MWAHA ONITHOKORERIWA 35
Yehova Onnaavaha Efaita Arumeyi Awe Oowiiyeviha
“Muluku . . . onnavaha eparakha atthu òwiyeviha”.—1 PED. 5:5.
NSIPO 48 Neetteke ni Yehova Khula Nihiku
ELE NINROWA AHU WIIXUTTA *
1. Yehova oniwoonela sai atthu oowiiyeviha? Mutthokiherye.
YEHOVA onnaaphenta vanceene atthu oowiiyeviha. Tthiri atthu arina waataana wooloka ni Yehova taale ari oowiiyeviha mwekeekhai. Masi owo “khanajaliha [khonaasuwela] alipa-òwisona”. (Esal. 138:6) Otheene ahu nimphavela omuhakalaliha Yehova ni woona wira onniniphenta vanceene. Tthiri, eyo tenniiriha okhala atthu oowiiyeviha.
2. Mwaha ola, ninrowa waakhula makoho xeeni?
2 Mwaha ola, ninrowa waakhula makoho mararu: (1) Wiiyeviha exeeni? (2) Ninrowa okhala sai atthu oowiiyeviha? (3) Itthu xeeni sikhanle ooweehererya wiiyeviha wahu? Ntoko ninrowa ahu woona mwaha ola, nakhala atthu oowiiyeviha nnoomuhakalaliha Yehova ni ophwanya mireerelo.—Mir. 27:11; Yes. 48:17.
WIIYEVIHA EXEENI?
3. Wiiyeviha exeeni?
3 Mutthu oowiiyeviha khonuupuwela wira okhalana efaita yinceene waavikana atthu akina ni khoniixinnuwiha. Biibiliya onnooniherya wira mutthu oowiiyeviha onnisuwela wira Yehova ti muulupale waavikana atthu otheene. Nave mutthu oowiiyeviha onnisuwela wira atthu akina taalupale onvikana yena mwa inamuna soovirikana.—aFil. 2:3, 4.
4-5. Niireke mutthu onikhala ntoko oowiiyeviha, toowiiyeviha tthiri?
4 Atthu akina annoothererya wira toowiiyeviha. Woonasa wene, atthu awo toowuuliwa muru, wala mwaha wa mahuweliwo aya pooti wira annaattittimiha atthu akina. Masi nnaamwi vari siiso, ari ene atthu oowiixinnuwiha ni oowiikuxererya. Akhala wira ti siiso, vanapisaka animooniherya ele eri vamurimani vaya.—Luka 6:45.
5 Nave atthu yaale anikhala wira towiiroromela aahiiso anilavula ele anoona aya, eyo khentaphulela wira toowiixinnuwiha. (Yoh. 1:) Hata vari siiso, atthu awo ahaana wiivaha ephoole wira ahiroromeleke paahi itthu ansuwela aya wala mikhalelo saya. Hata nri ene atthu oomaala wala oowuuliwa muru, otheene ahu nihaana wiimananiha okhala atthu oowiiyeviha. 46, 47
Murummwa Paulo aari mutthu oowiiyeviha ni khuupuwela wira ookhalana efaita waavikana atthu akina (Nwehe ettima 6) *
6. Ntoko onooniherya awe 1 aKorinto 15:10, ntakiheryo na Paulo ninniixuttiha exeeni?
6 Nkahaya nwehe ntakiheryo na murummwa Paulo. Okhaliheriwaka ni Yehova owo aahipaka miloko isya ipooma soovirikana. Woonasa wene, Paulo aahilaleerya vanceene waavikana arummwa akina a Yesu Kristu. Nnaamwi vaari siiso, Paulo khuupuwela wira aahikhalana efaita yinceene waavikana atthu akina. Moowiiyeviha Paulo aahimmye so: “Tthiri miyo kiri mwamukhanixa wavikana arummwa othene, kihiphwanelaka hatá wireliwa murummwa, okhala wira kahilupattha” muloko wa Muluku. (1 aKorinto 15:9) Moottharelana, Paulo aahimmye wira aahikhalana iparakha iye mwaha wa omoriwa ikharari wa Muluku, ohiya itthu aasuwela awe. (Mmusome 1 aKorinto 15:10.) Moohaanyiherya, ewarakha Paulo aalepenle awe aKorinto onnivaha ntakiheryo nooloka na wiiyeviha, maana alopwana akina a muloko ole yaaphavela wooniherya wira yaahikhalana efaita waavikana atthu akina!—2 aKor. 10:10.
Karl Frederick Klein, aari munna oowiiyeviha a Nikhuuru Noolamulela (Nwehe ettima 7)
7. Munna Karl, oonihenrye sai okhala mutthu oowiiyeviha?
7 Anna ni arokora anceene annilipa vaavo anisoma aya yowiiraneya ya mweekumini ya munna Karl Frederick Klein, yoowo aari a Nikhuuru Noolamulela. Yowiiraneya awe ya mweekumini, Munna Karl onneemererya moowiiyeviha mixankiho aarina awe mwa iyaakha sinceene. Mwa ntakiheryo, iyaakha sa 1920, munna Karl aahirowa olaleerya empa ni empa, masi oona wira muteko owo ti woovila, nto muupuwelo owo waahimwiiriha oviiriha iyaakha piili ohironwe olaleerya. Muhoolo mwaya, okathi aarumeela awe oBetheli, khaasiveliwa vanceene ni munna mmosa mwaha woowi aahinvaha miruku. Ohiya-vo, *
Karl aahikhalana muxankiho wa mmuupuweloni ni aanixanka vanceene, masi muhoolo mwaya aahipenuwa. Hata aarina mixankiho iyo, Karl aahivahiwa iparakha sinceene sa vameekhaaya. Vano nkahaya muupuwele ela: Nnaamwi Karl aari munna aasuweliwa vanceene, owo aari oowiiyeviha ni khuuleliwa muru weemererya sootteettheya sawe! Tthiri anna ni arokora anceene annimuupuwela moohakalala munna Karl ni yowiiraneya awe yoovara murima.NINROWA OKHALA SAI ATTHU OOWIIYEVIHA?
8. 1 Pedru 5:6 onooniherya sai wira wiiyeviha onnimusivela Yehova?
8 Nthowa nuulupale ninniiriha okhala atthu oowiiyeviha okhala wira wiiyeviha onnimusivela Yehova. Murummwa Pedru aahiiwanyeiha saana mwaha owo. (Mmusome 1 Pedru 5:6.) Ettittimiheryaka moolumo a murummwa Pedru, eliivuru ‘Murwé Mukitthareke’ ehimmye so: “Wiixinnuuha onlikana ni eveneno. Sookhumelela saya pooti okhala sootakhala. Wiixinnuuha pooti omwiiriha mutthu yoole aari ootthuneya, okhala oohifai wa Muluku. Moovirikana ni vo, wiiyeviha pooti omwiiriha ole ootepa oyeva okhala oofai wa Yehova. . . . [Mwaha wowiiyeviha] otthuveliwa wahu onrowa okhala wootepa oreera”. * Niireke yookhala etthu yootepa oloka ovikana omuhakalaliha Yehova?—Mir. 23:15.
9. Wiiyeviha onnikhaliherya sai waataana ni atthu akina?
9 Ohiya paahi omusiveliha Yehova, wiiyeviha onniniphwanyiha mireerelo. Maana wiiyeviha onniwiiriha atthu akina waataana ni hiyo. Moota xeeni? Nkahaya nwuupuwele atthu muniphavela anyu waataana. (Math. 7:12) Okhala wene, khonnisivela waataana ni mutthu onipaka itthu simmusivela paahi ni ohineemererya moonelo wa atthu akina. Moovirikana ni atthu awo, onninsivela okhala ni anna ni arokora vaavo ankhala aya ‘òkhupanyerya; ophenta ntoko axinna; okhala a ikharari ni òwìyeviha’. (1 Ped. 3:8) Akhala wira onninsivela okhala ni atthu oowiiyeviha, awo nave anoosiveliwaka okhala ni hiyo akhala wira naatthu oowiiyeviha.
10. Mwa enamuna xeeni wiiyeviha onkhweiherya aya okumi ahu?
10 Nave, wiiyeviha onnikhweiherya okumi ahu. Ekeekhai wira okathi mukina sinookhumelelaka itthu nnoona ahu wira ti soohiloka ni soohixariya. Mwene Salomoni yoowo aarina ankhili anceene aahimmye so: “Kihona ipottha sipakhiriwaka mukaroni, ni makhulupale yettaka vathí ntoko yari ipottha”. (Mus. 10:7) Okathi mukina, atthu yaale arina mikhalelo sa vameekhaaya khanttottopeliwa ntoko amphwanela aya. Nave okathi mukina, atthu yaale ahirina mikhalelo sa vameekhaaya, annittottopeliwa vanceene. Hata vaari siiso, Mwene Salomoni aahoona wira etthu yootepa otthuneya nikhanle ahu oopaka ori weemererya mukhalelo ahu ni ohiwehexexa itthu soohiloka. (Mus. 6:9) Akhala wira naatthu oowiiyeviha, nnimweemereryaka itthu sinikhumelela mookumini mwahu seiyo sihinnisivela.
ITTHU SIKHANLE OOWEEHERERYA WIIYEVIHA WAHU
Moota xeeni mikhalelo ntoko iya sikhanle aya ooweehererya wiiyeviha wahu? (Nwehe ittima 11-12) *
11. Xeeni ninreerela ahu wiiyeviha okathi ninvahiwa ahu miruku?
11 Khula nihiku, ninnikhalana eparakha ya wooniherya wira naatthu oowiiyeviha. Nrowe niwehe mikhalelo vakhaani nikhanle ahu oowooniherya wira naatthu oowiiyeviha. Okathi ninvahiwa ahu miruku. Nihaana osuwela wira mutthu onnivaha miruku ohiimananiha vanceene wira onikhaliherye, nave nihaana osyaka wuupuwela wira etthu nipanke ahu khahiyo yootepa otthekeya. Woonasa wene, etthu yoopacerya nimpaka ahu, oheemererya miruku ninvahiwa ahu. Naahiivahe ephoole pooti opacerya onvaanyiha mutthu owo wala wuupuwelaka wira onivanhe miruku mwa enamuna yoohiloka. Masi akhala wira naatthu oowiiyeviha mwekeekhai, nnookhalana moonelo wooloka voohimya sa miruku nivahiwe ahu.
12. Moovarihana ni Miruku 27:5, 6, xeeni vanreerela aya oxukhurela akhala wira noovahiwa miruku? Nvahe ntakiheryo.
12 Mutthu oowiiyeviha onnixukhurela vaavo onvahiwa awe miruku. Nkahaya muupuwele ela: Muupuwele wira muri Empa ya Omwene. Nuumala olavula ni anna anceene, munna mmosa onnoovekelani orowa ovaanela okhwipi vakhaani, olavulaka moohiiwanyeya onnihimya so: ‘Noohala ntikwa vakhaani mmainoni mwanyu’. Moohaanyiherya, nyuwo mwaamuuliwa muru. Masi niireke khimwaarowa omuxukhurela munna owo mwaha wowooleelani? Tthiri waamoosivelani vaakhanle wira mooleeliwa eyo khalai ene! Moolikanasa, akhala wira munna onniimananiha onivaha miruku, nihaana wiiyeviha ni omuxukhurela vanceene. Nave nihaana omuthokorerya munna owo ntoko mpatthani ihu ohiya ntoko nwanani ihu.—Musome Miruku 27:5, 6; aGal. 4:16.
Xeeni vari aya vooloka okhala mutthu oowiiyeviha okathi atthu akina anvahiwa aya iparakha? (Nwehe ittima 13-14) *
13. Ninrowa wooniherya sai wira naatthu oowiiyeviha okathi atthu akina anvahiwa aya iparakha?
13 Okathi atthu akina anvahiwa aya iparakha. Mutokweene oniihaniwa Jason onihimya so: “Okathi mukina, vaavo kinaawehaka anna akina avahiwaka iparakha, kinniikoha nthowa naya kahaathanliwa aka miyo”. Niireke mootoko okhalana moonelo ntoko wa munna Jason? Musuweleke wira khahiyo vootthekeya ophavela okhalana iparakha mmutthenkesoni 1 Tim. 3:1) Hata vari siiso, nihaana okhalana ephoole ni muupuwelo ahu. Maana naahikhalane ephoole, wiixinnuwiha pooti omaka vamurimani vahu. Mwa ntakiheryo, munna mmosa pooti opaceryaka wuupuwela wira yena paahi tonwerya ovara saana muteko mmulokoni. Aahiiso murokora pooti opacerya wuupuwela wira: ‘Iyaka paahi tonwerya ovara saana miteko waavikana anna akina!’ Akhala wira naatthu oowiiyeviha mwekeekhai, nnoosyaka moonelo wa wiixinnuwiha.
mwa Muluku. (14. Moonelo wa Moise onniixuttiha exeeni okathi atthu akina anvahiwa aya iparakha?
14 Moonelo wa Moise okathi atthu akina yaavahiwa aya iparakha onniniixuttiha etthu yuulupale. Moise aanixukhurela vanceene eparakha aarina awe ya okhala mukhulupale a aIsarayeli. Masi nihiku nimosa, Yehova aahaathanla atthu akina wira amukhaliheryeke Moise. Nto Moise oonenle sai? Owo khaakhalenle nrima. (Moth. 11:24-29) Maana aari mutthu oowiiyeviha, nto aahiweemererya atthu akina omukhaliherya waaphukela aIsarayeli. (Okhum. 18:13-24) Tthiri Moise khuupuwela wira iparakha sawe saari sootepa otthuneya waavikana aIsarayeli. Maana Moise aanisuwela wira yakhala atthu anceene aphukaka milattu, khivaarowa otthuneyaka aIsarayeli olipelela okathi munceene wira milattu saya siphukiwe. Tthiri Moise oonivaha ntakiheryo nooloka! Nihikhala-khale niliyalaka wira Yehova onnivaha efaita yinceene wiiyeviha wahu ovikana itthu ninwerya ahu opaka. Xontte, muupuweleke wira “Apwiya [Yehova], akhanleru alupalexa, annaphenta” atthu oowiiyeviha.—Esal. 138:6.
15. Marukunuxo xeeni yaaphwannye anna anceene?
15 Okathi wa marukunuxo. Iyaakha iya sookiserya, anna akhumme khalai omurumeela Yehova annivahiwa soothanleliwa sikina. Mwa ntakiheryo, mwaakha wa 2014 axitokweene a edistritu ni axaaraya, yaahivahiwa soothanleliwa isya. Nave Nikhuuru Noolamulela naahilakela wira okhuma mwaakha wa 2014, akhala wira mutokweene a esirkwiitu ookhalana iyaakha 70 khoneemereriwa-tho okhala mutokweene a esirkwiitu.
Nave akhala wira mutokweene onuuraanyiha nikhuuru na axitokweene ookhalana iyaakha 80, khoneemereriwa-tho okhala mutokweene onuuraanyiha nikhuuru na axitokweene mmulokoni. Ohiya-vo, anna anceene yaarumeela oBetheli aathanleliwa orowa okhala mapioneero. Anna akina yaavara muteko wa Muluku wa okathi wotheene yahaana ohiya mwaha wa owereyasiwa, waakhapelela amusi aya aahiiso mwaha wa mikhalelo sikina.16. Anna ni arokora anceene anooniherya sai wiiyeviha okathi wa marukunuxo?
16 Anna ni arokora anceene, khivaakhweelale weemererya marukunuxo awo. Maana yaahiviriha iyaakha sinceene avaraka muteko waasivela vanceene. Tthiri nuumala waaphwanya marukunuxo, anna ni arokora akina yaahiriipiwa murima mwaha woowi yaahaana olimalela soothanleliwa isya. Masi nuuvira okathi yaahipacerya olimalela. Mwaha wa xeeni? Mwaha woowi, anna awo annimphenta vanceene Yehova ovikana iparakha saya. Maana aasuwela wira yiivaherenrye wa Yehova, ohiya muteko, miritti wala iparakha yaarina aya. (aKol. 3:23) Awo annihakalala vanceene ovikaniha omurumeela Yehova moowiiyeviha mpakha vaniwerya aya. Anna awo ‘annihela mmatatani mwa [Yehova] ovelavela waya wothene’ asuwelaka wira onimwaakhapelela.—1 Ped. 5:6, 7.
17. Xeeni vanireerela aya otthara malakiheryo a Nuulumo na Muluku anihimya wira nihaana okhala oowiiyeviha?
17 Ninnixukhurela vanceene okhala wira Nuulumo na Muluku ninnintumererya okhala atthu oowiiyeviha! Tthiri vaavo nniiyeviha ahu ninniphwanya mireerelo hiyo ni atthu akina. Ninniwerya owanana saana mixankiho. Ohiya-vo, ninnikhalana waataana wooloka ni Tiithi ihu a wiirimu. Tthiri ti voohakalaliha osuwela wira hata Yehova ori ene ‘òvuwa’ ni a vasuluxa onnaaphenta ni onnaavaha efaita yinceene atthu oowiiyeviha!—Yes. 57:15.
NSIPO 45 Muupuwelo wa Murima Aka
^ etti. 5 Ti vooloka otheene ahu okhala atthu oowiiyeviha. Maana wiiyeviha mukhalelo wootepa otthuneya. Masi, wiiyeviha exeeni? Ninrowa okhala sai atthu oowiiyeviha? Itthu xeeni sikhanle ooweehererya wiiyeviha wahu? Mwaha ola, ninrowa othokorerya makoho awo ootepa otthuneya.
^ etti. 7 Nwehe mwaha oni: “Jeová tem lidado comigo de modo recompensador”, Despertai! 22 a Setembro, 1987.
^ etti. 8 Nwehe Muru 3, ettima 23.
^ etti. 53 OTTHOKIHERIWA WA EFOOTU: Murummwa Paulo ori ene etthoko ya munna ni maKristau makina waahela muhina anamwane. Owo khoniixoona okhala ootthuneya waavikana akina.
^ etti. 57 OTTHOKIHERIWA WA EFOOTU: Munna onneemererya miruku sa mBiibiliyani onvahiwa awe ni munna mmiravo.
^ etti. 59 OTTHOKIHERIWA WA EFOOTU: Munna oowuuluvala khommukhalela nrima munna mmiravo vaavo onvahiwa awe miritti mmulokoni.