1-2. Xeeni Yehova onipattunxe awe wiira nikhaleke atthu oovaha?

 YEHOVA aapattunxe apinaatamu wiira ahakalaleke mwaha wookhala atthu oovaha ovikana ovahiwa. (Mit. 20:35) Niireke eyo enitaphulela wiira khannihakalala mwaha wa ovahiwa? Nnaari. Okhala wene, ninnihakalala okathi ninvahiwa ahu etthu. Ohiya-vo, ninnitepa ohakalala, okathi ninvaha ahu. Moohaanyiherya, Yehova oonivaha mukhalelo ola okhala wiira ninniphwanya mureerelo. Mwaha wa xeeni?

² Mwaha wa Yehova onipattuxa ni mukhalelo ola, eyo enniniiriha wuncererya ohakalala wahu. Nave nnimuncererya ohakalala wahu, akhala wiira nnophavelasa inamuna sa waakhaliherya atthu akina. Niireke wiira khahiyo vootikiniha oweha moota Yehova onipattunxe awe? — Esaal. 139:14.

3. Xeeni Yehova onihimmwa awe okhala “Muluku oohakalala”?

³ Biibiliya onihimya wiira ovaha onnitepa ohakalaliha. Nto eyo enninikhaliherya osuwela wiira Yehova “Muluku oohakalala”. (1 Tim. 1:11) Yehova topacenrye ovaha ni khuuvo oninvikana owo. Ntoko murummwa Paulo aahimmye awe, mwaha wa Yehova onivaha okumi “ninneetta, ni nookhala”. (Mit. 17:28) Moohaanyiherya, “soovaha sotheene sooreera ni soomalela” sinikhuma wa Yehova. — Yak. 1:17.

4. Exeeni enrowa wuuncererya ohakalala wahu?

⁴ Woonasa wene, ootheene ahu ninniphavela oweha ohakalala onikhumelela mwaha wa okhala atthu oovaha. Nnoowerya opaka eyo nitakihaka ovaha wa Yehova. (aEef. 5:1) Mwaha ola, nnoothokorerya ntakiheryo nooloka na ovaha nave nnimwiixutta etthu nikhanle ahu oopaka akhala wiira atthu akina khanixukhurela ele nnaavaha ahu. Okathi ninrowa ahu othokoreryaka iponto iya, nwehe moota sikhanle aya oonikhaliherya ohihiya waavaha atthu akina ni ophwanya ohakalala mwaha woopaka eyo.

 MUKHALEKE OOVAHA NTOKO YEHOVA

5. Itthu xeeni sikina nimpirisari ahu Yehova onnivaha awe?

⁵ Mwa inamuna xeeni sikina Yehova onooniherya awe okhala oovaha? Nrowe nthokorerye matakiheryo vakhaani. Yehova onninivaha itthu nimpirisari ahu. Nnaamwi nihirina itthu sinceene, Yehova onninivaha itthu nimpirisari ahu wiira nikhale akumi. Mwa ntakiheryo, owo onninivaha eyoolya, ikuwo ni opuro wookhala. (Esaal. 4:8; Math. 6:31-33; 1 Tim. 6:6-8) Niireke Yehova onnivaha itthu nimpirisari ahu mwaha wookhanyereriwa? Khahiyo ti yeeyo! Xeeni Yehova onnivaha awe itthu nimpirisari ahu?

6. Matheyo 6:25, 26 oniixuttiha exeeni?

⁶ Yehova onninivaha itthu nimpirisari ahu okhala wiira onniniphenta. Muthokorerye moolumo a Yesu aniphwanyaneya Matheyo 6:25, 26. (Mmusome.) Iversiikulu iya, Yesu onnirumeela ntakiheryo na soopattuxiwa. Olavulaka sa axipalame, Yesu aahimmye so: “Khanaala, nnakhala khanihepha, hata kharina ntatha”. Nuumala-vo, nwehe ele aahimmye awe: “Tiithi inyu ori wiirimu, onnaaphwanyiha yoolya. Moottharelana Yesu aakonhe so: “Ankhi nyuwo, niireke khamurina efaita waavikana awo?” Exeeni nnixutta ahu? Nnixutta wiira Yehova onnaavaha efaita arumeyi awe ovikana inama. Okhala wiira Yehova onnithokorerya inama, nikupaliki wiira owo khula okathi onoonithokoreryaka! Ntoko paapa oophenta onaathokorerya awe anaawe, nave-tho Yehova onnaathokorerya arumeyi awe mwa niphento. — Esaal. 145:16; Math. 6:32.

7. Enamuna xeeni nikhanle ahu ootakiha ovaha wa Yehova?

⁷ Sintoko Yehova, hiyo nnoowerya waavaha atthu akina itthu anipirisari aya. Mwa ntakiheryo, niireke ookhala munna aahiiso murokora onipirisari yoolya aahiiso ikuwo? Yehova pooti woorumeelani wiira mmukhaliherye munna owo aahiiso murokora owo. Arumeyi a Yehova annisuweliwa okhala atthu oovaha, akhaliheryanaka mukina ni mukhwawe okathi wa mixankiho. Mwa ntakiheryo, okathi wa eretta ya Koronaviiru, anna ni arokora yaahaavaha eyoolya, ikuwo ni itthu sikina ale yaapirisari. Nave-tho, anamunceene yaanivaha musurukhu aya wiira akhaliherye muteko onivariwa olumwenku wootheene. Opaka eyo, yahaakhaliherya anna ni arokora olumwenku wootheene yaapirisari okhaliheriwa okathi ole wooxankiha. Anna awo ni arokora yaaheettela moolumo ari aHeeberi 13:16 ani: “Muhiliyale owiirela sooreera atthu akina, ni okawana naawo itthu sirina  anyu. Itthu iyo siri ntoko mikuttho, ni sinnimuhakalaliha vanceene Muluku”.

8. Ninttottela sai mureerelo owerya wa Yehova? (aFilipi 2:13)

⁸ Yehova onninivaha owerya. Yehova ookhalana owerya ohinimala ni onnihakalala mwaha wa waavaha arumeyi awe oororomeleya. (Mmusome aFilipi 2:13.) Niireke mootoko onvekela Yehova owerya wiira nvilele mixankiho sanyu? Pooti wiira mootoko onvekela Yehova wiira oovaheeni owerya wa ovara muteko nihiku nlo. Okathi nivekelo nanyu naakhulinwa aya, woonasa wene mwaahikupali moolumo a murummwa Paulo yaawo ani :“Kinniwerya sotheene mwaha wa ole onkivaha ikuru”. — aFil. 4:13.

9. Inamuna xeeni sikina nikhanle ahu oorumeela ikuru sahu naakhaliheryaka atthu akina? (Nwehe efootu.)

⁹ Hiyo khanrina ikuru aahiiso owerya ohinimala ntoko Yehova. Nave khanniwerya waavaha atthu akina owerya ni ikuru sahu ntoko Yehova oniira awe. Masi nnoowerya orumeela ikuru sahu wiira naakhaliherye. Mwa ntakiheryo, hiyo pooti waakhaliherya anna ni arokora oowuuluvala nivaraka miteko ntoko olokiherya empa aya aahiiso orowa omerkaatu. Akhala wiira makhalelo ahu annineemererya, hiyo pooti wiivahererya wiira nikhaliherye okwesa ni olokiherya Empa ya Omwene. Akhala wiira nnoorumeela ikuru sahu nipakaka itthu iya, anna ni arokora anoophwanya mureerelo.

10. Moolumo ahu anrowa waalipiha sai atthu akina?

¹⁰ Muhiliyale wiira moolumo aakhalana owerya. Niireke munnimusuwela mutthu aarowa ohakalala mwaha wa ottottopeliwa? Niireke munnimusuwela mutthu onipirisari olipihiwa? Nto akhala wiira munnimusuwela, munoonela sai okumana nuuwo ni wooniherya wiira munnimuthokorerya? Nyuwo pooti omuxukurya, omulikarela ni omwinviyarela mensagem. Khivampirisari oxankiheya ni etthu munrowa anyu ohimya. Vakhala wiira nnoorumeela moolumo ooreera, eyo enoomukhaliherya munna aahiiso murokora ovilela mixankiho sinimphwanya ni okhala oororomeleya. — Mir. 12:25; aEef. 4:29.

11. Yehova onaavaha sai ankhili awe atthu akina?

¹¹ Yehova onnaavaha ankhili. Murummwa Yakobo olempe so: “Akhala mutthu ohirina ankhili, ohihiyeke onvekela Muluku, okhala wira owo onnivaha ni murima wotheene, ohipwapwaka”. (Yak. 1:5) Yehova khoniithukumanyerya ankhili. Owo onnaavaha atthu akina ankhili awe. Murummwa Yakobo ohimmye wiira Yehova onnaavaha ankhili awe ni “murima wotheene”, aahiiso “ohipwapwaka”. Owo oniphavela wiira nihooveleleke onvekela ankhili. Ohiya-vo, owo oniphavela wiira ninvekeleke. — Mir. 2:1-6.

12. Eparakha xeeni nrina ahu ya owiixuttiha atthu akina itthu ninsuwela ahu?

¹² Ankhi hiyo? Niireke nnoowerya waavaha  ankhili atthu akina? (Esaal. 32:8) Arumeyi a Yehova, aakhalana eparakha ya owiixuttiha atthu akina itthu yiixuntte aya. Mwa ntakiheryo, ninnaakhaliherya anamalaleerya asya olimalela muteko woolaleerya. Axitokweene anaakhaliherya arumeyi ookhaliherya opaka saana soothanleliwa saya mmulokoni. Nave-tho anna ale alimalenle muteko wooteka, annaakhaliherya anna ale ahilimalenle wiira yiixutte ni ekhaliheryeke muteko wooteka.

13. Ninrowa otakiha sai enamuna Yehova onaavaha awe ankhili?

¹³ Ale aniwiixuttiha atthu akina itthu anisuwela aya, annitakiha enamuna Yehova onaavaha awe ankhili awe. Musuweleke wiira Yehova onnaavaha ankhili awe ni murima wootheene. Mwa enamuna emosa-ru, nihaana owiixuttiha atthu akina itthu ninsuwela ahu. Nto nihuupuweleke wiira vakhala wiira nnoomwiixuttiha mutthu mukina pooti onivikana aahiiso onaakha mpantta ahu. Nihuupuweleke so: ‘Miyo khuuvo okiixuttinhe! Atthu akina anihimya wiira okhala wiira yiixuntte mekhaya nave-tho awo khanrowa omwiixuttiha mutthu mukina’. Arumeyi a Yehova, ahuupuweleke siiso. Ohiya waakhaliherya paahi ni itthu ninsuwela ahu, ‘nihaana opaka sootheene ninwerya ahu wiira nimukhaliherye mutthu owo wiixutta itthu sootheene ninsuwela ahu’. (1 aTes. 2:8) Hiyo nimphavela wiira atthu yaale ninwiixuttiha ahu, esuweleke “owiixuttiha atthu akina”. (2 Tim. 2:1, 2) Akhala wiira nnoowiixuttiha atthu akina itthu ninsuwela ahu, eyo enoonikhaliherya ni atthu awo ninwiixuttiha ahu anookhala asuweli ni oohakalala.

OKATHI ATTHU AKINA AHINIXUKHURELA AYA ITTHU NNAAPAKELA AHU

14. Etthu xeeni atthu akina anipaka aya okathi nnaavaha ahu etthu?

¹⁴ Okathi nnaavaha ahu etthu atthu akina, otepexa wene anna ni arokora, awo annixukhurela. Awo pooti onilepela mensagem aahiiso onixukhurela mwa enamuna ekina. (aKol. 3:15) Okathi eyo eniiraneya aya, hiyo ninnitepa ohakalala mwaha woosuwela wiira noopaka etthu wiira naakhaliherye.

15. Etthu xeeni ninreerela ahu wuupuwelela akhala wiira atthu akina khanivaha efaita itthu nnaapakela ahu?

¹⁵ Masi ikwaha sikina, atthu akina pooti ohinixukhurela mwaha wa itthu nnaapakela ahu. Hiyo pooti osuwela wiira mutthu owo khovanhe efaita itthu nimpakenle ahu ntoko okathi ahu, ikuru aahiiso mireerelo nirumeelale ahu wiira nimukhaliherye. Akhala wiira eyo enimwiiraneya, etthu xeeni ninreerela ahu opaka wiira nihikhulumuwe? Muupuweleleke yoolepa ya mwaha ahu ola Miteko 20:35. Ohakalala wahu, khonlipa ni moota atthu akina anrowa aya oxukhurela aahiiso nnaari. Nihihiye waakhaliherya atthu akina hata ikwaha sikina ahinixukhurelaka. Ninrowa owerya sai opaka eyo? Nrowe nthokorerye inamuna vakhaani.

16. Exeeni enrowa onikhaliherya ovaha murima onittenle ene?

¹⁶ Muhiliyale wiira okathi munaavaha anyu atthu akina, munimutakiha Yehova. Yehova, onnaavaha atthu itthu sooreera nnaamwi ikwaha sikina ahimuxukhurelaka. (Math. 5:43-48) Yehova ohimmye wiira akhala wiira nnimwaapakela itthu sooreera atthu akina ‘nihilipelelaka waakhela etthu, nto otthuveliwa wanyu onrowa okhala wuulupale’. (Luka 6:35) Tivonto, muhixankeke akhala wiira ikwaha sikina atthu akina khanixukhurela itthu munaapakela anyu. Muhiliyale wiira Yehova onimootthuvelani mwaha woowiirela itthu sooreera atthu akina ni ‘murima wootteelaleneni’. — Mir. 19:17; 2 aKor. 9:7.

17. Etthu xeeni ninreerela ahu wuupuwelelaka okathi nimphavela ahu waakhaliherya atthu akina? (Luka 14:12-14)

¹⁷ Etthu ekina nikhanle ahu oopaka wiira  nimutakihe Yehova, ori wuupuwelela ele eri Luka 14:12-14. (Mmusome.) Khahiyo ti vootthekeya waalattula atthu akina wiira arwe owannyihu, wiira alye etthu hata nisuwelaka wiira anoopaka etthu emosa-ru. Masi ankhi vakhala wiira nimpaka etthu nlipelelaka wiira anittikiherye? Vakhala wiira eyo enimwiiraneya, nihaana wuupuwelela ele Yesu aahimmye awe. Hiyo pooti owiirela itthu sooreera atthu yaale ninsuwela ahu wiira khanrowa onittikiherya etthu naapakenle ahu. Niira siiso, nnoohakalalaka mwaha woosuwela wiira nimmutakiha Yehova. Akhala wiira nnoovahaka nihilipelelaka ottikiheriwa, nnoohakalalaka hata ikwaha sikina atthu awo ahinixukhurelaka.

18. Etthu xeeni nihinreerela ahu opaka, ni mwaha wa xeeni?

¹⁸ Muhikhalaneke moonelo woohiloka voohimya sa atthu akina. (1 aKor. 13:7) Vakhala wiira mutthu khonixukhurela etthu mumpakenle anyu, mwiikoheke so: ‘Niireke wiira mutthu ola okhala wene toohixukhuru aahiiso orooliyala?’ Pooti wiira aakhala mathowa amwiirihe ohipaka etthu naalipelela ahu. Atthu akina tooxukhuru, masi vannaavila wooniherya oxukhuru waya, okhala wiira khalai tiyaavaha atthu akina. Akhala wiira ninnaaphenta anna ni arokora, eyo enoonikhaliherya ohikhalana moonelo woohiloka ni ohihiya waavaha murima onittenle ene. — aEef. 4:2.

19-20. Etthu xeeni enrowa onikhaliherya okhala oohakalala okathi nnaavaha ahu etthu atthu akina?

¹⁹ Mukhaleke oopixa murima. Olavulaka sa ovaha, mwene Salomoni olempe so: “Muyeeherye yoolya anyu mmaasini, munoophwanya ohoolo”. (Mus. 11:1, Piipiliya Emakhuwa.) Moolumo ala anniixuttiha wiira atthu akina annooniherya oxukhurela waya ‘muhoolo’. Nwehe ntakiheryo na murokora mmosa yaamwiiranenle eyo.

²⁰ Iyaakha sivinre, mwaara a mutokweene a esirkwiitu, aahimulepela ekarta murokora aapatisinwe niinaano. Ekarta awe eyo, aahimuleela efaita erina aya ohihiya olipiha ororomeleya wa Yehova. Nuuvira iyaakha 8, murokora ole aahaakhula orumeelaka ekarta ohimyaka so: “Miyo kaaniphavela woolepelani ekarta kooxukhurelakani moota ekarta anyu yaakikhalihenrye  aya ovilela iyaakha iya sivinre. Ekarta ele yaari yooreera, masi etthu yaatempe okilipiha yaari yoolepa mwaarumeenle anyu, tthiri nkinrowa oliyala”. a Nuumala otthokiherya mixankiho saamukhumelenle, owo onihimya so: “Ikwaha sikina, kaanuupuwela ohiya ekeekhai, miritti saka ni itthu sootheene. Masi yoolepa ele mwaaromonle anyu mukartani mme, kaaniwerya wuupuwelela nave yookikhaliherya ohitthikela ottuli. Etthu ekikhalihenrye ovilela mixankiho saka iyaakha iye 8 sivinre, yaari ekarta ele”. Nkuupuwelani moota mwaara a mutokweene ole a esirkwiitu aahakalanle awe, nuumala waakhela ekarta ele nuuvira iyaakha sinceene! Mwa enamuna emosa-ru, nave hiyo pooti oxukhureliwa nuuvira iyaakha sinceene.

21. Xeeni muniphavela anyu ohihiya otakiha ovaha wa Yehova?

²¹ Ntoko niixuntte ahu, Yehova onipattunxe mwa enamuna ya vameekhaaya. Yehova onipattunxe wiira nihakalaleke mwaha wa okhala atthu oovaha ovikana ovahiwa. Nave-tho hiyo ninnitepa ohakalala mwaha woosuwela wiira noowerya waakhaliherya anna. Ohiya-vo, ti vootepa ohakalaliha okathi awo annixukhurela aya. Hata atthu akina ahixukhurelaka etthu nipanke ahu, hiyo ninnihakalala mwaha wa osuwela wiira noopaka etthu yooloka. Muhiliyale wiira “Yehova onoowerya woovahani itthu sinceene ovikana” iye nvanhe anyu. (2 Wah. 25:9) Ekeekhai ti yoowi vaavo ninlavula ahu sa ovaha, khuuvo oninvikana Yehova! Nave-tho khuuvo ohakalala mutthu oniphwanya awe ovikana otthuveliwa ni Yehova. Tivonto, noolakela ohihiya omutakiha Tiithi ahu oovaha, Yehova.