1. Xeeni vanireerela aya omwiiwelela Yehova?

YEHOVA tori mpattuxa ahu. Nto ookhalana ehakhi yoohimya ele eri yooloka ni yoohiloka. Tthiri okhala wira Yehova tonipattunxe nihaana omwiiwelela. * (Wis. 4:11) Masi yookhala etthu ekina enniiriha omwiiwelela Yehova, etthu ene tiila: Enamuna ya olamulela wawe ti woolokexa. Okhuma khalai apinaatamu akina annaalamulela akhwaaya. Masi nalikanyiha olamulela wa apinaatamu ni olamulela wa Yehova ninnoona wira Yehova namalamulela oolokexa, a miruku, oophenta, ooreera murima ni oomoriwa ikharari waavikana anamalamulela akina.​—Okhum. 34:6; aRom. 16:27; 1 Yoh. 4:8.

2. Moovarihana ni aHéberi 12:9-11, xeeni nimmwiiwelela ahu Yehova?

² Yehova khoniphavela wira nimwiiweleleke mwaha woomoova. Masi oniphavela wira nimwiiweleleke mwaha womphenta ni nimooneke ntoko Tiithi oophenta. Ewarakha aalepenle awe aHeberi, Paulo onnintumererya wira nihaana “omwiwelela Tithi” mwaha woowi ninniphwanya ‘mirerelo’.​—Mmusome aHéberi 12:9-11.

3. (a) Nnooniherya sai wira ninnimwiiwelela Yehova? (b) Makoho xeeni ninrowa ahu waakhula?

³ Mwa inamuna xeeni nikhanle ahu oowooniherya wira ninnimwiiwelela Yehova? Enamuna emosa ori omwiiwelela Yehova okumi ahu wotheene. Enamuna ya nenli, ori wiimananiha ohiiroromela mmensihu masi omuroromela Yehova ni murima wotheene. (Mir. 3:5) Etthu ekina enrowa onikhaliherya omwiiwelela Yehova ori wiixutta mikhalelo sawe sooloka. Mwaha wa xeeni? Mwaha woowi mikhalelo iyo sinnooniherya itthu sotheene ompaka awe. (Esal. 145:9) Vaavo nintepa ahu omusuwela Yehova, nnootepaka  omphenta. Nave vaavo nintepa ahu omphenta, khaninrowa ophavelaka ovahiwa elista ya itthu nikhanle ahu oopaka ni ohipaka. Ohiya-vo, ninniimananiha osuwela muupuwelo ni moonelo wa Yehova wira nihipake itthu soohiloka. (Esal. 97:10) Masi okathi mukina vannivila omwiiwelela Yehova. Xeeni eyo eniiraneya aya? Ntakiheryo na guvernatoro Nehemiya, Mwene Davidi ni Maria ninwiixuttiha exeeni axitokweene, axitiithi ni aximai? Mwaha ola, ninrowa waakhula makoho awo.

4-5. Moovarihana ni aRoma 7:21-23, xeeni okathi mukina vanivila aya omwiiwelela Yehova?

⁴ Etthu ekina eniiriha woonaka ovila omwiiwelela Yehova mwaha woowi noorava etampi ni ohimalela. Nto okathi mukina khanimphavela wiiwelela. Nuumala Adamu ni Eva ohimwiiwelela Muluku ni olya muhokorokho waakhoottihiwe, awo yaahooniherya wira yaaphavela othanlaka mekhaya ele eri yooloka ni yoohiloka. (Maph. 3:22) Olelo-va, atthu anceene annivikaniha ohiiwelela malamulo a Yehova anapaka ele murima aya onoona aya okhala yooloka ni yoohiloka.

⁵ Tthiri nnaamwi nimusuwelaka ni omphenta Yehova, okathi mukina pooti onixankihaka omwiiwelela. Mwa ntakiheryo, murummwa Paulo aahikumanana muxankiho owo. (Mmusome aRoma 7:21-23.) Ntoko Paulo, hiyo ninniphavela opaka itthu Yehova onoona awe okhala sooloka. Masi hata vari siiso, nihaana ovikaniha owanana soophavela soohiloka.

6-7. Etthu xeeni ekina ekhanle ooniiriha woonaka ovila omwiiwelela Yehova? Nvahe ntakiheryo.

⁶ Etthu ekina ekhanle ooniiriha woonaka ovila omwiiwelela Yehova opuro niyariwe ahu wala mahuweliwo ahu. Miyuupuwelo sinceene sa apinaatamu khasinivarihana ni muupuwelo wa Yehova. Nto nihaana wiimananiha osyaka muupuwelo wa atthu awo. Nrowe nithokorerye ntakiheryo nimosa.

⁷ Ilapo sikina, amiravo annikhanyereriwa vanceene ophavelasa mihakhu ni othaaciri paahi. Eyo ti etthu yaamwiiranenle murokora oniihaniwa Mary *. Ohinatthi wiixutta ekeekhai, owo aahisoma universidade yootepexa ovuwa ya elapo awe. Amusi awe yaahimukhanyererya ovara muteko woottittimiheya ni oniliviwa musurukhu munceene. Nave Mary aaniphavela eyo. Masi, nuumala opacerya omusoma Biibiliya ni wiixutta omphenta Yehova, Mary aahituruka soolukama sawe mookumini. Khivaakhweyale opaka eyo, Mary onihimya so: “Okathi mukina kinniphwanya muteko onliviwa musurukhu munceene, masi miteko iyo saamuhonona waataana waka ni Yehova. Mwaha wa makhalelo kihuuwale aka, okathi mukina vannikixankiha okhootta. Mahiku manceene kinnimuxonttela Yehova wira okikhaliherye okhootta miteko saarowa ohikeemererya ovara itthu sinceene mmutthenkesoni mwawe”.​—Math. 6:24.

8. Vano ninrowa othokorerya exeeni?

⁸ Ntoko nilavunle ahu wanipacerya, omwiiwelela Yehova onniniphwanyiha mireerelo. Masi atthu ale avahiwe okhulupale, ntoko axitokweene, axitiithi ni aximai aakhalana nthowa nikina ninwiiriha omwiiwelela Yehova, nthowa nene tinla: awo aakhalana eparakha yoowiirela itthu sooloka atthu akina. Nrowe nthokorerye matakiheryo vakhaani a mBiibiliyani anniixuttiha moota woorumeela okhulupale nivahiwe ahu wira nimuhakalaliheke Yehova.

9. Mixankiho xeeni Nehemiya aakumanne awe?

⁹ Yehova ohaavaha axitokweene muritti muulupale wa okhapelela ipwittipwitthi sawe. (1 Ped. 5:2) Enamuna Nehemiya aathokorerya awe atthu a Muluku, enniwiixuttiha etthu yuulupale axitokweene. Ntoko guvernatoro a oYuda, Nehemiya aahikhalana okhulupale wuulupale. (Neh. 1:11; 2:7, 8; 5:14) Vano nkahaya muupuwele mixankiho Nehemiya aakumanne awe. Okathi aaxukunrye awe oYerusalemu, owo aahoona wira aYuda khiyaattittimiha etemplo ni khiyaakhaliherya aLevi ntoko Nlamulo naahimya aya. Ohiya-vo, aYuda khiyaiwelela nlamulo na Esaabadu, nave aYuda akina yaahaathela athiyana amalapo. Nto guvernatoro Nehemiya aahaana ophuka muxankiho ole woovela-veliha.​—Neh. 13:4-30.

10. Nehemiya aapanke exeeni wira ophuke mixankiho?

¹⁰ Nehemiya khaarumenle okhulupale awe wira aakhanyererye atthu a Muluku weemererya muupuwelo awe. Ohiya-vo, owo aahinvekela Yehova wira onvahe malakiheryo ni omukhaliherya. Nave aahiwiixuttiha atthu Nlamulo na Yehova. (Neh. 1:4-10; 13:1-3) Nave-tho Nehemiya aari mutthu oowiiyeviha aakhaliheryaka atthu otthikela oteka ixiri sa oYerusalemu.​—Neh. 4:15.

11. Moovarihana ni 1 aTesalonika 2:7, 8, axitokweene yaakhapeleleke sai anna a mmulokoni?

¹¹ Ekeekhai wira axitokweene khanrowa okumana mixankiho ntoko Nehemiya aakumanne awe, masi awo pooti omutakiha mwa inamuna soovirikana. Mwa ntakiheryo, awo anniimananiha vanceene wira yaakhaliherye anna ni arokora. Masi khaneemererya wira okhulupale aya owiiriheke okhala atthu oowiixinnuwiha. Ohiya-vo, awo annithokorerya muloko moophenta ni mwa nttittimiho. (Mmusome 1 aTesalonika 2:7, 8.) Mwaha wa ophenta ni wiiyeviha, vaavo anlavula aya ni atthu akina, awo annilavula mooreerela murima. Munna Andrew yoowo okhumme khalai orumeela ntoko mutokweene onihimya so: “Kihoona wira vaavo mutokweene onikhala awe ooreera murima ni oopatthaneya, eyo ennaavara murima vanceene anna ni arokora. Mikhalelo iyo sinniwiiriha anna owiiwelela axitokweene”. Munna mukina oniihaniwa Tony, yoowo okhumme khalai orumeela ntoko mutokweene oni: “Kinniimananiha ovarihela muteko malakiheryo ari aFilipi 2:3, nave okathi wotheene  kinnaathokorerya atthu akina okhala aalupale okivikana miyo. Eyo ennikikhaliherya ohaakhanyererya atthu akina okiiwelela”.

12. Xeeni vari aya vooloka axitokweene okhala oowiiyeviha?

¹² Axitokweene ahaana okhala oowiiyeviha ntoko Yehova ori awe oowiiyeviha. Nnaamwi Yehova ori ene Mukhulupale a olumwenku wotheene, owo ‘onnùrama’ wira ‘amwemexe masikhini vantthupini varyawe’. (Esal. 18:36; 113:6, 7) Eyo ti etthu enimwiiriha Yehova ohaaphavela atthu oowiixinnuwiha.​—Mir. 16:5.

13. Xeeni vari aya vooloka mutokweene osuwela “wettiha nlumi nawe”?

¹³ Axitokweene aniphavela omwiiwelela Yehova, ahaana osuwela “wettiha nlumi” naya. Yaahiire siiso, okathi ahinrowa aya ottittimihiwa, woonasa wene awo animwaakhula moohireerela murima. (Yak. 1:26; aGal. 5:14, 15) Andrew nimulavunle ahu, onihimya so: “Okathi mukina, vaavo kinoona aka wira munna wala murokora khokittittiminhe, kinniphavela omwaakhula vaniiwa mwalapwa. Masi kinnuupuwelela matakiheryo a alopwana oororomeleya anilavuliwa mBiibiliyani, nto eyo ennikikhaliherya woona otthuneya waya okhala oowiiyeviha ni oomaala”. Tthiri akhala wira mutokweene onniphavela wooniherya wira onnimwiiwelela Yehova, ohaana olavula mooreerela murima ni moophenta, ohela muhina okathi onlavula awe ni axitokweene akhwaawe.​—aKol. 4:6.

14. Yehova aavanhe muritti xeeni axitiithi, ni oniphavela wira apakeke exeeni?

¹⁴ Yehova ohaavaha axitiithi muritti wookhala ahooleli a itthoko, nto owo oniphavela wira awiixuttiheke, waalakiherya ni waalaka anaaya. (1 aKor. 11:3; aÉf. 6:4) Masi okhulupale wa axitiithi wookhalana mukano, awo animwaakhula ohoolo wa Yehova, yoowo opattunxe imusi sotheene mwaha wa enamuna anithokorerya aya etthoko aya. (aÉf. 3:14, 15) Wira yooniherye omwiiwelela Yehova, axitiithi ahaana orumeela okhulupale aya mwa enamuna enimusivela Muluku. Tthiri ntakiheryo na Mwene Davidi ninniwiixuttiha etthu yuulupale axitiithi.

15. Ntakiheryo xeeni nooloka Mwene Davidi aavanhe awe ahooleli a itthoko?

¹⁵ Ohiya paahi okhala muhooleli a etthoko awe, Davidi aahivahiwa muritti wookhala muhooleli a nloko notheene na aIsarayeli. Ntoko mwene, Davidi aahikhalana owerya wuulupale. Masi okathi mukina Davidi khaarumenle saana okhulupale awe, nto aahipaka soovonya suulupale. (2 Sam. 11:14, 15) Masi aahooniherya omwiiwelela Yehova vaavo eemerenrye awe opwapweliwa. Owo aaninvekela Yehova omuleelaka itthu sotheene saamuxankiha ni uupuwela  awe. Nave aaniimananiha vanceene wiiwelela malakiheryo a Yehova. (Esal. 51:3-6) Ohiya-vo, Davidi aari mutthu oowiiyeviha, maana aaneemererya ovahiwa miruku ohiya paahi ni alopwana masi-tho ni athiyana. (1 Sam. 19:11, 12; 25:32, 33) Davidi aahiixutta etthu ni soovonya sawe ni aanihela nipuro noopacerya mookumini mwawe omukokhorela Yehova.

16. Itthu xeeni tiithi okhanle awe oowiixutta ni ntakiheryo na Mwene Davidi?

¹⁶ Akhala wira nyuwo mwa tiithi, munimwiixutta itthu sinceene ni ntakiheryo na Mwene Davidi. Mwa ntakiheryo, muhikhala-khale mpuheryaka okhulupale anyu. Mweemereryeke soovonya sanyu ni mweemereryeke vaavo munivahiwa anyu miruku sinikhuma mBiibiliyani. Akhala wira munoopaka eyo, mukupaliki wira etthoko anyu enimoottittimihakani mwaha wowiiyeviha wanyu. Okathi munivekela anyu ni etthoko anyu, mmuleeleke Yehova moonelo anyu. Mwiira siiso etthoko anyu enoosuwela wira munlipa ni Yehova wira oovaheeni malakiheryo. Etthu yootepa otthuneya, muheleke nipuro noopacerya mookumini mwanyu omukokhorela Yehova. (Otum. 6:6-9) Muhiliyale wira ntakiheryo nanyu nooloka etthu yuulupale mukhanle anyu oovaha etthoko anyu.

17. Muritti xeeni Yehova onvanhe awe maama?

¹⁷ Yehova onvaha maama muritti vatthokoni, owo oovahiwa okhulupale vakhaani eriyari ya anaawe. (Mir. 6:20) Itthu maama ompaka awe wala onihimya awe pooti omukhaliherya mwanawe okumi awe wotheene. (Mir. 22:6) Nwehe etthu maama okhanle awe oowiixutta ni ntakiheryo na Maria, maama awe Yesu.

18-19. Itthu xeeni maama okhanle awe oowiixutta ni ntakiheryo na Maria?

¹⁸ Maria aanisuwela oratteene Soolempwa. Owo aanimuttittimiha vanceene Yehova ni aahikhalana waataana wooloka ni Muluku. Maria aahilakela opaka itthu sotheene aavekeliwa awe ni Yehova hata etthu eyo erowaka oturuka okumi awe wotheene.​—Luka 1:35-38, 46-55.

¹⁹ Akhala wira mwa maama, sookhala inamuna sinceene mukhanle anyu owiixutta ni ntakiheryo na Maria. Moota xeeni? Wanipacerya, muhaana okhapelela waataana wanyu ni Yehova. Mpakeke eyo mmusomaka mekhinyu Biibiliya ni opaka mavekelo anyu. Ya nenli, mphaveleke opaka marukunuxo mookumini mwanyu wira mmusiveliheke Yehova. Mwa ntakiheryo, woonasa wene muhuuwale etthoko anamuyari anyu yaamakela aya onyoonyiheya ni khula etthu ni yaahaathokorerya saana anaaya. Pooti wira munnunwe muupuwelaka wira mweettelo owo ti wooloka. Woonasa wene, hata mwiixuntte ene enamuna Yehova oniphavela awe wira maama aathokoreryeke  anaawe, pooti wira vannoovilani waathokorerya saana aniinyu. Otepexa wene akhala wira mwaninyu oopaka etthu yoohiloka wala ohoonyoonyihani. (aÉf. 4:31) Okathi owo nyuwo muhaana onvekela Yehova wira ookhaliheryeni. Maama oniihaniwa Lydia onihimya so: “Okathi mukina, vaavo mwanaka ohinkiiwelela awe, kaahaana onvekela Yehova wira okikhaliherye wuupuwela saana ohiya onviruwela wala ompwapwela. Waahikhala okathi kiira aka kilavulaka, kineemela wira kinvekele Yehova moohiiwanyeya wira okikhaliherye. Ovekela onnikikhaliherya okhala oomaaleleya”.​—Esal. 37:5.

20. Muxankiho xeeni aximai anceene arina aya ni anrowa oxintta sai?

²⁰ Aximai anceene aakhalana muxankiho mmosaru, muxankiho ene tuula: vannaavila owooniherya anaaya wira annaaphenta. (Tito 2:3, 4) Aximai akina ahuuwale ni anamuyari yahaaphenta wala yahaarina waataana wooloka ni anaaya. Akhala wira eyo ti etthu eniwiiraneelani, khivanreerela opaka yoovonya emosaru anamuyari anyu apanke aya. Nto muhaana omwiiwelela Yehova ni wiixutta moota wowaaphenta aniinyu. Woonasa wene vannoovilani oturuka moonelo anyu, muupuwelo ni moota woopaka itthu. Muhixanke munoowerya oturuka! Marukunuxo awo animookhaliheryani nyuwo ni emusi anyu okhala oohakalala.

21-22. Moovarihana ni Yesaya 65:13, 14, mareeliho xeeni anikhumelela mwaha womwiiwelela Yehova?

²¹ Mwene Davidi aanisuwela mareeliho anikhumelela mwaha womwiiwelela Yehova. Owo aahimmye so: “Soruma sa Muluku ti soloka: sinnitteliha murim’ahu. Masu a Apwiya t’òwarya: annireriha witho. Tivó, miyo, murumeyi anyu, vamphavelaka wìwelela”. (Esal. 19:9, 12) Olelo-va, ninniwerya waasuwela ale aniiwelela miruku sa Yehova ni atthu ale ahiniiwelela. Nto ale animwiiwelela Yehova ‘annitthapa votteliwa murima’.​—Mmusome Yesaya 65:13, 14.

²² Vaavo axitokweene, axitiithi ni aximai animwiiwelela aya Yehova, annikhalana okumi wooloka, itthoko soohakalala ni miloko sinnitepa wiiraana. Etthu yootepa otthuneya, awo annimusiveliha Yehova. (Mir. 27:11) Tthiri eyo etthuvo yuulupale ovikana itthuvo sotheene.