1-2. (a) Moovarihana ni Miruku 16:31, niwooneleke sai anna ni arokora oowuuluvala? (b) Mwaha ola, ninrowa waakhula makoho xeeni?

EPOOMA ya wArkansas, wEstados Unidos, yookhala eparkhi vanikhweya aya ophwanya idiamante siri ene vathi. Atthu anceene khanivaha efaita idiamante iyo mwaha woowi nlelo khasireerihiwe.

² Mwa enamuna emosaru, anna ni arokora oowuuluvala ari ntoko ediamante, maana awo aakhalana efaita yinceene. Biibiliya onnilikanyiha ipwi ni ekorowa. (Musome Miruku 16:31; 20:29) Masi atthu akina pooti ohaavaha efaita anna ni arokora oowuuluvala. Amiravo ahaana osuwela wira anna oowuuluvala anoowiixuttiha itthu sinceene sa efaita ovikana mihakhu. Mwaha ola, ninrowa waakhula makoho mararu: Xeeni Yehova onaavaha awe efaita anna ni arokora oowuuluvala? Xeeni anna oowuuluvala arina aya efaita yinceene mmutthenkesoni mwa Yehova? Ntakiheryo naya ninniixuttiha exeeni?

3. Moovarihana ni Esalimo 92:13-16, xeeni Yehova onaavaha awe efaita anna ni arokora oowuuluvala?

³ Yehova onnaavaha efaita anna ni arokora oowuuluvala. Owo onniweha ele eri vamurimani va anna ni arokora awo, onnisuwela ni onnivaha efaita yinceene mikhalelo sooloka arina aya. Yehova onnisiveliwa vanceene vaavo anna oowuuluvala aniwiixuttiha aya amiravo itthu anisuwela aya ni yiixuntte aya iyaakha sotheene avirinhe aya amurumeelaka Yehova. (Yobi 12:12; Mir. 1:1-4) Nave, Yehova onnivaha efaita ovilela wa anna ni arokora oowuuluvala. (Mal. 3:16) Anna ni arokora awo oowuuluvala aakumana mixankiho sinceene mookumini mwaya. Hata vari siiso, awo aalipiha  omwaamini waya Yehova. Vano nlipelelo naya na muhoolo ti noolipa ovikana okathi yiixuntte aya ekeekhai. Yehova onnaaphenta vanceene anna awo, mwaha woowi hata yuuluvanle ene khanihiya olaleya nsina nawe.—Musome Esalimo 92:13-16.

4. Etthu xeeni ekhanle oowaamaaliha anna ni arokora oowuuluvala?

⁴ Akhala wira moopacerya wuuluvala, mukupaliki ni murima wotheene wira Yehova onnuupuwela itthu sotheene mpanke anyu khalai. (aHeeb. 6:10) Nyuwo mookhaliherya vanceene muteko woolaleerya, nto eyo ennimuhakalaliha vanceene Tiithi ihu a wiirimu. Nave moovilela mixankiho sinceene sikina sootepa oxankiha, mookhaliherya malamulo a xariya a mBiibiliyani, mwaahikhalana miritti sinceene mmutthenkesoni mwa Yehova ni moowiixuttiha atthu akina. Ohiya-vo, nyuwo muhiimananiha vanceene otthara marukunuxo anipakiwa mmutthenkesoni mwa Yehova. Nave muhaakhaliherya ni waatumererya ale anivara muteko wa Muluku wa okathi wotheene. Vaavo ororomeleya wanyu onincerereya aya, Yehova onnitepa woophentani. Musuweleke wira Yehova ooleiherya wira “khananyanyala apatthani awe”. (Esal. 37:28) Yehova onnaalipiherya atthu oowuuluvala wira: “Kinimokhapelelani-tho mpakha vanùluvalanyu: kinimokuxani-tho mpakha mahiku othene”. (Yes. 46:4) Nto muhuupuweleke wira okhala muhuuluvala khamurina efaita mmutthenkesoni mwa Yehova. Ohiya-vo, musuweleke wira nyuwo mookhalana efaita yinceene!

5. Etthu xeeni anna ni arokora oowuuluvala anireerela aya ohiliyala?

⁵ Anna ni arokora oowuuluvala anoowerya okhaliherya mutthenkeso wa Yehova mwa inamuna soovirikana. Ekeekhai wira awo kharina ikuru ntoko yaarina aya khalai, masi okathi wotheene avirinhe aya amurumeelaka Yehova, awo aakhalana sookumanana sinceene. Nto anoowerya okhaliherya mutthenkeso wa Yehova mwa inamuna soovirikana. Tthiri matakiheryo anittharelana a arumeyi a Yehova a khalai ni a mahiku ahu ala, animooniherya wira anna ni arokora oowuuluvala aakhalana efaita yinceene.

6-7. Matakiheryo xeeni a mBiibiliyani aatthu oowuuluvala yaareelihiwe ni Yehova?

⁶ Biibiliya ookhalana matakiheryo ooloka a arumeyi a Yehova oororomeleya yahaahiyale  ovara muteko awe hata yuuluvanle ene. Mwa ntakiheryo, Moise aapacenrye orumeela ntoko profeta a Yehova orina ene iyaakha 80 ni aari namitthaka a nloko na aIsarayeli. Okathi Daniyeli aarina awe iyaakha saavikana 90, Yehova khaahiyale omurumeela ntoko profeta. Nave vanikhala ntoko wira murummwa Yohani aarina iyaakha sinivikana 90 vaavo aarummwale awe olepa eliivuru ya Wiisuupulula.

⁷ Arumeyi anceene a Yehova oororomeleya khahiyo yaari atthu oovuwa. Woonasa wene, atthu anceene khiyaasuwela. Hata vari siiso, Yehova aaniweha itthu yaapaka aya ni aahireeliha ororomeleya waya. Mwa ntakiheryo, Biibiliya onnimulavula mulopwana iihaniwa Simeyoni, yoowo ‘aari naxariya ni aamoova Muluku’. Masi Yehova aanimusuwela oratteene Simeyoni ni aahinvaha eparakha ya onweha Yesu ni opaka iprofesia voohimya sa Yesu ni maama awe. (Luka 2:22, 25-35) Nave nkahaya muupuwele ntakiheryo nooloka na profeta Ana. Hata aarina iyaakha 84 owo ‘khaacompa mithukumano’. Biibiliya onihimya wira “khaacompela orowa otemplo”. Nto Yehova aahimureeliha vanceene onvahaka eparakha ya onweha Yesu. Vannooneya oratteene wira Yehova aaninvaha efaita yinceene Simeyoni ni Ana.—Luka 2:36-38.

8-9. Nvahe ntakiheryo nnooniherya wira arokora anaamukhweli aakhalana efaita mmutthenkesoni mwa Yehova.

⁸ Olelo-va, aakhala anna ni arokora oowuuluvala anaavaha ntakiheryo nooloka amiravo. Nwehe yowiiraneya ya murokora Lois Didur. Owo aapacenrye orumeela ntoko pioneera a vameekhaaya oCanadá orina ene iyaakha 21. Nuumala otheliwa ni John, awo yaahirumeela osirkwiitu. Muhoolo mwaya, yaahirumeela iyaakha 20 eBetheli ya oCanadá. Okathi Lois aarina awe iyaakha 58, owo ni iyawe John yaahilattuliwa orowa orumeela wUcrânia. Yoonenle sai nlattulo nne? Niireke yaahuupuwela so: ‘Hiyo nihuuluvala khivanreerela othaamela elapo ekina?’ Nnaari. Awo khiyaapanke eyo, yaaheemererya nlattulo nne, nto John aahithanliwa okhala mempuru a Ekomisau ya Efiliyaali. Nuuvira iyaakha 7 John aahikhwa, masi Lois khaahiyale orumeela wUcrânia. Olelo-va, Lois orina iyaakha 81 ni onnimurumeela Yehova moohakalala eBetheli ya wUcrânia ni anna ni arokora a eBetheli ele annimphenta vanceene.

⁹ Pooti wira arokora anaamukhweli ntoko Lois khanithokoreriwa ntoko yaathokoreriwa aya okathi axiiyeya yaahaakhwiiye aya. Masi eyo khenivukula efaita arina aya arokora awo. Yehova onnaavaha efaita yinceene arokora awo avirinhe iyaakha sinceene yaakhaliheryaka axiiyeya ni ahinihiya ororomeleya. (1 Tim. 5:3) Nave awo annaalipiha amiravo.

10. Ntakiheryo xeeni munna Tony onivanhe awe?

¹⁰ Anna ni arokora oowuuluvala anikhala mapuro anikhapeleliwa atthu oowuuluvala aakhalana efaita yinceene. Mwa ntakiheryo, nwehe yowiiraneya ya munna oniihaniwa Tony, yoowo olelo-va onikhala mapuro anikhapeleliwa atthu oowuuluvala. Owo aapatisiwe Agosto a 1942 orina ene iyaakha 20, epooma ya oPensilvânia, wEstados Unidos. Moohipisa nuumala opatisiwa  aahilattuliwa etoropa. Nto okhala wira aahikhootta, owo aahitthukweliwa mukhatteya iyaakha piili nnimeya. Munna Tony ni mwaarawe Hilda ahaahuwa anaaya anli mwekeekhaini. Iyaakha sinceene ovirinhe awe omurumeelaka Yehova, Tony oorumeela miloko 3 ntoko muhooleli a muloko (olelo-va kortenatoore a nikhuuru na axitokweene) ni aahirumeela ntoko muhooleli asembeleya a esirkwiitu. Owo aanipaka mithukumano ni wiiriha soosoma sa Biibiliya mukhatteya. Olelo-va, Tony orina iyaakha 98 ni khonuupuwela otthikela ottuli. Owo khohiyale omurumeela Yehova ni anna ni arokora a muloko awe!

11. Ninrowa wooniherya sai wira ninnaavaha efaita anna ni arokora oowuuluvala anikhala mapuro anikhapeleliwa atthu oowuuluvala?

¹¹ Ninrowa wooniherya sai wira ninnaavaha efaita anna ni arokora oowuuluvala anikhala mapuro anikhapeleliwa atthu oowuuluvala? Vaaweryaneyaka axitokweene ahaana waahela muhina anna awo miteko sa mmulokoni. Nave hiyo pooti wooniherya wira ninnaavaha efaita anna awo nivaanelaka naawo nirumeelaka vídeoconferência. Akhala wira ninnimusuwela munna wala murokora oowuuluvala onikhala mapuro anikhapeleliwa atthu oowuuluvala arakamenle muloko awe, nihaana onvaha efaita yinceene. Naahiivahe ephoole hiyo pooti waaliyala anna ni arokora awo nnaaphenta ahu vanceene. Anna ni arokora akina oowuuluvala pooti ohilavula sookumana saya wala waavila opaka eyo. Nto akhala wira nnimwaakoha, nnoowiiwa alavulaka itthu soohakalaliha apanke aya mmutthenkesoni mwa Yehova, nto eyo enoonilipiha vanceene.

12. Muloko ahu, anna xeeni nikhanle ahu oowaaphwanya?

¹² Hiyo pooti ohakalala vanceene vaavo nnoona ahu wira muloko ahu aakhala anna ni arokora oororomeleya akhanle oonivaha ntakiheryo nooloka. Murokora oniihaniwa Harriette aahiviriha iyaakha sinceene omurumeelaka Yehova muloko awe oNova Jersey, wEstados Unidos. Masi owo aahaana othaamela muloko mukina ni mwanawe mwaamuthiyana. Anna ni arokora a muloko awe musya yaahiviriha okathi wira amusuwele oratteene. Nto yaahoona wira murokora ole aahikhalana itthu sinceene sa efaita. Murokora Harriette aahaaleela moota aalaleerya awe okathi iixuntte awe ekeekhai mwaakha wa 1925. Okathi aarowa awe olaleerya owo aanihela mpastani mwawe eskova wira orumeeleke akhala wira aamutthukweliwa mukhatteya. Tthiri ikwaha piili mwaakha wa 1933, owo aahitthukweliwa mukhatteya esumana ntero. Ikwaha iyo soopiili, iyawe yoowo ahaakhanle Namoona a Yehova aanimukhaliherya ni aanaakhapelela anaaya araru. Moohaanyiherya, nihaana waavaha efaita anna ni arokora oowuuluvala ntoko Harriette!

13. Efaita xeeni anna ni arokora oowuuluvala arina aya mmutthenkesoni mwa Yehova?

¹³ Anna ni arokora oowuuluvala aakhalana efaita yinceene mmutthenkesoni mwa Yehova. Awo aaweha ni maitho aya moota Yehova onaareeliha awe ni moota onireeliha awe mutthenkeso awe. Nave awo yaahikhalana eparakha ya wiixutta itthu sinceene ni soovonya saya. Nto mwaathokoreryeke anna ni arokora awo ntoko “maphattuwelo ànkhili” ni muttotteleke mureerelo sookumanana saya. (Mir. 18:4) Akhala wira munooviriha okathi wira mwaasuwele oratteene, waamini wanyu onoolipa ni anoowiixuttihani itthu sinceene!

14. Otumererya 32:7, onnitumererya opaka exeeni?

¹⁴ Mwiimananiheke ovaanela ni anna ni arokora oowuuluvala. (Mmusome Otumererya 32:7.) Pooti wira anna ni arokora awo khanoona saana ni kharina ikuru wira alavule wala yeette. Masi murima aya nlelo mmiravo. Anna ni arokora awo aakhalana “nsina  nottittimiheya” vamaithoni va Yehova. (Mus. 7:1) Okathi wotheene, muupuweleke etthu enimwiiriha Yehova waavaha efaita anna ni arokora oowuuluvala. Nave muhihiye waattittimiha anna ni arokora awo. Mpakeke etthu emosaru aapanke awe Eliseyo. Owo aahimuleela Eliya wira aarowa okhala hoothe nihiku nne nookiserya. Ikwaha tthaaru Eliseyo aahimuleela Eliya wira: “Miyo nkinohiyani”.—2 Mam. 2:2, 4, 6.

15. Makoho xeeni nikhanle ahu oowaakoha anna ni arokora oowuuluvala?

¹⁵ Mooniheryeke wira munnaathokorerya anna ni arokora oowuuluvala mwaakohaka makoho ooreerela murima. (Mir. 1:5; 20:5; 1 Tim. 5:1, 2) Nyuwo pooti waakoha so: “Okathi mwaari anyu mmiravo, etthu xeeni yookupalinheni wira mwaahiphwanya ekeekhai? Itthu sookhumelenleni mookumini mwanyu, sookhalihenryeni sai omwaattamela Yehova? Etthu xeeni yookhalihenryeni ohihiya omurumeela Yehova moohakalala?” (1 Tim. 6:6-8) Nuumala-vo, mwaawiriyaneke ni ephoole vaavo anooleelaayani sowiiraneya saya.

16. Mireerelo xeeni sinikhumelela okathi anna oowuuluvala anivaanela aya ni amiravo?

¹⁶ Okathi amiravo ni anna oowuuluvala anivaanela aya, awo annilipihana vanceene. (aRom. 1:12) Amiravo annincererya okupali waya wira Yehova onnaakhaliherya arumeyi awe oororomeleya. Nave anna oowuuluvala annoona wira aakhalana efaita ni anniphentiwa vanceene. Musuweleke wira anna oowuuluvala onnaasivela vanceene waaleela amiravo moota Yehova aarelinhe awe mookumini mwaya.

17. Etthu xeeni enniiriha ohimya wira okathi anna ni arokora oororomeleya anuuluvala aya anootepa oreera?

¹⁷ Okhala wene, okathi mutthu onuuluvala awe, oreera wa werutthuni onnivukuwa. Masi vamaithoni va Yehova, okathi mutthu oororomeleya onuuluvala awe, owo onootepa oreera. (1 aTes. 1:2, 3) Mwaha wa xeeni? Mwaha woowi vaavo iyaakha sinivira aya, munepa wa Muluku onnaakhaliherya okhalana mikhalelo sooloka. Vaavo nnaasuwela ahu oratteene ni wiixutta itthu ni anna ni arokora awo oowuuluvala, ninnitepa woona wira aakhalana efaita yinceene!

18. Mwaha onittharelana, ninrowa othokorerya exeeni?

¹⁸ Muloko onnitepa olipa vaavo amiravo anaavaha aya efaita anna ni arokora oowuuluvala. Nave onnitepa olipa vaavo anna ni arokora oowuuluvala anaavaha aya efaita amiravo. Mwaha onittharelana, ninrowa oweha moota anna ni arokora oowuuluvala akhanle aya owooniherya wira annaavaha efaita amiravo a mmulokoni.