1-2. a) Makhalelo yaari sai oYudeya okathi murummwa Paulo aalepenle awe ekarta makristau aheeberi? b) Xeeni ninhimya ahu wiira ekarta ele yaaphiyale okathi wooreerela?

 MAKRISTAU aheeberi yaakhala oYerusalemu ni oYudeya, sanaaphwanya mixankiho sinceene nuumala Yesu okhwa. Nuuvira okathi vakhaani nuumala okhumelela muloko oYerusalemu, makristau awo yaahipacerya olupatthiwa vanceene. (Mit. 8:1) Nuuvira iyaakha 20, makristau ale waahaaphwanya muxankiho mukina woothoiwa. Yaahiiraneya eyo, mwaha wa etala yaakhumelenle elapo ele. (Mit. 11:27-30) Mwaakha wa 61 Nuumala Kristu Orwa, makristau ale yaahikhalana murettele nalikanyiha ni itthu saarowa okhumelela muhoolo. Okathi owo, makristau ale yaahaakhela ekarta murummwa Paulo aalepenle awe. Tthiri ekarta eyo, yaaphiyale okathi wooreerela.

² Ekarta ele yaaphiyale okathi wooreerela, okhala wiira okathi wa murettele yaarina aya, khiwaarowa opisa. Murummwa Paulo ahaavaha miruku makristau ale, saarowa waakhaliherya ovilela mixankiho saarowa waaphwanya. Nto opwetexiwa wa makhalelo a okathi wa ayuda yaawo Yesu aahimmye awe, waanaattamela. (Luka 21:20) Ekeekhai wiira nnakhala murummwa Paulo hata makristau ale a oYudeya, khiyaasuwela okathi ene itthu iyo saarowa aya wiiraneya. Masi makristau ale yanwerya orumeela saana okathi ole waahanle, wiira alipihe mikhalelo saya ntoko waamini ni ovilela. — aHeeb. 10:25; 12:1, 2.

3. Xeeni ekarta Paulo aalepenle awe aheeberi eri aya ya faita wa makristau olelo-va?

³ Moohipisa, anooniphwanya maxakha ovikana ale yaaphwannye makristau aheeberi. (Math. 24:21; Wiis. 16:14, 16) Tivonto, mwaha ola, nnoothokorerya miruku soovareleya  muteko sinrowa onikhaliherya, seiyo Yehova aavahale awe makristau aHeeberi.

NIKHALANEKE “WAAMINI WOOLIPA”

4. Mixankiho xeeni saaphwannye ayuda yaakenle ekristau? (Nwehe eteseenyo.)

⁴ Ayuda yaakenle ekristau, yaahaana opaka marukunuxo maalupale, nto opaka eyo khahiyo yaari etthu yookhweya. Khalai, ayuda yaari nloko naathanliwe ni Yehova. Iyaakha sinceene, oYerusalemu waanisuweliwa okhala opuro waarina efaita yuulupale. Okathi ole, etemplo ya Yehova yaari oYerusalemu. Nave atthu yaaphavela omukokhorela Yehova mutemplo, yaahaana orowa weiwo. Tivonto, ayuda oororomeleya yaanitthara Nlamulo na Moise ni malamulo ahooleli a itiini yiixuttiha aya. Soowiixuttiha iye, saanaakhaliherya othanla etthu yoolya, okhalana moonelo wooloka voohimya sa winnuwihiwa ni waataana waya ni ale yahaakhanle ayuda. Tivonto, nuumala Yesu okhwa, Yehova kheemererya mikuttho iyo ayuda yaavaha aya. Marukunuxo awo, yaanaaxankiha ayuda yaakenle ekristau okhala wiira yaahilimalela weettela Nlamulo na Moise. (aHeeb. 10:1, 4, 10) Hata makristau ale yaarina waamini woolipa ntoko Pedru, yaahikhalana muxankiho a moota woolimalela marukunuxo ale masya. (Mit. 10:9-14; aGal. 2:11-14) Mwaha wa marukunuxo ale masya, makristau ale yaahipacerya olupatthiwa ni ahooleli a itiini sa ayuda.

5. Itthu xeeni makristau ale yaareerela aya okhalana ephoole?

⁵ Makristau ale a oYudeya, yaanilupatthiwa ni ikurupu piili sa atthu. Yoopacerya, yaari ahooleli a itiini yaawo yaawoona makristau ale okhala anamavirikanya ni yaahiyale weettela etiini ya ayuda. Nave atthu akina yaawo yaahimmya okhala makristau, yaanaatumererya wiira yaahaana othipelela weettela Malamulo a Moise. Woonasa wene, atthu awo yaanipaka eyo okhala wiira yaanoova olupatthiwa. (aGal. 6:12) Exeeni yaarowa waakhaliherya makristau ale okhala oororomeleya wa Yehova?

6. Etthu xeeni murummwa Paulo aatumerenrye awe makristau opaka? (aHeeberi 5:14–6:1)

⁶ Ekarta murummwa Paulo aaroihenle awe aHeeberi, aahaatumererya wiira yahaana osoma  ni wuupuwelela Nuulumo na Muluku. (Mmusome aHeeberi 5:14–6:1.) Murummwa Paulo aahilavula Soolempwa sa eHeeberi, atthokiheryaka wiira enamuna ele esya yoomukokhorela Yehova, yaari yooloka ovikana ele ayuda yaamukokhorela aya khalai. a Paulo aanikupali wiira yasuwela ni wiiwexexa saana ekeekhai, eyo yaamwaakhaliherya osyaka soowiixuttiha soowootha.

7. Mixankiho xeeni sinniphwanya olelo-va?

⁷ Ntoko makristau aheeberi, olelo-va, nihaana waasyaka atthu yaawo animwara-mwarya itthu soowoothiwa ni ahinttittimiha malamulo a Yehova voohimya sa ele eri yooloka ni yoohiloka. Atthu akina, annaanyokha Anamoona a Yehova okhala wiira anneettela ele Biibiliya onihimya awe voohimya sa orupihana woohiloka. Atthu akina anihimya wiira na atthu ootakhala okhala wiira mutthu ahiya wiiwelela malamulo a Yehova onnikumihiwa mmulokoni. Enamuna atthu anuupuwela aya, enootepa ovirikana ni moota Yehova onuupuwela awe. (Mir. 17:15) Tivonto vari aya va miruku osuwela ni osyaka miyuupuwelo iyo soohiloka. Niheemererye nnakhala namavirikanya mmosa onikhulumulaka aahiiso onihiihaka omurumeela Yehova. — aHeeb. 13:9.

8. Moota xeeni ninrowa ahu wuncererya waamini wahu?

⁸ Paulo aahaatumererya makristau aheeberi wiira yaahana okhalana waamini woolipa, nave-tho hiyo nihaana otthara miruku iyo. Nihaana omuleeri Biibiliya ni ephoole wiira nimusuwele oratteene Yehova ni moota onuupuwela awe. Nto nihaana wiimananiha opaka eyo hata nuumala wiivahererya ni opatisiwa. Moohicikha okathi nivirinhe ahu nimurumeelaka Yehova, nihaana osoma ni wiiwexexa Nuulumo na Muluku khula nihiku. (Esaal. 1:2) Akhala wiira nnoopakaka yoosoma ahu ya Biibiliya khula nihiku, eyo enoonikhaliherya olipiha mukhalelo murummwa Paulo aalepenle awe makristau aheeberi, eyo piiyo, waamini. — aHeeb. 11:1, 6.

‘MUKHALANEKE WAAMINI WIIRA MUKHALE AKUMI’

9. Exeeni makristau ale aheeberi yaapirisari aya okhalana waamini woolipa?

⁹ Makristau yaanipirisari okhalana waamini woolipa, maana opaka eyo yaamwaakhaliherya ovilela okathi oYudeya saarowa aya opacerya mixankiho. (aHeeb. 10:37-39) Yesu aahaalopola awiixutti awe wiira nuumala oweha oYerusalemu orukurerinwene ni anakhotto, awo yaahaana otthyawela omiyaakoni. Makristau yaakhala epooma ele ya oYerusalemu ni ale yaakhala oYudeya, yaahaana wiiwelela miruku iye. (Luka 21:20-24) Okathi ole, vaavo anakhotto yaawoopopiha aya waatuphela atthu, ale yaakhala ota yaanitthyawela muhina mwa epooma ele okhala wiira ixiri saya saari soovareleleya. Nto miruku iye sa otthyawela omiyaakoni, saakhala ntoko wiira khisaavareleya muteko. Tivonto, vaanipirisari okhalana waamini woolipa.

10. Exeeni makristau yaarowa aya opaka vakhala wiira yaamukhalana waamini woolipa? (aHeeberi 13:17)

¹⁰ Nave makristau aheeberi yaanipirisari waaroromela ale Yesu aathanlalya awe, wiira avaheke malakiheryo mmulokoni. Woonasa wene, ale yaahoolela miloko yaahivaha malakiheryo ookhalela a moota ni okathi wootthyawa. (Mmusome aHeeberi 13:17.) Nuulumo na ekereku nirumeeliwe eliivuru ya aHeeberi 13:17 nni “nwiiweleleke”, nintumererya wiiwelela maana opaka eyo ennimwiiriha mutthu omuroromela ole onivaha miruku iyo. Masi ohiya wiiwelela mwaha woowi mutthu owo ookhalana eparakha yoovaha malakiheryo.  Tivonto, makristau aheeberi yaanipirisari wiixutta waaroromela axitokweene yaahoolela, sihinatthi opacerya mixankiho. Vakhala wiira okathi ole yaarina aya murettele vaanaakhweela wiiwelela malakiheryo yaavahiwa aya ni axitokweene, vaarowa okhala vookhweya wiiwelela malakiheryo okathi ole wooxankiha.

11. Xeeni makristau olelo-va anipirisari aya okhalana waamini woolipa?

¹¹ Ntoko makristau aheeberi, nave hiyo ninnipirisari okhalana waamini. Ninkhala okathi atthu anceene ahinikupali aya wiira onoophiya wanikisa wa makhalelo ala oohiloka. Awo anniniveeha mwaha wookupali eyo. (2 Ped. 3:3, 4) Ohiya-vo, nnaamwi Biibiliya ohimyaka itthu sikina sinrowa wiiraneya okathi wa maxakha maalupale, sookhala itthu sikina nihinsuwela ahu. Nihaana okupali wiira wanikisa onoophiya, nto okathi enrowa aya wiiraneya eyo nikupaliki wiira Yehova onoonikhapelela. — Hab. 2:3.

12. Exeeni enrowa onikhaliherya woopowa okathi wa maxakha maalupale?

¹² Nave nihaana olipiha waamini wahu wiira Yehova onnimurumeela “murumeyi oororomeleya ni a ankhili” wiira onivaheke malakiheryo. (Math. 24:45) Okathi anrowa aya opacerya maxakha maalupale, woonasa wene, nnimwaakhela malakiheryo ookhalela anrowa onikhaliherya woopola ikumi sahu, sintoko okathi ole makristau aheeberi yaakhenle aya nuumala Yerusalemu orukureriwa ni anakhotto. Tthiri ola okathi ninreerela ahu wiixutta waaroromela ale Yehova onaarumeela awe wiira anivaheke malakiheryo. Vakhala wiira khinnaaroromela ni owiiwelela ale avahiwe okhulupale, moohaanyiherya vanrowa okhala vooxankiha wiiwelela okathi ninrowa ahu ovahiwa malakiheryo nuumala opacerya maxakha maalupale.

13. Xeeni miruku sa Paulo siri aHeeberi 13:5 saari aya sa faita?

¹³ Alipelelaka ovahiwa esinaale wiira atthyawe, makristau ale aheeberi yaanipirisari okhalana okumi woohaattiheriwa itthu ni osyaka ‘ophenta musurukhu’ wiira aweryeke omurumeela Yehova. (Mmusome aHeeberi 13:5.) Akina yaari amasikhini. (aHeeb. 10:32-34) Nnaamwi yeemerenrye waaphwanya mixankiho mwaha wa ihapari sooreera, akina a yaawo yaahipacerya wiithukumanyerya mihakhu woonasa wene, aphavelaka wiikhapelela aahiiso othaaciri. Masi musurukhu khiwaarowa woopola ikumi saya okathi Yerusalemu aarowa awe opwetexiwa. (Yak. 5:3) Ohimya ekeekhai, ootheene yaale yaaphenta mihakhu woonasa wene, vaamwaaxankiha otthyawa, ohiya empa aya ni mireerelo sikina.

14. Moota xeeni okhalana waamini woolipa onrowa aya onikhaliherya opaka soothanla voohimya sa mihakhu?

¹⁴ Nakhalana waamini wiira Yehova onoopwetexa olumwenku ola voohipisa, hiyo khaninrowa woona wiira okhalana musurukhu ni mireerelo sinceene, teri etthu erina efaita yuulupale. Okathi wa maxakha maalupale, musurukhu aahiiso mihakhu khasinrowa okhalana efaita. Biibiliya onihimya wiira atthu “eparatha aya enooriheliwa muramphani” mwaha woowi anoosuwela wiira “hata eparatha, hata eweero aya kisinrowa owoopola nihiku noonanariwa wa APWIYA”. (Ezek. 7:19; Piipiliya Emakhuwa.) Ohiya wiithukumanyerya mihakhu, nihaana opaka soothanla sinrowa okhaliherya okumi ahu nave-tho okhaliherya emusi ahu ni sinrowa onikhaliherya ohihiya omurumeela Yehova. Khivaarowa okhala vamiruku orumeela musurukhu munceene aahiiso oviriha okathi munceene nikhapelelaka itthu sa weerutthuni. Nihaana okhalana ephoole wiira nihivahaxeke efaita itthu nirina ahu. (Math. 6:19, 24) Vaavo  vanaattamela aya wanikisa, hiyo nihaana othanla vakhala wiira nimmuroromela Yehova aahiiso mihakhu.

“MUHAANA OVILELA”

15. Xeeni makristau aheeberi yaapirisari aya ovilela?

¹⁵ Makristau aheeberi, yaanipirisari ovilela wiira awerye oxintta mixankiho saarowa weehererya waamini waya. (aHeeb. 10:36) Nnaamwi akina yaalupatthinwe khalai, masi akina yaakenle ekristau okathi wa murettele. Tivonto, Paulo aahiwuupuxerya wiira yaahana wiilokiherya wiira awerye oxintta olupatthiwa ni ohihiya ororomeleya mpakha okhwa, ntoko Yesu. (aHeeb. 12:4) Ayuda anceene yaaninanariwa ni yaamutepa okhala ootakhala mwaha wa atthu anceene yaakela ekristau. Okathi aalaleerya awe oYerusalemu, Paulo aahitupheliwa ni muttitthi wa atthu. Ayuda oowiiraka 40, “yaahimpaka palano ni yaahilapha, ahimyaka wira khiyaarowa olya etthu nnakhala owurya, ahimwiivale toko Paulo”. (Mit. 22:22; 23:12-14) Nnaamwi yaanyokhiwa ni olupatthiwa, makristau ale yaanipirisari othukumana wiira amukokhorele Yehova, olaleya ihapari sooreera ni olipiha waamini waya.

16. Moota xeeni ekarta yaaroiheliwe aheeberi, enrowa aya onikhaliherya ovilela muxankiho wa olupatthiwa? (aHeeberi 12:7)

¹⁶ Exeeni yaarowa waakhaliherya makristau ovilela nnaamwi yaalupatthiwa? Paulo aaphavela waakhaliherya makristau ale oweha mireerelo aniphwanya aya vakhala wiira anoovilela olupatthiwa. Owo aahaatthokiherya wiira, okathi makristau waamini waya oneehereriwa aya, Muluku pooti orumeela eyo wiira owiixuttihe. (Mmusome aHeeberi 12:7.) Wiixuttihiwa iwo waamwaakhaliherya olokiherya mikhalelo sa ekristau seiyo saarina efaita yuulupale. Vakhala wiira makristau ale aheeberi yaarowa owehexexaka mixankiho saya paahi, vaamwaaxankihaka okhala oovilela. — aHeeb. 12:11.

17. Exeeni Paulo aasuwela awe voohimya sa ovilela olupatthiwa?

¹⁷ Paulo aahaatumererya makristau aheeberi  wiira yaahaana olipa murima ni ohikhulumuwa okathi yaarowa aya olupatthiwaka. Murummwa Paulo, anwerya waavaha miruku sooloka sa moota woovilela olupatthiwa. Nto aanisuwela oratteene ele yaaxankiha. Nave nuumala yena okhala mukristau, saahimphwanya mixankiho ntoko olupatthiwa. (2 aKor. 11:23-25) Tivonto, Paulo aanisuwela oratteene etthu yaareerela aya opaka wiira avilele. Owo aahiwuupuxerya makristau ale wiira okathi yaalupatthiwa aya, yaahaana omuroromela Yehova ohiya wiiroromela. Nto eyo ti etthu yaamukhalihenrye Paulo olipa murima mpakha ohimya so: “Yehova tonikikhaliherya. Miyo nkinrowa woova etthu”. — aHeeb. 13:6.

18. Etthu xeeni enrowa onikhaliherya ovilela olupatthiwa?

¹⁸ Olelo-va, anna akina annivilela olupatthiwa. Hiyo nnoowerya waakhaliherya naavekelelaka aahiiso waavaha itthu anipirisari aya. (aHeeb. 10:33) Masi Biibiliya onihimya wiira “otheene ale aniphavela omurumeela Muluku ntoko awiixutti a Kristu Yesu, nave anrowa olupatthiwaka”. (2 Tim. 3:12) Tivonto, ootheene ahu nihaana wiilokiherya mwaha wa mixankiho sinrowa oniphwanya muhoolo. Nto nihaana ohihiya omuroromela Yehova nikupaliki wiira owo onoonikhaliherya ovilela khula muxankiho. Okathi wooreerela, Yehova onoowoopola ale animukokhorela moororomeleya. — 2 aTes. 1:7, 8.

19. Etthu xeeni ninreerela ahu opaka wiira niilokiherye mwaha wa maxakha maalupale? (Nwehe efootu.)

¹⁹ Ekarta Paulo aaroihenle awe makristau a eseekulu yoopacerya, yaahaakhaliherya okhala oolikana ene mwaha wa mixankiho saarowa waakhumelela muhoolo. Murummwa Paulo aahaatumererya makristau ale wiira yaahana osoma Nuulumo na Muluku ni wiiwexexa. Akhala wiira yampaka eyo, yanwerya osuwela ni osyaka soowiixuttiha seethiru seiyo saarowa ovukula waamini waya. Owo ahaatumererya-tho wuncererya olipiha waamini waya, wiira aweryeke wiiwelela malakiheryo a Yesu ni ale yaarina okhulupale wiira yeettiheke muloko. Nave aahaakhaliherya makristau ale ovilela mixankiho saaphwanya ni wiira yaahaana oweha mixankiho iye ntoko wiixuttihiwa ni Tiithi aya oophenta, mwaha wa mixankiho saarowa waaphwanya muhoolo. Hiyo nihaana otthara malakiheryo awo. Niira siiso, nnoowerya okhala oororomeleya mpakha wanikisa. — aHeeb. 3:14.