1-2. Enamuna xeeni yooloka ya omusoma ni omwiiwexexa Biibiliya? Nvahe ntakiheryo.

 NKUUPUWELANI mphavelaka othuma empa. Niireke mwaarowa oweha empa ene muhinatthi othuma aahiiso mwaarowa ophavela oweha efootu ene paahi, nuumala-vo muthumeke? Moohaanyiherya mwaamurowa oweha empa eyo, moota eri aya ni itthu sootheene siri opuro owo. Nave vaamoosivelani oweha moota etekiwe aya, ekawanyiwe aya ni itthu sootheene sirina aya empa eyo. Tthiri vaamureera oweha empa eyo muhinatthi othuma.

² Nihaana opaka etthu emosa-ru okathi nimphavela ahu omusoma ni omwiiwexexa Biibiliya. Namalepa mmosa onnilikanyiha muhupi wa mbiibiliyani ntoko “epereetiyu yuulupale, yoorakama ni etekiwe ni alisenso oolipa”. Exeeni nikhanle ahu oopaka wiira nimwiiwexexe saana Biibiliya? Akhala wiira munimusoma Biibiliya mwaakuveyasaka, nyuwo pooti wiixutta itthu vakhaani paahi “masi muhaana otthikela-tho wiixuttihiwa itthu soopacerya sa nuulumo noowaarya na Muluku”. (aHeeb. 5:12) Ntoko siisale mwaarowa anyu osiveliwa oweha empa muhinatthi othuma wiira musuwele saana, nave wiira mmwiiwexexe Biibiliya muhaana omusoma ni ephoole. Enamuna yooloka ya omwiiwexexa Biibiliya, ori oweha mwaha munisoma anyu moota onivarihana aya ni myaha sikina sa mbiibiliyani. Wiira mmwiiwexexe, khoniphiyerya osuwela ikeekhai xeeni munikupali anyu, masi exeeni eniwiirihani okupali ikeekhai iyo.

3. Etthu xeeni murummwa Paulo aatumererya awe makristau, ni mwaha wa xeeni? (aEefeso 3:14-19)

³ Wiira nimwiiwexexe saana Biibiliya ni itthu sootheene siri muhina, nihaana wiixutta ikeekhai sa mbiibiliyani. Murummwa Paulo, aahaatumererya makristau wiira yaahaana osoma Nuulumo na Muluku ni ephoole wiira ‘asuwele moota niri aya nuulupale,  noowunnuwa, noorakama ni noowiixerya’. Yiira siiso, waamini waya waamulipa “ntoko mitathaari soolipa”. (Mmusome aEefeso 3:14-19.) Nave hiyo nihaana opaka etthu emosa-ru. Nrowe niwehe etthu nikhanle ahu oopaka wiira niwerye wiiwexexa, osoma Nuulumo na Muluku ni ottottela mureerelo itthu sootheene ninsoma ahu.

4. Exeeni nikhanle ahu oopaka wiira nimwaattamele Yehova? Nvahe matakiheryo.

⁴ Ntoko makristau, hiyo khanimphavela wiixutta paahi ikeekhai soopacerya sa mbiibiliyani. Nikhaliheriwaka ni munepa woowaarya wa Yehova, ninniphavela wiixutta “hata itthu soowiixerya sa Muluku”. (1 aKor. 2:9, 10) Munoonela sai opaceriha yoosoma anyu ya Biibiliya wiira mmwaattamele Yehova? Mwa ntakiheryo, nyuwo pooti otokosa moota Yehova aakhaliherye awe ni waamorela ikharari arumeyi awe a khalai ni moota onoophentaweni. Nave pooti ophavela osuwela moota aisarayeli yaamukokhorela aya Yehova khalai ni moota nimmukokhorela ahu mahiku ala. Woonasa wene nyuwo pooti osoma voohimya sa iprofesia sa Yesu ni moota siiraneyale aya okathi ari awe valaponi.

5. Niireke wookhala mwaha mwaaphavela anyu osoma ni wiiwexexa saana?

⁵ Anna akina aniphenta Nuulumo na Muluku, aahimya itthu sikina sinaasivela okathi anisoma aya. Nyuwo pooti oweha itthu sikina ahimmye aya ekaaxa eni: “ Malakiheryo a Yoosoma ya Omwaneene”. Aahiiso nyuwo pooti omurumeela Índice das Publicações da Torre de Vigia wala Eliivuru Enaakhaliherya Anamoona a Yehova Otokosa Myaha Sikumiheriwe. Mwiira siiso munoosiveliwaka osoma Nuulumo na Muluku, munoolipiha waamini wanyu ni “munimwixutta wasuwela Apwiya”. (Mir. 2:4, 5) Vano nrowe niwehe-tho ikeekhai sikina mukhanle anyu oottottela mureerelo.

6. a) Palano ni yoolakela sivirikanne sai? b) Xeeni ninhimya ahu wiira yoolakela ya Yehova ya apinaatamu ni elapo ti “yoohimala”? (aEefeso 3:11)

⁶ Mwa ntakiheryo, nwehe ele Biibiliya onihimya awe olavulaka sa yoolakela ya Yehova. Ompaka palano ni yoolakela, itthu soovirikana vanceene. Nkuupuwelani mphavelaka weetta mukwaha, nyuwo pooti wuupuwelela estaraata munrowa anyu ovira ni opuro munrowa anyu.  Masi palano owo, pooti ofalyari aahiiso omana mwala mwaha woowi ephiro munrowa anyu ovira, pooti ohivireyaka mwaha wa mathowa oovirikana. Ohiya-vo yoolakela anyu pooti olikanyiha ni opuro mumphavela anyu ophiya. Okhala wiira moosuwela opuro muniphavela anyu ophiya, pooti othanla ephiro ekina wiira nvire. Nyuwo pooti opaka marukunuxo moovarihana ni makhalelo anyu. Ninnimuxukhurela Yehova mwaha woorumiha olempwa mbiibiliyani “yoolakela yoohimala”. (aEef. 3:11) Mwa enamuna ekina, Yehova onnipaka itthu sootheene oniphavela awe okhala wiira itthu “sothene sipankyaya” sookhalana yoolakela aya. (Mir. 16:4) Itthu sootheene Yehova opattunxe awe sinikhala voohimala. Yoolakela xeeni Yehova orina awe ni marukunuxo xeeni opanka awe wiira yiiraneye?

7. Nuumala Adamu ni Eva ohimwiiwelela Yehova, opanke marukunuxo xeeni ni yoolakela awe? (Matheyo 25:34)

⁷ Yehova aahaaleela anamathelana oopacerya yoolakela awe. Owo aahaahimerya wiira: “Mwayareke an’inyu, munjerereyeke: musareyeke mulaponi mothene . . . mukhaleke axinene ihopa sa mphareya n’axipalame a musulu n’inama sothene sinetta vathí”. (Maph. 1:28) Mwaha woohiiwelela wa Adamu ni Eva, apinaatamu ootheene aattheka. Hata vari siiso, eyo kheturunke yoolakela ya Yehova, masi etthu eturukeyale moota enrowa aya wiiraneya. Yehova oolokiherya Omwene awe wiirimu wiira yiiraneye etthu aaphavela awe woopaceryani wa olumwenku ola ahinatthi apinaatamu opattuxiwa. (Mmusome Matheyo 25:34.) Mwaha wa niphento, Yehova aahimuruma mwanawe orwa valaponi okathi aathanlale awe. Mwa enamuna ela, Yesu ntoko mwene a Omwene wa Muluku anwerya owiixuttiha atthu voohimya sa Omwene ni oleva okumi awe ntoko mukuttho woowoopola. Nuumala-vo, Yehova aahimuhihimuxa Yesu wiira otthikele wiirimu alamuleleke moomweneni wawe. Masi sookhala itthu sinceene munireerela anyu wuupuwelela voohimya sa yoolakela ya Muluku.

8. a) Muru xeeni muulupale wa mbiibiliyani? b) Moovarihana ni aEefeso 1:8-11, yoolakela xeeni yuulupale ya Yehova? (Nwehe efootu ya ekaapa.)

⁸ Muru muulupale wa mbiibiliyani, otteelihiwa wa nsina na Yehova. Eyo enimwiiraneya okathi onrowa awe omaleliha etthu oniphavela awe ni elapo ela ya vathi, orumeelaka Omwene awe onilamuleliwa ni Kristu. Owo ooleiherya wiiraneya itthu sootheene olakenle awe nto khiivo enrowa oturuka ele oniphavela awe. (Yes. 46:10, 11; aHeeb. 6:17, 18) Muhoolo, elapo yootheene enrowa okhala eparayiisu, nto osuulu wootheene wa Adamu ni Eva ‘onaamureeriwaka mahiku othene’. (Esal. 22:27) Ohiya paahi itthu iya, Yehova ooleiherya-tho itthu sikina. Yoolakela awe yuulupale, oniphavela wiira arumeyi awe ootheene ari wiirimu ni valaponi amurumeeleke yena moowiirana. Mwa enamuna ela, atthu ootheene anrowa onvuwihaka ni omwiiwelela Yehova ntoko mukhulupale a olumwenku wootheene. (Mmusome aEefeso 1:8-11.) Nyuwo khamunisiveliwa ni moota Yehova onimaleliha awe sooleiherya sawe?

9. Okathi nimmusoma ahu Biibiliya nuupuweleke exeeni enrowa wiiraneya muhoolo?

⁹ Nwehe eprofesia eri Maphattuwelo 3:15, yeeyo Yehova aahimmye awe oxardim ya wEdeni. b Eyo yaanihimya itthu saarowa okhaliherya wiiraneya yoolakela ya Yehova, masi nuuvira iyaakha sinceene. Yehova aahimuleela Abrahamu, wiira yavira maloko manceene mutthu mmosa a osuulu awe aamukhala Kristu. (Maph. 22:15-18) Nto mwaakha wa 33 Nuumala Kristu Orwa, Yesu aahivulalihiwa nxitta aahiiso nnawu  ntoko eprofesia yaahimmye aya. (Mit. 3:13-15) Epantta yookiserya ya eprofesia ela, eyo piiyo, okathi Yesu onrowa awe onyakela muru wa Satana enrowa wiiraneya wanikisa wa iyaakha 1.000 wa olamulela wa Kristu. (Wiis. 20:7-10) Biibiliya onnihimya itthu sikina sinrowa wiiraneya nuumala okhumelela ohiiwanana wa olumwenku wa Satana ni mutthenkeso wa Yehova.

10. a) Exeeni enrowa wiiraneya moohipisa? b) Ninrowa olokiherya sai muupuwelo ahu ni murima ahu? (Nwehe enoota.)

¹⁰ Nkuupuwelani soowiiraneya iya soohakalaliha Biibiliya onihimya awe. Yoowiiraneya yoopacerya, maloko anrowa olaleya “murettele ni ovareleleya!” (1 aTes. 5:2, 3) “Niinaano-ru”, anoopacerya maxakha maalupale okathi maloko anrowa aya otuphela itiini soowootha. (Wiis. 17:16) Nuumala-vo, okathi owo ‘mwaana a mutthu onimoorwa mmeekuni wiirimu, owerya ni ovuwa wuulupale’. (Math. 24:30) Nuuvira okathi, Yesu onimwaaphukela apinaatamu ovalaanyaka ipwittipwitthi ni ipuri. (Math. 25:31-33, 46) Hata vari siiso, Satana khonrowa okhulumuwa. Okathi owo onimwiiraaniha maloko Biibiliya oniitthana awe okhala Gogi a oMagogi, wiira yaatuphela arumeyi a Yehova. (Ezek. 38:2, 10, 11) Nto makristau ale oothanliwa anrowa wiiraka ari ene valaponi, anooroihiwa wiirimu wiira yakhaleke vamosa ni Kristu. Owo onrowa okhala muhooleli aya, nave anrowa omukhaliheryaka okathi wa ekhotto ya Armagedoni, epantte yookiserya ya maxakha maalupale. c (Math. 24:31; Wiis. 16:14, 16) Nuumala itthu iya sootheene wiiraneya, onoopacerya olamulelo wa iyaakha 1.000 wa Kristu valaponi-va. — Wiis. 20:6.

11. Munoonela sai okathi munuupuwela anyu wiira munrowa okhalaka moohimala? (Nwehe efootu.)

¹¹ Munnuupuwela etthu enrowa wiiraneya nuumala iyaakha 1.000? Biibiliya onihimya wiira mpattuxa ahu ‘oopweha vamurimani vahu osuwela woohimala’. (Mus. 3:11, Piipiliya Emakhuwa.) Niireke munnuupuwela moota onrowa aya okhala ompatthani anyu ni Yehova? Eliivuru Achegue-se a Jeová epaaxina 319, enitthokiherya so: “Naviriha iyaakha 100, 1.000, imilyau aahiiso ipiliyau nikhalaka, nnoosuwela itthu sinceene voohimya  sa Muluku ohiya iye ninsuwela ahu olelo-va. Masi nlelo nnookhalana itthu sinceene sooreera ni soovara murima ninreerela ahu wiixutta. . . . Okumi woohimala onrowa okhala woohakalaliha ni munceene, nave etthu yootepa oreera ninrowa ahu okhalana ori waataana wooloka ni Yehova”. Nlipelelaka itthu iyo wiiraneya, itthu xeeni ninrowa ahu wiixutta okathi nimmusoma ahu Biibiliya?

12. Exeeni Biibiliya onnooniherya awe voohimya sa wiirimu? Nvahe ntakiheryo.

¹² Biibiliya onihimya wiira Yehova ‘onikhala wiirimu’. (Yes. 33:5, Piipiliya Emakhuwa.) Nave onnooniherya itthu sootikiniha voohimya sa Yehova ni moota mutthenkeso awe wa wiirimu otthokihiwa awe. (Yes. 6:1-4; Dan. 7:9, 10; Wiis. 4:1-6) Mwa ntakiheryo, hiyo pooti osoma itthu sootikiniha profeta Daniyeli aawenhe awe okathi ‘erimu yaatthukunwe aya ni onapacerya woona itthu sa Muluku’. — Ezek. 1:1.

13. Moovarihana ni aHeeberi 4:14-16, munoonela sai mwaha woosuwela itthu Yesu onipaka awe wiirimu?

¹³ Nkuupuwelani etthu Yesu onipaka awe ori ene wiirimu, ntoko mwene ahu ni Namukuttho Muulupale onisuwela khula etthu ennixankiha. Mwaha wa Muluku onireerela murima vaalupale “nnoowerya omwaattamela nihoovaka etthu” ni onvekela wiira onilevelela itampi sahu ni ‘onikhaliherya okathi wooreerela’. (Mmusome aHeeberi 4:14-16.) Muhihiye niviraka nihiku ntero muhisomme ni wuupuwelela ele Yesu opanke awe ni onipaka awe okhuma wiirimu. Tthiri ophenta wa Kristu tonnitumererya, nave ohaana oniiriha oluttuweliwa ovara miteko sa Muluku. — 2 aKor. 5:14, 15.

14. Enamuna xeeni yooloka ya wooniherya omuxukhurela wahu Yehova ni Yesu mwaha wa itthu annipakela aya? (Nwehe ifootu.)

¹⁴ Enamuna emosa nikhanle ahu oomuxukhurela Yehova ni Yesu mwaha wa itthu annipakela aya, ori wiimananiha waakhaliherya atthu akina okhala Anamoona a Yehova ni atthareli  a Yesu. (Math. 28:19, 20) Ti yeeyo aapanka awe murummwa Paulo ooniheryaka omphenta wawe Yehova ni Yesu. Owo aanisuwela wiira Yehova oniphavela wiira “atthu a makhalelo otheene yoopowe, ni akhalane osuwela weekeekhai”. (1 Tim. 2:3, 4) Nave aaniimananiha vanceene olaleerya wiira aakhaliherye atthu a makhalelo ootheene ophavelaka wiira ‘owoopole akina’. — 1 aKor. 9:22, 23.

15. Moovarihana ni Esalimo 1:2, exeeni enrowa oniphwanyiha ohakalala?

¹⁵ Mulipa-oolepa Esalimo aahimuhimya oratteene mutthu onisiveliwa osoma Nuulumo na Muluku. Owo ohimmye wiira ‘onisiveliwa n’ikano s’ Apwiya’ ni “onnitthokelela ikano iyo othana n’uhiyu”. (Esal. 1:1-3) Olavulaka sa yoolepa ela, namataphulela a Biibiliya Joseph Rotherham, aahilepa eliivuru awe Estudos Dos Salmos. Owo aahimmye wiira “mutthu ohaana osiveliwa ni malakiheryo anikhuma wa Muluku, nave ohaana ophavelasa wiixutta ni ohaavya okathi wiira uupuweleleke”. Owo onnincererya ohimyaka wiira “mutthu pooti ohonona okathi awe vakhala wiira onniviriha okathi munceene ohimusomme Biibiliya ni omwiiwexexa”. Munoowerya osiveliwa omusoma Biibiliya, vakhala wiira munnivaha ephoole ni otokosa itthu sinihela muhina ele enisoma anyu ni oweha itthu sinivarihana. Wiiwexexa oratteene khula etthu enitthokiherya Nuulumo na Muluku enniniphwanyiha ohakalala weekeekhai!

16. Mwaha onittharelana ninrowa wiixutta exeeni?

¹⁶ Ikeekhai sooreera Yehova onnivaha awe orumeelaka Nuulumo nawe, khahiyo soovila wiiwexexa. Mwaha onittharelana, ninrowa wiixutta ikeekhai sikina sa mbiibiliyani, eyo piiyo, etemplo yuulupale yomunepani ya Yehova yeeyo murummwa Paulo aalepenle awe makristau a aheeberi. Tthiri vanimoosivelani wiixutta itthu sinceene voohimya sa mwaha owo.