1. Nuumala Adamu ni Eva ottheka, Yehova uupulunle exeeni sa nwanani ihu?

ADAMU aanisuwela wira enowa khenlavula. Tivonto, okathi aasuwenle awe wira enowa yoolavula ni Eva, woonasa wene Adamu aahoona wira naari nlaikha. (Maphattuwelo 3:1-6) Adamu ni Eva khiyaasuwela nlaikha nene. Masi Adamu yaahithanla omutthara ole yahaamusuwela aya, nto yaahimmwareela Tiithi aya oophenta a wiirimu. (1 Timótheyo 2:14) Moohipisa, Yehova aahipacerya omuupulula nwanani ole ootakhala ni ooleiherya wira onrowa ompwetexa. Masi, okathi ole Yehova aahaalopola wira nlaikha naalavunle ni Eva nrumeelaka enowa, naarowa waanyokhaka atthu otheene animphenta Muluku.​—Maphattuwelo 3:15.

2, 3. Xeeni Yehova ohalaka ohimya itthu vakhaani voohimya sa Satana ohinatthi orwa Mesiya?

² Yehova khaahimmye nsina na nlaikha nammwarenle. * (Nwehe enoota.) Masi nuuvira iyaakha 2.500, okhuma vaavale aamwareeliwe awe wEedeni, Yehova aahuupulula nsina na  nwanani ihu. (Yobi 1:6) Nlaikha nno ti “Satana”, nuulumo nintaphulela “Nwanani”. Iliivuru tthaaru paahi sa Soolempwa sa eHeeberi sinromola nsina na Satana, 1 Wahala, Yobi ni Zakariya. Xeeni nwanani ola ohalaka olavuliwa ikwaha vakhaani paahi ohinatthi orwa Mesiya?

³ Soolempwa sa eHeeberi, Yehova khohimmye itthu sinceene voohimya sa Satana ni miteko sawe. Tivonto, yoolakela ya Soolempwa sa eHeeberi yaari waakhaliherya atthu omusuwela ni omutthara Mesiya. (Luka 24:44; aGalasia 3:24) Nuumala Mesiya orwa, Yehova aahimurumeela Mesiya ni awiixutti awe wira anisuwelihe miteko sa Satana ni malaikha animutthara. * (Nwehe enoota.) Eyo etthu yookhalela, maana Yehova onrowa omurumeela Yesu ni maKristau oowoottihiwa, wira ampwetexe Satana ni malaikha awe.​—aRoma 16:20; Wisupulula 17:14; 20:10.

4. Xeeni nihintthuneya ahu omoova Diabo?

⁴ Murummwa Pedru onnimuhimya Satana Diabo okhala “kharamu onòpa murukulu”. Nave murummwa Yohani onnimuhimya okhala ‘enowa yulupalexa’ ni “nwanani”. (1 Pedru 5:8; Wisupulula 12:9) Masi khanintthuneya omoova Diabo. Maana owerya wawe wookhalana mukano. (Mmusome Yakobo 4:7.) Nto hiyo ninnikhapeleliwa ni Yehova, Yesu ni malaikha oororomeleya. Nikhaliheriwaka naawo, nnoowerya omukhootta nwanani ihu. Tivonto, nihaana osuwela waakhuliwa wa makoho ala mararu ootthuneya, ani: Mpakha vaavi Satana aahapunxe awe atthu? Satana oneererya sai waahapuxa atthu? Itthu xeeni ohinwerya awe opaka? Nrowe naakhule makoho ala ni niwehe ele eniixutta ahu.

5, 6. Xeeni anamalamulela ahinwerya aya opaka marukunuxo nimphavelexa ahu?

⁵ Malaikha manceene aamutthara Satana ammwareelaka Muluku. Ehinatthi Epula ya Mutaaseke, Satana aahiiriha malaikha makina orupihana ni athiyana valaponi. Biibiliya onnimulavula mwa nlikanyiho vaavo onimuhimya awe okhala enowa yuulupalexa, yeeyo yaapurunle mpantta wa neeraru wa itheneeri okathi yaariheliwe aya valaponi. (Maphattuwelo 6:1-4; Yuda 6; Wisupulula 12:3, 4) Nuumala malaikha awo ootakhala ohiya wiirela mpantta emusi ya Muluku, awo anilamuleliwa ni Satana. Nihuupuweleke wira malaikha awo oomwareya toohitthokiheya. Olumwenku ohinooneya wa minepa iyo, Satana ootthokiha olamulelo awe otakihaka Omwene wa Muluku. Satana ohiipaka okhala mwene ni oovaha owerya malaikha ootakhala wira yeettiheke olumwenku.​—aÉfeso 6:12.

⁶ Satana onnirumeela mutthenkeso awe wira eettiheke iguvernu sotheene sa apinaatamu. Hiyo ninnikupali ela, okhala wira Satana aahimooniherya Yesu “omwene wothene  wa mulaponi”, khumuleela wira: “Miyo kirovahiwa owerya n’uvuwa wothene wa ilapo iye, kinonvaha ole onimutthunaka. Kinimovahani nyuwo”. (Luka 4:5, 6) Tthiri, aakhala anamalamulela aniphavela waapakela itthu sooloka ni waakhaliherya atthu anaalamulela aya. Masi, khuuvo namalamulela pinaatamu onwerya opaka marukunuxo nimphavelexa ahu.​—Esalimo 146:3, 4; Wisupulula 12:12.

7. Ohiya paahi orumeela iguvernu, Satana onirumeela sai etiini yoowootha ni olumwenku wa nakoso? (Nwehe elatarato yoopacerya.)

⁷ Satana ni malaikha awe ootakhala annirumeela etiini yoowootha ni olumwenku wa nakoso wira aawoke “atthu othene” a valaponi. (Wisupulula 12:9) Satana onnirumeela etiini yoowootha wira yiixuttiheke itthu sowootha voohimya sa Yehova, ohela muhina weererya ovitha nsina na Muluku. (Yeremiya 23:26, 27) Nto eyo enniwiiriha atthu wuupuwelaka wira animukokhorela Muluku, masi akokhorelaka malaikha ootakhala. (1 aKorinto 10:20; 2 aKorinto 11:13-15) Nave, Satana onnirumeela olumwenku wa nakoso wira omwara-mware wootha wawe, ntoko yoowootha yoowi musurukhu aahiiso mihakhu sinnaaphwanyiha ohakalala. (Miruku 18:11) Ale anikupali wootha iwo, anniviriha okathi munceene athukumanyaka “Muhakhu”, ohiya omurumeela Muluku. (Matheyo 6:24) Hata yamphenta Muluku, ophenta waya muhakhu onninnuwa mpakha ovuvurya omphenta waya Muluku.​—Matheyo 13:22; 1 Yohani 2:15, 16.

8, 9. (a) Itthu xeeni piili nniixutta ahu ni sowiira sa Adamu ni Eva ni omwareya wa malaikha? (b) Xeeni vari aya vootthuneya osuwela wira Satana toneettiha olumwenku ola?

⁸ Sowiira sa Adamu ni Eva ni omwareya wa malaikha, onniniixuttiha itthu piili. Yoopacerya, nniixutta wira siri mipantta miili paahi, nto nihaana othanla mpantta oniphavela ahu okhaliherya. Hiyo pooti okhaliherya mpantta wa Yehova aahiiso wa Satana. (Matheyo 7:13) Ya nenli, nniixutta wira ale anikhaliherya mpantta wa Satana anniphwanya maxakha. Adamu ni Eva yaahikhalana eparakha yoothanla ele eri yooloka ni yoohiloka. Nave malaikha ootakhala aakhalana owerya woweettiha iguvernu sa apinaatamu. (Maphattuwelo 3:22) Okhala wene, othanla mpantta wa Satana onikumiherya maxakha. Tthiri khonikumiherya mireerelo sooloka!​—Yobi 21:7-17; aGalasia 6:7, 8.

⁹ Xeeni vari aya vootthuneya osuwela wira Satana toneettiha olumwenku ola? Eyo enoonikhaliherya okhalana moonelo wooloka voohimya sa anamalamulela ni olaleya ihapari sooreera. Noosuwela wira Yehova oniphavela wira naattittimiheke anamalamulela. (1 Pedru 2:17) Nave nihaana wiiwelela malamulo aya akhala wira khanivaanyihana ni Biibiliya. (aRoma 13:1-4) Nave-tho, noosuwela wira nihaana osyaka wiirela mpantta epoliitika aahiiso omukhaliherya napoliitika ni epartido awe. (Yohani 17:15, 16; 18:36) Okhala wira noosuwela wira Satana oneererya ovitha nsina ni ohonona omutthu wa Yehova, nto nihaana wiimananiha owiixuttiha atthu ekeekhai  voohimya sa Muluku. Eparakha yuulupale wiihaneliwa nsina na Muluku ni orumeela. Omphenta Muluku etthu yootepa otthuneya ovikana ophenta musurukhu ni itthu.​—Yesaya 43:10; 1 Timótheyo 6:6-10.

10-12. (a) Ehelelo xeeni Satana aarumenle awe wira ohapuxe malaikha? (b) Ele yaapanke aya malaikha ale enniixuttiha exeeni?

¹⁰ Inamuna Satana onrumeela awe wira aahapuxe atthu sinnimukhumela saana. Nto wira atthu apakeke ele entthuna awe, okathi mukina onnirumeela ehelelo aahiiso onneererya owoopopiha wira aahapuxe atthu.

¹¹ Satana aahirumeela ehelelo wira ohapuxe malaikha manceene. Woonasa wene, waahivira okathi munceene uupuwelaka etthu aarowa awe orumeela wira ohapuxe malaikha ale. Malaikha makina yaavariwe ni ehelelo ya orupihana ni athiyana valaponi. Anamwane yaayara aya malaikha awo yaari oorakama ni yaanaahasula atthu. (Maphattuwelo 6:1-4) Ohiya paahi orumeela oraruwa aahiiso onamuttompe wira ohapuxe malaikha ale, woonasa wene, Satana aahileiherya wira yaarowa waalamulelaka apinaatamu. Vamosaru, Satana aaheererya okhoottiherya wiiraneya eprofesia ya Yehova voohimya sa ‘muthiyana ni osùlu awe’. (Maphattuwelo 3:15) Masi Yehova kheemerenrye wira Satana okhoottiherye wiiraneya wa eprofesia eyo. Yehova aahiruuha Epula ya Mutaaseke wira omuhonone palano a Satana ni malaikha ootakhala.

¹² Eyo enniixuttiha exeeni? Orupihana woohiloka ni wiixinnuwiha ihelelo sinimwiiriha Satana okhumela saana. Malaikha amutthanre Satana yaahikhala ni Muluku wiirimu iyaakha sinceene! Hata vaari siiso, malaikha manceene yaahihiya soophavela soohiloka sinnuwaka vamurimani vaya. Okathi wotheene, nuupuweleke wira hata sivinre ene iyaakha sinceene nimurumeelaka Yehova, soophavela soohiloka pooti wunnuwa vamurimani vahu. (1 aKorinto 10:12) Ti maana aya, okathi wotheene vanitthuneya ahu oweha ele eri vamurimani vahu ni okumiha khula etthu enivarihana ni orupihana woohiloka ni wiixinnuwiha!​—aGalasia 5:26; mmusome aKolosi 3:5.

13. (a) Ehelelo xeeni ekina Satana onirumeela awe? (b) Ninrowa osyaka sai ehelelo eyo ya Satana?

 ¹³ Ehelelo ekina Satana onirumeela awe, ori onammunepani. Olelo-va, Satana onneererya owiiriha atthu ophavela osuwela minepa sootakhala orumeelaka etiini yoowootha ni matthekulelo. Iviidiyu, axooku a mukomputadoreni ni matthekulelo makina pooti omwiiriha mutthu woonaka onammunepani okhala etthu yoohakalaliha. Ninrowa osyaka sai ehelelo ela? Nihilipeleleke mutthenkeso wa Muluku onivaha elista ya matthekulelo ooloka ni oohiloka. Nihaana wiiniha nikuruta yowuupuxerya ya murima ahu wira nipakeke soothanla sooloka moovarihana ni malakiheryo a Yehova. (aHéberi 5:14) Nave akhala wira omphenta wahu Muluku ti “w’ekekhai”, nnoopakaka soothanla sooloka. (aRoma 12:9) Nawoothe, onnihimya etthu emosa onapaka ekina. Tivonto, vaavo ninthanla ahu matthekulelo, nihaana wiikoha so: ‘Kiireke kinnitthara malakiheryo kinaaleelaka atthu akina wira atthareke? Ale kinaasomiha aka Biibiliya ni atthu akina ankiweha anrowa woonela sai matthekulelo aka?’ Vaavo nintthara ahu malakiheryo nnaaleela ahu akina, eyo enoonikhaliherya osyaka ehelelo ya Satana.​—1 Yohani 3:18.

14. Moota xeeni Satana oneererya awe onoopopiha ni ninrowa owerya sai omukhootta?

¹⁴ Nave, Satana onneererya onivara onoopopihaka wira nihiye ororomeleya wa Yehova. Mwa ntakiheryo, Satana onniwiiriha anamalamulela onikhoottiherya olaleerya. Owo pooti owiiriha ale anivarana ahu muteko aahiiso anisomana ahu oxikola oninyohola mwaha wootthara malamulo a mBiibiliyani. (1 Pedru 4:4) Nave, Satana pooti owiiriha amusi ahu ahikhanle Anamoona, yaawo anikhala ntoko aniphavela onikhaliherya masi aphavelaka onikhoottiherya orowa omuthukumanoni. (Matheyo 10:36) Ninrowa opaka exeeni wira nixintte woopopiha wa Satana? Hiyo nihitikinihiweke naalupatthiwaka ni Satana, maana noosuwela wira owo onniwana ni hiyo. (Wisupulula 2:10; 12:17) Nave-tho, nihaana wuupuwela mwaha ola wootepa otthuneya: Satana onihimya wira nimmurumeela Yehova okathi wookhweya, nto okathi itthu sinnixankiha aya, nnoohiya omurumeela  Yehova. (Yobi 1:9-11; 2:4, 5) Nto okathi wotheene nihaana onvekela Yehova wira onivahe ikuru. Tivonto, muupuweleke wira Yehova khonikhala-khala oninyanyalaka.​—aHéberi 13:5.

15. Niireke Satana ookhalana owerya woonikhanyererya opaka itthu nihimphavela ahu? Mutthokiherye.

¹⁵ Satana khoniwerya waakhanyererya atthu etthu ahiniphavela aya opaka. (Yakobo 1:14) Atthu anceene moolumwenkuni khansuwela wira ari mpantta wa Satana. Masi, nuumala mutthu wiixutta ekeekhai, owo ookhalana eparakha yoothanla okhala mpantta wa Yehova aahiiso wa Satana. (Miteko 3:17; 17:30) Akhala wira noolakela omwiiwelela Muluku, Satana khoniwerya ohonona nroromelo nahu.​—Yobi 2:3; 27:5.

16, 17. (a) Etthu xeeni ekina Satana ni malaikha ootakhala ahinwerya aya opaka? (b) Xeeni nihintthuneya ahu woova onvekela Yehova moowiiwanyeya?

¹⁶ Nave sookhala itthu sikina Satana ni malaikha ootakhala ahiniwerya aya opaka. Mwa ntakiheryo, Biibiliya onnooniherya wira awo khaniwerya osuwele ele eri mmuupuweloni ni vamurimani vahu. Masi Yehova ni Yesu paahi taniwerya osuwela. (1 Samuweli 16:7; Marko 2:8) Niireke wira nihaana woova onvekela Yehova moowiiwanyeya, noovaka wira Diabo ni malaikha ootakhala animwiiwa ni orumeela ele ehimmye ahu wira anilupattheke? Nnaari! Nthowa xeeni? Nrowe nthokorerye nlikanyiho nna: Okathi ninvara ahu muteko wa Yehova, khannihiya opaka itthu sooloka noovaka owehiwa ni Diabo. Moolikanasa, khanintthuneya woova onvekela Yehova moowiiwanyeya noovaka wira Satana onooniwiriyana. Nave, Biibiliya onnaalavula arumeyi anceene a Muluku yaavekenle moowiiwanyeya. Masi khonihimya wira awo yaanoova owiriyaniwa ni Diabo. (1 Mamwene 8:22, 23; Yohani 11:41, 42; Miteko 4:23, 24) Akhala wira ninniimananiha ovekela moovarihana ni otthuna wa Muluku, nikupaliki wira Yehova khonrowa omweemererya Diabo onihasulaka moohimala.​—Musome Esalimo 34:8.

¹⁷ Nihaana omusuwela nwanani ihu, masi khanintthuneya omoova. Nnaamwi nri ene anatampi, nikhaliheriwaka ni Yehova nnoowerya omuxintta Satana! (1 Yohani 2:14) Akhala wira nnoomukhootta Satana, owo onoonitthyawa. (Yakobo 4:7; 1 Pedru 5:9) Olelo-va, vanikhala ntoko wira Satana onnaalupattha vanceene amiravo. Anrowa omukhootta sai Diabo? Nikoho nla ninrowa othokorerya mwaha onittharelana.