Makoho Anikohiwa ni Ale Anisoma Irevista Sahu
Niireke aisarayeli yaalya paahi emana ni anapiri okathi yaari aya moothakoni?
Aisarayeli yaahikhala iyaakha 40 moothakoni. Eyoolya aya yaari emana. (Okhum. 16:35) Yehova ahaavaha aisarayeli anapiri ikwaha piili mahiku oovirikana. (Okhum. 16:12, 13; Moth. 11:31) Masi aisarayeli yaahikhalana-tho iyoolya sikina.
Mwa ntakiheryo, ikwaha sikina Yehova anaakuxa arumeyi awe aarowanaka “nipuro n’omaka” aahiiso noophumurya, weiwo yaaphwanya aya maasi ni eyoolya. (Moth. 10:33) Opuro omosa yaaroihiwa aya waari wElimi, weiwo “waphattuwale ihime mulokó ni pili sa màsi ni mikole miloko mithanu na mili”. (Okhum. 15:27) Eliivuru Plantas da Bíblia, enihimya wiira ‘mikole aahiiso miri sinlikana ni mikole sinninnuwa mapuro oovirikana. Nave eyoolya enilyiwa moothakoni, ohiya okumiherya yoolya paahi, masi-tho sinnivaha makhura ni muuttutthi atthu anceene’.
Woonasa wene, aisarayeli yaaheemela opuro oniitthaniwa oásis grande olelo-va onisuweliwa okhala oFeiran, opuro yoowo oniirela mpantta omukotini wa oFeiran. a Eliivuru Descobrindo o Mundo da Bíblia, enihimya wiira mukoti owo aahiiso muratthi, “orakama waya ti wa ikiloomo 130 ni mukoti wootepa wunnuwa, oreera ni woosuwelexiwa wa omwaako Sinayi. Okhuma opuro muro ole onikumana aya ni ephareya, orowa mwaako Feiran orakama waya ti wa ikiloomo 45. Opuro owo ori mukoti orakamela waya osulu ti wa imeetru 600 masi orakama waya ti wa ikiloomo 5. Opuro owo, sookhala mikole sinceene aahiiso miri sinlikana ni mikole, nave vanihimmwa wiira ti wootepa oreera walikanyihiwa ni oJardim wa wEdeni. Mwa iyaakha sinceene, atthu annoorwa opuro owo mwaha wa miri iyo sa mikole aahiiso sinlikana ni mikole”.
Miri sa tamareiras saari opuro wa oásis Feiran
Okathi aisarayeli yaakhuma aya wExiitu, yaahikuxa otthu wooweetheiwa, etthu yeetheyanaya nave woonasa wene, yaahikuxa etiriku ni makhura. Ekeekhai wiira itthu iya khasiniviriha okathi munceene. Atthu anceene yaahiruuha “makoto manjene a inama sikhani ni sulupale”. (Okhum. 12:34-39) Masi nuuvira okathi, mwaha wa makhalelo oovirikana a moothakoni, pooti wiira inama sikina saahikhwa. Inama iyo sikina, yaahirumeela ntoko eyoolya nave sikina pooti wiira yaavaha mukuttho, ohela muhina amuluku eethiru. b (Mit. 7:39-43) Hata vari siiso, aisarayeli yaahiwerya okhapelela inama sikina. Ninnisuwela eyo, mwaha wa moolumo Yehova aalenle awe ohimyaka wiira yaamwiiwelele, “anaaya yaamulyihaka inama mothakoni-mu mpakha iyaakha miloko mixexe”. (Moth. 14:33) Tthiri, pooti wiira inama sa aisarayeli saanaavaha eleite nave ikwaha sikina awo yaanikhuura enama. Veekeekhai, iyo khisaaphiyera waavaha eyoolya atthu ale anceene mwa mahiku 40. c
Masi inama iya saaphwanya woowi maasi ni eyoolya? d Woonasa wene okathi ole yaanirupa epula yinceene nto yaanikhala malaxi moothakoni. Eliivuru Estudo Perspicaz, Volume 1, enihimya wiira mwa iyaakha 3.500 sivinre, “mapuro ale anikhapeleliwa maasi wArabia yaahikhala, nave yaahikhala okathi yaattale aya ovikana mahiku ala. Sookhala itthu sinooniherya wiira okathi wa khalai yaanirupa epula yinceene, maana saahikhala mikoti soowiixerya ni maxepa opuro yoowo waaphattuwa maasi”. Hata vari siiso, moothakoni waari opuro wuulupale ni woowoopiha. (Otum. 8:14-16) Yehova aahaapanke mwiiriirya aavaha maasi, aisarayeli ni inama saya yaamookhwa. — Okhum. 15:22-25; 17:1-6; Moth. 20:2, 11.
Moise aahaaleela aisarayeli, wiira Yehova ahaavaha emana wiira ekhale eyoolya aya ophavelaka ‘waasuweliha wiira etthu eninvaha mutthu okumi khahiyo eyoolya-ru paahi: molumo othene Apwiya anihimyaya t’aninvaha ekumi mutthu’. — Otum. 8:3.
a Munwehe A Sentinela, 1º a Maio a 1992, ipaax. 24-25.
b Biibiliya onnihimya ikwaha piili okathi inama saavahereryiwa aya mukuttho Yehova moothakoni. Ekwaha yoopacerya, waari okathi wiinakurariwa aya opuro waavahiwa mukuttho. Ekwaha ya nenli waari okathi wa paasikha. Ikwaha iya piili siiraneyale mwaakha 1512 Ohinatthi Kristu Orwa, mwaakha wa nenli nuumala aisarayeli okhuma wExiitu. — Onam. 8:14–9:24; Moth. 9:1-5.
c Wanikisa wa iyaakha 40 okathi aisarayeli yeetta aya moothakoni, awo yaahikhalana inama sinceene sa ekhotto. (Moth. 31:32-34) Masi hata vari siiso, awo khiyaahiyale olya emana mpakha okela elapo yooleiheriwa. — Yoox. 5:10-12.
d Khekhanle etthu enooniherya wiira inama saanilya emana. Yehova aahaaleela arumeyi awe wiira yaahaana ottotta emana yaaphiyera wiira khula mutthu olyeeke, ohiya inama. — Okhum. 16:15, 16.
