MWAHA ONITHOKORERIWA 38
“Mukirwele Miyo: Komumuliheni”
“Nyuwo othene mukhulumunwe, mulemeliwene muritti mulupale, mukirwele miyo: komumuliheni”.—MATH. 11:28.
NSIPO 17 “Kinnitthuna”
ELE NINROWA AHU WIIXUTTA *
1. Ntoko onooniherya awe Matheyo 11:28-30, Yesu aaleihenrye exeeni?
YESU aahileiherya etthu yoohakalaliha muttitthi ole wanwiriyana. Owo aahimmye so: “Mukirwele miyo: komumuliheni”. (Mmusome Matheyo 11:28-30.) Khahiyo wira aaroolavula paahi moolumo ale, masi aahikhala moovarihana ni moolumo awe. Mwa ntakiheryo, nkahaya muupuwele ele Yesu aamwiirinhe awe muthiyana aavirinhe iyaakha sinceene owereiwaka.
2. Yesu aamwiirinhe exeeni muthiyana aawereiwa?
2 Muthiyana ole aawereiwa khaarina nlipelelo. Owo aahaaphavelasa mameediku manceene uupuwelaka wira yaamumpenuxa. Owo aahiviriha iyaakha 12 owereiwaka ni khuuvo mutthu aawerya omukhaliherya wala ompenuxa. Moovarihana ni Nlamulo, muthiyana ole aari ni mwiikho. (Onam. 15:25) Nto aahiiwa olavuliwaka Yesu yoowo aawerya waapenuxa atthu yaawereiwa, vano aahirowa omwaavya Yesu. Nuumala omphwanya, muthiyana ole aahivara mukerekhere mwa nlaya nawe ni moohipisa aahipenuxiwa! Ohiya paahi ompenuxa muthiyana ole, Yesu aahipaka etthu ekina. Owo aahimuthokorerya moophenta ni mwa nttittimiho, nto muthiyana ole aahoona wira aahikhalana efaita ni aanittittimihiwa. Mwa ntakiheryo, olavulaka ni muthiyana ole, Yesu aahihimya wira “mwan’aka”, nuulumo nla nnooniherya ophenta ni nttittimiho. Tthiri, nuumala wiiwa moolumo ale, muthiyana ole aahihakalala ni olipa vanceene!—Luka 8:43-48.
3. Makoho xeeni ninrowa ahu waakhula mwaha ola?
3 Mooweha etthu yooloka muthiyana ole aapanke awe? Owo taapacenrye orowa wa Yesu. Etthu emosaru enniiraneya olelo-va. Hiyo nihaana wiimananiha orowa wa Yesu. Ekeekhai wira olelo-va Yesu khonaapenuxa atthu ale anirowa wa yena mwa mwiiriirya. Masi nlelo Yesu onnivikaniha onilattula oriki: “Mukirwele miyo: komumuliheni”. Mwaha ola, ninrowa waakhula makoho 5, makoho ene taala:
Nihaana opaka exeeni wira nrowe wa Yesu? Yesu aaphavela ohimya exeeni vaavo aahimmye awe wira “mwireye muritti aka”? Ntakiheryo na Yesu ninniixuttiha exeeni? Muteko Yesu onivanhe awe onnikurunuxa sai murima? Ninrowa ovikaniha sai omumulihiwa wala okurunuxiwa murima vaavo nniireya ahu muritti wa Yesu?“MUKIRWELE MIYO”
4-5. Mwa inamuna xeeni nikhanle ahu oorowa wa Yesu?
4 Enamuna emosa nikhanle ahu orowa wa Yesu, ori wiimananiha wiixutta itthu aahimmye awe ni aapanke awe. (Luka 1:1-4) Khuuvo mutthu mukina okhanle oonipakela eyo, nihaana opaka mmensihu nisomaka mBiibiliyani sowiiraneya sa okumi wa Yesu. Nave ninnooniherya wira noorowa wa Yesu vaavo nniivahererya ahu ni obatiziwa wira nikhale atthareli a Kristu.
5 Enamuna ekina nikhanle ahu oorowa wa Yesu ori waavekela nikhaliheryo axitokweene a mmulokoni. Yesu onnirumeela “sovaha sawe” sa atthu wira akhapeleleke ipwittipwitthi sawe. (aÉf. 4:7, 8, 11; Yoh. 21:16; 1 Ped. 5:1-3) Nihaana wiimananiha orowa ovekela nikhaliheryo naya. Nihilipeleleke wira axitokweene anooloha ele eri mmuupuweloni mwahu ni ennixankiha wira anikhaliherye. Nwehe ele yaamwiiranenle munna oniihaniwa Julian, owo onihimya so: “Kaahaana ohiya orumeela oBetheli mwaha woowi kanwereiwa. Nihiku nimosa mpatthani aka aahikileela wira vaamureerela waavekela axitokweene wira arwe akixukurye. Wanipacerya, kuupuwela wira khivaareerela oxukuriwa. Masi nuumala ovekela nikhaliheryo, kaahoona wira oxukuriwa iwe waari wootepa olipiha ni wookurunuxa murima kitonko aka waakhela”. Axitokweene oororomeleya ntoko ale yaamuxukunrye Julian pooti onikhaliherya waasuwela “ankhili a Kristu”, eyo piiyo, omananiha otakiha muupuwelo ni moonelo wa Kristu. (1 aKor. 2:16; 1 Ped. 2:21) Tthiri, eyo yoovaha yuulupale akhanle aya oonivaha.
“MWIREYE MURITTI AKA”
6. Yesu aaphavela ohimya exeeni ni moolumo oowi “mwireye muritti aka”?
6 Moolumo a Yesu oowi “mwireye muritti aka” pooti otaphulela wira “mweemererye okhulupale aka”. Nave pooti wira aaphavela ohimya wira “mukhale vathi va muritti aka wira otheene ahu nivareke muteko wa Yehova”. Masi mwa inamuna sotheene, wiireya muritti wa Yesu onnivarihana ni ovara muteko.
7. Moovarihana ni Matheyo 28:18-20, muteko xeeni nivahiwe ahu ni nikupaliki exeeni?
7 Ninniireya muritti wa Yesu vaavo nniivahererya ahu wa Yehova ni obatiziwa. Atthu otheene anoowerya opaka eyo, maana Yesu khonkhala-khala omukhoottaka mutthu oniphavela omurumeela Muluku ni murima wotheene. (Yoh. 6:37, 38) Nave atthareli otheene a Kristu aakhalana eparakha yoovara muteko, Yehova anvanhe awe Yesu wira ovareke. Nto nikupaliki ni murima wotheene wira mahiku otheene Yesu onookhala ni hiyo wira onikhaliherye ovara muteko nivahiwe ahu.—Mmusome Matheyo 28:18-20.
“MUKIHIYE” KIWIIXUTTIHENI
Mwaakurunuxeke murima atthu akina ntoko Yesu iira awe (Nwehe ittima 8-11) *
8-9. Xeeni atthu oowiiyeviha paahi aniphavela aya omwaattamela Yesu ni makoho xeeni ninreerela ahu wiikoha?
8 Atthu oowiiyeviha anniphavela omwaattamela wala okhalana waataana wooloka ni Yesu. (Math. 19:13, 14; Luka 7:37, 38) Mwaha wa xeeni? Mwaha woowi Yesu aahivirikana ni aFarisi. Ahooleli ale a etiini khiyaathokorerya saana atthu ni yaari oowiixinnuwiha. (Math. 12:9-14) Masi Yesu aari mutthu oophenta ni oowiiyeviha. Moovirikana ni Yesu, aFarisi yaaphavela ovuwihiwaka ni atthu otheene ni yaaniixinnuwiha mwaha wowooniwaka okhala atthu ootthuneya. Yesu aahimmye wira khahiyo vooloka okhalana muupuwelo owo. Nto aahiwiixuttiha atthareli awe okhala oowiiyeviha ni waarumeela atthu akina. (Math. 23:2, 6-11) AFarisi yaaphavela wira yiiweleliweke mwaha woowooviwa. (Yoh. 9:13, 22) Yesu aanaakurunuxa murima atthu moophenta ni moolumo ooreera.
9 Iyo itthu nikhanle ahu oowiixutta ni ntakiheryo na Yesu. Mwiikoheke so: ‘Kiireke atthu akina annikoona okhala mutthu ooreera murima ni oowiiyeviha? Kiireke kinnivara miteko sihinooneliwa vatthu wira kaakhaliherye atthu akina? Kiireke kinnaareerela murima atthu akina?’
10. Exeeni Yesu aakumiherya awe eriyari ya atthu ale aavarana awe muteko?
10 Yesu aanikumiherya murettele eriyari ya atthu ale aavarana awe muteko ni aanisiveliwa vanceene owiixuttiha. (Luka 10:1, 19-21) Owo aanaatumererya awiixutti awe opaka makoho ni vaanimusivela owiriyana moonelo aya. (Math. 16:13-16) Ntoko siisaale mwiri waaliwe nipuro nooloka oninnuwa awe saana, awiixutti yaahikhalana mapuro ooloka wira yinnuwe momunepani. Awo yaanivaha ephoole itthu Yesu aawiixuttiha awe, mwaha woopaka eyo awo yaahikumiherya mihokorokho, niire so, miteko sooloka.
Mukhaleke mutthu ookhweya olavulana ni oopatthaneya
Muluttuweliweke
Mwiiyeviheke ni mwiimananiheke ovara muteko *
11. Otheene ahu nihaana wiikoha exeeni?
11 Akhala wira moovahiwa eparakha ya waahoolela atthu akina, mwiikoheke so: ‘Kinikumiherya exeeni nipuro kinvaraka muteko wala owaani? Kiireke kinnikumiherya murettele? Kiireke kinnaatumererya atthu akina opaka makoho? Kiireke kinniwiriyana moonelo wa atthu akina?’ Moohaanyiherya, khuuvo mutthu oniphavela okhala ntoko aFarisi, yaawo yoona ntoko wira yanveehiwa vaavo atthu akina yaakoha aya etthu. Nave yaanimulupattha khula mutthu aavaha moonelo woovirikana ni wawaya.—Mar. 3:1-6; Yoh. 9:29-34.
“MUNOPHWANYA MURETTELE”
12-14. Xeeni muteko Yesu onivanhe awe ori awe woomaaliha?
12 Hiyo pooti ohimya wira muteko Yesu onivanhe awe onniniphwanyiha murettele wala onninimaaliha. Moota xeeni? Aakhala mathowa manceene anniiriha ohimya eyo, masi nrowe niwehe mathowa vakhaani.
13 Nookhalana muhooleli oolokexa. Nnaamwi Yehova ori ene a vasuluxa, owo khahiyo xeefi ootakhala murima wala oohixukhuru. Yehova onnivaha efaita muteko ninvara ahu. (aHéb. 6:10) Owo onninivaha ikuru wira niwerye ovara saana muteko onivanhe awe. (2 aKor. 4:7; aGal. 6:5) Mwene ahu Yesu Kristu onninivaha ntakiheryo nooloka otthara. (Yoh. 13:15) Nave axitokweene yaawo annihoolela anniimananiha omutakiha “makampusi mulupale” Yesu. (aHéb. 13:20; 1 Ped. 5:2) Wira aniixuttihe ni onikhapelela, axitokweene anniimananiha okhala ooreera murima, oolipa murima ni oolipiha.
14 Nookhalana apatthani ooloka. Khiivo egrupu erina apatthani ooloka ni muteko woohakalaliha onivikana hiyo. Nkahaya muupuwele ela: Hiyo nookhalana eparakha yoovara muteko ni atthu arina mweettelo wooloka ni ahiniixoona okhala atthu oolokexa waavikana atthu akina. Hata asuwelaka itthu sinceene, awo toowiiyeviha. Nave khannithokorerya okhala atthu ninvarana ahu muteko paahi, masi apatthani ahu eekeekhai. Tthiri oniphenta waya ti wuulupale mpakha owiiriha oleva okumi aya vaareerelaka wira anikhaliherye!
15. Nnoonela sai muteko nivahiwe ahu wira nivareke?
15 Nookhalana muteko wooloka. Ninniwiixuttiha atthu ikeekhai voohimya sa Yehova. Nave ninnuupulula sowootha sa Diabo. (Yoh. 8:44) Musuweleke wira Satana onnaahasula atthu aalemelihaka ni miritti ahinwerya aya oteexa. Mwa ntakiheryo, owo onniimananiha onikupaliha wira Yehova khonrowa onilevelela itampi sahu ni wuupuwelaka wira khanimphwanela ophentiwa ni Muluku. Tthiri iwo wootha wootakhala ni muritti woolemela ohinweryaneya oteexiwa! Vaavo ninrowa ahu wa Kristu, ninnileveleliwa itampi sahu. Eyo enooniherya wira Yehova onniniphenta vanceene. (aRom. 8:32, 38, 39) Moohaanyiherya, eparakha yuulupale waakhaliherya atthu omuroromela Yehova ni okhalana ekumi yooloka!
NVIKANIHE OKURUNUXIWA MURIMA NI MURITTI WA YESU
16. Ovirikana xeeni okhanle eriyari ya muritti Yesu onnivekela awe oteexa ni miritti ninteexa ahu khula nihiku?
16 Muritti Yesu onnivekela awe oteexa woovirikana ni miritti ninteexa ahu khula nihiku. Mwa ntakiheryo, atthu anceene annikhuma omutekoni ohiya paahi aakhulumunwe ene masi anyoonyiwe ene. Moovirikana ni miteko iyo, vaavo ninvara ahu muteko wa Yehova ni Kristu, ninnihakalala vanceene. Nuumala ovara muteko nihiku notheene, woonasa wene ninnikhulumuwa vanceene ni ninniimananiha orowela mithukumano ohiyu ene yoowo. Okathi ninhokolowa ahu omuthukumanoni, ninkhala oohakalala ni ninnikhalana ikuru sinceene. Etthu emosaru enniiraneya vaavo ninrowa ahu olaleerya ni opaka yoosoma ahu ya Biibiliya. Okathi owo mireerelo nimphwanya ahu sinnivikana ikuru ni okathi ninviriha ahu!
17. Nihaana osuwela exeeni nto ephoole xeeni ninreerela ahu okhalana?
17 Ekeekhai wira khula mutthu ookhalana ikuru okhanle awe oorumeela. Nto nihaana okhalana ephoole ni miritti nimphavela ahu oteexa. Mwa ntakiheryo, naahiivahe ephoole pooti orumeela ikuru sinceene niphavelasaka mihakhu paahi. Ekwaha emosa, mmiravo thaaciri aahimukoha Yesu wira: “Kìreke exeni wira kiphwanyé ekumi yohimala?” Mmiravo ole aaniiwelela Nlamulo. Woonasa wene, aari mutthu ooreera murima, maana Evangelyo ya Marko ennihimya mooluluwanya wira Yesu “ahinwehexexa n’umphenta”. Vano Yesu aahimulattula mmiravo ole oriki: “Murowé mwatumihe sothene sirinanyu”. Nuumala-vo aahimuleela wira “mwarwé mukitthareke”. Mmiravo ole thaaciri aaniphavela omutthara Yesu, masi khaawerya ohiya mireerelo sawe, “mana kharerena muhakhu”. (Mar. 10:17-22) Nto mmiravo ole kheemerenrye wiireya muritti wa Yesu, masi aathanlale ovikaniha okhala epottha ya “Muhakhu”. (Math. 6:24) Ankhi mwaari mwa nyuwo? Mwaarowa othanla opaka exeeni?
18. Okathi mukina nihaana opaka exeeni ni nthowa xeeni?
18 Okathi ti okathi, vannireerela ovarerya itthu ninhela ahu nipuro noopacerya mookumini mwahu. Mwaha wa xeeni? Mwaha woowi, eyo enoonikhaliherya oweha moota ninrumeela ahu ikuru sahu. Nwehe ele yaamwiiranenle munna mmiravo oniihaniwa Mark. Owo onihimya so: “Mwa iyaakha sinceene, kuupuwela wira okumi ti wookhweya. Kaari pioneero, masi kaamakela wuupuwela okhalana musurukhu munceene ni okumi woolokexa. Nto kaaniikoha nthowa naya okumi aka waari aya wooxankiha. Muhoolo mwaya kaahoona wira kaamakela wuupuwela soophavela saka paahi, kinanvaha Yehova itathela sa okathi ni ikuru saka”. Mark aahituruka muupuwelo awe ni mukhalelo wa okumi awe wira okhalane okathi munceene woovara muteko wa Yehova. Mark onnivikaniha oriki: “Okathi mukina kinnixanka vanceene. Masi kikhaliheriwaka ni Yehova ni Yesu kinniwerya oxintta mixankiho saka”.
19. Xeeni vanireerela aya okhalana moonelo wooloka?
19 Naaphavelaka ovikaniha okurunuxiwa murima ni muritti wa Yesu, nihaana opaka itthu tthaaru. Yoopacerya, mukhalaneke moonelo wooloka. Okhala wira ninvara muteko wa Yehova, nihaana ovara mwa enamuna Yehova oniphavela awe. Muhiliyale wira hiyo na anamuteko paahi, masi Yehova tori Mwaneene. (Luka 17:10) Wiimananiha ovara muteko wa Yehova mwa enamuna ahu, onoolikana ni owana ni mwiri. Nkahaya muupuwele enama enlimihiwa yeeyo eniimananiha okhala vathi va mwiri oneettihiwa ni mwaneene enama, eyo eneettela murima aya erowaka opuro enitthuna aya. Hata enama eyo erina ene ikuru sinceene enimooceya wala enimwiivulaliha. Moovirikana ni enama eyo, vaavo nimpaka ahu itthu ntoko Yehova omphavela awe, ninniphwanya mireerelo sinceene. Niira siiso nnoowerya oxintta mixankiho nahaarowa ahu oxintta mekhihu. Muhikhala-khale muliyalaka ela: Akhala wira Yehova onniphavela wira etthu eyo yiiraneye, khuuvo mutthu onwerya okhoottiherya!—aRom. 8:31; 1 Yoh. 4:4.
20. Exeeni enniiriha wiireya muritti wa Yesu?
20 Ya nenli, nvareke muteko ni moonelo wooloka. Yoolakela ahu naavaraka muteko onvuwiha Tiithi ahu oophenta, Yehova. Atthu a okathi wa Yesu, yaawo yaavara muteko ni moonelo woohiloka yaahiriipiwa murima ni yaahihiya muritti wa Yesu. (Yoh. 6:25-27, 51, 60, 66; aFil. 3:18, 19) Moovirikana ni vo, atthu ale yaavara muteko ni moonelo wooloka, niire so, mwaha womphenta Muluku ni akhwaaya yaahivikaniha ohakalala ni wiireya muritti wa Yesu okumi aya wotheene. Nto aavahiwa eparakha yoorowa ovaraka ni Yesu wiirimu. Etthu emosaru enniiraneya olelo-va. Akhala wira ninvara muteko wa Yehova ni moonelo wooloka, nnoovaraka moohakalala.
21. Moovarihana ni Matheyo 6:31-33, nikupaliki wira Yehova onooniiriha exeeni?
21 Ya neeraru, mulipeleleke ni moonelo wooloka. Vaavo nneemererya ahu muritti wa Yesu, ninnithanla wiikhootta mmensihu ni wiimananiha ovara muteko vanceene. Nave Yesu aahimmye wira naarowa olupatthiwaka. Masi ninnikupali wira Yehova onoonikhaliherya ovilela, moohicikha muxankiho ahu. Vaavo ninvilela ahu ninnitepa olipa. (Yak. 1:2-4) Nave nikupaliki wira Yehova onoonivaha itthu sinnithowa, Yesu onoonilakiheryaka, anna ni arokora anoonilipihaka. (Mmusome Matheyo 6:31-33; Yoh. 10:14; 1 aTes. 5:11) Tthiri nookhalana itthu sotheene nimphavela ahu wira nivikanihe ovilela!
22. Etthu xeeni ninxukhurela ahu vanceene?
22 Muthiyana ole aavirinhe iyaakha 12 ephome awe ehononeyaka aahikurunuxiwa murima nihiku nenle Yesu ampenunxe awe. Masi wira ovikanihe okurunuxiwa murima mahiku otheene, muthiyana ole aahaana okhala mutthareli a Kristu. Munoona wira aapanke yoothanla xeeni? Akhala wira aahithanla wiireya muritti wa Yesu, owo ookhalana eparakha ya ovara vamosa ni Yesu wiirimu! Khula etthu aalenve awe wira okhale mutthareli a Kristu khiyaarowa ovikana mareeliho aarowa awe ophwanya! Hata nrowaka okhala wiirimu wala mparayiisu valaponi, ninnixukhurela vanceene weemererya nlattulo na Yesu noowi: “Mukirwele miyo”!
NSIPO 13 Kristu, Ntakiheryo Nahu
^ etti. 5 Yesu oonilattula otheene ahu wira: “Mukirwele miyo”. Nihaana opaka exeeni wira nooniherye weemererya nlattulo nno? Mwaha ola, ninrowa waakhula nikoho nno ni onrowa onuupuxerya moota nikhanle ahu oomumulihiwa wala omaalihiwa vaavo ninvara ahu vamosa ni Kristu.
^ etti. 60 OTTHOKIHERIWA WA EFOOTU: Inamuna soovirikana Yesu oonihenrye awe wira aanaakurunuxa murima atthu akina.
^ etti. 66 OTTHOKIHERIWA WA EFOOTU: Moolikanasa, olelo-va nookhalana inamuna soovirikana nikhanle ahu oowaakurunuxa murima atthu akina.