Vanihimmwa wira othunku, “ti owerya ohimya etthu emwiiranenle mutthu mukina nilavulaka moomoriha ikharari, ntoko wira etthu eyo enikhumelenle hiyo”. Musomi onitokosa iretta sa mmuupuweloni, Dr.  Rick Hanson, ohimmye wira “othunku, mukhalelo oniyaraniwa ahu”.

MUTHOKORERYE ELA: Xeeni ninwerya ahu wooniherya mukhalelo owo ohinooniheriwa ni soopattuxiwa sikina? Biibiliya onihimya wira Muluku aapattunxe apinaatamu ailikanyihaka mmansawe. (Maphattuwelo 1:26) Muluku aapattunxe apinaatamu ailikanyihaka mmansawe mwa enamuna yoowi ninniwerya wooniherya mikhalelo sawe sooloka. Vaavo othunku oniwiiriha aya atthu othokoreryana saana ni okhaliheryana, awo anitakiha mukhalelo wa Mpattuxa aya, Yehova Muluku.​—Miruku 14:31.

Muluku onninoonela othunku ni khonimusivela oniweha nihaawaka. Aahimyaka aIsarayeli a khalai yaawo yaahaaxiwe vanceene wEjiitu nuumala-vo khuviriha iyaakha 40 ehaawaka moothakoni, Biibiliya onihimya so: “Moovelavelani mwaya motheene Muluku aaniriipiwa murima”. (Yesaya 63:9, NM) Muluku khahiyo paahi aariipiwa murima, masi-tho vaaninwereya. Owo aahimmye so: “Ale anahaxa atthu aka, annikiveha yomi ene”. (Zakariya 2:13) Okathi atthu akina anniirela aya etthu yoonanara, nave Owo onnoona owereya.

Biibiliya onnilipiherya wira hata murima ahu oniphukelaka, wala nuupuwelaka wira Muluku khonnoonela vatthu, nikupaliki wira “Muluku ti mulupale ovikana murim’ahu: owo onnisuwela sothene”. (1 Yohani 3:19, 20) Muluku onninisuwela saana, onnisuwela makhalelo ahu, ni miyuupuwelo sahu onivikana hiyo mmansihu. Owo onninoonela othunku.

 Biibiliya onninlipiherya wira:

• “Mwavekelaka Apwiya, awo anowiwani: mwakhuwelelaka w’Apwiya, anowakhulani vohipisa”.​—YESAYA 58:9.

• “Miyo kinnisuwela entthunaka owirelani. Kinimophwanyihani murettele, ohiya otakhaliwa. Miyo k’Apwiya: nkinotha! Kinimovahani oholo wororomeleya. Nyuwo munokhuwelela wa miyo, mukiphavelaka: munokilompa, vano miyo kinimowiriyanani”.​—YEREMIYA 29:11, 12.

• “Nyuwo mosuwela otthyawatthyawa waka wothene: mùpuwele maithori aka othene, elempwe mano mulivuruni mwanyu”.​—ESALIMO 56:9.

Tthiri osuwela wira Muluku onninoonela othunku, onninikhaliherya ovilela okathi wa mixankiho! Nrowe nithokorerye yowiiraneya ya Maria:

Owo ohimmye so: “Nuumala mwanaka oopacerya a iyaakha 18 oviriha iyaakha piili owereiwaka kanser, ni mooriipiha murima okhwa, vaahikiwereya vanceene ni kaahipacerya wuupuwela wira okumi waari woohixariya. Kaahinanariwa vanceene ni Yehova mwaha woohimpenuxa mwanaka!”

“Sivinre ene iyaakha 6, kaahivaanela ni mwaapara aka mmosa a mmulokoni ni kaahimuleela etthu kuupuwela aka. Kaahimuleela wira okhwa wa mwanaka waanikiiriha wuupuwela wira Yehova khaakiphenta. Nuumala okiwiriyana mwa okathi munceene moohikikwasa masu, murokora ole aahiromola yoolepa emosa. Aari 1 Yohani 3:19, 20, yoowo onihimya wira: ‘Muluku ti mulupale ovikana murim’ahu: owo onnisuwela sothene’. Aahikooniherya wira Yehova onnisuwela ni onniweha mixankiho sahu sotheene”.

“Hata vari siiso, khahiyo vaari vookhweya omaliha onanariwa waka! Nuumala-vo, kaahisoma Esalimo 94:19, yeeyo enihimya wira: ‘Ovelavela n’uxanka wahìniha murim’aka: vano nyuwo mokihakalaliha, khukitteliha murima’. Moolumo a eveersu ele yaahikivara murima vanceene! Vakhaani-vakhaani, murima aka waanikhala saana ni kaahikhala oolikaneene wira kimuleele Yehova mixankiho saka, maana kaanisuwela wira owo aanikiwiriyana ni aanisuwela itthu saakixankiha”.

Ti voolipiha vanceene osuwela wira Muluku onnisuwela muupuwelo ahu ni onninikhaliherya! Nto xeeni ohaawa wuulanne aya moolumwenkuni? Niireke ninhaawa mwaha wa etthu yoohiloka ninvara ahu? Niireke Muluku onoopaka etthu wira omalihe ohaawa wotheene? Makoho ala anrowa waakhuliwa myaha sinittharelana.