1-2. Musuweli 11:6, onivarihana sai ni muteko woolaleya ihapari sooreera sa Omwene?

ILAPO SIKINA, atthu annisiveliwa ihapari sooreera, maana awo yaanilipelela owiriyana ihapari iyo. Masi ilapo sikina atthu akina khaniphavela owiriyana myaha voohimya sa Muluku wala Biibiliya. Ankhi muttetthe munikhala anyu, atthu onnaasivela owiriyana ihapari sooreera? Hata yeemereryaka wala nnaari, Yehova oniphavela wira nihihiye olaleya ihapari sooreera mpakha muteko woolaleerya omala.

² Yehova onnisuwela okathi muteko woolaleerya onrowa aya omala ni nihiku ‘olumwenku ola onrowa aya omala’. (Math. 24:14, 36) Nilipelelaka ophiya okathi owo, ninrowa owerya sai wiiwelela yooruma ya ohihiya matata ahu amumulaka? *—Mmusome Musuweli 11:6.

3. Mwaha ola, ninrowa othokorerya exeeni?

³ Mwaha ovinre, noothokorerya itthu xexe sinrowa onikhaliherya okhala “atothi àtthu” ooloka. (Math. 4:19) Mwaha ola, ninrowa othokorerya itthu tthaaru sinrowa onikhaliherya ohihiya olaleerya hata nikumanaka mixankiho. Itthu sene tiiya: (1) ti vooloka owehexexa muteko ahu woolaleerya, (2) opixa murima, ni (3) olipiha waamini wahu.

4. Xeeni vanireerela aya owehexexa muteko Yehova onivanhe awe?

⁴ Yesu aahihimya makhalelo a atthu ni itthu saarowa okhumelela mahiku ookiserya, nave aanisuwela wira itthu iyo sanwiiriha awiixutti awe ohihela nipuro noopacerya muteko woolaleerya. Nto aahaaleela so: “Mulipeleleke!” (Math. 24:42) Ehinatthi Epula ya Mutaaseke, atthu yaaniluttuweliwa ovara miteko saya sa khula  nihiku, nto eyo yaahiwiiriha ohiiwelela nlopolo na Nowe. (Math. 24:37-39; 2 Ped. 2:5) Etthu emosaru enniiraneya olelo-va, nto nihaana owehexexa ovara muteko Yehova onivanhe awe.

5. Moovarihana ni Miteko 1:6-8, muteko woolaleerya waarowa ovariwa mpakha woowi?

⁵ Olelo-va nihaana ohela nipuro noopacerya muteko woolaleya ihapari sa Omwene. Yesu aahihimya vahinatthi wira nuumala wiiviwa, atthareli awe yanvikaniha olaleya ihapari sooreera ni yaamwaaphwanya atthu anceene. (Yoh. 14:12) Nuumala Yesu wiiviwa, atthareli awe akina yaahitthikela muteko aya woototha ihopa. Nuumala ohihimuxiwa, Yesu aahipaka mwiiriirya ni aahaakhaliherya awiixutti awe ovara ihopa sinceene. Okathi ene yoole, Yesu aahaakhaliherya awiixutti awe woona wira muteko wowaatotha atthu tori wa faita ovikana miteko sikina. (Yoh. 21:15-17) Okathi vakhaani ohinatthi otthikela wiirimu, Yesu aahaaleela awiixutti awe wira muteko woolaleerya waarowa ovariwaka ilapo sikina ohiya wIsarayeli paahi. (Musome Miteko 1:6-8.) Iyaakha vakhaani muhoolo mwaya, Yesu aahimooniherya murummwa Yohani etthu yaarowa wiiraneya okathi wa “nihiku n’Apwiya”. * Yohani aahoona etthu yootikiniha vanceene, etthu ene tiila: Owo aahoona malaikha yaarina “molumo òhimala èhapari yorera” wira yaalaleerye “atthu a maloko othene ni a mahimo othene ni a malavulelo othene ni a ilapo sothene”. (Wis. 1:10; 14:6) Eyo enooniherya wira Yehova oniphavela wira nlaleyeke ihapari sooreera mpakha wanikisa ophiya.

6. Exeeni enrowa onikhaliherya ohela nipuro noopacerya muteko woolaleerya?

⁶ Etthu enrowa onikhaliherya ohela nipuro noopacerya muteko woolaleerya, ori wuupuwela moota Yehova onnikhaliherya awe. Mwa ntakiheryo, olelo-va nookhalana eyoolya yinceene yomunepani. Eyo enihela muhina iliivuru soowimpirimiriwa, eletroniko, audiyu, iviidiyu ni itthu  sikina siri mwinternetini. Nave nookhalana esaiti ahu jw.org, yeeyo erina iliivuru mattaava anivikana 1.000! (Math. 24:45-47) Olumwenku ola atthu tookawanyeya mwaha woowi annikhaliherya epoliitika, aakhalana itiini soovirikana, ni mwaha woowi akina toothaaciri akina toohaawa. Hata vari siiso, arumeyi a Muluku olumwenku wotheene anivikana imilyau 8 toowiiraana ntoko emusi emosa. Mwa ntakiheryo, Namathanu 19 a Abril a 2019, Anamoona a Yehova a olumwenku wotheene yaahiiraana othokorerya yoolepa ya nihiku. Ohiyu ene yoole, atthu 20.919.041 yaahithukumana wira yuupuwelele okhwa wa Yesu Kristu. Yaari eparakha yuulupale woona eyo yiiraneyaka. Tthiri eyo enniniiriha oluttuweliwa olaleya ihapari sooreera sa Omwene.

7. Ntakiheryo na Yesu ninrowa onikhaliherya sai ohela nipuro noopacerya muteko woolaleerya?

⁷ Etthu ekina enrowa onikhaliherya ohela nipuro noopacerya muteko woolaleerya, ori otthara ntakiheryo na Yesu. Owo kheemerenrye nnakhala etthu emosa emuhiihaka olaleya ikeekhai. (Yoh. 18:37) Okathi Satana anvanhe awe Yesu “omwene wothene wa mulaponi n’uvuwa waya”, Yesu khaamorenle muraakho owo wa Satana, nave kheemerenrye okhalihiwa mwene. (Math. 4:8, 9; Yoh. 6:15) Nnaamwi aalupatthiwa, Yesu khaahiyale ovara muteko awe ni khaaphavela okhala thaaciri. (Luka 9:58; Yoh. 8:59) Okathi waamini wahu oneehereriwa aya, nihihiye ohela nipuro noopacerya muteko ahu woolaleerya, nave nihaana otthara miruku sa murummwa Paulo. Owo aahaatumererya maKristau otthara ntakiheryo na Kristu ni ‘ohihiya ovara miteko saya’!—aHéb. 12:3.

8. Opixa murima exeeni, ni xeeni ori aya wooloka opixa murima niinaano-va?

⁸ Opixa murima ontaphulela olipelela etthu moomaaleleya mpakha muxankiho owo ovira. Okathi mukina ninnikumana mixankiho sinceene seiyo nimphavela ahu wira simale moowaakuveya, nave pooti wira yookhala etthu yoohakalaliha ninlipelela ahu, nto okathi owo hiyo nihaana opixa murima. Profeta Habakuki aaniphavela woona omanle ene otakhala oYuda. (Hab. 1:2) Awiixutti a Yesu yaanilipelela wira Omwene wa Muluku waamukhumelela voohilekela wira owoopole opuheriwa ni aRoma. (Luka 19:11) Nave hiyo ninnilipelela wira Omwene wa Muluku orwe, omalihe mixankiho ni oruuha murettele olumwenku wotheene. (2 Ped. 3:13) Masi nihaana opixa murima nlipelelaka ophiya okathi Yehova othanlale awe. Vano nkahaya nwehe moota Yehova onniixuttiha awe opixa murima.

9. Matakiheryo xeeni anooniherya wira Yehova toopixa murima?

⁹ Yehova ntakiheryo nooloka na mutthu oopixa murima. Ehinatthi Epula ya Mutaaseke, waahivira okathi munceene Nowe otekaka ekalawa ni olaleyaka exariya. (2 Ped. 2:5; 1 Ped. 3:20) Okathi Abrahamu aamukoha awe itthu sinceene Yehova voohimya sa moota yaarowa aya opwetexiwa epooma ya oSodoma ni oGomora, Yehova aahimpixerya murima. (Maph. 18:20-33) Saahivira iyaakha sinceene nloko na aIsarayeli nihiroromeleyaka wa Yehova, hata vari siiso Yehova aanapixerya murima. (Neh. 9:30, 31) Olelo-va, ninnoona wira Yehova onnipixa murima, maana nlelo onnaavaha eparakha atthu wira “erukunuxe murima”. (2 Ped. 3:9; Yoh. 6:44; 1 Tim. 2:3, 4) Vaavo nnuupuwela ahu ntakiheryo na Yehova, khamunoona wira nookhalana mathowa manceene wira nihihiye olaleya ni owiixuttiha atthu moopixa murima? Nave Yehova onniniixuttiha opixa murima ni nlikanyiho nri mBiibiliyani.

10. Nlikanyiho na mulimi niri Yakobo 5:7, 8, ninniixuttiha exeeni?

¹⁰ Mmusome Yakobo 5:7, 8. Nlikanyiho na mulimi ninniniixuttiha opixa murima. Ekeekhai  wira miri sinceene sinninnuwa mowaakuveya. Masi miri sikina opisa wunnuwa, otepexa wene iye siniima mihokorokho maana onnivira okathi wira sittokotthe. WIsarayeli wa khalai, miri saaniviriha miyeeri 6 wira sinnuwe. Mulimi aanaala epyo awe okathi yaapacerya aya orupa epula ni anihepha nuuvira epula ya eyiita. (Mar. 4:28) Opixa murima wa mulimi, ntakiheryo nooloka ninreerela ahu otthara. Masi khahiyo vookhweya opaka eyo.

11. Opixa murima onnikhaliherya sai okathi ninlaleerya ahu?

¹¹ Okhala wene, apinaatamu oohimalela aniphavela woona sookhumelela sa muteko aya moowaakuveya. Masi mulimi ohaana olipelela, maana ohaana opatthula, waala epyo, okhuwari, olimela ni okhapelela saana miri iyo. Nave muteko wowaapaka awiixutti ninvara ahu, nihaana wiimananiha. Nave onnivira okathi wira nimukhaliherye ole nimmusomiha ahu Biibiliya okumiha vamurimani vawe muupuwelo wa nthalu wira okhaleke mutthu oophenta. Akhala wira nnoopixa murima, mixankiho khasinrowa onikhulumula nave hata atthu akina yeemereryaka ihapari sooreera nnaalaleerya ahu, nihaana opixa murima. Musuweleke wira hiyo khanikhanle oomukhanyererya ole nimmusomiha ahu Biibiliya wira okhalane waamini woolipa. Muhiliyale wira hata awiixutti a Yesu, okathi mukina yaanipisa wiiwexexa ele Yesu aawiixuttiha awe. (Yoh. 14:9) Nave-tho muhiliyale wira muteko ahu waala ni okhuwari paahi, maana Muluku toninnuwiha.—1 aKor. 3:6.

12. Ninrowa wooniherya sai wira ninnipixa murima vaavo nnaalaleerya ahu amusi ahu ahikhanle Anamoona a Yehova?

¹² Okathi mukina vannivila opixa murima vaavo nnaalaleerya ahu amusi ahu ahikhanle Anamoona a Yehova. Malakiheryo ari Musuweli 3:1, 7 anoonikhaliherya vanceene. Awo ani: “Itthu sothene molumwenkuni-mu sokhalana okathi aya . . . okathi w’omàla n’ukathi w’ olavula”. Ikwaha sikina ti vooloka omaala ni ohiya wira  mweettelo ahu okhaleke tonlavula. Nave-tho ti vooloka ottottela mureerelo khula eparakha ninkhalana ahu wira naaleele ekeekhai. (1 Ped. 3:1, 2) Ti vooloka oluttuweliwa waalaleerya, owiixuttiha ni waapixerya murima atthu ootheene waahela muhina amusi ahu.

13-14. Matakiheryo xeeni a opixa murima ninreerela ahu otthara?

¹³ Matakiheryo a arumeyi oororomeleya a Muluku a khalai ni a mahiku ahu ala, anniniixuttiha opixa murima. Habakuki aanilipelela woona otakhala omanle ene, masi aahooniherya wira aanipixa murima vaavo aahimmye awe so: “Kinowehererya nipuro n’olipelela”. (Hab. 2:1) Murummwa Paulo aaniphavela omaliha muteko awe woolaleerya, masi owo khaahiyale ‘olaleya [moomalela] ehapari yorera’ moopixa murima.—Mit. 20:24.

¹⁴ Nkahaya nwehe ntakiheryo na anamathelana yaawo yaasomme exikola ya oGileadi. Nuumala exikola, awo yaahiroihiwa elapo ari aya Anamoona a Yehova vakhaani. Okhala wira elapo ele yaathanleliwe aya, atthu anceene khahiyo maKristau, nto anamathelana ale yaaphwanya atthu vakhaani paahi yaasiveliwa omusoma Biibiliya. Masi atthu akina yaarina aya eturma emosaru ya oGileadi yaawo yaarumeela ilapo sikina yaanaaleela ihapari soohakalaliha ahimyaka wira yaanikhalana soosoma sa Biibiliya saakela vahoolo. Masi anamathelana ale khiyaahiyale opixa murima, awo yaahivikaniha olaleerya moopixa murima nnaamwi atthu anceene a muttetthe ole yahaaphavela waawiriyana. Nuuvira iyaakha 8 alaleeryaka muttetthe ole yahaawiriyaniwa aya, yaahihakalala omoona ole yaamusomiha aya Biibiliya opatisiwaka. Matakiheryo ala a khalai ni a niinaano anniixuttiha exeeni? Arumeyi awo oororomeleya khiyaahiyale oluttuweliwa ni khiyaahiyale matata aya amumulaka, nto Yehova aahaareeliha mwaha woopixa murima. Nto nihaana otthara mweettelo “w’atthu ale anamini ni arina nthiti, ni siso anakhela sohiyeriwa Muluku salaihenryawe”.—aHéb. 6:10-12.

15. Waamini onnikhaliherya sai ohihiya oluttuweliwa olaleerya?

¹⁵ Hiyo Ninnaamini muhupi ninlaleya ahu, tivonto nnaalaleerya ahu atthu anceene nnaaphwanya ahu. Nave hiyo ninniroromela sooleiherya sa Muluku siri mBiibiliyani. (Esal. 119:42; Yes. 40:8) Ohiya mahiku ala, ninnoona siiraneyaka iprofesia sinceene sa mBiibiliyani. Nave ninnaaweha atthu anceene avarihelaka muteko malakiheryo a mBiibiliyani ni alokiheryaka mweettelo aya. Tthiri itthu iyo sinninikhaliherya woona wira atthu awo anniphavela owiriyana ihapari sooreera sa Omwene.

16. Moovarihana ni Esalimo 46:2-4, omuroromela Yehova ni Yesu onnikhaliherya sai ohihiya oluttuweliwa olaleerya?

¹⁶ Hiyo ninnimwaamini Yehova yoowo ori mwaneene muhupi ninlaleya ahu, nave-tho ninnimwaamini Yesu yoowo Yehova omuthanlale awe wira okhale mwene a Omwene awe. (Yoh. 14:1) Moohicikha mukhalelo ahu, Yehova khonrowa ohiya okhala ntthyawelo nahu ni ikuru sahu. (Musome Esalimo 46:2-4.) Ohiya-vo, hiyo ninniroromela wira ori ene wiirimu, Yesu onnihoolela muteko woolaleerya orumeelaka owerya ni ikuru ovahiwe ahu ni Yehova.—Math. 28:18-20.

17. Xeeni vanreerela aya ovikaniha olaleerya? Nvahe nlikanyiho.

¹⁷ Waamini onninikhaliherya okupali wira Yehova onooreeliha wiimananiha wahu, nto eyo enniiraneya mwa enamuna nahaalipelela ahu. (Mus. 11:6) Mwa ntakiheryo, atthu imilyau sinceene khula nihiku anniweha ikarinyu ni meesa ninlaleeryana ahu. Nto niireke olaleerya mwa enamuna eyo onnikhumela saana? Aayo, Orummwa Ahu wa Omwene, Novembro a 2014 aahimuhimya  muthiyana mmosa aasoma wuniversidade yoowo aalempe mwaha voohimya sa muteko wa Anamoona a Yehova. Muthiyana owo khaawenrye ophwanya empa ya Omwene ya Anamoona a Yehova. Masi aahoona meesa ni iliivuru sahu waattamela wuniversidade, nto aahiphwanya soohimmwa sikina wira ohele muhina wa mwaha awe. Muhoolo mwaya, owo oopatisiwa khukhala Namoona a Yehova nave vano onrumeela ntoko pioneera ookilaatheya. Sowiiraneya ntoko iyo sinninikhaliherya ohihiya olaleerya, nto eyo enninikhaliherya woona wira nlelo aakhala atthu aniphavela owiriyana muhupi wa Omwene.

18. Exeeni ennikupaliha wira muteko woolaleya Omwene onoomala okathi Yehova oniphavela awe?

¹⁸ Ninnikupali wira muteko woolaleerya, onoomala okathi Yehova othanlale awe. Nkahaya muupuwele ele yiiraneyale okathi wa Nowe. Yehova aahooniherya wira onnipaka itthu okathi wooreerela. Sihalaka iyaakha 120, Yehova aahihimya nihiku aarowa awe opacerya Mutaaseke. Iyaakha sinceene muhoolo mwaya, Yehova aahimuleela Nowe wira opake ekalawa. Woonasa wene, saahivira iyaakha 40 aahiiso 50 ohinatthi mutaaseke. Nto Nowe aaniluttuweliwa ovara muteko owo. Nnaamwi atthu yahanwiriyana Nowe, owo aahivikaniha olaleya muhupi woophukela wa Yehova mpakha okathi Yehova aamulenle awe wira ohele inama mukalawani. Nto okathi wooreerela Yehova aahitthuka ‘mukhora ottuli wa Nowe’.—Maph. 6:3; 7:1, 2, 16.

19. Ninrowa ophwanya exeeni naahihiye matata ahu amumulaka?

¹⁹ Ninnikupali wira moohipisa Yehova onoohimya wira muteko woolaleerya woomala, nto owo ‘onotthuka mukhora’ wa olumwenku wa Satana wira oruuhe olumwenku musya ni wa xariya. Nlipelelaka ophiya nihiku nno, nihaana omutakiha Nowe, Habakuki ni arumeyi akina yahaahiyale matata aya amumulaka. Nto muhihiye ohela nipuro noopacerya muteko woolaleerya, opixa murima ni omwaamini Yehova ni sooleiherya sawe.