1. Muxankiho xeeni wamphwannye Yowasi, Oziya ni Yosiya?

 NKUUPUWELANI vakhanle wiira muthanliwe okhala mwene a atthu a Muluku muri ene mwaana wala mmiravo! Mwaarowa orumeela sai owerya ni okhulupale owo wootheene? Biibiliya onnaaromola amiravo anceene yaakhalihiwe mamwene elapo ya oYuda. Mwa ntakiheryo, Yowasi aahikhalihiwa mwene orina ene iyaakha 7, Oziya orina ene iyaakha 16 nave Yosiya orina ene iyaakha 8 paahi. Tthiri khivaakhweelale! Masi nnaamwi vahaakhweyale, Yehova ni atthu akina yaahaakhaliherya oxintta mixankiho saya ni opaka itthu sooloka.

2. Xeeni vari aya vooloka osoma yoowiiraneya ya Yowasi, Oziya ni Yosiya?

² Ekeekhai wiira hiyo khahiyo mamwene aahiiso mapwiyamwene, masi nnimwiixutta etthu ni soowiiraneya sa Yowasi, Oziya ni Yosiya. Awo yaahipaka soothanla sooloka, masi-tho yaahipaka soothanla soohiloka. Okathi ninrowa ahu owehaka matakiheryo aya, nnooweha nthowa naya vanireerela aya waathanla apatthani ooloka, ohihiya okhala oowiiyeviha ni wiimananiha omwaattamela Yehova.

3. Yehoyada aamukhalihenrye sai mwene Yowasi opaka soothanla sooloka?

³ Mutakiheke soothanla sooloka sa Yowasi. Okathi aari awe mmiravo, mwene Yowasi aahipaka yoothanla yooloka. Paapa awe aahikhwa, nto aahitthara miruku sooloka sa Yehoyada Mukhulupale Anamukuttho. Yehoyada aahimuhuwa Yowasi ntoko mwanawe. Ottharaka ntakiheryo nooloka na Yehoyada, Yowasi aahithanla omurumeela Yehova ni waakhaliherya atthu awo opaka etthu emosa-ru. Yowasi aahipacerya olokiherya etemplo ya Yehova. — 2 Wah. 24:1, 2, 4, 13, 14.

4. Mireerelo xeeni nimphwanya ahu mwaha womphenta Yehova ni wiiwelela malamulo awe? (Miruku 2:1, 10-12)

 ⁴ Vakhala wiira anamuyari anyu aahiiso mutthu mukina onniwiixuttihani voohimya sa Yehova ni malamulo awe, mukupaliki wiira eyo yoovaha yuulupale. (Musome Miruku 2:1, 10-12.) Anamuyari anyu pooti owiixuttihani mwa inamuna soovirikana. Nwehe moota paapa awe murokora oniitthaniwa Katya aamukhalihenrye awe opaka soothanla sooloka. Khula nihiku okathi amuroiha awe oskola, awosa yaanivaanela voohimya sa yoolepa ya nihiku nne. Katya onihimya so: “Ovaanela iwe waanikikhaliherya oxintta mixankiho saarowa okiphwanya nihiku nne”. Woonasa wene anamuyari anyu pooti woovahakani malakiheryo ankhuma mbiibiliyani munoona anyu okhala oovila. Exeeni enrowa wookhaliheryani wiiwelela? Murokora mmosa oniitthaniwa Anastasia, onihimya wiira anamuyari awe yaanimutthokiherya etthu yaawiiriha onvahaka malakiheryo ale. Murokora ole onihimya so: “Eyo yaanikikhaliherya wiiwexexa wiira khahiyo yaapaka malamulo ale wiira akiweha-weheke, masi yaapaka eyo okhala wiira yaanikiphenta ni yaaphavela okikhapelela”.

5. Miteko sanyu sinaavara sai anamuyari anyu ni Yehova? (Miruku 22:6; 23:15, 24, 25)

⁵ Anamuyari anyu anoohakalala, vakhala wiira munootthara malakiheryo a mbiibiliyani anoovahayani. Masi etthu yuulupale okhala wiira Yehova onoohakalala nave ompatthani anyu ni yena onrowa otepaka olipa (Musome Miruku 22:6; 23:15, 24, 25.) Awo mathowa ooloka anrowa owiirihani otthara ntakiheryo na Yowasi okathi aari awe mmiravo.

6. Miruku xeeni Yowasi aapacenrye awe wiiwelela nuumala Yehoyada okhwa, nave exeeni yaakhumelenle? (2 Wahala 24:17, 18)

⁶ Mwiixutteke etthu ni soothanla soohiloka sa Yowasi. Nuumala Yehoyada okhwa, Yowasi aahipacerya okhalana apatthani oohiloka. (Mmusome 2 Wahala 24:17,18.) Owo aahithanla otthara miruku sa makhulupale a oYuda, yahamphenta Yehova. Woonasa wene, munnikupali wiira Yowasi aahaana okhala ottaiwene aahiiso ohaataana ni atthu siiso. (Mir. 1:10) Ohiya opaka eyo, Yowasi aari mulolo, nave aahithanla wiiwelela miruku soohiloka sa atthu ale. Mooriipiha murima, okathi mmusi awe iitthaniwa Zakariya aimananiha awe wiira omukhaliherye, Yowasi aahiruma wiira iiviwe. (2 Wah. 24:20, 21; Math. 23:35) Tthiri ele yaari etthu yoohiirya! Yowasi aahipacerya saana, masi mooriipiha murima owo aahipakeya namavirikanya ni nawiive. Muhoolo mwaya, owo aahiiviwa ni arumeyi awe. (2 Wah. 24:22-25) Itthu saarowa okhala sooloka, vakhanle wiira khaahiiye omwiiwelela Yehova ni atthu yamphenta! Ntakiheryo na Yowasi ninniixuttiha exeeni?

7. Tani ninreerela ahu waathanla wiira akhale apatthani ahu? (Nwehe efootu.)

 ⁷ Etthu nniixutta ahu ni soothanla soohiloka sa Yowasi, ti yoowi nihaana waathanla apatthani anrowa onikhaliherya omphenta Yehova ni omuhakalaliha. Nave apatthani ahu pooti okhala a iyaakha soovirikana. Muhiliyale wiira Yowasi aari mmiravo namulikanyiha ni mpatthani awe, Yehoyada. Nwuupuwelaka axipatthani murina anyu, mwiikoheke so: ‘Kiireke apatthani aka annikikhaliherya olipiha omwaamini waka Yehova? Annikitumererya wiiwelela malamulo a Muluku? Niireke annaaleela atthu akina voohimya sa Yehova ni ikeekhai sa mbiibiliyani? Kiireke annittittimiha malamulo a Muluku? Kiireke anlavula etthu aphavelaka okihakalaliha paahi, aahiiso annikivaha miruku kinreerela aka ovahiwa okathi owo?’ (Mir. 27:5, 6, 17) Ekeekhai ti yoowi vakhala wiira apatthani anyu khanimphenta Yehova, awo khanireerela okhala apatthani anyu. Masi vakhala wiira mookhalana apatthani animphenta Yehova, muhaahiyererye, yaawo tanrowa wookhaliheryani. — Mir. 13:20.

8. Vakhala wiira munnarumeela aredes sociais, exeeni munreerela nyu wuupuwela?

⁸ Aredes sociais pooti onikhaliherya ovaanela ni amusi ni apatthani ahu. Masi atthu akina anaarumeela aredes sociais wiira awaamwelelihe atthu akina, ahelaka ifootu saya ni iviidiyu sa itthu aathumme aya aahiiso aapanke aya. Vakhala wiira munnaarumeela aredes sociais mwiikoheke so: ‘Yoolakela aka ophavela owaamweleliha atthu akina? Kiireke kimphavela owooniherya atthu akina etthu yooreera aahiiso kimphavela wiivuwiha paahi? Kiireke itthu atthu akina aanihela aya muredes sociais sinnikiiriha wuupuwela, olavula aahiiso ovara etthu mwa enamuna yoohiloka?’ Munna Nathan Knorr, aari mmosa a Nikhuuru Noolamulela, aahivaha miruku iya: “Muhiphaveleke waahakalaliha atthu akina mwiira siiso pooti ohimuhakalaliha mutthu. Mwiimananiheke omuhakalaliha Yehova. Mwiira siiso, munimwaahakalaliha ootheene ale animphenta”.

9. Exeeni Oziya aapanke awe okhaliheriwaka ni Yehova? (2 Wahala 26:1-5)

⁹ Mutakiheke soothanla sooloka sa Oziya. Okathi mwene Oziya aari awe mmiravo aari oowiiyeviha. Oziya aahiixutta “omova Muluku”. Owo aakhwiiye orina ene iyaakha 68, mwa iyaakha sinceene sa okumi awe Yehova aahimureeliha. (Mmusome 2 Wahala 26:1-5.) Oziya aahaaxintta awanani anceene, nave aahiiriha wiira Yerusalemu okhale oovareleleya. (2 Wah. 26:6-15) Moohaanyiherya, Oziya aahihakalala vanceene mwaha wa itthu sootheene aavanre awe okhaliheriwaka ni Yehova. — Mus. 3:12, 13.

10. Exeeni yiiraneyale ni Oziya?

¹⁰ Mwiixutteke etthu ni soothanla soohiloka sa Oziya. Mwene Oziya, aahilimalela waaleela atthu akina etthu yaakhanle aya oopaka. Niireke eyo yaahimwiiriha wuupuwela wiira yena pooti opaka khula etthu aaphavela awe? Nihiku nimosa, Oziya aahivolowa mutemplo mwa Yehova onaphavela opaha nsenso valtaari, etthu yeeyo mamwene yaaheemereriwa aya opaka. (2 Wah. 26:16-18) Muulupale anamukuttho Azariya, aahimananiha omukhoottiherya, masi Oziya aahinanariwa vanceene. Mooriipiha murima, Oziya aahihiya omwaamini Yehova, nto Yehova aahimuhukhumu omukumiheryaka makuttula. (2 Wah. 26:19-21) Eyo khiyaarowa wiiraneya vakhanle wiira yena khaahiyale okhala oowiiyeviha!

11. Exeeni enrowa onikhaliherya okhala oowiiyeviha? (Nwehe efootu.)

¹¹ Nuumala Oziya okhalana owerya wuulupale, owo aahiliyala itthu sootheene iireliwa awe ni Yehova. Exeeni nniixutta ahu? Nihaana ohiliyala wiira itthu sootheene sooreera ni iparakha nirina ahu sinikhuma wa Yehova. Ohiya wiikompela mwaha wa etthu ninwerya ahu ovara, nihaana  omuxukhurelaka Yehova. b (1 aKor. 4:7) Ohiya-vo, nihaana okhala atthu oowiiyeviha ni weemererya wiira na atthu oottheka nave ikwaha sikina nnooreerelaka ottaruxiwa. Munna mmosa orina iyaakha 60 olempe so: “Kihiixutta ohaakuva oveeheya wala okhulumuwa vakhala wiira mutthu mukina onnoona etthu yoohiloka kinipaka aka. Ikwaha sikina sookhala itthu soohiloka kinipaka aka nto kinareerela ovahiwa miruku. Hata vari siiso, kinniimananiha olokiherya itthu iyo ni onvaha Yehova itthu kiniwerya aka”. Okathi nimmwiiwelela ahu Yehova ni ohihiya okhala oowiiyeviha, ninniphwanya ohakalala weekeekhai.— Mir. 22:4.

12. Yosiya aamwaattamenle sai Yehova nlelo ori ene mmiravo? (2 Wahala 34:1-3)

¹² Mutakiheke soothanla sooloka sa Yosiya. Yosiya aarina iyaakha 16, okathi aapacenrye awe omwaattamela Yehova. Owo aaniphavela wiixutta voohimya sa Yehova ni opaka yootthuna awe, masi ikwaha sikina mmiravo ole mwene itthu khisaamweettenle saana. Okathi ole, atthu anceene yaakokhorela amuluku eethiru, nto Yosiya aahaana olipiha murima wiira aakiherye okokhorela weekeekhai. Ti etthu yena aapanke awe! Yosiya nnakhala khaaphiyerinhe iyaakha 20, vaavo aapacenrye awe waapwexakasa amuluku eethiru a elapo ele. — Mmusome 2 Wahala 34:1-3.

13. Ontaphulela axeeni wa nyuwo wiivahererya wa Yehova?

¹³ Hata muri ene mmiravo mwaamukhaani, nyuwo pooti omutakiha Yosiya ni wiixutta itthu voohimya sa Yehova ni mikhalelo sawe sooreera. Eyo ti etthu enrowa owiirihani ovahererya okumi ahu wa Yehova. Masi yoothanla eyo enrowa ovara sai okumi anyu? Lucas yoowo opatisiwe orina ene iyaakha 14, onihimya so: “Okhuma nenna-va orowa ohoolo, kinrowa ohelaka opuro woopacerya muteko kininvarela aka Yehova, nave kinrowa wiimananihaka omuhakalaliha”. (Mar. 12:30) Mukupaliki wiira munooreelihiwa vanceene vakhala wiira munoopaka etthu emosa-ru!

14. Nvahe matakiheryo a moota amiravo akina animutakiha aya mwene Yosiya.

¹⁴ Mixankiho xeeni sinoophwanyani nyuwo, ntoko mmiravo onimurumeela Yehova? Johan yoowo opatisiwe orina ene iyaakha 12,  onihimya wiira aanikhanyereriwa ni amiravo akina aasomana awe oskola wiira ompaheke sikaro. Wiira ohipake etthu ele aakhanyereriwa awe, Johan onnuupuwela wiira asikaro ohiya paahi okumiherya mixankiho mookumini mwawe, nave-tho pooti ohonona ompatthani awe ni Yehova. Nave Raquel, yoowo opatisiwe orina ene iyaakha 14, onnitthokiherya etthu enimukhaliherya oxintta mixankiho sinikumana awe oskola. Owo onihimya so: “Kinniimananiha olikanyiha khula etthu kinoona aka ni itthu sa mbiibiliyani. Mwa ntakiheryo, okathi kinsoma aka etisipiliina ya História, pooti okuupuxerya yoowiiraneya emosa eri mbiibiliyani aahiiso eprofesia. Nave ikwaha sikina, vaavo kinivaanela aka ni mutthu mukina a oskola, kinnuupuwela yoolepa emosa ya mbiibiliyani kinamooniherya mutthu owo”. Mixankiho sinoophwanyani, pooti ovirikana ni iye samphwannye Yosiya, masi hata vari siiso nyuwo pooti okhala a miruku ni oowaamini ntoko yena. Oxintta mixankiho sinoophwanyani muri ene mmiravo, sinimookhaliheryani oxintta mixankiho sinrowa anyu ophwanya muhoolo.

15. Exeeni yaamukhalihenrye mwene Yosiya omurumeela Yehova moororomeleya? (2 Wahala 34:14, 18-21)

¹⁵ Okathi mwene Yosiya arina awe iyaakha 26, aahipacerya olokiherya etemplo. Waari okathi ene yoowo, yaaphwanyiwe aya “eliivuru ya Nlamulo na Yehova, aavahereriwe awe Moise”. Okathi mwene iiwale awe eliivuru ele esommwaka, aahipaka marukunuxo moowakuveya wiira iiwelele itthu saalempwale muliivuruni mmo. (Mmusome 2 Wahala 34:14, 18-21.) Niireke munniimananiha omusoma Biibiliya khula nihiku? Vakhala wiira ti siiso niireke onnookhaliheryani? Niireke munnilepa iversiikulu sinrowa wookhaliheryani? Lucas yoowo nimuromonle ahu wanipacerya, onnilepa mukaternuni itthu simmusivela oniphwanya awe okathi onimusoma awe Biibiliya. Woonasa wene, opaka etthu emosa-ru pooti wookhaliheryani wuupuwelela iversiikulu sa mbiibiliyani, aahiiso itthu muniixutta anyu. Okathi munrowa anyu otepaka omusuwela Biibiliya ni omphenta, nave munrowa otepaka ophavela omurumeela Yehova. Ntoko siisaale Nuulumo na Muluku namukhaliherya aya Yosiya  opaka itthu sooloka, nave nnimookhaliheryani.

16. Exeeni yaamwiirinhe Yosiya opaka etthu yoohiloka, nave nniixutta exeeni?

¹⁶ Mwiixutteke etthu ni soothanla soohiloka sa Yosiya. Okathi Yosiya aarina awe iyaakha 39, owo aahipaka etthu yoohiloka yaamwiirinhe okhwa. Ohiya omuroromela Yehova, Yosiya aari mwiiroromela. (2 Wah. 35:20-25) Eyo enniniixuttiha etthu. Moohicikha iyaakha nirina ahu aahiiso iyaakha nivirinhe ahu nimurumeelaka Yehova, ootheene ahu nihaana ohihiya omwaattamela. Wiira nipake eyo nihaana khula okathi onvekelaka Yehova malakiheryo, omusoma Biibiliya ni ovaha ephoole miruku ninvahiwa ahu ni makristau arina waamini woolipa. Mwiira siiso, enimookhaliheryani ohipaka itampi suulupale, nave enimookhaliheryani okhala oohakalala. — Yak. 1:25.

17. Etthu xeeni nniixutta ahu ni soowiiraneya sa mamwene mararu a oYuda?

¹⁷ Sookhala itthu sinceene sooreera mukhanle anyu ovara nlelo muri ene mmiravo. Yoowiiraneya ya Yowasi, Oziya ni Yosiya, enooniherya wiira munoowerya opaka soothanla sooloka ni omuhakalaliha Yehova hata muri ene mmiravo. Ekeekhai wiira yaahipaka itthu soohiloka saawiirinhe ophwanya mixankiho sinceene. Masi vakhala wiira munootakiha itthu sooloka, ni osyaka itthu soohiloka yaapanke aya, okumi anyu onookhala woohakalaliha.

18. Matakiheryo xeeni anooniherya wiira okumi anyu pooti okhala woohakalaliha? (Nwehe efootu.)

¹⁸ Biibiliya onnilavula matakiheryo a amiravo akina yaamwaattamenle Yehova, aareelinha awe ni yaahakalala vanceene. Mmosa amiravo awo Davidi. Okathi aari awe mmiravo, Davidi aahithanla okhala mpatthani a Yehova nave muhoolo mwaya aahikhala mwene oororomeleya. Ekeekhai wiira Davidi aahipaka itthu soohiloka, masi Yehova aamuthokorerya Davidi okhala murumeyi awe oororomeleya. (1 Mam. 3:6; 9:4, 5; 14:8) Munoonela sai osoma yoowiiraneya ya Davidi? Moohaanyiherya, eyo enimookhaliheryani omurumeela Yehova moororomeleya. Aahiiso pooti osoma yoowiiraneya ya Marko wala Timootheyo. Yaapacenrye omurumeela Yehova ari ene amiravo, mpakha okhwa waya. Awo yaaheemereriwa ni Yehova nave yaahiphwanya ohakalala wuulupale.

19. Mumphavela wiira okumi anyu okhaleke sai?

¹⁹ Enamuna munirumeela anyu okumi anyu nenna-va, ennooniherya moota okumi anyu onrowa aya okhala muhoolo. Akhala wiira nyuwo munoomuroromela Yehova, ohiya wiiroromela, khula okathi owo onimookhaliheryakani opaka soothanla sooloka. (Mir. 20:24) Okumi anyu onrowa okhala woohakalaliha nave munookhalana itthu sinceene sooloka. Masi muhiliyale wiira Yehova onnivaha efaita yuulupale itthu munimpakela anyu. Orumeela okumi anyu wiira mmurumeele Tiithi ahu Yehova, teri etthu yoolokexa munireerela anyu opaka, khiivo enlikana naya.