1-2. Xeeni vari aya vooreera osoma voohimya sa Sansoni?

 EXEENI munuupuwela anyu okathi muniiwa anyu nsina noowi Sansoni? Woonasa wene, munnuupuwela wiira aari mulopwana a ikuru, eyo ekeekhai. Masi-tho ekeekhai wiira aahipaka soothanla soohiloka ni saahimphwanya mixankiho mwaha wa soothanla sawe iyo. Hata vari siiso, Yehova aawehexexa itthu sooloka Sansoni aapanke awe. Yehova oheemererya wiira ntakiheryo na Sansoni nlempwe mbiibiliyani wiira nniphwanyihe mureerelo.

² Yehova aahimurumeela Sansoni wiira opake itthu sooreera ni aakhaliherye aisarayeli. Sivinre ene iyaakha sinceene nuumala Sansoni okhwa, Yehova aahimuupuxerya murummwa Paulo olepa nsina na Sansoni, elista ya atthu yoonihenrye waamini woolipa. (aHeeb. 11:32-34) Ntakiheryo na Sansoni pooti onilipiha. Owo aahimuroromela Yehova hata okathi samphwanya aya mixankiho sinceene. Mwaha ola, ninrowa oweha moota ntakiheryo na Sansoni ninnilipiha aya. Nave nnooweha itthu nniixutta ahu ni ntakiheryo nawe.

3. Muteko xeeni Sansoni aarummwale awe ovara?

³ Mahiku aayariwa awe Sansoni, afilisti yaanaalamulela ni yaanaahaaxa aisarayeli. (Makh. 13:1) Afilisti yaari atthu ootakhala, ti maana aya aisarayeli yaatepa aya ohaawa. Yehova aahimuthanla Sansoni wiira “owòpole atthu a Isarayeli mmatatani mw’aFilisti”. (Makh. 13:5) Owo waarowa okhala muteko wooxankiha! Wiira ovare muteko ole aarummwale awe, Sansoni aahaana omuroromela Yehova.

4. Yehova aamukhalihenrye sai Sansoni wiisoopola mmatatani mwa afilisti? (Makhulupale 15:14-16)

⁴ Nooweha ntakiheryo nimosa nnooniherya wiira Sansoni  aanimuroromela Yehova, nave aalipa ni okhaliheriwa ni Muluku. Nihiku nimosa, ekurupu ya atoropa a afilisti yaahirowa oLehi, woonasa wene waari muttetthe wa oYuda, wiira yanvare Sansoni. Atthu a oYuda yaahoova vanceene, nto yaahilakela onvahererya Sansoni mmatatani mwa awanani awe. Atthu a nloko na Sansoni, yaahimutthukwa ni mikhoi miili isya anvahererya mmatatani mwa afilisti. (Makh. 15:9-13) Masi munepa wa Yehova waahinvaha ikuru Sansoni, okwasa mikhoi iye aatthukwaniwa awe. Nuumala-vo, aahikuxa nikhuva na puuru, owiivana anakhotto 1.000! — Mmusome Makhulupale 15:14-16.

5. Sansoni oonihenrye sai wiira aanimuroromela Yehova?

⁵ Exeeni yaamwiirinhe Sansoni orumeela nikhuva na puuru? Ela khahiyo etthu anamunceene yaarowa aya orumeela ntoko ekaruma ya nakhotto! Moohaanyiherya Sansoni aanisuwela wiira Yehova ammukhaliherya waaxintta afilisti voohicikha ekaruma aarowa awe orumeela. Mulopwana ole oororomeleya, aahirumeela ele aarina awe wiira opake etthu Yehova aaphavela awe. Mwaha woomuroromela Yehova, Sansoni aahireelihiwa nave aahaaxintta anakhotto ale.

6. Ntakiheryo na Sansoni ninniixuttiha exeeni?

⁶ Nave Yehova onoonivaha ikuru wiira nipake khula etthu ninvekeliwa ahu, hata ekhalaka ntoko kheniweryaneya. Owo pooti onikhaliherya mwa enamuna enrowa onitikiniha. Nto mmuroromeleke Yehova. Ntoko siisaale anvaha awe ikuru Sansoni, nave onimookhaliheryani opaka ele oniphavela awe, vakhala wiira munoomuroromela ni munonvekela wiira ookhaliheryeni. — Mir. 16:3.

7. Nvahe ntakiheryo nnooniherya wiira ti vooloka ophavelasa malakiheryo a Yehova.

⁷ Anna ni arokora anceene anivara miteko sooteka mmutthenkesoni, annooniherya wiira annimuroromela Yehova. Khalai, anna yaanimpaka palano ni yaaniteka Inupa sinceene sa Omwene ni ipereetiyu sikina sa mutthenkeso ahu. Masi nuuvira okathi, atthu anceene yaahipatisiwa nto mutthenkeso onareerela opaka marukunuxo. Anna anihoolela miteko iyo, yaahinvekela Yehova malakiheryo, nave  yaaheererya inamuna isya. Mwa ntakiheryo, othuma ipa sootekiwa ni soolokiheriwa ene. Munna Robert, yoowo okhalihenrye miteko sinceene sooteka olumwenku wootheene, onihimya so: “Wanipacerya khivaakhweyale weemererya wiira naahaana opaka itthu mwa enamuna ela. Maana ela yaahivirikana ni moota naapaka ahu itthu mwa iyaakha sinceene. Masi anna yaaheemererya marukunuxo ale ni yaahooneya wiira Yehova aanireeliha”. Nla ntakiheryo nimosa paahi nnooniherya moota Yehova onaavaha awe malakiheryo atthu awe wiira apake etthu oniphavela awe. Ikwaha sikina, hiyo pooti wiikoha so: ‘Kiireke kinniphavelasa malakiheryo a Yehova ni kinnipaka marukunuxo wiira kimurumeeleke mwa enamuna yooloka?’

8. Sansoni aapanke exeeni okathi aavoliwa awe ntthona?

⁸ Woonasa wene nyuwo munnuupuwela itthu sootikiniha Sansoni aapanke awe. Mwa ntakiheryo, ohikunxe etthu mmatatani yena aahiwerya omwiiva kharamu, nave muhoolo mwaya aahiwiiva alopwana 30 afilisti epooma ya wAxikeloni. (Makh. 14:5, 6, 19) Sansoni aanisuwela wiira ohikhaliheriwaka ni Yehova, owo khaawerya opaka itthu iya. Eyo yaahitepa wooneya, nihiku nimosa Sansoni aavoliwa awe ntthona nuumala owiiva afilisti 1.000. Exeeni aapanke awe? Ohiya ophavelasa maasi ni ophuka muxankiho ole mekhawe, owo aahinvekela Yehova wiira omukhaliherye. — Makh. 15:18.

9. Exeeni Yehova aapanke nuumala Sansoni onvekela wiira omukhaliherye? (Makhulupale 15:19)

⁹ Yehova aahaakhula yooveka ya Sansoni, onvahaka ehime aathimpe awe mwa mwiiriirya. Nuumala Sansoni owurya maasi ale, “ahilipiha-tho murim’awe, khuhihimuwa”. (Mmusome Makhulupale 15:19.) Vanikhala ntoko wiira ehime ele yaahikhala muhoolo mwaya, okathi profeta Samuweli aalepa awe eliivuru ya Makhulupale. Khula okathi aisarayeli yaarowa aya owehaka ehime ele, yaamupuwelaka wiira yaamuroromela Yehova, owo aamwaakhaliherya khula muxankiho waarowa waaphwanya.

10. Exeeni ninreerela ahu opaka wiira Yehova onikhaliherye?

¹⁰ Nave hiyo nihaana onvekela Yehova wiira onikhaliherye, moohicikha itthu ninsuwela ahu ovara aahiiso miteko ninvarenle ahu. Nihaana okhala oowiiyeviha ni weemererya wiira nnoowerya opaka etthu Yehova onnivekela awe vakhala wiira nnoomuroromela. Moolikanasa ni Sansoni yoowo aaphwannye ikuru nuumala owurya maasi Yehova anvanhe awe, nave nnoowerya okhalana ikuru vakhala wiira nnoorumeela khula etthu Yehova onnipakela awe. — Math. 11:28.

11. Aleksey oonihenrye sai wiira aanimuroromela Yehova, nto hiyo ninrowa omutakiha sai?

¹¹ Nrowe niwehe ntakiheryo na Aleksey mmosa a anna anihaaxiwa vanceene oRússia. Exeeni enimukhaliherya ohihiya okhala oolipa, nnaamwi simphwanyaka mixankiho sinceene? Munna owo ni amwaarawe yaahimpaka palano a ovara miteko sa Muluku. Owo onihimya so: “Kinniimananiha ohihiya opaka yoosoma aka ya omwaneene ni omusoma Biibiliya khula nihiku. Khula voosiisu, miyo ni mwaaraka ninnisoma yoolepa ya nihiku nave ninninvekela Yehova hoothe”. Exeeni nniixutta ahu ni ntakiheryo na Aleksey? Ohiya wiiroromela mmensihu, nihaana omuroromela Yehova. Moota xeeni? Nikhalanaka yoosoma ahu ya omwaneene ni ovara miteko sa Muluku seiyo sinrowa olipiha waamini wahu. Vakhala wiira nnimwiira siiso, Yehova onooreeliha wiimananiha wahu wiira nimurumeele.  Yehova aahimulipiha Sansoni, nave moohaanyiherya onoonilipiha.

12. a) Yoothanla xeeni yoohiloka Sansoni aapanke awe? b). Dalila aavirikanne sai ni athiyana akina Sansoni aarina awe?

¹² Sansoni aari mutthu oottheka ntoko hiyo. Ikwaha sikina aahipaka soothanla soohiloka. Yookhala etthu emosa yoohiloka aathanlale awe opaka yaamukumihenrye mixankiho sinceene. Nuumala oviriha okathi, Sansoni orumeelaka ntoko mukhulupale a wIsarayeli, owo “ahimuthela muthiyana mmosa, ihaniwa Dalila, ari a èlapo y’oSoreki”. (Makh. 16:4) Nuuvira mahiku vakhaani, Sansoni aahimunoivari muthiyana mikina nfilisti. Yehova taamurumme opaka eyo, okhala wiira omunoivari muthiyana ole yaamunvaha eparakha ya owana ni afilisti. Nave okathi mukina Sansoni aahimaka vate va muthiyana namararuwa nfilisti aakhala epooma ya oGaza. Ele yaari enamuna ekina Yehova aarumenle awe wiira onvahe ikuru Sansoni wiira owerye owana ni afilisti yaakhala epooma ele. (Makh. 14:1-4; 16:1-3) Athiyana ale ootheene, yaahivirikana ni Dalila. Woonasa wene Dalila aari mwisarayeli. Nto ekasamento aya khiyaarowa onvaha eparakha Sansoni ya owana ni afilisti.

13. Exeeni Dalila ampakenle awe Sansoni?

¹³ Afilisti yaahimuliva musurukhu munceene Dalila, wiira onwoke Sansoni. Sansoni aahisiveliwa vanceene ni Dalila, ohinawerya oweha etthu Dalila aaphavela awe opaka. Dalila aahimukhanyererya Sansoni, wiira omuleele etthu yaamwiiriha okhala oolipexa, nuumala-vo owo aahimuleela esiiri awe. Mooriipiha murima, Sansoni aahiikumiherya mixankiho mmensawe. Yoothanla awe ele, yaahimwiiriha oyeleela ikuru sawe mwa  okathi vakhaani ni oyeleela ompatthani awe ni Yehova. — Makh. 16:16-20.

14. Mixankiho xeeni saamukhumelenle Sansoni mwaha woomuroromela Dalila?

¹⁴ Mwaha woomuroromela Dalila ohiya omuroromela Yehova, Sansoni saahimukhumelela mixankiho sinceene. Afilisti yaahinvara Sansoni amutthukwela mukhatteya epooma ya oGaza. Waahikhala okathi, aawuulihinha awe muru atthu yaakhala epooma ele. Masi vano owo tuulihihiwa muru, maana aakhalihiwe epottha yaaxila ipyo. Afilisti yaahithipelela omuulihiha muru Sansoni, amuroihaka empa yaampakela aya efesta muluku aya Dagoni. Maana awo yuupuwela wiira yanvanre Sansoni akhaliheriwaka ni muluku aya oowootha. Afilisti yaahiruma oroweliwa Sansoni mukhatteya wiira ‘athweelaneke’. — Makh. 16:21-25.

15. Sansoni oonihenrye sai wiira aahitthikela omuroromela Yehova? (Makhulupale 16:28-30) (Nwehe eteseenyo ya ekaapa.)

¹⁵ Nnaamwi Sansoni aatthenke vanceene, masi owo khaahiyale omurumeela Yehova. Owo aahiphavelasa eparakha yoopaka etthu Yehova aaphavela awe, eyo piiyo, owana ni afilisti. (Mmusome Makhulupale 16:28-30.) Sansoni aahimuxonttela Yehova oriki: “Kintthuna owunlela ikuhu aFilisti”. Mwa mwiiriirya Yehova aahaakhula nivekelo na Sansoni onvahaka ikuru sinceene. Okathi ole, Sansoni aahiwiiva afilisti anceene ovikana aawiivale awe okumi awe wootheene.

16. Exeeni nniixutta ahu ni itthu Sansoni aapanke awe nuumala ottheka?

¹⁶ Ekeekhai wiira mwaha wa soottheka sawe, Sansoni saahimphwanya mixankiho sinceene. Masi owo khaahiyale wiimananiha opaka itthu Yehova aaphavela awe. Etthu emosa-ru enniiraneya ni hiyo. Vakhala wiira noottheka, nnapirisari okhaliheriwa aahiiso nooyeleela eparakha naarina ahu, nihihiye omurumeela Yehova. Muhiliyale wiira Yehova khonikhala-khala oninyanyalaka. (Esal. 103:8-10) Hata nitthekaka, nlelo nnoowerya onvarela muteko Yehova, ntoko Sansoni iirale awe.

17-18. Ntakiheryo na Michael niwiixuttinheni exeeni? (Nwehe efootu.)

¹⁷ Nrowe niwehe etthu yaamwiiranenle munna mmosa mmiravo oniitthaniwa Michael. Owo aanivara miteko sinceene mmulokoni, aarumeela ntoko murumeyi ookhaliherya ni pioneero rekular. Mooriipiha murima aahipaka etthu yoohiloka yiirinhe oyeleela  iparakha sawe mmulokoni. Owo onihimya so: “Itthu saaneetta saana, nave kaaninvarela miteko sinceene Yehova, masi mootutuxerya kaahimana vamwala. Kaanisuwela wiira Yehova khaarowa okinyanyala. Masi kaamakela wuupuwela vakhala wiira kaamutthikela okhalana ompatthani kaarina aka ni Yehova khalai aahiiso akhala wiira kaamutthikela ovara miteko ntoko kaavara aka”.

¹⁸ Moohakalaliha Michael khaakhulumunwe. Nuuvira okathi aahitthikela okhalana iparakha aarina awe mmulokoni, vano onirumeela ntoko mutokweene ni pioneero rekular. Owo onitthokiherya so: “Miyo kaahiimananiha otthikela ompatthani kaarina aka ni Yehova. Khula okathi kaanimutthukulela murima aka Yehova kinvekelaka, kisomaka ni wuupuwelela. Moota anna yaakikhaliherya aya ni okilipiha, otepexa wene axitokweene, waahikikhaliherya oweha wiira nlelo Yehova anikiphenta. Vano kinniwerya-tho orumeela mmulokoni ni murima wooloka. Eyo yookiixuttiha oweha wiira Yehova onnimulevelela khula mutthu onittharuwa ni murima wootheene”. Exeeni nniixutta ahu? Hiyo nikupaliki wiira Yehova pooti onirumeela ni onitthuvela hata nitthekaka, vakhala wiira khula okathi nnimwiimananiha olokiherya soottheka sahu ni ohihiya omuroromela Yena. — Esal. 86:5; Mir. 28:13.

19. Vano musomme anyu itthu saamwiiranenle Sansoni, exeeni munupuwela anyu?

¹⁹ Mwaha ola, nihuupuwelela itthu sookuxa murima saamukhumelenle Sansoni. Yena aari oottheka, hata vari siiso khaahiyale wiimananiha omurumeela Yehova, hata nuumala oopaka etthu yoohiloka ni Dalila. Nave Yehova khaamunyanyanle. Yehova aahitthikela omurumeela Sansoni mwa enamuna yootikiniha. Nlelo Yehova onnimoona Sansoni ntoko mulopwana orina waamini wuulupale. Nsina na Sansoni niri elista ya atthu yoonihenrye waamini aari aHeeberi ekapiitulu 11. Ti voohakalaliha osuwela wiira nimmurumeela Tiithi oophenta oniphavela onilipiha, vanceenexa okathi ninkhulumuwa ahu! Tivonto, ntoko Sansoni, nrowe nimuxonttele Yehova niiraka so: “Xontte, Apwiya Muluku! Mukùpuwele: mukitthikiherye nlelo ikuru saka”. — Makh. 16:28.