1-2. (a) Xeeni Armagedoni ori awe ihapari sooreera? (b) Mwaha ola, ninrowa waakhula makoho xeeni?

“ARMAGEDONI”. Vaavo atthu akina aniiwa aya nuulumo nno, anuupuwela ekhotto ya ibomba wala ehasara ya ephattu. Masi Biibiliya onnooniherya wira Armagedoni ihapari sooreera nikhanle ahu oolipelela moohakalala! (Wis. 1:3) Musuweleke wira ekhotto ya Armagedoni enrwa owoopola apinaatamu, ohiya waapwetexa! Moota xeeni?

² Biibiliya onnooniherya wira ekhotto ya Armagedoni enrowa owoopola apinaatamu ni opwetexa iguvernu sotheene. Ekhotto eyo enrowa owoopola apinaatamu yaapwetexaka atakhali ni waahiya atthu ooreera murima. Nave enrowa owoopola apinaatamu vaavo enrowa aya waapwetexa ale anihonona elapo. (Wis. 11:18) Wira niiwexexe saana iponto iyo, mwaha ola ninrowa waakhula makoho maxexe. Makoho ene taala: Armagedoni exeeni? Itthu xeeni sinrowa okhumelela ohinatthi Armagedoni? Nihaana opaka exeeni wira noopowe okathi owo? Ninrowa ovikaniha sai ororomeleya vaavo Armagedoni onrowa awe waattamela?

3. (a) Nuulumo noowi “Harmagedoni” nintaphulela exeeni? (b) Moovarihana ni Wisupulula 16:14, 16, xeeni ninhimya ahu wira Armagedoni nipuro na nthoonyeryo?

³ Mmusome Wisupulula 16:14, 16. Nuulumo noowi “Harmagedoni” nimphwanyaneya ekwaha emosa paahi mBiibiliyani. Nuulumo nna ninkhuma elavulelo ya eHeeberi nintaphulela Mwaako wa oMegido. (Wis. 16:16) OMegido yaari epooma ya wIsarayeli a khalai. (Yox. 17:11) Masi Armagedoni khahiyo nsina na opuro onooneya ori valaponi. Olavula mooluluwanya, Armagedoni onihimmwa mukhalelo wala okathi “mamwene a mulaponi mothene” anrowa aya othukumanyiwa wira awane ekhotto ni Yehova. (Wis. 16:14) Nto, mwaha ola vaavo ninrowa ahu orumeelaka nuulumo noowi ‘Harmagedoni’ ninhimya ekhotto enrowa wiiraneya nuumala othukumanyiwa mamwene a mulaponi motheene. Masi ninsuwela sai wira Armagedoni nipuro na nthoonyeryo? Yoopacerya, okhala wira khokhanle mwaako  wa oMegido onooneya. Ya nenli, mwaha woowi muttetthe wa oMegido nipuro naamukhaani nahaarowa aya ophiyerya “mamwene a mulaponi mothene”, anakhotto aya ni ikapwitthi saya. Ya neeraru, ntoko ninrowa ahu woona muhoolo wa mwaha ola, ekhotto ya Armagedoni enrowa opacerya vaavo “mamwene” a elapo ela anrowa aya waatuphela arumeyi a Muluku, yaawo ankhala elapo yotheene.

4. Xeeni ekhotto yookiserya ya Muluku envarihana aya ni oMegido?

⁴ Xeeni Yehova ovahaka nsina na oMegido ekhotto awe yuulupale ni yookiserya? Okhala wira okathi wa Biibiliya, oMegido ni muttetthe wowaattamela Ekhato ya oYizireyeli naari nipuro naawaniwa ekhotto. Okathi mukina Yehova aanaakhaliherya arumeyi awe oxintta ekhotto opuro ole. Mwa ntakiheryo, “màsi òMegido”, Muluku aahimukhaliherya Mukhulupale a aIsarayeli Baraki waaxintta aKaanani yaawo yaahooleliwa ni Sisera. Tthiri Baraki ni profeta Deebora yaahimuxukhurela vanceene Yehova mwaha wowaakhaliherya mwa mwiiriirya. Awo yiipale so: “Wirimu itheneri sahiwana ekhotto: osulusulu itheneri sahinvirikanya Sisera. Muró Kixoni wahakhupa ni màsi aya”.​—Makh. 5:19-21.

5. Ovirikana xeeni okhanle eriyari ya ekhotto ya Armagedoni ni ekhotto yaawaniwe ni Baraki?

⁵ Baraki ni Deebora yaahimaliha nsipo naya ni moolumo ala: “Siso ekhweke awanan’inyu othene nyuwo, Apwiya. Vano apatthan’inyu ekhalé ntoko nsuwa, ekhumaka ni warya waya wothene”. (Makh. 5:31) Nave okathi wa ekhotto ya Armagedoni awanani a Muluku anoopweteya, masi atthu otheene animphenta Muluku animoopowa. Musuweleke wira wookhala ovirikana wuulupale ikhotto iya piili. Okathi wa Armagedoni atthu a Muluku khanrowa owana ekhotto. Nave khanrowa okuxa ikapwitthi sa ekhotto! Maana anrowa ‘omuroromela [Muluku ni okhala] olipa’ asuwelaka wira Yehova ni anakhotto awe a wiirimu anrowa owoopola.​—Yes. 30:15; Wis. 19:11-15.

6. Inamuna xeeni Yehova onrowa awe orumeela wira aapwetexe awanani awe okathi wa Armagedoni?

⁶ Muluku onrowa waaxintta sai awanani awe okathi wa ekhotto ya Armagedoni? Owo onrowa orumeela inamuna soovirikana. Mwa ntakiheryo, Yehova pooti orumeela itetere, maralala ni waarya ontutha. (Yobi 38:22, 23; Ezek. 38:19-22) Nave pooti owiiriha awanani awe owana yaaworu. (2 Wah. 20:17, 22, 23) Yehova pooti oruma malaikha awe oowerya wira yaapwetexe atakhali. (Yes. 37:36) Moohicikha enamuna onrowa awe orumeela, musuweleke wira Yehova onooxintta ekhotto eyo moomalela. Onimwaapwetexa apinaatamu otheene ahinimwiiwelela. Nto, anaxariya otheene animoopowa.​—Mir. 3:25, 26.

7-8. (a) Moovarihana ni 1 aTesalonika 5:1-6, makhulupale a mulaponi anrowa olaleya exeeni? (b) Xeeni olaleiwa iwo onrowa aya okhala wootakhala?

⁷ Onrowa olaleiwaka wira “nokhalana murettele” ni ovareleleya nihinatthi ophiya nihiku na Yehova wala “orwa w’Apwiya”. (Mmusome 1 aTesalonika 5:1-6.) Nuulumo noowi “orwa w’Apwiya” nirumeeliwe 1 aTesalonika 5:2 anihimmwa maxakha maalupale. (Wis. 7:14) Ninrowa osuwela sai okathi maxakha maalupale anrowa aya opacerya? Biibiliya onihimya wira onrowa okhala olaleiwa ohiniiraneye. Nto eyo enrowa okhala ekanyeryo enooniherya wira maxakha maalupale ahanle opacerya.

⁸ Okathi owo onrowa olaleiwaka wira “nokhalana murettele” ni ovareleleya. Xeeni makhulupale a mulaponi anrowa aya opaka eyo? Niireke ahooleli a itiini animwiirela mpantta olaleya murettele owo? Woonasa wene animwiirela mpantta. Masi olaleiwa wa murettele ni ovareleleya onrowa okhala wootha wuulupale wa minepa sootakhala. Nto wootha iwo onrowa okhala wootakhala, mwaha woowi atthu anceene anrowa wuupuwelaka wira aakhalana murettele ni ovareleleya, nto moohipisa akhumeleleke maxakha maalupale ahitonko waakhumelela apinaatamu. Tivonto Biibiliya  onihimya awe wira okathi ene yowo ‘onimwarwela opweteya nananoru ntoko ohawa wa muthiyana ohanle oyara’. Ankhi arumeyi a Yehova oororomeleya? Okhala wira khanrowa osuwela okathi maxakha maalupale anrowa aya opacerya, woonasa wene pooti oxanka, masi anrowa okhala oowiilokiherya ene.

9. Niireke Yehova onrowa opwetexa olumwenku wa Satana ekwaha emosa paahi? Mutthokiherye.

⁹ Okathi wa Nowe, Yehova aahipwetexa olumwenku ole wootakhala ekwaha emosa paahi. Masi opwetexiwa wa olumwenku wa Satana onrowa okhala ikwaha piili. Wanipacerya Yehova onrowa ompwetexa Babilonia Muulupale, yoowo onthoonyerya itiini sowootha sa olumwenku wotheene. Nuumala-vo, okathi wa Armagedoni, Yehova onrowa opwetexa olumwenku wa Satana ohela muhina ipoliitika, anakhotto ni olumwenku wa nakoso. Vano nrowe nithokorerye oratteene itthu iyo sinrowa wiiraneya.

10. Moovarihana ni Wisupulula 17:1, 6 ni 18:24, xeeni Yehova onrowa awe ompwetexa Babilonia Muulupale?

¹⁰ “Ohukhummwa wa muthiyana namararuwa”. (Mmusome Wisupulula 17:1, 6; 18:24.) Babilonia Muulupale onniwiiriha atthu anceene ohimuttittimiha Muluku. Owo onniixuttiha itthu sowoothiwa voohimya sa Yehova. Ntoko namararuwa, etiini yoowootha khenroromeleya wa Yehova mwaha woowi ennikhaliherya iguvernu ni epoliitika. Etiini yoowootha ennirumeela owerya waya wira ewiiyerye atthu musurukhu, owiiva atthu waahela muhina arumeyi oororomeleya a Muluku. (Wis. 19:2) Yehova onrowa ompwetexa sai Babilonia Muulupale?

11. “Nxeni noxerya” na “manyaka mulokó” ninrowa omwiiriha exeeni Babilonia Muulupale?

¹¹ Wira ompwetexe “muthiyana namararuwa” Yehova onrowa orumeela “manyaka mulokó” a “nxeni noxerya”. Nxeni nooxeerya ninthoonyerya Nações Unidas. Vano manyaka muloko antaphulela anamalamulela a epoliitika yaawo ammukhaliherya Nações Unidas. Okathi wooreerela, Muluku onrowa waarumeela anamalamulela ni Nações Unidas wira ampwetexe Babilonia Muulupale. Awo “anrowa omwakha sothene sirinawe, emuhiye ahiwanr’etthu” vaavo anrowa aya okuxa mihakhu sawe ni wooniherya itthu soohiloka ompaka awe. (Wis. 17:3, 16) Opwetexiwa wawe onrowa okhala wowaakuveya ntoko wiiraneyale “nihiku nimosá  pahi”. Nto atthu otheene anikhaliherya etiini yoowootha anrowa oxanka vanceene mwaha woowi Babilonia aahimya wira: “Kikilanthe va, ntoko pwiyamwene: miyo nkihiyó namukhweli, nkinrowa-tho ohawa!”​—Wis. 18:7, 8.

12. Yehova khonrowa oweemererya atthu opaka exeeni ni nthowa xeeni?

¹² Yehova khonrowa weemererya wira atthu awo yaapwetexe arumeyi awe oororomeleya. Awo anrowa ovuwihaka nsina na Muluku ni wiiwelela yooruma ya okhuma oBabilonia Muulupale. (Mit. 15:16, 17; Wis. 18:4) Nave okathi owo, arumeyi a Muluku anrowa wiimananiha vanceene waakhaliherya atthu akina okhuma etiini yoowootha. Nto arumeyi a Yehova khanrowa ophwanyiwa ni “ehukhumu” ya Babilonia Muulupale. Tthiri nnaamwi arumeyi a Yehova arowaka okhapeleliwa okathi Babilonia Muulupale onrowa awe opwetexiwa, waamini waya onrowa weehereriwa.

13. (a) Tani ori Gogi? (b) Moovarihana ni Ezekiyeli 38:2, 8, 9, okathi xeeni Gogi onrowa awe ophiya nipuro na nthoonyeryo na Armagedoni?

¹³ Otuphela wa Gogi. (Mmusome Ezekiyeli 38:2, 8, 9.) Nuumala itiini sotheene sowootha opwetexiwa, etiini emosa paahi tenrowa ohala valaponi. Awo anrowa okhala arumeyi a Yehova nto anrowa okhalaka ntoko mwiri ohanle mekhawe nuumala ovira ehasara yuulupale. Moohaanyiherya, okathi owo Satana onoonanariwa vanceene. Nto onimooniherya onanariwa wawe ni propaganda a minepa sootakhala onikumiheriwa ni moolumo ‘ònanara’. Propaganda owo ootakhala onoowiiriha atthu a maloko otheene waatuphela atthu a Muluku. (Wis. 16:13, 14) Otuphela iwo oniihaniwa Gogi a “elapo y’oMagogi”. Okathi maloko a atthu anrowa aya waatuphela atthu a Yehova, awo anrowa ophiya opuro wa nthoonyeryo oniihaniwa Armagedoni.​—Wis. 16:16.

14. Exeeni Gogi onrowa awe osuwela?

¹⁴ Okathi owo, Gogi onrowa ororomela “ikuru sinimala”, eyo piiyo, ikuru sa anakhotto awe. (2 Wah. 32:8) Hiyo ninrowa omuroromelaka Yehova Muluku ahu. Omuroromela Yehova onrowa okhalaka ntoko ololo vamaithoni va atthu akina. Mwaha wa xeeni? Mwaha woowi amuluku eethiru a Babilonia Muulupale khanrowa owerya owoopola atthu aya okathi anrowa aya opwetexiwa ni “nxeni” na “manyaka mulokó”! (Wis. 17:16) Nto Gogi onrowa wuupuwelaka wira vanookhweya waapwetexa atthu a Muluku. Gogi onrowa waatuphela arumeyi a Yehova, ntoko “meku  anikhunela elapo”. (Ezek. 38:16) Masi, okathi owo Gogi onimoona wira oomorela vantaphani. Ntoko siisaale okathi Farawo aari awe Ephareya Yooxeerya, Gogi onimoona wira oniwana ni mwaneene Yehova.​—Okhum. 14:1-4; Ezek. 38:3, 4, 18, 21-23.

15. Yesu onrowa opaka exeeni okathi wa ekhotto ya Armagedoni?

¹⁵ Kristu ni anakhotto awe a wiirimu onrowa waakhapelela atthu a Muluku, vaavo onrowa awe waapwetexa moomalela anakhotto a Gogi. (Wis. 19:11, 14, 15) Exeeni enrowa omwiiraneela Satana nwanani muulupale a Yehova, yoowo aawonke atthu wira yaatuphele atthu a Muluku mpakha owiiriha ophiya wArmagedoni? Yesu onrowa onvara ni omurihela munlittini noowiixa vamosa ni minepa sawe sootakhala, weiwo anrowa aya otthukweliwa iyaakha ekonto emosa [1.000].​—Wis. 20:1-3.

16. (a) Nnooniherya sai wira ninnimusuwela Muluku? (b) Okathi wa Armagedoni, exeeni enrowa owiiraneela atthu ale animusuwela Muluku?

¹⁶ Otheene ahu, akhale ale yiixuntte ekeekhai niinaano wala yiixuntte khalai, nnimoopowa okathi wa Armagedoni. Masi wira eyo yiiraneye, nihaana ‘omusuwela’ Muluku ni “wiwelela ehapari yorera ya Pwiy’ahu Yesu”. (2 aTes. 1:7-9) Hiyo ninnooniherya wira noomusuwela Muluku, vaavo ninsuwela ahu itthu sinimusivela ni malamulo awe. Nave ninnooniherya omusuwela wahu vaavo nimmwiiwelela ahu ni omukokhorela yoowo paahi. (1 Yoh. 2:3-5; 5:3) Akhala wira nnoomusuwela Muluku, nnookhalana eparakha ya ‘osuweliwa ni Muluku’, eyo piiyo, okhalana waataana wooloka ni Muluku! (1 aKor. 8:3) Nakhalana waataana wooloka ni Muluku, owo onoonoopola okathi wa Armagedoni.

17. Ontaphulela exeeni wiiwelela “ehapari yorera ya Pwiy’ahu Yesu”?

¹⁷ “Ehapari yorera ya Pwiy’ahu Yesu” enihela muhina ikeekhai sotheene Yesu iixuttinhe awe siri mBiibiliyani. Nto ninniiwelela ihapari sooreera vaavo ninvarihela ahu muteko mookumini mwahu. Mwa ntakiheryo, vaavo ninhela ahu nipuro noopacerya Omwene, ninnikhala moovarihana ni malamulo a xariya a Muluku ni waalaleerya atthu Omwene wa Muluku. (Math. 6:33; 24:14) Nave ninniiwelela ihapari sooreera naakhaliheryaka  axinnawe Kristu, yaawo anivara muteko wootepa otthuneya.​—Math. 25:31-40.

18. Axinnawe Kristu anrowa otthuvela sai “ipwittipwitthi sikina” mwaha woowaakhaliherya?

¹⁸ Moohipisa, arumeyi oowoottihiwa a Muluku anrowa otthuvela “ipwittipwitthi sikina” mwaha woowi sihaakhaliherya vanceene. (Yoh. 10:16) Moota xeeni? Ehinatthi opacerya ekhotto ya Armagedoni, maKristau otheene oowoottihiwa 144.000 anrowa wiiraka ahihimuxiwe ene ni ari ene wiirimu ntoko malaikha ahinikhwa. Awo anrowa wiirela mpantta muttitthi wa anakhotto a wiirimu anrowa ompwetexa Gogi ni waakhapelela atthu a “muttittihi mulupale” yaawo animurumeela Yehova. (Wis. 2:26, 27; 7:9, 10) Moohaanyiherya, muttitthi muulupale onrowa otthapaka mwaha wowaakhaliherya arumeyi oowoottihiwa a Yehova okathi yaari aya valaponi!

19-20. Moohicikha mixankiho sahu, exeeni enrowa onikhaliherya ovikaniha ororomela vaavo onaattamela awe Armagedoni?

¹⁹ Mahiku ala ookiserya ni ooxankiha, arumeyi anceene a Yehova anneehereriwa. Hata vari siiso nnoowerya ovilela moohakalala. (Yak. 1:2-4) Etthu enrowa onikhaliherya vanceene ori ovikaniha ovilela ni ohihiya ovekela. (Luka 21:36) Ohiya ovekela paahi, nihaana omusoma Biibiliya khula nihiku ni wuupuwelela ele ninsoma ahu, ohela muhina iprofesia sinrowa wiiraneya moohipisa. (Esal. 77:13) Okathi omosaru, nihaana wiimananiha olaleerya. Niira siiso, waamini wahu onrowa okhala woolipa ni khaninliyala nlipelelo nahu na muhoolo!

²⁰ Nkahaya muupuwele moota onrowa aya okhala woohakalaliha okathi Babilonia onrowa awe opwetexiwa ni Armagedoni ovinre ene! Etthu yootepexa otthuneya tiila: wuupuwela vaavo atthu otheene anrowa aya ovuwihaka ni ottittimiha nsina na Muluku ni ehakhi awe ya olamulela! (Ezek. 38:23) Moohaanyiherya, atthu ale animusuwela Muluku, animwiiwelela Mwanawe ni anivilela mpakha wanikisa, annikupali wira Armagedoni ihapari sooreera.—Math. 24:13.