MWAHA ONITHOKORERIWA 41
NSIPO 13 Kristu, Ntakiheryo Nahu
Nniixutta Exeeni ni Mahiku 40 Ookiserya Yesu Aari Awe Valaponi?
“Awo yaahinweha mahiku 40, ni aanilavula myaha sa Omwene wa Muluku”. — MIT. 1:3.
ELE NINROWA AHU WIIXUTTA
Mwaha ola, nnoothokorerya etthu nnixutta ahu ni mahiku 40 ookiserya Yesu aari awe valaponi.
1-2. Exeeni yaawiiranenle awiixutti ale anli okathi yeetta aya arowaka muttetthe wa Emawuusi?
NIHIKU 16 a Nisani mwaakha wa 33 Nuumala Kristu Orwa, awiixutti awe yaahiriipiwa murima ni yaanoova. Awiixutti anli, yaahikhuma oYerusalemu arowaka muttetthe wiitthaniwa Emawuusi, weiwo waarakamelanne etthu yoowiiraka ikiloomo 11. Awiixutti ale yaahikhulumuwa okhala wiira Yesu yaamutthara aya aahiiviwa. Awo yaalipelela wiira Mesiya ampaka itthu sootikiniha para ayuda, moovirikana ni vo, aahiiviwa. Masi voohipisa, yaahiiraneya etthu yahaalipelela aya.
2 Yeettaka siisale, Mulopwana mmosa yahaamusuwela aya, aahiwaattamela oneetta vamosa naawo. Awo yaaniikhupanyeerya elavulaka itthu sootheene saamwiiranenle Yesu. Mulopwana ole yahaamusuwela aya aahipacerya olavula itthu saarowa oturuka okumi aya. Orumeelaka “soolempwa sa Moise ni sa maprofeta otheene”, owo onnitthokiherya nthowa naya Mesiya ahaawale awe ni okhwa. Nuumala alopwana ale ophiya muttetthe wa Emawuusi, yaahisuwela wiira mulopwana ole aari Yesu yoowo Muluku aamuhihimunxe awe! Niireke munniwerya wuupuwelela ohakalala yaarina aya alopwana ale, nuumala osuwela wiira Mesiya aari mukumi? — Luka 24:13-35.
3-4. a) Yesu aakhalihenrye sai awiixutti awe, ni exeeni yaakhumelenle? (Miteko 1:3) b) Mwaha ola ninrowa wiixutta exeeni?
3 Yesu aahiixooniherya wa awiixutti awe ikwaha sinceene, mahiku ale 40 ookiserya aari awe valaponi. (Musome Miteko 1:3.) Owo aahaalipiha awiixutti awe yaariipiwe murima ni yoova. Awo yaahihakalala ni yaari oolikana ene wiira yalaleye ni wiixuttiha ihapari sooreera sa Omwene. a
4 Nnoowerya ottottela mureerelo ni itthu Yesu aapanke awe okathi ole. Mwaha ola, nnoothokorerya moota Yesu aarumenle awe okathi owo wiira (1) aalipihe awiixutti awe, (2) aakhaliherya wiiwexexa Nuulumo na Muluku ni (3) owiixuttiha wiira akhapeleleke miritti. Khula eponto, ninrowa othokoreryaka moota woomutakiha Yesu.
MWAALIPIHEKE ATTHU AKINA
5. Xeeni awiixutti a Yesu yaapirisari aya olipihiwa?
5 Awiixutti a Yesu, yaanipirisari olipihiwa. Mwaha wa xeeni? Akina yaahihiya ipa saya, yaahaahiya amusi ni miteko saya wiira amutthare Yesu. (Math. 19:27) Nave akina yaahithokoreriwa moohixariya mwaha wa othanla omutthara Yesu. (Yoh. 9:22) Awo yaahipaka marukunuxo mookumini mwaya, okhala wiira yaanisuwela wiira Yesu aari Mesiya aaleiherinwe. (Math. 16:16) Nuumala Yesu okhwa, awiixutti ale yaahiriipiwa murima ni okhulumuwa okhala wiira khiyaasuwela etthu yaarowa owiiraneela.
6. Etthu xeeni Yesu aapanke awe nuumala ohihimuxiwa?
6 Yesu, aanisuwela wiira awiixutti awe, yamuriipiwa murima nuumala yena okhwa. Nave aanisuwela wiira khiyaariipinwe murima, mwaha woohikhalana waamini woolipa. Nuumala ohihimuxiwa, owo aahipacerya waalipiha awiixutti awe. Mwa ntakiheryo, aahimukhumelela Maria Madalena okathi anla awe opuro aavithiwa awe Yesu. (Yoh. 20:11, 16) Nave-tho aahaakhumelela awiixutti anli yaawo yeetta arowaka muttetthe wa Emawuusi. Nave-tho, aahimukhumelela murummwa Pedru. (Luka 24:34) Ntakiheryo na Yesu ninnixuttiha exeeni? Nrowe nthokorerye etthu yiiraneyale nuumala Yesu omukhumelela Maria Madalena.
7. Moovarihana ni Yohani 20:11-16, Yesu anwehe Maria opakaka exeeni ni ampakenle exeeni? (Nwehe eteseenyo.)
7 Mmusome Yohani 20:11-16. Voosiisu ene nihiku 16 na Nisani, athiyana oororomeleya yaahirowa omahiye opuro Yesu aavithiwa awe. (Luka 24:1, 10) Nrowe nthokorerye yoowiiraneya ya Maria Madalena. Nuumala Maria ophiya omahiye, owo khaaphwanyale murutthu wa Yesu. Moottharelana, Maria aahirowa omuleela Pedru ni Yohani. Ari ene ni Maria, yaahitthimakela opuro Yesu aavithiwa awe. Nuumala oweha wiira murutthu wa Yesu khiwaakhanle, awo yaahitthikela owaani. Masi Maria aahanle omahiye iwe anlaka. Nave owo, khaasuwela wiira Yesu iira onwehaka. Okathi Maria anla awe, Yesu aahiixooniherya wa yena ni aahimpakela etthu yooreera, eyo piiyo, ommaaliha. Yesu aahilavula ni Maria Madalena ni omuleela wiira aaleele awiixutti akina wiira yena oohihimuxiwa. — Yoh. 20:17, 18.
Nnoowerya omutakiha Yesu niwehaka itthu sinaaxankiha anna ni wiimananiha wiira naalipihe (Nwehe ettima 7)
8. Ninrowa omutakiha sai Yesu?
8 Ninrowa omutakiha sai Yesu? Nnoomutakiha Yesu, akhala wiira nnimwaalipihaka atthu akina wiira ahihiye omurumeela Yehova. Ntoko Yesu, nihaana osuwela itthu sinaaxankiha anna ni arokora, wiihela nipuro naya ni waamaaliha. Nrowe nithokorerye yoowiiraneya ya murokora oniitthaniwa Jocelyn, yoowo muhima awe okhwiiye mwaha wa asitenti. Owo onihimya so: “Miyo kaaniriipiwa murima okathi wootheene”. Nto munna mmosa ni mwaarawe, nuumala osuwela etthu yaamwiiranenle Jocelyn, yaahimulattula owannyeya. Awo yaahinwiriyana ni ephoole ni yaahimuleela wiira Yehova aanimphenta. Jocelyn onihimya-tho so: “Miyo kaahixanka kihinoona yoopaka. Masi emusi ele, yaahikikhaliherya ohihiya omurumeela Yehova”. Nave-tho, hiyo nnoowerya waalipiha atthu akina, naawiriyanaka ni ephoole okathi annileela aya mixankiho saya. Niira siiso, nnoowerya waakhaliherya ohihiya omurumeela Yehova. — aRom. 12:15.
MWAAKHALIHERYEKE ATTHU AKINA WIIWEXEXA NUULUMO NA MULUKU
9. Muxankiho xeeni waaphwannye awiixutti a Yesu ni owo aakhalihenrye sai?
9 Nuumala wiiwa Nuulumo na Muluku, awiixutti a Yesu yaahaamini ni weettela mookumini mwaya. (Yoh. 17:6) Masi yaahitikinihiwa nuumala onweha Yesu okhwaaka vamwirini va nihaaxeryo. Yesu aanisuwela wiira awiixutti awe yaanimwaamini ni yaanimphenta. Masi aahoona wiira etthu yahaleela, waari wiiwexexa soolempwa. (Luka 9:44, 45; Yoh. 20:9) Nto, owo aahaakhaliherya wiiwexexa ele soolempwa sinihimya aya. Nwehe moota Yesu aapanke awe eyo vaavo aakhumelenle awe awiixutti anli yaarowa muttetthe wa Emawuusi.
10. Moota xeeni Yesu aakhalihenrye awe awiixutti awe wiiwexexa iprofesia saamuhimya yena? (Luka 24:18-27)
10 Mmusome Luka 24:18-27. Nwehe wiira okathi Yesu aakumanne awe ni awiixutti ale, owo khaaisuwanyeihale. Ohiya-vo, owo aapakenle makoho. Mwaha wa xeeni? Woonasa wene, Yesu aaphavela osuwela etthu yuupuwela aya ni ele yaari vamurimani vaya. Ni yaahipaka eyo. Awo yaamulenle wiira yuupuwela wiira Yesu aarowa okhala Mwene ni anwoopola mmatatani mwa aRoma. Nuumala omutthokiherya muxankiho aya, Yesu aahirumeela soolempwa wiira aakhaliherye alopwana ale wiiwexexa ele yiiraneyale. b Nuuvira okathi, Yesu aahaakhumelela awiixutti akina ohiyu onaatthokiherya iprofesia saamuhimya yena. (Luka 24:33-48) Yoowiiraneya ela enniixuttiha exeeni?
11-12. a) Nniixutta exeeni ni moota Yesu aatthokiherya awe atthu Soolempwa? (Nwehe ifootu.) b) Nortey aakhaliheriwe sai ni munna aamusomiha Biibiliya?
11 Ninrowa omutakiha sai Yesu? Yoopacerya, okathi nnaasomiha ahu anaxikola ahu a Biibiliya, nihaana opaka makoho aniwiiriha ohimya ele anuupuwela aya ni eri vamurimani vaya. (Mir. 20:5) Nuumala osuwela mixankiho saya, mwaakhaliheryeke moota woophwanya soolepa sa mbiibiliyani sinrowa waakhaliherya. Masi muhaaleeleke etthu ekhanle aya oopaka. Ohiya-vo, mwaakhaliheryeke wuupuwelela ni weettela malakiheryo a mbiibiliyani. Nrowe nthokorerye yoowiiraneya ya munna onikhala oGana oniitthaniwa Nortey.
12 Okathi munna Nortey aarina awe iyaakha 16, owo aahipacerya omusoma Biibiliya, nto amusi awe yaahipacerya omulupattha. Exeeni yaamukhalihenrye? Mulipa aamusomiha Biibiliya aahimooniherya Matheyo ekapiitulu 10 ni aahimutthokiherya wiira makristau eekeekhai, yaamurowa olupatthiwaka. Nortey, onihimya so: “Okathi kaapacenrye aka olupatthiwa, kaahikupali wiira koophwanya ekeekhai”. Nave-tho, munna aamusomiha aahimooniherya Matheyo 10:16, yeeyo yaamukhalihenrye waatthokiherya amusi awe sookupali sawe mwa nttittimiho. Nuumala opatisiwa, Nortey aaphavela okhala pioneero masi paapa awe aaphavela wiira yena orowe wuniversidade. Ohiya omuleela etthu yoopaka, munna ole aamusomiha Biibiliya, aahipaka makoho wiira omukhaliherye wuupuwelela soolepa sa mbiibiliyani ni opaka yoothanla yooloka. Exeeni yaakhumelenle? Nortey aahithanla okela muteko wa okathi wootheene. Paapa awe aahimoomola owaani. Nortey oonenle sai itthu iye sootheene saamwiiranenle? Owo onihimya so: “Kinniweha wiira koopaka yoothanla yooloka”. Okathi nnaatumererya ahu atthu akina wuupuwelela Soolempwa, ninnaakhaliherya okhalana wataana wooloka ni Yehova. — aEef. 3:16-19.
Mmutakiheke Yesu mwaakhaliheryaka atthu akina wiiwexexa Nuulumo na Muluku (Nwehe ettima 11) e
NWIIXUTTIHEKE ANNA WIIRA AKHALE “SOOVAHA”
13. Yesu aapanke awe exeeni, wiira muteko woolaleerya ohitthikele ottuli nuumala orowa wiirimu? (aEefeso 4:8)
13 Okathi aari awe valaponi, Yesu aahivara oratteene muteko Tiithi awe aamurumme awe. (Yoh. 17:4) Yesu khuupuwela wiira yena paahi taawerya ovara muteko wa Yehova. Iyaakha iye tthaaru nnimeya sa muteko awe woolaleerya, owo aahiwiixuttiha atthu akina ovara saana muteko ole. Yesu anaaroromela awiixutti awe. Owo aahaavaha muritti wa olaleya ihapari sooreera ni waakhapelela arumeyi a Muluku. Awiixutti akina yaahoolela muteko owo, woonasa wene khiyaaphiyerinhe iyaakha 30. (Mmusome aEefeso 4:8.) Awiixutti ale, yaahivara muteko munceene ni Yesu ni yaari oororomeleya. Masi ohinatthi orowa wiirimu, aahiwiixuttiha-tho wiira akhale “soovaha”. Yesu aawiixuttihale sai?
14. Etthu xeeni Yesu aapanke awe, wiira owiixuttihe atthareli awe mahiku ale 40 ookiserya aari awe valaponi? (Nwehe eteseenyo.)
14 Yesu aahaavaha miruku awiixutti awe masi mwa enamuna yoophenta. Mwa ntakiheryo, yena aahiweha wiira awiixutti awe akina, khiyaakupali wiira yena aahikhwa ni ohihimuxiwa. Ti nthowa naya aakhalihenrye awe osuwela ekeekhai aavahaka miruku. (Luka 24:25-27; Yoh. 20:27) Owo aahaaleela wiira yaahaana okhalela nthiti waakhapelela arumeyi a Muluku, ohiya wiithukumanyerya mihakhu. (Yoh. 21:15) Owo aahiwuupuxerya wiira, ahilikanyiheke muteko aninvarela aya Muluku ni ole atthu akina anivara aya. (Yoh. 21:20-22) Aahaakhaliherya oturuka moonelo woohiloka yaarina aya voohimya sa Omwene, ni yaahaana oluttuweliwa olaleya ihapari sooreera. (Mit. 1:6-8) Axitokweene aniixutta exeeni ni ntakiheryo na Yesu?
Mmutakiheke Yesu nwiixuttihaka alopwana okhapelela muloko (Nwehe ettima 14)
15-16. a) Axitokweene anrowa omutakiha sai Yesu? Mutthokiherye. b) Patrick attottenle sai mureerelo miruku aavahiwe awe?
15 Axitokweene anrowa omutakiha sai Yesu? Axitokweene ahaana owiixuttiha anna ohela muhina amiravo ovara saana miteko sa mmulokoni. c Axitokweene khanlipelela wiira ale aniwiixuttiha aya, khanrowa ofalyariki. Masi ahaana waavaha miruku wiira yiixutteke okhala oowiiyeviha, oororomeleya ni oowiivahererya wiira yaakhaliherye atthu akina. — 1Tim. 3:1; 2Tim. 2:2; 1Ped. 5:5.
16 Nrowe nthokorerye moota munna oniitthaniwa Patrick, attottenle awe muraarelo miruku aavahiwe awe. Okathi aari awe mmiravo, khaasuwela olavula saana ni arokora. Masi mutokweene mmosa, aahoona wiira Patrick aahaana opaka marukunuxo. Owo aahinvaha miruku masi mwa enamuna yoophenta. Patrick, onihimya so: “Kinnihakalala vanceene mwaha wa munna ole okivaha miruku iye. Kaaniriipiwa murima okathi kaaweha aka atthu akina yaakhelaka iparakha seiye kaaphavela aka. Mutokweene ole, aahikikhaliherya okooniheryaka wiira kaahaana okhala oowiiyeviha ni waaphenta anna ni arokora ohiya owehexexa iparakha kaaphavela aka”. Moohakalaliha, nuumala Patrick ophiyeriha iyaakha 23, aahithanliwa wiira okhale mutokweene. — Mir. 27:9.
17. Yesu oonihenrye sai wiira anaaroromela awiixutti awe?
17 Ohiya paahi olaleerya, Yesu aahaavaha awiixutti awe muteko wa wiixuttiha. (Math. 28:20) Awiixutti yuupuwela wiira khiyaarowa owerya ovara muteko ole Yesu aarumme awe. Masi Yesu aanisuwela wiira awo yanwerya ovara muteko ole. Ti maana aya aahimmye awe wiira: “Siisaale Tiithi okirumme awe, nave miyo kinnoorumani nyuwo”. — Yoh. 20:21.
18. Axitokweene anrowa omutakiha sai Yesu?
18 Axitokweene anrowa omutakiha sai Yesu? Axitokweene a miruku annaavaha miritti atthu akina. (aFil. 2:19-22) Mwa ntakiheryo, axitokweene pooti waavekela amiravo orattela Empa ya Omwene ni olokiherya. Axitokweene pooti onvaha munna muritti mmosa, omwiixuttiha moota woovara ni omuroromela wiira owo onoovara saana muteko owo. Munna mmosa oniitthaniwa Matthew, yoowo othanliwe niinaano ntoko mutokweene, onnixukhurela mwaha wa axitokweene omwiixuttiha ni omuroromela wiira anvaraka saana miteko iyo. Owo onihimya so: “Okathi kahaavaraka saana miteko iyo, awo yaanikikhaliherya oweha mpantta kaareerela aka olokiherya wiira kihitthikele-tho ofalyari”. d
19. Exeeni nilakenle ahu opaka?
19 Yesu aahirumeela mahiku ale 40 ookiserya aari awe valaponi, wiira aalipihe ni owiixuttihe atthu akina moota woovara saana miteko. Tthiri noolakela otthara ntakiheryo na Yesu. (1Ped. 2:21) Owo onoonikhaliherya opaka eyo. Ohiya-vo, ooleiherya wiira ‘ori ni hiyo mahiku otheene mpakha olumwenku ola omala’. — Math. 28:20.
NSIPO 15 Munvuwihe Kristu: Mwaana Oopacerya a Yehova
a Ivangelyo sinnooniherya wiira Yesu aahaakhumelela awiixutti awe ikwaha sinceene nuumala yena ohihimuxiwa. Owo aahimukhumelela Maria Madalena. (Yoh. 20:11-18) Aahaakhumelela athiyana akina. (Math. 28:8-10; Luka 24:8-11); Aahaakhumelela awiixutti anli. (Luka 24:13-15) Aahimukhumelela Pedru. (Luka 24:34) Aahaakhumelela arummwa masi Tome khaakhanle. (Yoh. 20:19-24) Aahaakhumelela-tho arummwa omuhela muhina Tome. (Yoh. 20:26) Aahaakhumelela awiixutti 7. (Yoh. 21:1, 2) Aahaakhumelela-tho awiixutti anivikana 500. (Math. 28:16; 1aKor. 15:6); Aahimukhumelela muhimaawe Yakobo. (1aKor. 15:7) Aahaakhumelela arummwa awe ootheene. (Mit. 1:4) Ni aahaakhumelela arummwa waattamela oBethania. (Luka 24:50-52) Pooti wiira Yesu aahaakhumelela awiixutti awe ikwaha sikina, masi Biibiliya khonihimya. — Yoh. 21:25.
b Wiira nwehe iprofesia sinimuhimya Mesiya nwehe mwaha ori va jw.org oni: “Será que as profecias da Bíblia provam que Jesus era o Messias?”
c Axitokweene ari amiravo, pooti oothanliwa wiira akhale axitokweene a esirkwiitu hata arina ene iyaakha 25 aahiiso 30. Masi wanipacerya, owo ohaana oviriha iyaakha sinceene orumeelaka ntoko mutokweene.
d Wiira nwehe malakiheryo a moota woomukhaliherya munna ori mmiravo okhalana miritti mmulokoni, munwehe Owehaweha a Agosto a 2018 ipaax. 11-12, itti. 15-17, ni Sentinela 15 a Abril 2015, ipaax. 3-13.
e OTTHOKIHERIWA WA EFOOTU: Naxikola a Biibiliya mmosa nuumala wiixutta ele Biibiliya onihimya awe onnilakela oriha itthu sootheene sinivarihana ni Natali.
