1, 2. (a) Exeeni enaakhaliherya amiravo owana ni Satana ni malaikha awe ootakhala? (Nwehe elatarato yoopacerya.) (b) Exeeni ninrowa ahu othokorerya mwaha ola?

MURUMMWA Paulo aahaalikanyiha maKristau ni anakhotto. Hiyo ninniwana ekhotto, nto awanani ihu aakhala tthiri! Hiyo khaninwana ni apinaatamu masi ninwana ni Satana ni malaikha awe ootakhala. Okhala wira apacenrye khalaixa owana ekhotto eyo, nto annisuwela owana saana. Tivonto, pooti okhalaka wira khaninwerya oxintta ekhotto eyo, otepexa wene akhala wira na amiravo. Niireke amiravo anoowerya waaxintta awanani awo ootupa? Aayo, nto eyo ti etthu eniiraneya! Moota xeeni? Mwaha woowi awo annikhaliheriwa ni Yehova. Nave-tho, ntoko anakhotto yiixuttihiwe saana, amiravo awo aawara ikaruma sotheene sa ekhotto avahiwa aya ni Muluku, tivo aalikana owana ekhotto eyo.​—Mmusome aÉfeso 6:10-12.

² Okathi aarumenle awe nlikanyiho nna, Paulo uupuwela ikaruma sa ekhotto saawariwa ni anakhotto ooRoma. (Miteko 28:16) Mwaha ola, ninrowa othokorerya nlikanyiho nlo noovara murima. Nave ninrowa othokorerya ele amiravo akina  ehimmye aya voohimya sa mixankiho ni mireerelo aphwannya aya mwaha woowara ikaruma sotheene sa ekhotto ahu yomunepani.

3, 4. Moota xeeni ekeekhai ya mBiibiliyani enlikana aya ni esintu ya nakhotto ooRoma?

³ Mmusome aÉfeso 6:14. Esintu ya nakhotto ooRoma yaanikhalana ipetaaso sa yuuma wira sikhaliheryeke esintu awe ni wiiriha yoowara ya yuuma okhala opuro aya. Nave isintu sikina saanikhalana murupa woolipa waaheliwa ekatana ni mwaalo. Okathi nakhotto aawara awe esintu eyo, khoova orowa okhottoni.

⁴ Ntoko esintu, ikeekhai niixuntta ahu mBiibiliyani, sinninikhapelela wira nihiwokiwe ni sowiixuttiha sowootha. (Yohani 8:31, 32; 1 Yohani 4:1) Nave, vaavo nintepa ahu wiixutta ni ophenta ikeekhai iyo, vanoonikhweelaka weettela malamulo a Muluku aahiiso owara “yowara y’ayuma”. (Esalimo 111:7, 8; 1 Yohani 5:3) Nave-tho, wiiwexexa ikeekhai iyo, onoonikhaliherya waakiherya saana.​—1 Pedru 3:15.

5. Xeeni okathi wotheene nintthuneya ahu olavula ekeekhai?

⁵ Okhala wira ninnoona ikeekhai sa Nuulumo na Muluku okhala sootthuneya, ninniiwelela ele Biibiliya onihimya awe ni okathi wotheene ninnilavula ekeekhai. Wootha kapwitthi muulupale a Satana. Wootha onnimukumiherya maxakha nawoothe ni ale anikupali wootha iwo. (Yohani 8:44) Tivonto, hata nri ene anatampi, ninnimananiha ohootha. (aÉfeso 4:25) Eyo etthu yooxankiha. Abigail, orina iyaakha 18, onihimya so: “Olavula ekeekhai pooti oxankiha, otepexa wene akhala wira wootha vale, onoomwiiriha mutthu osyaka maxakha”. Nto xeeni okathi wotheene oniimananiha awe olavula ekeekhai? Abigail onihimya wira: “Olavula ekeekhai onnikiiriha okhalana yowuupuxerya ya murima yooloka vamaithoni va Yehova. Nave eyo enniwiiriha anamuyari aka ni apatthani aka okiroromela”. Victoria, orina iyaakha 23, onihimya so: “Vaavo munlavula anyu ekeekhai ni weettela sookupali sanyu, nyuwo pooti onyoholiwa. Masi nyuwo munniphwanya mareeliho ntoko ala: Munniroromeliwa, omwaattamela Yehova ni munnittittimihiwa ni ale anoophentani”. Niireke munnoona otthuneya waya okathi wotheene owara esintu “eri ekekhai”?

6, 7. Xeeni malamulo a xariya anlikanyihiwa aya ni yoowara ya yuuma?

⁶ Ikwaha sikina yoowara ya yuuma ya nakhotto, yaapakiwa mwa enamuna yaakhaliherya okela saana mmakhatani mwa nakhotto. Wira emukhweiheryeke weeteteya, ipetaaso iyo sa yuuma saanikhalana ikweeceryo wira sikweeciheriweke ni ikhwaaya. Okathi mukina, yoowara eyo yaanimukhoottiherya weeteteya, nto aahaana oweha akhala wira sookweecereya saana. Nave yoowara eyo, yaanikhapelela murima ni mipantta sikina sa erutthu wira ohihommwe ni mavaka, ikatana ni mattheere!

 ⁷ Malamulo a xariya a Yehova, annikhapelela ‘murima’ ahu aahiiso omutthu ahu wa muhina, ntoko yoowara ya yuuma. (Miruku 4:23). Nakhotto khaatthuneya oturuka yoowara awe ya yuuma yoolipa, onawara yoohilipa. Moolikanasa, nihikhala-khale nturukaka malamulo a Yehova voohimya sa ele eri yooloka, vano nnatthara ele nnoona ahu okhala yooloka. Maana khanrina osuwela onwerya okhapelela murima ahu. (Miruku 3:5, 6) Ti nthowa naya okathi wotheene, nintthuneya ahu oweha “yowara [ahu] y’ayuma”, wira noone akhala wira ennivikaniha okhapelela murima ahu.

8. Xeeni vanitthuneya ahu weettela malamulo a Yehova?

⁸ Niireke ikwaha sikina munoona wira malamulo a Yehova annookhoottiheryani otaphuwa aahiiso opaka ele muntthuna anyu? Daniel, orina iyaakha 21, onihimya so: “Maprusoore ni anaxikola akhwaaka, annikitheya mwaha woweettelaka malamulo a mBiibiliyani. Waahikhala okathi, kaavolonle aka mwaha woowi waamini waka waahivukuwa”. Vano Daniel onoonela sai? Owo onihimya so: “Muhoolo mwaya, kihoona oreera waya weettela malamulo a Yehova. Maana ‘apatthani’ aka akina yaahipacerya olya mirette soohapala; akina yaahihiya osoma. Vaari vooripiha murima woona moota okumi aya waahononeyale aya. Tthiri Yehova onninikhapelela”. Madison, orina iyaakha 15, onihimya wira: “Vannikivila weettela malamulo a Yehova mwaha woowi aximwali akhwaaka annikikhanyererya otthara ele anoona aya okhala yooloka ni yoohakalaliha”. Nto exeeni enipaka awe? Owo onihimya wira: “Etthu enikikhaliherya, wuupuwela wira ka namoona a Yehova ni wira, yoweeha enamuna Satana onirumeela awe wira okihapuxe. Vaavo kinxintta aka, kinnihakalala vanceene”.

9-11. (a) Ixapattho xeeni sa nthoonyeryo maKristau aniwara aya? (b) Exeeni enrowa onikhaliherya woona oreera naalaleeryaka?

⁹ Mmusome aÉfeso 6:15. Nakhotto ooRoma khaarowa owana ohiwanre ixapattho. Okhala wira esapala ya ixapattho saya yaaphitaanyiwa ikwaha tthaaru, nto saanilipa vanceene. Nave, okhala wira saanilipa vanceene, eyo yaanimwiiriha nakhotto okhala saana ni ohivulalihiwa.

¹⁰ Ixapattho sa anakhotto ooRoma saanaakhaliherya oxintta ekhotto, nave ixapattho sahu sa nthoonyeryo, sinninikhaliherya olaleya “ihapari sorera” sa murettele. (Yesaya 52:7; aRoma 10:15) Okathi mukina ontthuneya olipa murima vanceene wira nilaleerye. Bo, orina iyaakha 20, onihimya so: “Kaanoova waalaleerya anaxikola akhwaaka. Kinoona wira kuuliwa muru. Kuupuwelaka okathi ovinre, nkinsuwela etthu yaakiiriha wuuliwa muru. Vano kinnihakalala waalaleerya amiravo akhwaaka”.

¹¹ Amiravo anceene maKristau, annoona wira vannaakhweela olaleerya akhala wira ahiilokiherya vahinatthi. Munrowa  wiilokiherya sai? Julia, orina iyaakha 16, onihimya so: “Kinnikuxa iliivuru mmurupani mwaka, ni kinnaawiriyana anaxikola akhwaaka vaavo anihimya aya moonelo aya ni itthu ankupali aya. Nuumala-vo, kinnuupuwela etthu enrowa waakhaliherya. Okathi oniilokiherya aka vahinatthi, kinniwerya waaleela etthu enrowa waakhaliherya”. Makenzie, orina iyaakha 23, onihimya wira: “Akhala wira munnaareerela murima ni waawiriyana saana, munoowerya osuwela ele enaaxankiha amiravo akhwiinyu. Nave kinnimananiha osoma khula mwaha anlepeliwa amiravo. Nto, kinniwerya owooniherya mBiibiliyani aahiiso va jw.org ele enrowa waakhaliherya”. Wiilokiherya saana wira mwalaleerye, onlikana ni owara “ixapattho”.

12, 13. “Matthere [xeeni] a moro” Satana onirumeela awe?

¹² Mmusome aÉfeso 6:16. Nakhotto ooRoma aanikuxa nikula nuulupale nowiixaakihana. Nikula nno naanimukhuneela okhuma vatthirima mpakha mmakuthani. Nto eyo yaanimukhapelela wira ohivulalihiwe ni ikatana, mavaka ni mattheere.

 ¹³ Nto “matthere [xeeni] a moro” Satana okhanle awe oowoovonyeryani? Satana pooti omootherya Yehova ophavelaka woowokani. Satana oniphavela woowokani wira Yehova khonoophentani ni wira khuuvo oniwoonelani vatthu. Ida, orina iyaakha 19, onihimya wira: “Ikwaha sinceene kuupuwela wira khivaaweryaneya okhala Mpatthani a Yehova”. Exeeni emukhalihenrye oxintta muupuwelo owo? Owo onihimya wira: “Mithukumano sinnikhaliherya olipiha waamini waka. Karowa omuthukumanoni kaamukilaathi paahi, nkaakomentari kuupuwelaka wira khuuvo aarowa ophavela okiwiriyana. Vano kinnilokiherya mithukumano ni weererya okomentari ikwaha piili aahiiso tthaaru. Hata vavilaka, opaka eyo onnikikhaliha saana. Nave anna ni arokora annikilipiha vanceene. Nuumala mithukumano, kinnoona wira Yehova onnikiphenta”.

14. Yowiiraneya ya Ida enniixuttiha exeeni?

¹⁴ Nikula na nakhotto naapakiwa mwa enamuna emosa. Masi, ntoko noonale ahu ni yowiiraneya ya Ida, waamini wahu khoniira siiso. Waamini wahu pooti wunnuwa aahiiso ovukuwa, nave pooti olipa aahiiso otteettheya. Maana eyo enlipa ni hiyo. (Matheyo 14:31; 2 aTesalonika 1:3) Wira “nikula no wisakihana, ori wamini” nnikhapelele, nihaana ovikaniha olipiha ni wunnuwiha!

15, 16. Moota xeeni nlipelelo nahu ninlikana aya ni ekapaseeti?

¹⁵ Mmusome aÉfeso 6:17. Nakhotto ooRoma aaniwara ekapaseeti wira okhapelele muru, exiko ni owiitho wawe. Okhala wira ikapaseeti sikina saanikhalana mukhoyi, eyo yaanimwiiriha nakhotto okuxa mmatatani.

¹⁶ Ntoko siisaale ekapaseeti enikhapelela aya oramattha aahiiso ottoopare wa nakhotto, “wopowa” wahu onnikhapelela muupuwelo ahu. (1 aTesalonika 5:8; Miruku 3:21) Nlipelelo ninninikhaliherya owehexexa sooleiherya sa Muluku ni ohikhulumuwa mwaha wa mixankiho sahu. (Esalimo 27:1, 14; Miteko 24:15) Masi naphavela wira nlipelelo nahu nnikhapeleleke, nihaana okhala neekeekhai. Nave nihaana owara “ekapaseti” ahu ohiya okuxa mmatatani!

17, 18. (a) Exeeni Satana ekhanle awe oopaka wira nirule ekapaseeti ahu? (b) Ninrowa wooniherya sai wira khaniwokiwe ni Satana?

¹⁷ Exeeni Satana ekhanle awe oopaka wira nrule ekapaseeti ahu? Muupuwele ele aaphavela awe omwiiriha Yesu. Satana aanisuwela wira Yesu aamukhala mwene aapinaatamu. Masi, Yesu aahaana ohaawa mpakha wiiviwa ohinatthi okhala mwene. Nave aahaana olipelela mpakha okathi Yehova aarowa awe omukhaliha Mwene. Masi, Satana aahimweehererya Yesu onvahaka omwene mowaakuveya. Satana aahimuleiherya Yesu wira amukokhorela paahi, aamukhala mwene a olumwenku okathi ene yoole. (Luka 4:5-7) Nave oosuwela wira Yehova oonileiherya onivaha itthu sooloka elapo esya. Masi nihaana olipelela wiiraneya yooleiherya eyo. Nave ninnikumana mixankiho sinceene. Masi, Satana onnineehererya onleiheryaka okumi wooloka vano. Owo oniphavela wira nipweheke opuro woopacerya itthu sinnisivela, ohiya Omwene wa Muluku.—Matheyo 6:31-33.

¹⁸ Satana khowenrye waawoka amiravo anceene maKristau. Mwa ntakiheryo,  Kiana, orina iyaakha 20, onihimya wira: “Koosuwela wira Omwene wa Muluku paahi tonrowa omaliha mixankiho”. Moota xeeni nlipelelo nawe ninkhaliherya aya muupuwelo ni okumi awe? Ninnimukhaliherya wuupuwela wira itthu sa olumwenku ola sinoovira. Nto ohiya oviriha okathi awe ottharaka elapo ela, Kiana onnirumeela okathi ni ikuru sawe wira omukokhoreleke Yehova.

19, 20. Ninrowa orumeela sai oratteene Nuulumo na Muluku?

¹⁹ Anakhotto ooRoma yaanirumeela ikatana. Nto ikatana iyo saarina erakamelo ya nimeya na emeeturu. Anakhotto awo yaanisuwela saana orumeela ikatana mwaha woowi khula nihiku yaaniina nikuruta.

²⁰ Murummwa Paulo oolikanyiha Nuulumo na Muluku ni ekatana. Yehova oonivaha nuulumo nawe. Masi nihaana wiixutta moota woorumeela saana wira naakiherye waamini wahu ni olokiherya muupuwelo ahu. (2 aKorinto 10:4, 5; 2 Timótheyo 2:15) Ninrowa wiilokiherya sai? Sebastian, orina iyaakha 21, onihimya wira: “Khula ekapiitulu kinsoma aka mBiibiliyani, kinnilepa eversu emosa. Kookhalana elista ya iversu sookisivela”. Eyo ennimukhaliherya osuwela muupuwelo wa Yehova. Daniel onincererya so: “Vaavo kimmusoma aka Biibiliya, kinnilepa iversu kinoona aka wira sinimwaakhaliherya atthu kinaalaleerya aka. Kinnoona wira atthu awo anneemererya vaavo anoona aya wira ennikisivela ele Biibiliya eniixuttiha awe ni kinnipaka eniwerya aka wira kaakhaliherye”.

21. Xeeni nihintthuneya ahu omoova Satana ni malaikha awe ootakhala?

²¹ Mwaha ola, nihiixutta matakiheryo a amiravo anooniherya wira khanintthuneya omoova Satana ni malaikha awe ootakhala. Ekeekhai wira awo aakhalana owerya, masi owerya waya khoninvikana Yehova. Nave awo khanrowa okhalaka mahiku otheene. Maana anrowa otthukweliwa, nto khanrowa okhalana owerya woowaahapuxa atthu okathi wa Eyaakha Ekonto Emosa ya Olamulelo wa Kristu. Nuumala-vo, anrowa opwetexiwa. (Wisupulula 20:1-3, 7-10) Hiyo ninnimusuwela nwanani ihu, olavilavi awe, ni yoolakela awe. Masi nikhaliheriwaka ni Yehova nnoowerya omukhootta Satana!