1. Itthu xeeni sinrowa wiiraneya moohipisa?

 NINKHALA okathi wooxankiha! Nto moohipisa sinimwiiraneya itthu soowoopiha. Muhoolo, Yesu onrowa waaphukela apinaatamu. Olavulaka sa okathi owo woophukela, Yesu aahaavaha awiixutti awe “ethoonyeryo” ya otthika wawe ni “omala wa olumwenku”. (Math. 24:3) Ithoonyeryo iyo soolempwa eliivuru ya Matheyo ikapiitulu 24 ni 25 nave-tho iyo sinniphwanyaneya eliivuru ya Marko ekapiitulu 13 ni Luka ekapiitulu 21.

2. Mwaha ola ninrowa othokorerya exeeni?

² Yesu oorumeela malikanyiho mararu wiira onilopole. Nlikanyiho noopacerya, ti na ipwittipwitthi ni ipuri, na nenli ti na imwali saarina ankhili ni sahaarina ankhili ni na neeraru ti na italento. Malikanyiho ala, anoonikhaliherya wiiwexexa moota Yesu onrowa awe waaphukela apinaatamu moovarihana ni miteko saya. Mwaha ola, nnoothokorerya malikanyiho awo ni etthu nikhanle ahu oowiixutta. Nlikanyiho noopacerya ninrowa ahu othokorerya, ti na ipwittipwitthi ni ipuru.

IPWITTIPWITTHI NI IPURI

3. Okathi xeeni Yesu onrowa awe ophukela ipwittipwitthi ni ipuri?

³ Nlikanyiho na ipwittipwitthi ni ipuri, Yesu aahihimya moota onrowa awe waaphukela apinaatamu moovarihana ni moota yeemerenrye aya ihapari sooreera ni moota yaakhaliherya aya axinnawe oothanliwa. (Math. 25:31-46) Yesu, onoorowa ophukela ipwittipwitthi ni ipuri okathi wa “maxakha maalupale” ehalaka vakhaani opacerya ekhotto ya Armagedoni. (Math. 24:21) Ntoko siisale makampusi onivalaanya awe ipwittipwitthi ni ipuri, mwa enamuna emosa-ru, Yesu onimwaavalaanya atthu yaakhaliherya axinnawe oothanliwa ni ale yahaakhaliherya.

4. Moovarihana ni Yesaya 11:3, 4, xeeni ninreerela ahu okupali wiira Yesu onimwaaphukela atthu mwa xariya? (Nwehe vakaapani.)

⁴ Iprofesia sa mbiibiliyani, sinooniherya wiira Yehova oomuthanla Yesu, wiira okhale mphuki nave owo onoorowa waalamula  apinaatamu mwa xariya. (Mmusome Yesaya 11:3, 4.) Yesu onnivaha ephoole moota mutthu onipaka awe itthu, onilavula awe ni moota onuupuwela awe ohela muhina moota anaathokorerya aya axinnawe Kristu. (Math. 12:36, 37; 25:40) Mwa enamuna ela, Yesu onoorowa waasuwela ale yaakhaliherya axinnawe. a Enamuna emosa ale anlikanyihiwa ni ipwittipwitthi anaakhaliherya aya axinnawe Kristu, ori olaleya ihapari sooreera. Atthu awo anrowa ophukeliwa ntoko “anaxariya” nave anrowa “ophwanya okumi woohimala” valaponi. (Math. 25:46; Wiis. 7:16, 17) Tthiri, nno otthuveliwa wuulupale anrowa aya ophwanya ale anrowa ovikaniha okhala oororomeleya! Mwaha woohihiya ororomeleya mpakha okathi ni nuumala maxakha maalupale, masina aya khanrowa ottipihiwa “muliivuruni mwa okumi”. — Wiis. 20:15.

5. Exeeni nniixutta ahu ni nlikanyiho na ipwittipwitthi ni ipuri, ni tani anttottela mureerelo?

⁵ Mooniheryeke wiira munniroromeleya. Nlikanyiho Yesu aarumenle awe na ipwittipwitthi ni ipuri nnaahimya paahi ale arina nlipelelo na okhala mahiku ootheene valaponi. Atthu awo annooniherya waamini waya, yaakhaliheryaka axinnawe Kristu vaavo anlaleya aya ihapari sooreera ni aniiwelela ekurupu ya anna oothanliwa, eyo piiyo, murumeyi oororomeleya ni a ankhili. (Math. 24:45) Masi ankhi ale arina nlipelelo na okhala wiirimu? Naawo-tho, annipirisari ovaha ephoole nlikanyiho nla. Mwaha wa xeeni? Mwaha woowi Yesu onnivaha ephoole mweettelo aya, moolumo ni moota anipaka aya itthu. Awo ahaana wooniherya wiira anniroromeleya. Ti nthowa naya Yesu aarumenle awe malikanyiho manli, aahimyaka ale ari oothanliwa. Nlikanyiho nlo, nri Matheyo ekapiitulu 25. Vano nrowe nthokorerye nlikanyiho na imwali saarina ankhili ni sahaarina ankhili.

IMWALI SAARINA ANKHILI NI SAHAARINA ANKHILI

6. Moota xeeni imwali 5 soonihenrye aya wiira saahikhalana ankhili? (Matheyo 25:6-10)

⁶ Nlikanyiho na imwali, Yesu aahilavula imwali 10 seiyo saaronwe okumana ni mutheli. (Math. 25:1-4) Imwali iye saaphavela omuhoola mutheli efesta ya ekasamento. Yesu aahihimya wiira imwali 5 “khisaarina ankhili” nave sikina 5 “saahikhalana ankhili”. Imwali saarina ankhili saari soolikana ene ni soowehaweha. Imwali iye, saari soolikana ene omulipelela mutheli, hata aarowa opisa. Iyo saahisariha makhura muxamaniiyani mwaya ohiyu ole. Awo yaahilokiherya vakhala wiira mutheli ampisa, akuxaka makhura makina. (Mmusome Matheyo 25:6-10.) Nuumala mutheli ophiya, imwali iye saarina ankhili saahivolowa nuuwo. Mwa enamuna emosa-ru, makristau oothanliwa anrowa okhala oowehaweha ni oororomeleya mpakha okathi Yesu ontthika awe, anrowa okhala ni mutheli, eyo piiyo, Yesu moomweneni mwawe wiirimu. b (Wiis. 7:1-3) Exeeni yiiraneyale ni imwali iye sahaarina ankhili?

7. Exeeni yiiraneyale ni imwali 5 sahaarina ankhili, ni mwaha wa xeeni?

⁷ Moovirikana ni imwali iye saarina ankhili, imwali iye 5 sahaarina ankhili, khisaailokihenrye okathi mutheli aaphiyale awe. Ixamaniiya saya saahala ottipha nave khiyaakuxale makhura makina. Okathi yaasuwenle aya wiira mutheli amphiya moohipisa, awo ti yuupuwenle aya orowa othuma makhura. Nave okathi mutheli aaphiyale awe, awo yiira ahinatthi otthika. Nuumala mutheli  ophiya, “imwali saari soolikana ene, saahikela nuuwo efesta ya ekasamento, nto mukhora khuwaliwa”. (Math. 25:10) Nuuvira okathi, imwali iye sahaarina ankhili saahitthika nto mutheli aahihimya wiira: “Miyo nkinoosuwelani”. (Math. 25:11, 12) Imwali iye sahaarina ankhili, khisaakhanle oolikana ene wiira simwaakhele mutheli. Ale oothanliwa aniixutta exeeni ni nlikanyiho nla?

8-9. Exeeni makristau oothanliwa aniixutta aya ni nlikanyiho na imwali? (Nwehe efootu.)

⁸ Mooniheryeke wiira muhiilokiherya ni munniwehaweha. Yesu khahiyo aaphavela ohimya wiira saamukhala ikurupu piili sa atthu oothanliwa. Ekurupu emosa yeeyo yaarowa wiilokiherya mpakha wanikisa wa makhalelo ootakhala ni ekurupu ekina yeeyo yahaarowa wiilokiherya. Hata vari siiso, owo aatthokiherya itthu saarowa owiiraneela makristau oothanliwa yahaarowa wiilokiherya ni olipiha waamini waya mpakha wanikisa. Mwaha waivaavo, awo khiyaarowa waakhela etthuvo aya. (Yoh. 14:3, 4) Tthiri ola mwaha muulupale! Moohicikha vakhala wiira ninrowa okhalaka wiirimu aahiiso valaponi vaava, ootheene ahu nihaana ovaha ephoole nlikanyiho na imwali. Nto khula mmosa a hiyo ohaana wiilokiherya ni okhala oowehaweha mpakha wanikisa. — Math. 24:13.

⁹ Nuumala Yesu olavula nlikanyiho na imwali ni ottittimiherya efaita erina aya okhala atthu oowiilokiherya ni oowehaweha, moottharelana owo aahilavula nlikanyiho na italento. Nlikanyiho nlo, ninnooniherya efaita erina aya okhala atthu anivara muteko ni okhalela nthiti.

ITALENTO

10. Moota xeeni arumeyi anli yoonihenrye aya ororomeleya? (Matheyo 25:19-23)

¹⁰ Nlikanyiho na italento, Yesu onnaalavula arumeyi anli yaari oororomeleya ni pwiya aya masi mmosa nnaari. (Math. 25:14-18) Arumeyi ale anli, yaahooniherya ororomeleya waya, akhalelaka nthiti ovara muteko wiira yincererye muhakhu wa pwiya aya. Okathi pwiya aya aaphavela awe weetta mukwaha woorakama, owo aahimuhiyerya khula  mmosa italento, eyo piiyo, mireerelo. Arumeyi ale anli oororomeleya, yaahivara muteko munceene ni yaahirumeela mwa miruku musurukhu ole. Exeeni yaakhumelenle? Okathi pwiya aya atthinke awe, awo yiira yincerenrye ene musurukhu yaahiyerinwe aya. Tivo pwiya aya aahattottopela, nuumala-vo aahimeerya wiira: “Mutteeliweke murima ni pwiya anyu”. (Mmusome Matheyo 25:19-23.) Masi exeeni yiiraneyale ni murumeyi ole a neeraru? Exeeni iirinha awe musurukhu pwiya awe aamuhiyenrya awe?

11. Exeeni yiiraneyale ni murumeyi ole “oolosowa”, ni mwaha wa xeeni?

¹¹ Murumeyi ole a neeraru, aavahiwe etalento emosa paahi, masi aari “oolosowa”. Pwiya ole, aaphavela wiira murumeyi ole orumeele musurukhu aavahiwe awe ni ankhili. Ohiya-vo, owo aarothipela. Okathi pwiya ole aatthinke awe, amphwanyale murumeyi ole ohincerenrye musurukhu ole. Murumeyi ole, khaarina mweettelo wooloka. Ohiya oveka musammaha mwaha woohiwerya wuncererya musurukhu, murumeyi ole aahimuhimya pwiya awe okhala “mutthu ooxankiha”. Etthu ele aapanke awe murumeyi ole, khiyaamusivenle pwiya awe. Tivonto, etalento aarina awe aahaakhiwa nave tho aahoomoliwa vatthokoni va pwiya awe. — Math. 25:24, 26-30.

12. Arumeyi ale anli oororomeleya, anithoonyerya exeeni olelo-va?

¹² Arumeyi ale anli oororomeleya, anithoonyerya makristau oothanliwa. Pwiya aya, Yesu, onnaalattula arumeyi awe wiira ‘atteeliweke murima ni pwiya aya’. Awo anrowa waakhela etthuvo aya wiirimu, eyo piiyo, ohihimuxiwa woopacerya. (Math. 25:21, 23; Wiis. 20:5b) Ntakiheryo na murumeyi ole oohiroromeleya, ninnaalopola makristau oothanliwa. Masi moota xeeni?

13-14. Makristau oothanliwa aniixutta exeeni ni nlikanyiho na italento? (Nwehe efootu.)

¹³ Mooniheryeke wiira munnikhalela nthiti miteko sanyu. Nlikanyiho na italento ni na imwali, Yesu khaaphavela ohimya wiira makristau oothanliwa yaarowa okhala oolosowa. Ohiya-vo, owo aaphavela otthokiherya etthu yaarowa okhumelela vakhala wiira yaamuhiya okhalela nthiti miteko saya. Awo yaamuhiya ‘olipiherya wiihaniwa waya ni othanliwa  waya’, nave awo khiyaarowa weemereriwa wiirela mpantta Omwene wa wiirimu. — 2 Ped. 1:10.

¹⁴ Malikanyiho Yesu aalavunle awe voohimya sa imwali ni italento, annooniherya oratteene wiira makristau oothanliwa ahaana okhala oolikana ene ni oowehaweha, nave tho ahaana ovara muteko ni opaka ele aniwerya aya. Masi niireke wiira Yesu aahihimya-tho etthu ekina yaakhanle oowaalopola makristau oothanliwa? Aayo! Etthu Yesu aahimmye awe eri Matheyo 24:40, 41, nave-tho enilavula voohimya sa ophukela wookiserya wa makristau oothanliwa.

TANI ONROWA ‘OKUXIWA’?

15-16. Moota xeeni Matheyo 24:40, 41 onaakhaliherya awe makristau oothanliwa okhala oowehaweha?

¹⁵ Ohinatthi opacerya olavula malikanyiho ale mararu, Yesu aahitthokiherya ophukeliwa wookiserya wa makristau oothanliwa wiira ooniherye ti pani aarowa weemereriwa. Owo onnaalavula alopwana anli anvara muteko mmatta ni athiyana anli anixila vanxiloni. Vanikhala wiira ikurupu iya piili sa atthu, saavara muteko woolikana, masi Yesu aahimmye wiira “mmosa onookuxiwa, mukina onrowa ohiiwa”. (Mmusome Matheyo 24:40, 41.) Nuumala-vo, Yesu aahaaleela awiixutti awe wiira: “Muthipeleleke owehaweha, okhala wira khamunsuwela nihiku ninrwa awe Pwiya anyu”. (Math. 24:42) Yesu aahilavula etthu emosa-ru okathi aahimmye awe nlikanyiho na imwali. (Math. 25:13) Niireke wiira iversiikulu iya sinnivarihana? Vanikhala wiira ti yeeyo. Ootheene yaale anrowa othanliwa ni ohihiya ororomeleya ‘anookuxiwa’, aahiiso Yesu onrowa oweemererya okela Moomweneni mwawe wiirimu. — Yoh. 14:3.

¹⁶ Nwehaweheke. Khula mukristau oothanliwa onrowa ohiya okhala oowehaweha, owo khonrowa ‘othukumanyiwa ni atthu oothanliwa’. (Math. 24:31) Moohicikha nlipelelo arina aya, arumeyi ootheene a Muluku ahaana ovaha ephoole moolumo a Yesu, ohihiya okhala oowehaweha ni olipiha waamini waya.

17. Xeeni nihinxanka ahu ni moota Yehova onaathanla awe makristau ororomeleya?

¹⁷ Hiyo ninnimusuwela oratteene Yehova nave-tho ninnisuwela wiira enamuna oniphuka awe ti ya xariya. Hiyo khaninxanka vakhala wiira Yehova onnilakela waathanla makristau ororomeleya okathi ahu ola. c Ninnuupuwela nlikanyiho Yesu alavunle awe na alopwana yaavara muteko ematta ya uuva okhuma 17 oora. (Math. 20:1-16) Ale yaalattuliwe ovara muteko makaaripi, yaahaakhela musurukhu mmosa-ru yaakhenle aya ale yaapacenrye ovara muteko okhuma voosiisu. Mwa enamuna emosa-ru, moohicikha okathi makristau ororomeleya anithanliwa aya, awo anirowa wakhela otthuveliwa waya wiirimu yaahihiye-ru okhala ororomeleya.

NVAHEKE EPHOOLE SOOLOPOLA

18-19. Itthu xeeni niixuntte ahu ni malikanyiho nithokorenrye ahu?

¹⁸ Exeeni niixuntte ahu? Nihiixutta wiira nlikanyiho na ipwittipwitthi ni ipuru, nenlo nintaphulela atthu arina nlipelelo na okhala mahiku ootheene valaponi, ninnooniherya efaita erina aya olipiha omuroromela waya Yehova okhuma nenna-va mpakha okathi wa maxakha maalupale. Muhoolo, Yesu onrowa waaphukela ale ahinrowa ohiya okhala oororomeleya nave-tho “anrowa ophwanya okumi woohimala”. — Math. 25:46.

¹⁹ Nave tho nihiixutta malikanyiho manli anaaromola makristau oothanliwa. Nlikanyiho Yesu aaromonle awe na imwali saarina  ankhili ni sahaarina ankhili, iye 5 saarina ankhili sahoopowa. Iyo saahiilokiherya ni saaniwehaweha, okathi wootheene amulipelelaka mutheli ophiya. Masi imwali iye 5 sahaarina ankhili, khisailokihenrye. Tivonto, mutheli ole khaaweemerenrye wiirela mpantta efesta ele ya ekasamento. Mwa enamuna emosa-ru, hiyo nihaana wiilokiherya okathi wootheene nilipelelaka ophiya okathi Yesu onrowa awe opwetexa olumwenku ola wootakhala. Nave-tho nlikanyiho na italento, nihiixutta wiira arumeyi ale anli oororomeleya yaanivara muteko ni yaanikhalela nthiti. Awo yaanivara muteko munceene wiira amuhakalalihe pwiya aya, tivonto yena aahiweemererya. Masi murumeyi ole oolosowa aahoomoliwa. Nniixutta exeeni? Hiyo nihaana oluttuweliwa ovara miteko sa Yehova mpakha wanikisa. Nave-tho, nihiixutta wiira makristau oothanliwa ahaana okhala owehaweha wiira ‘akuxiwe’ ni Yesu wiira yatthuveliwe wiirimu. Makristau oothanliwa annilipelela moohakalala okathi anrowa aya “othukumanyiwa vamosa” ni Yesu wiirimu. Nuumala ekhotto ya Armagedoni, awo anrowa wiirela mpantta ekasamento ya mwaapwittipwitthi. — 2 aTes. 2:1; Wiis. 19:9.

20. Yehova onrowa owiiriha exeeni ale anivaha ephoole soolopola?

²⁰ Ohanle okathi vakhaani paahi wiira Yesu aaphukele apinaatamu, masi hiyo khanimpirisari woova etthu. Vakhala wiira khaninrowa ohiya okhala oororomeleya, Tiithi ahu oophenta a wiirimu, onoonivaha “owerya onivikana wa mutthu” wiira niwerye ‘weemela ohoolo wa Mwaana a mutthu’. (2 aKor. 4:7; Luka 21:36) Moohicikha nlipelelo nrina ahu, hiyo nnoowerya omuhakalaliha Tiithi ahu a wiirimu vakhala wiira nnoovahaka ephoole malikanyiho Yesu aahimmye awe. Mwaha wa oreera murima wuulupale wa Yehova, masina ahu ‘anrowa olepiwa mulivuruni’ mwa ekumi. — Dan. 12:1; Wiis. 3:5.