Mwaakha ole, mutthenkeso waahipaka marukunuxo yaakhalihenrye Anamasoma a Biibiliya okhala oowiiraana. Erevista Owehaweha, yaahipacerya okumiherya ikomentaario saatthokiherya soolepa yaarumeela aya okathi wa mithukumano saya sa vasumanani anvuwihaka Yehova. Ohiya-vo, Anamasoma a Biibiliya yaahipaka elista ya soolepa yaarowa aya orumeelaka khula esumana, ohela muhina masipo yaarowa aya wiipaka okathi wa yoosoma aya ya omwaneene ni okathi wa Omulompa Muluku Vatthokoni.

Okathi wa mithukumano saya, Anamasoma a Biibiliya yaanivaha “onamoona” waahela muhina soowiiraneya saya sa muteko woolaleerya, omuxukhurela waya Yehova, wiipa aahiiso nivekelo. Eva Barney, opatisiwe orina ene iyaakha 15 mwaakha wa 1923, onihimya so: “Akhala wiira mwaaphavela ovaha onamoona, mwaahaana ovenya ni opacerya olavula moolumo ala: ‘Kiniphavela wooxukhurelani Yehova mwaha wookireerela wanyu murima’”. Anna akina yaaninvuwiha Yehova ni moolumo aya. Murokora Barney, olavulaka sa mithukumano iye, aahimmye so: “Waahikhala okathi munna Godwin iira awe omuxukhurelaka Yehova. Mwaarawe munna ole okathi aalavula awe aahoona wiira munna aahoolela muthukumano ole aahipacerya onanariwa vanceene. Nuumala-vo, mwaarawe munna Godwin aahinvara ekasako wiira ohiye olavula ni okilaathi”.

Ekwaha emosa vamweerini, khula Muloko waanipaka muthukumano a vameekhaaya wa onvuwiha Yehova ni ovaha onamoona. Olavulaka sa muthukumano owo, A Sentinela 1 a Abril a 1923 onihimya so: “Okathi wa muthukumano owo, waahikhala okathi waasukeriwe aya wiira atthu ahimyeke soowiiraneya saya voohimya sa muteko woolaleerya ni waalipiha ale yaavara muteko. . . . Ninnikupali wiira mithukumano iyo soolipiha, saaniwiiriha anna awo okhala oowiiraana”.

Charles Martin, yoowo orina iyaakha 19 aari namavara muteko okathi ole, eyo piiyo, (namalaleerya a mmulokoni) a oVancouver, oCanada, aahittottela mureerelo vanceene mithukumano iyo. Muhoolo mwaya owo aahimmye so: “Mithukumano iya sookiixuttiha etthu kikhanle aka oohimya okathi woolaleerya empa ni empa. Anna yaarwa yaanihimya soowiiraneya saya sa muteko woolaleerya empa ni empa, nto eyo yaanikikhaliherya osuwela etthu yoohimya ni moota woowaakhula miyoonelo soovirikana”.

Othanlela “mahiku yaarowa aya olaleerya” yaanaakhaliherya anna ni arokora olipihana ni ovara muteko woolaleerya. A Sentinela a 1 a Abril a 1923 aahimmye so: “Wiira ovariwe muteko ole moowiiraana . . . Namanli 1 a Maio a 1923, naari nihiku naathanliwe wiira anna ni arokora ootheene avare muteko woolaleerya. Mwa enamuna emosa-ru, eNamanli yoopacerya ya khula miyeeri saattharelana . . . khula ekurupu yahaana ovara muteko woolaleerya”.

Hata amiravo yaari Anamasoma a Biibiliya, yaaniirela mpantta muteko owo. Hazel Burford, orina iyaakha 16 onihimya so: “EBolletin yaaniruha malakiheryo a moota woolaleerya (ovaanela woohimya sa Biibiliya) wiira nuupuweleleke. a Miyo ni piipi aka, naahiirela mpantta muteko owo ni ikuru sahu sootheene”. Murokora Burford aahipacerya olupatthiwa mwa enamuna ahuupuwela awe. Owo onihimya so: “Munna mmosa oowuuluvala oona wiira miyo nkaareerela wiirela mpantta muteko ole woolaleerya. Okathi ole, atthu akina kiyiiwexexa wiira Anamasoma ootheene a Biibiliya, waahela muhina ‘amiravo ni imwali’ yaahaana wiirela mpantta muteko ole wa onvuwiha Mpattuxa ahu Muulupale”. (Esal. 148:12, 13, Versão Rei Jaime.) Masi murokora Burford khaakhulumunwe. Nuuvira okathi owo aahilattuliwa Eskola ya oGileadi nave onirumeela ntoko misionaaria elapo ya oPanamá. Muhoolo mwaya anna yaahikhaliherya moonelo awe voohimya sa amiravo ovaraka muteko woolaleerya.

Akonkresu a muttetthe yaaniwiiraaniha anna ni arokora. Akonkresu anceene yaahela muhina muteko woolaleerya waapakiwa oWinnipeg, oCanadá. Konkresu aapakiwe 31 a Março, aahela muhina okawa “Nlattulo na Vameekhaaya na oWinnipeg”, nenno anna ootheene yaamurwenle konkresu yaalattuliwe aya wiirela mpantta. Atthu anceene yaahilattuliwa okathi ole, nave muteko ole waahikumiherya mureerelo woohakalaliha. Nihiku 5 a Agosto, atthu oowiiraka 7.000 yaahimurweela konkresu. Nla naari nummeru nootepa waatta okathi ole na atthu yaamurwenle konkresu oCanadá.

 Konkresu ootepa ohakalaliha a arumeyi a Yehova a mwaakha wa 1923, aapakiwe 18-26 a Agosto, oLos Angeles, oCalifórnia. Isumana aapakiwa awe konkresu ole, ijornale saanilaleya muthukumano ole mwa inamuna soovirikana, nave Anamasoma a Biibiliya yaahikawa malattulo aniphiyerya 500.000. Malattulo ale yaanikolariwa mphironi nave khula mutthu aanikolari mukaaroni mwawe.

Saabadu, 25 a Agosto, munna Rutherford aahilavula mwaha waahimya sa “Ipwittipwitthi ni Ipuri”. Okathi ole aahitthokiherya wiira “ipwittipwitthi” saataphulela atthu a xariya anrowa okhalaka mparayiisu valaponi. Nave owo aahiwuupuxerya anna ni arokora sa “Nlopola” nimosa. Nlopolo nno naalaleya sa etiini yoowootha ni naanaatumererya anaxariya okhuma “Babilonia Muulupale”. (Wiis. 18:2, 4) Anamasoma a Biibiliya ooluttuweliwa a olumwenku wootheene, muhoolo mwaya yaahiiraana okawa ikoopiya sinceene na nlopolo nno.

Nihiku nookiserya na konkresu ole, atthu oowiiraka 30.000 yaahinwiriyana munna Rutherford olavulaka mwaha awe waahimya so: “Todas as Nações Marchando Para o Armagedom, Mais Milhões Que Agora Vivem Jamais Morrerão”. Okhala wiira yaahikhala atthu anceene, Anamasoma a Biibiliya yaahivekela woolihiwa ipa saatekiwe niinano oLos Angeles. Wiira vaweryaneya atthu ootheene owiriyana eprokrama ele, anna yaahirumeela ikaruma saarumiha masu saari opuro ole masi ele yaari enamuna esya. Nave atthu anceene yaahiwiriyana eprokrama ele amurumeelaka raadio.

Mwaakha wa 1923, waahincerereya muteko woolaleerya wÁfrica, wEuropa, wÍndia ni wAmérica do Sul. Munna A. J. Joseph a wÍndia, nnaamwi aakhapelela anaawe 6, aahikhaliherya muteko wa wimpirimiri iliivuru sa eHindi, eTamil, eTelugu ni eUrdu.

OSerra Leoa, Anamasoma a Biibiliya, Alfred Joseph ni Leonard Blackman yaahilepela ikarta oseedi ya oBrooklyn, oNova York, evekelaka nikhaliheryo. Yoovekela aya yahaakhuliwa 14 a Abril a 1923. Alfred Ohimmye so: “Saabadu ohiyu kaahaakhela examaada kahaalipelelaka”. Owo aahiwiriyana nsu naakoha so: “Ti nyuwo mulikarenle oseedi mwaavekelaka anamalaleerya?” Alfred aakhunle so: “Aayo”, nuumala-vo yaahiruuhiwa anamalaleerya. Nsu nle naari na William R. Brown, munna ole aaphiyale niinaano okhumaka oCaribe vamosa ni mwaarawe, iitthaniwa Antonia ni anaawe anli acikhaani, Louise ni Lucy. Nto anna khiyaalipelenle ovira okathi munceene wiira yaasuwele anna ni arokora ale yamphiya-ru.

 Alfred onitthokiherya so: “Nihiku naattharelana voosiisu, Leonard ni miyo niira nithokoreryaka yoosoma ahu ya Biibiliya ya vasumanani, okathi waamaniwa aya mukhora ahu ni mutthu nahaamusuwela ahu. Owo aari William R. Brown. Aaari munna aakhalela nthiti miteko sa Muluku, nave aaphavela olavula mwaha awe nihiku naattharelana”. Nuumala miyeeri vakhaani munna Brown aahikumiha iliivuru aaruhale awe. Nave okathi vakhaani aahaakhela iliivuru 5.000, masi nlelo saanipirisareya iliivuru sikina. Munna Brown khahiyo aasuweliwa ntoko mutthu onitumiha iliivuru. Okathi wootheene anvarela awe muteko Yehova mooluttuweliwa, munna Brown olavulaka mwaha awe aaniromola soolepa sa mbiibiliyani. Nuuvira okathi atthu anceene yaamwiitthana okhala Brown nabiibiliya.

Hata vari siiso, efiliyaali ya oBarmen, wAlemanha yaahisareya atthu nave epooma ele yanoopopihiwa otupheliwa ni anakhotto a oFrança. Anamasoma a Biibiliya yaahiphavelasa empa yoovareleleya wiira yimpirimiriki iliivuru saya nto yaahiphwanya oMagdeburg. Nihiku na 19 a Junho, anna yaahimaliha waarumari ikaruma sootheene yaarumeela aya wiira yimpirimiriki iliivuru ni itthu sikina yaaroiha aya oBetheli ya oMagdeburg. Nihiku naattharelana, efiliyaali yaahiruuha ekarta yaahimya wiira itthu sootheene soolikana, masi soohimmwa saahimya wiira epooma ele ya oBarmen yaahitupheliwa ni anakhotto a oFrança. Nto itthu sootheene anna yaapanke aya wiira akhume opuro ole, yaahoona wiira Yehova anaakhapelela ni aanaareeliha.

oBrasil George Young, yoowo eettale mikwaha sinceene olaleyaka ihapari sooreera, aahipaka efiliyaali ni aahipacerya okawa irevista sa nttaava na ekunya. Miyeeri vakhaani saattharelana, aahikawa iliivuru siniphiyerya 7.000. Masi ophiya wa munna ole, waahimuhakalaliha Sarah Ferguson vamosa ni emusi awe. Okhala wiira okhuma mwaakha wa 1899 owo aanisoma irevista iye masi khaatonko wiivahererya wa Yehova ni opatisiwa. Nuumala miyeeri vakhaani, murokora Ferguson vamosa ni anaawe 4 yaahipatisiwa.

Wanikisa wa mwaakha ole, A Sentinela a 15 a Dezembro a 1923 atthokiheryaka mithukumano sa Anamasoma a Biibiliya ohimmye so: “Vannooneya wiira anna ni arokora . . . yaahikhalana waataana wooloka ni Yehova . . . nihaana wiilokiherya wiira nivare muteko ni ohihiya omurumeela Muluku ni nthiti nihakalalaka mwaakha onirwa, 1924”.

Mwaakha waattharelana waari woohiliyaleya wa Anamasoma a Biibiliya. Anna a oBeteli yaarowa ovaraka muteko mwa miyeeri sinceene muttetthe wa Staten Island, waattamela oseedi ya oBrooklyn. Ipa anna yaateka aya opuro ole saamalihiwe wanipacerya wa mwaakha wa 1924. Yaahaakhaliherya okhala oowiiraana ni olaleya ihapari sooreera mwa enamuna yahaatonko wiiraneya.