1, 2. (a) Annilipiha sai anna ni arokora anvikaniha olaleerya mittetthe seiye anamunceene ahimphavela aya wiiwa? (Nwehe elatarato yoopacerya.) (b) Yesu aahimmye exeeni mutthu olaleerya “mulaponi mwawe”? (Nwehe enoota.)

SERGIO NI OLINDA, anamathelana mapioneero anikhala wEstados Unidos. Awo arina iyaakha sinvikana 80. Mahiku ala, mwaha wowaawereyaka metto, khanwerya weetta vanceene. Masi mwa iyaakha sinceene, khula 7 oora ya voosiisu, annirowa eparkhi anvira atthu anceene muttetthe aya wira yalaleeryeke. Awo anlaleerya waattamela opuro oniweliwa ikaaro wira yaavaheke iliivuru atthu anvira. Nnaamwi anamunceene ahaacalelaka, annivikaniha okhala oopatthaneya wa ale anaaweha. Othana eriyari, anniipurulela owannyeya. Hata vari siiso, mmeeloni mwaya, 7 oora annitthikela opuro ole. Awo annilaleerya mwaakha wotheene mahiku 6, khula esumana.

² Aakhala anna ni arokora anceene anlikana ni Sergio ni Olinda, yaawo mwa iyaakha sinceene anlaleerya mulaponi mwaya, hata anamunceene ahiphavelaka waawiriyana. Nave  pooti wira atthu a muttetthe anyu khamphavela woowiriyanani. Akhala wira ti siiso, ninnoottottopelani mwaha wa ovilela wanyu ni ovikaniha olaleerya hata vahikhweyaka. * (Nwehe enoota.) Ntakiheryo nanyu, ninnaalipiha anna ni arokora, hata yaale akhumme khalai omurumeela Yehova. Nwehe ele axitokweene akina a esirkwiitu ahimmye aya: “Okathi kinlaleerya aka ni anna ni arokora oororomeleya, kinnilipa mwaha wa ntakiheryo naya”. “Ororomeleya waya onnikilipiha ni okiiriha olipa murima vaavo kinilaleerya aka”. “Ntakiheryo naya, ninnikivara murima”.

3. Makoho xeeni mararu ninrowa ahu waakhula, ni nthowa xeeni?

³ Mwaha ola, ninrowa waakhula makoho mararu. Xeeni ikwaha sikina vaninyoonyiwa ahu? Ontaphulela exeeni wiima mihokorokho? Exeeni enrowa onikhaliherya wiima mihokorokho mwaha woovilela? Osuwela waakhuliwa wa makoho ala, onoonikhaliherya ovikaniha ovara muteko nirummwale ahu ni Yesu.

4. (a) Paulo oonela sai vaavo aYuda anceene yahaaphavela aya wiiwa? (b) Exeeni yaamwiiriha woonaka siiso?

⁴ Niireke mootoko onyoonyiheya mwaha woowi atthu a muttetthe anyu khamphavela wiiwa muhupi wa Omwene? Akhala wira ti siiso, munimwiiwexexa ele Paulo oona awe. Maana owo aahiviriha iyaakha sowiiraka 30 olaleeryaka, ni aahaakhaliherya atthu anceene okhala maKristau. (Miteko 14:21; 2 aKorinto 3:2, 3) Hata vaari siiso, Paulo khaawenrye waakhaliherya aYuda anceene okhala maKristau. Maana aYuda anceene yaahikhootta onwiriyana, nave akina yaanimulupattha. (Miteko 14:19; 17:1, 4, 5, 13) Paulo oonela sai, nnaamwi atthu awo yahaaphavela wiiwa? Owo aahimmye wira: “Murim’aka onnikiripa vanjene: kinnihawa nihiku ti níhiku vohihiyererya”. (aRoma 9:1-3) Exeeni yaamwiiriha Paulo woona siiso? Okhala wira Paulo aanisiveliwa olaleerya ni aanaaphenta atthu. Nave, aanaaphenta vanceene aYuda, ti maana aya aariipiwa awe murima vaavo yaakhootta aya omoriwa ikharari wa Muluku.

5. (a) Exeeni enniiriha olaleerya? (b) Xeeni ikwaha sikina ninnyoonyiwa ahu?

⁵ Ntoko Paulo, ninnaalaleerya atthu okhala wira ninnaathokorerya ni nimphavela waakhaliherya. (Matheyo 22:39; 1 aKorinto 11:1) Sookumanana sahu sinninikhaliherya woona wira omurumeela Yehova teri etthu yootepa oloka. Nave, nimphavela waakhaliherya atthu woona moota woophwanya okumi wooloka! Ti maana aya, vanaatumererya ahu wiixutta voohimya sa Yehova ni yoolakela awe wa apinaatamu. Vanikhala ntoko wira nikunxe yoovaha yootepa oreera, vano khiyaaxonttela nriki: ‘Xontte mwaakhele yoovaha ela’. Nto okathi anikhootta aya, hiyo ‘ninniripiwa murima’ ntoko Paulo. Etthu enniiriha oriipiwa murima, khahiyo mwaha woohikhalana waamini, masi mwaha woowi ninnaaphenta tthiri atthu awo. Tivonto, hata okathi mukina vaninyoonyaka, ninnivikaniha olaleerya. Hiyo pooti woonaka ntoko Elena, yoowo ovirinhe iyaakha sinivikana 25 ori ene pioneera. Owo onihimya so: “Muteko woolaleerya  khonikikhweela. Masi khokhanle muteko mukina woohakalaliha ovikana ola”.

6. Nikoho xeeni ninrowa ahu waakhula vano?

⁶ Exeeni ennikupaliha wira nnookhumela saana muteko woolaleerya moohicikha opuro onilaleerya ahu? Wira naakhule nikoho nna nootthuneya, nrowe nthokorerye malikanyiho manli a Yesu voohimya sa otthuneya waya ‘wìma mihokorokho’. (Matheyo 13:23) Nlikanyiho noopacerya ninlavula voohimya sa evidera.

7. (a) Nlikanyiho na Yesu, tani ori “mulipa-òlima”, mwiri wa “evidera” ni “iritta”? (b) Nikoho xeeni nlelo nintthuneya ahu waakhula?

⁷ Mmusome Yohani 15:1-5, 8. Nlikanyiho nla, Yesu aahitthokiherya wira Yehova tori “mulipa-òlima”, vano Yesu ti mwiri wa “evidera”, nto awiixutti awe tari “iritta”. * (Nwehe enoota.) Nuumala-vo, Yesu aahaaleela arummwa awe wira: “Ovuwa w’Atithi aka ti nno: wira mwimeke mihokorokho sowatta, mukhaleke awixutti aka”. Nto, ontaphulela exeeni wiima mihokorokho? Nnaamwi nlikanyiho nla Yesu ahaahimmye mooluluwanya muhokorokho ene, masu awe annikhaliherya waakhula nikoho nna.

8. (a) Nlikanyiho na Yesu, niireke ‘wìma mihokorokho’ ontaphulela waapaka awiixutti asya? (b) Niireke Yehova onnivekela itthu sihinwerya ahu?

⁸ Olavulaka sa Tiithi awe, Yesu aahimmye so: “Eritta yothene eri mwa miyo, ehinìma mihokorokho, Atithi annìkittha”. Mwa enamuna ekina, hiyo nnookhala arumeyi a Yehova, paahi akhala wira ninniima mihokorokho. (Matheyo 13:23; 21:43) Tivonto, nlikanyiho nna, wiima mihokorokho khontaphulela waapaka awiixutti asya. (Matheyo 28:19) Maana vaakhanle wira ti siiso, Anamoona oororomeleya ahiwenrye omukhaliherya mutthu okhala mutthareli a Kristu, yaarowa olikanaka ni iritta sihiniima mihokorokho. Eyo khiyaarowa okhalela! Nthowa xeeni? Nthowa noowi hiyo khannaakhanyererya atthu wira akhale atthareli a Kristu. Okhala wira Yehova toophenta, owo khonkhala-khala onivekelaka opaka etthu ehinwerya ahu. Masi onnivekela itthu siniwerya ahu opaka.​—Otumererya 30:11-14.

9. (a) Nniima sai mihokorokho? (b) Nlikanyiho xeeni ninrowa ahu othokorerya moottharelana?

⁹ Nto, ontaphulela exeeni wiima mihokorokho? Etthu enitaphulela aya, otheene ahu ninniwerya opaka. Muteko xeeni Yehova aavanha awe arumeyi awe otheene? Ti olaleya ihapari sooreera sa Omwene wa Muluku. * (Nwehe enoota.) (Matheyo 24:14) Nlikanyiho na Yesu na mulipa-oowaala, ninninikhaliherya woona eyo. Nrowe nthokorerye nlikanyiho nno.

10. (a) Nlikanyiho na Yesu, entaphulela exeeni epyo ni etthaya? (b) Ninkumiherya exeeni nikala na etrigu?

¹⁰ Mmusome Luka 8:5-8, 11-15. Nlikanyiho na mulipa-oowaala, Yesu aahitthokiherya wira epyo, “masu a Muluku” aahiiso muhupi voohimya sa Omwene wa Muluku. Etthaya ti mirima sa atthu. Vano epyo yaamorenle etthaya yooloka, yaahinnuwa khukhala mwiri. Nto mwiri ole waahiima mihokorokho “mpakha miloko mulokó”, niire so, 100. Vaakhanle wira mwiri owo nikala na  etrigu, waarowa wiima mihokorokho xeeni? Niireke waarowa wiima makala macikhaani a etrigu? Nnaari. Masi waarowa wiima ipyo sa etrigu, seiyo nuumala waaliwa ni wunnuwa, sinkumiherya makala a etrigu. Vano nlikanyiho na Yesu, epyo emosa yaahikumiherya ipyo 100. Exeeni nlikanyiho nna ninniixuttiha aya voohimya sa muteko ahu woolaleerya?

11. (a) Nlikanyiho na mulipa-oowaala ninniixuttiha exeeni voohimya sa olaleerya? (b) Ninkumiherya sai ipyo isya?

¹¹ Vaavo anamuyari ahu maKristau aahiiso Namoona a Yehova anlalenrye awe sa Omwene wa Muluku, waalikana ni waala epyo etthaya yooreera. Nto atthu awo yaahihakalala vanceene okathi yoonale aya wira niheemererya muhupi yaalaleya aya. Vano epyo eyo yaahivikaniha wunnuwa mpakha wiima mihokorokho. Ntoko nilavunle ahu, nikala na etrigu khannikumiherya makala masya, masi ipyo isya, nto hiyo khannaakumiherya awiixutti asya, masi ipyo isya. * (Nwehe enoota.) Nimpaka sai eyo? Ninnipaka eyo okathi onaaleela ahu atthu akina voohimya sa Omwene wa Muluku. Vanikhala ntoko wira nnincererya mihokorokho sa epyo yaaliwe vamurimani vahu. (Luka 6:45; 8:1) Tivonto, vaavo ninvikaniha ahu olaleya muhupi wa Omwene wa Muluku, ninniima “mihokorokho mwaha wa nthiti” nahu.

12. (a) Nlikanyiho na Yesu na mulipa-oowaala ni evidera, ninniixuttiha exeeni? (b) Nyuwo munoonela sai ele nlikanyiho nno ninniixuttiha aya?

¹² Exeeni nniixutta ahu ni malikanyiho a Yesu a evidera ni mulipa-oowaala? Anniixuttiha wira ‘wìma mihokorokho’, khonlipa ni atthu wiiwa muhupi onlaleya ahu. Masi onlipa ni ovikaniha wahu olaleerya. Paulo aahihimya etthu enlikana ni mwaha ola oriki: “Khula mmosá onotthuveliwa vophwanela ni muteko ovanryawe”. (1 aKorinto 3:8) Nto Yehova onrowa ontthuvela mwaha wa muteko ahu, ohiya mwaha wa mihokorokho sa muteko ahu. Matilda, yoowo ovirinhe iyaakha 20 ori ene pioneera, onihimya wira: “Kinnihakalala osuwela wira Yehova onnitthuvela wiimananiha wahu”.

13, 14. Moovarihana ni aRoma 10:1, 2, itthu xeeni saamwiiriha Paulo ohihiya olaleerya?

¹³ Exeeni enrowa onikhaliherya ‘wìma mihokorokho’ mwaha woovilela? Nrowe nithokorerye  saana ntakiheryo na Paulo. Noosuwela wira Paulo aahinyoonyiheya mwaha wa aYuda yaakhootta wiiwa muhupi wa Omwene. Masi, Paulo khaatonko ohiya waalaleerya atthu ale. Nave Paulo onnitthokiherya moota aawoonela awe aYuda ale oriki: “Etthu emphavelaka ni murim’aka wothene, eninvekelaka Muluku, t’ila: wira aYuda yòpowe. Miyo kinnakhalela onamona wira awo anetetela omuttittimiha Muluku, nto khansuwela enamuna y’omuttittimiha Muluku vophwanela”. (aRoma 10:1, 2) Exeeni yaamwiiriha Paulo ovikaniha olaleerya?

¹⁴ Wanipacerya, Paulo onihimya wira etthu yaamwiiriha waalaleerya aYuda mwaha woowi eyo ti ‘etthu yaphavela awe ni murima wothene’. Tthiri Paulo aaphavela wira atthu ale yoopowe. (aRoma 11:13, 14) Ya nenli, Paulo aahimmye wira ‘aninvekela Muluku’. Nto Paulo aamuxonttela Yehova wira omukhaliherye khula muYuda weemererya muhupi wa Omwene. Ya neeraru, Paulo aahimmye wira: “Awo anetetela omuttittimiha Muluku”. Ela enooniherya wira Paulo aanoona mikhalelo sooloka sa atthu ale ni wira yanwerya omurumeela Yehova. Nave, aahisuwela wira aYuda ale ooluttuweliwa yanwerya okhala awiixutti ooluttuweliwa a Kristu, ntoko Paulo.

15. Ninrowa omutakiha sai Paulo? Nvahe matakiheryo.

¹⁵ Ninrowa omutakiha sai Paulo? Wanipacerya, nihaana waaphavela ni murima wotheene atthu ‘othene athanleliwe ekumi ehinimala’. Ya nenli, ninnimuxonttela Yehova wira aakhaliherye atthu a murima saana  waakhelela muhupi onlaleya ahu. (Miteko 13:48; 16:14) Eyo ti etthu aapanke awe Silvana, yoowo ovirinhe iyaakha waattamela 30 ori ene pioneera. Owo onihimya so: “Kihinatthi orowa olaleerya muttetthe aka, kinninvekela Yehova wira okiirihe okhalana moonelo wooloka”. Nave, hiyo ninnivekela wira malaikha anikhaliherye waaphwanya atthu yaale aniphavela wiiwa masu. (Matheyo 10:11-13; Wisupulula 14:6) Robert, yoowo ovirinhe iyaakha sinivikana 30 ori ene pioneero onihimya wira: “Ti voohakalaliha ovara vamosa ni malaikha, maana annaasuwela atthu anaalaleerya ahu”. Ya neeraru, ninneererya oweha mikhalelo saya sooloka ni woona wira anoowerya okhala arumeyi a Yehova. Carl, mutokweene yoowo ovirinhe iyaakha sinivikana 50 obatiziwe ene, oni: “Kinnimananiha oweha etthu yaamukhaani enooniherya wira mutthu owo onniphavela wiiwa masu, vaavo vantheya awe, enamuna enkiweha awe, aahiiso nikoho nimpaka awe”. Akhala wira ninnipaka itthu iya, nnoowerya wiima “mihokorokho mwaha wa nthiti”, ntoko Paulo.

16, 17. (a) Musuweli 11:6, onniixuttiha exeeni? (b) Moota xeeni muteko ahu woolaleerya onaakhaliherya aya ale anniweha?

¹⁶ Nihikhala-khale nliyalaka wira olaleerya wahu pooti waakhaliherya atthu hata awo ahiphavelaka oniwiriyana. (Mmusome Musuweli 11:6.) Nisuweleke wira ninniwehiwa ni atthu, nto awo pooti woona wira ninniwara saana, na atthu a nttittimiho ni oopatthaneya. Eyo pooti ovara murima aya, nto muhoolo, ale khalai yahaaphavela oniwiriyana pooti ophavelaka. Eyo ti etthu yiiraneyale ni Sergio ni Olinda.

¹⁷ Sergio onihimya so: “Okhala wira oniwereya metto, waahivira okathi nihirowaka oparkhi. Okathi naatthikenle ahu olaleerya opuro ole, atthu yaavira yaahinikoha wira: ‘Exeeni yaakhumelenle? Mwaarowanse woowi?’” Moohakalala, Olinda onihimya so: “Ale aneettiha ikaaro anninlavuliha ni matata nto ale ari mukaaroni annikhuwela ariki: ‘Nvare saana!’ Nave anniveka irevista”. Sergio ni Olinda yaahitikinihiwa vaavo mulopwana mmosa aattamenle awe ekarinyu yoolaleerya aavaha ifilori ni waaxukhurela mwaha wa muteko aya.

18. Xeeni mulakenle anyu wiima “mihokorokho mwaha wa nthiti”?

¹⁸ Biibiliya onihimya wira “mwàleke vasisu, mwàle-tho makaripi”. Nto vaavo vanitepa anyu waaleela akina muhupi wa Omwene wa Muluku, nyuwo munniirela mpantta olaleya ehapari “wira maloko othene esuwele”. (Matheyo 24:14) Nave, munoohakalala vanceene osuwela wira Yehova onnisiveliwa ni muteko anyu. Tthiri, Yehova onnaaphenta otheene ale ‘anìma mihokorokho mwaha wa nthiti naya’!