1. MaKristau otheene ahaana ohihiya opaka exeeni?

NIIREKE nyuwo moopatisiwa? Akhala wira ti siiso, okathi mwaapatisiwa anyu, nyuwo mwaahiwooniherya atthu otheene wira munnimwaamini Yehova ni muniphavela omurumeela yena vamosa ni mutthenkeso awe. * Tthiri omwaamini wanyu Yehova ohinnuwa ni woolipa vanceene. Masi, hata vari siiso, muhihiye olipiha okupali wanyu wira Yehova onneettiha mutthenkeso awe olelo-va.

2-3. Olelo-va, Yehova oneettiha sai mutthenkeso awe? Nvahe matakiheryo.

² Olelo-va, Yehova onneettiha mutthenkeso awe mwa enamuna enooniherya omutthu awe, soolakela sawe, malamulo ni malakiheryo awe a xariya. Vano nrowe nithokorerye mikhalelo miraru sa Yehova sinooneya mmutthenkesoni mwawe.

³ Woopacerya, “Muluku khanathanla atthu”. (Mit. 10:34) Ophenta woomwiiriha Yehova onivaha Mwanawe mmoseene wira “awòpole atthu othene”. (1 Tim. 2:6; Yoh. 3:16) Nave Yehova ohaaruma atthu awe wira alaleyeke ihapari sooreera sa Omwene. Eyo ennaakhaliherya atthu otheene aniphavela ottottela mureerelo mukuttho wowoopola wa Yesu wira yoopowe. Wa nenli, Yehova Muluku ootthokiheya ni a murettele. (1 aKor. 14:33, 40) Nto atthu otheene animukokhorela ahaana okhala ootthokiheya ni a murettele. Wa neeraru, Yehova ‘Mwixuttihi ahu’ Muulupalexa. (Yes. 30:20, 21) Tivonto mutthenkeso awe oniimananiha awe owiixuttiha atthu Nuulumo nawe, okhale mmulokoni wala muteko woolaleerya. Mikhalelo iyo miraru sa  Yehova, sooneya sai muloko wa eseekulu yoopacerya? Olelo-va, atthu a Yehova anitakiha sai mikhalelo iyo? Munepa wootteela wa Muluku onrowa wookhaliheryani sai orumeela mmutthenkesoni mwa Yehova olelo-va?

4. Moovarihana ni Miteko 1:8, muteko xeeni Yesu aarumme awe atthareli awe ovara ni niireke anivara mekhaya?

⁴ Eseekulu yoopacerya. Muhupi Yesu aalaleya awe waanaavaha nlipelelo apinaatamu otheene. (Luka 4:43) Nto Yesu ohaaruma atthareli awe ovara muteko yoowo opacerinhe awe alaleyaka ihapari sooreera “mpakha omalenle elapo”. (Musome Miteko 1:8.) Ekeekhai wira awo khanivara muteko owo ni ikuru saya, niire so, mekhaya paahi. Awo annikhaliheriwa ni munepa wootteela wa Muluku, yoowo ori “mulipa-òkhaliherya” Yesu aaleihenrye awe wira aamwaavaha.—Yoh. 14:26; Zak 4:6b.

5-6. Munepa wootteela, waakhalihenrye sai atthareli a Yesu?

⁵ Atthareli a Yesu Kristu yaahaakhela munepa wootteela nihiku na Pentekoositi a 33, nuumala Kristu orwa. Akhaliheriwaka ni munepa owo wootteela, moohipisa yaahipacerya olaleerya. Nto okathi vakhaani paahi atthu anceene yaaheemererya ihapari sooreera. (Mit. 2:41; 4:4) Okathi yaapacenrye aya olupatthiwa, atthareli ale khiyoovale ni khiyaahiyale olaleerya. Ohiya-vo, awo yaahinvekela Muluku wira aakhaliherye. Awo yaavekenle so: “Munivahe hiyo arumeyi anyu, ikuru s’olaleya molumo anyu ni wilipiha, nihòvaka etthu”. Nuumala-vo, otheene aya yaahisareya munepa wootteela “khukelela olaleya molumo a Muluku ni wilipiha, ehòvaka etthu”.—Mit. 4:18-20, 29, 31.

⁶ Atthareli ale a Yesu Kristu yaahikhalana mixankiho sikina. Mwa ntakiheryo, awo khiyaarina iroolu sinceene sa Soolempwa. Nave khiyaarina iliivuru sikina saatthokiherya soolempwa ni ikaruma sikina saarowa waakhaliherya osoma ntoko hiyo nrina ahu olelo-va. Ohiya-vo, awo yaahaana waalaleerya atthu yaalavula mattaava oovirikana. Nnaamwi yaarina mixankiho iyo, atthareli ale ooluttuweliwa yaahivara muteko muulupale. Iyaakha 30 paahi, awo yaahilaleya ihapari sooreera “mulaponi mothene”.—aKol. 1:6, 23.

7. Iyaakha sinivikana 100 sivinre, arumeyi a Yehova yaasuwenle sai ele aaphavela awe wira apakeke ni yaapanke exeeni?

⁷ Mahiku ahu ala. Olelo-va, Yehova khohiyale waalakiherya ni waavaha ikuru atthu awe wira apakeke yootthuna awe. Malakiheryo manceene, anikumihiwa Nuulumo nawe, Biibiliya. Nto mBiibiliyani hiyo ninnisoma voohimya sa muteko woolaleerya wa Yesu ni yooruma Yesu aavanhe awe atthareli awe wira ahaana ovikaniha ovara muteko aapacerinhe awe. (Math. 28:19, 20) Erevista Owehaweha (ya Enkelexi) ya Julyo a 1881, yaahimmye so: “Hiyo khaniihaniwe ni khanithalinwe wira nivuwihiweke nnakhala wiithukumanyerya mihakhu, masi wira niviriheke okathi ahu nlaleyaka ihapari sooreera”. Vano elivirinyu: Ole Ororomeliwe Ovara muteko (ya Enkelexi), yeeyo yaakumiheriwe mwaakha wa 1919 yaahimmye so: “Muteko ola muulupale, masi muteko wa Apwiya, nto awo anoonivaha ikuru wira nivare oratteene muteko ola”. Tthiri ntoko maKristau a eseekulu yoopacerya, moolipa murima anna ale yaahiivahererya wira avareke muteko woolaleerya akupaliki wira munepa wootteela waamwaakhaliherya waalaleerya atthu otheene. Nave hiyo olelo-va ninnikupali wira munepa wootteela onoonikhaliherya.

8-9. Inamuna xeeni sa olaleerya mutthenkeso wa Yehova orumeelale awe?

⁸ Mutthenkeso wa Yehova onnirumeela ikaruma soolokexa wira olaleye ihapari sooreera. Ikaruma iyo sinihela muhina iliivuru soowimpirimiriwa, “Fotodrama da Criação” fonokrafu, ikaaro saarumiha masu, raadio, interneti ni ikaruma sikina sa etekonologia ya niinaano. Nave mutthenkeso wa Yehova onniimananiha vanceene otaphulela iliivuru. Mwaha wa xeeni? Mwaha woowi oniphavela wira atthu otheene awiriyaneke ihapari sooreera ni nttaava ayaraniwe aya. Musuweleke wira  Yehova khonimuthanla mutthu ni aahihimya vahinatthi wira ihapari sooreera yaamulaleeriwa “atthu a maloko othene ni a mahimo othene ni a malavulelo othene ni a ilapo sothene”. (Wiis. 14:6, 7) Tthiri vannooneya wira Yehova oniphavela wira atthu otheene awiriyane ihapari sa Omwene.

⁹ Ankhi atthu ale nihinwerya ahu waalaleerya owannyeya woonasa wene, mwaha woowi anikhala ipa nihinwerya ahu okela? Ophavelaka wira naalaleerye atthu awo, Yehova oonikhaliherya orumeelaka mutthenkeso awe wira nipaceryeke orumeela inamuna isya wira nlaleeryeke mapuro oowaatta atthu. Mwa ntakiheryo, mwaakha wa 2001, Nikhuuru Noolamulela, naaheemererya wira anna ni arokora a oFrança apaceryeke olaleerya arumeelaka ikarinyu ni meesa. Muhoolo mwaya, enamuna eyo yaahipacerya orumeeliwa ilapo sikina, nto yaahikumiherya mireerelo sinceene. Mwaakha wa 2011, yaahipacerihiwa enamuna esya wEstados Unidos mpantta wowaatta atthu epooma ya oNova York. Mwaakha ole woopacerya, saahivahiwa iliivuru 102.129 ni irevista 68.911. Nto atthu 4.701 yaahivekela yoosoma ya Biibiliya! Tthiri vannooneya wira orumeelaka munepa awe wootteela, Yehova onnikhaliherya muteko awe. Nto olelo-va, olumwenku wotheene Nikhuuru Noolamulela niheemererya wira nlaleeryeke nrumeelaka ikarinyu.

10. Etthu xeeni ninreerela ahu opaka wira nikhale anamalaleerya ooloka?

¹⁰ Etthu xeeni mukhanle anyu oopaka? Okathi wa mithukumano, Yehova onniniixuttiha wira nilaleeryeke oratteene. Nto murumeeleke ele muniixutta anyu okathi munilaleerya anyu. Nave mulaleeryeke vamosa ni ekrupu anyu ya muteko woolaleerya. Nto anna ni arokora a ekrupu anyu animookhaliheryani okhala namalaleerya ooloka ni ntakiheryo naya nnimoolipihani vanceene. Muhihiye olaleerya hata mukumanaka mixankiho. Yoolepa ahu ya mwaha ola, ehooniherya wira nnoowerya opaka yootthuna ya Yehova ohiya mwaha wa ikuru sahu, masi mwaha wa ikuru ninvahiwa ahu ni munepa wootteela wa Muluku. (Zak. 4:6b) Muhiliyale wira ninvara muteko wa Muluku.

11. Nikhuuru noolamulela na eseekulu yoopacerya naavanre sai mowiiraana wira atthu a Muluku akhale oowiiraana?

¹¹ Eseekulu yoopacerya. Nikhuuru noolamulela oYerusalemu naanivara mowiiraana wira atthu  a Muluku akhale ootthokiheya ni a murettele. (Mit. 2:42) Mwa ntakiheryo, mwaakha 49, maKristau manceene yaahikhalana moonelo woovirikana akhala wira mutthu ahaana winnuwihiwa wira omurumeeleke Yehova wala nnaari. Nto mwaha ole waahiroiheliwa nikhuuru noolamulela, nikhaliheriwaka ni munepa wootteela, nikhuuru noolamulela naahithokorerya oratteene mwaha ole. Vaakhanle wira mwaha ole khophukiwe, muteko woolaleerya khiwaarowa okhumela saana. Nnaamwi arummwa ni axitokweene ale yaari aYuda, awo khiyaahapuxiwe ni soolema sa aYuda ni atthu ale yaakhaliherya soolema iyo. Ohiya-vo, awo yaahiphavelasa malakiheryo ari Nuulumo na Muluku ni yaahivekela munepa wootteela wira waakhaliherye opaka yoothanla yooloka. (Mit. 15:1, 2, 5-20, 28) Nto exeeni yaakhumelenle? Yoothanla yaapanke aya, yaahikhaliherya muloko okhala woowiirana ni wa murettele ni yaahivikaniha olaleya ihapari sooreera.—Mit. 15:30, 31; 16:4, 5.

12. Olelo-va, etthu xeeni enooniherya wira mutthenkeso wa Yehova ti wootthokiheya ni wa murettele?

¹² Mahiku ahu ala. Mutthenkeso wa Yehova onniimananiha wira atthu a Muluku akhaleke oowiiraana ni a murettele. Mwaakha wa 1895, erevista A Torre de Vigia de Sião e Arauto da Presença de Cristo yaahikhalana mwaha waarina muru oni: “Nttittimiho ni Wiiraana”. Mwaha ole, waakumihiwe yoolepa ya 1 aKorinto 14:40. Owo waahimmye so: “Arummwa yaahilepela miloko sa eseekulu yoopacerya itthu sinceene voohimya sa wiiraana . . . Nto nihaana ohihiya ovaha ephoole itthu ‘sothene silempwe khalai, silepeliwe wira nixuttihiwe’”. (aRom. 15:4) Nave olelo-va, mutthenkeso wa Yehova onniimananiha vanceene wira miloko sotheene sikhale sootthokiheya ni sa murettele ntoko saari aya miloko sa eseekulu yoopacerya. Mwa ntakiheryo, akhala wira munrowa oweha Yoosoma ya Owehaweha muloko mukina ekhale elapo anyu wala elapo ekina, nyuwo munimoona wira yoosoma eyo enihooleliwa mwa enamuna emosa ni onisommwa mwaha mmosaru olumwenku wotheene. Tthiri moohipisa munimoona wira khamurimenle! Nto vanniweryaneya okhalana wiiraana iwo, mwaha woowi ninnikhaliheriwa ni munepa wootteela wa Muluku.—Sof. 3:9.

13. Nuupuwelaka ele onihimya awe Yakobo 3:17, makoho xeeni ninreerela ahu wiikoha?

¹³ Etthu xeeni mukhanle anyu oopaka? Yehova oniphavela wira atthu awe ‘yiwananeke omosaru avahiwe aya ni . . . [munepa wootteela] ni murettele  onaathukumanya’. (aEef. 4:1-3) Nto mwiikoheke so: ‘Kiireke kinnikumiherya wiiraana ni murettele mmulokoni? Kiireke kinniwiiwelela ale annihoolela? Kiireke atthu akina annikiroromela otepexa wene akhala wira mookhalana miritti mmulokoni? Kiireke kinnipeherya mithukumano, kinnaakhaliherya ni waarumeela atthu akina?’ (Mmusome Yakobo 3:17.) Moona wira yookhala enamuna munireerela anyu olokiherya, nvekeleke munepa wootteela wira wookhaliheryeni. Vaavo munrowa anyu otepaka olokiherya omutthu anyu ni miteko sanyu, anna ni arokora animoophentakani vanceene.

14. Moovarihana ni aKolosi 1:9, 10, eseekulu yoopacerya Yehova awiixuttiha sai atthu awe?

¹⁴ Eseekulu yoopacerya. Yehova waanimusivela vanceene owiixuttiha atthu awe. (Esal. 32:8) Owo aaphavela wira amusuwele, amphenteke ni akhaleke mahiku otheene okhala wira anaawe oophentiwa. Itthu iyo sotheene sanweryaneya mwaha woowi aaniwiixuttiha. (Yoh. 17:3) Yehova aanirumeela muloko wa eseekulu yoopacerya wira owiixuttihe atthu awe. (Mmusome aKolosi 1:9, 10.) Munepa wootteela yoowo ori “mulipa-òkhaliherya” Yesu aaleihenrye awe waahaakhaliherya vanceene atthareli ale a eseekulu yoopacerya. (Yoh. 14:16) Tthiri munepa wootteela waahaakhaliherya awiixutti wiiwexexa Nuulumo na Muluku ni waahiwuupuxerya itthu sotheene Yesu aahimmye awe vaavo muhoolo mwaya yaalepa aya Ivangelyo. Osuwela waahilipiha waamini wa maKristau a eseekulu yoopacerya, omphenta waya Muluku, omphenta waya Mwaana ni ophentana waya mukina ni mukhwaawe.

15. Mwa inamuna xeeni Yehova onimaliherya awe eprofesia awe eri Yesaya 2:2, 3?

¹⁵ Mahiku ahu ala. Yehova aahihimya vahinatthi wira “yaphiyá mahiku aya” atthu a maloko otheene yaamurowa vamwaako vawe wira yiixuttihiwe iphiro sawe. (Mmusome Yesaya 2:2, 3.) Olelo-va ninnoona yiiraneyaka eprofesia ela. Maana okokhorela wekeekhai ori vasuluxa ovikana okokhorela wowootha. Nave Yehova onnaavaha atthu  awe yoolya yinceene yomunepani! (Yes. 25:6) Nto omurumeelaka “murumeyi òroromeleya ni ànkhili” owo onninivaha yoolya eyo yotheene ya omunepani mwa inamuna soovirikana. Mwa ntakiheryo, hiyo ninnisoma myaha, oweha iviidiyu ni itthu sikina. (Math. 24:45) Tthiri moonelo ahu onoolikana ni moonelo wa mpatthani a Yobi iihaniwa Elihu yoowo, aahimmye so: “[Muluku ahu] ti mwixuttihi òratta wavikana awixuttihi othene”.—Yobi 36:22.

16. Muhaana opaka exeeni wira muttottele mureerelo wiixuttihiwa ni Yehova?

¹⁶ Etthu xeeni mukhanle anyu oopaka? Nvekeleke munepa wootteela, owo onimookhaliheryani ovarihela muteko ele munisoma anyu mBiibiliyani. Nave nvekeleke ntoko nasaalimo aavekenle so: “Apwiya! Mukithonyerye iphiro sanyu, wira ketteleke ekekhai anyu; mukhomalihe murim’aka, wira kitthareke otthuna wanyu”. (Esal. 86:11) Ohiya-vo muhihiye omusoma Biibiliya ni iliivuru Yehova onnivaha awe orumeelaka mutthenkeso awe. Muhiliyale wira yoolakela anyu khahiyo okhalana osuwela paahi, masi muniphavela wira ekeekhai ekhale vamurimani ni nvariheleke muteko mookumi mwanyu. Nto munepa wootteela wa Muluku onimookhaliheryani opaka eyo. Nave muhihiye waalipiha anna ni arokora. (aHeeb. 10:24, 25) Mwaha wa xeeni? Mwaha woowi awo amusi anyu oomunepani. Nto nvekeleke munepa wa Muluku wira wookhaliheryeni ovaha ikomentaario soovara murima ni opaka oratteene mpantta anyu. Mwiira siiso, nyuwo munoomooniherya Yehova ni Mwanawe wira munniphenta vanceene “ipwittipwitthi” sawe.—Yoh. 21:15-17.

17. Mwa inamuna xeeni munrowa anyu wooniherya wira munnikhaliherya mutthenkeso wa Yehova?

¹⁷ Moohipisa, mpantta wa valaponi wa mutthenkeso wa Yehova onrowa ohooleliwaka ni munepa wootteela wa Muluku. Nto mwiimananiheke ovara vamosa ni mutthenkeso wa Yehova. Mooniheryeke wira munnaaphenta atthu otheene ntoko Muluku onaaphenta awe mwaalaleeryaka ihapari sooreera atthu otheene munaaphwanya anyu. Nave mutakiheke ophenta, otthokiheya ni murettele wa Muluku mukumiheryaka wiiraana mmulokoni. Munwiriyaneke Mwiixuttihi anyu Muulupalexa muttottelaka mureerelo yoolya yotheene ya omunepani onnivaha awe. Mwiira siiso, vaavo olumwenku ola wa Satana onrowa aya omalaka, nyuwo khamunrowa woova. Ohiya-vo, nyuwo munrowa okhala olipa murima muri ene ni atthu ale anirumeela moororomeleya mutthenkeso wa Yehova.