1. Waataana xeeni apinaatamu arina aya ni Yehova?

YEHOVA onnaaphenta vanceene atthu otheene animukokhorela, omuhela muhina Yesu yoowo ‘opacenrye opattuxiwa mwa itthu sotheene’ ni malaikha. (aKol. 1:15; Esal. 103:20) Okathi aari awe valaponi, Yesu aahooniherya wira apinaatamu oororomeleya pooti omuthokorerya Yehova ntoko Tiithi aya. Olavulaka ni awiixutti awe, Yesu aahimuhimya Yehova okhala ‘Tiithi awe yoowo-tho, okhanle Tiithi aya’. (Yoh. 20:17) Nave vaavo nniivahererya ahu wa Yehova ni opatisiwa, ninniirela mpantta emusi yoophenta ya anna ni arokora ya olumwenku wotheene.—Mar. 10:29, 30.

2. Mwaha ola, ninrowa othokorerya exeeni?

² Atthu akina onnaavila omuthokorerya Yehova ntoko Tiithi oophenta. Akina khanisuwela moota wowooniherya waaphenta waya anna ni arokora. Mwaha ola, ninrowa othokorerya moota Yesu onnikhaliherya awe omuthokorerya Yehova ntoko Tiithi oophenta ni moota nikhanle ahu ookhalana waataana wooloka ni Yehova. Nave nnooweha inamuna nikhanle ahu oomutakiha Yehova vaavo nnaathokorerya ahu anna ni arokora.

3. Nivekelo na ntakiheryo na Yesu ninnikhaliherya sai omwaattamela Yehova?

³ Yehova Tiithi oophenta. Nave Yesu oniphavela wira nimuthokoreryeke Yehova ntoko yena onimuthokorerya awe. Ntoko namuyari ookhweya olavulana ohiya ntoko mutthu oopuherya. Nivekelo na ntakiheryo Yesu aawixuttinhe awe arumeyi awe, ninnooniherya eyo. Owo aapacerinhe ni moolumo oowi: “Tiithi ihu”. (Math. 6:9) Yesu oonitumererya omuhimya Yehova okhala ‘Nanwerya sothene’, ‘Mpattuxa’ ni ‘Mwene a mahiku otheene’. Khahiyo vootakhala orumeela maihaneliwo awo a nttittimiho mwaha woowi Biibiliya onnirumeela omuhimyaka Yehova.  (Maph. 49:25; Yes. 40:28; 1 Tim. 1:17) Masi Yesu oonitumererya omwiitthana Yehova okhala “Tiithi”.

4. Ninsuwela sai wira Yehova oniphavela wira nimwaattameleke?

⁴ Niireke vannoovilani omuthokorerya Yehova ntoko Tiithi oophenta? Atthu akina onnaavila. Vannivila omuthokorerya Yehova okhala Tiithi oophenta akhala wira paapa ahu khaanithokorerya saana. Masi ti voomaaliha osuwela wira Yehova onnisuwela oratteene moonelo ahu! Nave owo oniphavela onaattamela. Tivonto Nuulumo nave ninhimya aya wira: “Mmwaattameleke Muluku, vano owo onoowaattamelani”. (Yak. 4:8) Yehova onniniphenta vanceene ni oniphavela okhala Tiithi ahu oolokexa.

5. Moovarihana ni Luka 10:22, Yesu onnikhaliherya sai omwaattamela Yehova?

⁵ Yesu onoowerya onikhaliherya omwaattamela Yehova. Maana Yesu aanimusuwela oratteene ni aahooniherya moomalela mikhalelo sa Tiithi awe okathi aari awe valaponi. Tivonto Yesu aahimmye awe wira: “Ole okiwenhe, nave-tho ohaaweha Atiithi”. (Yoh. 14:9) Ntoko muulupale ahu, Yesu onoowerya oniixuttiha moota woomuttittimiha ni omwiiwelela Tiithi ihu. Nave moota nikhanle ahu ookhootta opaka itthu saarowa omuriipiha murima ni okhalana waataana wooloka ni yena. Nave-tho Yesu onninikhaliherya osuwela oratteene wira Yehova tooreera murima ni toophenta. (Mmusome Luka 10:22.) Nrowe nithokorerye matakiheryo vakhaani.

6. Nvahe matakiheryo anooniherya wira Yehova aaniwiriyana mavekelo a Yesu.

⁶ Yehova onnaawiriyana oratteene anaawe. Nkahaya nwehe moota Yehova anwiriyana awe Mwanawe oopacerya. Yehova aahiwiriyana mavekelo manceene Mwanawe aapanke awe okathi aari awe valaponi. (Luka 5:16) Nave Yehova aahiwiriyana mavekelo a Yesu vaavo aaphavela awe opaka soothanla suulupale ntoko waathanla arummwa awe 12. (Luka 6:12, 13) Nave-tho Yehova aahiwiriyana mavekelo a Yesu vaavo owo aaxanka awe. Ohalaka okathi vakhaani wira ovarihiwe ni Yuda, Yesu aahinvekela Tiithi awe wira omukhaliherye itthu saarowa omukhumelela moohipisa. Khahiyo wira  Yehova aawiriyana mavekelo Yesu aapaka awe paahi, masi-tho owo aahiruma nlaikha wira namulipihe Mwanawe ole amphentexa awe.—Luka 22:41-44.

7. Munoonela sai osuwela wira Yehova onniwiriyana ni waakhula mavekelo ahu?

⁷ Olelo-va, Yehova onniwiriyana mavekelo a arumeyi awe. Nave onnaakhula okathi wooreerela. (Esal. 116:1, 2) Murokora mmosa a wÍndia, aahoona wira Yehova onnaakhula mavekelo awe. Owo aanixanka ni oriipiwa murima vanceene. Nto Yehova aahaakhula mavekelo a murokora ole voohimya sa muxankiho awe. Murokora ole, olempe so: “Eprograma ya JW Broadcasting^® ya Maio 2019, yaahilavula itthu nikhanle ahu oopaka akhala wira ninnixanka wala oriipiwa murima. Nto eprograma ele yaari waakhuliwa wa mavekelo aka”.

8. Mwa enamuna xeeni Yehova oonihenrye awe wira aanimphenta Yesu?

⁸ Yehova onniniphenta ni onikhapelela ntoko amphenta awe ni omukhapelela Yesu okathi aari awe valaponi. (Yoh. 5:20) Owo aahimukhaliherya Yesu olipiha waamini wawe, aahimukhaliherya vaavo aaxanka awe ni aahinvaha itthu sotheene saamuthowa. Nave Yehova aahimuleela Yesu wira aanimphenta vanceene ni aanimuhakalaliha. (Math. 3:16, 17) Okhala wira okathi wotheene aanikhaliheriwa ni Tiithi awe a wiirimu, Yesu khoona wira aari mekhawe.—Yoh. 8:16.

9. Itthu xeeni sinooniherya wira Yehova onniniphenta?

⁹ Ntoko Yesu, otheene ahu ninnoona wira Yehova onniniphenta mwa inamuna soovirikana. Nkahaya muupuwele ela: Yehova ooneemererya okhala apatthani awe ni oonivaha eparakha ya okhalana anna ni arokora yaawo annihakalaliha ni annilipiha okathi wa mixankiho. (Yoh. 6:44) Nave Yehova onninivaha itthu sinnikhaliherya olipiha mukhalelo ahu womunepani. Ohiya-vo, Yehova onninivaha khula nihiku itthu sa weerutthuni. (Math. 6:31, 32) Nto vaavo nnoona ahu wira Yehova onniniphenta, omphenta wahu onnitepa olipa.

10. Enamuna Yehova onaaphenta awe anna ni arokora enniixuttiha exeeni?

¹⁰ Yehova onnaaphenta vanceene anna ni arokora. Masi khivanikhweya okathi wotheene wooniherya wira ninnaaphenta anna ni arokora. Mwaha wa xeeni? Mwaha woowi otheene ahu niyariwe ilapo soovirikana ni nookhalana makhalelo oovirikana. Nave otheene ahu ninnivonya, nto pooti opaka itthu sinrowa waanyoonyiha atthu akina. Masi otheene ahu nihaana wiimananiha olipiha waaphenta wahu anna ni arokora. Moota xeeni? Nitakihaka enamuna Tiithi ihu a wiirimu Yehova onaaphenta awe anna ni arokora. (aEef. 5:1, 2; 1 Yoh. 4:19) Nrowe niwehe itthu ntakiheryo na Yehova ninniixuttiha aya.

11. Yesu oonihenrye sai “othunku” wa Yehova?

¹¹ Yehova toothunku vanceene. (Luka 1:78) Mutthu oothunku, tuule oniihela nipuro na atthu ale anihaawa, nuumala-vo onaavya inamuna soomukhaliherya ni ommaaliha mutthu owo. Enamuna Yesu aathokorerya awe atthu, aahooniherya oratteene wira Yehova onnaakhapelela wala onniwoonela othunku atthu otheene. (Yoh. 5:19) Okathi aawenhe awe muttitthi muulupale wa atthu, Yesu aahiwoonela othunku okhala wira yaari ntoko “ipwittipwitthi soovulalihiwa ni soonyanyaliwa, sihirina makampusi aya”. (Math. 9:36) Yesu khahiyo paahi aamwaaphenta atthu ale, masi-tho aahipaka etthu wira aakhaliherye maana aahaapenuxa wala waavoniha ale yaawereiwa ni aahaakhaliherya atthu otheene ‘yaavenle ni yaalemeliwe’.—Math. 11:28-30; 14:14.

12. Ninrowa wooniherya sai wira ninniwoonela othunku anna ni arokora?

¹² Nihinatthi owoonela othunku ni waathokorerya anna ni arokora, nihaana osuwela mixankiho  aniwanana aya. Mwa ntakiheryo pooti wira murokora mmosa, onimakela owereyasiwa. Yena pooti wira khotonko ohimya muxankiho awe. Masi woonasa wene, owo aamuxukhurela vanceene okhaliheriwa. Niireke onniwerya okhapelela emusi awe? Niireke onniwerya opaka yoolya wala orattela empa awe? Pooti wira ookhala munna oomoliwe omutekoni wawe. Hiyo pooti onvaha musurukhu ni omukhaliherya mpakha ophwanya muteko mukina.

13-14. Ninrowa otakiha sai ovaha wa Yehova?

¹³ Yehova, Muluku oovaha. (Math. 5:45) Nto nihaalipeleleke anna ni arokora onivekela wira naakhaliherye ni owoonela othunku. Nihaana omutakiha Yehova nipaceryaka waakhaliherya anna awo, ohiya waalipelela anna awo onivekala nikhaliheryo. Mwa ntakiheryo, khula nihiku Yehova onnikumiha nsuwa hata nihinvekenle! Atthu otheene annittottela mureerelo nsuwa hata atthu yale ahinimuxukhurela. Niireke khamunikupali wira mwaha wa Yehova onivaha itthu sotheene sinnithowa, owo onnooniherya oniphenta vanceene? Hiyo ninnimphenta vanceene Yehova mwaha woowi owo tooreera murima ni toovaha!

¹⁴ Amutakihaka Tiithi ihu a wiirimu, anna ni arokora anceene annaavaha atthu akina. Mwa ntakiheryo, mwaakha wa 2013 sikoloni Haiyan aahinyaanya vanceene oFilipinas. Anna ni arokora anceene ipa saya saahinyaanyeya ni yaahipweteiwa mireerelo saya. Masi anna ni arokora a olumwenku wotheene yaahaakhaliherya. Anna ni arokora anceene yaahivaha musurukhu aya wala okhaliherya otthikela otekiwa ipa saya. Nto ehinatthi ovira eyaakha, saahilokiheriwa wala otekiwa ipa 750! Okathi wa oretta wa COVID-19 wala koronaviru, anna anceene yaahiimananiha waakhaliherya anna ni arokora akina. Tthiri vaavo nnaakuvela ahu waakhaliherya anna ni arokora, ninnooniherya wira ninnaaphenta vanceene.

15-16. Moovarihana ni Luka 6:36, etthu xeeni ninreerela ahu opaka wira nimutakihe Tiithi ihu a wiirimu?

¹⁵ Yehova toomoriwa ikharari ni toolevelela. (Mmusome Luka 6:36.) Khula nihiku, ninniweha wira Tiithi ihu a wiirimu onninimorela ikharari ni onninlevelela. (Esal. 103:10-14) Awiixutti a Yesu yaari oohimalela, niire so, yaanivonya. Masi hata vaari siiso, owo aanaamorela ikharari ni aanaalevelela. Owo oovaha okumi  awe wira nileveleliwe itampi sahu. (1 Yoh. 2:1, 2) Niireke khamunoona wira omoriwa ikharari ni olevelela wa Yehova ni Yesu onninikhaliherya omwaattamela?

¹⁶ Nnoolipiha waaphenta wahu anna ni arokora, ‘naalevelelaka ni murima wotheene’. (aEef. 4:32) Ekeekhai wira vanitthuneya wiimananiha okathi wotheene wira naalevelele atthu akina. Murokora mmosa aahisoma erevista Owehaweha mwaha oni: “Mulevelelaneke Ni Murima Wotheene”. * Mwaha ole, waahimukhaliherya vanceene waalevelela atthu akina. Murokora ole, olempe so: “Mwaha ola, wookikhaliherya vanceene woona wira waalevelela atthu akina onookiphwanyiha mireerelo sinceene. Mwaha ole, waahitthokiherya wira waalevelela atthu akina, khontaphulela wira etthu apanke aya ti yooloka wala kheniwereyale. Masi vaavo nnaalevelela ahu hiyo khanimpweha mathowa vamurimani ni ninnikhalana murettele”. Tthiri, vaavo nnaalevelela ahu ni murima wotheene anna ni arokora ninnooniherya wira ninnaaphenta ni nimphavela omutakiha Tiithi ihu Yehova.

17. Moovarihana ni Matheyo 5:16, ninrowa onvuwiha sai Tiithi ihu a wiirimu?

¹⁷ Eparakha yuulupale wiirela mpantta emusi ya olumwenku wotheene ya anna ni arokora yaawo aniphentana mukina ni mukhwaawe. Nave nimphavela wira atthu anceene atakaahane ni hiyo wira nimukokhoreleke Muluku ahu. Nuupuwelaka eyo, nihaana wiimananiha ohipaka etthu yaarowa owiiriha atthu akina okhalana moonelo woohiloka voohimya sa arumeyi a Yehova. Nto nihaana okhalana mweettelo wooloka wira niwiirihe atthu akina ophavela omusuwela ni omurumeela Yehova.—Mmusome Matheyo 5:16.

18. Etthu xeeni enrowa onikhaliherya olaleerya moolipa murima?

¹⁸ Okathi mukina, atthu akina pooti onilavula voohiloka wala onilupattha mwaha woowi ninnimwiiwelela Tiithi ihu a wiirimu. Nihaana opaka exeeni akhala wira ninnoovelela waalaleerya atthu akina? Nikupaliki ni murima wotheene wira Yehova ni Mwanawe anoonikhaliherya. Yesu, aahaaleela awiixutti awe wira khiyaareerela  oxanka voohimya sa etthu yaarowa aya olavula wala ohimya. Mwaha wa xeeni? Yesu aahimmye so: “Ewoora ene yeeyo, munoosuwela etthu yoolavula. Veekeekhai, khahiyo nyuwo munrowa olavula mekhinyu, masi munepa wa Tiithi inyu, tonrowa wookhaliheryani olavula”.—Math. 10:19, 20.

19. Nvahe ntakiheryo na mutthu aalalenrye moolipa murima.

¹⁹ Nwehe yowiiraneya ya Robert. Iyaakha sinceene sivinre vaavo aapacenrye awe niinaano omusoma Biibiliya ni ahaasuwela awe itthu sinceene sa mBiibiliyani, owo aahaana orowa etribunaali ya wÁfrica do Sul wira amutthokiherye juiz etthu yaamwiiriha ohirowa okhottoni. Moolipa murima, Robert aahimutthokiherya juiz wira khaaphavela wiirela mpantta ekhotto mwaha woowi aanaaphenta vanceene axinnawe makristau. Owo aanivaha efaita yinceene opuro awe mweemusini mwa Yehova! Moottharelana, juiz aahimukoha Robert wira: “Anninyu awo tani?” Robert, khuupuwela wira aamukohiwa nikoho nne, masi moowaakuveya aahuupuwela yoolepa emosa. Yoolepa ene yaari ya Matheyo 12:50, yeeyo enihimya so: “Ole onipaka etthu oniphavela awe Tiithi aka ori wiirimu, yoowo tokhanle munnaka, murokoraka ni maama aka”. Nnaamwi Robert aapacenrye omusoma Biibiliya niinaano, munepa woowaarya wa Yehova waahimukhaliherya waakhula nikoho nne ni makoho makina ahaalipelela awe. Tthiri Robert aahimuhakalaliha vanceene Yehova! Nave, Yehova onnihakalala vaavo nimmuroromela ahu ni olaleerya moolipa murima hata nirina ene mixankiho.

20. Etthu xeeni otheene ahu ninreerela ahu opaka? (Yohani 17:11, 15)

²⁰ Otheene ahu, nihihiye ovaha efaita wiirela mpantta emusi ela yoophenta vanceene. Hiyo nookhalana Tiithi ootepexa oloka ni anna ni arokora anceene yaawo anniphenta. Masi nihiikhuraane, mwaha woowi Satana oniphavela oniiriha waanyiherya akhala wira Tiithi ihu a wiirimu onniniphenta wala nnaari ni ohonona wiiraana nirina ahu ni anna ni arokora. Yesu oonivekelela wira Tiithi ihu ohihiye onikhapelela ni wira nivikaniheke okhala oowiiraana. (Mmusome Yohani 17:11, 15.) Nto Yehova onnaakhula nivekelo nne na Yesu. Nimutakihaka Yesu, nihikhala-khale naanyiheryaka wira Tiithi ihu a wiirimu onniniphenta ni onninikhaliherya. Nto otheene ahu, nihihiye olipiha waataana wahu ni anna ni arokora.