1. Pedru oonenle sai nuumala Yesu opaka mwiiriirya ni omukhaliherya ovara ihopa sinceene?

 PEDRU aahiviriha ohiyu wootheene otothaka ihopa masi khaavanre etthu. Aahitikinihiwa okathi Yesu aamulenle awe so: “Nrowe opuro woowiixerya, mwarihele matthavi anyu wira mutothe ihopa”. (Luka 5:4) Pedru khaakupali wiira anvara ihopa, masi hata vari siiso aahipaka ele Yesu aavekenle awe. Nuumala orihela matthavi aya mmuro, awo yaahipacerya okhereya mwaha woolemeliwa okhala wiira yaahivara ihopa sinceene. Mwaha woosuwela wiira waari mwiiriirya Yesu aapanke awe, Pedru ni ale aavarana awe muteko “yaahitikinihiwa vanceene”. Pedru aahimmye so: “Pwiya, mukhume-va, maana miyo ka natampi”. (Luka 5:6-9) Woonasa wene Pedru uupuwela wiira khaaphwanela omwaattamela Yesu.

2. Xeeni vari aya vooloka wiixutta ntakiheryo na Pedru?

² Pedru aahimya ekeekhai, maana aari “natampi”. Biibiliya onnooniherya wiira ikwaha sikina Pedru aahilavula ni aahipaka itthu muhoolo mwaya saamuriipinhe murima. Mootoko oriipiwa murima ntoko Pedru? Niireke mookhalana muxankiho muniimananiha anyu oxintta mwa okathi munceene? Akhala wiira ti siiso, wiixutta ntakiheryo na Pedru pooti wookhaliheryani ohihiya okhalana nlipelelo. Moota xeeni? Nkuupuwelani ela: Yehova aaphavenle khaarumiha olempwa mbiibiliyani soottheka sa Pedru. Masi iyo soolempwa mbiibiliyani wiira siniixuttiheke etthu. (2 Tim. 3:16, 17) Wiixutta ntakiheryo na Pedru yoowo samphwannye mixankiho ni aarina moonelo ntoko hiyo, pooti onikhaliherya wiiwexexa wiira Yehova khonlipelela wiira nikhale atthu oohittheka. Yehova oniphavela wiira nihikhulumuwe nave niimananiheke opake ele eniwerya ahu hata siniphwanyaka mixankiho.

3. Xeeni nihinreerela ahu okhulumuwa?

³ Xeeni vari aya vooloka ovilela? Nkuupuwelani ntakiheryo  nla: Okathi mutthu oniphavela awe oxutta omoopa saana viola owo ohaana opaka eyo mwa okathi aahiiso iyaakha sinceene. Okathi owo onimwiixutta awe, ikwaha sikina onoofalyari, masi aahihiye wiixutta owo onoowerya omoopaka saana. Hata osuwelaka omoopa saana, nlelo ikwaha sikina onanfalyari. Masi hata vari siiso khonikhulumuwa ni onniimananiha wiira oxutte omoopa saana. Moolikanasa, hata niweryaka oxintta muxankiho oniphwannye, ikwaha sikina hiyo pooti ofalyariki. Masi hata vari siiso, ninnipaka ele eniwerya ahu wiira nixintte moomalela. Ootheene ahu ninnilavula aahiiso opaka itthu, muhoolo mwaya sinaniriipiha murima. Masi etthu yooloka nikhanle ahu oopaka ori ohikhulumuwa, maana niira siiso Yehova onookhaliherya wiimananiha wahu. (1 Ped. 5:10) Nrowe niwehe ntakiheryo na ovilela wa Pedru. Moota Yesu aamureerenle awe murima Pedru hata aattheka, pooti onikhaliherya ohihiya omurumeela Yehova.

4. a) Moovarihana ni Luka 5:5-10, exeeni Pedru aahimmye awe? b) Yesu aamulipinhe sai Pedru?

⁴ Biibiliya khonihimya xeeni Pedru uupuwela awe wiira aari “natampi” ni itampi uupuwela awe. (Mmusome Luka 5:5-10.) Pooti wiira Pedru aahipaka itampi suulupale. Yesu aahoona wiira Pedru aanoova maana khaixoona okhala mutthu ooloka. Nave Yesu aanisuwela wiira Pedru anwerya ohihiya okhala oororomeleya. Mooreera murima Yesu aahimuhimeerya Pedru wiira “muhoove!” Moolumo ala yaanooniherya wiira Yesu aanimuroromela Pedru nave yaahimwiiriha oturuka okumi awe. Pedru ni muhima awe iitthaniwa Andreya yaahihiya muteko ole woototha ihopa ni yaahipacerya omutthara Yesu muteko woolaleerya. Mwaha waivaavo, awo yaahaakhela mareeliho manceene yaakhuma wa Yehova. — Mar. 1:16-18.

5. Mareeliho xeeni Pedru aaphwannya awe mwaha woomutthara Yesu?

⁵ Mwaha woomutthara Kristu, Pedru aahikhalana soowiiraneya soohakalaliha. Owo aahinweha Yesu aapenuxaka aretta, oomolaka malaikha ootakhala ni aahihimuxaka alipa-ookhwa. b (Math. 8:14-17; Mar. 5:37, 41, 42) Nave Pedru aahimoona Yesu muhoolo mwaya ori ene mwene oovuwa a Omwene wa Muluku. Nto okathi wootheene, yena aanuupuwela yoowoonihiwa eyo. (Mar. 9:1-8; 2 Ped. 1:16-18) Veekeekhai Pedru aahiwerya oweha itthu sinceene ahaarowa awe oweha ahaamutthanre Kristu. Moohaanyiherya, owo aahihakalala vanceene mwaha wooxintta  muupuwelo awe woohiloka ni okhalana eparakha ya waakhela mareeliho ale!

6. Niireke Pedru aahixintta mixankiho sawe moowaakuveya? Mutthokiherye.

⁶ Hata aawenhe ni aiwale itthu sinceene okathi ari awe ni Yesu, owo nlelo aniwanana mixankiho sawe. Nrowe niwehe matakiheryo vakhaani. Okathi Yesu aatthokihenrye awe wiira aahaana ohaawa ni wiiviwa wiira omalelihe iprofesia sa mbiibiliyani, Pedru aahakhula wiira eyo khiyaarowa wiiraneya. (Mar. 8:31-33) Ikwaha sinceene, Pedru ni arummwa akina yaaninyakulihana aphavelaka osuwela tani aari mukhulupale. (Mar. 9:33, 34) Ohiyu wookiserya Yesu ohinatthi okhwa, Pedru aahiikittha niyaru na murumeyi mmosa a namukuttho muulupale. (Yoh. 18:10) Ohiyu ene yoole, mwaha wa owoova atthu, Pedru aahimukhootta Yesu ikwaha tthaaru ohimyaka wiira khaamusuwela. (Mar. 14:66-72) Mwaha waivaavo, Pedru aahinla oriipiwe ene murima vanceene. — Math. 26:75.

7. Nuumala Yesu ohihimuxiwa, eparakha xeeni anvaha awe Pedru?

⁷ Yesu khaamunyanyanle murummwa Pedru. Nuumala Yesu ohihimuxiwa, aahinvaha eparakha Pedru wiira ooniherye omphenta wawe yena. Yesu aahinvekela Pedru wiira moowiiyeviha okhapeleleke ipwittipwitthi sawe. (Yoh. 21:15-17) Nto Pedru aahipaka sootheene Yesu anvekenle awe. Nave Pedru aari eriyari ya atthu oopacerya othanliwa ni munepa woowaarya, okathi aari awe oYerusalemu nihiku na Pentekoositi.

8. Yoottheka xeeni yuulupale Pedru aapanke awe okathi aari awe wAntiyokiya?

⁸ Hata nuumala othanliwa ni munepa woowaarya, Pedru nlelo aaniwanana mixankiho sawe. Mwaakha wa 36 Nuumala Kristu Orwa, Muluku aahimuruma Pedru okumana ni Korneelio yoowo ahaakhanle muyuda. Nuumala-vo, Korneelio aahithanliwa ni munepa woowaarya nto eyo yaahooniherya wiira Muluku “khonaathanya atthu”. Hata ale yahaakhanle ayuda yaneemereriwa wiirela mpantta muloko wa ekristau. (Mit. 10:34, 44, 45) Muhoolo mwaya, Pedru aahipacerya olya ni ale yahaakhanle ayuda, masi owo khaatonko opaka eyo. (aGal. 2:12) Masi makristau makina ayuda, yuupuwela wiira ayuda ni amalapo khiyaareerela olya vamosa. Nuumala ayuda akina orowa wAntiyokiya, Pedru aahihiya olya vamosa ni amalapo, maana anoova ovukula waamini wa makristau a ayuda. Okathi murummwa Paulo oonale wiira Pedru kheettela ekeekhai, aahimpwapwela ohoolo wa atthu ootheene. (aGal. 2:13, 14) Hata aapanke yoottheka ele, Pedru khaatthikenle ottuli ni aanivilela. Masi exeeni yaamukhalihenrye?

9. Yohani 6:68, 69, onooniherya sai wiira Pedru aari oororomeleya?

⁹ Pedru aari oororomeleya, nave kheemerenrye wiira etthu nnakhala mutthu omuhiihe omutthara Yesu. Mwa ntakiheryo, aahooniherya okhala oororomeleya okathi awiixutti yaahaiwexenxa aya etthu Yesu aahimmye awe. (Mmusome Yohani 6:68, 69.) Okhala wiira khiyaalipelenle otthokiheriwa etthu yahaiwexenxa aya, atthu anceene yaahihiya omutthara Yesu. Masi Pedru khaahiyale. Owo aari oororomeleya ni aahihimya wiira Yesu paahi torina “moolumo a okumi woohimala”.

10. Yesu oonihenrye sai wiira aanimuroromela Pedru? (Nwehe eteseenyo.)

¹⁰ Yesu khaamunyanyanle Pedru. Ohiyu awe wookiserya valaponi, Yesu aanisuwela wiira Pedru ni arummwa akina yammunyanyala. Hata vari siiso, Yesu aahimuhimeerya Pedru oriki koosuwela wiira khamunrowa ohiya okhala oororomeleya. (Luka 22:31, 32) Yesu  aanisuwela wiira “murima onniphavela tthiri, masi erutthu teri yootteettheya”. (Mar. 14:38) Yesu khaamunyanyanle Pedru, hata okathi yoole yena aahimmye awe wiira khaamusuwela. Nuumala ohihimuxiwa, Yesu aahimukhumelela Pedru ori ene mekhawe. (Mar. 16:7; Luka 24:34; 1 aKor. 15:5) Aahimulipiha Pedru nnaamwi aakhulumunwe mwaha wa itthu soohiloka aapanke awe!

11. Yesu aamulipinhe sai Pedru wiira Yehova ammukhaliheryaka?

¹¹ Yesu aahimulipiha Pedru omuleelaka wiira Yehova ammukhapelela. Nuumala ohihimuxiwa, mwa mwiiriirya Yesu aahimwiiriha Pedru ni arummwa akina ovara ihopa sinceene. (Yoh. 21:4-6) Miiriirya iye, saahimukhaliherya Pedru wiiwexexa wiira Yehova anwerya onvaha itthu sootheene aaphavela awe. Woonasa wene, murummwa Pedru aanuupuwela moolumo a Yesu aahimmye awe wiira Yehova aamwaakhapelela atthu ootheene, ‘anihela opuro woopacerya Omwene’. (Math. 6:33) Nto eyo yaahimukhaliherya Pedru ohela nipuro noopacerya muteko awe woolaleerya ohiya muteko woototha ihopa. Owo aari mukristau oolipa murima ni aahipaka eyo nihiku na Pentekoositi 33 Nuumala Kristu Orwa. Nave aahaakhaliherya atthu anceene weemererya ihapari sooreera. (Mit. 2:14, 37-41) Nuuvira okathi, owo aahaakhaliherya asamariya ni ale yahaakhanle ayuda, wiixutta voohimya sa Kristu ni omutthara. (Mit. 8:14-17; 10:44-48) Moohaanyiherya, Yehova aahimurumeela Pedru wiira aakhaliherye atthu a makhalelo ootheene orwa mmulokoni wa ekristau.

12. Ntakiheryo na Pedru ninnikhaliherya sai akhala wiira ninniwanana muxankiho mwa okathi munceene?

¹² Yehova pooti onikhaliherya wiira nivilele. Okathi mukina pooti ohikweya ovilela, otepexa wene vaavo ninwanana ahu muxankiho mwa okathi munceene. Ikwaha sikina mixankiho sahu pooti okhala suulupale ovikana iye samphwannye Pedru. Masi Yehova pooti onivaha ikuru nimpirisari ahu wiira nihikhulumuwe. (Esal. 94:17-19) Mwa ntakiheryo, munna mmosa ohinatthi wiixutta ekeekhai owo aanirupihana alopwana-ru mwa iyaakha sinceene. Nuumala wiixutta ekeekhai, aahituruka mweettelo awe moomalela ni aanivarihela muteko itthu iixutta awe. Hata vari siiso, ikwaha sikina onniwanana miyuupuwelo soohiloka. Exeeni  enimukhaliherya ovilela? Owo onihimya so: “Yehova tonikikhaliherya”. Onnincererya oriki: “Kikhaliheriwaka ni munepa woowaarya, . . . kihiixutta wiira vanniweryaneya okhala moovarihana ni ele Yehova oniphavela awe. . . . Hata kiri ene mutthu oottheka, Yehova khonihiya okirumeela ni okilipiha”.

13. Moovarihana ni Miteko 4:13, 29, 31, ninrowa otthara sai ntakiheryo na Pedru? (Nwehe efootu.)

¹³ Ntoko niwenhe ahu, mwaha wa owoova atthu Pedru aanipaka itthu soohiloka. Masi owo aaninvekela Yehova ikuru, eyo yaahimukhaliherya okhala oolipa murima. (Musome Miteko 4:13, 29, 31.) Nave hiyo nnoowerya oxintta woova wahu. Nwehe etthu yaamwiiranenle munna mmosa mmiravo aakhala wAlemanha okathi wa Ekhotto ya Nenli ya Olumwenku Wootheene. Okathi ole, atthu yaanikhanyereriwa wuurama ohoolo wa Hitler ahimyaka wiira “Hitler xontte munoopole!” Nto eyo ti etthu Horst aapanke awe. Okathi Horst aaleelale awe anamuyari awe, awo khiyampwapwenle masi yaahivekela hoothe wiira Yehova onvahe olipa murima aapirisari awe. Horst aahiwerya okhalana ikuru okhaliheriwaka ni anamuyari awe vamosa ni Yehova. Nuuvira okathi owo aahimmye so: “Yehova khonakinyanyale”. c

14. Axitokweene oophenta anrowa waakhaliherya sai ale akhulumunwe?

¹⁴ Yehova ni Yesu khanikhala-khala aninyanyalaka. Nuumala Pedru omukhootta Yesu, aahaana opaka yoothanla yuulupale. Niireke aamuhiya omutthara Kristu? Yesu aahinvekela Yehova wiira omukhaliherye Pedru wiira waamini wawe ohivukuwe. Owo aahimuleela Pedru wiira oopaka nivekelo nne nave aanikupali wiira Pedru anwerya waalipiha anna akina. (Luka 22:31, 32) Woonasa wene Pedru aanilipa khula okathi uupuwela awe moolumo  a Yesu! Mwa enamuna emosa-ru, okathi nimphavela ahu opaka yoothanla yuulupale ya mookumini, Yehova pooti onikhaliherya ohihiya okhala oororomeleya. Owo pooti opaka eyo aarumeelaka axitokweene oophenta. (aEef. 4:8, 11) Munna mmosa oniitthaniwa Paul, onirumeela ntoko mutokweene mwa iyaakha sinceene, onniimananiha opaka eyo. Okathi mutthu onuupuwela awe ohiya ekeekhai, Paul onnimutthokiherya mutthu owo etthu emwiirinhe Yehova omuthanla. Nave onnimuupuxerya wiira ophenta woororomeleya wa Yehova khonrowa weemererya wiira yena ohiye ekeekhai. Paul onihimya so: “Kihaaweha anna anceene yaakhulumunwe masi mwaha wookhaliheriwa ni Yehova awo yaahiwerya ovilela”.

15. Ntakiheryo na Pedru ni Horst ninnikhaliherya sai ororomela moolumo ari Matheyo 6:33?

¹⁵ Ntoko siisale Yehova aamukhalihenrye awe Pedru ni awiixutti akina aavahaka itthu saathowa, nave onoowerya onivaha itthu nimpirisari ahu, naahihiye ohela Omwene wa Muluku nipuro noopacerya mookumini mwahu. (Math. 6:33) Horst yoowo nimulavunle ahu ittima sivinre, aahuupuwela okhala pioneero nuumala Ekhotto ya Nenli ya Olumwenku Wootheene. Owo aari ohaawa ni uupuwela wiira khaarowa owerya orumeela ntoko pioneero rekular. Exeeni aapanke awe? Owo aahilakela omuroromela Yehova. Nto esumana yaattharela, okathi yaaxukuriwa aya ni mutokweene esirkwiitu, owo aahivara muteko woolaleerya esumana yootheene. Wanikisa wa esumana ele, aahivahereriwa enveloope ni mutokweene esirkwiitu yaarina musurukhu munceene, owo aahihakalala vanceene. Masi khaaleeliwe tani aakuminhe musurukhu ole. Musurukhu waari enveloope ele, waaniphiyerya wiikhapelela orumeelaka ntoko pioneero mwa miyeeri sinceene. Yoovaha ele, yaahimukhaliherya Horst oweha wiira Yehova ammukhaliheryaka okumi awe wootheene, aahihiye ohela opuro woopacerya Omwene wa Muluku. — Mal. 3:10.

16. Xeeni vari aya wa faita wiixutta ntakiheryo na Pedru ni itthu olempe awe?

¹⁶ Woonasa wene, Pedru aahihakalala vanceene okhala wiira khaanyanyaliwe ni Yesu ntoko yena aavekenle awe ekwaha emosa! Yesu khaahiyale omwiixuttiha Pedru wiira okhale murummwa oororomeleya ni okhale ntakiheryo nooloka na makristau. Nave hiyo ninniixutta etthu ya faita ni moota Pedru iixuttihiwa awe. Owo aahaaleela atthu akina itthu iixuntte awe, orumeelaka ikarta sawe piili siniphwanyaneya mbiibiliyani, aalepenle awe makristau oopacerya. Mwaha onittharelana, ninrowa wiixutta itthu vakhaani sa ikarta iyo ni moota nikhanle ahu oovarihela muteko olelo-va.