanla mwa miruku mookumini mwanyu. Masi hata vari siiso, nyuwo muhaana wiimananiha opaka soothanla sooloka wira mmusiveliheke Yehova. Mmutakiheke Yesu, muthanlaka omurumeela Tiithi inyu a wiirimu oophenta. Akhala wira munoopaka eyo, nyuwo munookhalana okumi wooloka ni woohakalaliha niinaano-va. (1 Tim. 4:16) Nave muhoolo nyuwo munrowa okhalana okumi woohakalaliha ni wootepexa oloka.