Anna a oBeteli, yaahivara muteko munceene, waahivira mwaakha mmosa ni miyeeri vakhaani wiira akhalane raadiyu yoowo aitthaniwa WBBR oStaten Island, oNova York. Nuumala olokiherya opuro ole waarowa ovariwaka muteko, awo yaahipaka empa yuulupale wiira akhaleke anamuteko ni epreediyu ekina wiira sipwehiweke ikaruma. Nuumala opheriwa muteko ole, anna yaahimontari ikaruma sootheene saapirisari wiira estasau ele ya raadiyu epacerye ovara muteko. Masi awo yaahikhalana mixankiho sikina yaareerela aya oxintta.

Okathi aamontariwa awe anteena, anna yaahoona wiira estalasau ya anteena ole yaahikhalana muxankiho. Anteena a meeturu 91 aahaana othomeiwa ni miri miili saarina 61 meeturu. Ekwaha yoopacerya khiyaakhumenle saana. Ekhaliheriwaka ni Yehova, anna ale yaahiwerya. Calvin Prosser, yoowo aakhalihenrye muteko ole aahimmye so: “Vaakhanle wiira ekwaha ele yoopacerya naahikhumela saana, hiyo naamwiittottopaka ni naamuhimya so: ‘Nweheke muteko nivanre ahu!’” Masi anna ale yaahinvuwiha Yehova mwaha woowaakhaliherya. Masi mixankiho saya khisaamanle.

Okathi ole, aari raadiyu opacerya naaphavela ahu ommontari, nto khahiyo vaari vookhweya ophwanya ikaruma naapirisari ahu. Moohakalaliha, anna yaahimuthuma transmissor oorumeeliwa. Ohiya othuma mikrofooni, anna ale yaamurumenle telefoni. Ohiyu omosa wa Fevereiro anna yaahilakela omweererya raadiyu aapakiwe ni ikaruma sootthakaseriwa. Awo yaahaavya etthu yoorumiha okathi ole, nto anna yaahilakela wiipa isipo sa Omwene. Mmosa a anna ale yiipa, aari Ernest Lowe, onnuupuwela etthu yootheiha yiiraneyale  nihiku nle yiipa aya. Owo onihimya wiira yaahilikareliwa ni mukhulupale Rutherford, b yoowo aawiiwa muraadiyuni mwawe oryeene oBrooklyn ikiloomo soowiira 25.

Munna Rutherford aahimmye so: “Mmaalihe etthu eyo. Nyuwo munoonyakula paahi!”. Yuuliwe ene muru, moowaakuveya anna ale yaahithipiha emisoore, masi awo yaahoona wiira raadiyu ole aahilikana wiira opacerye ovara muteko.

Nihiku 24 a Fevereiro a 1924, taapacerinwe awe orumeeliwa raadiyu ole. Nto munna Rutherford tanvaheryenrye raadiyu ole wiira orumeeliweke para ‘miteko sa Omwene’. Owo aahimmye wiira yoolakela yuulupale ya raadiyu ole yaari “waakhaliherya atthu omwiiwexexa Biibiliya ni osuwela okathi nnikhala ahu”.

Emissoore ele yoopacerya ya raadiyu yahikumiherya mireerelo sinceene. Raadiyu ole, aahirumeeliwa iyaakha sinivikana 33 okumiheryaka iprokrama sa Anamoona a Yehova.

Julho a 1924, anamasoma a Biibiliya yaahithukumana wiira ampake kongresu oColombus, Ohio. Anamasoma a Biibiliya a olumwenku wootheene yaahirowa owiriyana myaha iye ni nttaava na Arabe, Englexi, Efransexi, nttaava na Alemão, Ekereku, Ehunkaru, Italiyano, eLituwania, ePolônexi, eRuusu, mattaava anilavuliwa wEscandinávia ni Eukrâniano. Ipantta sikina sa kongresu ole saarumihiwa muraadiyuni, nave anna yaahipaka mareheryo wiira ipantta sikina sikumiheriweke muxornaaleni yiihaniwa Ohio State Journal.

Namaxexe 24 a Julho, anna ni arokora oowiiraka 5.000 yaahikhuma wiira yalaleerye mittetthe soowaattamela opuro iiriwa kongresu ole. Anna awo yaahikawa iliivuru sinivikana 30.000 nave yaahipaceriha soosoma sa Biibiliya sinceene. Erevista ya Torre de Vigia, yeeyo enisuweliwa okhala Owehaweha yaahiitthana nihiku nle okhala “mpantta wootepaxa ohakalaliha wa kongresu”.

Namathanu 25 a Julho okathi Rutherford aalavula awe mwaha awe, moolipa murima aahisoma edukumento yeeyo yaaphukela ahooleli a itiini ni anapoliitika. Owo aahimmye wiira “anapoliitika, ahooleli a itiini ni alipa-animwiira nakoso yanaakhoottiherya atthu wiixutta ekeekhai voohimya sa ‘Muluku ni mareeliho onrowa awe waavaha apinaatamu’”. Anamasoma a Biibiliya, yaahaana olipa murima wiira alaleye muhupi owo.

 Muhoolo mwaya, erevista ya Torre de Vigia, yaahimmye wiira kongresu ole aapakiwe oColombos aahilipiha waamini wa ekurupu ele ya anna ni arokora yaawo yaari ooluttuweliwa. Ni yaahaavaha olipa murima wiira alaleerye ihapari sooreera nnaamwi yaalupatthiwa. Leo Claus yoowo aamurowenle kongresu ole onihimya so: “Naakhumme waasembeleyani iwe nitteeliwe ene murima mwaha wa olaleya muhupi”.

Mweeri wa Outubro, Anamasoma a Biibiliya yaahipacerya okawa imilyau sinceene sa ikoopiya ya etratato Acuçados os Eclesiasticos, yeeyo yaakumiheriwe okonkresuni ni munna Rutherford. Esitati yaamukhaani ya oKlahoma wEstados Unidos, Frank Johnson aahimaliha okawa ifolyeeto sawe moowaakuveya, nuumala-vo onaalipelela anna ni arokora wiira arwe opuro aari awe. Munna ole aahikhala opuro wowiipitheya okathi aalipelela awe anna ale okhala wiira yaahikhala atthu akina yahaasiveliwa ni muteko ole. Owo aahiipitha ekerexa aattamenle awe. Okhala wiira khuuvo aakhanle mukerexa mme, owo aahipweha ifolyeeto iye wa khula ekhatera. Nuumala-vo aahikhuma mukerexa mmo moowaakuveya. Okhala wiira aahikhalana okathi, owo aahirowa ikerexa sikina piili opaka etthu emosaru.

Nuumala-vo, munna Frank aahitthikela opuro aarowa awe okumana ni anna ale. Owo aahiipitha opuro aatumihiwa kasolina onaaweha alopwana ale yaamuhaavya. Alopwana ale khiyaawenrye onweha okhala wiira yaari ni kaaro. Nuumala alopwana ale ovira, anna ni arokora yaalaleerya mittetthe sikina yaahikumana ni Frank anarowa.

Okathi naakhuma ahu esitati ele, naahiwuupuwela anna akina nto naahivira ikerexa tthaaru niwaavyaka. Yaahikhala atthu 50 yaawo yeemela ohoolo wa khula ekerexa. Akina yaanisoma efolyeeto ele, nave akina yaaniwooniherya mapastoore. Nto naahikhuma moowaakuveya noovaka manyaku-nyaku! Naahimuxukhurela Yehova mwaha wa onikhapelela ni onikhaliherya waasyaka awanani ahu ale.

Ilapo sikina, alipa oomusoma Biibiliya yaahirumeela enamuna emosaru yoolaleerya moolipa murima. Onorti wa oFrança, Józef Krett aahimulaleerya namuteko mmosa aakhuma elapo ya oPolónia yoowo aavara muteko wa imiina. Munna Krett aarowa olavula mwaha waarina muru oni: “Em breve os mortos serão ressuscitados”. Nuumala anna ni arokora ovaha malattulo, paatiri mmosa aahaaleela atthu a ekerexa awe wiira ahirowe. Masi etthu yiiraneyale yaari yoovirikana ni ele aalipelela awe. Atthu oowiiraka 5.000 yaahirwa owiriyana mwaha ole, ohela muhina paatiri ole! Nto munna Krett, aahimwiitthana paatiri ole wiira otthokiherye sookupali sawe, masi owo aahikhootta. Nuumala omaliha olavula mwaha awe, munna Krett aahaavaha iliivuru sootheene aarina awe alipa-oowiriyana, okhala wiira aahoona wiira yaahikhalana etala ya wiiwa Nuulumo na Muluku. — Am. 8:11.

WÁfrica, oCosta do Ouro olelo-va onisuweliwa okhala oGana, munna Claude Brown toruuhale ihapari sooreera. Atthu anceene yaahiiwa ihapari sooreera okhala wiira aahipaka myaha ni aahivaha iliivuru sinceene muttetthe ole. John Blankson yoowo aasoma wiira okhale meediku, aahiwiriyana mwaha wa munna Brown. Moowaakuveya owo aahoona wiira aahiphwanya ekeekhai. Owo onihimya so: “Mwaha ole kaawiriyanne aka waahikivara murima”. Owo onincererya ohimyaka so: “Kaahaaleela apatthani aka voohimya sa mwaha ole”. John, aahiixutta wiira mbiibiliyani khekhanle yoowiixuttiha ya amuluku araru.

 Nihiku nimosa aahilakela orowa okerexa wiira amukohe paatiri voohimya sa mwaha owo. Nto paatiri ole aahinanariwa ni aahihimya so: “Nyuwo khahiyo mwa Mukristau, nyuwo muniirela mpantta emusi ya Satana. Mukhumeva!”

Nuumala ophiya owaani, John aahimulepela ekarta paatiri ole omulattulaka para olavula voohimya sa mwaha ole. Wiira omwaakhule paatiri ole aahimuleela John wiira yaahaana okumana eskritoorio ya prusoore aamusomiha. Prusoore ole aahimukoha John akhala wiira aahilepa ekarta ele omulepelaka paatiri.

Nto John aakhunle so: “Aayo tthiri miyo koolepa”.

Nto prusoore ole aahimuleela John wiira aahaana olepa ekarta ekina onvekelaka musammaha paatiri ole. Nto John aalempe so:

“Aalupale, prusoore aka ookileela wiira kihaana woovekelani musammaha, nto miyo kiri oolikana ene masi akhala wiira munimweemererya wiira muniixuttiha itthu sa ethiru”.

Prusoore ole otikinihiwe ene aahimukoha so: “Blankson niireke ti yeeyo tthiri mumphavela anyu olepa?”

Owo aakhunle so: “Aayo, ela ti etthu kiniphavela aka olepa”.

Prusoore ole aahimmye so: “Nyuwo munimoomoliwa eskola ela”. Muniwerya sai onyakulihana ni paatiri a ekerexa yeeyo enikhaliheriwa ni kuverno?”

John aakonhe so: “Prusoore, okathi nihiniiwexexa ahu itthu munniixuttiha anyu kiira ninnipaka makoho?”

Prusoore owo aakhunle so: “Aayo ti yeeyo”.

Nto John aahaakhula so: “Nto eyo ti etthu yiiraneyale. Paatiri ola iixuttiha myaha sa Biibiliya nto miyo kimukoha mwaha kahaiwexexa aka. Nto akhala wiira khaniwerya waakhula nikoho naka, nkinoona nthowa naya kinireerelaka waalepela ekarta kaavekelaka muswammaha”.

Blankson khoomolinwe eskola ele. Nave-tho khaalempe ekarta avekelaka muswammaha.

Erevista Torre de Vigia elavulaka voohimya sa muteko wa mwaakha, yaatthokihenrye so: “Nnoowerya ohimya ntoko Davidi aahimmye awe so: ‘Nyuwo munookivaha ikuru wiira kawane ekhotto’”. (Esal. 18:39) Mwaakha ole waari woolipiha okhala wiira naahiwerya oweha nikhaliheryo na Yehova. Arumeyi awo oororomeleya annilaleya ihapari sooreera moohakalala.

Wanikisa wa mwaakha ole, anna yaahimpaka palano wiira ihapari sooreera silaleiweke muradiyoni. Muteko owo waahipacerya estasau ekina ya raadiyu waattamela oChigago. Estasau ele esya yaanisuweliwa okhala PALAVRA, nto anna yaahirumeela materiyaale olipa a estasau ele, yaawo yaarowa okweiheryaka wiira masu a Muluku aphiyeke mapuro oorakamela ohela muhina onorti wa oCanada.

Mwaakha wa 1925 Yehova aahaakhaliherya anna ale wiiwexexa ekapiitulu 12 ya Wiisupulula. Mwaha wa wiiwexexa nno wa niinaano wanwiiriha atthu akina ohiya omurumeela Yehova. Nave atthu akina yaamuhakalala otthokiheriwa oratteene ni wiiwexexa etthu ele yaarowa wiiraneya wiirimu, ni etthu yaarowa owiiraneela arumeyi a Muluku valaponi va.