Bebe aahipatthana vanceene ni apapawe. Masu awo ahinliyaleya, yaalavuliwe ni mpatthani a emusi ele. Masi ohiya omulipiha Bebe, masu awo yaaroomutepiha wunla. Owo onihimya so: “Okhwa wa apaapa khokiphwanyinhe mureerelo”. Muhoolo mwaya, Bebe aahilepa eliivuru yeeyo yooniherya wira nlelo aahiriipiwa murima.

Moolikanasa ni Bebe, mutthu okhweliwe pooti oviriha okathi munceene wira oliyale oriipiwa murima, vanceenexa akhala wira aahipatthana ni namukhwa ole. Biibiliya onihimya wira okhwa “nwanani onrowa okiserya pwetexiwa”. (1 aKorinto 15:26) Okhwa onnikhumela voohihiyererya ni onnipwetexa ikumi sahu. Ikwaha sinceene, okhwa onikhumela mootutuxerya, ni onninaakha ale yaaphenta ahu. Khuuvo onwerya otthyawa okhwa. Ti maana aya ninxanka ahu okathi ninkhweliwa ahu ni ohisuwela yoopaka voohimya sa mwaha owo ni sookhumelela saya.

Waaniheryasa nyuwo pooti wiikohaka so: ‘Mutthu oriipiweke murima mpakha mahiku makavi? Ninrowa owerya sai oxintta oriipiwa murima? Ninrowa waakhaliherya sai atthu aninla mwaha wookhweliwa? Niireke ale akhwiiye aakhalana yoolipelela?’