1. Itthu xeeni sikhanle ookhumelela omutekoni aahiiso oskola?

 MUNOONELA sai okathi mpatthani anyu a omutekoni aahiiso a oskola, onookohaaweni voohimya sa sookupali sanyu? Niireke munoonanariwa? Anamunceene a hiyo ninkhala siiso. Makoho ntoko awo, anninikhaliherya osuwela ele onuupuwela awe mutthu owo nave anninivaha eparakha ya olaleerya. Masi ikwaha sikina, atthu annipaka makoho awo aphavelaka wiira ninyakhulihaneke. Tthiri khanintikhina eyo. Okhala wiira atthu anceene anniiwa soohimmwa soohiloka voohimya sa ele ninkupali ahu. (Mit. 28:22) Moohaanyiherya, ninkhala “mahiku ookiserya”, okathi anamunceene ‘ahiniphavela aya wiiwanana’ ni ari aya “oowali”. — 2 Tim. 3:1, 3.

2. Xeeni ninreerela ahu okhala atthu oomaala?

² Woonasa wene nyuwo munnuupuwela so: ‘kinrowa owerya sai okhala oopixa murima okathi mutthu mukina oniphavela awe wiira ninyakulihaneke myiha sa mbiibiliyani?’ Munnisuwela etthu enrowa wookhaliheryani? Okhala oomaala. Mutthu oomaala khonaakuva onanariwa, owo onniikasopa okathi onipaciwa awe ni ohinoona awe yoowaakhula. (Mir. 16:32) Ekeekhai wiira ti vookhweya olavula masi ovila opaka. Munrowa owerya sai okhala mutthu oomaala? Munrowa omwaakhula sai moomaaleleya, okathi mutthu mukina onookohaaweni voohimya sa sookupali sanyu? Akhala wiira mwa paapa aahiiso maama munrowa waakhaliherya sai aniinyu waakiherya waamini waya moomaaleleya? Mwaha ola, nnimwaakhula makoho ala.

3. Xeeni ninhimya ahu wiira oomaala onniniiriha okhala oolipa murima ohiya oolosowa? (2 Timootheyo 2:24, 25)

³ Okhala oomaala khonitaphulela wiira mwa mutthu oolosowa, masi owo mukhalelo wa atthu oolipa murima. Nihaana okhala oolipa murima wiira nihihiye okhala oomaala okathi sinniphwanya aya mixankiho. Omaala mukhalelo onikumiheriwa ni “munepa  woowaarya”. (aGal. 5:22, 23) Nuulumo na ekereku noowi “omaala” naanirumeeliwa ehimmwaka ekhavalo ya mutakhwani yeeyo yaaxinttiwe. Nuumala oxinttiwa, ekhavalo ennimaaleleya, masi khenihiya okhalana ikuru. Ankhi hiyo? Ninrowa owerya sai okhala oomaala okathi omosa-ru okhala oolipa murima? Khaninrowa owerya nihikhaliheriwaka. Nihaana onvekela Muluku wiira onivahe munepa awe woowaarya ni onikhaliherye okhalana mukhalelo ola wooreera. Aakhala matakiheryo manceene anooniherya wiira vanniweryaneya wiixutta okhala oomaala. Anna ni arokora anceene khiyaahiyale okhala oomaala, hata okathi yaapaciwa aya ni atthu akina. Eyo yaahaakhaliherya atthu akina okhalana mooneelo wooloka voohimya sa Anamoona a Yehova. (Mmusome 2 Timootheyo 2:24, 25.) Munrowa owerya sai wiiriha omaala okhala mukhalelo anyu muulupale?

4. Exeeni yaamukhalihenrye Isakhi okhala mutthu oomaala?

⁴ Mbiibiliyani sookhala soowiiraneya sinceene sinooniherya wiira omaala mukhalelo orina efaita yuulupale. Nrowe niwehe ntakiheryo na Isakhi. Okathi aakhala awe muttetthe wa oGerari, owo aahaattamana ni afilisti. Awo yaahimukhalela nrima ni yaahuuhweelela ihime saathimpwe ni ipottha sa paapa awe. Masi ohiya owana-wana mwaha wa ihime iyo, Isakhi ni emusi awe yaahithaamela muttetthe mukina ni yaahithipa ihime sikina. (Maph. 26:12-18) Masi afilisti yaahihimya wiira ihime iyo saathimpwale niinano maasi awo yaari awaya. Hata vaari siiso, Isakhi aahikhala oomaaleleya. (Maph. 26:19-25) Owo aawenrye sai okhala oomaaleleya hata atthu akina yaampaca? Moohaaniherya, owo aaniweha ntakiheryo na anamuyari awe. Nave aahiixutta itthu sinceene ni ntakiheryo na paapa awe, iitthaniwa Abrahamu yoowo aari mutthu amurettele ni aarina “murima woomaala ni woowiiyeviha”. — Ped. 3:4-6; Maph. 21:22-34.

5. Ntakiheryo xeeni nnooniherya wiira anamuyari pooti owiixuttiha anaaya okhala oomaala?

⁵ Nave nyuwo anamuyari, pooti owiixuttiha aniinyu okhala oomaala. Nwehe ntakiheryo na Maxence, orina iyaakha 17. Oskola ni muteko woolaleerya, owo aahaana waavilela atthu oowali. Masi anamuyari awe yaanimpixerya murima ni yaanimwiixuttiha moota wookhala oomaala. Anamuyari awe Maxence anihimya so: “Owo aahiixutta wiira ti vookhweya opaka etthu yoohiloka okathi nimpaciwa ahu. Masi mutthu oolipa murima ohaana okhala oomaaleleya”. Moohakalaliha, Maxence aahiixutta okhala mutthu oomaala.

6. Nivekelo ninrowa onikhaliherya sai okhala mutthu oomaala?

⁶ Exeeni nikhanle ahu oopaka okathi atthu akina anilavula aya itthu soohiloka voohimya sa Yehova aahiiso Biibiliya? Nihaana onvekela Yehova munepa woowaarya ni ankhili wiira nisuwele etthu yoopaka moomaaleleya. Masi exeeni nikhanle ahu oopaka noona wiira noolavula aahiiso noopaka etthu mwa enamuna yoohiloka? Nihaana otthikela ovekela ni wuupuwelela etthu nikhanle ahu oopaka mwa enamuna yooloka ekwaha ekina. Niira siiso, Yehova onoonivaha munepa awe woowaarya ni onikhaliherya wiikasoopa ni okhala oomaaleleya.

7. Exeeni ennikhaliherya wiikasoopa vaavo ninlavula ahu aahiiso opaka etthu okathi wooxankiha? (Miruku 15:1, 18)

⁷ Iversiikulu sinceene sa mbiibiliyani pooti onikhaliherya olavula mwa enamuna yoomaaleleya okathi wa mixankiho. Munepa woowaarya pooti onikhaliherya wuupuwelela soolepa iyo. (Yoh 14:26) Mwa ntakiheryo, malakiheryo nimphwanya ahu eliivuru ya Miruku, pooti onikhaliherya okhala oomaaleleya. (Musome Miruku 15:1, 18.) Eliivuru eyo ya mbiibiliyani, ennooniherya xeeni vari aya vooloka okhala oomaala okathi wooxankiha. — Mir. 10:19; 17:27; 21:23; 25:15.

8. Xeeni ninreerela ahu wuupuwela saana nihinatthi omwaakhula mutthu onnikoha sa itthu ninkupali ahu?

⁸ Ankhili pooti onikhaliherya. (Mir. 19:11) Mutthu a miruku, onnisuwela otthokiherya okathi onikohiwa awe ni mutthu mukina voohimya sa etthu onikupali awe. Makoho makina aahiiso soohimmwa sinoolikana ni icebergs, eyo piiyo, nluku nuulupale na exeelo. Exeeni enniiriha ohimya siiso? Okhala wiira okathi mutthu onnikoha awe voohimya sa itthu ninkupali ahu, ti voovila osuwela etthu emwiirinhe mutthu owo onikoha. Tivo, nihinatthi waakhula, ti vooloka wuupuwela wiira khansuwenle etthu emwiirinhe mutthu owo opaka nikoho nno. — Mir. 16:23.

9. Gideyoni oonihenrye sai okhala mutthu a miruku ni oomaala okathi aalavula awe ni alopwana a nloko na Efrayimi?

⁹ Nrowe niwehe etthu Gideyoni aapanke awe okathi alopwana a Efrayimi yaalavunle aya ni yena mwa enamuna yoohiloka. Awo yaaphavela wiira asuwela etthu yaamwiirinhe Gideyoni ohaalattula wiira yawane ekhotto ni awanani aya, aisarayeli. Masi exeeni yaawiirinhe olavula ni owali? Woonasa wene mwaha wa wiixinnuwiha, awo yoona wiira yaahiveehiwa maana yuupuwela wiira nloko naya naahikhalana efaita waavikana aisarayeli akina. Moohicikha etthu yaawiirinhe olavula siisaale, Gideyoni aahooniherya okhala mutthu ankhili. Owo aahiphavelasa osuwela etthu yaawiirinhe onanariwa ni aahiwaakhula moomaaleleya.  Exeeni yaakhumelenle? Biibiliya onihimya wiira axilopwana ale “yahikhurunuwa murima”. — Makh. 8:1-3.

10. Exeeni enrowa onikhaliherya osuwela waakhula okathi ninkohiwa ahu voohimya sa waamini wahu? (1 Pedru 3:15)

¹⁰ Woonasa wene, mpatthani ahu a oskola aahiiso a omutekoni, pooti onikohaka nthowa naya nintthara ahu malamulo a mbiibiliyani. Okathi nnaakhula ahu, nihaana wiimananiha waakiherya sookupali sahu nave okathi omosa-ru wooniherya wiira ninnittittimiha moonelo wa mutthu owo. (Mmusome 1 Pedru 3:15.) Ohiya wuupuwelaka wiira oniphavela oniveeha, vaamuloka oweha nikoho nno ntoko eparakha wiira nimusuwelihe etthu yooloka okhanle awe oopaka. Moohicikha etthu emwiirinhe mutthu owo opaka nikoho nno, nihaana waakhula mwa enamuna yoomaaleleya ni mooreera murima. Moota ninrowa ahu waakhula pooti omukhaliherya mutthu owo wuupuwela saana voohimya sa mwaha owo. Hata mutthu ori ene oowali aahiiso ooveeha, khula okathi nihaana omwaakhula mwa enamuna yooreera murima. — aRom. 12:17.

11-12. a) Exeeni ninreerela ahu wuupuwelelaka nihinatthi waakhula makoho oovila? (Nwehe efootu.) b) Nuumala ovarerya makoho ala ninrowa omwaakhula sai mutthu owo?

¹¹ Mpatthani anyu a omutekoni aahiiso a oskola, pooti ophavelaka osuwela etthu eniwiirihani ohitthapelaka nihiku muyariwe anyu. Nkuupuwelani ela: Niireke oniphavela osuwela akhala wiira hiyo ninnitthekula aahiiso nnaari? Aahiiso niireke owo onoona wiira mwaha woohitthapelaka nihiku niyariwe ahu, ninnihonona ompatthani okhanle omutekoni? Nihaana omuttottopela mpatthani ahu owo, mwaha woowi onnaathokorerya atthu akina omutekoni. Nave nihaana omutthokiherya wiira ninniphavela ovara muteko ni apatthani ootheene. Niira siiso, nnoovukula oxankiheya wa mpatthani ahu owo. Nave woonasa wene, eyo pooti onikhaliherya omusuweliha moonelo wa Biibiliya voohimya sa efesta ya wuupuwelela nihiku niyariwe ahu.

¹² Hiyo pooti opaka etthu emosa-ru okathi sinikhumelela aya myiha sikina siniiriha onyakulihana. Mwa ntakiheryo, mpatthani ahu oskola pooti ohimyaka wiira Anamoona a Yehova, aahaana olokiherya moota anuupuwela aya voohimya sa orupihana alopwana-ru aahiiso athiyana-ru. Niireke owo onilavula eyo mwaha woowi khonaasuwela saana Anamoona a Yehova? Aahiiso niireke orina mpatthani awe wala mmusi awe onirupihana alopwana-ru aahiiso athiyana-ru? Niireke owo onuupuwela wiira ninnaanyokha atthu anrupihana alopwana-ru aahiiso athiyana-ru? Woonasa wene vanooloka omutthokiherya wiira hiyo ninnaathokorerya atthu ootheene ni waattittimiha. Nave ninnisuwela wiira khula mutthu ookhalana etireitu yoopaka soothanla. b (1 Ped. 2:17) Omuleela mutthu owo ele Biibiliya enihimya awe ni moota woweettela, enoonikhaliherya okhalana okumi woohakalaliha.

13. Munrowa omukhaliherya sai mutthu ohinikupali wiira Muluku ookhala?

¹³ Okathi ninvaanela ahu ni mutthu onilavula moonelo awe moolipiherya, nihuupuweleke wiira ninnisuwela etthu enimwiiriha mutthu owo olavula siiso. (Tito 3:2) Mwa ntakiheryo, mwaarowa opaka exeeni akhala wiira mpatthani anyu a oskola onihimya wiira khonikupali akhala wiira Muluku ookhala? Niireke moowakuveya mwaarowa wuupuwela wiira owo onikupali wiira itthu siroothatuwa ni onnisuwela saana itthu sootheene sa mwaha owo? Woonasa wene, owo pooti olavulaka etthu aatonko awe wiiwa ni ohitonko awe wuupuwela saana sa mwaha owo. Ohiya opacerya ovaanela soowiixuttiha sa othatuwa, mmananihe onvaha etthu ekhanle awe oosoma aahiiso wuupuwelela okathi mukina. Woonasa wene nyuwo pooti omooniherya myiha sinlavula sa  soopattuxiwa siri esaite ahu jw.org. Nto nihiku nikina nyuwo pooti ovaanela voohimya sa mwaha aahiiso eviidiyu ophwannya awe. Okathi nnaattittimiha ahu atthu mwa enamuna ela, vanimwaakhweela awo ophavelasa wiixutta ele Biibiliya onihimya awe.

14. Niall aarumeelale sai esaite jw.org wiira ooniherye, wiira ele anihimya aya atthu akina sa Anamoona a Yehova itthu soowoothiwa?

¹⁴ Mmiravo mmosa oniitthaniwa Niall aahirumeela esaite ahu jw.org ophavelaka wooniherya wiira ele atthu akina anihimya aya sa Anamoona a Yehova khahiyo ekeekhai. Owo onihimya so: “Mpatthani aka mmosa a oskola aahimya wiira khula okathi nkaakupali itthu sa siensia mwaha woowi kaakupali eliivuru elempwale ni apinaatamu”. Okhala wiira mpatthani awe ole khaaphavela onwiriyana Niall olavulaka, owo aahimuleela wiira orowe va jw.org ni owehe mwaha oni: “A Ciência e a Bíblia”. Nuuvira okathi, Niall aahisuwela wiira mpatthani awe ole aahikela esaite eyo, vano aaniphavela ovaanela voohimya sa soopattuxiwa. Nave eyo pooti wiiraneya ni nyuwo.

15. Anamuyari anrowa waakhaliherya sai anaaya waakhula mwa enamuna yooreera murima okathi anikohiwa aya sa ele anikupali aya?

¹⁵ Anamuyari pooti waakhaliherya anaaya osuwela moota woowaakhula moomaaleleya, okathi anikohiwa aya sa ele anikupali aya. (Yak. 3:13) Anamuyari akina anniwiixuttiha anaaya okathi woomulompa Muluku vatthokoni. Awo annisoma myiha sikhanle ookhumelela oskola ni annipaka sowooniherya sa moota woowaakhula. Nave anniwiixuttiha anaaya moota woolavula mooreera murima ni waavara murima atthu akina. — Nwehe ekaaxa eni: “ Mwiixutteke ni Emusi Anyu”.

16-17. Wiixutta vahinatthi onrowa waakhaliherya sai amiravo osuwela waakhula?

¹⁶ Wiixutta vahinatthi pooti waakhaliherya amiravo waatthokiherya saana atthu akina ele anikupali  aya. Nave eyo enoowiiriha okupali wiira ele aniixutta aya mbiibiliyani ekeekhai. Myaha siri mpantta oni: “Amiravo Annikoha” musaitini jw.org, sookhalana itabela sikhanle oowaakhaliherya amiravo. Myiha iyo sipakeliwe wiira saakhaliheryeke amiravo olipiha ele anikupali aya ni owerya waakhula arumeelaka moolumo aya. Okathi emusi eniixutta aya hoothe myiha iyo, eyo enimwaakhaliherya atthu ootheene waakiherya waamini waya moomaaleleya ni mwa enamuna enaavara murima atthu akina.

¹⁷ Mmiravo mmosa oniitthaniwa Matthew, onnitthokiherya oriki wiixutta ni emusi awe waahimukhaliherya vanceene. Okathi woomulompa Muluku vatthokoni, owo ni anamuyari awe yaanitokosa myiha sikhanle ookhumelela oskola. Owo onihimya so: “Hiyo naanuupuwelela Makoho axipatthani aka a oskola yaakhanle aya ookikoha nuumala-vo naanitokosa moota woowaakhula. Okathi kaasuwelaka saana etthu enikiiriha omukupali Biibiliya, kaanitepa okupali nave kaanoona okhweya waakhula mwa enamuna yoomaaleleya okathi kaakohiwa aka”.

18. Akolosi 4:6, onniixuttiha exeeni?

¹⁸ Ekeekhai wiira hata nisuwelaka otthokiherya, pooti ohiwiiriha atthu akina okupali ele enihimya ahu. Masi etthu yooloka enrowa waakhaliherya ori olavula mwa enamuna yoowaareerela murima. (Mmusome aKolosi 4:6.) Olavula sa ele ninkupali ahu onoolikana ni omuxokari poola ni mutthu mukina. Hiyo pooti omuxokari mwa enamuna yooloka aahiiso mwa enamuna ekhanle onwereya mutthu owo. Akhala wiira nnoomuxokariki mwa enamuna yooloka nnoomukhaliherya ole nrina ahu ohihiya omuxokari. Mwa enamuna emosa-ru, akhala wiira nnoolavula mwa enamuna yooreerela ni yoomaaleleya, nnoowiiriha atthu akina osiveliwaka oniwiriyana ni ohihiya ovaanela ni hiyo. Akhala wiira mutthu mukina oniphavela onyakulihana aahiiso olavula mwa enamuna yoohiloka sa ele ninkupali ahu, hiyo khannikhanyereriwa othipelela ovaanela aahiiso omwaakhula. (Mir. 26:4) Masi khahiyo wiira anamunceene aniphavela onyakulihana aahiiso olavula mwa enamuna yoohiloka. Tthiri atthu akina anooniwiriyanaka.

19. Itthu xeeni sinniiriha waakhula mooreerela murima okathi nnaakiherya ahu waamini wahu?

¹⁹ Veekeekhai okhala mutthu oomaala onninikhaliherya. Munvekeleke Yehova wiira oovaheni ikuru muniprisari anyu, wiira muhihiye okhala oomaala okathi mutthu mukina onookohaaweni aahiiso oniphavela awe osuwela etthu munikupali anyu. Muhiliyale wiira waakhula mooreerela murima, onimookhaliheryani wiira ovaanela wanyu ohikumiherya onyakulihana. Waakhula mwa enamuna yooreerela murima ni mwa nttittimiho onimwaakhaliherya atthu akina woowiriyanani ni oturuka moonelo aya voohimya sa hiyo ni Biibiliya. Khula okathi, ‘mukhaleke oolikana ene wiira mwaakhule saana’ voohimya sa ele munikupali anyu. Masi, “mwaakhuleke vooreerela murima, ni nttittimiho”. (1 Ped. 3:15) Nto muhihiye opaka itthu mwa enamuna yoomaaleleya ni mooniheryaka wiira mwa mutthu oolipa murima!