1-2. Enamuna xeeni ya othukumelihiwa profeta Hagayo aahimmye awe oniiraneya olelo-va?

ATTHU AKINA yooponwe okathi wa etetere yaakhumelenle oNepal mwaakha wa 2015, yaahimmye so: “Minuutu vakhaani paahi ilooxa ni ipa sa khalai saahipacerya omora. Atthu otheene yaahixanka . . . Atthu anceene ahimmye wira etetere ele yaavirinhe minuutu miili paahi. Masi miyo kinoona wira yaahiviriha okathi munceene”. Tthiri vaakhanle wira nyuwo mwaahiviriha muxankiho muulupale ntoko ola, khimwaarowa oliyala.

² Olelo-va, ninniweha enamuna ekina ya othukumelihiwa elapo, ohiya othukumelihiwa epooma emosa wala muttetthe mmosa. Masi Yehova onnithukumeliha maloko otheene a moolumwenkuni. Nave opacenrye khalai othukumeliha maloko awo. Othukumelihiwa iwo wa maloko, waahihimmwa vahinatthi ni profeta Hagayo. Owo aalempe so: “Vano miyo, Apwiya òwerya sothene, kinohimeryani wira: Yavirá mahiku vakhani, miyo kinottikinya erimu ni vathí, elapo n’iphareya”.—Hag. 2:6.

3. Othukumelihiwa wa maloko Hagayo aahimmye awe ovirikanne sai ni etetere?

³ Enamuna ya othukumelihiwa profeta Hagayo aahimmye awe khahiyo ntoko etetere, yeeyo enihonona paahi. Ohiya-vo, enamuna ya othukumelihiwa Hagayo aahimmye awe ennikumiherya mireerelo. Yehova aahimmye so: “Kinimwathukumeliha atthu a maloko othene: mihakhu saya sinoruheliwa nno. Vano miyo kinosarya emp’ela ovuwa waka”. (Hag. 2:7) Eprofesia ela yaataphulela exeeni wa atthu ale yaakhala mahiku a Hagayo? Enitaphulela exeeni wa hiyo olelo-va? Mwaha ola, ninrowa waakhula makoho awo. Nave nnooweha moota nikhanle ahu ookhaliherya muteko wa othukumelihiwa maloko onivariwa olelo-va.

4. Xeeni Yehova aamurumme awe profeta Hagayo orowa waalipiha aYuda?

⁴ Yehova aahinvaha profeta Hagayo muteko wa efaita yinceene wira ovareke. Nkahaya muupuwele itthu siiraneyale ohinatthi Yehova onvaha muteko owo. Mwaakha 537 Kristu ohinatthi orwa, aYuda anceene yaahikhuma weepotthani oBabilonia arowaka oYerusalemu. Woonasa wene, Hagayo aari eriyari ya atthu awo. Moohipisa nuumala ophiya oYerusalemu, arumeyi ale oororomeleya a Yehova, yaahipacerya oteka empa ya Yehova wala etemplo. (Ézi. 3:8, 10) Masi moohipisa yaahikhumelela etthu yooriipiha murima. Awo yaahikhulumuwa ni yaahihiya oteka etemplo, mwaha woowi awanani aya yaahipacerya waalupattha. (Ézi. 4:4; Hag. 1:1, 2) Masi mwaakha 520 Kristu ohinatthi orwa, Yehova aahimuruma Hagayo wira aalipihe aYuda ni waatumererya omaliha etemplo. *—Ézi. 6:14, 15.

5. Xeeni muhupi wa Hagayo waalipinhe aya atthu a Muluku?

⁵ Yoolakela yuulupale ya muhupi wa Hagayo waari waalipiha aYuda ohihiya omwaamini Yehova. Moolipa murima, profeta Hagayo aahaalipiha aYuda ohimyaka wira: “Nyuwo atthu otheene. Mulipihe mirima sanyu: mutepeke ovara muteko. Tthiri miyo kiri ni nyuwo: miyo k’Apwiya òwerya sothene”. (Hag. 2:4) Woonasa wene, moolumo oowi ‘Apwiya òwerya sothene’ wala Yehova aanakhotto, yaahaalipiha vanceene aYuda. Yehova ookhalana muttitthi muulupale wa anakhotto a wiirimu, wala malaikha. Nto wira aYuda amalihe oteka etemplo, yaahaana omuroromela Yehova.

6. Muhupi wa Hagayo waarowa okumiherya exeeni?

⁶ Yehova aahimuruma Hagayo orowa waaleela aYuda wira owo aarowa othukumeliha maloko otheene. Muhupi ole waahaalipiha vanceene aYuda yaakhulumunwe ni yaahiyale oteka etemplo. Nave muhupi ole, waanooniherya wira Yehova aarowa othukumeliha elapo ya oPérsia, yeeyo yaari olamulelo wa olumwenku wotheene okathi ole. Othukumelihiwa iwo waarowa okumiherya exeeni? Yoopacerya, atthu a Muluku wala aYuda yammaliha oteka etemplo. Ya nenli, atthu yahaakhanle aYuda yaarowa omukokhorelaka Yehova etemplo ele yaamanle otekiwa. Tthiri muhupi ole waahaalipiha vanceene atthu a Muluku!—Zak. 8:9.

7. Muteko xeeni onithukumeliha elapo onivariwa olelo-va? Mutthokiherye.

⁷ Eprofesia ya Hagayo enitaphulela exeeni olelo-va? Olelo-va, Yehova onnithukumeliha maloko otheene, nto hiyo ninniirela mpantta othukumelihiwa iwo wa maloko. Nkahaya nwehe etthu enooniherya eyo: Mwaakha wa 1914, Yehova aahimukhaliha Yesu Kristu, Mwene a Omwene wa wiirimu. (Esal. 2:6) Vaavo Omwene waapacenrye aya olamulela, eyo yaahaariipiha murima anamalamulela. Maana yooniherya wira “okathi wa amalapo”, niire so, okathi ahaakhanle awe Mwene aalamulela aathanliwe ni Yehova waahimala. (Luka 21:24) Mwaha woosuwela eyo, otepexa wene mwaakha wa 1919, atthu a Yehova annilaleya wira Omwene wa Muluku paahi tonrowa omaliha mixankiho sa apinaatamu. Nto olaleiwa wa “ihapari iya sooreera sa Omwene” onnithukumeliha olumwenku wotheene.—Math. 24:14.

8. Moovarihana ni Esalimo 2:1-3, maloko manceene anoonela sai muhupi ninlaleya ahu?

⁸ Atthu anceene anoonela sai muhupi owo? Atthu anceene annikhootta muhupi owo. (Musome Esalimo 2:1-3.) Tthiri maloko otheene aaxanka. Awo annikhootta omweemererya Mwene othanliwe ni Yehova. Awo  khanikupali wira muhupi wa Omwene ninlaleya ahu ‘ihapari sooreera’. Tthiri ikuvernu sikina sinnikhoottiha muteko ahu woolaleerya. Nnaamwi anamalamulela anceene a ilapo iyo ahimyaka wira annimukokhorela Muluku, awo khaniphavela ohiya okhulupale aya. Ntoko anamalamulela a okathi wa Yesu, anamalamulela a olelo-va khanimphavela ole othanliwe ni Yehova, mwaha woowi annaalupattha atthareli awe.—Mit. 4:25-28.

9. Eparakha xeeni Yehova aavanhe awe awanani awe?

⁹ Yehova onoonela sai moonelo woohiloka wa maloko otheene? Esalimo 2:10-12 enaakhula so: “Vano, nyuwo mamwene, mukhalé atthu a miruku: nyuwo makhulupale a mulaponi, mulakeyeke. Murumeleni Muluku ni wova: mwattittimihe Apwiya n’uthukumela. Mwahiré siso, awo anonanariwa, nyuwo munimokhwa: owali aya onovarela nananoru. Òreriwa t’ale antthyawela wa Muluku!” Mooreerela murima, Yehova onnaavaha okathi awanani awe wira arukunuxe murima. Nto awo pooti orukunuxa muupuwelo aya ni weemererya Omwene wa Yehova. Masi okathi ohanle ori vakhaani. Hiyo ninkhala wanikisa wa “mahiku ookiserya” a olumwenku ola wootakhala. (2 Tim. 3:1; Yes. 61:2) Olelo-va, ti vootepexa otthuneya atthu otheene osuwela ekeekhai ela ni othanla omurumeela Yehova.

10. Mireerelo xeeni sinikhumelela mwaha wa othukumelihiwa maloko onilavuliwa Hagayo 2:7-9?

¹⁰ Atthu akina anneemererya othukumelihiwa wa maloko wa nthoonyeryo, profeta Hagayo aahimmye awe vahinatthi. Owo ohimmye wira othukumelihiwa wa maloko “mihakhu saya” wala atthu a murima saana a maloko otheene annithukumanyiwa wira amukokhoreleke Yehova. * (Mmusome Hagayo 2:7-9.) Profeta Yesaya ni Mikeya yaahihimya vahinatthi wira eyo yaamwiiraneya mahiku ookiserya.—Yes. 2:2-4; Mik. 4:1, 2.

11. Etthu xeeni munna mmosa aapanke awe nuumala wiiwa ekwaha yoopacerya muhupi wa Omwene?

¹¹ Nwehe moota muhupi wa othukumelihiwa maloko otheene, waamukhalihenrye aya  munna Ken, yoowo onirumeela eseedi ahu ya olumwenku wotheene. Mpakha-va, onnuupuwela ekwaha yoopacerya aiwale awe muhupi wa Omwene iyaakha 40 sivinre. Munna Ken onihimya so: “Ekwaha yoopacerya kaiwale aka ekeekhai ya Nuulumo na Muluku kaahihakalala vanceene wiixutta wira ninkhala mahiku ookiserya a olumwenku ola wootakhala. Kaahoona wira kaaphavelaka weemereriwa ni Muluku ni ophwanya okumi woohimala, kaahaana ohiya wiirela mpantta olumwenku ola woohiroromeleya ni okhala mpantta wa Yehova. Moohipisa, kaahinvekela Yehova ni kaahihiya wiirela mpantta olumwenku ni kaaheemererya okhapeleliwa ni Omwene wa Muluku, yoowo ohinrowa opwetexiwa”.

12. Mahiku ala ookiserya, etemplo ya omunepani ya Yehova enisareya sai ovuwa?

¹² Tthiri Yehova onnaareeliha atthu awe. Mahiku ala ookiserya ninniweha nincerereyaka nummuru na atthu animukokhorela Yehova. Mwaakha wa 1914, yaari atthu vakhaani paahi yaamukokhorela Yehova. Masi olelo-va, atthu aniluttuweliwa omukokhorela Yehova annivikana imilyau 8. Nave khula mwaakha atthu imilyau sinceene anniweha muthukumano wa Wuupuwelela. Nto nivate na etemplo ya omunepani ya Yehova, niire so, mareheryo Yehova opanke awe a okokhorela wekeekhai sinnisareya “mihakhu” sa maloko otheene. Nave nsina na Yehova ninnivuwihiwa vaavo atthu anipaka aya marukunuxo mookumini mwaya ni owara omutthu musya.—aEef. 4:22-24.

13. Iprofesia xeeni sikina siiraneyale saalavula wuncerereya wa atthu animukokhorela Yehova? (Nwehe efootu ya ekaapa.)

¹³ Sowiiraneya iyo soohakalaliha sinnimaliherya iprofesia sikina, ntoko eprofesia eri Yesaya ekapiitulu 60. Eversiikulu 22 enihimya so: “Etthoko anyu yamukhanixa enokhala muttitthi munjene: etthoko anyu yoyevaxa enokhala nloko nowatta atthu. Miyo, Apwiya, kinrowa omaliherya sothene vowakuveya, waphiyakaru okathi aya”. Okhala wira atthu anceene annipacerya omukokhorela Yehova ennikhumelela etthu yoohakalaliha vanceene. “Mihakhu” iyo, niire so, atthu awo anniruuha itthu sinceene anisuwela aya ni anniphavela olaleya “ihapari iya sooreera sa Omwene”. Mwaha waivaavo atthu a Yehova annirumeela itthu iyo  sinisuweliwa seiyo Yesaya aahimmye awe okhala ‘yolya y’amalapo’ wala eleeti ya amalapo. (Yes. 60:5, 16) Nto alopwana ni athiyana awo annilaleya ihapari sooreera ilapo 240 olumwenku wotheene ni sinnipakiwa iliivuru mattaava anivikana 1.000.

14. Yoothanla xeeni atthu otheene anireerela aya opaka niinaano-va?

¹⁴ Mahiku ala ookiserya, othukumelihiwa wa maloko onniwiiriha atthu opaka yoothanla. Niireke anookhaliherya Omwene wa Muluku, wala anrowa ororomelaka ikuvernu sa apinaatamu? Eyo yoothanla yuulupale khula mutthu onireerela awe opaka. Nnaamwi atthu a Yehova yiiwelelaka malamulo a elapo anikhala aya, awo khankhaliherya epoliitika. (aRom. 13:1-7) Maana annisuwela wira Omwene wa Muluku paahi tonrowa omaliha mixankiho sotheene sa apinaatamu. Omwene owo khahiyo wa valaponi vaava.—Yoh. 18:36, 37.

15. Eliivuru ya Wiisuupulula, enooniherya sai wira arumeyi oororomeleya a Yehova yaarowa weehereriwaka mahiku ookiserya?

¹⁵ Eliivuru ya Wiisuupulula, enihimya wira arumeyi oororomeleya a Yehova animweehereriwaka vanceene mahiku ala ookiserya. Weehereriwa iwo waarowa ohela muhina olupatthiwa vanceene. Ikuvernu sikina sa elapo ela saarowa okhoottiheryaka okokhorela wekeekhai ni sarowa waalupatthaka atthu otheene ahinikhaliherya ikuvernu saya. (Wiis. 13:12, 15) Awo yaarowa waakhanyererihaka “atthu otheene, acikhaani ni aalupale, athaaciri ni amasikhini, ale ootaphuwa ni ipottha, wira eheliwe ekanyeryo ntata naya noolopwana aahiiso vayuuci vaya”. (Wiis. 13:16) Khalai ipottha saaniheliwa ekanyeryo vayuuci, yeeyo yooniherya wira epottha eyo yaahikhala ni mwaneene. Mwa enamuna emosaru, atthu anceene olelo-va yaarowa oheliwa ekanyeryo ya nthoonyeryo ntata naya aahiiso vayuuci vaya. Nto enamuna atthu anuupuwela aya ni miteko saya saamooniheryaka wira anniirela mpantta ni annikhaliherya ikuvernu sa apinaatamu.

16. Xeeni vari aya vooloka niinaano-va olipiha ororomeleya wahu wa Yehova?

¹⁶ Niireke nnimweemererya oheliwa ekanyeryo ya nthoonyeryo ni okhaliherya ikuvernu sa apinaatamu? Ale anikhootta oheliwa ekanyeryo eyo, sinnaaphwanya mixankiho ni pooti waakhumelela ehasara. Eliivuru ya Wiisuupulula enihimya wira: “Ohikhale mutthu oniwerya othuma aahiiso otumiha etthu, ohikhanle yoole oheliwe ekanyeryo”. (Wiis. 13:17) Masi atthu a Muluku annisuwela etthu Muluku onrowa awe owiiriha atthu otheene aheliwe ekanyeryo, yaawo anilavuliwa Wiisuupulula 14:9, 10. Ohiya weemererya oheliwa ekanyeryo, awo anrowa olempwa ntata naya wira: “Miyo kawaya Apwiya” Yehova. (Yes. 44:5) Ola ti okathi ninreerela ahu olipiha ororomeleya wahu wa Yehova. Niira siiso, Yehova onoohakalala vanceene ni onoohimya wira hiyo naatthu awe!

17. Etthu xeeni ninreerela ahu osuwela voohimya sa opixa murima wa Yehova?

¹⁷ Mahiku ala ookiserya, Yehova onnipixa murima vanceene. Maana Yehova khoniphavela wira nnakhala mutthu mmosa opwetexiwe. (2 Ped. 3:9) Tthiri Yehova ohaavaha okathi wira atthu otheene attharuwe opaka itthu soohiloka ni othanla omurumeela. Masi opixa murima wa Yehova onoomala. Ale anrowa okhootta wiiwelela Omwene wa Muluku, enoowiiraneela etthu emosaru yaamwiiranenle Farawo okathi wa Moise. Yehova aahimuleela Farawo wira: “Kattharihenle oviruwa waka, kahana wotakhalihani nyuwo n’atthu anyu n’owereiwa: nyuwo mwamurimela mulaponi-mu. Masi kowòpolani, wira kothonyeryeni ikuru saka, wira nsina naka nivuwihiwe mulaponi  mothene”. (Okhum. 9:15, 16) Nto okathi owo, maloko otheene anoosuwela wira Yehova paahi tori Muluku ekeekhai. (Ezek. 38:23) Eyo enrowa wiiraneya sai?

18. (a) Enamuna xeeni ya oxekexiwa enilavuliwa Hagayo 2:6, 20-22? (b) Ninsuwela sai wira moolumo a Hagayo anrowa wiiraneya muhoolo?

¹⁸ Sivinre ene iyaakha sinceene Hagayo okhwiiye ene, murummwa Paulo aahaalepela aHeeberi moolumo ari Hagayo 2:6, 20-22 yaawo anrowa wiiraneya muhoolo. (Mmusome.) Paulo aalempe so: “Okathi ole, nsu na Muluku naahixekexa elapo ya vathi, masi vano owo ooleiherya wira: ‘Nave-tho, nkinrowa ottikinya elapo ya vathi paahi, masi kinoottikinya-tho erimu’. Nuulumo noowi ‘nave-tho’, nnooniherya wira Muluku onrowa okumiha itthu sixekexiwe, seiyo sihipakiwe ni Muluku, wira sihale iye sihixekexiwe”. (aHeeb. 12:26, 27) Oxekexiwa onilavuliwa eliivuru ya aHeeberi woovirikana ni othukumelihiwa wa maloko onilavuliwa Hagayo 2:7. Oxekexiwa iwo onooniherya wira atthu ale ari ntoko Farawo, yaawo anrowa okhootta weemererya wira Yehova tori namalamulela anrowa opwetexiwa voomalela.

19. Etthu xeeni ehinrowa oxekexiwa ni ninsuwela sai?

¹⁹ Etthu xeeni ehinrowa oxekexiwa wala opwetexiwa? Paulo ohimmye so: “Tivonto, niimananiheke wira nihihiye ottottela mureerelo oreera murima wuulupale wa Muluku, weiwo onnikhaliherya omurumeela Muluku ntoko oniphavela awe, nimoovaka ni omuttittimiha”. (aHeeb. 12:28) Nuumala ovira oxekexiwa wookiserya, Omwene wa Muluku paahi tonrowa ohala, owo onrowa okhala wa mahiku otheene!—Esal. 110:5, 6; Dan. 2:44.

20. Yoothanla xeeni atthu anireerela aya opaka ni ninrowa waakhaliherya sai opaka yoothanla yooloka?

²⁰ Ola khahiyo okathi wowiikhuraana! Hiyo nihaana othanla akhala wira ninrowa okhaliheryaka olumwenku yoowo onrowa opwetexiwa. Aahiiso ninrowa wiimananihaka weettela ele Muluku oniphavela awe, yeeyo enrowa onikhaliherya ophwanya okumi woohimala. (aHeeb. 12:25) Nnoowerya waakhaliherya atthu anceene opaka yoothanla yooloka naalaleeryaka ihapari sooreera. Nto niimananiheke waakhaliherya atthu anceene othanla okhaliherya Omwene wa Muluku. Nave nihiliyale moolumo a Pwiya ahu Yesu, yoowo aahimmye so: “Ihapari iya sooreera sa Omwene sinoolaleiwa elapo yotheene, wira atthu otheene yiiwe. Vano, olumwenku ola omaleke”.—Math. 24:14.