Ekeekhai wiira awiixutti ale 70, khiyaakhanle ni Yesu okathi apaka awe niira na Eyoolya ya Ohiyu ya Apwiya. Masi eyo, khentaphulela wiira awiixutti ale yaaroomunyanyala Yesu aahiiso owo khaaweemererya-tho okhala awiixutti awe. Yesu aaphavela okhala ni arummwa awe paahi.

Akhale ale 12 ni ale 70, ootheene aya yaari awiixutti a Yesu. Eriyari ya awiixutti awe anceene, Yesu ahaathanla alopwana 12, aavaha nsina na arummwa. (Luka 6:12-16) Okathi owo, Yesu aari oGalileya vaavo ‘aawiihanne awe arummwa 12’ nuumala-vo “aahaaruma waalaleerya atthu Omwene wa Muluku, ni waapenuxa aretta”. (Luka 9:1-6) Nuuvira okathi, ori ene oYudeya Yesu “aahaathanla awiixutti akina 70, aaruma anli-anli”. (Luka 9:51; 10:1) Yesu, ahikhalana atthareli anceene mapuro manceene ihapari sooreera saalaleiwa aya.

Ayuda ale yaakhanle awiixutti a Yesu, yaahaana omwiiraka Paasikha khula mwaakha woonasa wene ni emusi aya. (Okhum. 12:6-11, 17-20) Ohalaka okathi vakhaani wiira Yesu iiviwe, owo ni awiixutti awe yaahirowa oYerusalemu. Masi Yesu khaalattunle awiixutti awe ootheene a oYudeya, oGalileya ni oPereya wiira yampake Paasikha. Vannooneya wiira okathi ole, Yesu aaphavela okhala ni awiixutti awe paahi. Owo aalenle so: “Kaahiphavela vanceene omulya Paasikha ola ni nyuwo, kihinatthi ohaawa”. — Luka 22:15.

Yesu aahikhalana mathowa ooloka yaamwiiriha opaka eyo. Moohipisa owo aamookhwa ntoko “mwaapwittipwitthi a Muluku, yoowo onttipiha itampi sa moolumwenkuni!” (Yoh. 1:29) Yesu aarowa okhwa oYerusalemu weiwo mwa okathi munceene aavahiwa awe mikuttho Muluku. Paasikha, aniwuupuxerya aisarayeli okathi Yehova aawooponle awe wExiitu. Masi mukuttho wa Yesu waahikhalana efaita yuulupale, okhala wiira owo arowa owoopola apinaatamu etampi ni okhwa. (1 aKor. 5:7, 8) Okhwa wa Yesu, waahiweemererya awiixutti ale 12 okumiherya muloko wa ekristau. (aEef. 2:20-22) Ti voohakalaliha osuwela wiira muttetthe wowaarya, eyo piiyo, Yerusalemu a wiirimu, ookhalana “maluku 12 vaalisensoni vaya, vaavo valempwale aya masina 12 a arummwa 12 a Mwaapwittipwitthi”. (Wiis. 21:10-14) Eyo enooniherya wiira arummwa ale, yaamukhalana muteko wa efaita wa omaleliha muteko wa Muluku. Nto vannooneya wiira ala ti yaari mathowa yaamwiirinhe Yesu okhala ni awiixutti awe ale 12 paahi, okathi ole wa Paasikha ookiserya ni Wuupuwelela aapanke awe moottharelana, eyo piiyo, Eyoolya ya Ohiyu ya Apwiya.

Awiixutti ale 70 ni akina, khiyaakhanle okathi Yesu aapaka awe Eyoolya ya Ohiyu ya Apwiya. Nnaamwi vari siiso, awiixutti ootheene yaarowa wooniherya okhala oororomeleya yamphwanya mureerelo mwaha wa Eyoolya ya Ohiyu ya Apwiya. Awiixutti ootheene nuuvira okathi yaarowa okhala makristau oothanliwa, nave yaamukhalana eparakha ya wiirela mpantta nivarihano na Omwene, nenlo Yesu aalenle awe arummwa awe ohiyu ole wookiserya. — Luka 22:29, 30.