MWAHA ONITHOKORERIWA 39
‘Kàhona Muttitthi Mulupalexa’
“Kahiweha-tho, kònaka muttitthi mulupalexa w’atthu: khavo awerya owalikela. . . . Atthu awo yarimwemela oholo w’ehije n’uholo wa mwapwittipwitthi”.—WIS. 7:9.
NSIPO 60 Aniiwa Moolumo Anoophwanya Okumi
ELE NINROWA AHU WIIXUTTA *
1. Mwaakha 95 muxankiho xeeni Yohani aarina awe?
MWAAKHA 95 nuumala Kristu orwa, murummwa Yohani ahikhalana mixankiho. Owo aahuuluvala ni aahitthukiwa esisiro ya oPatmo, nave vanikhala ntoko wira okathi ole eriyari ya arummwa otheene Yohani paahi taari mukumi. (Wis. 1:9) Yohani aanisuwela wira awanani yaaniixuttiha itthu soohiloka mmulokoni wira yaakawanye anna. Vaakhala ntoko wira eKristau ya ekeekhai yaahanle vakhaani omala.—Yuda 4; Wis. 2:15, 20; 3:1, 17.
Murummwa Yohani aahiweha “muttitthi mulupalexa” owanre ene ikuwo sootteela okunxe ene iritta sa miri mmatatani. (Nwehe ettima 2)
2. Moovarihana ni Wisupulula 7:9-14, Yohani awenhe exeeni? (Nwehe elatarato ya ekaapa.)
2 Nlelo Yohani orina ene mixankiho iye, Muluku aahimooniherya itthu sootikiniha saarowa wiiraneya muhoolo. Yowoonihiwa ele, malaikha yaahivahiwa malakiheryo wira avarelele ipheyo xexe soopwetexa sa maxakha maalupale mpakha ophiya okathi yaarowa aya otthittiwa ekanyeryo egrupu ya arumeyi a Muluku. (Wis. 7:1-3) Atthu aniirela mpantta egrupu eyo ari 144.000, yaawo anrowa olamulelaka ni Yesu Kristu wiirimu. (Luka 12:32; Wis. 7:4) Moottharelana, Yohani aahoonihiwa egrupu ekina yuulupalexa emutikiniha vanceene, nto aawenhe exeeni? Yohani oni:“Kahiweha-tho, kònaka muttitthi mulupalexa w’atthu: khavo awerya owalikela. Awo yari a ilapo sothene ni a maloko othene ni a mahimo othene ni a malavulelo othene. Atthu awo yarimwemela oholo w’ehije n’uholo wa mwapwittipwitthi”. (Mmusome Wisupulula 7:9-14.) Tthiri Yohani aahihakalala vanceene osuwela wira muhoolo atthu anceene yaarowa omukokhorelaka Muluku mwa enamuna yooloka!
3. (a) Yowoonihiwa ya Yohani enlipiha sai waamini wahu? (b) Mwaha ola, ninrowa othokorerya exeeni?
3 Moohaanyiherya, yowoonihiwa ele yaahilipiha waamini wa Yohani. Nave hiyo ninkhala mahiku ala ookiserya, yowoonihiwa ele pooti olipiha waamini wahu, mwaha woowi ninkhala okathi eniiraneya aya yowoonihiwa ele! Mahiku ahu ala, atthu imilyau sinceene annimukokhorela Yehova alipelelaka wira animoopowa okathi wa
maxakha maalupale ni okhalana nlipelelo nookhala mParayiisu valaponi. Mwaha ola, ninrowa woona moota Yehova aakhalihenrye awe atthu awe osuwela muttitthi muulupale mwa iyaakha 80 sivinre. Nuumala-vo, ninrowa othokorerya itthu piili voohimya sa muttitthi muulupale: (1) mwaattelo wa muttitthi owo ni (2) ovirikana wa atthu a muttitthi muulupale. Itthu iyo piili, sinoolipiha waamini wa atthu otheene arina nlipelelo na wiirela mpantta egrupu eyo.MUTTITTHI MUULUPALE ONROWA OKHALAKA WOOWI?
4. Ekeekhai xeeni ya mBiibiliyani itiini sowootha sihiniixuttiha aya? Moota xeeni Anamasoma a Biibiliya yaarina aya moonelo woovirikana ni wa itiini sowootha?
4 Itiini sowootha khasiniixuttiha ekeekhai ya mBiibiliyani yoowi apinaatamu animwiiwelela Muluku anrowa okhalaka mahiku otheene mparayiisu valaponi. (2 aKor. 4:3, 4) Itiini iyo sowootha, sinihimya wira atthu ootheene ooreera murima yakhwa vale anrowa wiirimu. Masi egrupu yaamukhaani ya Anamasoma a Biibiliya, yaawo yaakumiherya erevista Watch Tower (Owehaweha) okhuma mwaakha wa 1879, yaahikhalana moonelo woovirikana ni wa itiini sowootha. Awo yaanisuwela wira Muluku onimwiiriha elapo ela okhala eParayiisu ni imilyau sinceene sa atthu anrowa okhalaka mahiku otheene valaponi vaava ohiya wiirimu. Masi waahivira okathi munceene wira yaasuwele atthu awo.—Math. 6:10.
5. Exeeni Anamasoma a Biibiliya yaakupali aya voohimya sa maKristau 144.000?
5 Tthiri Anamasoma a Biibiliya yaahisuwela wira moovarihana ni Nuulumo na Muluku, yaamukhala atthu “yopoliwe w’elapo ya vathí” wira yalamuleleke ni Yesu wiirimu. (Wis. 14:3) Atthu yaarowa wiirela mpantta egrupu eyo, yaarowa okhala maKristau ooluttuweliwa 144.000, yaawo yiivaherenrye ni animurumeela Muluku moororomeleya nlelo ari ene valaponi. Masi, yaakupali exeeni voohimya sa muttitthi muulupale?
6. Anamasoma a Biibiliya yaasuwela exeeni voohimya sa muttitthi muulupale?
6 Yowoonihiwa ele, Yohani aahiweha muttitthi muulupale wa atthu, yaawo yeemenle “oholo w’ehije n’uholo wa Mwapwittipwitthi”. (Wis. 7:9) Moolumo ala a yowoonihiwa ya Yohani, yaahiwiiriha Anamasoma a Biibiliya wuupuwelaka wira ntoko maKristau owoottihiwa 144.000, muttitthi muulupale waarowa okhalaka wiirimu. Masi akhala wira maKristau 144.000 ni muttitthi muulupale waarowa okhalaka wiirimu, ovirikana xeeni waarowa okhala? Anamasoma a Biibiliya yuupuwela wira muttitthi muulupale yaari maKristau yahaamwiiwelela oratteene Muluku okathi yaari aya valaponi. Nnaamwi maKristau awo yaarina mweettelo onivarihana ni Biibiliya, woonasa wene akina a yaawo yaaniirela mpantta etiini yoowootha. Nto Anamasoma a Biibiliya yoona wira maKristau yamphenta vakhaani Muluku khiyaaphwanelela olamulela ni Yesu. Okhala wira omphenta waya Muluku khahiyo waari wuulupale, muttitthi muulupale pooti wira waamurowa wiirimu ohoolo wa ehice masi khiyaarowa okilaathi veehiceni.
7. Moovarihana ni Anamasoma a Biibiliya, tani yaarowa okhalaka valaponi okathi wa Iyaakha Ekonto Emosa? Etthu xeeni yaarowa owiiraneela arumeyi oororomeleya a khalai?
7 Tani yaarowa okhalaka valaponi? Anamasoma a Biibiliya yaakupali wira, wanipacerya maKristau 144.000 ni muttitthi muulupale waarowa wiirimu. Nuumala-vo, imilyau sinceene sa atthu yaamukhalana eparakha ya okhalaka valaponi ni yaamwaakhela mareeliho a Olamulelo wa Iyaakha Ekonto Emosa ya Kristu. Anamasoma a Biibiliya yuupuwela wira imilyau iyo sa atthu khiyaamurumenle Yehova ohinatthi opacerya Olamulelo wa Kristu. Nto yoona wira egrupu eyo yaamwiixutta voohimya sa Yehova okathi wa Iyaakha Ekonto Emosa. Wanikisa wa Iyaakha Ekonto Emosa, ale yaarowa wiiwelela malamulo a Yehova yaamutthuveliwa ekumi yoohimala Esal. 45:17.
valaponi, masi ale yaarowa ohimwiiwelela Yehova yampwetexiwa. Ohiya-vo, Anamasoma a Biibiliya yaakupali wira atthu ale yaarowa omurumeelaka Muluku ntoko “mapewe” okathi owo valaponi, yaamurowa wiirimu wanikisa wa Iyaakha Ekonto Emosa. Eriyari ya mapewe wala makhulupale awo, yaamukhala ale aniihaniwa okhala “atthu a khalai oophwanelela”, eyo piiyo, arumeyi oororomeleya yaakhwiiye ohinatthi Kristu ni yaawo yaahihimuxiwe.—8. Igrupu xeeni tthaaru Anamasoma a Biibiliya yuupuwela aya wira sookhala?
8 Olavula mookwasa, Anamasoma a Biibiliya yaakupali wira saahikhala igrupu tthaaru: (1) maKristau 144.000 yaarowa olamulelaka ni Yesu wiirimu, (2) muttitthi muulupale wa maKristau yaaluttuweliwa vakhaani, yaawo yaarowa okhala wiirimu yeemenle ene ohoolo wa ehice ya Yesu ni (3) imilyau sa atthu yaarowa okhalaka valaponi, yaawo yaarowa wiixuttihiwa voohimya sa Yehova okathi wa Olamulelo wa Iyaakha Ekonto Emosa ya Kristu. * Masi nuuvira okathi, Yehova aahaakhaliherya wiiwexexa oratteene mwaha ole.—Mir. 4:18.
EKEEKHAI ENNAARYA VANCEENE
Kongresu a 1935, yaahipatisiwa atthu anceene arina nlipelelo na okhala valaponi (Nwehe ettima 9)
9. (a) Mwa enamuna xeeni muttitthi muulupale onrowa awe weemela “oholo w’ehije n’uholo wa Mwapwittipwitthi” ari ene valaponi? (b) Xeeni wiiwexexa wahu yoolepa ya Wisupulula 7:9 ori aya wooloka?
9 Mwaakha wa 1935, waahisuweliwa oratteene muttitthi muulupale oonihiwe awe Yohani. Anamoona a Yehova yaahiiwexexa wira muttitthi muulupale khonrowa mowooneya wiirimu wira weemele “oholo w’ehije n’uholo wa Mwapwittipwitthi”. Awo anrowa opaka eyo mwa nthoonyeryo ari ene valaponi. Weemela “oholo w’ehije” ontaphulela osuwela okhulupale wa Yehova ni omwiiwelela ni murima wotheene. (Yes. 66:1) Nave weemela ‘oholo wa Mwapwittipwitthi’ ontaphulela waamini mukuttho wowoopola wa Yesu. Ti voohakalaliha woona wira Matheyo 25:31, 32, onihimya wira “atthu a maloko othene” waahela muhina atthu ootakhala “anothukumanyiwa oholo” wa ehice ya Yesu wiirimu. Vannooneya wira maloko awo khakhanle wiirimu, masi ari valaponi. Tthiri wiiwexexa wa Anamoona a Yehova mwaakha wa 1935 waari wooloka. Eyo ennitthokiherya saana nthowa naya Biibiliya ohinihimya awe wira muttitthi muulupale onrowa okhalaka wiirimu. Masi Egrupu yaamukhaani ya maKristau tarina nlipelelo na okhalaka wiirimu, maKristau awo ari 144.000 ni anrowa “owettiha atthu a vathí-va”.—Wis. 5:10.
10. Xeeni muttitthi muulupale onitthuneya awe wiixutta voohimya sa Yehova sihinatthi opacerya Iyaakha Ekonto Emosa?
10 Okhuma 1935, Anamoona a Yehova yaahiiwexexa wira muttitthi muulupale oonihiwe awe Yohani, egrupu ya maKristau oororomeleya arina nlipelelo na okhala mahiku otheene mParayiisu valaponi. Wira yoopowe okathi wa maxakha maalupale, ahaana wiixutta voohimya sa Yehova sihinatthi opacerya Iyaakha Ekonto Emosa. Awo ahaana okhalana waamini woolipa wira awerye “otthyawa sothene sinrowa okhumelela” sihinatthi opacerya Iyaakha Ekonto Emosa ya Olamulelo wa Kristu.—Luka 21:34-36.
11. Xeeni Anamasoma akina a Biibiliya yuupuwela aya wira atthu akina anrowa wiirimu nuumala Iyaakha Ekonto Emosa?
11 Ankhi muupuwelo ole waahimya wira atthu akina oororomeleya a valaponi anrowa wiirimu nuumala Iyaakha Ekonto Emosa? Iyaakha sinceene sivinre, erevista The Watch Tower (Owehaweha) ya 15 a Feverero a 1913, ya Enkelexi yaahilavula mwaha owo. Anamasoma akina a Biibiliya yuupuwela so: ‘Xeeni arumeyi oororomeleya a Muluku a khalai anrowa aya waakhela etthuvo aya valaponi variki maKristau makina woonasa wene ahiroromeleyale vanceene anrowa aya otthuveliwa wiirimu?’ Tthiri moonelo aya waavarihana
ni miyuupuwelo iya miili seethiru: (1) muttitthi muulupale waarowa okhalaka wiirimu ni (2) muttitthi muulupale yaarowa okhala maKristau ahinluttuweliwa.12-13. Etthu xeeni maKristau oowoottihiwa ni a muttitthi muulupale ansuwela aya?
12 Ntoko niwenhe ahu, okhuma mwaakha wa 1935 Anamoona a Yehova yaahiiwexexa wira atthu anrowa woopowa okathi wa Armagedoni taale aniirela mpantta muttitthi muulupale aawehihiwe awe Yohani. Awo anikhuma maxakha maalupale ni annikhuwela ariki: “Wopola ti wa Muluku ahu, yowo okilanthe vehijeni, ni ti wa Mwapwittipwitthi”. (Wis. 7:10, 14) Ohiya-vo, Biibiliya oniixuttiha wira ale anrowa ohihimuxiwa wira yakhaleke wiirimu animwaakhela “sorera sulupalexa” waavikana maKristau oororomeleya a khalai. (aHéb. 11:40) Wiiwexexa wa niinaano wahaasivela vanceene anna ale. Awo yaahipacerya waalattula atthu akina wira amukokhoreleke Yehova alipelelaka okhala mParayiisu valaponi.
13 Ale a muttitthi muulupale annihakalala vanceene ni nlipelelo arina aya. Awo annisuwela wira Yehova ookhalana ehakhi yoohimya akhala wira ale animukokhorela anrowa omurumeelaka ari ene wiirimu wala valaponi. MaKristau oowoottihiwa ni a muttitthi muulupale annisuwela wira khampwanelela etthuvo anivahiwa aya masi anivahiwa mwaha wa omoriwa ikharari wa Muluku ni mukuttho wowoopola wa Yesu Kristu.—aRom. 3:24.
WUNCEREREYA WA MUTTITTI “MULUPALEXA”
14. Nuumala 1935, exeeni yaawiiriha atthu akina wuupuwela moota eprofesia ya muttitthi muulupale yaarowa aya wiiraneya?
14 Nuumala wiiwexexa wa 1935, atthu a Yehova yaaniikoha mwaattelo wa muttitthi “mulupalexa” waarowa okhalaka valaponi. Mwa ntakiheryo, Ronald Parkin, yoowo aarina iyaakha 12 okathi waasuweliwe aya oratteene muttitthi muulupale, onihimya so: “Okathi ole, yaahikhala anamalaleerya 56.000 olumwenku wotheene, woonasa wene anamunceene a yaawo yaari oowoottihiwa. Nto vaakhala wira muttitthi muulupale waari vakhaani”.
15. Okhuma khalai Yehova onvikaniha sai othukumanya muttitthi muulupale?
15 Iyaakha sinceene muhoolo mwaya, mutthenkeso ahu waahipacerya waaroiha mamisionaario ilapo sikina, nto nummuru na Anamoona a Yehova naanincerereya. Mwaakha wa 1968, yaahipacerya eprograma ya osomihiwa Biibiliya atthu erumeeliwaka eliivuru A Verdade Que Conduz à Vida Eterna. Eliivuru ele yaanitthokiherya mwa enamuna yookhweya ikeekhai sa mBiibiliyani, nto atthu anceene yaahaasivela ekeekhai ovikana khalai. Eriyari ya iyaakha xexe, atthu yaavikana 500.000 yaahipatisiwa. Ohiya-vo, vaavo wAmérica Latina ni ilapo sikina Ekerexa Katoolika yahaarina aya owerya vanceene ni omala wa okhoottiheriwa muteko ahu woolaleerya ilapo ntoko wEuropa do Leste ni mipantta Yes. 60:22) Iyaakha vakhaani sivinre, mutthenkeso wa Yehova woopaka ikaruma sinceene wira waakhaliherye atthu wiixutta ele Biibiliya oniixuttiha awe. Olelo-va, olumwenku wotheene aakhala anamalaleerya anivikana imilyau 8. Tthiri vannooneya wira Yehova onnithukumanya muttitthi muulupale.
sikina sa wÁfrica, imilyau sinceene sa atthu yaahipatisiwa. (MUTTITTHI WA ATTHU OOVIRIKANA
16. Muttitthi muulupale onikhuma woowi?
16 Okathi aalempe awe yowoonihiwa ele, Yohani aahimmye wira muttitthi muulupale waarowa okhala wa “ilapo sothene ni a maloko othene ni a mahimo othene ni a malavulelo othene”. Iyaakha sinceene saavinre, profeta Zakariya aahihimya etthu yaalikana ni ele Yohani aahimmye awe. Zakariya aalempe so: “Mahiku awo, wa khula mutthu òYuda, amalapo mulokó a maloko othene anonvara metto emuhimeryaka wira: ‘Nimphavela wottharani, mana nokupali wira Muluku ori ni nyuwo’”—Zak. 8:23.
17. Muteko xeeni onivariwa wira naakhaliherye atthu a ilavulelo sinceene?
17 Anamoona a Yehova annisuwela wira vanooweryaneya waakhaliherya atthu a ilavulelo sotheene akhala wira ihapari sooreera sinoolaleiwa mattaava manceene. Soovira iyaakha 130 nitaphulelaka iliivuru ninrumeela ahu naawiixuttihaka atthu Biibiliya. Olelo-va, ninnitaphulela iliivuru Math. 24:14; Yoh. 13:35.
sahu mattaava anivikana 900, tthiri noovara muteko munceene. Mahiku ahu ala Yehova onnithukumanya muttitthi muulupale. Okhala wira Biibiliya ni iliivuru sikina siniphwanyaneya mattaava oovirikana, hata muttitthi owo orina ene atthu a ilapo soovirikana awo annimukokhorela Yehova mowiiraana. Nave Anamoona annisuweliwa oratteene mwaha wooluttuweliwa olaleya ekeekhai ni ophentana waya mukina ni mukhwaawe. Tthiri oweha itthu iyo sotheene siiraneyaka, onnilipiha waamini wahu.—YOWOONIHIWA ELE ENNIIXUTTIHA EXEENI?
18. (a) Moovarihana ni Yesaya 46:10, 11, xeeni nihintikinihiwa ahu vaavo nnoona ahu moota Yehova onthukumanya awe muttitthi muulupale? (b) Xeeni ale anrowa okhalaka valaponi ahinoona aya wira aroonyanyaliwa?
18 Moohaanyiherya, eprofesia enilavula muttitthi muulupale ti yoovara murima! Nave khanintikhina osuwela wira Yehova onnimaliherya eprofesia ela mwa enamuna yoohakalaliha. (Mmusome Yesaya 46:10, 11.) Tthiri ale aniirela mpantta muttitthi muulupale annimuxukhurela vanceene Yehova. Awo khanoona wira aroonyanyaliwa mwaha woohithanliwa ni munepa wootteela wira yalamuleleke ni Yesu wiirimu. Nto okathi ninsoma ahu mBiibiliyani voohimya sa alopwana ni athiyana owaamini ninnihakalala woona wira awo yaaneettihiwa ni munepa wootteela. Hata vari siiso alopwana ni athiyana awo oowaamini khaniirela mpantta egrupu ya 144.000. Ntakiheryo nimosa ti na Yohani Mbatiza. (Math. 11:11) Ntakiheryo nikina ti na Davidi. (Mit. 2:34) Yohani Mbatiza, Davidi ni arumeyi akina oororomeleya anoohihimuxiwa muhoolo wira akhaleke mparayiisu mahiku otheene. Akhale ale anrowa ohihimuxiwa wala a muttitthi muulupale, anookhalana eparakha ya wooniherya wira anniroromeleya wa Yehova ni okhulupale awe.
19. Wiiwexexa yowoonihiwa ya Yohani enniiriha opaka exeeni?
19 Okathi ola, Yehova onnaathukumanya atthu a maloko otheene ovikana khalai. Hata nlipelelaka okhala wiirimu wala valaponi, nihaana wiimananiha vanceene waakhaliherya atthu wiirela mpantta muttitthi muulupale wa “ipwittipwitthi sikina”. (Yoh. 10:16) Moohipisa, Yehova onooruuha maxakha maalupale yaawo anrowa opwetexa iguvernu sa apinaatamu ni itiini sowootha seiyo sinaakumiherya maxakha apinaatamu. Otheene ale aniirela mpantta muttitthi muulupale aakhalana eparakha yuulupale muhoolo. Eparakha ene tiila: Omurumeela Yehova mahiku otheene valaponi!—Wis. 7:14.
NSIPO 139 Muupuweleke Muryeene oParayiisu
^ etti. 5 Mwaha ola, ninrowa othokorerya yowoonihiwa ya murummwa Yohani, voohimya sa othukumanyiwa wa “muttitthi mulupulexa”. Tthiri mwaha ola onoolipiha waamini wa atthu ale arina nlipelelo na wiirela mpantta egrupu eyo.
^ etti. 8 Nwehe eliivuru Testemunhas de Jeová—Proclamadores do Reino de Deus, ipaaxina 159-163.