1-2. Exeeni eniwiiriha arumeyi a Yehova okhala oohakalala? (Yakobo 1:22-25)

 YEHOVA ni Mwanawe, aniphavela wiira nihakalaleke. Mulipa-oolepa Esalimo 119:2, ohimmye so: “Oohakalala taale aniiwelela moolumo awe oowuupuxerya, Yaale animwaavya ni murima aya wootheene”. Nave-tho Yesu aahimmye so: “Oohakalala taale aniiwa nuulumo na Muluku, aneettela!” — Luka 11:28.

² Ntoko arumeyi a Yehova, hiyo na atthu oohakalala. Mwaha wa xeeni? Mwaha woowi khanreerane mathowa manceene anniiriha ohakalala, nimosa a yaawo okhala wiira hiyo ninniwerya osoma Nuulumo na Muluku ni weettela ele nniixutta ahu. — Mmusome Yakobo 1:22-25.

3. Mireerelo xeeni nimphwanya ahu vakhala wiira ninkhala moovarihana ni ele nniixutta ahu mbiibiliyani?

³ Tthiri ninniphwanya mireerelo sinceene mwaha wa okhala atthu “aneettela masu awo”. Mureerelo woopacerya, okhala wiira hiyo ninnisuwela wiira nihaana opaka eyo wiira nimuhakalalihe Yehova. Wuupuwela eyo enninihakalaliha. (Mus. 12:13) Okathi ninkhala ahu moovarihana ni ele eniixutta ahu mbiibiliyani, emusi ahu ni ompatthani ahu ni atthu akina onnitepa olipa. Woonasa wene, muhoona eyo yiiraneyaka mweekumini mwanyu. Ohiya-vo, ninnisyaka mixankiho sinaaphwanya atthu ahinimurumeela Yehova. Moohaanyiherya, hiyo ninnikupali ele mwene Davidi aahimmye awe. Nuumala wiipa nsipo naalavula sa malamulo, sooruma ni ophukela wa Yehova, owo aahimmye so: “Ale aneettela malamulo anyu, annitthuveliwa vanceene.” — Esaal. 19:7-11.

4. Xeeni vanixankiha aya ikwaha sikina okhala atthu aneettela Nuulumo na Muluku?

⁴ Ekeekhai wiira khivanikhweya weettela khula okathi ele ninsoma ahu mbiibiliyani. Hata naatteliwaka miteko khula nihiku, nihaana wiivaha okathi wiira nimusome Biibiliya wiira niiwexexe  ele Yehova oniphavela awe wiira nipakeke. Nrowe nthokorerye itthu vakhaani sinrowa onikhaliherya okhalana okathi wiira nimusome Biibiliya. Nave-tho, nnoothokorerya etthu enrowa onikhaliherya wuupuwelela ni ovarihela muteko mweekumini mwahu ele enisoma ahu.

MWIIVAHEKE OKATHI WIIRA MUSOME NUULUMO NA MULUKU

5. Itthu xeeni sinniiriha waatteliwaka miteko?

⁵ Anamunceene animurumeela Yehova, waatteliwa miteko. Nihaana oviriha okathi munceene nivaraka miteko seiye Biibiliya onihimya awe okhala sa faita. Mwa ntakiheryo, akina a hiyo ahaana ovara muteko wiira yiikhaliherye ni waakhaliherya amusi aya. (1 Tim. 5:8) Anna akina, ahaana waakhapelela anamuyari aya yuuluvanle aahiiso aniwereyasiwa. Nave-tho nihaana okhalana okathi wiira nikhapelele okumi ahu. Ohiya-vo, nookhalana-tho miritti sikina mmulokoni. Muteko muulupale nirina ahu, ori okhalela nthiti olaleerya. Muupuwelelaka miritti iya sootheene murina anyu, munrowa owerya sai okhalana okathi woomusoma Biibiliya khula nihiku, wuupuwelela ele munisoma anyu ni ovarihela muteko mweekumini mwanyu?

6. Okathi xeeni wooreerela mukhanle anyu oopaka yoosoma anyu ya Biibiliya? (Nwehe efootu.)

⁶ Omusoma Biibiliya ti etthu eri ‘yootepa oreerela’ mukristau onireerela awe opaka, tivonto nihaana ovaha efaita. (aFil. 1:10) Elavulaka sa mulopwana oohakalala, Esalimo yoopacerya enihimya so: “Etthu enimusivela vanceene ti nlamulo na Yehova, Owo onnisoma ni ephoole nlamulo na Muluku, othana ni ohiyu”. (Esaal. 1:1, 2) Eyo enitaphulela wiira nihaana wiivaha okathi wiira nimusome Biibiliya. Masi okathi xeeni wooreerela wiira nimusome Biibiliya? Nyuwo mukhanle oothanla okathi mukhanle anyu opaka eyo. Masi ohimya ekeekhai okathi wooreerela, ti yoole muniwerya anyu omusoma. Munna mmosa oniitthaniwa Victor onihimya so: “Miyo okisivela omusoma Biibiliya voosiisu. Ohimya ekeekhai, miyo nkiniwerya opeherya masi etthu enikisivela, okhala wiira okathi owo khasinaatta itthu sinceene sinikaakanyerya. Okathi owo, kinnikhalana muupuwelo wooloka ni  kinniwerya wuupuwelela oratta ene”. Woonasa wene, pooti wiira enniwiiraneelani eyo. Mwiikoheke so: ‘okathi xeeni wooreerela kikhanle aka oopaka yoosoma aka ya Biibiliya?’

MUUPUWELEKE ELE MUNISOMA ANYU

7-8. Etthu xeeni ekhanle oniiriha ohittottela mureerelo ele enisoma ahu? Mutthokiherye.

⁷ Ikwaha sikina, hiyo pooti osoma itthu sinceene masi nihiwerya wiixutta etthu. Niireke mootoko osoma mwaha mmosa nuuvira okathi muliyala etthu musomme anyu? Ootheene ahu yootoko oniiraneela. Mooriipiha murima, eyo pooti oniiraneela okathi nimmusoma ahu Biibiliya. Woonasa wene, mookhalana yoolakela ya osoma ikapiitulu vakhaani sa Biibiliya khula nihiku. Eyo etthu yooreera. Hiyo nihaana okhalana yoolakela ni omaleliha. (1 aKor. 9:26) Omusoma Biibiliya etthu yooreera, masi wanipacerya paahi. Nto nihaana wiimananiha vanceene wiira nttottele mureerelo yoosoma ahu ya Biibiliya.

⁸ Muupuwele ela: Epula yookhalana efaita yuulupale valaponi. Masi akhala wiira enoorupa epula yinceene mwa okathi vakhaani paahi anookhala maasi manceene. Nto akhala wiira eyo enimwiiraneya, epula enivikaniha orupa khenivareleya-tho muteko. Ti vooloka okathi epula enrupa aya vakhaani-vakhaani okhala wiira maasi anninaaniha etthaya oratta ene wiira miri sinnuweke saana. Mwa enamuna emosa-ru nihimusomeke Biibiliya moowaakuveya, maana opaka eyo, ele enisoma ahu khenrowa oniphwanyiha mureerelo. — Yak. 1:24.

9. Nipakeke exeeni vakhala wiira noolimalela omusoma Biibiliya naakuveyasaka?

⁹ Niireke mootoko omusoma Biibiliya nuumala vo nweha wiira mwaamusoma mwaakuveyasaka? Etthu xeeni mukhanle anyu oopaka? Musomeke moohaakuveya. Opaka eyo enimookhaliheryani wiiwexexa ele munisoma anyu. Nto opaka eyo khahiyo etthu yoovila. Akhala wiira vannooxankihani wuupuwelela ele munisoma anyu, etthu mukhanle anyu oopaka ori weemela vakhaani ni wuupuwela ele musomme anyu. Woonasa wene, vanrowa opirisariki wiivaha okathi wiira musome ni wuupuwelela. Nave-tho nyuwo pooti osoma iversiikulu vakhaani wiira murumeele okathi ohanle wiira muupuwelele ele musomme anyu.  Munna Victor yoowo nimulavunle ahu ittima sivinre, onihimya so: “Yoosoma aka ya Biibiliya, kinsoma ekapiitulu emosa paahi. Nto okhala wiira kinsoma voosiisu, eyo ennikikhaliherya wuupuwelela nihiku nootheene”. Moohicikha enamuna munirumeela anyu, etthu yootepexa okhalana efaita ori wiimananiha wiira muttottele mureerelo ele munisoma anyu. — Esaal. 119:97, nwehe ekaaxa eni: “ Makoho Ninreerela Ahu Wiikoha”.

10. Nvahe ntakiheryo na moota mukhanle anyu owuupuwelela ele munisoma anyu. (1 aTesaloonika 5:17, 18)

¹⁰ Moohicikha okathi ni iwoora muniviriha anyu mmusomaka Biibiliya, muupuweleke moota mukhanle anyu oovarihela muteko ele munisoma anyu. Okathi munisoma anyu eversiikulu emosa ya mbiibiliyani, mwiikoheke so: ‘Ele enisoma aka, kinrowa ovarihela sai muteko olelo ni muhoolo?’ Mwa ntakiheryo, muupuwele wiira munimusoma 1 aTesaloonika 5:17, 18. (Mmusome.) Nuumala osoma iversiikulu iya, munoonela sai weemela vakhaani ni wuupuwela ikwaha kavi ni mwa enamuna xeeni munivekela anyu. Woonasa wene, pooti omuxukhurela Yehova mwaha wa itthu onoopakelaweni. Hata nvirihaka okathi vakhaani muupuwelelaka ele enisoma anyu mbiibiliyani, eyo enimookhaliheryani wiiwexexa ni weettela Nuulumo na Muluku. Muupuweleleke mireerelo munrowa anyu ophwanya vakhala wiira munoopaka eyo khula nihiku ni iversiikulu sikina sa Biibiliya okathi munisoma anyu! Mwiira siiso, munookhala mutthu oneettela masu awo. Masi exeeni mukhanle anyu oopaka mwasuwela wiira sookhala itthu sinceene munireerela anyu olokiherya?

MPAKEKE SOOTHANLA MUNIWERYA ANYU

11. Okathi munimusoma anyu Biibiliya, exeeni ekhanle oowookhulumulani? Nvahe ntakiheryo.

¹¹ Okathi munimusoma anyu Biibiliya, pooti okhulumuwa mwaha woosuwela wiira sookhala itthu sinceene munireerela anyu olokiherya. Mwa ntakiheryo, nkuupuwelani wiira khula nihiku munisoma ekapiitulu emosa ya Yakobo, nto munnisoma moota wooxintta nthalu. (Yak. 2:1-8) Nuumala-vo, munnoona wiira muhaana olokiherya moota munaathokorerya anyu atthu akina. Nto munnilakela opaka marukunuxo. Tthiri eyo etthu yooreera! Vano nihiku ninttharelana munnisoma efaita erina aya okhapelela moolumo anyu. (Yak. 3:1-12) Nuumala-vo, munnuupuwelela wiira nihiku nlo, mootoko olavula etthu yahaareere waawereya atthu akina. Vano moolakela olavula mwa enamuna enaalipiha atthu akina. Nihiku ninttharelana nyuwo munnisoma moota vari aya vowoopiha okhala mpatthani a olumwenku. (Yak. 4:4-12) Nuumala-vo, munniweha wiira muhaana opaka marukunuxo ni itthu munisoma anyu, muniweha anyu ni muniwiriyana anyu. Nihiku ninttharelana, munoona  wiira khasireere itthu munireerela anyu olokiherya.

12. Okathi munimusoma anyu Biibiliya, xeeni vahinreerela anyu okhulumuwa mwaweha wiira muhaana opaka marukunuxo? (Nwehe enoota.)

¹² Vakhala wiira mooweha wiira muhaana opaka marukunuxo manceene, muhikhulumuwe. Eyo enooniherya wiira nyuwo mwa mutthu oowiiyeviha ni munniphavela opaka marukunuxo. Mutthu oowiiyeviha ni oororomeleya, onnimusoma Biibiliya ophavelaka olokiherya mweettelo awe. a Muhiliyale wiira, khula okathi nihaana wiimananiha wiira nihihiye ‘owara omutthu wa niinaano’ maana sinookhalaka itthu ninreerela ahu olokiheryaka. (aKol. 3:10) Exeeni enrowa wookhaliheryani ohihiya okhala mutthu oneettela masu a Muluku?

13. Enamuna xeeni yooloka ya ovarihela muteko itthu nniixutta ahu? (Nwehe efootu.)

¹³ Ohiya opaka marukunuxo manceene ekwaha emosa okathi munisoma anyu, mmananiheke weettela etthu emosa aahiiso piili khula okathi munisoma anyu. (Mir. 11:2) Mmananihe opaka ela: Nyuwo pooti opaka elista ya itthu munireerela anyu olokiherya, wuupaceryani muthanle emosa wala piili vano sikina munrowa opakaka okathi mukina. Masi ankhi vakhala wiira itthu iyo khasireere, tiivi mukhanle anyu oopacerya?

14. Marukunuxo xeeni mukhanle anyu oopaceriha opaka?

¹⁴ Nyuwo pooti othanla opacerya marukunuxo ookhweya aahiiso pooti othanla ele muniphavela anyu olokiherya nenna-va. Nuumala othanla etthu muniphavela anyu olokiherya, pooti otokosa murumeelaka iliivuru sahu ntoko Índice das Publicações da Torre de Vigia aahiiso Eliivuru Enaakhaliherya Anamoona a Yehova  Otokosa Myaha Sikumiheriwe. Munvekeleke Yehova wiira oovaheeni “ophavela ni owerya ovara muteko”. (aFil. 2:13) Nuumala-vo, mmananiheke weettela ele muniixutta anyu. Okathi munoona anyu wiira moomaleliha yoolakela anyu yoopacerya, eyo enimoovahani ikuru wiira mpake marukunuxo makina. Veekeekhai, okathi munrowa anyu owehaka wiira moolokiherya mikhalelo sanyu sa ekristau, munoohakalalaka ni munrowa ophavelaka opaka marukunuxo makina.

MWEMERERYE WIIRA NUULUMO NA MULUKU “NOOKHALIHERYENI”

15. Anamoona a Yehova avirikanne sai ni atthu akina animusoma Biibiliya? (1 aTesaloonika 2:13)

¹⁵ Atthu akina, anihimya wiira aamusoma Biibiliya ikwaha sinceene. Masi niireke annikupali ele Biibiliya oniixuttiha awe? Niireke wiira annivarihela muteko ele aniixutta aya aahiiso annikhala moovarihana ni itthu Biibiliya oniixuttiha awe? Mooriipiha murima, atthu anceene khaniphavela otthara miruku sa Biibiliya. Masi ti woovirikana ni arumeyi a Yehova! Moolikanasa ni makristau oopacerya, hiyo ninnimukupali Biibiliya okhala “Nuulumo na Muluku”. Etthu ya efaita yuulupale okhala wiira ninniimananiha weettela miruku sa mbiibiliyani mweekumini mwahu. — Mmusome 1 aTesaloonika 2:13.

16. Exeeni enrowa onikhaliherya okhala atthu aneettela Nuulumo na Muluku?

¹⁶ Okhala wene, khivanikhweya osoma ni ovarihela muteko Nuulumo na Muluku. Woonasa wene, muxankiho ahu ori ohikhalana okathi wiira nisome. Aahiiso pooti wiira ninsoma naakuveyasaka nto nihinawerya wuupuwelela ele nisomme ahu. Nave-tho pooti onixankihaka opaka marukunuxo mwaha wooweha itthu sinceene ninreerela ahu olokiherya. Moohicikha muxankiho murina anyu, munoowerya oxintta mukhaliheriwaka ni Yehova. Tivonto, mweemererye nikhaliheryo na Yehova maana opaka eyo, enimookhaliheryani weettela oratteene ni omaliherya Nuulumo na Muluku ohiya wiiwa paahi khuliyala niinaano-ru. Moohaanyiherya, okathi ninsoma ahu Nuulumo na Muluku ni ovarihela muteko mweekumini mwahu, ninrowa otepaka ohakalala. — Yak. 1:25.